1. Ihi i tu xikinisa kwila twala “mu izuwa ya sukidila-ku”?

Se eye a ku vwalela mu muvu wa 1914 mba mivu kupholo, mwenyu wê woso wa bhiti “mu izuwa ya sukidila-ku.” (2 Tim. 3:1) Etwenyoso twevu kyá maka a lungu ni izulukutu yambele Jezú kwila yeji bhita mu thembu yiyi. O ima yene mu bhita yenyiyi: Ita, kukamba kudya, itungutilu ya ixi, mawuhaxi, usweya, ni izukutisu yene mu bhita ni mundu wa Jihova. (Mat. 24:3, 7-9, 12; Luka 21:10-12) Twene mu mona we athu ala ni wendelu kala wambele poxolo Phawulu. (Tala o kaxa “ Kyebhi Kyala o Athu Lelu?”) Kuma tu abhezi a Jihova, twa xikina ni kidi kyoso kwila, twala ku disukilu dya “izuwa-phe ya sukidila-ku.”—Mik. 4:1.

2. Twa bhingi kwijiya o itambwijilu ya ibhwidisu yebhi?

² Kuma kwa bhiti kya mivu yavulu tunde 1914, tu tena kuzwela kwila, kindala twala ku disukilu dya “izuwa ya sukidila-ku.” Kuma o dizubhilu dya mundu yú wa ibha dya zukama, twa tokala kwijiya o itambwijilu ya ibhwidisu yiyi: Izulukutu yebhi yanda bhita ku disukilu dya “izuwa ya sukidila-ku”? Ihi ya mesena Jihova kokwetu tunde kindala kiki katé o kithangana kya izulukutu yiyi?

3. Kala kya ki kanena mu 1 Tesalonika 5:1-3, ngolokela yebhi yanda bhanga o ifuxi ya mundu?

³ Tanga 1 Tesalonika 5:1-3. Phawulu wa tumbula o ‘Kizuwa kya Jihova.’ Mu jivelusu jiji, o izwelu ‘Kizuwa kya Jihova’ ilombolola o kithangana kyoso kyanda mateka o kibwika kya  “Babilonya ya Dikota,” kifwa; o kisangela kya jingeleja joso ja makutu. O kizuwa kiki kyanda bhwa mu Alumajedone. (Dij. 16:14, 16; 17:5) Maji ande dya kumateka o “kizuwa” kiki, o ifuxi ya mundu woso anda bhanga o ngolokela: “Kuma kwa batama, kwa tululuka!” O a alunguludi amukwa amba: “Kwa tululuka, kwa kondama.” Kyoso o jinguvulu ja mundu kya bhanga ukamba mudyâ, mu veji javulu ene we mu tumbula o izwelu yiyi. * Maji o ngolokela yamba o Bibidya kwila “kuma kwa batama, kwa tululuka,” yanda difwa kyengi. Mukonda dyahi? Mukonda kyoso kyanda bhanga o ngolokela yiyi, o athu ku mundu woso, anda banza kwila, o jinguvulu a sange o kutululuka phala o athu oso. Maji mu kidi, “a kà tukumuka kibwika kyâ kya tula” mu “hadi ya dikota,” kala kya ki kanena.—Mat. 24:21.

4. (a) Ya lungu ni ngolokela “kwa batama, kwa tululuka” ima yahi ki twa ijiya? (b) Ihi i twejiya kyá?

⁴ Ya lungu ni ngolokela “kwa batama, kwa tululuka” sayi ima yanda bhita twa ijiya. Maji ya mukwa ki twa ijiya. Mu kifika, ki twejiya se ihi yanda bhangesa o jinguvulu kubhanga o ngolokela yiyi, ni kyebhi kyanda i bhanga. Ki twejiya we se anda bhanga ngó ngolokela imoxi mba anda bhanga mu veji javulu. Kabasa o ukexilu wa ka bhanga o ngolokela yiyi, o kima ki twejiya kyenyiki: Etu ki twa tokala kuxikina mu makutu a jinguvulu, a kwila a sange o kutululuka ku mundu woso. Mu veji dya kiki, yiyi yene o ngolokela yene mu tangela o Bibidya. Kyene o kijimbwete kilondekesa kwila, o ‘kizuwa kya Jihova’ kyanda mateka!

5. 1 Tesalonika 5:4-6 u tu kwatekesa kyebhi kukala polondo kyoso kyanda mateka o ‘kizuwa kya Jihova’?

