1. Gịnị mere obi ji sie anyị ike na anyị bi “n’oge ikpeazụ”?

À MỤRỤ gị mgbe afọ 1914 gachara? Ọ pụtara na i bi “n’oge ikpeazụ” nke ụwa ochie a kemgbe a mụrụ gị. (2 Tim. 3:1) Anyị niile anụla gbasara ihe ndị ahụ Jizọs kwuru ga na-eme n’oge anyị a, ya bụ, ihe ndị dị ka agha, ụkọ nri, ala ọma jijiji, ọrịa na-efe efe, mmebi iwu na-arị elu, na mkpagbu a na-akpagbu ndị Jehova. (Mat. 24:​3, 7-9, 12; Luk 21:​10-12) Anyị ahụkwala ka ndị mmadụ na-akpa àgwà otú ahụ Pọl onyeozi buru n’amụma. (Gụọ igbe bụ́ “ Àgwà Ndị Mmadụ Na-akpa Ugbu A.”) Obi siri anyị bụ́ ndị na-efe Jehova ike na anyị bi “n’oge ikpeazụ.”​—Maị. 4:1.

2. Olee ajụjụ ndị anyị kwesịrị ịmata azịza ha?

² Ebe ọ bụ na ọtụtụ afọ agaala kemgbe afọ 1914, ọ ga-abụrịrị na anyị bizi ná ngwụcha “oge ikpeazụ.” Ebe ọ bụ na ọgwụgwụ ụwa a dịzi ezigbo nso, ajụjụ ụfọdụ dị mkpa anyị kwesịrị ịmata azịza ha bụ: Olee ihe ndị ga-eme ná ngwụcha “oge ikpeazụ” a? Olee ihe Jehova chọrọ ka anyị na-eme mgbe anyị na-echere ka ihe ndị ahụ mee?

3. Dị ka e buru n’amụma ná 1 Ndị Tesalonaịka 5:​1-3, olee ọkwa ndị ọchịchị ụwa ga-ama?

³ Gụọ 1 Ndị Tesalonaịka 5:​1-3. Pọl kwuru banyere “ụbọchị Jehova.” N’amaokwu Baịbụl ahụ, ọ pụtara na oge ahụ ga-amalite mgbe a ga-alụso “Babịlọn Ukwu ahụ” ọgụ, ya bụ, okpukpe ụgha niile dị n’ụwa, jirikwa Amagedọn pịachie. (Mkpu. 16:​14, 16; 17:5) Tupu “ụbọchị” ahụ ebido, ndị ọchịchị ụwa ga-ama ọkwa na e nweela “udo na obi iru ala.” (E nwere Baịbụl kpọrọ ya “udo na ịnọ ná ntụkwasị obi.”) Mgbe ụfọdụ, ndị ọchịchị ụwa na-ekwu ụdị ihe ahụ ma ha  kwuwe otú mba dị iche iche ga-esi dịkwuo ná mma. * Ma, “udo na obi iru ala” ahụ Baịbụl kwuru na a ga-ama ọkwa ya ga-adị iche. N’ihi gịnị? Ọ bụ n’ihi na, a maa ọkwa ahụ, ndị mmadụ nwere ike iche na ndị ọchịchị ụwa emeela ka udo dị n’ụwa, meekwa ka obi ruo onye ọ bụla ala. Ma nke bụ́ eziokwu bụ na “mbibi mberede” ga-abịakwasị ha n’oge “oké mkpagbu” ahụ.​—Mat. 24:21.

4. (a) Olee ihe ndị anyị na-amaghị gbasara ọkwa ahụ a ga-ama na e nweela “udo na obi iru ala”? (b) Olee ihe anyị ma gbasara ya?

⁴ E nwere ihe ndị anyị ma gbasara ọkwa ahụ a ga-ama na e nweela “udo na obi iru ala.” Ma, e nwere ihe ndị anyị na-amaghị. Anyị amaghị ihe ga-eme ka ha maa ọkwa ahụ ma ọ bụ otú ha ga-esi ama ya. Anyị amaghịkwa ma hà ga-ama ya naanị otu ugboro, ka hà ga-ama ya ugboro ugboro. Nke ọ bụla ọ bụ, ihe anyị ma bụ na anyị ekwesịghị ikwe ka ndị ọchịchị ụwa mee ka anyị chee na ha ga-emeli ka ezigbo udo dị n’ụwa. Kama, ihe a gwara anyị bụ ka anyị na-atụ anya mgbe a ga-ama ọkwa ahụ. Ọ ga-egosi na “ụbọchị Jehova” agawala ibido.

