1. Ngenyi atikanakani kuti tiri kurarama mu njiku jo kupejisira?

IMWIMWI makabahwa pasure po gore ro 1914 here? Kudeya makabahwa pasure po gore rondhoro, imwimwi muciri kurarama mu “njiku jokupejisira” jo kupera ko nyika ino. (2 Timoti 3:1) Jesu wainga akananga zviro zvizinji zvaizoitika pa mukuvo uno, zvakadari inga hondo, njara, kuzungunyika ko nyika, ndhendha, kuwanda ko ushaishi no kuteverehwa ko vashandiri va Jehovha. (Mateu 24:3, 7-9, 12; Luka 21:10-12) Tese tiri kuvona izvi zveciitika nyamasi uno, kana kutozwa zvecinangwa. Tiri kuvonazve vandhu vano mufambiro wakadurujihwaya ndi mupostori Pauro. (Vonanyi bhokiso rinoti: “ Ngowapi Mufambiro wo Vandhu Nyamasi Uno?”) Itusu tinonamatari Jehovha, atikanakani kuti tiri kurarama mu “mukuvo wokugumisira.”—MIKEYA 4:1.

2. Tinodikana kuziva mupinguro jo muvhunjo japi?

² Papera makore akawanda kuvhira mu gore ro 1914. Wari tiri kurarama kumbhiri ko “njiku jo kupejisira.” Zvecivoneka kuti mugumo wo nyika ino uri phedo, itusu tinodikana kuziva mupinguro jo muvhunjo jimweni jinosisira maningi, jakadari inga iji: Zvicinyi zvinozoitika kumbhiri ko “njiku jo kupejisira”? Jehovha anoda kuti tiitenyi patinonga tecivetera zviitiko izvi?

3. Mukuzwirana no ciporofita cinowanika pana 1 VaTesalònika 5:1-3, majinja anozoita ciziviso capi?

³ Verenganyi 1 VaTesalònika 5:1-3. Pauro wakananga ngo pamusoro po “njiku ya Tenji.” Magama okuti “njiku ya Tenji” kana njiku ya Jehovha, ari kuda kunangira mukuvo unotangira pa kuhwiswa ko Bhabhironi Guru (rinoimirira mutongi wo pasi pese wo ciara co manyepo) mbhera pa Armagedhoni. (Apokalipsi  16:14, 16; 17:5) Asi mukuvo mushoma “njiku” iyi icito yatanga, majinja anozoita ciziviso cokuti: ‘Runyararo no rugarisiko!’ Ndizvona kuti vatungamiriri vo nyika vanoshandisavo magama aya, vecibhuya ngo pamusoro po kuzwirana kwavanoita no nyika jimweni. * Asi ciziviso cinonangwa mu Bhaibheri cokuti ‘runyararo no rugarisiko,’ cinozova cakasiyana. Ngenyi? Ngokuti ciziviso ici pacinozoithwa, vandhu vazinji vanozorangarira kuti vatungamiriri vo nyika vazokwanisa kuita kuti nyika ive yakagarisika pomwe no runyararo. Asi izvona kamare ngo zvo kuti, nyika inonga yeciwira mu dambujiko guru rinozopejisira ngo kuparajwa ngo civhumbu.—Mateu 24:21.

4. (a) Zvicinyi zvaticikazivi ngo pamusoro po ciziviso co ‘runyararo no rugarisiko’? (b) Zvicinyi zvatinoziva ngo pamusoro po ciziviso ici?

⁴ Tinoziva zviri zvese ngo pamusoro po ciziviso co ‘runyararo no rugarisiko.’ Asi zvimweni atizvizivi. Inga muezaniso, atizvizivi zvinozoitisa kuti majinja aite ciziviso ici, nee atizvizivi kuti vanozociitisa kudini. Atizvizivi kuti dangani kunozova no ciziviso cimwe basi cinosisira kana kunozoithwa zviziviso zvakatevererana. Ticadoneseka ngo zvaticikazivi. Asi ngatibatikane ngo zviro zvatinoziva: kutama kujicengeja ngo kurangarira kuti vatungamiriri vo nyika vakwanisadi kamare kuviisa runyararo pasi pese. Asi ici ndicona ciziviso cinonangwaya ngo Bhaibheri catinodikana kuvetera. Icona cinozova citatijo cokuti “njiku ya Tenji” yoda kutanga!

