1. Kungani siqiniseka ukuthi siphila “ezinsukwini zokucina”?

NXA wazalwa sekwedlule u-1914 kutsho ukuthi uphile impilo yakho yonke “ezinsukwini zokucina” zomumo lo wezinto. (2 Tim. 3:1) Sonke sesike sezwa ngalokho uJesu athi kuzakwenzakala kulezinsuku zokucina. Okunye kwakhona yizimpi, ukuswelakala kokudla, ukuzamazama komhlaba, imikhuhlane emibi, ukwanda kobubi lokuhlukuluzwa kwabantu bakaJehova. (Mat. 24:3, 7-9, 12; Luk. 21:10-12) Kanti njalo sibona abantu beziphatha ngendlela eyakhulunywa ngumphostoli uPhawuli. (Khangela ibhokisi elithi “ Indlela Abantu Abaziphatha Ngayo Khathesi.”) Thina oFakazi bakaJehova siyaqiniseka ukuthi siphila ‘ezinsukwini zokucina’ sibili.​—Mik. 4:1.

2. Yiphi imibuzo okumele sixoxe ngayo?

² Sekuyisikhathi eside u-1914 wadlula, yikho kumele ukuthi khathesi siphila ekucineni kwazo ‘izinsuku zokucina.’ Njengoba ukuphela sekuseduze kangaka, asixoxeni ngemibuzo eqakathekileyo elandelayo: Kuyini okuzakwenzakala ekupheleni ‘kwezinsuku zokucina’? UJehova ukhangelele ukuthi senzeni sisalindele lokho okuzakwenzakala?

3. Isiphrofetho esiku-1 Thesalonika 5:1-3 sithi yisiphi isimemezelo esizakwenziwa yizizwe?

³ Bala u-1 Thesalonika 5:1-3. “Usuku lukaJehova” uPhawuli akhuluma ngalo emavesini la luqala ngokuhlaselwa ‘kweBhabhiloni Enkulu’ kumbe inkolo yamanga luze luphele ngempi ye-Amagedoni. (Isam. 16:14, 16; 17:5) Lapho  “usuku” lolo seluzaqala izizwe zizakwenza isimemezelo esithi: “Ukuthula lokuvikeleka!” Ababusi bomhlaba bajayele ukusebenzisa amazwi afanana lawonala nxa bekhuluma ngokuthuthukisa ubudlelwano babo lamanye amazwe. * Kodwa isimemezelo okukhulunywa ngaso eBhayibhilini siyabe sitshiyene ngoba abantu abanengi bazathi besizwa bacabange ukuthi ababusi bomhlaba sebenelisile ukuletha ukuthula lokuvikeleka emhlabeni wonke. Kodwa iqiniso yikuthi ‘ukuhlupheka okukhulu’ kuzahle kuqalise besekulandela ‘ukubhujiswa okuzabajuma.’​—Mat. 24:21.

4. (a) Kuyini esingakwaziyo mayelana lesimemezelo ‘sokuthula lokuvikeleka’? (b) Kuyini esikwaziyo ngaso?

⁴ Kukhona esikwaziyo mayelana lesimemezelo ‘sokuthula lokuvikeleka.’ Kodwa kukhona futhi esingakwaziyo. Kasikwazi okuzabangela ukuthi ababusi benze leso simemezelo lokuthi bazasenza njani. Okunye esingakwaziyo yikuthi sizakwenziwa kanye kuphela yini kumbe kanenginengi. Lanxa kunjalo, nanku esikwaziyo: Ababusi bomhlaba ngeke benelise ukuletha ukuthula emhlabeni yikho akumelanga sikhohliswe yisimemezelo sabo. IBhayibhili lisitshela ukuthi kumele sisilindele isimemezelo leso ngoba yiso esizatshengisa ukuthi “usuku lukaJehova” seluzaqala.

5. U-1 Thesalonika 5:4-6 uthi kumele senzeni ukuze silulungele “usuku lukaJehova”?

⁵ Bala u-1 Thesalonika 5:4-6. Emavesini la uPhawuli usitshela okumele sikwenze ukuze silulungele “usuku lukaJehova.” Uthi ‘singalali njengabanye kodwa sihlale siphapheme.’ Ngokwesibonelo, kumele sinanzelele ukuthi kasithathi cele kwezombusazwe futhi kasingeni ngitsho endabeni zakhona. Nxa besingenza njalo besizacina ‘sesingabomhlaba.’ (Joh. 15:19) Siyakwazi ukuthi uMbuso kaNkulunkulu yiwo kuphela ozaletha ukuthula emhlabeni.