5. Olee otú 1 Ndị Tesalonaịka 5:​4-6 si enyere anyị aka ijikere maka “ụbọchị Jehova”?

⁵ Gụọ 1 Ndị Tesalonaịka 5:​4-6. Pọl gwara anyị ihe anyị kwesịrị ime iji jikere maka “ụbọchị Jehova.” Anyị ekwesịghị “ịnọ na-ehi ụra dị ka ndị ọzọ na-ehi.” Anyị kwesịrị ‘ịmụrụ anya’ ma na-eche nche. Dị ka ihe atụ, anyị kwesịrị ịkpachara anya ka anyị ghara itinye aka n’agha ma ọ bụ na ndọrọ ndọrọ ọchịchị nke ụwa a. Anyị tinye aka n’ụdị ihe ahụ, anyị nwere ike ịbụzi “nke ụwa.” (Jọn 15:19) Anyị ma na ọ bụ naanị Alaeze Chineke ga-eme ka udo dị n’ụwa a.

6. Gịnị ka anyị kwesịrị inyere ndị ọzọ aka ka ha mee? Maka gịnị?

⁶ E wezụga anyịnwa ịmụrụ anya, anyị kwesịkwara inyere ndị ọzọ aka ka ha mata ihe Baịbụl kwuru ga-eme n’ụwa a. Ka anyị cheta na ozugbo oké mkpagbu ahụ bidoro, ndị mmadụ agaghịzi abịali fewe Jehova, n’ihi na oge agaala. Ọ bụ ya mere o ji dị ezigbo mkpa ka anyị kwusaa ozi ọma ugbu a. *

7. Gịnị ka Jehova chọrọ ka anyị mee ugbu a?

⁷ N’obere oge a fọrọnụ tupu “ụbọchị Jehova” amalite, Jehova chọrọ ka anyị na-ekwusasi ozi ọma ike. Anyị kwesịrị ịgbasi mbọ ike ka anyị ‘nwee ọtụtụ ihe anyị na-arụ mgbe niile n’ọrụ Onyenwe anyị.’ (1 Kọr. 15:58) Jizọs buru amụma ihe anyị ga-eme. Mgbe ọ na-ekwu gbasara ihe niile gbara ọkpụrụkpụ ga-eme n’oge ikpeazụ a, o kwukwara, sị: “A ghaghịkwa ibu ụzọ  kwusaa ozi ọma ahụ ná mba niile.” (Mak 13:​4, 8, 10; Mat. 24:14) Chegodị echiche. Mgbe ọ bụla ị gara ozi ọma, i so na-emezu amụma ahụ Baịbụl buru.

8. Olee ihe gosiri na ozi ọma anyị na-ekwusa na-aga nke ọma?

⁸ Ozi ọma anyị na-ekwusa ọ̀ na-aga nke ọma? Kwa afọ, ọ na-aga n’ihu n’ihu. Dị ka ihe atụ, chegodị otú e si nwekwuo ndị nkwusa Alaeze n’ụwa niile n’oge ikpeazụ a. N’afọ 1914, e nwere puku ndị nkwusa ise, otu narị na iri ise na ise ná mba iri anọ na atọ. Taa, e nwere ihe dị ka nde ndị nkwusa asatọ na ọkara na narị mba abụọ na iri anọ. N’agbanyeghị nke ahụ, anyị ekwusachabeghị ozi ọma a. Anyị ka kwesịrị ịna-ekwusa na ọ bụ naanị Alaeze Chineke ga-akwụsị nsogbu anyị niile.​—Ọma 145:​11-13.

9. Gịnị mere anyị agaghị akwụsị ịna-ekwusa ozi ọma?

⁹ Anyị agaghị akwụsị ozi ọma anyị na-ekwusa ruo mgbe Jehova ga-asị na o zuola. Ọ̀ bụ afọ ole fọọrọ ndị mmadụ ịbịa mara Jehova Chineke na Jizọs Kraịst? (Jọn 17:3) Anyị amaghị. Ihe anyị ma bụ na ruo mgbe oké mkpagbu ahụ ga-amalite, ndị ọ bụla “nwere ezi obi maka inweta ndụ ebighị ebi” ka nwere ike ịnabata ozi ọma ma chegharịa. (Ọrụ 13:48) Olee otú anyị nwere ike isi nyere ndị ahụ aka tupu oge agaa?

