1. Ɛgɛnyá nɛ alɔ bi le jé kpɔcii ku alɔ lā ɛpleeko “nɛ̄ ɛcɛ gáā mɛ ā”?

É MA uwɔ igbihi ku ihayi ku 1914 nɛɛ? Ó lɛ a, a lā ɛjɛɛji oyeeyi ku uwɔ ɛpleeko “nɛ̄ ɛcɛ gáā mɛ ā.” (2 Utím. 3:1) Ɛjɛɛji alɔ gē po ɛgɛ nɛ akacɛ ku Ujisɔsi lɛyikwu eko ku alɔ nyā yɔ i ya jila a. Aɔdā bɛɛka ɛfú ō kpo, ɔkpɛta, ajɛ ō jiliye klla hɛ wulu, ōcē obɔbi ɛyɛɛyɛyi ō tu ɛga alɛwa, ɔbiipu ō nyila, mɛmla ō ya ŋmo ku ācɛ nōo gē gba Ujehofa ɛ̄gbā a. (Umát. 24:3, 7-9, 12; Ulúk. 21:10-12) Alɔ klla yɔ i má ɛgɛ nɛ ācɛ gē ya uce ɛgɛ nɛ Upɔlu ka ipu akacɛ ku nu a yiili. (Má ikpati nōo ka kahinii: “ Uce Ō Ya Ku Ācɛ Babanya.”) Alɔ nōo wɛ Ācɛ Ocijali Ku Ujehofa a jé kpɔcii ku alɔ lā ɛpleeko “nɛ̄ ɛcɛ gáā mɛ ā.”

2. Ɔka ɛpa nyá nɛ alɔ cika ō jé ohi ku uwa a?

² Abɔ eko alɛwa le yɛ ŋmiifi ihayi ku 1914 ɛ ma, ó teyi peee ka ɛpleeko “nɛ̄ ɛcɛ gáā mɛ ā” le ba ajaajɛ ɛ. Abɔ ó le ba ɛ ma a, alɔ cika ō jé ohi ku aɔka ōhī nōo cɛgbá nɛhi: Ɔdi wɛ ɔdā nōo géē ya oŋmɛyi ku eko “nɛ̄ ɛcɛ gáā mɛ ā”? Ɔdi nɛ Ujehofa kē dɔka ku alɔ ya abɔ alɔ yɔ i gbeyi ku aɔdā nōo ba nyā a kóō ya a?

3. Oŋma akacɛ nōo yɔ ipu ɔkpá ku 1 Ācɛ Utesaloníka 5:1-3 a, ɔdi wɛ ɛlā nɛ aewo a géē ka tɛɛcɛ a?

³ Jé 1 Ācɛ Utesaloníka 5:1-4. Upɔlu kɛla lɛyikwu “ɛci kú Ɔwɔicō [Ujehofa].” Ɛ̄cī ku Ujehofa néē ka ipu ɛgɛ ku Ubáyíbu ɔɔma, lɛ ō ya mla ɛpleeko néē géē gbɔɔ ō kpo ɛfú ta “Ubábīlɔn Nɛ̄hi” nōo kwɛyi ku ɔwa ku ɛjɛɛji ɔwɛ ō gba ɛ̄gbā ku ɛkɛmgbɛ a. Ɛ̄cī ɔɔma géē ŋmɛyi eko ku Amagɛdɔn. (Mafú 16:14, 16; 17:5) Gbɔbu ɛɛ ku “ɛci” ɔɔma kóō gbɔɔ, aéwo a géē ka tɛɛcɛ ka “ɔdā dóódu í je unwalu lɛ alɔ gɛ ŋ́, alɔ kē bá ɛbɔ́!” Aotrɛyi ku ɛcɛ nyā  gē ka ɛdɔ ɛlā ɛgɛnyā eko duuma néē gē kɛla lɛyikwu ō ya ku ɛbɔ kóō yɔ ɔtahɛ ku aéwo. * Amáŋ, ɛgɛ nɛ Ubáyíbu mafu ka ɛlā ō ka tɛɛcɛ ɔɔma gáā lɛ a géē wɛ ɛyɛɛyi. Ɔdiya a? Eko néē gbɔɔ ō kɛla ɔɔma tɛɛcɛ, ācɛ alɛwa géē yɔ i gbɛla ka aotrɛyi ku ɛcɛ nyā lɛ ɔ ya ku alɔ ba ɛdɔ ɔkwɔɔkwɛyi ɛ. Amáŋ ɔkwɛyi a kē wɛ kahinii “ōwē nɛ̄hi” géē gbɔɔ, cɛɛ, “igbɛ ékpónú ífi nɛ̄ɛ̄nɛ̄hi géē wā.”—Umát. 24:21.

