1. Tshidi tshitujadikila ne: tudi mu “matuku a ku nshikidilu” ntshinyi?

BIWIKALA muledibue panyima pa 1914, nanku udi mukole mu “matuku a ku nshikidilu.” (2 Tim. 3:1) Yezu uvua muambe ne: malu kampanda neenzeke matuku etu aa. Tuetu bonso tukadi bumvue bakula bualu buawu. Mu malu au mudi: mvita, biyole bia nzala, dikanka dia buloba, bipupu bia masama, divulangana dia dishipa dia mikenji, ne dikengeshibua dia bantu ba Yehowa. (Mat. 24:3, 7-9, 12; Luka 21:10-12) Tudi bamone kabidi mudi bantu benza malu anu muvua mupostolo Paulo mudianjile kuamba. (Tangila kazubu ka “ Mudi bantu lelu.”) Tuetu batendeledi ba Yehowa, tudi batuishibue ne: tudi “ku ndekelu kua matuku.”​—Mika 4:1.

2. Nnkonko kayi itudi ne bua kuandamuna?

² Katshia ku 1914, kukadi kupite bidimu bia bungi. Nunku lelu tudi ne bua kuikala ku ndekelu kua “matuku a ku nshikidilu.” Bu mukadi nshikidilu mulembelele, bidi bikengela tumanye mandamuna a imue nkonko ya mushinga bu mudi: Mmalu kayi enzeka ku ndekelu kua “matuku a ku nshikidilu”? Ntshinyi tshidi Yehowa musue bua tuenze mu tshikondo tshitudi bindile malu aa?

3. Bilondeshile mêyi a buprofete a mu 1 Tesalonike 5:1-3, bisamba nebimanyishe bualu kayi?

³ Bala 1 Tesalonike 5:1-3. Mu mvese eu, Paulo udi wakula bua “dituku dia Yehowa.” Dituku edi ntshikondo tshidi tshituadija ne dibunda “Babilona Munene,” mmumue ne: nsangilu wa bitendelelu  bia dishima bia pa buloba bujima, ne tshishikila ne Armagedone. (Buak. 16:14, 16; 17:5) Pikala “dituku” adi pa kutuadija, bisamba nebiambe ne: kudi “ditalala, ne kakuena bualu bua kutshina!” (Imue Bible idi yamba ne: ‘Mpindieu tudi ne bupole ne dikisha.’) Imue misangu bakalenge ba pa buloba batu bamba mêyi a buena aa patubu bakeba kuakaja malanda adi pankatshi pa matunga. * Kadi dimanyisha dia ne: kudi “ditalala, ne kakuena bualu bua kutshina” didi Bible wakuila nedikale dia wadi mushindu. Bua tshinyi? Bualu padimanyishabu, bantu nebele meji ne: bakalenge ba pa buloba mbafike ku dienza bua buloba bujima buikale mu dikisha, mu bukubi bua bungi. Kadi mu bulelela, “kabutu ka tshimpitshimpi” nekabakuate mu “dikenga dinene.”​—Mat. 24:21.

4. a) Bua dimanyisha dia ne: “Ditalala, ne kakuena bualu bua kutshina,” ntshinyi tshitudi katuyi banji kumanya? b) Ntshinyi tshitukadi bamanye bua dimanyisha edi?

⁴ Tudi bamanye amue malu adi atangila dimanyisha dia ne: “Ditalala, ne kakuena bualu bua kutshina.” Kadi katuena bamanye makuabu to. Tshilejilu, katuena bamanye tshiafikisha bakalenge ku difila dimanyisha edi anyi muadifilabu to. Katuena kabidi bamanye ni badifila anu musangu umue anyi ni badifila misangu ne misangu. Nansha biobi bienzeke mushindu kayi, tshitudi bamanye ntshia ne: katuena ne bua kulekela tshintu nansha tshimue tshitushimakaja bua kuitaba ne: bakalenge ba pa buloba badi mua kufila ditalala to. Kadi dimanyisha adi ke didi Bible mutuambile bua kuindila. Nedikale tshimanyinu tshia ne: “dituku dia Yehowa” dikadi pa kutuadija!

