1. Mati da a ǂan ǀuni tsēdi ǃnâ da hâ ǃkhaisa?

1914ǁÎ KURIB khaoǃgâ du ge ǃnae? Nēs nî amas ga i o, ots ge sa ûib hoaba “ǀuni tsēdi” ǃnâ ûi hâ. (2Tim. 3:1) Hoa da ge Jesub ge ǀuni tsēdi xa mî xūna ge ǁnâu. Nēs ge torogu, ǃâtsūǀkhāgu, ǃhūǂgubigu, ǀaegu, eloxoresasib tsî Jehovab ǃoaba-aona saoǃgonhes tsîna ǃkhōǂgā hâ. (Mat. 24:3, 7-9, 12; Luk. 21:10-12) Khoen ge apostel Paulub ge mî ǀgaub ǃnâs tsîna ra tanisen. (“ Khoen nēsi ī ǀgaub” di hâ boksisa mû re.) Jehovab ǃoaba-aon ase da ge ra ǂgom “ǀuni tsēdi” ǃnâ da ûi hâ ǃkhaisa.—Mix. 4:1.

2. Mâ dîdi ai da ǃereamde nî hō?

² ǂGui ǁaeb ge 1914ǁǀî kurib khaoǃgâ ge ǃkharu ǁnās ǃaroma da ge ǀams “ǀuni tsēdi” dis ǃnâ ûi hâ. ǀAms nētikōse a ǀgū ǃkhais ǃaroma da ge sao ra dîdi ai ǃereamsa nî hō: Taena ǀuni tsēdi ǀams ai nî ī? Tsî Jehovaba tae-e sada xu ra ǃâubasen nēsa da ǃâu hâ hîna?

3. 1 Tesalonikaǁîn 5:1-3 ǃoagun khoena mâ ǂanǂansa nî dī?

³ Khomai re 1 Tesalonikaǁîn 5:1-3. Paulub ge ‘Jehovab di tsēs’ xa ge ǂanǂan. Nēba î ra ǁgauhe khamis ge nēsa “Babilons kais” di ǁnāǂamsa ǃoa ra ǁnaeǁgau, ama tama ǂgomdi nî hîgāgā-e se ī ǁaeb hîna Armagedons ǀkha nî ǀamsa. (J.ǂHa. 16:14, 16; 17:5) ǁNā tsēdi nî hās aiǃân ge khoena “ǂkhîb ge hâ tsî tsūǃgâ-i a ǀkhai” di hâ ǂanǂansa nî mā. (ǀNîn ge nēsa “ǂkhîb tsî ǃnorasasib”  ge hâ di ra ǂnûiǃkhuni.) ǃHūbaib ǂgaeǂgui-aogu tsîn ge nē ǂâi ǀgauba ra sîsen-ū ǃhaode ǀguiǃnâxa kais xa gu ga ǃhoa o. * Xawe “ǂkhîb ge hâ tsî tsūǃgâ-i a ǀkhai” di hâ ǂanǂans Elobmîs ǃnâ hâs ge nî ǀkhara. Tae-i ǃaroma? Nēs ga ī on ge khoena nî ǂâi ǃhūbaib ǂgaeǂgui-aogu go ǂkhîb tsî ǃnorasasib tsîna hoa ǃhūbaiba hā-ūba di. Xaweb ge “kai ǁgâiǀāba” nîra tsoatsoa tsî gu ge “kai tsūǀkhāga” nîra hâ.—Mat. 24:21.

4. (a) Tae-e da nî ǃâu mûsa “ǂkhîb ge hâ tsî tsūǃgâ-i a ǀkhai” di hâ ǂanǂans xa? (b) Tae-e da ǀnai nē ǂanǂans xa a ǂan?