⁵ Tanga 1 Tesalonika 5:4-6. Phawulu wa tu tendelesa i twa tokala kubhanga phala ni tu kale polondo kyoso kyanda mateka o ‘kizuwa kya Jihova.’ Ki twa tokala “kukala ku kilu kala ki bhanga athu amukwâ.” Maji twa tokala ‘kutona’ ni kukala kumesu azele. Mu kifika, twa bhingi kudilanga phala ki tu di te mu maka a jinguvulu. Se tu di ta mu maka a jinguvulu, ‘twanda bhanga mbandu ku mundu.’ (Nzwá 15:19) Etu twejiya kwila, o Utuminu wa Nzambi wene ngó wanda bheka o kutululuka ku mundu.

6. Twa tokala kudimuna akwetu ku ihi ni mukonda dyahi?

⁶ Twa tokala kukala ku mesu azele. Twa tokala we kudimuna akwetu, phala n’a tendela o izulukutu ya mu bhita ku mundu, kala kya kanena o Bibidya. Twa tokala kudimuna akwetu mu sidivisu ya kuboka mukonda, kyoso kyanda mateka o hadi ya dikota, o athu kanda tena dingi kumateka kusidivila Jihova. *

7. Ihi ya mesena Jihova kokwetu kindala kiki?

⁷ Mu ka kithangana ka kambe-ku ande dya  kumateka o “kizuwa” kyê, Jihova wa mesena kwila tu di bhakula mu sidivisu ya kuboka. Twa tokala kubhanga yoso phala ni tu “swine jinge mu kikalakalu kya Ngana.” (1 Kol. 15:58) Jezú wambele yoso i tweji bhanga. Kyoso kya zwela o ima yoso yeji bhita mu izuwa ya sukidila-ku, mwene wa bandekesa: “Mukonda ki bhinga o Njimbu Yambote a dyanga ku i boka . . . ku akwa jixi joso.” (Marku 13:4, 8, 10; Mat. 24:14) Ijiya kwila: Ithangana yoso i wenda mu boka, wa mu kwatekesa ku kumbidila o kikanenu kiki kya Bibidya!

8. Kyebhi kyene mu suluka ni kukula o njimbu yambote ya Utuminu?

⁸ Kyebhi kyene mu suluka ni kukula o njimbu yambote ya Utuminu? Mivu yoso, o athu evwa o njimbu yambote ya Utuminu, a mu di bandekesa. Mu kifika, mu izuwa yiyi ya sukidila-ku, o aboki a Utuminu mu ngongo yoso, a dibandekesa kyavulu. Ku muvu wa 1914, kwexile 5.155 a aboki, mu 43 kya jixi. Lelu, kwala 8.5 (dinake dya mazunda ni kaxaxi) ka aboki, mu 240 a jixi! Né kiki, o kikalakalu kyetu ki twa ki zubha luwa. Twa tokala kusuluka ni kutangela akwetu kwila, o Utuminu wa Nzambi wene ngó wanda zubha o hadi yoso ya athu.—Jisá. 145:11-13.

9. Mukonda dyahi twa tokala kusuluka ni kuboka o njimbu ya Utuminu?

⁹ Twanda zubha ngó o kikalakalu kyetu kya kuboka o njimbu ya Utuminu, kyoso Jihova kyanda tu tangela kwila kwabhu. Kwa kambe thembu kuxi phala o athu kwijiya Jihova Nzambi ni Jezú? (Nzwá 17:3) Ki twa kijiya. Twejiya ngó kwila katé kyoso o hadi ya dikota ki yanda mateka, ‘oso a fwamena o mwenyu ki wabhwa’ anda tena kuxikina o njimbu yambote. (Ika. 13:48) Kyebhi tu tena kukwatekesa o athu yá ande dya hadi ya dikota kubhixila?

10. Ihi yene mu tu bhana Jihova i tu kwatekesa kulonga o kidi ku athu?

¹⁰ Bhu kaxi ka kilunga kyê Jihova wene mu tu bhana yoso i twa bhindamena phala kulonga o kidi ku athu. Mu kifika twene mu tambula milongi mu yônge ya kaxi ka semana. O kyônge kiki, ki tu kwatekesa kwijiya se ihi i twanda zwela mu kubhana umbangi wa dyanga ni mu kukunda o muthu. I tu bhana we jindunge phala kulonga o Bibidya ku maxibulu metu. O kilunga kya Jihova kyene we mu tu  bhana o madivulu bhu kaxi ka jifalamenda jetu ja kulonga. O ji falamenda jiji ji tu kwatekesa phala . . .

• kumateka o kuzwela,

• kubhangesa o muthu kuwabhela o milongi,

• kukwatekesa o muthu kumesena kudilonga dingi,

• kulonga o kidi bhu kaxi ka Bibidya

• kwixana o athu phala kuya mu yônge ni kutokwesa mu sayte yetu.