5. Ntshinyi tshidi 1 Tesalonike 5:4-6 utuambila bua kuenza bua tuikale badilongolole bua “dituku dia Yehowa”?

⁵ Bala 1 Tesalonike 5:4-6. Paulo udi utuambila tshitudi ne bua kuenza bua tuikale badilongolole bua “dituku dia Yehowa.” Katuena ne bua ‘kulala bu mudi bantu bakuabu bonso benza’ to. Tudi ne bua ‘kushala batabale’ ne kudimuka. Tshilejilu, katuena ne bua kubuelakana mu malu a tshididi to, bualu adi anyanga buena Kristo buetu. Tuetu babuelakanamu, tudi mua kulua “ba pa buloba.” (Yone 15:19) Tudi bamanye ne: anu Bukalenge bua Nzambi ke butudi batekemene bua kufila ditalala pa buloba.

6. Tudi basue kuambuluisha bantu bakuabu bua benze tshinyi? Bua tshinyi?

⁶ Pa kumbusha dishala batabale, tudi kabidi basue kuambuluisha bantu bakuabu bua batabuluke bua kumanya malu akavua Bible muambe ne: avua ne bua kuenzeka pa buloba. Tudi ne bua kuenza nanku bualu patuadija dikenga dinene, tshikondo tshia bantu kukeba bua kuenzela Yehowa mudimu netshikale tshimane kupita. Ke bualu kayi etshi ke tshikondo tshia tuetu kuyisha! *

7. Ntshinyi tshidi Yehowa musue bua tuenze mpindieu?

⁷ Yehowa mmusue tudifile bikole mu mudimu wa diyisha mu matuku makese adi mashale aa kumpala kua “dituku” diende kutuadija. Mbimpe tuenze muetu muonso bua ‘tuikale amu ne bia bungi bia kuenza mu mudimu wa Mukalenge.’ (1 Kol. 15:58) Yezu ukavua muleje tshitudi mua kuenza. Pavuaye wakula bua malu manene onso avua ne bua kuenzeka mu matuku a ku nshikidilu, wakasakidila wamba ne: “Kabidi, badi ne bua kuanji kuyisha lumu luimpe mu bisamba bionso.” (Mâko 13:4, 8, 10; Mat. 24:14) Anji elabi meji: dîba dionso diudi uya mu buambi, udi wenza pebe mudimu mu dikumbana dia mêyi a buprofete aa!

8. Ntshinyi tshidi tshileja ne: mudimu wa kuyisha udi wenda uya kumpala?

⁸ Kadi netuambe tshinyi bua diya kumpala dia mudimu wa kuyisha? Udi anu wenda uya kumpala ku tshidimu ne ku tshidimu. Tshilejilu, elabi meji bua mudi bungi bua bamanyishi ba Bukalenge buvule matuku a ku nshikidilu aa. Mu 1914, kuvua bamanyishi 5 155 mu matunga 43. Lelu, mbatue ku 8 500 000 mu matunga 240! Nansha nanku, mudimu wetu ki mmuanji kujika to. Tudi ne bua kutungunuka ne kumanyisha bantu ne: Bukalenge bua Nzambi ke buajikija ntatu yabu.​—Mis. 145:11-13.

9. Bua tshinyi tudi ne bua kutungunuka ne kuyisha?

⁹ Mudimu wetu wa kuyisha newujike anu pamba Yehowa ne: kuajiki. Nkushale matuku bungi munyi bua bantu kufikabu ku dimanya Yehowa ne Yezu Kristo? (Yone 17:3) Katuena bamanye to. Tshidibi tudi bamanye bimpe ne: ‘bantu bonso badi bakaje muoyo wabu bimpe bua kupeta muoyo wa tshiendelele’ nebikale amu bitaba lumu luimpe too ne patuadija dikenga dinene. (Bien. 13:48) Ntshinyi tshitudi mua kuenza bua kuambuluisha bantu aba patshidiku dîba?

