1. Inki ke ndimisa beto nde beto ke zinga na “bilumbu ya nsuka”?

KETI nge butukaka na nima ya 1914? Kana mpidina, nge ke zinga kaka na “bilumbu ya nsuka” ya nsi-ntoto yai. (2 Tim. 3:1) Beto yonso ke kutana ti mambu yina Yezu tubaka sambu na nsungi yai. Mambu yango kele bitumba, nzala, kunikana ya ntoto, maladi, kikalulu ya kufwa nsiku mpi kuniokula bansadi ya Nzambi. (Mat. 24:3, 7-9, 12; Luka 21:10-12) Beto ke mona mpi bantu ke monisa bikalulu yina ntumwa Polo tubilaka. (Tala lupangu “ Bikalulu Yina Bantu Ke Monisaka Bubu Yai.”) Bansadi ya Yehowa ke ndimaka nde bo ke zinga na “kitini ya nsuka ya bilumbu” ya nsuka.—Mika 4:1.

2. Inki bangiufula beto ta tadila?

² Sambu bamvula mingi me luta banda 1914, yo fwete vanda nde beto ke zinga na kitini ya nsuka ya “bilumbu ya nsuka.” Sambu nsuka me finama, beto fwete zaba bamvutu na bangiufula yai ya mfunu: Inki mambu ta salama na kitini ya nsuka ya “bilumbu ya nsuka”? Inki beto fwete sala ntangu beto ke vingila nde mambu yango kusalama?

3. Na kutadila mambu yina kele na 1 Batesalonika 5:1-3, nki makanda ta tuba?

³ Tanga 1 Batesalonika 5:1-3. Bangogo “kilumbu ya Yehowa” ya Polo ke tubila na verse yai ke tendula nsungi yina bo ta  fwa “Babilone ya Nene,” disongidila mabundu yonso ya luvunu mpi yo ta suka na Armagedoni. (Kus. 16:14, 16; 17:5) Na ntwala nde “kilumbu” yina kuyantika, makanda ta tuba nde “Ngemba mpi lutaninu!” Bantangu ya nkaka bamfumu ya luyalu ke tubaka bangogo ya mutindu yai na masolo na bo ya kuwakana ti bansi ya nkaka. * Kansi bangogo “ngemba mpi lutaninu” ya Biblia ke tubilaka me swaswana ti yina bamfumu ya luyalu ke tubaka bubu yai. Sambu na nki? Ntangu bo ta tuba nde “ngemba mpi lutaninu,” bantu ta yindula nde bamfumu ya nsi-ntoto me tula ngemba mpi lutaninu ya kieleka na ntoto ya mvimba. Kansi, “lufwa ta kwisila bo na kintulumukina” sambu “mpasi ya nene” ta yantika.—Mat. 24:21.

4. (a) Inki beto me zaba ve sambu na bangogo “ngemba mpi lutaninu”? (b) Inki mambu beto me zaba sambu na yo?

⁴ Beto me zaba mambu ya nkaka ya me tala bangogo “ngemba mpi lutaninu,” kansi ya nkaka beto me zaba ve. Beto me zaba ve mambu yina ta pusa bamfumu na kutuba nde “ngemba mpi lutaninu” mpi mutindu bo ta tuba yo. Beto me zaba mpi ve kana bo ta tuba yo mbala mosi mpamba to mbala mingi. Kansi kima beto me zaba kele nde bamfumu ya luyalu ta kuka ve kutula ngemba ya kieleka na ntoto ya mvimba. Biblia ke zabisa beto mfunu ya kukengila. Yo ke monisa nde “kilumbu ya Yehowa” me finama kibeni.

5. Inki mutindu 1 Batesalonika 5:4-6 ke sadisa beto na kuvanda ya kuyilama sambu na “kilumbu ya Yehowa”?

⁵ Tanga 1 Batesalonika 5:4-6. Ndongisila ya Polo ke monisa mambu yina beto fwete sala sambu na kuvanda ya kuyilama sambu na “kilumbu ya Yehowa.” Beto fwete “lala ve bonso bantu ya nkaka” kansi beto fwete “kangula meso.” Beto fwete kangula meso mpi kukota ve na mambu ya politiki. Kana beto me kudikotisa na mambu yai, beto ta kuma “bantu ya nsi-ntoto.” (Yoa. 15:19) Beto me zaba nde Kimfumu ya Nzambi mpamba ta tula ngemba na ntoto ya mvimba.