6. Sifuna ukunceda abantu ukuthi benzeni njalo kungani sifuna ukubanceda?

⁶ Kumele sihlale siphapheme sibili kodwa sifuna ukunceda labanye ukuthi bafunde ngalokho iBhayibhili elithi kuzakwenzakala emhlabeni. Kufanele sibancede khathesi ngoba ukuhlupheka okukhulu kungavele kuqalise, kuyabe kungasela sikhathi sokuthi abantu baqalise ukukhonza uJehova. Lokhu kutshengisa ukuthi kuqakathekile ukuthi sitshumayele khathesi. *

7. UJehova ukhangelele ukuthi senzeni khathesi?

⁷ UJehova ukhangelele ukuthi siqhubeke sikhuthele emsebenzini wokutshumayela  njengoba “usuku” lwakhe seluseduze. Kumele sibe leqiniso lokuthi ‘senza okunengi emsebenzini weNkosi.’ (1 Khor. 15:58) Ngesikhathi uJesu elandisa izinto ezazizakwenzakala ngezinsuku zokucina wakhuluma ngesasizakwenza, wathi: “Kanti njalo izindaba ezinhle kumele ziqale zitshunyayelwe ezizweni zonke.” (Mak. 13:4, 8, 10; Mat. 24:14) Lokhu kutsho ukuthi loba nini nxa usiya ekutshumayeleni uyabe uncedisa ekugcwaliseni isiphrofetho esakhulunywa nguJesu.

8. Kungani sisithi umsebenzi wokutshumayela uyaphumelela?

⁸ Umsebenzi wokutshumayela uphumelela kangakanani? Minyaka yonke izindaba ezinhle zoMbuso zitshunyayelwa ebantwini abanengi. Ngokwesibonelo, ezinsukwini lezi zokucina inani labamemezeli emhlabeni wonke liqhubeka lisanda kakhulu. Ngo-1914 kwakulabamemezeli abangu-5 155 emazweni angu-43 kodwa lamuhla sekulabamemezeli abedlula 8 500 000 emazweni angu-240. Kodwa lokhu akutsho ukuthi umsebenzi wethu usuphelile. Kufanele siqhubeke sitshela abantu ukuthi uMbuso kaNkulunkulu yiwo kuphela ozaqeda zonke inhlupho zabo.​—Hubo. 145:11-13.

9. Kungani kumele siqhubeke sitshumayela ngoMbuso?

⁹ Sizaqhubeka sitshumayela ngoMbuso uJehova aze athi sekwanele. Kusele isikhathi esingakanani ukuthi abantu bazi uJehova loJesu Khristu? (Joh. 17:3) Kasikwazi. Esikwaziyo yikuthi labo ‘abalesifiso sokuthola ukuphila okungapheliyo’ bangazamukela izindaba ezinhle bakhonze uJehova ukuhlupheka okukhulu kungakaqalisi. (ImiSeb. 13:48) Singabanceda njani abantu laba isikhathi singakadliwa ngumangoye?

10. UJehova usinceda njani ukuthi sifundise abantu iqiniso?

¹⁰ UJehova usebenzisa inhlanganiso yakhe ukusinika konke esikudingayo ukuze sifundise abantu iqiniso. Ngokwesibonelo, siyaqeqetshwa maviki wonke emhlanganweni waphakathi kweviki. Umhlangano lo usinceda sazi esingakutsho nxa siqala ukufika ebantwini lalapho sesiphindela. Uphinda usifundise indlela yokuqhuba izifundo zeBhayibhili. Inhlanganiso kaJehova isiphe lokunye esingakusebenzisa okuseBhokisini Elilamathuluzi Okufundisa. Amathuluzi la asinceda ukuthi . . .

•   siqalise ingxoxo labantu,

• sitshumayele ngendlela ezakwenza abantu bafise ukulalela,

• sikhuthaze abantu ukuthi baqhubeke befunda okunengi mayelana leBhayibhili,

• sifundise iqiniso nxa siqhuba izifundo zeBhayibhili futhi

• sinxuse abantu abafisa ukufunda ukuthi bangene kuwebhusayithi yethu lokuthi basivakatshele emaWolu oMbuso.

