1. Wetin mek wi biliv tranga wan se wi de insay di las dez?

NA AFTA di ia 1914 dɛn bɔn yu? If na so i bi, yu dɔn liv ɔl yu layf insay di las dez. (2 Tim. 3:​1) Wi ɔl dɔn yɛri bɔt di tin dɛn we Jizɔs bin tɔk se go apin insay dis las dez. Tin dɛn lɛk wɔ, tin fɔ it dɔn shɔtin, atkwek, sik dɛn we de prɛd, bɔku bɔku pipul dɛn we de brok lɔ, ɛn dɛn de mek Jiova in pipul dɛn de sɔfa. (Mat. 24:​3, 7-9, 12; Lyuk 21:​10-12) Wi dɔn si bak di we aw pipul dɛn de biev jɔs lɛk aw di apɔsul Pɔl bin tɔk. (Luk di bɔks we gɛt di taytul “ Di We Aw Pipul dɛn Tan Rayt Naw.”) As Jiova in savant dɛn, wi biliv tranga wan se wi de insay di tɛm “we di wɔl go want fɔ dɔn.”—Mayk. 4:​1, NW.

2. Us kwɛstyɔn dɛn wi nid fɔ gɛt ansa to?

² Bɔku tɛm dɔn pas frɔm 1914, so wi de insay di las pat na di las dez. Bikɔs di tɛm fɔ lɛ dis wɔl dɔn nɔ de fa igen, wi nid fɔ no di ansa to sɔm impɔtant kwɛstyɔn dɛn: Wetin-ɛn-wetin go apin di tɛm we di las dez go want fɔ dɔn? Ɛn wetin Jiova want wi fɔ du we wi de wet fɔ lɛ dɛn tin ya apin?

3. Frɔm di prɔfɛsi we de na Fɔs Lɛta fɔ Tɛsalonayka 5:​1-3 (NW), us anawnsmɛnt di lida dɛn na di wɔl gɛt fɔ mek?

³ Rid Fɔs Lɛta fɔ Tɛsalonayka 5:​1-3, NW. Pɔl bin tɔk bɔt “Jiova in de.” Insay dis skripchɔ, Jiova in de min di tɛm we dɛn go atak “Babilɔn di Gret,” we na ɔl dɛn lay lay rilijɔn,  te to di tɛm we Amagɛdɔn go kam. (Rɛv. 16:​14, 16; 17:​5) Jɔs bifo Jiova in de bigin, di lida dɛn na ɔl di neshɔn dɛn go tɔk se “wi dɔn gɛt pis ɛn natin nɔ de fɔ fred!” Di lida dɛn na di wɔl kin yuz dɛn sem kayn wɔd dɛn ya we dɛn de tɔk bɔt pis bitwin neshɔn dɛn. * Bɔt di wɔd dɛn we di lida dɛn na di wɔl gɛt fɔ anawns fɔ se “wi dɔn gɛt pis ɛn natin nɔ de fɔ fred” go difrɛn frɔm wetin di Baybul tɔk. Wetin mek? Na bikɔs we dis go apin, pipul dɛn go tink se di lida dɛn na di wɔl dɔn ebul fɔ mek di wɔl sef fɔ mɔtalman ɛn natin nɔ de fɔ fred igen. Bɔt fɔ tru, na da tɛm de di big big trɔbul go bigin ɛn “dɛn ɛnd go kam kwik kwik wan.”—Mat. 24:​21.

4. (a) Wetin wi fɔ wet fɔ si bɔt di anawnsmɛnt we dɛn go mek fɔ se “wi dɔn gɛt pis ɛn natin nɔ de fɔ fred”? (b) Wetin wi no bɔt da anawnsmɛnt de?

⁴ Wi no sɔm tin dɛn bɔt di anawnsmɛnt we dɛn go mek fɔ se “wi dɔn gɛt pis ɛn natin nɔ de fɔ fred!” Bɔt ɔda tin dɛn de we wi nɔ no. Wi nɔ no wetin go mek dɛn mek da anawnsmɛnt de ɔ aw dɛn go mek am. Ɛn wi nɔ no if dɛn go mek bɔku anawnsmɛnt ɔ na wan big anawnsmɛnt dɛn go mek. Ilɛk wetin apin, na wan tin wi no, dat na: Wi nɔ fɔ alaw dɛn fɔ ful wi fɔ biliv se di lida dɛn na di wɔl go ebul fɔ mek pis de ɔlsay na di wɔl. Bifo dat, di Baybul tɛl wi se na da anawnsmɛnt de wi fɔ de wach fɔ. Na sayn fɔ sho se “Jiova in de” de kam bigin!