4. (a) Ɔdi nɛ alɔ i jé ŋ lɛyikwu ɛlā ō ka tɛɛcɛ nōo ka “ɔdā dóódu í je unwalu lɛ alɔ gɛ ŋ́, alɔ kē bá ɛbɔ́” a? (b) Ɔdi nɛ alɔ kē jé lɛyikwu ɔ a?

⁴ Ó lɛ aɔdā ōhī nɛ alɔ jé lɛyikwu ɛlā ɔɔma néē géē ka tɛɛcɛ a. Amáŋ, ó kē lɛ aɔdā ōhī nɛ alɔ i jé ŋ. Alɔ i jé ɔdā nōo géē ya gbɔbu ɛɛ nɛ aotrɛyi ku ɛcɛ nyā géē kɛla ɔɔma tɛɛcɛ ŋ, alɔ i kē jé ɛgɛ néē gáā bi le ka ɔ a ŋ. Alɔ i jé ɔdaŋ ka é géē ka ɔ igbo éyi amāŋ ka é géē yɔ i ka ɔ igbalɛwa ŋ. Amáŋ, oduuma nōó wɛ, ɔdā nɛ alɔ jé a yɔ a: Alɔ i gáā gbɔɔ ō gbɛla ku aotrɛyi ku ɛcɛ nyā géē ya ku ɛbɔ kóō yɔ ipu ɛcɛ nyā ŋ. Ikɔkɔ ɔɔma, alɔ géē jé ka ɛlā ō ka tɛɛcɛ nɛ Ubáyíbu da alɔ ku alɔ leyi kwɛɛcɛ ku nu a yɔ abɔɔ a. Ó wɛ ɔdā ocabɔ nōo géē mafu ka “ɛci kú Ɔwɔicō” gáā gbɔɔ ɛ!

5. Ɔdi nɛ ɔkpá ku 1 Ācɛ Utesaloníka 5:4-6 ka ku alɔ cika ō ya, o ya ɛɛ ku alɔ lɛ iyi alɔ tutu lɛyikwu “ɛci kú Ɔwɔicō” a?

⁵ Jé 1 Ācɛ Utesaloníka 5:4-6. Upɔlu da alɔ ɔdā nɛ alɔ cika ō ya, o ya ɛɛ ku alɔ lɛ iyi alɔ tutu lɛyikwu “ɛci kú Ɔwɔicō” a. Ó ka alɔ kóō “híīī yɔ̄ ī gbɔlā icííci bɛ̄ɛka ācɛ nēé wɛ ācɔ̄lóhɔ́nyɛtá ŋ́ mā ŋ́.” Amáŋ, alɔ cika ō “leyī kwɛcɛ.” Ocabɔ mafu, alɔ cika ō leyi kwɛɛcɛ, o ya ɛɛ ku alɔ kóō hii lɛ abɔ ipu ɛlā imeli ku ɛcɛ nyā amāŋ ɛfú ō kpo ŋ. Ɔdaŋ ku alɔ gbɔɔ ō lɛ abɔ ipu uwa, ó géē ya ku alɔ kwu piya “ákú ɛcɛ ā.” (Ujɔ́n. 15:19) Alɔ jé kpɔcii ku Ajɔɔcɛ ku Ɔwɔico foofunu gáā ya ku ɛbɔ kóō yɔ ipu ɛcɛ nyā gla a.

