1. Ánni nga tsín jao tjínni tokoán nga nichxin fetʼa tiyoaa.

TSA kʼia kitsiaan nga jejaʼato nó 1914, tiʼyañá jmeni xi bakó nga to jenichxin fetʼa tiyoaa (2 Tim. 3:1). Ngatsʼiñá nga tiʼyaa josʼin tíbitjoson jmeni xi tongini kitso Jesús nga koa̱n nichxin xi tiyoaa ndʼaibi. Tobʼelañá, tísʼee kjoajchán, kjinrá, cháonnʼio, chʼin, kjoatsʼen kʼoa nga chjota fitjenngike je choʼndale Jeobá (Mat. 24:3, 7-9, 12; Luc. 21:10-12). Kʼoati tiʼyaa nga kʼoakjoan chjota jokitso je pastro Pablo (chótsenlai je recuadro “ Jokjoan chjota ndʼaibi”). Ñá xi choʼndale Jeobá maa, alikui jao tjín tokoán nga nichxin fetʼa tiyoaa (Miq. 4:1).

2. Jméni xi chótʼayajiaan i̱bi.

² Nga jenkjín nó tífaʼato saʼnda tjen nó 1914, kui xi tsonile nga to jetífikjetʼa je nichxin xi tiyoaa. Jenʼio machrianle nga kjoetʼa jmeni xi chon sonʼnde. Kuinga jao koya tjínni xi chótʼayajiaan xi nʼio tjínle kjoandosin. Xi títjon, jmé xi koa̱n nga to jetífikjetʼa nichxin. Xi majaoni, jmé xi mele Jeobá nga sʼiaan.

3. Tojo tso 1 Tesalonicenses 5:1-3, jmé xi kuitso je naxinandáyʼai.

³ (Tʼexkiai 1 Tesalonicenses 5:1-3). * Kʼianga “nichxinle Nainá” síkʼaxki̱ je Pablo, kui nchja̱ni je nichxinle Jeobá kʼoa  kʼiaa koaitsʼiani nga ni̱kjeson je “Babilonia xi nʼio je”, xi tsonile ngatsʼi religión ndiso xi tjín jngo tjíjtsa Sonʼnde, kʼoa kʼiaa kjoetʼa nga kjoaʼaí je Armagedón (Apoc. 16:14, 16; 17:5). Tonga “jo nda nyʼán tiyoaa. Nijmejin xi koa̱nná” kuitso je chjota tongini nga kjesa faʼaijin je nichxinle Jeobá. Je chjotatítjonle naxinandáyʼai kui én jebi síchjén sakʼoa kʼianga kʼoatso nga ndasʼin koatio je naxinandá. * Tonga alikui mangóson kao jmeni xi nchja̱ni je Biblia. Ánni. Nga̱ kʼianga kjuinrʼoé én jebi je chjota, nʼio nkjín xi kʼoasʼin sikjaʼaitsjen nga jenda tjío kʼoa nga tsín jme xi koa̱nle. Tonga kʼiaa koaitsʼia je kjoañʼai xi nʼio tse kʼoa toxijña kjoaʼaí je kjoafetʼa (Mat. 24:21).

4. 1) Jméni xi tsín ʼyaa tʼatsʼe nga “jo nda nyʼán tiyoaa. Nijmejin xi koa̱nná” kuitso je chjota. 2) Jméni xi ʼyaa xi tʼatsʼe jebi.

⁴ To choaa xi ʼyaa tʼatsʼe nga “jo nda nyʼán tiyoaa. Nijmejin xi koa̱nná” kuitso je chjota. Alikui ʼyaa jméni xosikao je naxinandáyʼai nga kui én koajnani, kʼoa jósʼin koajinkon én jebi chjota. Kʼoati tsín ʼyaa tsa nkjín kʼa kʼoa tsa toñandia kʼoakuitso. Ninga kʼoalani, alikui kʼoaiʼndee nga je katabʼanachaná kʼoa tsín kʼoasʼin si̱kjaʼaitsjeen nga je chjotaxátítjonle naxinandáyʼai kjoaʼaíkao kjoanyʼán. Kʼianga kʼoakuitso je én jebi kui xi koako nga jeme koaitsʼia je nichxinle Jeobá.