10. Mmunyi mudi Yehowa utuambuluisha bua kulongesha bantu bulelela?

¹⁰ Yehowa udi utupesha bionso butudi nabi dijinga bua kulongesha bantu bulelela ku diambuluisha dia bulongolodi buende. Tshilejilu, tudi tulongeshibua lumingu luonso mu tshisangilu tshia munkatshi mua lumingu. Tshidi tshituambuluisha bua kumanya tshia kuamba patudi tuyisha muntu musangu wa kumpala anyi patudi tumupinganyina. Tshidi tshitulongesha kabidi mua kulonga Bible ne bantu. Bulongolodi bua Yehowa mbutupeshe kabidi biamu bia mudimu bia mu Bintu bietu bia kulongesha nabi. Bidi bituambuluisha bua . . .

•   kutuadija kuyukila ne bantu,

• kujula bantu nyota,

• kupesha bantu dijinga dia kulonga bia bungi,

• kulongesha bantu bulelela patudi tulonga nabu Bible, ne

• kulomba badi banyisha bulelela bua kubuela mu site wetu wa Enternete ne kulua mu bisangilu.

Bushuwa, kuikala ne bintu ebi patupu ki nkukumbane to. Tudi ne bua kuyisha nabi. * Tshilejilu, wewe mumane kuyukila bimpe ne muntu udi wanyisha bulelela, mumushile trakte anyi tshibejibeji, udi mua kubibala kabidi too ne pawapeta mushindu wa kumutangila kabidi. Kuyisha bikole ngondo yonso mmudimu udi yonso wa kutudi ne bua kuenza.

11. Mbenze Malonga a mu Bible a ku Enternete bua tshinyi?

¹¹ Tuangate tshilejilu tshikuabu tshia mudi Yehowa wambuluisha bantu bua balonge bulelela. Tuakule bua Malonga a mu Bible a ku Enternete adi mu jw.org^®. * Mbenze malonga aa bua tshinyi? Ngondo yonso eu, bantu bapite bungi pa buloba bujima batu bakeba malonga a mu Bible ku Enternete. Adi mua kubafikisha ku dituadija kulonga bulelela budi mu Dîyi dia Nzambi. Bamue bantu baudi uyukila nabu badi mua kuelakana bua kuitaba bua kulonga nabu Bible. Biobi nanku, baleja bintu bidi mu site wetu anyi batumina muaba udibu mua kututa bua kufika muaba udi malonga aa. Kuoku mushindu, udi mua kubaleja mua kuapeta mu muakulu udibu bumvua bimpe.

12. Mmalu kayi adi muntu mua kulonga mu tshitupa tshia Malonga a mu Bible a ku Enternete?

¹² Malonga etu a mu Bible a ku Enternete adi ne biena-bualu ebi: “Bible ne muenaye,” “Bantu badi Bible mutambe kuakuila,” ne “Mukenji wa ditekemena udi mu Bible.” Padi muntu ulonga biena-bualu ebi, neamanye:

• Mudi Bible mua kuambuluisha muntu

• Yehowa ne Yezu ne banjelu bimpe menemene

• Bua tshinyi Nzambi wakafuka bantu

• Bua tshinyi kudi makenga ne malu mabi

Malonga aa adi aleja kabidi muikala Yehowa mua . . .

• kujikija lufu ne makenga,

• kubisha bantu ku lufu, ne

• kupingaja Bukalenge buende pa muaba wa mbulamatadi mibi ya bantu.

