1. Nkia ziku tuna kiau vo mu lumbu yambaninu tuzingilanga?

NGA ku nim’a mvu wa 1914 wawutuka? Avo i wau, mu “lumbu yambaninu” ya tandu kiaki ozingilanga. (2 Tim. 3:1) Yeto awonso tumonanga yo wá mana Yesu kasakula mu kuma kia ntangwa yayi, i sia vo, vita, mvengele, nzakama za ntoto, vuku, wokela kwa umpumbulu yo lubangamu lwa nkangu a Yave. (Mat. 24:3, 7-9, 12; Luka 21:10-12) Tumonanga mpe e kadilu kina o wantu besonganga nze una Paulu wa ntumwa kasakula. (Tala e babu “ E Kadilu ya Wantu o Unu.”) Yeto Mbangi za Yave tuna ye ziku vo mu “lumbu yambaninu” tuzingilanga.—Mika 4:1.

2. Nkia yuvu tubakila e mvutu?

² Wau vo se kolo kiayingi kiviokele kala tuka muna mvu wa 1914, owau tuzingilanga kikilu ku mfoko a ‘lumbu yambaninu.’ Ekolo e mbaninu a tandu kiaki ifinamanga, tufwete zaya e mvutu za yuvu eyi yamfunu: Nkia mambu mevangama ku mfoko a “lumbu yambaninu”? Adieyi Yave kevavanga vo twavanga ekolo tuvingilanga e mambu mama?

3. Landila ungunza una muna 1 Tesalonika 5:1-3, e zula nkia diambu bevova?

³ Tanga 1 Tesalonika 5:1-3. Paulu wavovela e “lumbu kia Yave.” Mu sono kiaki, e lumbu kia Yave kiyikanga e kolo kiyantikila muna lufwasu lwa Babele Anene, i sia vo, kintwadi kia nsambila zawonso zaluvunu yo fokokela muna Armangedo. (Lus. 16:14, 16; 17:5) Vitila e “lumbu” kiaki kiayantika, e zula bevova vo “Luvuvamu ye ngemba.” Ezak’e ntangwa, ayadi a nza mpe besadilanga e mvovo miau mimosi vava bevovelanga e  ngwizani vana vena e zula. * Kansi, o luzayisu lwa “luvuvamu ye ngemba” luyikwanga muna Nkand’a Nzambi lwaswaswana lukala. Ekuma? Kadi vava e diambu diadi divangama o wantu beyindula vo ayadi batwese luvuvamu ova nza. Kansi e ludi i kiaki, e nza imona o luyantiku lwa “mpasi zayingi” ezi zifokokela muna “lubukumuku lwa kinsalukisa.”—Mat. 24:21.

4. (a) Nkia mambu ke tuzeye ko mu kuma kia luzayisu lwa “luvuvamu ye ngemba”? (b) Nkia mambu tuzeye mu kuma kia luzayisu lwalu?

⁴ Tuzeye maka mambu mu kuma kia luzayisu lwa “luvuvamu ye ngemba.” Kansi, vena ye mambu mankaka ke tuzeye mo ko. Ke tuzeye ko dina difila ayadi muna vana luzayisu lwalu ye mpila bevangila wo. Ke tuzeye ko kana vo luzayisu lwalu nkumbu miayingi luvewa yovo nkumbu mosi kaka. Kiakala nkia diambu divangama, edi tuzeye: Ke tuvukumunua ko kwa ngindu za sia vo ayadi balendele twasa luvuvamu ova nza. Kansi, o lwalu i luzayisu luyikwanga muna Nkand’a Nzambi tufwete vingila. Ekiaki i sinsu kisonga vo e “lumbu kia Yave” se kiyantika.

5. E sono kia 1 Tesalonika 5:4-6, aweyi kikutusadisilanga mu kala twakubama mu kuma kia “lumbu kia Yave”?

⁵ Tanga 1 Tesalonika 5:4-6. O lulukisu lwa Paulu lukutusadisanga mu zaya una tulenda kubamena mu kuma kia “lumbu kia Yave.” Muna kuma kiaki, ke tufwete ‘leka ko nze ankaka.’ Tufwete ‘yingila’ yo lungalala. Kasikil’owu, tufwete venga konso diambu dilenda kutufila mu kuyisia mu mambu ma tuyalu. Avo tuyisidi muna mambu mama, tulenda ‘kituka akwa nza.’ (Yoa. 15:19) Tuzeye wo vo Kintinu kia Nzambi kaka kilenda twasa o luvuvamu mu nza yawonso.

