LARTIK LETID 40
Res Bien Okipe dan Dernie Parti “Bann Dernie Zour”
“Vinn ferm, solid, ena touzour boukou pou fer dan travay nou Segner.”—1 KOR. 15:58, NW.
KANTIK 58 Rod Bann Dimounn Ki Kontan Lape
REZIME *
1. Kifer nou sir ki nou pe viv dan “bann dernie zour”?
ESKI to’nn ne apre lane 1914? Si wi, to finn touletan viv pandan “bann dernie zour” sa lemond-la. (2 Tim. 3:1, NW) Nou tou nou finn tann bann kitsoz ki Zezi ti predir pou arive dan sa lepok-la. Parmi sa bann kitsoz-la ena lager, lafaminn, tranbleman-de-ter, lepidemi, bann pratik ki kont lalwa ki pe ogmante, ek persekision pep Zeova. (Mat. 24:3, 7-9, 12; Lik 21:10-12) Nou pe osi trouv bann dimounn azir dan mem fason ki lapot Pol ti predir. (Get lankadre “ Azordi Bann Dimounn . . . ”) Nou, bann Temwin Zeova, nou sir ki nou pe viv “dan peryod final bann zour.”—Mish. 4:1.
2. Ki bann kestion nou pou reponn dan sa lartik-la?
2 Boukou letan finn pase depi 1914, alor pena dout ki nou pe viv dan dernie parti “bann dernie zour.” Parski lafin bien pre, nou bizin konn repons pou sertin kestion inportan kouma: Ki bann levennman pou ena alafin “bann dernie zour”? Ki Zeova anvi nou fer amezir ki nou pe atann sa bann levennman-la?
KI POU ARIVE ALAFIN “BANN DERNIE ZOUR”?
3. Dapre profesi ki trouv dan 1 Tesalonisien 5:1-3, ki deklarasion bann dirizan sa lemond-la pou fer?
3 Lir 1 Tesalonisien 5:1-3, NW. * Dan sa bann verse-la, Pol koz lor “zour Zeova.” Dan sa text-la, “zour Zeova” fer referans ar lepok ki pou koumanse avek latak kont “Gran Babilonn,” lanpir mondial fos relizion, ek ki pou fini par Armagedon. (Rev. 16:14, 16, NW; 17:5) Zis avan ki sa ‘zour-la’ koumanse, bann dirizan sa lemond-la pou anons “Lape ek sekirite!” Bann dirizan dan lemond souvan servi bann lexpresion koumsa kan zot pe rod amelior relasion ki ena ant bann pei. * Selman, deklarasion “Lape ek sekirite” ki mansione dan Labib pou diferan. Kifer? Kan sa arive, bann dimounn kitfwa pou panse ki bann dirizan imin finn reisi fer lemond vinn enn plas kot nou plis an sekirite. Me an realite, “enn sel kou” pou ena enn destriksion kan “gran detres” pou koumanse.—Mat. 24:21, NW.
Pa les twa anbete par lanons ki bann nasion pou fer konsernan “lape ek sekirite” (Get paragraf 3-6) *
4. (a) Ki kitsoz nou pa kone konsernan lanons lor “lape ek sekirite”? (b) Ki nou deza kone konsernan sa lanons-la?
4 Se vre ki ena bann kitsoz ki nou kone konsernan deklarasion “Lape ek sekirite.” Me ena sertin kitsoz ki nou pa kone. Nou pa kone kifer bann dirizan pou fer sa lanons-la ek kouma zot pou fer sa lanons-la. Nou pa kone osi si pou ena zis enn sel lanons ouswa plizir lanons. Me fode pa nou les nou anbete ek panse ki bann dirizan pou kapav amenn lape dan lemond. Okontrer, se sa lanons-la ki Labib demann nou pou veye. Se enn sign ki “zour Zeova” pre pou koumanse!