⁴ “ǂKhîb ge hâ tsî tsūǃgâ-i a ǀkhai” di hâ ǂanǂans xa da ge xū-e a ǂan. Xawen ge ǀnî xūna hâ hîna da a ǀūna. ǀŪ da ge a tae-i nî ǃaromasa nē ǂanǂans nî mā-es aiǃâ tamas ka io matis nē ǂanǂansa nî mā-e ǃkhaisa. Nē ǂanǂans nî ǃâgu ǃnâ tamas ka io ǀgui ǁaeb ai dīhe ǃkhais tsîna da ge a ǀū. Tae-i ǀgui i ga ī xawe da ge tātsē ǂgom ǂgao tama nē ǃhūbaib ǂgaeǂgui-aogu ǂkhîba ǃhūbaiba nî hā-ūba di. Xawe da ge nē ǂanǂans xa nî ǂan i Elobmîs nēs xa ra ǃhoa xui-ao. Nēs ge ‘Jehovab kai tsēs’ di tsoatsoas ǁgauǁgaus ase nî ī.

5. 1 Tesalonikaǁîn 5:4-6 sa mati ra huida ‘Jehovab di kai tsēs’ amsi ǂkhaikari hâs ǃnâ?

⁵ Khomai re 1 Tesalonikaǁîn 5:4-6. Paulub ǃkhâikhoms ge ra ǁgau mati da aiǂhomisase nî hâsa ‘Jehovab kai tsēs’ ǃgao. “A da ǁnâi tā ǁom naun khami.” “ǂKhaikari” hâ tsî da ge nî ǂanbasen. Aiǁgause da ge nî ǂanbasen ǀkhāna ǁhûi tama is ǃnâ tsî nē ǃhūbaib di ǂgīǂgōsi xūn ǃnâ ǃâs tsîna. Nē xūn ǃnâ da ga ǃâ-e ūhâ, o da ge nî nē ǃhūbaib di ǃâ kai. (Jhn. 15:19) ǂAn da ge a Elob Gaosib ǀguib ǂkhîba ǃhūbaib ai nî hā-ū ǃkhaisa.

6. Nau khoena da tae-e ra hui ǂgao dīsa tsî tae-i ǃaroma?

⁶ Sada ǂkhaikari ra hâ xawe da ge nau khoen tsîna ra hui ǂgao în ǁîn tsîna ǂkhaikari hâ, Elobmîs sada ǃhūbaib xa ra mî xūna ǁkhāǁkhā nîs ǃnâ-ū. ǂÂis ǃnâ da ge nî ūhâ kai ǁgâiǀāb ga tsoatsoa o, on khoena Jehovaba ǁnā ǁaeb ai ǃoaba ǁoa ǃkhaisa. Nēs ǃaroma i ge a ǂhâǂhâsa nēsi da nî aoǁnâ ǃkhaisa. *

7. Jehovaba tae-e nēsi sada xu ra ǃâubasen hîna da nî dīse ī-e?

⁷ Nē ǃnubu ǁaerob ǁîb ‘kai tsēs’ aisi ǃau hâb ǃnâb ge Jehovaba ǂhâba hâ î da aoǁnâ sîsenni ǃnâ ǀhapese hâ. Dītsâ da ge nî i da “ǃaruǀîǀgui ǀaro ǃKhūb di sîsenni ǃnâ.” (1Kor. 15:58) Jesub ge ge mî tae-e da nî dīsa. ǀUni tsēdi ǃnâ nî īse ī mâǂoa ra xūn xab gere ǃhoa o, ob ge ge mî: “Tsîs ge ǃgâiǂhôasa aibe hoa ǁaedi ǃnâ nîra aoǁnâhe.” (Mrk. 13:4, 8, 10;  Mat. 24:14) ǂÂi re: Sada aoǁnâ sîsenni ǃnâ ra dī xūn hoan ge Elobmîs kēbosa dīǀoaǀoahes ǀkha ra hui.