6. Ɔdi nɛ alɔ dɔka ō ta ācɛ ɔhá abɔ kéē ya a, ɔdiya nɛ alɔ kē dɔka ō ta uwa abɔ a?

⁶ Alɔ i cika ō ya ku alɔ ofoofu alɔ kóō leyi kwɛɛcɛ ŋ, amáŋ alɔ cika ō ya ku ācɛ ɔhá kéē leyi kwɛɛcɛ duu. Alɔ géē ya ɛnyā ɔdaŋ ku alɔ gē ta ācɛ ɔhá abɔ kéē nwu ɛlā nɛ Ubáyíbu kacɛ ku ó géē ya ipu ɛcɛ ku alɔ nyā. Alɔ cika ō yɔ i ta uwa abɔ babanya, ohigbu ka ɔdaŋ ku alɔ i ya lɛ a ŋ, eko duuma nɛ eko ku owe nɛhi a gbɔɔ, ɛga duuma i gáā yɔ lɛ uwa kéē wa i gba Ujehofa ɛ̄gbā gɛ ŋ. Ɔdā nōo ya nɛ uklɔ ku ɔna ō ta ku alɔ cɛgbá nɛɛnɛhi icɛ yɔ abɔɔ a! *

7. Ɔdi nɛ Ujehofa dɔka ku alɔ ya babanya a?

⁷ Eko kpii nyā nōo hile gbɔbu ɛɛ ku “ɛci kú Ɔwɔicō” kóō gbɔɔ a, Ujehofa dɔka ku alɔ bēē yuklɔ ku ɔna ō ta a lɔfu lɔfu. Alɔ cika ō “lɛ abɔ̄ bī odée [alɛwa] yɔ̄ gē yá ipú úklɔ́ nɛ̄ [alɔ] gē yá lɛ Óndú ā.” (1 Ukɔ́r. 15:58) Ujisɔsi lɛ  ɔdā nɛ alɔ géē ya a ka taajɛ gbɔbu ɛ. Eko nɛ ó yɔ i kɛla lɛyikwu aɔdā nōo géē ya ɛpleeko nɛ ɛcɛ gáā mɛ a, ó kɛla ɔhá ta ɔ kahinii: “É géē tɔ́ɔna kú Ɔkōolɔhi ā lɛ odúúdu éwo dóódu kú ipú ɛcɛ nyā.” (Umák. 13:4, 8, 10; Umát. 24:14) Gbeyi ɛ o, gbɛla tu ɔ ka a, ɔɔma le ka eko duuma nɛ a bɛɛcɛ nyɔ i tɔɔna, a yɔ i tabɔ ō ya ku akacɛ ɔɔma kóō le ya jila.

8. Ɛgɛnyá nɛ alɔ bi le jé ka uklɔ ku ɔna ō ta a yɔ i jɛ gɔbu a?

⁸ Ɔdi nɛ alɔ lɔfu ka lɛyikwu ō jɛ gɔbu ku uklɔ ku ɔna ō ta a? Ihayi doodu, ācɛ alɛwa gē po ɔkoolɔhi lɛyikwu Ajɔɔcɛ a tōōtɔ̄ɔ̄. Ocabɔ mafu, gbɛla lɛyikwu ɛgɛ nɛ aluka ku ācɛ ō tɔɔna lɛyikwu Ajɔɔcɛ a yɔ i nwune tōōtɔ̄ɔ̄ ɛpleeko amoomɛ nyā ɛ. Ipu ihayi ku 1914, aluka ku ācɛ ō tɔɔna ipu ajɛ ofu ɛpa ce ɛta (43), wɛ ācɛ ula igwo ɛpa ce ofu igwo ahaapa ce igwo ɛhɔ (5,155). Amáŋ icɛ, aluka ku uwa wɛ umiliyɔn ahata ce (8.5), ipu ajɛ ofu igwo ɛpa ce igwo (240)! Naana a, uklɔ ku alɔ i mɛ ɛ nóó. Alɔ cika ō gɔbu yɔ i da ācɛ ku Ajɔɔcɛ ku Ɔwɔico foofunu gáā ya ku unwalu ku alɔ kóō mɛ gla a.—Aíjē 145:11-13.