5. Kouma 1 Tesalonisien 5:4-6 ed nou pou prepar nou pou “zour Zeova”?
5 Lir 1 Tesalonisien 5:4-6, NW. * Dan sa bann verse-la, Pol dir nou seki nou bizin fer pou ki nou pare kan “zour Zeova” vini. “Fode pa ki nou dormi kouma lezot.” Nou bizin res eveye ek “res lor nou gard.” Par exanp, nou bizin res lor nou gard pou ki nou kapav gard nou netralite ek pa inplik nou dan bann zafer politik. Si nou inplik nou dan sa bann zafer-la, nou riske “fer parti dan lemond.” (Zan 15:19, NW) Nou kone ki se zis Rwayom Bondie ki pou kapav amenn lape dan lemond.
6. Ki nou anvi ed lezot pou fer, ek kifer?
6 Anplis ki nou res lor nou gard, nou anvi ed lezot osi pou kone seki Labib ti predir lor seki pou ariv lemond. Nou bizin fer sa depi asterla mem parski kan gran detres pou koumanse, li pou tro tar pou ki bann dimounn koumans servi Zeova. Ala kifer li irzan ki nou pres bonn nouvel! *
RES BIEN OKIPE DAN PREDIKASION
Kan nou prese azordi, nou montre ki zis Rwayom Bondie ki kapav amenn vre lape ek sekirite lor later (Get paragraf 7-9)
7. Ki Zeova anvi nou fer asterla?
7 Res bien tigit letan avan ki “zour” Zeova koumanse. Avan ki sa zour-la koumanse, Zeova anvi ki nou res bien okipe dan predikasion. Nou bizin fer an sort ki nou “ena touzour boukou pou fer dan travay nou Segner.” (1 Kor. 15:58, NW) Zezi ti predir seki nou ti pou fer. Kan li ti koz lor tou bann kitsoz inportan ki ti pou arive pandan bann dernie zour, li ti azoute: “Premie dabor, fode ki Bonn Nouvel proklame dan tou bann nasion.” (Mark 13:4, 8, 10; Mat. 24:14) Reflesi lor la: Sak fwa ki to al prese, an realite to pe ede pou realiz sa profesi-la!
8. Ki bann bon rezilta pe gagne gras-a travay predikasion?
8 Ki nou kapav dir lor bann bon rezilta ki pe gagne gras-a travay predikasion? Sak lane pli boukou dimounn pe tann koz lor bon nouvel lor Rwayom Bondie. Par exanp, pandan bann dernie zour, dan lemond antie, kantite proklamater inn kontign ogmante. An 1914, ti ena 5,155 proklamater dan 43 pei. Azordi, ena apepre 8.5 milyon proklamater dan 240 pei! Kanmem sa, nou travay pankor fini. Nou bizin kontign anonse ki se zis Rwayom Bondie ki pou rezoud problem bann dimounn.—Ps. 145:11-13.
9. Kifer nou bizin kontign pres mesaz lor Rwayom Bondie?
9 Nou travay predikasion pa pou fini tanki Zeova pa dir ki li’nn fini. Komie letan reste pou ki bann dimounn aprann konn Zeova ek Zezi Kris? (Zan 17:3, NW) Nou pa kone. Me nou kone ki, tanki gran detres pa koumanse, ninport kisannla ki “ena enn bon kondision leker pou gagn lavi eternel” ankor kapav aksepte bonn nouvel ek swazir pou servi Zeova. (Zist. 13:48, NW) Kouma nou kapav ed sa bann dimounn-la avan ki li tro tar?
10. Kouma Zeova ed nou pou ansegn bann dimounn laverite?
10 Atraver so lorganizasion, Zeova pe donn nou tou seki nou bizin pou ansegn bann dimounn laverite. Par exanp, sak semenn nou gagn enn formasion dan renion lasemenn. Sa renion-la ed nou pou kone seki nou kapav dir kan nou zwenn bann dimounn pou premie fwa ek kan nou al vizit zot. Nou aprann osi kouma pou fer bann letid Labib. Lorganizasion Zeova finn osi donn nou bann zouti dan nou Kes Zouti pou Ansegne. Sa bann zouti-la ed nou pou . . .
-
koumans bann konversasion,
-
prezant nou mesaz dan enn fason interesan,
-
ed bann dimounn pou anvi konn plis lor Labib,
-
ansegn laverite ki ena dan Labib ar nou bann letid, ek
-
invit bann ki interese pou al lor nou sit Internet ek pou vinn asiste nou bann renion.