8. Matib Gaosib ǃgâiǂhôas aoǁnâ sîsena nî aiǃgû?

⁸ Gaosib aoǁnâ sîsenni ra aiǃgû ǀgaus xa da tae-e a mî ǁkhā? Mâ kurib hoaban ge ǃnāsa khoena Gaosib ǃgâiǂhôas xa ra ǁnâu. Aiǁgause, ǂâi re matin ge Gaosib di aoǁnâ-aona ǃhūbaib ǂhawase a ǀarosen ǀgausa ǀuni tsēdi ǃnâ. 1914ǁÎ kurib ǃnân ge 5 155 aoǁnâ-aona 43 ǃhūgu ǃnâ ge hâ i. Nētsēn ge 8.5 miliun aoǁnâ-aona 240 ǃhūgu ǃnâ hâ. Xaweb ge sada sîsena noxoba toa tama hâ. Elob Gaosib ǃgâiǂhôasa da ge noxoba nî aoǁnâ nēs ǃnâ-ū ǀguin khoena ǁîn ǃgomsina ǀamsa nî hōba amaga.—Psa. 145:11-13.

9. Tae-i ǃaroma da Gaosib aoǁnâ sîsenni ǀkha nî aiǃgû?

⁹ Sada Gaosib aoǁnâ sîsenni ge Jehovab toa i go di mî tama hâs kōse toa tide. Khoena matikō ǁae-e ūhâ Jehovab tsî Jesub Xristub tsîkha xa ǁkhāǁkhāsens amsi? (Jhn. 17:3) Sada ge nēsa a ǀū. ǂAn da ge a kai ǁgâiǀāb nî tsoatsoas kōsen ‘ǀamo ûiba ǃoa ǃkhōǂuibasenhe hâna’ ǃgâiǂhôasa nî ūǃoasa. (ǃNǃkh. 13:48) Nē khoena da mati a hui ǁkhā ǁaeba da noxoba ūhâ hîna?

10. Mâ huibab Jehovaba ra mā da nau khoena amab xa ǁkhāǁkhās ǃaroma?

¹⁰ ǁÎb di ǀapeǂhumis ǃnâ-ūb ge Jehovaba hoa xūn hîna da ǂhâ hâna ra mā da, khoena amaba ǁkhāǁkhās ǃnâ. Aiǁgause da ge wekheb ǁaegub ǃnâ hâ ǀhaos tawa ra ǁkhāǁkhā-e. Nē ǀhaos ge ra huida î da ǂan tae-e da ǂguro saris tsî ǁkhawa saris tawa nî mîsa. Tsî ra huida mati da Elobmîs ǁkhāǁkhāde nî dīsa. Jehovab ǀapeǂhumis ge ǁkhāǁkhās boksis ǃnâ da ra hō xūn tsîna ge mā da. Nē xūn ge ra huida î da . . .

• ǁgamǀhaode tsoatsoa ǁkhā

• ǃgâiǃgâibasensa omkhâi

• khoena ǂkhâǃnâ în ǃnāsase Elobmîs xa ǁkhāǁkhāsen ǂgao

• amaba Elobmîs xa da ra ǁkhāǁkhā ǁaeb ai ǁkhāǁkhā

• ǃgâiǃgâibasensa ūhâ khoena sada internets ǂhaweba ǃoa ǁkhau tsî sada ǀhaodi ǃoas tsîna

 Xawe î ge ǂâu tama hâ nē xūn ǀguina ūhâsa. Nē xūna da ge nî sîsen-ū. * Aiǁgause du ga ǃgâi ǁgamǀhaosa khoe-i ǀkha aoǁnâ sîsenni ǃnâ ūhâ tsî ǁnās khaoǃgâ ǁî-e Elobmîs ai ǃgaoǃgaosa ǂkhaniba mā o, o i ge ǁî-e ǁnā ǂkhaniba sadu ǁkhawa nî oasī ǁaeb kōse nî khomai. Sada ǃereams ge mâ ǁkhâb hoaba Gaosib di ǃgâiǂhôasa aoǁnâsa.