9. Ɔdiya nɛ alɔ cika ō yɔ i tɔɔna lɛyikwu ɔkoolɔhi a gɔbu a?

⁹ Uklɔ ō yɔ i tɔɔna lɛyikwu Ajɔɔcɛ ku Ɔwɔico i gáā mɛ ŋ jaa gbeeko nɛ Ujehofa le da alɔ ka ɛ̄nɛ̄ alɔ ya a jɛ ɛ. Ihayi ɛmula hile lɛ ācɛ kéē wa gáā jé Ujehofa mɛmla Ujisɔsi kpɔ ɛ ma? (Ujɔ́n. 17:3) Alɔ i jé nóó. Amáŋ alɔ jé ka eko yɔ, oŋma obabanya jaa gā ta eko nɛ owe nɛhi a géē gbɔɔ, lɛ ɔcɛ duuma “nēé fu kéē lɛ oyēeyī opiyóó ā” kóō miyɛ ɔkoolɔhi a klla cɛ ō wa gáā gba Ujehofa ɛ̄gbā. (Ācot. 13:48) Ɛgɛnyá nɛ alɔ gáā ta ācɛ nōo ba nyā abɔ babanya gbɔbu ɛɛ ku eko ku owe nɛhi a kóō gbɔɔ a?

10. Otabɔ nyá nɛ Ujehofa yɔ i je lɛ alɔ o ya ɛɛ ku alɔ lɔfu nwu ācɛ ɛlā ɔkwɛyi a?

¹⁰ Ujehofa yɔ i bi ɔwa ku nu le je aɔdā nɛ alɔ cɛgbá ō bi le nwu ācɛ ɛlā ɔkwɛyi a lɛ alɔ. Ocabɔ mafu, ipu alaadi doodu, alɔ gē nwu ɛlā ŋma ōjila nɛ alɔ gē lɛ ɔtahɛ ku alaadi a. Ōjila ɔɔma gē ta alɔ abɔ ku alɔ jé ɛlā nɛ alɔ géē ka eko aflɛyi nɛ alɔ má ācɛ mla eko nɛ alɔ ya ocigbihi a. Ó klla gē nwu alɔ ɛgɛ nɛ alɔ géē bēē ya oklɔcɛ ku Ubáyíbu mla ācɛ. Ɔwa ku Ujehofa klla gē ya aɔdā nɛ alɔ lɛ nōo yɔ ipu Aɔdā Okpɔcii Nɛ Alɔ Gē Bi Le Nwu Ācɛ Ɛlā a. Aɔdā okpɔcii nyā gē ta alɔ abɔ ku alɔ . . .

• gbɔɔ ɛlā ō ka mla ācɛ,

• kɛla ku alɔ ɔwɛ nōó géē he ācɛ ɔtu,

• ta ācɛ abɔ kéē nwu ɛlā lɛyikwu Ubáyíbu tōōtɔ̄ɔ̄,

•   nwu ɛlā ɔkwɛyi eko nɛ alɔ gē ya oklɔcɛ mla ācɛ, mla ō

• da ācɛ nɛ ɛlā ku alɔ he uwa ɔtu a kéē nyɔ gā uwɛbsaiti ku alɔ mɛmla ō hi uwa igwú wa Agbla Ku Ajɔɔcɛ ku alɔ.

Aku ɔkwɛyi a, ó wɛ ō lɛ aɔdā nɛ alɔ gē bi le nwu ācɛ ɛlā anca ŋ. Amáŋ alɔ cika ō bi uwa le yuklɔ. * Ocabɔ mafu, ɔdaŋ ku alɔ lɛ ɛlā Ɔwɔico ka lɛ ɔcɛ nɛ ɛlā a he ɔ ɔtu, nɛ a lɛ ɔkpá ku alɔ éyi je lɛ ɔ, ó géē yɔ i jé ɔkpá a jaa gbeeko nɛ a géē má ɔ kpɔ. Ō tɔɔna lɔfu lɔfu, wɛ uklɔ nɛ ɔnyɔɔnyɛ ku alɔ lɛ ō ya ipu ɔya doodu.