5. Aw Fɔs Lɛta Fɔ Tɛsalonayka 5:​4-6 ɛp wi fɔ rɛdi wisɛf fɔ “Jiova in de”?

⁵ Rid Fɔs Lɛta Fɔ Tɛsalonayka 5:​4-6. Pɔl bin tɛl wi wetin wi fɔ du fɔ mek shɔ se wi rɛdi fɔ “Jiova in de.” Wi nɔ fɔ “tan lɛkɛ pipul we de slip, lɛkɛ dɛn ɔda pipul.” Wi fɔ “waydawek” ɛn wi fɔ soba. Fɔ ɛgzampul, wi nid fɔ tek tɛm fɔ lɛ wi kɔntinyu fɔ avɔyd ɛnitin we gɛt fɔ du wit pɔlitiks. If wi put an pan ɛnitin we gɛt fɔ du wit pɔlitiks, wi dɔn tan lɛk di pipul dɛn na di wɔl. (Jɔn 15:​19) Wi no se na Gɔd in Kiŋdɔm nɔmɔ go mek pis de ɔlsay na di wɔl.

6. Wetin wi want fɔ ɛp ɔda pipul dɛn fɔ du? Wetin mek?

⁶ Wi nɔ jɔs want fɔ kɔntinyu fɔ waydawek, bɔt wi want bak fɔ ɛp ɔda pipul dɛn fɔ lan bɔt wetin di Baybul se go apin na di wɔl. Wi fɔ mɛmba se we di big big trɔbul go bigin, i go dɔn tu let fɔ lɛ pipul dɛn kam to Jiova. Na dat mek wi prichin wok rili ɔjɛnt! *

7. Wetin Jiova want wi fɔ du rayt naw?

⁷ Insay dis shɔt tɛm we dɔn lɛf fɔ lɛ “Jiova in de” bigin, Jiova want wi fɔ lɛ wi  kɔntinyu fɔ du di prichin wok. Wi nid fɔ mek shɔ se wi “de du Gɔd in wok ɔltɛm.” (1 Kɔr. 15:​58) Jizɔs bin dɔn tɔk bɔt wetin wi go du. We i bin de tɔk bɔt ɔl di tin dɛn we go apin insay di las dez, i bin tɔk se: “Bifo di wɔl dɔn, pipul ɔlɔbɔt na [di] wɔl fɔ dɔn yɛri di Gud Nyuz fɔs.” (Mak 13:​4, 8, 10; Mat. 24:​14) Jɔs tink bɔt dis: Ɛnitɛm we yu de go du di prichin wok, yu de ɛp fɔ lɛ wetin di Baybul bin dɔn tɔk se go apin bi!

8. Aw wi no se di prichin wok de kɔntinyu fɔ go bifo?

⁸ Wetin wi go se bɔt di we aw di prichin wok de go bifo? Ɛvri ia, mɔ ɛn mɔ pipul dɛn de yɛri di gud nyuz bɔt Gɔd in Kiŋdɔm. Fɔ ɛgzampul, tink bɔt aw di pɔblisha dɛn de bɔku ɔlsay na di wɔl insay dis las dez. Insay 1914, na bin 5,155 pɔblisha dɛn bin de na 43 kɔntri dɛn. Tide, na lɛk 8.5 milyɔn pɔblisha dɛn de na 240 kɔntri dɛn! Bɔt stil, di wok nɔ dɔn yet. Wi fɔ kɔntinyu fɔ tɛl ɔda pipul dɛn se na Gɔd in Kiŋdɔm nɔmɔ go sɔlv mɔtalman prɔblɛm dɛn.—Sam 145:​11-13.

