1. Ino nciinshi citupa kushoma kwaamba ayi tutookala “munshiku shakweelaako”?

NA mwakashalwa mumwaaka wa 1914, nkokwaamba ayi mwakashalwa “munshiku shakweelaako” sha bweende bwashintu buno. (2 Timo. 3:1) Soonse twakanyumfwaawo shintu Yesu nshaakambila limwi ayi shilaakunoocitika munshiku shakweelaako. Shintu ishi shileelikaawo nkondo, nsala, shitentanshi, malwashi, kuya panembo kwakutalulama, alimwi akupenshekwa kwa bantu bakwe Yehova. (Mate. 24:3, 7-9, 12; Luka 21:10-12) Kwiilikaawo, twaboona amibo ya bantu mboyabica abuumbi kweelana a bushinshimi bwakaamba mutumwi Paulo. (Amubone kabokosi kacite mutwi utokwaamba ayi “ Bantu Mbobabete Munshiku Shino.”) Mbuli Bakamboni Bakwe Yehova, tulishomete cakutatoonsha kwaamba ayi tutookala “munshiku shakumamanino.”​—Mika 4:1.

2. Ino njimiipusho nshi njotweelete kucana shikumbulo?

² Mukwiinga peenda myaaka iinji kuswa mu mwaaka wa 1914, cilyeelete kwaamba ayi mamanino ali pafwiifwi abuumbi. Mukwiinga mamanino ali pafwiifwi abuumbi, tulyeelete kushiba shikumbulo kumiipusho iyandika abuumbi mbuli: Ino nshiinshi sheshi shikacitike ‘inshiku shakweelaako’ shaakumana? Alimwi ino Yehova alisuni ayi tunoocita nshi pacecino ciindi?

3. Kweelana abushinshimi buli pa 1 Bene Tesalonika 5:1-3, ino shishi shilaakunokwaambilisha nshi?

³ Amubelenge 1 Bene Tesalonika 5:1-3. Palilembo ili Paulo wakaamba pa “bushiku bwakwe Yehova.” Maswi akwaamba ayi  “bushiku bwakwe Yehova” aambwa palilembo ili, alasansulula ciindi “Babiloni Munene” na bupailishi boonse bwakubeca ndyeshi bukalwaanwe akushikila ciindi inkondo ya Amagedoni ndyeshi ikatalike. (Ciyu. 16:14, 16; 17:5) “Bushiku” ubu kabutana kutalika, shishi shilaakunokwaambilisha ayi “Luumuno akuliiba!” Beendeleshi ba shishi, cimwi ciindi balasebensesha maswi mbuli aaya eenka na kabaamba shakunyumfwana kwa shishi. * Nacibi boobo, uku teshi nkokwaambilisha kwa “luumuno akuliiba” kwaambwaawo mu Baibo. Ino nceebonshi? Mukwiinga kwaambilisha uko na kukacitike, bantu baanji balaakuyeeya ayi beendeleshi ba shishi bacikonsha kuleta luumuno pacishi coonse. Ano cancine ncakwaamba ayi ishi na shikacitikebo, peenkapo “mapensho anene alaakutalika” lyalo “bunyonyooshi bulaakushika cakuteengashila.”​—Mate. 24:21.

4. (a) Ino nshiinshi nshotuteshiiwo pamakani akwaambilishikwa kwa “luumuno akuliiba”? (b) Ino ngamakani nshi ngotushi kale?

⁴ Nabi kwaamba ayi kuli nshetushi pamakani akwaambilisha “luumuno akuliiba,” kuli makani amwi ngotuteshiiwo. Kucakubonenaako, tatucishiiwo ceshi cikape beendeleshi kwaambilisha ayi kuli luumuno akuliiba alimwi tatuciishiwo na kwaambilisha uko kulaakuba buyani. Alimwi tatucishiwo na balaakwaambilishabo linkanda lyomwi na mankanda aanji. Muli moonse mweshi shikabete, ncetushi ncakwaamba ayi: Tatweelete kuyeeya ayi beendeleshi ba shishi inga bacikonsha kuleta luumuno lwancinencine nsengwe yoonse. Sombi tulyeelete kwiibaluka kwaamba ayi uku nkwaambilisha Baibo nkoyakaambila limwi. Ncishibilo cakwaamba ayi “Bushiku bwakwe Yehova” butootalika!