6. Beto fwete sadisa bantu na kusala nki mpi sambu na nki?

⁶ Katula kukengila, beto ke zolaka mpi kusadisa bantu ya nkaka na kulonguka mambu yina Biblia ke tuba yina ta salama na nsi-ntoto. Beto vila ve nde kana mpasi ya nene me yantika, yo ta vanda mpasi sambu bantu kusadila Yehowa. Yo yina, beto fwete samuna mpi kusala yo kukonda kusukinina. *

7. Yehowa ke lomba beto na kusala nki?

⁷ Sambu ntangu me bikala fioti na ntwala nde “kilumbu” ya Yehowa kuyantika, yandi ke lomba beto na kudipesa mingi na kisalu ya kusamuna. Beto fwete sala bikesa na kuvanda “ntangu yonso ti mambu mingi ya kusala na  kisalu ya Mfumu.” (1 Bak. 15:58) Yezu tubaka mambu yina beto fwete sala. Ntangu yandi tubilaka mambu yina ta salama na bilumbu ya nsuka, yandi yikaka nde: “Diaka, na makanda yonso, bo fwete samuna ntete nsangu ya mbote.” (Mar. 13:4, 8, 10; Mat. 24:14) Zaba nde: Konso ntangu ya nge ke samunaka, nge ke lungisaka mambu yina Biblia tubaka.

8. Inki mutindu kisalu ya kusamuna ke kwenda kaka na ntwala?

⁸ Inki beto lenda tuba na yina me tala kuyela ya kisalu ya kusamuna? Konso mvula, kisalu ya kusamuna ke kwendaka kaka na ntwala. Mu mbandu, yindula mutindu ntalu ya bansamuni ya Kimfumu ke kuma mingi na ntoto ya mvimba na bilumbu yai ya nsuka. Na 1914, bansamuni vandaka 5155 na bansi 43. Kansi bubu yai, bo kele bamilio 8 ti ndambu na bansi kiteso ya 240. Ata mpidina, beto ke landa kaka kusamuna. Beto fwete longa bantu nde Kimfumu ya Nzambi mpamba ta manisa bampasi yonso.—Nk. 145:11-13.

9. Sambu na nki beto fwete landa kusamuna nsangu ya Kimfumu?

⁹ Kisalu ya kusamuna ta suka kana Yehowa me tuba nde yo me lunga. Bantangu ikwa me bikala sambu bantu kuzaba Yehowa mpi Yezu Kristu? (Yoa. 17:3) Beto me zaba ve. Beto me zaba nde na ntwala nde mpasi ya nene kuyantika, bantu yonso yina kele ti “nkadilu ya mbote sambu na kubaka luzingu ya mvula na mvula” ta ndima nsangu ya mbote. (Bis. 13:48) Inki mutindu beto lenda sadisa bantu yai na ntwala nde nsuka kukwisa?

10. Yehowa me salaka nki sambu na kusadisa beto na kulonga bantu kieleka?

¹⁰ Yehowa ke sadilaka dibundu na yandi sambu na kupesa beto bisadilu yina beto kele na yo mfunu sambu na kulonga bantu. Mu mbandu, beto ke bakaka formasio konso mposo na lukutakanu ya kati-kati ya mposo. Yo ke sadisaka beto na kuzaba mambu yina beto lenda tuba na mbala ya ntete ya beto me kutana ti muntu mpi kana beto me vutukila yandi. Yo ke longaka beto mutindu ya kulonguka Biblia ti bantu. Dibundu ya Yehowa me basisaka mikanda yina kele na Bisadilu Sambu na Kulonga Bantu. Mikanda yai ke sadisaka beto na . . .

•   kuyantika masolo ti bantu,

• kubenda dikebi ya bantu na kieleka,

• kupesa bantu mpusa ya kulonguka mingi,

• kulonguka Biblia ti bantu mpi

• kulomba bantu yina ke monisa mpusa na kukota na site Internet na beto mpi kubingisa bo na balukutakanu.

Ya kieleka, yo me fwana kaka ve na kuvanda ti bisadilu yai, beto fwete sadila yo. * Mu mbandu, na nima ya kusolula ti muntu mosi, nge lenda bikila yandi trakiti to zulunalu, yandi lenda tanga yo tii kilumbu yina nge ta vutukila yandi. Kusamuna mingi konso ngonda kele mukumba ya konso nsamuni.