9. Wetin mek wi fɔ kɔntinyu fɔ prich bɔt di Kiŋdɔm mɛsej?

⁹ Wi prichin wok nɔ go dɔn te Jiova tɔk se i du so. Ɔmɔs tɛm dɔn lɛf fɔ lɛ pipul dɛn kam fɔ no bɔt Jiova Gɔd ɛn Jizɔs Krays? (Jɔn 17:​3) Wi nɔ no. Wi no nɔmɔ se te di big big trɔbul go bigin ɛnibɔdi “we rili sho se [i] want fɔ gɛt layf we go de sote go” stil gɛt di chans fɔ lisin to di gud nyuz ɛn disayd fɔ sav Jiova. (Akt 13:​48, NW) Aw wi go ɛp dɛn pipul dɛn ya bifo i go tu let?

10. Wetin Jiova de gi wi fɔ ɛp wi fɔ tich pipul dɛn di trut?

¹⁰ Insay di ɔganayzeshɔn, Jiova de gi wi ɔl wetin wi nid fɔ tich pipul dɛn di tru tin dɛn we de na di Baybul. Fɔ ɛgzampul, wi de gɛt trenin ɛvri wik na di mitin we wi kin gɛt insay di wik. Dis mitin de ɛp wi fɔ no wetin fɔ tɔk di fɔstɛm we wi go prich to pɔsin ɛn we wi de du ritɔn visit dɛn. Ɛn wi de lan aw fɔ kɔndɔkt Baybul stɔdi dɛn. Jiova in ɔganayzeshɔn dɔn gi wi bak tul dɛn na wi Tichin Tulbɔks. Dɛn tul dɛn ya de ɛp wi fɔ . . .

•   stat fɔ tɔk to pɔsin,

• prich di kayn we we go mek pipul dɛn lisin,

• ɛp pipul dɛn fɔ lɛ dɛn go want fɔ lan mɔ,

• tich di tru tin dɛn we wi de kɔndɔkt Baybul stɔdi, ɛn

• ɛnkɔrej di wan dɛn we gɛt intrɛst fɔ go na wi wɛbsayt ɛn wi Kiŋdɔm Ɔl dɛn.

Fɔ tru, i nɔ jɔs du fɔ gɛt dɛn tul dɛn ya. Wi fɔ yuz dɛn. * Fɔ ɛgzampul, afta we yu dɔn fɔ tɔk fayn wan to pɔsin we rili want fɔ no mɔ bɔt di Baybul, yu lɛf trakt ɔ magazin wit am, i go ebul fɔ rid am te yu go to am bak. Na wisɛf sɛf gɛt di wok fɔ kɔntinyu fɔ prich di Kiŋdɔm mɛsej ɛvri mɔnt.

11. Wetin mek dɛn mek di Online Bible Study Lessons?

¹¹ Wan ɔda ɛgzampul bɔt aw Jiova de ɛp in pipul dɛn fɔ lan di trut na we wi tink bɔt di Online Bible Study Lessons we de na jw.org^®. (Luk ɔnda di say we se BIBLE TEACHINGS > ONLINE LESSONS.) Wetin mek dɛn mek dɛn lɛsin dɛn ya? Ɛni mɔnt, bɔku bɔku pipul dɛn ɔlsay na di wɔl de go na di Intanɛt fɔ Baybul lɛsin dɛn. Di lɛsin dɛn we de na wi wɛbsayt kin ɛp pipul dɛn fɔ lan di trut na Gɔd in Wɔd. Dɔn bak, sɔm pan di pipul dɛn we wi de tɔk to kin fred smɔl fɔ gri fɔ stɔdi di Baybul wit wi. If na so i bi, sho dɛn dis say na wi wɛbsayt ɔ sɛn di link fɔ dɛn lɛsin dɛn ya to dɛn. *

12. Wetin pɔsin go lan frɔm di Online Bible Study Lessons?

¹² Di Online Bible Study Lessons de tɔk bɔt dɛn tɔpik dɛn ya: “The Bible and Its Author,” “The Bible’s Main Characters,” ɛn “The Bible’s Message of Hope.” Insay dɛn tɔpik dɛn ya, yu go lan:

• Aw di Baybul kin ɛp pɔsin?

• Udat na Jiova, Jizɔs, ɛn di enjɛl dɛn?

• Wetin mek Gɔd mek mɔtalman?

• Wetin mek bad tin dɛn de ɛn tin dɛn we de mek wi sɔfa?

Di lɛsin dɛn de tɔk bak bɔt aw Jiova go . . .

• pul day ɛn mek wi lɛf fɔ sɔfa,

• gi layf bak to di wan dɛn we dɔn day, ɛn

• pul mɔtalman gɔvmɛnt we dɔn fel ɛn briŋ in yon Kiŋdɔm.