11. Ɔdiya nɛ ɔwa ku alɔ ya Online Bible Study Lessons ipu uwɛbsaiti ku alɔ a?

¹¹ Ɔdā ɔhá nɛ Ujehofa gē bi le ta ācɛ abɔ kéē gáā jé ɛlā ɔkwɛyi a wɛ Online Bible Study Lessons nōo yɔ ipu jw.org a. Ɔdiya néē ya ɔ a? Ipu ɔya doodu, ācɛ alɛwa nōo yɔ ɛga doodu ipu oduudu ɛcɛ a gē jila ipu intanɛt kéē má aɛlā ō nwu ku Ubáyíbu. Aɛlā ō nwu nōo yɔ ipu uwɛbsaiti ku alɔ a lɔfu ta ācɛ nōo ba nyā abɔ kéē gbɔɔ ō nwu ɛlā ɔkwɛyi nōo yɔ ipu Ubáyíbu a. Ó lɛ ācɛ ōhī nɛ alɔ gē kɛla lɛ uwa nōó gē dɔka ku alɔ cigbihi gáā ya oklɔcɛ mla uwa ŋ. Ó lɛ a, mafu aya nyā lɛ uwa ipu uwɛbsaiti ku alɔ. Ɔdaŋ ka ó tɔɔtɛ, a lɔfu da uwa lɛyikwu ɛgɛ néē géē má aɛlā ō nwu a ipu uce nōo he uwa ɔtu a. *

12. Ɔdi nɛ ɔcɛ lɔfu nwu ŋma Online Bible Study Lessons a?

¹² Online Bible Study Lessons ku alɔ a gē kɛla lɛyikwu aikpɛyi ɛlā nyā: “The Bible and Its Author,” “The Bible’s Main Characters,” and “The Bible’s Message of Hope.” Ɔdaŋ ka ɔcɛ gē klɔcɛ ku aikpɛyi ɛlā nyā, ó géē nwu:

• Ɛgɛ nɛ Ubáyíbu lɔfu ta ɔcɛ abɔ

• Ɔnyɛ nɛ Ujehofa, Ujisɔsi, mla aalelekwu otɛhɔ ku Ɔwɔico wɛ a

• Ɔdā nōo ya ɛɛ nɛ Ɔwɔico ya alɛɛcɛ a

• Ɔdā nōo ya nɛ alɔ yɔ i má owe mla aɔdobɔbi a

Aɛlā ō nwu a klla kɛla lɛyikwu ɛgɛ nɛ Ujehofa géē . . .

• ya ku owe mɛmla ikwū kóō yɔ gɛ ŋ,

• je ācɛ nōo kwū a heyi ŋma ɔlekwu, mla

• ɛgɛ nɛ ó géē bi Ajɔɔcɛ ku nu lɛ aigɔmɛnti ku ɛcɛ nyā cataajɛ a.

13. Ɔdaŋ ka ɔcɛ lɛ aɛlā ō nwu nōo yɔ ipu uwɛbsaiti ku alɔ a jé kwɛyi, ó géē cɛgbá ku Ɔcɛ Ocijali Ku Ujehofa kóō ya oklɔcɛ ku Ubáyíbu mla ɔ kpɔ ɛ? Lɛ ɛlā a teyi peee.