13. Malonga etu a ku Enternete adi mua kupingana pa muaba wa kulongesha muntu Bible anyi? Umvuija.

¹³ Malonga a ku Enternete kaena apingana pa muaba wa dilongesha muntu Bible to. Yezu mmutupeshe diakalenga dia kuvuija bantu bayidi. Tudi batekemene ne: bantu badi banange bulelela nebabale malonga etu adi ku Enternete aa, kuanyisha bidibu balonga ne kukeba bua kumanya malu a bungi. Bobu benze nanku, pamuapa nebitabe bua kulonga Bible. Ku ndekelu kua dilonga dionso, badi bambila muntu bua kuwuja dilomba bua kulonga Bible ne muntu. Padibu benze makumi a bungi bua bantu batu babuela mu site wetu bua kulomba dilonga dia Bible, mbamone ne: dituku dionso edi, bantu badi badilomba mbapite pa 230! Kulonga Bible ne muntu eku kudi ne mushinga wa bungi!

14. Bilondeshile mêyi a Yezu adi mu Matayi 28:19, 20, tudienzeje bua kuenza tshinyi? Bua tshinyi?

¹⁴ Bala Matayi 28:19, 20. Patudi tulongesha bantu Bible, tudi ne bua kuenza muetu muonso bua ‘kubavuija bayidi, kubalongesha mua kutumikila malu onso adi Yezu mutuambile.’ Bidi bikengela tubambuluishe bua bamone ne: kuenzela Yehowa mudimu ne kutua Bukalenge buende mpanda kudi ne mushinga. Bua kuenza nanku,  bidi bikengela tubapeteshe dijinga dia kutumikila bidibu balonga, kudilambula kudi Yehowa, ne kubatijibua bua bavuije bulelela bua mu Bible tshintu tshiabu. Bobu benze nanku, dîba adi nebasungidibue mu dituku dia Yehowa.​—1 Pet. 3:21.

15. Katuena ne dîba dia kuenza tshinyi? Bua tshinyi?

¹⁵ Anu mutukadi bamone, dîba didi dishale bua Yehowa kubutula ndongoluelu wa malu eu ndikese menemene. Ke bualu kayi, katuena ne dîba dia kutungunuka ne kulonga ne bantu badi kabayi menemene ne meji a kulua bayidi ba Kristo to. (1 Kol. 9:26) Mudimu wetu ngua kuenza ne lukasa! Patshidiku dîba apa, kutshidi bantu ba bungi badi ne dijinga dia kumvua mukenji wa Bukalenge.

16. Bilondeshile Buakabuluibua 18:2, 4, 5, 8, tuetu bonso tudi ne bua kuenza tshinyi? (Tangila kabidi dimanyisha dia kuinshi kua dibeji.)

¹⁶ Bala Buakabuluibua 18:2, 4, 5, 8. Mvese eyi idi ileja bualu bukuabu budi Yehowa ulomba batendeledi bende bua kuenza. Bena Kristo balelela bonso badi ne bua kuikala bashilangane bikole ne bena mu Babilona Munene. Mulongi kampanda wa Bible uvua mua kuikala mu tshitendelelu kampanda tshia dishima. Uvua mua kuikala ubuela mu masangisha a mu tshitendelelu atshi anyi wenzamu pende midimu. Peshi uvua mua kuikala ufilamu makuta. Kumpala kua kumuitabilabu bua kulua muambi wa lumu luimpe, udi ne bua kukosa malanda onso ne ntendelelu wa dishima. Udi ne bua kufundila tshitendelelu tshivuaye anyi bulongolodi budi mu diumvuangana ne Babilona Munene buvuaye * mukanda wa dipatukamu peshi kukosa nabi malanda onso.