13. If sɔmbɔdi dɔn rid ɔl di online study lessons, yu tink se i stil nid fɔ stɔdi di Baybul wit wan Jiova Witnɛs? Ɛksplen.

¹³ If wi de rid di tin dɛn we de na di online lessons, dat nɔ min se wi nɔ fɔ stɔdi di Baybul. Jizɔs dɔn gi wi di chans fɔ mek disaypul dɛn. Wi op se di wan dɛn we gɛt intrɛst go rid di online lessons, lɛk di tin dɛn we dɛn de rid, ɛn want fɔ lan mɔ. Sɔntɛm dat go mek dɛn want fɔ stɔdi di Baybul. Na di las pat na ɛni lɛsin, dɛn de tɛl di pɔsin we de rid fɔ aks fɔ lɛ sɔmbɔdi stɔdi am di Baybul. Ɛvride, na lɛk 230 pipul dɛn kin aks fɔ stɔdi di Baybul na wi wɛbsayt ɔlsay na di wɔl! I rili impɔtant fɔ lɛ sɔmbɔdi stɔdi di Baybul wit wan Jiova Witnɛs!

14. Frɔm wetin Jizɔs bin tɛl wi fɔ du na Matyu 28:​19, 20, wetin wi fɔ tray tranga wan fɔ du? Wetin mek?

¹⁴ Rid Matyu 28:​19, 20. We wi de kɔndɔkt Baybul stɔdi dɛn, wi fɔ tray tranga wan fɔ mek di pipul dɛn bi Jizɔs in “lanin bɔy dɛn” ɛn “lan dɛn fɔ du ɔl wetin [Jizɔs] dɔn tɛl” wi fɔ du. Wi nid fɔ ɛp  pipul dɛn fɔ ɔndastand se i rili impɔtant fɔ lɛ dɛn disayd fɔ sav Jiova ɛn sɔpɔt in Kiŋdɔm. Dis min se wi nid fɔ tray tranga wan fɔ ɛp pipul dɛn fɔ du di tin dɛn we dɛn de lan, gi dɛn layf to Jiova, ɛn baptayz. Na dat nɔmɔ go mek dɛn sev di tɛm we Jiova in de go kam.—1 Pit. 3:​21.

15. Wetin wi nɔ fɔ west wi tɛm fɔ du? Wetin mek?

¹⁵ Jɔs lɛk aw wi bin dɔn tɔk fɔs, bɛtɛ tɛm nɔ de igen fɔ lɛ dis wɔl dɔn. Na dat mek wi nɔ de west wi tɛm fɔ stɔdi di Baybul wit pipul dɛn we nɔ de chenj dɛn layf fɔ sho se dɛn want fɔ bi Jiova in savant dɛn. (1 Kɔr. 9:​26) Di wok we wi de du rili ɔjɛnt! Bɔku pipul dɛn de we stil nid fɔ yɛri di mɛsej bɔt di Kiŋdɔm bifo i tu let.

16. Frɔm wetin de na Rɛvɛleshɔn 18:​2, 4, 5, 8 (NW), wetin wi ɔl fɔ du? (Luk bak di futnot.)

¹⁶ Rid Rɛvɛleshɔn 18:​2, 4, 5, 8, NW. Dɛn vas dɛn ya sho ɔda tin bak we Jiova want in savant dɛn fɔ du. Ɔlman we na tru Kristian fɔ mek shɔ se dɛn nɔ gɛt natin fɔ du wit Babilɔn di Gret. Pɔsin we de stɔdi di Baybul go mɔs dɔn de na wan lay lay rilijɔn bifo i bigin fɔ lan di trut. I go mɔs dɔn de atɛnd dɛn savis dɛn ɛn put an pan ɔda tin dɛn we dɛn kin du. Ɔ sɔntɛm i bin de gi mɔni fɔ sɔpɔt da ɔganayzeshɔn de. Bifo di Baybul studɛnt go fit fɔ bi ɔnbaptayz pɔblisha, i fɔ mek shɔ se i nɔ gɛt natin fɔ du wit lay lay rilijɔn igen. I fɔ rayt lɛta to di chɔch we i bin de go ɔ ɛni ɔganayzeshɔn we gɛt fɔ du wit Babilɔn di Gret fɔ se in nɔto dɛn mɛmba igen. *