6. Nkia diambu tufwete sadisila akaka mu vanga? Ekuma?

⁶ Vana fulu kia yingila kaka yeto kibeni, tufwete mpe sadisa akaka bazaya mana o Nkand’a Nzambi uvovanga mu kuma kia mana mevangama ova nza. Tufwete sungamenanga vo vava e mpasi zayingi ziyantika, o wantu ke bekala diaka ye lau dia sadila Yave ko. Ekiaki i kuma dinina o mfunu mu samuna e nsangu zambote owau. *

7. Adieyi Yave kevingilanga vo twavanga owau?

⁷ Mu kolo kiaki kiandwelo kisidi vitila e “lumbu kia Yave” kiayantika, Yave ovingilanga vo twayivana muna salu kia samuna e nsangu zambote. Yeto awonso tufwete kala ye ziku vo mu ‘wokesa kaka tuna e salu kia Mfumu.’ (1 Kor. 15:58) Yesu wasakula dina tufwete vanga. Vava kayika mana mevangama omu lumbu yayi yambaninu, wakudikila vo:  “Muna zula yawonso mpe, e nsangu zambote zisamunua entete.” (Maku 13:4, 8, 10; Mat. 24:14) Zaya e diambu edi: Konso ntangwa ovaikanga muna salu kia umbangi, ungunza wa Nkand’a Nzambi olungisanga.

8. Aweyi e salu kia samuna e nsangu zambote za Kintinu kikwamanananga nungunukina?

⁸ Adieyi tulenda vova mu kuma kia lunungunuku lwa salu kia samuna e nsangu zambote za Kintinu? Konso mvu, wantu ayingi betambulwilanga e nsangu za Kintinu. Kasikil’owu, yindula una o lutangu lwa ateleki a Kintinu luwokelelanga mu lumbu yayi yambaninu. Muna mvu wa 1914, tezo kia 5.155 ma ateleki bakala mu nsi 43. O unu, vioka tezo kia 8.5 milhões ma ateleki bena mu nsi 240. Kana una vo i wau, e salu kieto ke kialweke ntete ku mfoko ko. Tufwete kwamanana samuna kwa wantu vo e Kintinu kia Nzambi i kiau kaka kifokola e mpasi zawonso ova nza.—Nku. 145:11-13.

9. Ekuma tufwete kwamanena samuna e nsangu zambote za Kintinu?

⁹ E salu kieto kia samuna e nsangu zambote za Kintinu ke kifokoka ko yavana Yave kevova vo ifwene. Kolo kwa kisidi kimana o wantu bazaya Yave wa Nzambi yo Yesu Kristu? (Yoa. 17:3) Ke tuzeye ko. Kansi, tuzeye wo vo yavana e mpasi zayingi ziyantika, awana ‘bena kikilu ye luzolo lwa vua moyo a mvu ya mvu,’ balenda tambulwila e nsangu zambote. (Mav. 13:48) Aweyi tulenda sadisila wantu awaya ekolo twakinu ye ntangwa?

10. Nkia lusadisu Yave kekutuvananga muna longa e ludi kwa wantu?

¹⁰ Yave osadilanga nkubik’andi mu kutuvana yawonso tuvuidi o mfunu muna longa e ludi kwa wantu. Kasikil’owu, tutoma longwanga muna konso lukutakanu lwa kati kwa lumingu. O lukutakanu lwalu lukutusadisanga mu zaya mana tulenda vova muna moko kiantete ye vava tuvutukanga kingula o wantu. Lukutulonganga mpe una tulenda fidila e longi dia Nkand’a Nzambi. E nkubik’a Yave ikutuvananga mpe e sadilwa ina muna Salanganu Yeto ya Longela. E sadilwa yayi ikutusadisanga mu . . .

• yantika e moko,

• tunta e sungididi kia wantu,

• fila wantu mu kala ye tima dia longoka mayingi,

• longa e ludi muna longi dia Nkand’a Nzambi yo

• kasakesa akwa luzolo lwambote mu kota muna nzil’eto ya internete yo kubabokela mu lungana yeto muna Seka dia Kintinu.

Dialudi vo, o kala ye salanganu yayi ke diau  kaka ko divavuanga. Kansi, divavanga vo twasadilanga yo. * Kasikil’owu, avo tumokene yo muntu osongele luzolo lwambote yo kunsisila finkanda-nkanda yovo Eyingidilu yovo Despertai!, wafwana dio tanga yavana tuvutuka kunkingula. Konso muntu mu yeto una ye mbebe ya kuyivana muna salu kia samuna e nsangu zambote za Kintinu mu konso ngonde.