10. Olee otú Jehova si enyere anyị aka ịkụziri ndị mmadụ eziokwu?

¹⁰ Jehova ji nzukọ ya na-enye anyị ihe niile anyị ga-eji na-akụziri ndị mmadụ eziokwu. Dị ka ihe atụ, a na-azụ anyị kwa izu n’ọmụmụ ihe etiti izu. Ọmụmụ ihe a na-enyere anyị aka ịma ihe anyị ga-ekwu ná mkparịta ụka nke mbụ nakwa ná nletaghachi. Ọ na-akụzikwara anyị otú anyị ga-esi na-eduzi ọmụmụ Baịbụl. Nzukọ Jehova enyekwala anyị Ihe Ndị Anyị Ji Akụziri Ndị Mmadụ Ihe. Ihe ndị a na-enyere anyị aka . . .

• ịmalite mkparịta ụka,

• ikwusa ozi ọma otú ga-eme ka ndị mmadụ nwee mmasị,

• inyere ndị mmadụ aka ka ha chọọ ịmụtakwu gbasara Baịbụl,

• ịkụzi eziokwu mgbe anyị na-amụrụ mmadụ Baịbụl, nakwa

• ịgwa ndị nwere mmasị ka ha gaa n’ebe anyị na-edebe ihe n’Ịntanet nakwa ka ha bịa n’Ụlọ Nzukọ Alaeze.

 N’eziokwu, inwe ihe ndị a abụghị ebe okwu biri. Anyị kwesịrị iji ha na-enyere ndị mmadụ aka. * Dị ka ihe atụ, ọ bụrụ na gị na onye nwere mmasị ekwuchaa gbasara Baịbụl, gị enye ya traktị ma ọ bụ magazin, ọ ga-enwe ike ịna-agụ ya ruo mgbe gị na ya ga-ahụ ọzọ. Anyị kwesịrị ịna-agbalịsi ike na-ekwusa ozi ọma kwa ọnwa.

11. Gịnị mere e ji wepụta Online Bible Study Lessons?

¹¹ Ihe ọzọ na-egosi otú Jehova si na-enyere ndị mmadụ aka ịmụta eziokwu bụ Online Bible Study Lessons dị na jw.org^®. Gịnị mere e ji wepụta ya? Kwa afọ, ọtụtụ puku mmadụ n’ụwa niile na-aga n’Ịntanet na-achọ ịmata ihe ụfọdụ gbasara Baịbụl. Ihe ahụ dị na jw.org nwere ike ime ka ụdị ndị ahụ mụta eziokwu Baịbụl na-akụzi. O nwekwara ike ụfọdụ ndị ị na-ahụ n’ozi ọma agaghị ekweta ozugbo ka ị mụwara ha Baịbụl. Ị hụ ụdị ndị ahụ, gosi ha ihe a dị n’Ịntanet ma ọ bụ gị esi n’Ịntanet zigara ha ihe ga-enyere ha aka imepe ya. *

12. Olee ihe mmadụ ga-amụta na Online Bible Study Lessons?

¹² Isiokwu ndị gbara na Online Bible Study Lessons kwuru gbasara Baịbụl na onye e dere uche ya na ya, ndị a kọrọ akụkọ ha na Baịbụl, na ihe Baịbụl kwuru mere ka anyị nwee olileanya. Ihe mmadụ ga-amụta n’isiokwu ndị ahụ bụ:

• Otú Baịbụl nwere ike isi nyere mmadụ aka

• Onye Jehova na Jizọs bụ nakwa ndị bụ́ ndị mmụọ ozi

• Ihe mere Chineke ji kee ndị mmadụ

• Ihe mere ndị mmadụ ji ata ahụhụ na ihe mere ihe ọjọọ ji dịrị

N’isiokwu ndị ahụ, a kọwakwara otú Jehova ga-esi . . .

• mee ka ịta ahụhụ na ọnwụ kwụsị,

• kpọlite ndị nwụrụ anwụ,

• jirikwa Alaeze ya dochie ọchịchị ụmụ mmadụ na-enweghị isi na ọdụ.

13. È ji ihe a dị n’Ịntanet dochie Baịbụl anyị na-amụrụ ndị mmadụ? Kọwaa.