Kodwa ukuba lamathuluzi la akwenelanga, kumele siwasebenzise. * Ngokwesibonelo, nxa ube lengxoxo emnandi lomuntu ofuna ukufunda futhi wamtshiyela iphetshana kumbe imagazini, uzasala ebala okunengi uze uphindele. Kungumlandu womuntu ngamunye ukuthi akhuthale emsebenzini wokutshumayela ngoMbuso nyanga zonke.

11. Kungani kwenziwa ingxenye ethi Online Bible Study Lessons?

¹¹ Enye indlela uJehova anceda ngayo abantu ukuthi bafunde iqiniso yingxenye ethi Online Bible Study Lessons eku-jw.org^®. Yenzelweni ingxenye le? Nyanga zonke kulabantu abanengi kakhulu emhlabeni wonke abangena ku-inthanethi befuna ukufunda iBhayibhili. Izifundo ezitholakala kuwebhusayithi yethu zinganceda abantu laba bafunde iqiniso eliseLizwini likaNkulunkulu. Abanye abantu oxoxa labo bangabe bethikaza ukufundiswa iBhayibhili. Nxa ungahlangana labantu abanjalo batshengise ingxenye le kuwebhusayithi yethu kumbe ubathumele ilinki ebasa khona. *

12. Yiziphi izinto ezitholakala engxenyeni ethi Online Bible Study Lessons?

¹² Ezinye izihloko ezitholakala engxenyeni ethi Online Bible Study Lessons yilezi: “IBhayibhili LoMlobi Walo,” “Okukhulunywa Ngabo Kakhulu EBhayibhilini,” lesithi “Umlayezo WeBhayibhili Onika Ithemba.” Nanku okunye okutholakala ezihlokweni lezi:

• IBhayibhili lingakunceda njani?

• Ngubani uJehova, uJesu lezingilosi?

• Kungani uNkulunkulu wadala abantu?

• Kungani abantu behlupheka futhi kusenzakala izinto ezimbi?

Izihloko lezi ziphinda zikhulume ngokuthi uJehova . . .

• uzaqeda ukuhlupheka lokufa,

• uzavusa abafileyo lokuthi

• uzasusa ohulumende babantu abangenelisiyo ukusinceda abesefaka uMbuso wakhe.

13. Ingxenye ethi Online Bible Study Lessons ithatha indawo yohlelo lokuqhuba izifundo zeBhayibhili yini? Chasisa.

¹³ Ingxenye le ayithathi indawo yohlelo lokuqhuba izifundo zeBhayibhili ngoba phela uJesu usinike umsebenzi wokwenza abafundi. Silethemba lokuthi abantu abalesifiso sokufunda iBhayibhili bazayibala ingxenye le, bakuthande abakufundayo futhi bafise ukufunda okunengi. Nxa bangakwenza lokhu kungenzakala bavume ukufundiswa iBhayibhili. Isifundo ngasinye siphetha ngokukhuthaza umuntu osibalayo ukuthi acele ukufundiswa iBhayibhili. Emhlabeni wonke kulabantu abangaba ngu-230 abangena kuwebhusayithi yethu nsuku zonke abacela ukufundiswa iBhayibhili. Kuqakathekile sibili ukuthi babe lomuntu obafundisayo.

14. Ngokwalokho okwatshiwo nguJesu kuMathewu 28:19, 20, kuyini okumele sizame ngamandla wonke ukukwenza futhi kungani?

¹⁴ Bala uMathewu 28:19, 20. Nxa siqhuba izifundo zeBhayibhili kumele sizame ngamandla wonke ‘ukwenza abafundi, sibafundise ukulandela izinto zonke [uJesu] asilaye zona.’ Kumele sincede abantu bazwisise ukuthi kuqakathekile ukuthi bakhonze uJehova lokuthi basekele uMbuso wakhe. Lokhu sikwenza ngokuzama ukubakhuthaza ukuthi basebenzise lokho abakufundayo, bazinikele kuJehova futhi babhabhathizwe. Bangenza njalo bazasinda ngosuku lukaJehova.​—1 Phet. 3:21.

15. Kuyini esingasoze sikwenze futhi kungani?

¹⁵ Sesibonile ukuthi ukuphela komumo lo wezinto sekuseduze kakhulu. Yikho kasilaso isikhathi sokutshona sifunda labantu okungacaciyo ukuthi bayafuna yini ukuba ngabalandeli bakaKhristu loba hatshi. (1 Khor. 9:26) Phela isikhathi esiseleyo sesisincane. Banengi abantu okumele bezwe ngoMbuso ukuphela kungakafiki.