17. Uskayn wok dɛn we tru Kristian dɛn fɔ avɔyd? Wetin mek?

¹⁷ Pɔsin we na tru Kristian fɔ mek shɔ se di wok we i de du nɔ gɛt natin fɔ du wit Babilɔn di Gret. (2 Kɔr. 6:​14-17) Fɔ ɛgzampul, i nɔ fɔ bi wokman na ɛni chɔch. Dɔn bak, if dɛn sɛn pɔsin we na tru Kristian we nɔ de wok fɔ insɛf fɔ go du imajɛnsi wok na ples we dɛn de yuz fɔ lay lay wɔship, i go nid fɔ disayd fɔ insɛf wetin i fɔ du. Di atikul we de na di futnot go ɛp am fɔ no mɔ bɔt wetin fɔ du. Ɛn if tru Kristian gɛt in yon biznɛs, i nɔ go tray fɔ gɛt wok ɔ gri fɔ du wok we gɛt ɛnitin fɔ du wit Babilɔn di Gret. Wetin mek wi de tinap tranga wan fɔ dis kayn tin? Na bikɔs wi nɔ want fɔ gɛt ɛnitin fɔ du wit di lay lay  tichin dɛn ɛn di bad bad tin dɛn we lay lay rilijɔn dɛn de du, we na tin dɛn we nɔ klin na Gɔd in yay.—Ayz. 52:​11. *

18. Aw wan brɔda bin obe di prinsipul dɛn na di Baybul pan in wok we i de du?

¹⁸ Trade, wan kɔntraktɔ bin tɛl wan ɛlda we gɛt in yon biznɛs fɔ du wan smɔl kapɛnta wok na wan chɔch we de na di tɔŋ usay di brɔda de. Di kɔntraktɔ no se di brɔda bin dɔn de tɔk se i nɔ go du wok fɔ ɛni chɔch. Bɔt dis tɛm di kɔntraktɔ bin de rili fɛn pɔsin fɔ du wan wok fɔ am. Bɔt pan ɔl dat, di brɔda bin fala di prinsipul dɛn we de na di Baybul ɛn nɔ gri fɔ tek di wok. Di ɔda wik, wan nyuspepa sho wan pikchɔ we wan ɔda kapɛnta de fiks krɔs na di chɔch. If wi brɔda bin gri fɔ du di wok, na in pikchɔ bin fɔ dɔn de na di nyuspepa. Tink bɔt aw dat fɔ bin dɔn mek di brɔda gɛt badnem to in kɔmpin Kristian dɛn! Tink bak bɔt aw Jiova bin fɔ dɔn fil.

19-20. (a) Wetin wi dɔn lan? (b) Wetin bak wi nid fɔ lan?

¹⁹ Frɔm wetin di Baybul bin dɔn tɔk, di ɔda impɔtant tin we go apin jisnɔ na di wɔl na we ɔl di lida dɛn na di wɔl go tɔk se “wi dɔn gɛt pis ɛn natin nɔ de fɔ fred!” Wi tɛl Jiova tɛnki fɔ wetin i dɔn tich wi bikɔs wi no se di neshɔn dɛn nɔ go ebul mek pis de na di wɔl sote go. Wetin wi fɔ du bifo da tɛm de rich ɛn we Jiova go dɔnawe wit dɛn kwik kwik wan? Jiova want wi fɔ kɔntinyu fɔ de prich di mɛsej bɔt in Kiŋdɔm ɛn tray fɔ mek mɔ disaypul dɛn. Dɔn, wi nid fɔ avɔyd ɛnitin we gɛt fɔ du wit ɔl dɛn lay lay rilijɔn dɛn. Dat min bak se wi fɔ stɔp fɔ bi mɛmba na Babilɔn di Gret ɛn nɔ du ɛni wok we gɛt fɔ du wit Babilɔn di Gret.

²⁰ Ɔda tin dɛn de bak we gɛt fɔ apin insay di las pat pan di las dez. Dɔn, ɔda tin dɛn de we Jiova want wi fɔ du. Wetin na dɛn tin dɛn ya, ɛn aw wi go rɛdi wisɛf fɔ ɔltin we gɛt fɔ apin tumara bambay? Wi go tɔk bɔt dis insay di nɛks atikul.