5. Ino lilembo lya 1 Bene Tesalonika 5:4-6 inga lyatucafwa buyani kulibambila “bushiku bwakwe Yehova”?

⁵ Amubelenge 1 Bene Tesalonika 5:4-6. Palilembo ili, Paulo alatucafwa kushiba mbweenga twalibambila “Bushiku bwakwe Yehova” kabutana kushika. Wakaamba ayi tatweelete ‘koona bweenka mbuli bantu bamwi.’ Tulyeelete kuba “balibambite” akutolelela kuba bacenjete. Kucakubonenaako, tulyeelete kucenjela kwaamba ayi tutolelele kutaabanamo lubasu mumakani ashamapolitiki. Mukwiinga na twatalika kwaabanamo lubasu, nkokwaamba ayi “twaba bamucishi.” (Joni 15:19) Tulishi kwaamba ayi Bwaami bwakwe Lesa bweenkabo mbweshi bukalete luumuno pacishi ca panshi.

6. Ino tulisuni kucafwa bantu kwaamba ayi bacite nshi, alimwi ino nceebonshi?

⁶ Tulyeelete kuba bacenjete alimwi akucafwaako bamwi kwiiya Baibo nshoyaamba ayi shilaakucitika pacishi ca panshi. Tutaluubi kwaamba ayi na mapensho anene akatalikebo, teshi kukabeewo ciindi cakucafwa muntu kwaamba ayi atalike kusebensela Yehova. Aboobo cino nceciindi ncotweelete kucafwa bantu! *

7. Ino Yehova alisuni ayi tunoocita nshi?

⁷ Yehova alisuni kwaamba ayi tutolelele kusebensa cankusu muncito yakushimikila “bushiku bwakwe” kabutana kushika. Tulyeelete kuba “ashiinji shakucita muncito ya Mwaami.” (1 Koli. 15:58) Yesu wakaambila limwi nsheshi tukanoocita. Ndyaakalinga kwaamba pashintu shinene sheshi shikacitike munshiku shakweelaako, wakaamba ayi: “citaanshi makani abotu alyeelete kushimikilwa.” (Maako 13:4, 8, 10; Mate. 24:14) Ano amuyeeye paceeci: Lyoonse na mwaya muncito yakushimikila, mutokwaabanamo lubasu mukukumanisha bushinshimi ubu bwamu Baibo!

8. Ino tulishi buyani ayi incito yakushimikila itooya panembo?

⁸ Ino incito yakushimikila itokweendela pali pacecino ciindi? Incito iyi itooya panembo mwaaka amwaaka. Kucakubonenaako, amuyeeyebo beshikushimikila mbobafula nsengwe yoonse munshiku shino shakweelaako. Mu 1914, beshikushimikila bakalinga kushikabo 5,155 mushishi 43. Ano pacecino ciindi, beshikushimikila bashika 8.5 miliyoni mushishi 240! Nacibi boobo, incito yesu icitolelela. Tulyeleete kutolelela kwaambilisha ayi Bwaami bwakwe Lesa bweenkabo mbweshi bukamane mapensho oonse bantu ngobatokwiindaamo.​—Kulu. 145:11-13.

9. Ino nceebonshi tulyeelete kutolelela kushimikila makani aBwaami?

⁹ Tulaakutolelela kushimikila kushikila Yehova ndyeshi akaambe ayi camana. Ino kwacaala ciindi cilaamfu buyani kwaamba ayi bantu bashibe Yehova a Yesu Klistu? (Joni 17:3) Tatucishiiwo. Ncetushi ncakwaamba ayi abo ‘bacite moyo ulibambite kutambula buumi butamaani’ bacicite coolwe cakukutika makani abotu akusala kusebensela Yehova, mapensho anene kaatana kutalika. (Milimo 13:48) Ino inga twacita buyani kwaamba ayi tucafwe bantu aba ciindi kacitana kumana?

10. Ino nducafwo nshi Yehova ndwaatupa kwaamba ayi twiishe bantu cancine?

¹⁰ Kwiinda mulibunga lyakwe, Yehova watolelela kutupa shoonse nshetuyandika kwaamba ayi twiishe kabotu cancine. Kucakubonenaako, nsondo ansondo tulatambula lwiiyo kwiinda mumabungano amukati kansondo. Mabungano aya alatucafwa kushiba nsheenga twaamba lweendo lwakutaanguna alimwi alweendo lwabili. Alimwi tuleeya ambweenga twacita ciiyo ca Baibo. Libunga lyakwe Yehova lyakatubambila a Nshetusebensesha Ndyetutokwiisha. Shisebensesho ishi shilatucafwa . . .

•   kutalika mibandi,

• kushimikila munshila yeenga yapa muntu kusuna kwiiya,

• kucafwa muntu kusuna kwiiya makani aanji amu Baibo,

• kwiisha shiiyo sha Baibo cancine camu Baibo, alimwi

• akwiita basuni kuya pa webusaiti yesu akusa Kuŋanda ya Bwaami.