¹³ Aɛlā ō nwu nyā nōo yɔ ipu intanɛti a i gáā kwɛyi oklɔcɛ ku Ubáyíbu ō ya mla ācɛ nóó. Ujisɔsi lɛ ɛnɛɛnɛ uklɔ ō nyɔ gáā lɛ ācɛ piya ayikpo ku nu a je lɛ alɔ ɛ. Amáŋ alɔ ya aɛlā ō nwu a ku ācɛ nɛ ɛlā ku Ujehofa he uwa ɔtu a kéē jé ɔ, ku ɛlā néē jé a kóō lɛ abɔ kwu uwa ɔtu, cɛɛ, kéē dɔka ō nwu ɛlā tōōtɔ̄ɔ̄. Ó kē i lɔfu ya kéē cɛ ō ya oklɔcɛ ku Ubáyíbu. Oŋmɛyi ku ɛlā ō nwu duuma, ó lɛ ɔdā néē ta ɛhaajɛ nōo yɔ i da ɔcɛ nōo yɔ i jé ɔ a ɔka, ɔdaŋ ka ó géē dɔka ku ɔcɛ éyi kóō wa gáā klɔcɛ ku Ubáyíbu mɛmla ɔ. Ɛ̄cī doodu, ɔwa ku alɔ gē miyɛ ohi nōo fiyɛ ofu igwoleyi ce igwo (230) ipu uwɛbsaiti ku alɔ ŋma ɛgiyi ācɛ ɛga ɛyɛɛyɛyi ipu oduudu ɛcɛ nōo dɔka ku alɔ wa i klɔcɛ ku Ubáyíbu mɛmla uwa! Ō yɔ i ya oklɔcɛ ku Ubáyíbu mla ɔcɛ eyī caa cɛgbá nɛɛnɛhi!

14. Oŋma ɔdā nɛ Ujisɔsi da alɔ ku alɔ ya ipu Umátiyu 28:19, 20 a, ɔdi nɛ alɔ gē ceyitikwu ku alɔ ya a, ɔdiya nɛ alɔ kē i ya lɛ a?

¹⁴ Jé Umátiyu 28:19, 20. Abɔ alɔ gē ya oklɔcɛ ku Ubáyíbu mla ācɛ a, alɔ cika ō  ceyitikwu “yá kéē le pīya ayíkpó kú [Ujisɔsi]” klla ‘nwū uwā kéē yá ɔdā dóódu nɛ̄ ó ka ā.’ Alɔ cika ō ta ācɛ abɔ kéē má ɛgɛ nɛ ó cɛgbá nɛhi kéē miya ō gáā gba Ujehofa ɛ̄gbā a. Ɛnyā mafu ku alɔ cika ō ta ācɛ ɔtu kwu ɔtu kéē bi aɛlā néē yɔ i nwu a le yuklɔ ipu oyeeyi ku uwa, kéē lɛ oyeeyi ku uwa gwɛɛya lɛ Ujehofa klla gáā lɛ ubatisim ya. Ō ya ɛnyā foofunu gáā ya kéē wi amāŋ lɛ onyata ɛ̄cī ku Ujehofa a.—1 Upít. 3:21.

15. Ɔdi nɛ alɔ i lɛ eko ō ya ŋ ma, ɔdi kē ya a?

¹⁵ Ɛgɛ nɛ alɔ ka gbɔbu a, eko nōó hile oŋma obabanya gáā ta eko nɛ ɛcɛ obɔbi nyā gáā mɛ a i nwune lɛ a gɛ nóó. Ohigbu ɛnyā, alɔ i le eko ō yɔ i ya oklɔcɛ ku Ubáyíbu mɛmla ācɛ nōó gē ya opiyabɔ ipu oyeeyi ku uwa nōo géē mafu ka é dɔka ō gba Ujehofa ɛ̄gbā ŋ. (1 Ukɔ́r. 9:26) Uklɔ ku alɔ cɛgbá nɛɛnɛhi! Abɔ eko yɔ ɛ ma, ó lɛ ācɛ alɛwa nōo cika ō po ɔkoolɔhi lɛyikwu Ajɔɔcɛ kpɔ ɛ.