Biensir, li pa ase ki nou zis ena sa bann zouti-la. Nou bizin servi zot. * Par exanp, si nou’nn kit enn trakt ouswa enn magazinn avek enn kikenn ar ki nou’nn gagn enn bon konversasion, li pou kapav kontign lir nou piblikasion ziska ki nou re-zwenn li. Se nou responsabilite pou res bien okipe sak mwa dan laktivite predikasion.
11. Ki lobzektif Letid Labib lor Internet?
11 Enn lot fason ki Zeova pe ed bann dimounn pou aprann konn laverite se atraver seksion Letid Labib lor Internet lor jw.org®. Ki lobzektif sa seksion-la? Sak mwa, enn kantite dimounn al lor Internet pou rod bann letid Labib. Sa seksion ki trouv lor nou sit la kapav ed bann dimounn pou koumans aprann bann verite ki ena dan Parol Bondie. Kitfwa sertin dimounn ki to zwenn dan predikasion ezite pou aksepte enn letid Labib. Alor, to kapav montre zot sa seksion-la lor nou sit ouswa avoy zot enn link pou al dan sa seksion-la. *
12. Ki enn kikenn kapav aprann dan seksion Letid Labib lor Internet?
12 Dan seksion Letid Labib lor Internet ena bann size kouma: “Labib ek So Loter,” “Bann Personaz Prinsipal dan Labib,” ek “Mesaz Lespwar ki Ena dan Labib.” Dan sa seksion-la, enn kikenn kapav aprann:
-
Kouma Labib kapav ed enn dimounn?
-
Kisannla Zeova, Zezi, ek bann anz ete?
-
Kifer Bondie finn kree bann dimounn?
-
Kifer ena soufrans ek bann move kitsoz?
Sa seksion-la montre osi kouma Zeova pou . . .
-
eliminn soufrans ek lamor,
-
resisit bann mor, ek
-
ranplas bann gouvernman imin par Rwayom Bondie.
13. Eski enn letid Labib lor Internet ranplas enn letid Labib ki nou fer personelman avek enn dimounn? Explike.
13 Bann letid Labib lor Internet pa ranplas enn Letid Labib ki nou fer personelman avek bann dimounn. Zezi finn donn nou privilez pou fer bann disip. Nou ti pou kontan ki bann ki interese al get sa seksion-la lor Internet, apresie seki zot aprann, ek anvi konn plis. Kitfwa lerla zot pou aksepte enn letid Labib. Alafin sak size, zot gagn enn linvitasion pou etidie Labib avek enn kikenn. Sak zour lor nou sit, dan lemond antie, plis ki 230 dimounn pe demann ki enn kikenn etidie Labib avek zot. Enn letid Labib ki enn ansegnan fer personelman avek enn dimounn li bien inportan.
KONTIGN FER ZEFOR POU FER BANN DISIP
14. Dapre Matie 28:19, 20, nou bizin fer nou maximum pou fer ki kitsoz, ek kifer?
14 Lir Matie 28:19, 20. Kan nou fer bann letid Labib, nou bizin fer nou maximum pou fer “bann disip . . . . Montre zot met anpratik tou seki [Zezi] finn komann zot.” Nou bizin ed bann dimounn pou konpran ki kantite li inportan ki zot swazir pou servi Zeova ek soutenir so Rwayom. Savedir ki nou bizin esey motiv bann dimounn pou met an pratik seki zot aprann, pou vwe zot lavi ar Zeova, ek pou pran batem. Se lerla ki zot pou gagn lavi sov kan zour Zeova vini.—1 Pier 3:21.
15. Nou pa kapav perdi nou letan fer ki kitsoz, ek kifer?
15 Kouma finn mansione avan, res bien tigit letan avan lafin sa sistem-la. Akoz sa, nou pa kapav perdi nou letan pou kontign etidie Labib avek bann dimounn ki pena okenn lintansion pou vinn bann disip Zezi Kris. (1 Kor. 9:26) Nou travay li irzan! Ena ankor boukou dimounn ki bizin tann mesaz lor Rwayom Bondie avan ki li tro tar.