¹³ E jighị ihe a dị n’Ịntanet dochie Baịbụl anyị na-amụrụ ndị mmadụ. Jizọs nyere anyị ọrụ ime ka ndị mmadụ bụrụ ndị na-eso ụzọ ya. Anyị na-atụ anya na ndị nwere mmasị ga-aga mụọ ihe ahụ dị n’Ịntanet, ya atọmịrị ha, ha achọọkwa ịmụtakwu ihe ndị ọzọ. O nwere ike ime ka ha kweta ka a mụwara ha Baịbụl. Ná ngwụcha ihe ọmụmụ nke ọ bụla, a na-agwa onye ahụ ka o dejupụta fọm kwuo na ọ chọrọ ka e zitere ya onye ga-amụwara ya ihe. Kwa ụbọchị, n’ụwa niile, ndị na-esi n’ebe anyị na-edebe ihe n’Ịntanet ekwu ka a bịa mụwara ha ihe karịrị narị mmadụ abụọ na iri atọ. Baịbụl ahụ a na-amụrụ ndị mmadụ otu otu dị ezigbo mkpa.

14. Dị ka Jizọs kwuru na Matiu 28:​19, 20, gịnị ka anyị ga-agbalịsi ike na-eme? Maka gịnị?

¹⁴ Gụọ Matiu 28:​19, 20. Ka anyị na-amụrụ ndị mmadụ Baịbụl, anyị ga-agbalịsi ike ‘na-eme ka ha bụrụ ndị na-eso ụzọ Jizọs, na-ezi ha ka ha debe ihe niile o nyere anyị n’iwu.’ Anyị kwesịrị ịna-enyere ndị mmadụ aka ịghọta na ha kwesịrị ikpebi ifewe Jehova, na-akwadokwa Alaeze ya. Ihe ọ pụtara bụ na anyị kwesịrị ịna-enyere ndị mmadụ aka ka ha na-eme ihe ha mụtara, nyefee Jehova onwe ha, e meekwa ha baptizim. Ọ bụ naanị ihe ga-eme ka ha lafere ụbọchị Jehova.​—1 Pita 3:21.

15. Gịnị ka anyị na-ekwesịghị ime? Maka gịnị?

 ¹⁵ Dị ka anyị kwuburu, oge fọrọ tupu e bibie ụwa ochie a dị ezigbo ntakịrị. N’ihi ya, o doo anya na mmadụ achọghị ịbụ onye na-eso ụzọ Kraịst, anyị ekwesịghị ịnọ na-amụrụ ya Baịbụl. (1 Kọr. 9:26) Oge anyị ga-eji zie ozi ọma na-akụzi kwarapụ kwarapụ. E nwere ọtụtụ ndị e kwesịrị izi ozi ọma Alaeze Chineke tupu oge agaa.

16. Dị ka e kwuru ná Mkpughe 18:​2, 4, 5, 8, gịnị ka anyị niile kwesịrị ime? (Kwuokwa ihe e dere n’ala ala peeji.)

¹⁶ Gụọ Mkpughe 18:​2, 4, 5, 8. Amaokwu ndị a mere ka anyị mata ihe ọzọ Jehova chọrọ ka ndị na-efe ya mee. Ezigbo Ndị Kraịst niile kwesịrị ịsa anya na mmiri ka ha ghara itinye aka n’ihe ọ bụla gbasara okpukpe ụgha. Tupu mmadụ amụta eziokwu Baịbụl, o nwere ike ịbụ na ọ nọbu n’okpukpe ụgha, soro ha na-efe ofufe, na-eme ihe ndị ha na-eme ma ọ bụ na-atụrụ ha ụtụ. Tupu onye a na-amụrụ ihe aghọọ onye nkwusa a na-emebeghị baptizim, ọ ga-esepụ aka n’ihe ọ bụla jikọrọ ya na okpukpe ụgha. Ọ ga-ede akwụkwọ ozi gwa ha na o nweghịzi ihe jikọrọ ha na ya ma ọ bụ mee ka o doo anya na o nweghịzi ihe jikọrọ ya na chọọchị ahụ ọ nọbu nakwa n’òtù ọ bụla ọzọ ya na Babịlọn Ukwu ahụ na-emekọ ihe. *