Kukala ni jifalamenda jiji ki kyene ngó o kima kya beta-kota. Twa tokala we kukalakala naju. * Mu kifika, se wa zwela ni muthu wa mesena kwijiya dingi, anga u mu bhana ka mukanda mba kadivulu, mwene wanda kala ni kima phala kutanga, katé kizuwa ki wanda mukunda dingi. Mbeji joso, twa tokala kubhanga kima mu sidivisu ya kuboka o njimbu ya Utuminu.

11. Mukonda dyahi a bhange o Curso da Bíblia On-line?

¹¹ O ukexilu wengi wa Jihova kukwatekesa o athu kwijiya o kidi, o Curso da Bíblia On-line mu jw.org^®. (Bweta ku mbandu ENSINOS BÍBLICOS > LIÇÔS ON-LINE.) Mukonda dyahi a bhange o madisá yâ? Mbeji joso mazunda ni mazunda a athu ene mu tokwesa mu Internete o izwelu madisá a Bibidya. O madisá mu sayte yetu a tena kukwatekesa athu yá kudilonga o kidi kya Mak’â Nzambi. Sayi yá ala ni hele ya kudilonga o Bibidya kumoxi netu. Se u sanga o athu yá, londekesa o kursu mu sayte yetu mba u a tumikisa o linky ambata ku madisá yá. *

12. Ihi i tena kudilonga o muthu mu Curso da Bíblia On-line?

¹² O Curso da Bíblia On-line Ijimbulula o maka kala: “O Bibidya ni Mubhangi wê,” “O athu a tumbula mu Bibidya,” ni “kidyelelu ki bhana o Bibidya kya lungu ni hádya.” Mu ji mbandu jiji o muthu u tena kudilonga o maka yá:

• Kyebhi o Bibidya i tena kukwatekesa o muthu

• Jihova, Jezú ni ji anju a nanyi

• Mukonda dyahi Nzambi wa bhange o athu

• Mukonda dyahi kwala hadi ni usweya

O madisá yá anda zwela we kyebhi Jihova kyanda . . .

• zubha o hadi ni kalunga,

• wanda fukununa yó afwa kyá,

• wanda bhinganesa o utuminu wa jinguvulu ni Utuminu wa Nzambi.

13. O kwila madisá a Bibidya a bhinganesa o kudilonga o Bibidya ni Jimbangi ja Jihova kubhata? Jimbulula.

¹³ O madisá a Bibidya ka bhinganesa o kudilonga o Bibidya ni Jimbangi ja Jihova kubhata. Jezú wa tu bhana o ujitu wa kubhanga o maxibulu. O madisá a Bibidya a a bhange phala yó a mesena kwijiya dingi. Se ene a wabhela o milongi ya mu dilonga mu sayte u bheka wâ, anda bhinga ku Jimbangi ja Jihova phala o kudilonga o Bibidya kubhata. Ku disukilu dya disá o mutangi a mu swinisa kusonekea mu sayte phala kubhinga mulongexi phala ku mu longa o Bibidya kubhata. Bhu kaxi ka sayte yetu 230 kya athu ndenge ene mu bhinga phala kudilonga kubhata ku mundu woso! Kifwa-phe, kwa bhingi mwene kudilonga o Bibidya ni muthu kubhata!

14. Kala kya tendelesa Jezú mu divulu dya Matesu 28:19, 20, ihi i tu sota kubhanga ni mukonda dyahi?

¹⁴ Tanga Matesu 28:19, 20. Kuma tu alongexi a Bibidya, twa bhingi kubhanga yoso i tu tena phala “kubhanga maxibulu . . . , ku  a longa kwaluka o ima yoso [ya] . . . tumu [Jezú].” Twa bhingi kukwatekesa o athu kutendela kwila kima kyambote phala éne kusola kusidivila Jihova ni kukwatekesa o Utuminu wê. Kiki kilombolola kuma twa bhingi kusota kukwatekesa o athu kukumbidila o ima ya mu dilonga ku mwenyu wâ, ku mesena kudibhakula kwa Jihova ni kudibatizala. Kyene ngó kyanda tena kubhuluka mu kizuwa kya Jihova.—1 Phe. 3:21.

15. Ki twa tokala kuzanga o kithangana kyetu mu kubhanga ihi ni mukonda dyahi?

¹⁵ Kala ki twa tumbula kya kudima, kwa kambe ngó kithangana kyofele phala o disukilu dya ngongo yiyi. Mukonda dya kiki, ki twa tokala kuzanga o kithangana kyetu mu kusuluka ni kudilonga ni athu ka mesena kulungulula o ukexilu wâ, phala kulondekesa kwila a mesena kukituka jiselevende ja Jihova. (1 Kol. 9:26) Twa tokala kubhanga ni lusolo lwoso o kikalakalu kyetu. Kwene hanji athu avulu a bhingi kwijiya o njimbu ya Utuminu ande dya kubhixila o kithangana.