11. Ekuma e kunku Curso da Bíblia On-line kiavaikisilwa?

¹¹ E kunku Curso da Bíblia On-line kina muna jw.org^®, i mpila yankaka o Yave kesadisilanga o wantu mu longoka e ludi. (Ziula vana vasonama ENSINOS BÍBLICOS > LIÇÕES ON-LINE.) Ekuma e kunku kiaki kiavaikisilwa? Konso ngonde, wantu ayingi mu nza yawonso bekotanga muna Internete mu vava malongi ma Nkand’a Nzambi. E kunku kiaki kina muna nzil’eto ya internete kilenda fila o wantu mu zaya e ludi kia Diambu dia Nzambi. muna bona e nona, avo tuwananene yo muntu muna salu kia umbangi una yo lukatikisu mu longoka Nkand’a Nzambi yo yeto, tulenda kunsonga e kunku kiaki muna nzil’eto ya internete yovo kuntwikila muna telefone e fulu kalenda kio sololwela. *

12. Nkia mambu o muntu kalenda longoka muna kunku Curso da Bíblia On-line?

¹² Muna kunku Curso da Bíblia On-line tulenda mo solola malongi malende: A Bíblia e seu Autor, Os principais personagens da Bíblia ye A mensagem da Bíblia sobre um futuro melhor. Ekolo o muntu kelongokanga malongi mama olenda zaya:

• Una Nkand’a Nzambi ulenda kunsadisila

• Nani i Yave, Yesu ye ambasi

• Ekuma Nzambi kavangila o wantu

• Ekuma e mambu mambi ye mampasi mevangamenanga ova nza

E malongi mama mevovelanga mpe una Yave kesinga . . .

• fokolwela e mpasi yo lufwa,

• kefudila mafwa ye

• una kevingisila Kintinu kiandi vana fulu kia tuyalu twa wantu.

13. Nga e malongi mevaikiswanga muna internete mevinganga vana fulu kia longoka o Nkand’a Nzambi yo muntu? Sasila.

¹³ E kunku Curso da Bíblia On-line ke yavingiswa va fulu kia longi dia Nkand’a Nzambi ko difilwanga kwa Mbangi za Yave. Kadi Yesu kwa yeto kavana e lau dia kitula wantu se alongoki. Tuna ye vuvu vo akwa luzolo lwambote besinga kota muna nzil’eto yo yangalela mana belongoka yo kala ye luzolo lwa zaya mayingi. Ediadi nanga dilenda kubafila mu tambulwila e longi dia Nkand’a Nzambi. Kuna mfoko a konso longi, vena ye fulu kina o ntangi kalenda soneka mu lomba e longi dia Nkand’a Nzambi kwa Mbangi a Yave. Muna lusadisu lwa nzil’eto ya internete, konso lumbu tutambulanga tezo kia 230 za ndomba mu longoka Nkand’a Nzambi mu nz’amvimba. E longi diadi dia wantu wole diamfunu kikilu!

14. Mun’owu wa nkanikinu a Yesu una muna Matai 28:19, 20, adieyi tufwete vanganga? Ekuma?

¹⁴ Tanga Matai 28:19, 20. Ekolo tufilanga e longi dia Nkand’a Nzambi, tuvanganga e ngolo za ‘kitula o wantu se alongoki . . . , kubalonga balunda o mambu mawonso [Yesu] katukanikina.’ Tufwete mpe sadisa o wantu babakula o mfunu wa zaya Yave yo yikama e Kintinu kiandi. Ediadi disongele vo tufwete kasakesanga o wantu bakitula e ludi se mpila zingu kiau muna sadilanga mana belongokanga, bakiyekola kwa Yave yo vubwa. Muna mpila yayi kaka  balenda vulukila muna lumbu kia Yave.—1 Pet. 3:21.

15. Nkia diambu ke tunina ye ntangwa ko? Ekuma?

¹⁵ Nze una tuyikidi kala, kolo kiandwelo kaka kisidi vana vena e lumbu yayi tuzingilanga ye mfoko a tandu kiaki. Muna kuma kiaki, ke tufwete fwasanga e ntangw’eto ko muna kwamanana longoka o Nkand’a Nzambi yo muntu ke songanga luzolo lwa kituka nlongoki a Kristu ko. (1 Kor. 9:26) E salu kieto kifwete sadilwa mu nzaki. Kadi vena yo wantu ayingi ke bawidi ntete e nsangu za Kintinu ko.