11. Sambu na nki kulonguka ke salamaka mpi na Internet?

¹¹ Yehowa ke sadisaka bantu mpi na kulonguka kieleka na jw.org na kitini Malongi ya Biblia na Internet. Sambu na nki? Konso ngonda bantu mingi kibeni ke longukaka Biblia bo mosi na nzila ya malongi ya Biblia yina kele na Internet. Malongi yango lenda sadisa bantu yai na kuyantika kulonguka Ndinga ya Nzambi. Diaka, bantu ya nkaka yina beto ke solulaka ti bo lenda ndima ve kulonguka Biblia. Kana mpidina, songa bo na kukota na site na beto jw.org^® na kitini Malongi ya Biblia na Internet to tindila bo kidimbu yina lenda nata bo kisika yina malongi yango kele. *

12. Inki mambu muntu lenda longuka na Internet?

¹² Malongi ya Biblia yina kele na Internet ke tubilaka masolo yai: “Biblia mpi Munkwa na Yo,” “Bantu ya Mfunu Yina Biblia Ke Tubila,” mpi “Nsangu ya Biblia Yina Ke Pesaka Kivuvu.” Kana muntu kulonguka malongi yai, yandi ta zaba:

• Mutindu Biblia lenda sadisa muntu

• Yehowa, Yezu ti bawanzio

• Sambu na nki Nzambi gangaka bantu

• Sambu na nki Nzambi me pesaka nzila na bampasi mpi na mambi

Malongi yai ke tubila mpi mutindu Yehowa . . .

• ta katula bampasi mpi lufwa,

• ta futumuna bafwa mpi

• ta katula baluyalu ya bantu mpi ta tula Kimfumu na yandi.

13. Keti kulonguka Biblia na Internet ke tendula nde muntu lenda longuka diaka ve Biblia ti Bambangi ya Yehowa? Tendula.

¹³ Muntu lenda longuka Biblia yandi mosi na Internet kansi kulonguka Biblia ti Bambangi ya Yehowa kele mfunu mingi kuluta. Yezu me pesaka beto dibaku ya kukumisa bantu balongoki. Beto ke ndima nde bantu yina ta monisa mpusa ta longuka Biblia na nzila ya Internet, ta sepela ti mambu yina bo ta longuka mpi ta zola diaka kulonguka mambu mingi. Ziku bo ta ndima kulonguka Biblia. Na nsuka ya konso dilongi, bo ke lombaka bantu yina ke longuka Biblia bo mosi na Internet na kusosa kulonguka ti Mbangi ya Yehowa. Konso kilumbu, bantu 230 na ntoto ya mvimba ke sonikaka na site na beto sambu Bambangi ya Yehowa kulonguka ti bo. Kulonguka Biblia ti Mbangi ya Yehowa kele mfunu mingi kibeni!

14. Bantuma ya Yezu yina kele na Matayo 28:19, 20, ke lomba beto na kusala nki bikesa mpi sambu na nki?

¹⁴ Tanga Matayo 28:19, 20. Sambu beto ke longukaka Biblia ti bantu, beto fwete sala bikesa na ‘kukumisa bantu balongoki mpi kulonga bo na kuzitisa mambu yonso ya Yezu tubaka.’ Beto fwete sadisa bantu na kubakisa mfunu ya kusadila Yehowa mpi kupesa maboko na Kimfumu na yandi. Yo ke tendula kusadisa bantu na kusadila mambu yina bo ke longuka, kudipesa na Yehowa mpi kubaka  mbotika. Mpidina, bo ta guluka na kilumbu ya Yehowa.—1 Pie. 3:21.

15. Inki beto fwete sala ve mpi sambu na nki?

¹⁵ Mutindu beto me mona yo, yo me bikala ntangu fioti kibeni sambu nsuka ya nsi-ntoto yai kukwisa. Yo yina, beto lenda lutisa ve ntangu na kulonguka Biblia ti bantu yina kele ve ti luzolo ya kukuma balongoki ya Kristu. (1 Bak. 9:26) Kisalu ya kusamuna fwete salama kukonda kusukinina. Bantu mingi kele ti nzala ya kuwa nsangu ya Kimfumu na ntwala nde nsuka kukwisa.