5. Tojo tso 1 Tesalonicenses 5:4-6, jósʼin koasenkaoná nga tjenyatokon kuiyolee je nichxinle Jeobá.

⁵ (Tʼexkiai 1 Tesalonicenses 5:4-6). * Je Pablo kʼoatso nga tjínnele tjenyatokon kuiyolee je nichxinle Jeobá. Ali koa̱n si̱changalee yaoná “joni tsa je xikʼa”, tosa tjenyatokon kuiyoaa. Tobʼelañá, alikui koa̱n ya kuinójiaan yaoná jmeni xi chon sonʼnde, jolani je kjoa política kʼoa tsín kuitjátoné je kjoatéxomale Niná (Juan 15:19). ʼYañá nga toje Chjotaxále Niná xi koa̱nle kjoaʼaíkao kjoanyʼán i̱ Sonʼnde.

6. Jósʼin koa̱n kuinyakoaa je chjota, kʼoa ánni.

⁶ Kʼianga tjenyatokon tiyoaa, kʼoati machjén nga kuinyakoaa je xi kjaʼaí chjota nga katamajinle jotso Biblia tʼatsʼe jmeni xi koa̱n nichxin xi nroaján. Nga̱ kʼianga jetíjna je kjoañʼai xi nʼio tse alikui tichoa̱leni nga kʼia koasjai Jeobá je chjota. Kuinga nʼio maxátíyanile nga kʼuínyasoán. *

7. Jmé xi mele Jeobá nga sʼiaan ndʼaibi.

⁷ Je Jeobá kui xi mele nga tosi tonda nʼio kʼuínyasoán kʼianga kjesa faʼaijin je nichxinle. Machjén nga nʼio kʼoailee  kjoandosin nga koakoyaa je Énle Niná (1 Cor. 15:58). Kʼianga kui kinchja̱ni Jesús jokoa̱nchon kʼianga jetífetʼa nichxin, kʼoakitso jme xá xi sʼin je choʼndale Niná. I kitso: “Títjon machjén nga je énnda xi tʼatsʼe Cristo katafisonle ngatsʼi chjota” (Mar. 13:4, 8, 10; Mat. 24:14). Jebi kui xi tsonile kʼianga tinitjosoán jmeni xi kitso je Jesús kʼianga bitjokʼinyasoán.

8. Jósʼin ʼyañá nga tosi tonda kjimankjínya je xi tsoyason.

⁸ Kʼianga xki̱ nó sa nkjín sa nkjín chjota nrʼoé je énnda chjotse. Kataʼyala jokji kjimankjínya ndʼaibi je xi tsoyason jngo tjíjtsa Sonʼnde. Kʼianga nó 1914, je xi tsoyason 5,155 mani je xi 43 naxinandá tjínni. Ndʼaibi, jela 8,500,000 mani xi tsoyason xi 240 naxinandá tjínni. Tonga kje fetʼajin je xá xi tinʼia. Tjínnele tosi tonda kʼuínyasoán nga toje Chjotaxále Niná xi koa̱nle kʼoendajin je kjoa xi tjín (Sal. 145:11-13).

9. Ánni machjénsíni nga tosi tonda kʼuínyasoán xi tʼatsʼe Chjotaxále Niná.

⁹ Tosi tonda kʼuínyasoán josaʼnda nga kʼoakuitso Jeobá nga toya tjen sʼe̱kjoanle. Alikui ʼyaa jokjitse nichxin tíjnasa nga koa̱n kʼuínyalee chjota xi tʼatsʼe Jeobá kao Jesús (Juan 17:3). Ngatsʼi chjota xi mele nga so̱kole “kjoabijnachon ngantsjai” machjén nga kʼuínyalee nga kjesa faʼaijin je kjoañʼai xi nʼio tse (Hech. 13:48). Jósʼin kuinyakoaa je chjota nga kjesa faʼaijin je kjoañʼai xi nʼio tse.