16. Landila Lusengomono 18:2, 4, 5, 8, adieyi tufwete vanga? (Tala mpe e mvovo mina vana yanda lukaya.)

¹⁶ Tanga Lusengomono 18:2, 4, 5, 8. E tini ya sono kiaki isonganga e mambu mana Yave kevingilanga kwa selo yandi. Akristu awonso akieleka bafwete songa vo baswaswana kikilu ye Babele Anene. Vitila kalongoka o Nkand’a Nzambi, dilenda kala vo nlongoki a Nkand’a Nzambi mu dibundu dialuvunu kasambilanga. Nanga wakivananga muna mambu ma dibundu diandi yo yikama e salu ya dibundu, yovo wakubanga e nzimbu muna dibundu diandi. Vitila o nlongoki a Nkand’a Nzambi kayifwanisa mu kituka se nteleki alembi vubwa, divavanga vo kayambula emvimba mawonso mena ngwizani ye dibundu kasambilanga. Kafwete soneka nkanda muna songa vo kasidi diaka musi dibundu diau ko, ediadi disonga vo wayambula emvimba nkubika zawonso zina e ngwizani ye Babele Anene. *

17. Nkia mpila salu o Nkristu kafwete venga? Ekuma?

¹⁷ O Nkristu akieleka kafwete kala ye ziku vo e salu kiandi ke kina ngwizani ko ye Babele Anene. (2 Kor. 6:14-17) Kasikil’owu, kalendi vanga e salu kia dibundu ko. Vana ntandu, o Nkristu osadilanga mu kompani dia muntu ankaka, kalendi tambulwila e salu ko kilenda nungununa e nsambil’aluvunu. Kansi, avo salu kia yandi kibeni kesalanga, kafwete kala ye ziku vo kalendi sala ko e salu kina ngwizani ye Babele Anene. Ekuma tukadilanga ye kani diadi? Kadi ke tuzolele kala entwadi ko muna malongi maluvunu ye fu yambi ya nsambil’aluvunu, ina vo yafunzuka vana meso ma Nzambi.—Yes. 52:11. *

18. Aweyi mpangi mosi katatidila nkanikinu mia Nkand’a Nzambi muna diambu ditadidi tambulwila e salu?

¹⁸ Mu mvu miavioka, nkuluntu mosi una vo mvadi a nti, walombwa vo kasala e salu mu nzo  a nzambi mosi muna mbanza kezingilanga. O muntu ndiona wanlomba kasala e salu kiokio, wazaya wo vo nkuluntu ndioyo wavovanga ntangwa zawonso vo kalendi sala salu kia dibundu ko. Kansi muna kolo kiaki, o muntu ona wanlomba kasala e salu kiokio kakala diaka ye vuvu kiasolola muntu ankaka ko. Kana una vo i wau, o mpangi watatidila e nzengo zandi yo lembi tambulwila e salu kiokio. Muna lumingu lwalanda, muna zulunalu ya mbanza yayina basonga e foto dia mvadi a nti ankaka ona watambulwila vanga e salu kiokio vana ndambu a kuluzu dia nzo a nzambi. Kele vo mpangi eto watambulwila e salu kiokio, yandi wadi vaikiswa muna zulunalu yayina. Yindula una e kiwuntu kiandi kumosi ye kia Akristu ankaka kiadi yivisilwa mu kuma kia vangu diadi. Yindula mpe una Yave kadi mona muna vangu diadi.

19-20. (a) Ameyi tulongokele mu longi diadi? (b) Adieyi tulongoka muna longi dilanda?

¹⁹ Landila o ungunza wa Nkand’a Nzambi, e diambu dina tuvingilanga ye sungididi kiawonso i vava ayadi bevova vo “luvuvamu ye ngemba.” Mu kuma kia mana Yave kekutulonganga, tuzeye wo vo e zula ke belenda twasa luvuvamu lwakieleka ko ngatu lwakwele mvu. Adieyi tufwete vanga vitila luzayisu lwa “luvuvamu ye ngemba” yo lubukumuku lulwakila o wantu kuna kinsalukisa? Yave ozolele vo twakwamanana kuyivana muna salu kia samuna e nsangu za Kintinu yo vava kitula wantu se alongoki. Kuna diak’e sambu, tufwete kuyivambula emvimba ye nsambila zawonso za luvunu. Ediadi disongele vo ke tufwete yikamanga ko konso diambu yovo salu kina e ngwizani ye Babele Anene.

²⁰ Vena ye mambu mankaka mevangama mu ‘lumbu yayi yambaninu.’ Vena mpe ye mambu mankaka mana o Yave kevingilanga vo twavanga. Nkia mambu mama? Aweyi tulenda kubamena mu kuma kia mambu mevangama kuna ntwala? Muna longi dilanda tuzaya e mambu mama.