11. Tae-i ǃaroma di Online Bible Study Lesson de ge tsoatsoa-e?

¹¹ Online Bible Study Lessons di hîna jw.orgs ai hâ di ge a ǀnî hâ ǀgau hînab Jehovaba khoena ra huiba amaba ǁkhāǁkhāsensa. Tae-i ǃaromab nē ǁkhāǁkhā ǀgauba ge tsoatsoa-e? Mâ ǁkhâb hoaban ge ǂgui ǃgôab di khoena ǃhūbaib ǂhawase internetsa ra sari Elobmîs xa ra ǁkhāǁkhāsen ǂgaose. Sada internets ǂhaweb ai hâ ǁkhāǁkhāǃâdi ge khoena Elobmîs amaba ǃoa a daoǁgau ǁkhā. ǀNî khoen hîna da ra ǃhoa-ūn ge Elobmîs ǁkhāǁkhāsa ǀnîsi ǃhaese ūǃoa tide. Nē ǃgomsiba du ga ūhâ o sada internets di ǀasa ǁkhāǁkhā ǀgauba ǁgau nî re tamas ka io linka sîba nî re. *

12. Khoena tae-e Online Bible Study Lesson de xu a ǁkhāǁkhāsen ǁkhā?

¹² Online Bible Study Lesson di ge sao ra xūna ra ǃhoaǃgao: “Elobmîs tsî ǁîs di xoa-aob,” “Elobmîs di mâǂoara ǃhoaǃâdi” tsî “Elobmîs di haisi ams hānîǁaeb xa.” ǁNā ǁkhāǁkhāǃâdi ǃnâ i ge sao rana ra ǁkhāǁkhā-e:

• Elobmîs mati khoe-e a hui ǁkhās

• Jehovab, Jesub tsî ǀhomǃgāgu a hams

• Elob tae-i amsi khoena ge kurus

• ǃGomsin tsî ǁgaoǁgaosib tsîna da tae-i ǃaroma ra hōǃâs

Nē ǁkhāǁkhāǃâdi ge sao ra xūn Jehovab nî dīn tsîna ra ǃhoaǃgao . . . 

• ǃgoma tsâs tsî ǁōb tsîna ǀamsa hōbas,

• ǁō hâna ǁkhawa ûi kais

• Tsî Elob Gaosib ǀkha khoen di ǂhanugu hîna ǃgomsina ǀam-e hōba tama hâga ǃkhōǃkhunis.

13. Elobmîs ǁkhāǁkhāǃâdi internets ai hâde Elobmîs di ǁkhāǁkhâǃâdi hîna da sada ra dī de ra ǃkhōǃkhuni? ǁGuiǃā re.

¹³ Internets ai hâ Elobmîs ǁkhāǁkhāǃâdi ge sada nî dīse ī Elobmîs ǁkhāǁkhāsa ǃkhōǃkhuni tama hâ. Jesub ge ǁkhā- ǁkhāsabedīs di aiǂhanuba ge mā da. ǂGomǃgâ da ge ra ǃgâiǃgâibasensa ūhâ khoen internets ai māsa ǁkhāǁkhāǃâde khomai tsî ǃgôaǃgâsiba omkhâi tsî ǃnāsase nî ǁkhāǁkhāsen ǂgao ǃkhaisa. Nēsan ga dī o, on ge ǀnîsi Elobmîs ǁkhāǁkhāsa a ūǃoa ǁkhā. Mâ ǁkhāǁkhāǃâs hoas ǀams ain ge khoena ra ǂkhâǃnâ-e Elobmîsa ǁkhāǁkhāsensa. Mâ tsēs hoasas ge ǀapeǂhumisa 230 ǂgan-amsende ǃhūbaib ǂhawase ra hō Elobmîsa ra ǁkhāǁkhāsen ǂgao khoen dide. Nēs ǃaroma i ge khoe-i ǀkha Elobmîsa ǁkhāǁkhāsensa a ǂhâǂhâsa.