10. Jméni xi títsjoáná je naxinandále Jeobá nga koa̱n kʼuínyalee chjota.

¹⁰ Nʼio nkjín koya jmeni xi títsjoáná je naxinandále Jeobá nga koa̱n kʼuínyalee chjota. Tobʼelañá, nga satíoná kjoajtín nga jinle xomana kui sakóyaná jokoa̱n kuixoán nga chja̱kaonajmiá chjota nga tosʼa bichochon títjonlee kʼoa nga mangínnixatʼa ijngokʼá kʼoa josʼin ʼmiyalee Biblia. Je naxinandále Jeobá kʼoati títsjoáná je xo̱n kao video xi nichjén nga ʼmiyaa. Kataʼyala jósʼin koasenkaoná:

• nga chja̱kaonajmiá je chjota,

• nga katamandosinná je chjota,

• nga koa̱nmesale skoe̱ xi tʼatsʼe Niná,

• nga kʼuínyalee je Biblia,

• kʼoa nga kʼoakʼuínlee nga koa̱n sichjén je página xi tíjnaná ya Internet kʼoa nga katafi ya Ndʼia jña chotʼayá.

 Nga nkjín koya tjínná xi nichjén nga ʼmiyasoán, tjínnele koa̱nná si̱chjén ngayeje jebi. * Tobʼelañá, tsa je chja̱kaonajmiá chjota xi koa̱nndosinle je Énle Niná, koaan tsa jngo tratado kʼoa tsa jngo revista si̱kájnalee kʼoa kʼoakʼuínlee nga katabʼéxkia josaʼnda nga kuichochon ijngokʼalee. Nga jngó jngóñá nga tjínnele nda kʼuínyasoán nga xki̱ sá.

11. Ánni nga ma ya tjen Internet ʼmiyanile je chjota.

¹¹ Ijngolasa koya kataʼyaa josʼin tíbasenkao Jeobá je chjota nga katamale xi tʼatsʼe. Maa ya tjen página xi tíjnaná Internet ʼmiyanile Biblia je chjota. * Jmé xá kisʼendani página jebi. Nga xki̱ sá jmi mani chjota básjai nga ya tjen Internet kataʼmiyanile Biblia. Jmeni xi faʼaitʼa ya jw.org^® binyakao chjota nga katabe jotjínni xi kixi. Tjínkʼa chjota xi tsaojiaan kʼianga ʼmiyasoán xi tsín tokjoán mamele nga Biblia kotʼaya. Koaan koakolee je página xi tíjnaná ya Internet kʼoa kʼoati koa̱n si̱kasénlee je dirección xi kui én xi nchja̱ faʼaitʼa.

12. Jméni xi majinle chjota kʼianga ya tjen Internet kotʼayani Biblia.

¹² Jmeni xi sakóyale chjota ya tjen Internet kui tʼatsʼe Biblia kʼoa ʼyá tʼatsʼe jaʼaini. Kʼoati nchja̱ni tʼatsʼe chjota xi faʼaitʼa Biblia kʼoa jmé kjoachoya xi tsjoáná nichxin xi nroaján. Kʼianga kotʼaya chjota majinle xi tʼatsʼe:

• jósʼin basenkaoná Biblia,

• ʼyáni je Jeobá, Jesús kʼoa kao ánkje,

• jmé xá kisindani Niná je chjota,

• kʼoa ánni nga kʼoasikji kjoañʼai kao kjoatsʼen tjínsíni.

Kʼoati majinsale xi tʼatsʼe:

• jméni xi sʼin Jeobá nga kjoaʼaxin je kjoañʼai kao kjoabiya,

• jósʼin sikjaʼáyanile xi jekʼien,

• kʼoa jósʼin kʼoéjnayangajaole je Chjotaxále Niná je chjotaxá sonʼnde.