Nacibi boobo, tatweelete kweelabo pakuba ashisebensesho ishi. Tulyeelete kunooshisebensesha. * Kucakubonenaako, na pesule lyakubandika amuntu usuni kwiiya mwaabila tilakiti na magazini, inga wacaala kaabelenga kushikila ndyeshi mukabonane alimwi. Soonse tulicite mukuli wakutolelela kusebensa cankusu mweenshi uli woonse muncito yakushimikila.

11. Ino nceebonshi ncobakabikila lubasu lwa Online Bible Study Lessons?

¹¹ Cimwi Yehova ncaabamba kwaamba ayi bantu beeye cancine, mbubaambo bwa Online Bible Study Lessons ubo mbotucana pa jw.org^® Ino nceebonshi ncobakabikila bubaambo ubu? Mweenshi uli woonse bantu baanji nsengwe yoonse balalangoola kwiiya Baibo pa Intaneti. Shiiyo shicanika pa webusaiti yesu, inga shabacafwa kutalika kwiiya cancine ncetucana mu Maswi akwe Lesa. Bantu bamwi inga bawayawaya kusumina ciiyo ca Baibo. Aboobo amubatondeshe lubasu ulu pa webusaiti yesu na kubatuminako ka linki keenga kabatola ku shiiyo. *

12. Ino muntu inga weeya nshi kushiiyo shapa jw.org?

¹² Mbasu ishi shicanika pa jw.org shilicite mitwi yashiiyo mbuli: “The Bible and Its Author,” (Ino Mulembi wa Baibo Ngani?) “The Bible’s Main Characters,” (Bantu Baambwa mu Baibo), “The Bible’s Message of Hope” (Makani Abulindilishi Ngotucana mu Baibo). Shiiyo ishi shilacafwa muntu kushiba:

• Baibo mbweenga yamucafwa

• Yehova, Yesu, alimwi abaanjelo

• Lesa ncaakalengela bantu

• Cipa kwaamba ayi kube mapensho ashibiibi

Shiiyo shileelikaawo a Yehova mbweshi . . .

• akamane mapensho alufu,

• akabushe bafu, alimwi a

• mbweshi akakushewo mfulumeende sha bantu akuleta Bwaami bwakwe.

13. Sa lubasu lwakwiiya Baibo lwapa jw.org lwakapyana bubaambo bwakucita shiiyo sha Baibo? Amusansulule.

¹³ Lubasu ulu lwapa jw.org taluna kupyana bubaambo bwakucita shiiyo sha Baibo. Yesu wakatupa coolwe cakucafwa bantu kuba bashikwiiya. Lubasu ulu lwakabikwa kwaamba ayi abo basuni cancine beeyeko comwi, basune nshobeeya, alimwi babe alusuno lwakusuna kwiiya shiinji. Na caba boobo, mpashi inga basumina kwiiya Baibo. Kumamanino aciiyo comwi acomwi, kuli palubasu mpeenga utokwiiya walemba na alisuni muntu weenga wesa mukumwiisha Baibo. Bushiku buli boonse nsengwe yoonse bantu beendilila 230 balasenga pa webusaiti yesu ayi balisuni muntu wakubaiisha Baibo! Alimwi ncintu cisangalasha abuumbi na muntu usuni kwiiya Baibo wacana shikumwiisha!

14. Kweelana a Yesu nshaakaamba pa Mateyo 28:19, 20, ino nshiinshi nshotweelesha cankusu kucita, alimwi ino nceebonshi?

¹⁴ Amubelenge Mateyo 28:19, 20. Ndyetutoocita shiiyo sha Baibo, tulyeelete kweelesha cankusu “kucafwa bantu kuba bashikwiiya . . . , kubaiisha kukonkela akucita shintu shoonse [Yesu] nshaakatulwiita.” Tulyeelete kubacafwa kushiba kuyandika kwa kusebensela Yehova akuba kulubasu lwa Bwaami bwakwe. Nkokwaamba ayi tulyeelete kweelesha kuyuminisha bantu  kukonkela nshebatokwiiya, akulyaaba kuli Yehova akubombekwa. Lyalo ndyeshi bakapuluke bushiku bwakwe Yehova.​—1 Pita 3:21.

15. Ino tatuciteewo ciindi cakucita buyani, alimwi ino nceebonshi?

¹⁵ Bweenka mbuli mbotwaambawo kale, kwacaalabo ciindi ciniini kwaamba ayi bweende bwakwe Satana bunyonyoolwe. Aboobo tatucitewo ciindi cakutolelela kwiisha bantu Baibo batasuni kuba bashikwiiya bakwe Klistu. (1 Koli. 9:26) Incito yesu ilyeelete kucitwa cakufwambaana! Kuli bantu baanji mbotweelete kushimikila makani abotu aBwaami ciindi kacitana kumana.