14. Jesub di ǁkhāǁkhās hîna Mateub 28:19, 20 ǃnâ hâs ǃoagu da tae-e nî ǁgūtsâ dīsa tsî tae-i ǃaroma?

¹⁴ Khomai re Mateub 28:19, 20. Elobmîsa da ra ǁkhāǁkhā khami da ge nî ǁgūtsâ ‘ǁkhāǁkhāsabedīsa . . .  tsî  khoena nî hui în Jesub ge mîmā xūn hoana ûiǂui.’ Khoena da ge nî hui în mûǂan matikōse i a ǂhâǂhâsasa în Jehovaba ǃoaba tsî ǁîb Gaosiba ǂkhâǃnâ. Nēs ge ra ǂâibasen î da khoena ǂkhâǃnâ în amaba ūǃoa tsî ǁkhāǁkhāsen an ra xūna ûiǂui tsî ǁîn ûiga Jehovab ǃoa-ai mâǁnâ tsî ǁāǁnâ-e. Nēsan ga dī o, o ǀguin ge Jehovab tsēs ai nî sâuhe.—1Pet. 3:21.

15. Tae-i ǃaroma da ǁae-e ūhâ tama hâ tsî tae-i amsi?

¹⁵ ǀGapiga da goro ǃhoaǃgao khami î ge ǃnubu ǁaeroba nēsis tsî ǀams nî hās tsîn ǁaegu hâ. Nēs ǃaroma da ge ǀkharaǀkharana ǁîn ûib ǃnâ dī ǂgao tama tsî Jehovab di ǃoaba-ao kai ǂgao tama khoen ǀkha Elobmîsa ǁkhāǁkhāsens ǃnâ-ū ǁaeba ǁore ǂgao tama hâ. (1Kor. 9:26) Sada di sîsenni ge kaise a ǁgariǁgarisa. ǂGui khoen ge noxoba ǃau hâ hîna Gaosib haisi-amsa nî ǁnâuse īna.

16. ǂHaiǂhais 18:2, 4, 5, 8 ǃoagu da tae-e nî dī? (ǀGamirosa mû re.)

¹⁶ Khomai re ǂHaiǂhais 18:2, 4, 5, 8. Nē ǁaraǃādi ǃnâ da ge ǀnî hâ xū-i Jehovab ǁîb ǃoaba-aon nî dī ǃkhaisa ǂhâba hâ-e ra mû. Hoa ama Xristeǁîn ge nî dītsâ în tā Babilons kais ǀkha ǃgaeǀhao-e ūhâ. Amaba i nî ǁkhāǁkhāsen aiǃâ i ge Elobmîs ǁkhāǁkhāsen-ao-e ge ama tama ǂgoms di ǁani i. ǁÎ-i ge ǀnîsi ǁîn di ǂgomsa ǃoa ī tsî ǁnā ǁaxasigu ǃnâ gere ǁhao. Tamas ka io ǁnā ǀapeǂhumisa marisise gere ǂkhâǃnâ. Elobmîsa ra ǁkhāǁkhāsen khoe-i nî ǁāǁnâhe tama aoǁnâ-ao kais aiǃâ i ge ama tama ǂgoms ǀkha i ūhâ ǃgaeǀhaodi hoade nî ǀam kai. ǁÎ-i ge sîǂkhanisa ǁî-i hâǃnâ hâ ǂgomsa ǃoa nî xoa tamas ka io ǀapeǂhumidi hîna i ǃâ-e ūǃnâ hâde ǃoa, mî rase ǁî-i ǃaruǀî ǁîn ǀkha ǃgaeǀhao-e ūhâ tama hâ di. *