13. Tʼeyanajmí, a kui xi tsonile nga tsín tikoa̱n ñásoa kʼuínyanilee je chjota kʼianga ya tjen Internet ʼmiyanile Biblia.

¹³ Kʼianga ya tjen Internet ʼmiyanile Biblia chjota ali tsakuijin xi tsonile nga tsín tikoa̱n ñásoa kʼuínyanilee. Je Jesús kui kjoanda títsjoáná nga chjotatjenngile tinikoaa je chjota. Kui xi mená nga ya tjen Internet katamanile je chjota xi tʼatsʼe Biblia, nga chjí katabe jmeni xi koa̱njinle kʼoa nga koa̱nmesale skoe̱ jotjínni xi kixi. Tsa kʼoasʼin, tsakui nichxin koa̱nmele nga ʼya xi kuichosíxatʼa ya niʼyale nga kuitsoyale Biblia. Kʼianga jekjoetʼale nga skótʼaya jmeni xi ya Internet faʼaitʼa, kʼoa tsa mesale skoe̱ jotso Biblia, koaan sijé nga jngo testigole Jeobá koaisíxatʼa nga kuitsoyale Biblia. Nga nyaon nyaon, mela 230 chjota síjé ya tjen Internet nga mele Biblia sa̱kóyale. Nʼio tjínle kjoandosin nga kʼuínyalee.

14. Tojo tso Mateo 28:19, 20, jméni xi kʼoénelee yaoná nga sʼiaan, kʼoa ánni.

¹⁴ (Tʼexkiai Mateo 28:19, 20). * Kʼianga Biblia ʼmiyalee je chjota, kʼoénelee  yaoná nga chjotatjenngile Cristo si̱koaa kʼoa nga katasítjoson ngayeje jmeni xi tsakʼéne je Jesús. Machjén nga katamajinle nga toje Jeobá kao Chjotaxále tjínnele koaitʼale. Kui xi tsonile nga tjínnele kʼoasʼin koaikao yaole jotso je Énle Niná, nga tsjoátʼale yaole je Jeobá kʼoa nga katafisʼenngindá. Nga̱ kui xi koasenkao nga kjoaʼaí je nichxinle Jeobá (1 Ped. 3:21, TNM).

15. Ánni nga tsín nichxinná si̱chasíñá.

¹⁵ Tojosʼin tiʼyaa, tongichoasa chale nga kjoetʼa jmeni xi chon sonʼnde. Kuinga tsín koa̱n nichxinná si̱chañá nga Biblia tosi tonda kʼuínyalee je chjota xi tsín mele nga chjotatjenngile Cristo koa̱n (1 Cor. 9:26). Nʼio maxátíyale je xá xi tinʼia. Nʼio nkjín chjota chasa xi tjínnele kjuinrʼoé je énnda chjotse nga kjesa fetʼajin jmeni xi chon sonʼnde.

16. Tojo tso Apocalipsis 18:2, 4, 5, 8, jméni xi tjínnele sʼiaan ngatsʼiaa (kʼoati chótsenlai nota).

¹⁶ (Tʼexkiai Apocalipsis 18:2, 4, 5, 8). * Texto jebi kui bakóyaná jmesani xi mele Jeobá nga sʼiaan. Ñá xi chjotale Cristo maa, tjínnele nga ñaki kuinyatʼaxinlee je Babilonia xi nʼioje. Tsakui nichxin je chjota xi Biblia ʼmiyalee ya tsakatiojin je religión ndiso nga kjesa bejin xi kixi. Kʼoa tsa nʼio kisisinje̱ yo̱ngo̱le kʼoa kui kʼoakisʼin jmeni xi ma kʼoa tsa tao̱n tsakʼaileje̱. Kʼianga jekoa̱nmele kuitsoyason kao je jtín ninga kje fisʼenngindájin, machjén nga sikatío ngayeje xi ya religión ndiso nroani. Tjínnele jngo xo̱n kʼoenda nga kʼoakuitso nga tsín tiya tsjónjinni yaole ya yo̱ngo̱ jñani sísin ngasʼa kʼoa tsa jmesani xi kisʼin xi ya nroani je Babilonia xi nʼioje. *