RES LWIN AR FOS RELIZION
16. Dapre Revelasion 18:2, 4, 5, 8, ki nou tou nou bizin fer? (Get not osi.)
16 Lir Revelasion 18:2, 4, 5, 8, NW. * Sa bann verse-la koz lor enn lot kitsoz ki Zeova anvi ki so bann serviter fer. Tou bann vre Kretien bizin fer sir ki zot pena okenn lien avek Gran Babilonn. Avan ki enn etidian Labib konn laverite kitfwa li ti dan enn fos relizion. Kitfwa li ti asiste bann lapriyer sa relizion-la ek ti partisip dan so bann laktivite. Kitfwa li finn osi donn kas pou soutenir sa relizion-la. Avan ki enn etidian Labib vinn enn proklamater ki pa batize, li bizin fer sir ki li nepli form parti dan fos relizion ouswa dan ninport ki lorganizasion ki ena enn lien ar fos relizion. Li bizin ekrir enn let sa legliz ouswa sa lorganizasion ki li ti form parti la, pou inform zot ki li nepli enn manb. *
17. Ki kalite travay enn Kretien bizin pa fer, ek kifer?
17 Enn vre Kretien bizin fer sir ki so travay pena okenn lien avek Gran Babilonn. (2 Kor. 6:14-17) Par exanp, li pa pou travay pou enn legliz. Anplis, enn Kretien ki travay pou enn konpagni pa pou fer bann gran travay dan enn batiman ki servi pou fos ladorasion. Ek si aster li ena so prop biznes, li pa pou aksepte enn travay ouswa enn kontra ki pou fer li travay pou Gran Babilonn. Kifer nou bizin ferm koumsa? Parski devan lizie Zeova, sa bann lorganizasion relizie la inpir ek nou nou pa anvi partisip avek zot dan zot bann travay ek zot bann pese.—Iza. 52:11. *
18. Kouma enn frer ti res atase ar bann prinsip Zeova dan so travay?
18 Plizir lane avan, enn kontrakter ti demann enn ansien ki ena so prop biznes pou fer enn ti travay sarpantie dan enn legliz ki ti trouv dan landrwa kot frer-la ti reste. Kontrakter-la ti kone ki sa frer-la ti touletan dir ki li pa pou travay dan legliz. Me sann fwa-la, kontrakter-la pa ti pe gagn personn pou fer sa travay-la. Kanmem sa, frer-la ti res atase ar bann prinsip Labib ek li ti refiz sa travay-la. So semenn apre, zournal lokal ti montre foto enn lot sarpantie ki ti pe atas enn lakrwa lor sa legliz-la. Sey mazine ki ti pou arive si nou frer pa ti res atase ar bann prinsip Labib! Kitfwa se so foto ki ti pou ena lor sa zournal-la. Sa ti kapav gat so repitasion parmi bann frer ek ser. Reflesi osi ki Zeova ti pou resanti!
KI NOU FINN APRANN?
19-20. (a) Ki nou finn aprann dan sa lartik-la? (b) Ki nou pou aprann dan prosin lartik?
19 Dapre Labib, prosin profesi inportan ki biento pou realize se kan bann dirizan sa lemond-la pou anonse ki ena “lape ek sekirite.” Gras-a seki Zeova finn ansegn nou, nou kone ki bann nasion pa pou reisi amenn vre lape ek sekirite. Ki nou bizin fer avan ki sa levennman-la arive ek ki enn sel kou ena enn destriksion? Zeova anvi ki nou res bien okipe pou pres bon nouvel lor Rwayom Bondie ek esey fer pli boukou disip. Anmemtan, nou bizin res lwin ar fos relizion. Savedir ki nou bizin aret form parti dan Gran Babilonn ek fode pa nou fer enn travay ki ena enn lien avek Gran Babilonn.
20 Ena bann lezot levennman ki pou arive dan dernie parti bann “dernie zour.” Ena osi bann lezot kitsoz ki Zeova anvi nou fer. Ki sa bann kitsoz-la sa, ek kouma nou kapav prepar nou pou tou seki pou arive biento? Nou pou get sa dan prosin lartik.