17. Mâ ǃnôa sîsena xun Xristeǁîna nî ǂgōsen tsî tae-i ǃaroma?

¹⁷ Ama Xristeǁî-i ge ǁî-i sîsenni Babilons kais ǀkha ǃgaeǀhaosa ūhâ tama hâ ǃkhaisa nî ôaǃnâ. (2Kor. 6:14-17) Aiǁgause i ge ama tama ǂgomde sîsenba tide. Xristeǁî-i ra sîsenba ǃkhaib ga ama tama ǂgomsa ra ǂkhâǃnâ xū-i tsîna dī o, on ge tā ǁnās ǃnâ nî ǃâ. Aitsama i ga sîsenbasen o, o i ge Babilons kais xa i ra  mā-e sîsen-e ǃkhōǃoa tide. Tae-i ǃaroma da nēti ī ǂgomǁaposisa nēs xa ūhâ? Sada ge ama tama ǁkhāǁkhādi tsî dīxūn ama tama ǂgom didin hîna Elob mûǁae ǃgâi taman ǃnâ ǃâ ǂgao tama hâ.—Jes. 52:11. *

18. Matib ǀgui ǃgâsaba Elobmîs daoǁgaude ǁîb sîsenni tawa ge ǁnâuǀnam?

¹⁸ Kurina ǃkharu hâseb ge ǀhaohâb ǃûi-aoba ge ǂganhe îb ǃnao-kuru sîsen-e kerkheb tawa sī dī. Sîsen-e ge mā bi khoeb ge ge ǂan i ǃgâsab hoaǁae gere ǂkhāsa kerkhega sîsenbasa. Xawe nē ǃnās aib ge ǁgariǁgarisase sîsenba bi nî khoe-e gere ôa. Xaweb ge ǃgâsaba nē ǃnās ais tsîna nē sîsen-e ūǃoasa ge ǂkhā. Wekheba ǃkharu tsî i ge ǂhôa ǂkhanib ǃnâ ǀnî hâ ǃnao-kuru-aob hîna ge ǁnā sîsen-e ūǃoab di ai-īsiba ge hâ i ǃgâuhaibab ra mâise. Sada ǃgâsab ga nē sîsen-e ūǃoa hâ o, os ge nēsa ga ǁîb di ai-īsi hâ. ǂÂi re matis ga nēsa ǁîb di ǀonsa ǀuriǀuri hâsa ǁîb ǃgâsan ǁaegu. Jehovab tsîn ga nēs xa tsâǀkhā-e hâ ǀgaus xas tsîna ǂâi re.

19-20. (a) Tae-e da go ǁkhāǁkhāsen? (b) Tsî tae-e da noxoba nî ǁkhāǁkhāsen?

¹⁹ Elobmîs kēbodi ǃoagu nî sao rase īse ī xū-i ge ǂanǂans “ǂkhîb ge hâ tsî tsūǃgâ i a ǀkhai” di hâsa. Jehovaba da ge ra gangan ǁkhāǁkhā dab ge ǃkhaisa, sada ge a ǂan ǃhaodi ama hâhâ ra ǂkhîba hā-ū ǁoa ǃkhaisa. Tae-e da ǁnā ǂanǂans tsî kai ǁgâiǀāb nî tsoatsoas aiǃâ nî dī? Jehovab ge ǂhâba hâ i da aoǁnâ sîsenni ǀkha aiǃgû tsî ǁkhāǁkhāsabedī. Xawe da ge ǁkhā ǁaeb ai ama tama ǂgomdi ǀkha ǃgaeǀhao-e ūhâ ǂgao tama hâ. Nēs ge ra ǂâibasen ama tama ǂgomdi ǁani kai ǀû da nî tsî Babilons kaisa sîsenba tide ǃkhaisa.

²⁰ ǀNî hâ xūn ge noxoba “ǀuni tsēdi” ǁaeb ǃnâ nî ī. Tsî Jehovab tsîn ge ǀnî hâ xūna sada xu ra ǂgaoǀkhā. Nē xūna a tae tsî mati da hānîǁaeb ǃaroma nî aiǂhomisen? Sao ra ǁkhāǁkhāǃâs ge nē xūna nî ǃhoaǃgao.