16. Oŋma ɛlā nōo yɔ ipu Ɔdā Nēé Mafú Lɛ Ujɔ́ni 18:2, 4, 5, 8, ɔdi nɛ ɛjɛɛji alɔ cika ō ya a? (Má ɛlā néē ta ahaajɛ a.)

¹⁶ Jé Ɔdā Nēé Mafú Lɛ Ujɔ́ni 18:2, 4, 5, 8. Ɔgba nyā mafu ɔdā ɔhá nɛ Ujehofa cɛgbá ŋma ɛgiyi ācɛ nōo gē gba ɔ ɛ̄gbā a. Ɛjɛɛji Ācɛ O Yɛce Ukraist ɔkwɛyi cika ō leyi kwɛɛcɛ gɛɛ, o ya ɛɛ kéē hii lɛ abɔ ipu ɔdā duuma nōo lɛ ō ya mla ɛ̄gbā ō gba ku ɛkɛmgbɛ ŋ. Gbɔbu ɛɛ ku ɔcɛ nōo gē klɔcɛ ku Ubáyíbu kóō gáā jé ɛlā ɔkwɛyi a, ó lɔfu wɛ ipu ɔwɛ ku ɛ̄gbā ō gba ku ɛkɛmgbɛ éyi. Ó lɔfu yɔ i gā ōjila ku uwa klla gē ya aɔdā ōhī néē gē ya a duu. Ó kóō lɔfu gē je ije ya ɔwa ɛgɔɔma ɛhi. Amáŋ, gbɔbu ɛɛ ku ɔcɛ ɛgɔɔma kóō cika jɛ ō wɛ ɔcɛ ō tɔɔna nōó ya ubatisim ɛ ŋ (unbaptized publisher), ó cika ō lɛ abɔ ci ɛma duuma nɛ ó lɛ mla ɛ̄gbā ō gba ku ɛkɛmgbɛ. Ó cika ō lɛ uleta ta gē lɛ icɔɔci nɛ ó gē nyɔ gbɔbu amāŋ gē lɛ ɔwa duuma nɛ ó yɔ ipu nu nōo lɛ abɔ ipu ɛ̄gbā ō gba ku ɛkɛmgbɛ, cɛɛ kóō le da uwa ipu uleta a ka anuɔ i wɛ ipu uwa gɛ ŋ. *

17. Ɛdɔ uklɔ nyá nɛ Ɔcɛ O Yɛce Ukraist ɔkwɛyi i cika ō ya ŋ ma, ɔdi kē ya a?

¹⁷ Ɔcɛ O Yɛce Ukraist ɔkwɛyi cika ō leyi kwɛɛcɛ, o ya ɛɛ ku uklɔ duuma nōo i ya a kóō hii tɛɛma kwu ɛ̄gbā ō gba ku ɛkɛmgbɛ ŋ. (2 Ukɔ́r. 6:14-17) Ocabɔ mafu, ó cika ō yuklɔ duuma ipu icɔɔci ŋ. Ɔcɛ O Yɛce Ukraist ɔkwɛyi nōo gē yuklɔ lɛ ɔcɛ ɔhá i cika ō yuklɔ nwune nwune ipu inu amāŋ agbla duuma nɛ ācɛ ō gba ɛ̄gbā ɛkɛmgbɛ gē gba ɛ̄gbā ipu nu ŋ. Ɔdaŋ ka ó kē lɛ uklɔ ku abɔyi nu, ó cika ō yɔ i dɔka uklɔ amāŋ miyɛ uklɔ duuma nōo tɛɛma kwu ɛ̄gbā ō gba ku ɛkɛmgbɛ ŋ. Ɔdiya  nɛ alɔ i gē bi ɛdɔ ɛlā ɛgɛnyā le hija ŋ ma? Ohigbu ku alɔ i dɔka ō lɛ abɔ ipu ɛlā ō nwu ku ɛkɛmgbɛ amāŋ uce obɔbi ō ya ku ācɛ ō gba ɛ̄gbā ɛkɛmgbɛ nōo wɛ ɔdeelihɔ ɛgiyi Ujehofa ŋ.—Ayis. 52:11. *

18. Ɛgɛnyá nɛ ɔyinɛ alɔ nɔnyilɔ éyi yɛce ukɔ́ ku Ubáyíbu lɛyikwu uklɔ ku nu a?