16. Ngokwalokho okutshiwo kuSambulo 18:2, 4, 5, 8, kuyini okumele sikwenze? (Khangela lamabala angaphansi.)

¹⁶ Bala iSambulo 18:2, 4, 5, 8. Amazwi asemavesini la asitshela okunye uJehova akhangelele ukuthi izinceku zakhe zikwenze. Wonke amaKhristu eqiniso akumelanga azihlanganise ngitsho leBhabhiloni Enkulu. Kungenzakala ukuthi umuntu ofunda iBhayibhili wayengena isonto ethile singakaqalisi ukufunda laye. Mhlawumbe wayehlanganyela ezintweni ezenziwa kuyo kumbe enikela esontweni leyo. Umuntu onjalo kumele aphume aphele enkolweni yamanga engakabi ngummemezeli ongabhabhathizwanga. Kumele abhale incwadi yokuvalelisa kumbe atshiye loba yini elokwenza leBhabhiloni Enkulu. *

17. Yiwuphi umsebenzi umKhristu okungamelanga awenze njalo kungani?

¹⁷ UmKhristu kumele abe leqiniso lokuthi kenzi umsebenzi ozamhlanganisa leBhabhiloni Enkulu. (2 Khor. 6:14-17) Ngokwesibonelo, akumelanga asebenzele isonto. Kanti njalo umKhristu oqhatshwe enkampanini ethile akumelanga enze okunengi esakhiweni esisetshenziswa yinkolo yamanga. Nxa elenkampani yakhe akumelanga adinge loba amukele umsebenzi osekela iBhabhiloni Enkulu. Kungani singadlali ngendaba le? Asifuni kuhlanganyela emsebenzini lasezonweni zenkolo yamanga  uNkulunkulu ayibona ingcolile.​—Isaya. 52:11. *

18. Omunye umfowethu watshengisa njani ukuthi uyakulandela lokho okutshiwo liBhayibhili endabeni yomsebenzi wokuziphilisa?

¹⁸ Eminyakeni eminengi eyadlulayo enye indoda yacela umdala webandla olenkampani yakhe ukuthi enze umsebenzi wokubaza kwenye isonto esedolobheni umfowethu ayehlala kulo. Indoda le yayikwazi ukuthi umfowethu wayehlala esala ukusebenza emasontweni. Kodwa yayisidinge yaswela umuntu owayengenza umsebenzi wakhona. Lanxa kunjalo umfowethu walandela okutshiwo liBhayibhili wala ukwenza umsebenzi lo. Ngeviki eyalandelayo iphephandaba lakuleyondawo lalilomfanekiso womunye umbazi efaka isiphambano esontweni leyo. Aluba umfowethu wantshintsha ingqondo yakhe wacina esevuma ukwenza umsebenzi ayecelwe ukuthi awenze kwakuyabe kunguye osemfanekisweni. Lokhu kwakuzabakhuba sibili abanye abazalwane. Ucabanga ukuthi uJehova yena wayezakuzwa njani?

19-20. (a) Sifundeni esihlokweni lesi? (b) Kuyini okunye esizakufunda esihlokweni esilandelayo?

¹⁹ Sekuseduze ukuthi kugcwaliseke isiphrofetho seBhayibhili esiqakathekileyo esimayelana lesimemezelo ‘sokuthula lokuvikeleka’ esizakwenziwa ngababusi bomhlaba. Kodwa uJehova usifundisile ukuthi ababusi abasoze balethe ukuthula kweqiniso okuzahlala kuze kube nini lanini. Manje kumele senzeni isimemezelo lesi singakenziwa lokubhujiswa okuzajuma abantu kungakafiki? UJehova ukhangelele ukuthi siqhubeke sikhuthele emsebenzini wokutshumayela ngoMbuso futhi sizame ukwenza abafundi abanengi. Kanti njalo akumelanga sizihlanganise lenkolo yamanga. Lokhu kugoqela ukuphuma eBhabhiloni Enkulu lokwala ukwenza imisebenzi eyisekelayo.

²⁰ Kulokunye okuzakwenzakala ekucineni ‘kwalezinsuku zokucina.’ Kanti njalo kulokunye uJehova akhangelele ukuthi sikwenze. Kuyini lokhu futhi singenzani ukuze sikulungele konke osekuzakwenzakala? Sizaxoxa ngakho esihlokweni esilandelayo.