16. Inki mambu beto fwete sala yina Kusonga 18:2, 4, 5, 8 ke tubila? (Tala mpi noti na nsi ya lutiti.)

¹⁶ Tanga Kusonga 18:2, 4, 5, 8. Baverse yai ke monisa mambu ya nkaka yina Yehowa ke lombaka bansadi na yandi. Bakristu yonso ya kieleka fwete vukana ve na mambu yonso ya Babilone ya Nene. Na ntwala ya kulonguka kieleka, ziku longoki ya Biblia vandaka na dibundu mosi ya luvunu. To yandi vandaka kuvukana na bisalu na yo. Yo lenda vanda mpi nde yandi vandaka kupesa mbongo na dibundu yina. Na ntwala nde bo ndima longoki ya Biblia na kukuma nsamuni yina me baka ntete ve mbotika, yandi fwete yambula mambu yonso ya ke wakana ti mabundu ya luvunu. Yandi fwete sonika mukanda nde yandi kele diaka ve muntu ya dibundu yina to na dibundu ya nkaka ya Babilone ya Nene. *

17. Inki kisalu Mbangi ya Yehowa fwete buya mpi sambu na nki?

¹⁷ Mbangi ya Yehowa fwete zikisa mbote nde kisalu na yandi ke wakanaka ve ti Babilone ya Nene. (2 Bak. 6:14-17) Mu mbandu, yandi fwete vanda ve muntu ya kisalu ya dibundu mosi ya luvunu. Diaka, Mbangi ya Yehowa yina ke salaka kisalu fwete ndima ve nde bamfumu ya kisalu kupesa yandi kisalu yina ta sala nde mambu ya dibundu ya luvunu kukwenda na ntwala. Kana yandi ke salaka kisalu na yandi mosi, yandi ta sosa ve kusala to kundima kisalu yina ke wakana ti Babilone ya Nene. Sambu na nki? Sambu beto ke zolaka ve kuvukana na bisalu mpi na masumu ya bimvuka yina kele mvindu na meso ya Nzambi.—Yez. 52:11. *

18. Inki mutindu mpangi mosi kangamaka na minsiku ya Biblia na yina me tala kisalu?

¹⁸ Na bamvula me luta, mfumu mosi ya kisalu lombaka nkuluntu yina ke salaka bisalu ya mabaya na kusala bisalu na nzo-nzambi mosi  na mbanza na bo. Mfumu yango zabaka nde nkuluntu yina ke salaka ve bisalu na banzo-nzambi. Kansi yandi lombaka nkuluntu na kusala yo sambu muntu ya nkaka ya kusala vandaka ve. Ata mpidina, nkuluntu kangamaka na minsiku ya Biblia mpi buyaka. Na mposo yina landaka, zulunalu ya bwala yina monisaka foto ya muntu mosi ya kisalu ya mabaya ke tula kulunsi na nzo-nzambi. Kana nkuluntu yina ndimaka, bo zolaka kutula foto na yandi. Inki mutindu bampangi zolaka kudiwa? Lukumu ya nkuluntu yina zolaka kubeba. Yehowa mpi zolaka kuwa mpasi.

19-20. (a) Inki mambu beto me longuka? (b) Inki mambu mingi ya nkaka beto ta longuka?

¹⁹ Mbikudulu ya Biblia ke monisa nde, diambu ya nene yina ta salama ntama mingi ve kele ntangu makanda ta tuba nde “ngemba mpi lutaninu.” Sambu Yehowa me longaka beto, beto me zaba nde makanda ta kuka ve kutula ngemba ya kieleka mpi ya kimakulu. Inki beto fwete sala na ntwala nde mambu yina kusalama mpi lufwa ya kintulumukina kukwisa? Yehowa ke lomba beto na kulanda kusamuna nsangu ya Kimfumu, kukumisa bantu mingi balongoki mpi kukabwana ti mabundu ya luvunu. Mu mbandu, kuvanda ve muntu ya kimvuka mosi ya dibundu ya luvunu mpi kusala ve kisalu yina ke wakana ti Babilone ya Nene.

²⁰ Mambu ya nkaka ta salama na kitini yai ya nsuka ya “bilumbu ya nsuka.” Yehowa ta lomba beto mpi mambu ya nkaka. Inki mambu yango mpi nki mutindu beto lenda kudibongisa sambu na mambu yina ta salama ntama mingi ve? Disolo yina ke landa ta tubila yo.