16. Kweelana a Ciyubululo 18:2, 4, 5, 8, ino nshiinshi nshotweelete kucita? (Amubone futunoti.)

¹⁶ Amubelenge Ciyubululo 18:2, 4, 5, 8. Mavesi aya alatondesha cintu cimwi Yehova ncaasuni ayi bantu bakwe banoocita. Beneklistu bancine boonse balyeelete kutalamuka cili coonse cikumite bupailishi bwakubeca. Mpashi kaatana kwiiya cancine, shikwiiya wakalinga kuya kubupailishi bwakubeca. Mpashi wakalinga kubungana akwaabanamo lubasu mushakucita shabo. Na mpashi wakalinga kupako amaali kulibunga ilyo. Shikwiiya kaatana kusuminishikwa kwaamba ayi abe shikushimikila utana kubombekwa, alyeelete kushinisha ayi waswitaako limwi kubupailishi bwakubeca. Alyeelete kulemba nkalata yakubalwiita ayi waswaamo mubupailishi na libunga ilyo alimwi teshi akapailewo ambabo alimwi. *

17. Ino ni ncito ya mushobo nshi Mwineklistu njaeelete kuleya, alimwi ino nceebonshi?

¹⁷ Mwineklistu wancine taeelete nabibo paniini kusebensa ncito ikumite bupailishi bwakubeca. (2 Koli. 6:14-17) Kucakubonenaako, taeelete kunjila ncito yakusebensa paceeci. Kwiilikaawo, Mwineklistu usebensa kukampani, taeelete kusebensa ncito shiinji pamusena usebenseshekwa abeshibupailishi. Alimwi na alalisebensela mwiine, taeelete kusumina kusebensa ncito itanjililwa abupailishi bwakubeca. Ino nceebonshi ncotweelete kucitila sheeshi shoonse? Mukwiinga tatusuniiwo kwaabanamo lubasu muncito ashibiibi sha bupailishi butasalalite pameenso akwe Lesa.​—Isa. 52:11. *

18. Ino mukwesu umwi wakatondesha buyani ayi alakonkela njiisho shamu Baibo pamakani akusala ncito?

¹⁸ Myaaka iniini yainda, musankwa umwi wakalinga kucite ncito yakusebensela paceeci, wakalinga kusuni kunjisha mukwesu munene mulibungano kusebensako kacito kaniini paceeci  yakalinga kumusena mukwesu uyu nkwaakalinga kukala. Musankwa uyu wakalinga kucishi ayi lyoonse mukwesu uyu alakaka kunjila ncito shakusebensa pamaceeci. Ano paciindi ici taakalinga kucitewo muntu umwi uli woonse weenga wamucafwa kusebensa ncito iyo. Nacibi boobo, mukwesu wakayuminina kukonkela njiisho shamu Baibo akukaka ncito iyo. Nsondo yakaboolawo, nyusipepala yakumusena uko yakatondesha cikope ca muntu umwi wakalinga kubika mucilingano paceeci ilya mukwabesu mpaakaka kuya mukusebensela. Naakwiinga mukwabesu taakwe kukonkela njiisho shamu Baibo, naakwiinga ngowakaswa pacikope ico. Ano amuyeeyebo, ino bamakwesu abenankashi naakwiinga bakamubona buyani? Alimwi ino Yehova naakwiinga wakanyumfwa buyani?

19-20. (a) Ino nshiinshi nshotweeya mumutwi uyu? (b) Ino njimiipusho nshi njeshi tukabandike mumutwi utokonkelaawo?

¹⁹ Kweelana abushinshimi bwamu Baibo, cintu cinene ceshi cikacitike nsengwe yoonse ncakwaamba ayi beendeleshi ba shishi balaakwaambilisha ayi kuli “luumuno akuliiba.” Ano mukwiinga Yehova alatwiisha, tulicishi kwaamba ayi beendeleshi bashishi inga tabacikoonshi kuleta luumuno lwancinencine. Ino nshiinshi nshotweelete kunoocita ishi kashitana kucitika alimwi abunyonyooshi bwakuteengashila kabutana kushika? Yehova alisuni kwaamba ayi tutolelele kusebensa cankusu muncito yakushimikila makani abotu aBwaami akucafwa bantu baanji kuba bashikwiiya. Kwiilikaawo, tulyeelete kutalamuka bupailishi bwakubeca. Ici cileelikaawo kuswita limwi mubupailishi bwakubeca akuleya ncito ili yoonse ikumite Babiloni Munene.

²⁰ Kuli ashimwi sheshi shikacitike kumamanino a “nshiku shakweelaako.” Alimwi kuli ashimwi Yehova nshaasuni ayi tunoocita. Ino nshintu nshi, alimwi ino nshiinshi nshotweelete kucita kwaamba ayi tulibambile kushintu shili shoonse sheshi shikese kunembo? Tulaakucana shikumbulo kumiipusho iyi mumutwi utokonkelaawo.