17. Olee ụdị ọrụ Onye Kraịst na-ekwesịghị ịrụ? Maka gịnị?

¹⁷ Ezigbo Onye Kraịst kwesịrị ịgbasi mbọ ike ka ọrụ ya ghara inwe ihe jikọrọ ya na Babịlọn Ukwu ahụ. (2 Kọr. 6:​14-17) Dị ka ihe atụ, ọ gaghị ekwe ka chọọchị wee ya n’ọrụ. Onye Kraịst ụlọ ọrụ ha dunyere ọrụ ekwesịghịkwa ịga rụọ ọrụ buru ibu n’ụlọ e ji akwado okpukpe ụgha. Ọ bụrụ onye nwere ụlọ ọrụ nke ya, ọ gaghị agbalịwa ka okpukpe ọ bụla so na Babịlọn Ukwu ahụ nye ya ọrụ ọ ga-arụ. Ha nyegodị ya, ọ gaghị ekwe arụ. Gịnị mere anyị ejighị ụdị ihe a egwu egwu? Ọ bụ n’ihi na anyị achọghị ka aka anyị dịrị n’ihe na-abụghị eziokwu okpukpe ụgha na-akụzi nakwa n’ihe ọjọọ ndị ha na-eme Chineke kpọrọ asị.​—Aịza. 52:11. *

18. Olee otú otu nwanna si rubere ihe Baịbụl kwuru isi n’ihe gbasara ọrụ ya?

 ¹⁸ Ọtụtụ afọ gara aga, a kpọrọ otu okenye nwere ụlọ ọrụ nke ya ka ọ bịa rụọ obere ọrụ kapịnta n’otu chọọchị dị n’ebe o bi. Onye kpọrọ nwanna ahụ ọrụ ahụ ma na ọ na-ekwu mgbe niile na ya agaghị arụ ọrụ ọ bụla na chọọchị. Ma nwoke ahụ chọsiri ike inweta onye ga-arụ ọrụ ahụ. N’agbanyeghị nke ahụ, nwanna ahụ ekweghị arụ ọrụ ahụ n’ihi ihe Baịbụl kwuru. N’izu na-eso ya, foto ebe nwoke ọzọ bụ́ kapịnta na-ekonye obe na chọọchị gbara n’otu akwụkwọ akụkọ ndị obodo ahụ. A sị na nwanna ahụ kwere gaa rụọ ọrụ ahụ, ọ bụ foto ya gaara agba n’akwụkwọ akụkọ ahụ. Chegodị otú ụmụnna gaara esi na-ele nwanna ahụ anya ma ọ bụrụ ya ka e sere n’akwụkwọ akụkọ ahụ. Cheekwa otú obi gaara adị Jehova.

19-20. (a) Olee ihe ndị anyị mụtara n’isiokwu a? (b) Oleekwa ihe ndị ọzọ anyị kwesịrị ịmata?

¹⁹ Amụma e buru na Baịbụl na-egosi na ihe ọzọ dị ezigbo mkpa ga-eme n’ụwa n’oge na-adịghị anya bụ na ndị ọchịchị ụwa ga-ama ọkwa na e nweela “udo na obi iru ala.” Ihe Jehova na-akụziri anyị mere ka anyị mara na ndị ọchịchị agaghị emeli ka ezigbo udo dị n’ụwa. Olee ihe anyị kwesịrị ime tupu a maa ọkwa a, mbibi mberede esochiekwa ya? Jehova chọrọ ka anyị na-ekwusasi ozi ọma Alaeze ya ike ma na-emekwu ka ndị ọzọ bụrụ ndị na-eso ụzọ Jizọs. Ọ chọkwara ka a ghara inwe ihe ọ bụla ga-ejikọ anyị na okpukpe ụgha. Ihe ọ pụtara bụ na anyị ga-akwụsị ịbụ ndị òtù ha, jụkwa ịrụ ọrụ ọ bụla nwere ihe jikọrọ ya na Babịlọn Ukwu ahụ.

²⁰ E nwere ihe ndị ọzọ ga-emenụ ná ngwụcha “oge ikpeazụ” a ma a machaa ọkwa ahụ. E nwekwara ihe ndị ọzọ Jehova chọrọ ka anyị mee. Gịnị bụ ihe ndị ahụ? Olee otú anyị ga-esi jikere maka ihe niile ga-emenụ n’oge na-adịghị anya? A ga-amata azịza ajụjụ ndị a n’isiokwu na-esonụ.