16. Kala kilondekesa o Dijingunwinu 18:2, 4, 5,8, ihi i twa tokala kubhanga etwenyoso? (Tala we ku lwiji.)

¹⁶ Tanga Dijingunwinu 18:2, 4, 5, 8. O jivelusu jiji jilondekesa kwila sayi ima ya mukwá ya tokala kubhanga o Jiselevende ja Jihova. O Jikidistá joso ja kidi katokala kubhanga mbandu mu ima yalungu ni Babilonya ya Dikota. Ande dya kudilonga o kidi, o dixibulu dya Bibidya nange wa tokalele mu ngeleja ya makutu. Mwene nange uya mu jimisa ja jingeleja ni mu ima ya kamukwa. Mba wa sangela-mu kitadi mu ngeleja yiyi. Ande dya dixibulu dya Bibidya ku kituka muboki ka mu batizala, mwene ka tokala dingi kubhanga mbandu ku jingeleja ja makutu. Mwene wa tokala kutumikisa mukanda ku ngeleja ya tokalele ni kwa tangela kwila ka mesena dingi kubhanga mbandu ya ngeleja yiyi ni kubatula o ukamba woso ni jingeleja ja makutu ja Babilonya ya Dikota. *

17. Ikalakalu yebhi ya tokala kudituna o Jikidistá, ni mukonda dyahi?

¹⁷ O Kidistá ya kidi wa tokala kwijiya se o salu yé ki i bhanga mbandu ni Babilonya ya Dikota. (2 Kol. 6:14-17) Mu kifika, mwene ka tokala kukala mukalakadi ya ngeleja. Ku mbandu ya mukwa, o Kidistá wa tokala mu ditenda dyéngi kanda xikina kubhanga kikalakalu mu sabhalalu i bhanga mbandu ya ngeleja  ya makutu. Se sayi Kidistá wala ni wenji wê, mwene kanda sota kubhanga sidivisu ni ditenda di bhanga mbandu ya Babilonya ya Dikota. Mukonda dyahi twa tokala kudituna o ima yiyi? Mukonda ki twa tokala kubhanga mbandu ya milongi ya makutu, ni mu ibhangelu yayibha ya jingeleja, mukonda ku mesu a Nzambi a xidi.—Iza. 52:11. *

18. Kyebhi o phange wa londekesa kwila wexile mu kayela o itendelesu ya lungu ni ikalakalu?

¹⁸ Mivu kudima sayi kafunga wexile ni wenji wê, a mu bhingile phala kubhanga kikalakalu kya kusonga mabaya mu ngeleja mu mbanza mwa tungile. O muthu weza ku mu bhinga, wejidile kya kwila o phange wene mu dituna ku kalakala mu ngeleja. Maji o diyala didi dya bhindamene mwene muthu phala kukalakala. Né kiki, o phange wehela o itendelesu ya Bibidya ku mwendesa, yu wa ditunu o kikalakalu. Mu semana ya kayela-ku, o jurnale ya londekesa diyala dya mukwa ku foto wexile mu phaphela o dikulusu ku ngeleja. Xinganeka hanji? Se phang’yetu wa xikinine o kikalakalu kyenyókyo hinu ki mwene weji moneka ku jurnale? Mwene weji xidisa o dijina dyê ni dijina dya jiphange jê! Xinganeka kyebhi kyeji divwa Jihova.

19-20. (a) Ihi i twa bhingi kudilonga? (b) Ihi dingi i twa bhingi kubhanga?

¹⁹ Kala kyamba o Bibidya, o kizulukutu kyanda kayela mu kudikumbidila kya lungu ni ngolokela dya kisangela ya jinguvulu, “kuma kwa batama, kwa tululuka.” Tu sakidila Jihova mu ku tu kukwatekesa kwijiya kwila o jinguvulu ka tenena ku bheka o paze ku mundu woso. Ihi i tu tena kubhanga ande dya kwiza o izulukutu yiyi? Jihova wa mesena kwila tu suluka mu kuboka o njimbu ya Utuminu ni kusota kubhanga maxibulu. Ki twa tokala we kubhanga mbandu mu jingeleja ja makutu. Kifwa, kilombolola kuma, ki twa tokala kubhanga mbandu mu Babilonya ya Dikota ni kubhanga salu mu jingeleja jiji.

²⁰ Kwala izulukutu yamukwá yanda bhita ku disukilu dya “izuwa ya sukidila-ku.” Sayi dingi ima ya mukwa ya mesena Jihova kwila tu i bhanga. O ima yebhi ni kyebhi ki tu tena ku di sokejeka phala o ima yoso yanda kwiza ku hádya? Twanda dilonga mu milongi ya kayela.