¹⁸ Ihayi alɛwa nōo gáā yɛ a, icɔɔci éyi je uklɔ lɛ adā éyi kóō ya, anu nɛ adā gáā ta ɔyinɛ alɔ nɔnyilɔ éyi nōo wɛ ɔcɛ ō gba ɔcí, nōo lā ipu igeli ɔɔma kóō gáā lɛ uklɔ ligii éyi ya lɛ ɔ ipu icɔɔci a a. Adā a jé ka ɔyinɛ alɔ nɔnyilɔ a gē ka ka anuɔ i gē yuklɔ ipu icɔɔci ŋ. Amáŋ ɛ̄cī ɔɔma ó cɛgbá ɔcɛ nōo géē yuklɔ ɔɔma lɛ ɔ nɛhi. Naana a, ɔyinɛ alɔ a yɛce ukɔ́ ku Ubáyíbu, anu ó ta ō miyɛ uklɔ a. Alaadi nōo gboce ɔ a, ɔkpá ku ɔ̄kā (newspaper) ku igeli ɔɔma mafu ɔcɛ ō gba ɔcí ɔhá yɔ i lɛ ukrɔsi playi inu icɔɔci a. Ɔdaŋ ka ɔyinɛ alɔ nɔnyilɔ ɔɔma géē yɛ i piya ɔtu ku nu abɔ klla miyɛ uklɔ a, ifoto ku nu géē yɛ i yɔ ipu ɔkpá ku ɔ̄kā ɔɔma a. Gbɛla lɛyikwu ɛgɛnɛ nɛ ɔɔma géē yɛ i biya ɔtu ku ayinɛ nu nōo yɔ ipu ujɔ lɛ a! Gbɛla lɛyikwu ɛgɛ nōó géē yɛ i biya Ujehofa ɔtu lɛ a.

19-20. (a) Ɔdi nɛ alɔ nwu ɛ ma? (b) Ɔdi nɛ alɔ kē cika ō nwu kpɔ ɛ ma?

¹⁹ Ubáyíbu ka ka akacɛ ɔhá nōo cɛgbá nɛhi nōó gáā gboji ō ya jila ipu ɛcɛ nyā gɛ ŋ ma, wɛ ka aotrɛyi ku ɛcɛ nyā géē ka tɛɛcɛ ka “ɔdā dóódu í je unwalu lɛ alɔ gɛ ŋ́, alɔ kē bá ɛbɔ́.” Amáŋ, ohigbu aɔdā nɛ Ujehofa le nwu alɔ ɛ ma, alɔ jé ka aotrɛyi ku ɛcɛ nyā i gáā lɔfu ya ku ɛbɔ ku ɔkwɔɔkwɛyi kóō yɔ ipu ɛcɛ nyā piyoo ŋ. Ɔdi nɛ alɔ cika ō ya gbɔɔ ɛɛ kéē ya ɛlā ō ka tɛɛcɛ nyā nōo géē ya ku ifi nɛɛnɛhi kóō wa igbekponu a? Ujehofa dɔka ku alɔ kóō bēē yuklɔ ku ɔna ō ta a lɔfu lɔfu, klla ceyitikwu ku ācɛ alɛwa kéē gáā le piya ayikpo ku Ukraist. Ó wɛ ɔɔma foofunu ŋ, alɔ cika ō lɛ abɔ ci ɔdā duuma nōo tɛɛma kwu ɛ̄gbā ō gba ku ɛkɛmgbɛ. Ɛnyā kē wɛ ku alɔ i gáā wɛ ipu ɔwa ku uwa ŋ, alɔ i klla gáā yuklɔ duuma lɛ uwa nōo tɛɛma kwu ɛ̄gbā ō gba ku uwa ŋ.

²⁰ Ó lɛ aɔdā alɛwa ɔhá nōo géē ya ɛpleeko nɛ “ɛcɛ gáā mɛ ā.” Ó kē lɛ aɔdā ɔhá nɛ Ujehofa cɛgbá ŋma ɛgiyi alɔ kpɔ. Ɔdi néē wɛ a, ɛgɛnyá nɛ alɔ kē lɔfu lɛ iyi alɔ tutu lɛyikwu ɛjɛɛji aɔdā nōo géē ya ɛcɔbu a? Alɔ géē má ohi ku aɔka nyā ipu ikpɛyi ɛlā nōo gboce ɛnyā a.