17. Mmudimu kayi udi muena Kristo kayi ne bua kuenza? Bua tshinyi?

¹⁷ Muena Kristo mulelela udi ne bua kuenza bua mudimu wende kawikadi mu diumvuangana ne Babilona Munene to. (2 Kol. 6:14-17) Tshilejilu, ki mbimpe ikale muena mudimu wa tshitendelelu kampanda to. Bualu bukuabu, badi mua kuikala bangate muena Kristo ku mudimu mu kumpanyi kansanga, kadi balomba kumpanyi au bua kuya kuenza mudimu ku tshitanda kampanda tshia nzambi. Bobu batume muena Kristo eu kuntu aku, ki mbimpe enzaku mudimu wa bungi to; kadi udi mua kuenzaku anu tumidimu bu mudi tua diambuluisha bantu anyi tudi tutangila lutatu kampanda lua tshimpitshimpi. Yeye muikale ne wende kumpanyi, ki mbimpe alombe bua kuenza mudimu kampanda udi mu diumvuangana ne Babilona Munene anyi kutua biala pa mikanda bua kuwenza to. Bua tshinyi tudi tuamba nunku tuosha ne munu muiku? Bualu katuena basue kubuelakana mu malu a malongolodi a  ntendelelu ne mpekatu yawu to; mmakoya ku mêsu kua Nzambi.​—Yesh. 52:11. *

18. Leja muvua muanetu mukuabu mutumikile mêyi manene a mu Bible bua mudimu wende wa bianza.

¹⁸ Kukadi bidimu, muntu kampanda uvua mulombe mukulu mukuabu uvua udienzela mudimu wende wa mabaya bua kuenza kamudimu mu tshitanda kampanda tshia nzambi mu tshimenga tshiabu. Muntu au uvua mumanye ne: muanetu uvua ubenga bua kuenza mudimu mu bitanda bia nzambi. Kadi kavua mupete muntu mukuabu uvua mua kuwenza to. Nansha nanku, muanetu au wakalamata ku mêyi manene a mu Bible, yeye kubenga. Lumingu luakalonda, bakapatula tshikandakanda tshikale ne foto wa muena mabaya mukuabu wenda wasa nkuruse ku tshitanda tshia nzambi atshi. Bu muanetu au kayi mulamate ku mêyi manene a mu Bible, foto au uvua mua kuikala wende. Elabi meji muvuabi mua kumunyangila lumu kudi bena Kristo nende! Elabi kabidi meji muvua Yehowa mua kumvua.

19-20. a) Tshitudi balonge ntshinyi? b) Ntshinyi tshikuabu tshitudi ne bua kulonga?

¹⁹ Bilondeshile mêyi a buprofete a mu Bible, bualu bukuabu bunene bukadi pa kuenzeka ndimanyisha dia kudi bisamba dia ne: kudi “ditalala, ne kakuena bualu bua kutshina.” Ku diambuluisha dia malu adi Yehowa mutulongeshe, tudi bamanye ne: bisamba kabiakufila ditalala dia bushuwa didi dishala kashidi to. Ntshinyi tshitudi ne bua kuenza kumpala kua kufilabu dimanyisha adi ne kua dibutuka dia tshimpitshimpi dialonda? Yehowa mmusue bua tuyishe mukenji wa Bukalenge bikole ne tudienzeje bua kuvuija bantu ba bungi bayidi. Kadi bidi bikengela kabidi bua tushale katuyi tubuelakana mu malu a bitendelelu bionso bia dishima. Bualu ebu budi bulomba kabidi kupatuka mu Babilona Munene ne kubenga kuenza mudimu udi mu diumvuangana nende.

²⁰ Ku ndekelu kua “makutu a ku nshikidilu” aa, malu makuabu neenzeke panyima pa dimanyisha dia ne: kudi “ditalala, ne kakuena bualu bua kutshina.” Kudi kabidi malu makuabu adi Yehowa musue bua tuenze. Mmalu kayi au? Mmunyi mutudi mua kudilongolola bua bualu buonso bukadi pa kuenzeka mu matuku makese emu? Netubimone mu tshiena-bualu tshialonda.