KANTIK 71 Nou Bann Solda Zeova!
^ par. 5 Nou pe atann ki biento bann dirizan sa lemond-la anonse ki zot finn reisi amenn “lape ek sekirite!” Sa pou enn sign ki montre ki gran detres pre pou koumanse. Ki Zeova anvi nou fer ant asterla ek moman ki fer sa lanons-la? Sa lartik-la pou ed nou gagn sa repons-la.
^ par. 3 1 Tesalonisien 5:1-3: “1 Alor, konsernan bann letan ek bann lepok, frer, zot pa bizin ki ekrir zot nanye lor la. 2 Parski zot bien kone ki zour Zeova pe vini parey kouma enn voler dan lanwit. 3 Kan zot pou dir: ‘Lape ek sekirite!’ lerla, enn sel kou enn destriksion pou vinn lor zot, san ki zot atann, parey kouma bann douler enn fam ansint; ek dan okenn fason zot pa pou sape.”
^ par. 3 Par exanp, lor so sit, l’Organisation des Nation Unies pretann ki li pe prezerv “lape ek sekirite dan lemond.”
^ par. 5 1 Tesalonisien 5:4-6: “4 Me zot mo bann frer, zot pa dan nwarte, pou ki sa zour-la pran zot par sirpriz parey kouma lizour pran bann voler par sirpriz, 5 parski zot tou zot bann garson lalimier ek bann garson lizour. Nou pa pou lanwit ni pou nwarte. 6 Alor fode pa ki nou dormi kouma lezot pe fer, me anou res lor nou gard ek gard nou bon sans.”
^ par. 6 Get lartik “Bann Zizman Bondie—Eski Bondie Touletan Donn Ase Lavertisman?” dan sa magazinn-la.
^ par. 10 Pou gagn plis ransegnman kouma pou servi nou Kes Zouti pou Ansegne, get lartik “Ansegn Laverite” dan Latour Degard Oktob 2018.
^ par. 11 Pou linstan Letid Labib lor Internet disponib zis an Angle ek an Portige. Plitar pou ena bann lezot lang.
^ par. 16 Revelasion 18:2, 4, 5, 8: “2 Ek li ti kriye avek enn lavwa bien for, li ti dir: ‘Li’nn tonbe! Gran Babilonn inn tonbe, ek li’nn vinn enn landrwa kot bann demon reste ek enn plas kot tou bann lespri inpir ek tou bann zwazo inpir ek degoutan kasiet.’ 4 Mo’nn tann enn lot lavwa sorti dan lesiel dir: ‘Sorti ladan, mo pep, si zot pa anvi partisip avek li dan so bann pese, ek si zot pa anvi gagn enn par dan so bann maler. 5 Parski so bann pese finn mont ziska lesiel, ek Bondie finn rapel tou so bann linzistis. 8 Ala kifer dan enn sel zour tou bann maler pou vinn lor li: lamor, dey, lafaminn, ek li pou brile net par dife parski Bondie Zeova ki’nn ziz li, Li for.’”
^ par. 16 Fode pa nou form parti osi dan bann lorganizasion kouma mouvman bann zenes ouswa bann asosiasion sportif ki ena enn lien avek fos relizion. Par exanp, konsernan YMCA (Association chrétienne de jeunes gens), get lartik « Questions des lecteurs » dan Latour Degard 1e Avril 1979. Bann mem prinsip aplike pou YWCA (Association chrétienne des jeunes femmes). Mem si sa bann lasosiasion-la fer krwar ki zot bann aktivite pa relizie, an realite zot ankouraz bann lide relizie ek zot ena bann lobzektif relizie.
^ par. 17 Pou examinn plis an profonder seki Labib dir lor bann travay ki ena enn lien avek bann lorganizasion relizie, get « Questions des lecteurs » dan Latour Degard 15 Avril 1999.
^ par. 86 DESKRIPSION ZIMAZ: Reaksion bann klian dan enn restoran kan zot tann lanons lor “lape ek sekirite” ki pe pase lor televizion. Enn koup Temwin, ki pe fer enn ti poz apre predikasion, pa les zot anbete ar sa linformasion-la.