17. Jmé xá xi tsín koa̱n chjoé xi chjotale Cristo maa, kʼoa ánni.

¹⁷ Ñá xi chjotale Cristo maa alikui koa̱n nga kui xá chjoé xi ya nroani tʼatsʼe religión ndiso (2 Cor. 6:14-17). Tobʼelañá, tsín koa̱n nga ya si̱xá ya yo̱ngo̱. Xi ijngosani, tsa nai tjínná xi tsjoáxáná, alikui koa̱n nga ya si̱xá tsa jngo yo̱ngo̱ sʼe̱nda. Kʼoa tsa  tsaan xá nʼia alikui koa̱n nga ya kuijnyíxá kʼoa tsa ya si̱xá xi tʼatsʼe religión ndiso nroani. Ánni nga tsín koa̱n kʼoasʼiansíñá. Kuinga tsín kʼoati ya si̱kʼójiaan yaoná jmeni xi sʼín je religión ndiso kʼoa jokji tjíobajngijée ngixko̱n Niná (Is. 52:11). *

18. Jókisʼin jngo ndsʼee kʼianga kʼoatsakʼinle nga ya sixá jñani kijna jngo yo̱ngo̱.

¹⁸ Ñandia jngo chjota kʼoakitsole jngo ndsʼee xi chjotajchínga sʼin tíjna xi chjineyá tsa koa̱n ya koaisíxá jñani kijna jngo yo̱ngo̱. Chjota jebi be nga kʼoakitso je ndsʼee nga tsín sixá jñani yo̱ngo̱ tjín. Tonga nga kʼia, nʼio maxátíyale je xá. Ninga kʼoalani, je ndsʼee kui kuenta kisʼin je kjoafaʼaitsjen xi tsjoá Biblia kʼoa tsín kisixá. Je periódico xi kitjo nga jejngo xomana jaʼato, yaa kitjotʼa je chjota xi kisixá nga jngo kro tíbasenjnason ya yo̱ngo̱. Kʼiatsa jelani ndsʼee xi ya kisixá yajin kitjotʼa je periódico. Kʼoa alikuijin ndasʼin kisikjaʼaitsjen je ndsʼee ya jinjtín kʼoa chʼaojin kisʼe kon je Jeobá.

19, 20. 1) Jméni xi kamajinná i̱ kjoaʼmiya jebi. 2) Jmésani xi machjén nga jchaa.

¹⁹ Tojo tso je én xi tongini kinokjoa, je xi nʼio tjínle kjoandosin xi jeme kʼoakoa̱n kuinga “jo nda nyʼán tiyoaa. Nijmejin xi koa̱nná” kuitso chjota. Tonga je Jeobá kʼoatso nga tsín koa̱nle je chjota nga kjoanyʼán kjoaʼaíkao. Jméni xi sʼiaan nga kjesa kʼoatsojin je chjota kʼoa nga kjesa faʼaijin kjoaxkón. Je Niná kui xi mele nga tosi tonda kʼuínyasoán xi tʼatsʼe Chjotaxále kʼoa nga chjotale Cristo si̱koaa je chjota. Tonga kʼoati machjén nga tsín ya kuinójiaan yaoná jmeni xi sʼín je religión ndiso. Jebi kui xi tsonile nga tsín tiya kuiyojinnilee je religión ndiso kʼoa nga tsínkui xá chjoé xi tʼatsʼe nroani.

²⁰ Nʼiosa nkjín koya jmeni xi koa̱n nga to jetífetʼa nichxin kʼoa tjínsa jmeni xi mele Jeobá nga sʼiaan. Jméni xi mele nga sʼiaan, kʼoa jósʼin tongini kuiyondalee jmeni xi koa̱n nichxin xi machrianle. Yaa kjoaʼmiya xi ijngo jchaa xi tʼatsʼe jebi.