5. Mukuzwirana no 1 VaTesalònika 5:4-6, tingaitisa kudini kuti tive takanasiririka kuitira “njiku ya Tenji”?

⁵ Verenganyi 1 VaTesalònika 5:4-6. Ngwajo ya Pauro inotivhunja zvatinodikana kuita kuti tive takanasiririka kuitira “njiku ya Tenji.” Atidikani ‘kuvata inga mavatiro o vamweni.’ Tinodikana kugara ‘takarinda’ no kungwara. Inga muezaniso, tinodikana kungwarira kuti titame kungwinira mu shwiro jo zvomatongehwe o nyika. Patinongwinira mu shwiro iji, tinoguma pa kuva divi ro “nyika yo pasi.” (Johani 15:19) Tinoziva kuti Umambo hwa Mwari ndiwona basi unozoviisa runyararo pasi pese.

6. Tinodikana kubesa vamweni kuti vaitenyi zve ngenyi?

⁶ Azvikwani basi kugara takarinda. Tinodikana kubesera vamweni kuti vamuke no kujija zvinonanga Bhaibheri ngo pamusoro po kumbeji. Ceujanyi kuti, dambujiko guru rikambhera ngo kutanga, apacazovizve no nguva kuti vandhu vade kushandira Jehovha. Ngo iyo ndava, basa redu ro kucumaera ngo ro kukasika! *

7. Jehovha anovetera kuti tiitenyi?

⁷ Pa mukuvo mushoma wasarari, icito yaguma “njiku,” Jehovha anovetera kuti tibatikane pa basa ro kucumaera. Tese tinodikana ‘kubatira Tenji ngo simba rese, teciziva kuti kuremba kwedu akuiti kwabiresi.’ (1 VaKorinto 15:58) Jesu wakananga zvatinodikana kuita.  Paakananga ngo zviro zvese zvinosisira zvaizoitika mu njiku jokupejisira jino, iyena wakati: “Kaveta pakutungamira bzinodika kuti Vangeri ritokoteswe ku mabvumbo ese.” (Marco 13:4, 8, 10; Mateu 24:14) Rangariranyi izvi basi: Vhaza jese jamunoenda kocumaera, munonga mecibesera kukwanirisika ko ciporofita ici co Bhaibheri!

8. Tinozvizivisa kudini kuti basa ro kucumaera rinozoenderera mberi recibudirira?

⁸ Waro, tingati kudini ngo kukura ko basa redu ro kucumaera? Gore ngo gore, vandhu vazinji vari kuzwa masoko akanaka o Umambo. Inga muezaniso, rangariranyi ngo kuengejeka ko vacumaeri mu njiku jino jo kupejisira. Mu gore ro 1914, kwainga no vacumaeri vanokwana kuita 5.155, mu nyika jinokwana kuita makumarongomuna natatu. Nyamasi uno, kuno vacumaeri vanokwana kuita zviuru zvisere no meiya mu nyika jinokwana 240! Asi, basa redu arito raguma kumbhiri. Tinodikana kwenderera mberi tecizivisa kuti Umambo hwa Mwari ndihwona basi unokwanisa kupeja zvineso zvo vandhu vese.—Nduyo 145:11-13.

9. Ngenyi atidikani kuima kucumaera?

⁹ Itusu tinozoima kucumaera, basi Jehovha akativhunja kuti zvakwana. Waro, pasara nguva yakadini kuti vandhu vazive Jehovha Mwari na Jesu Kristu? (Johani 17:3) Atizvizivi. Zvatinoziva nga izvi, mbhera dambujiko guru ritange, vese “vainga vakasanwa kuti vazopone kucikaperi” kana vano cido cakanaka co kuva no upenyu ucikaperi, vanodikana kuashire masoko akanaka. (Maitiro o Vapostori 13:48) Tingabeseresa kudini vandhu avo nguva icito yapera?

10. Jehovha anotipa zviro zvapi kuti tijijise vandhu?

¹⁰ Ecishandisa sangano rake, Jehovha anotipa zvese zvatinoda kuti tijijise cokwadi vandhu vamweni. Inga muezaniso, tinojijiswa pa musongano wo pakati po sumana. Iwona unotijijisa kuti tinodikana kunangenyi pa kutanga kusongana no mundhu, tingaitisa kudini kuti tiite hwiririro no manera okuitisa jijo jo Bhaibheri. Kusiyapo zvondhozvo, sangano ra Jehovha rakatipa zviro zviri mu Bhokiso Redu ro Mathurusi. Izvona zvinotibesera kuti . . .

• titange mabhuyo,

• timuse cidaka-daka,

• tibesere vandhu kuti vade kujija zvizinji,

• tijijise cokwadi ngo kuitisa jijo jo Bhaibheri pomwe no

• kuvhunja vandhu kuti vanghwine mu saiti yedu no kuviya ku Nyumba yo Umambo.

 Zvokadi kamare, azvikwani basi kuva no mathurusi aya. Tinodikana kumashandisa. * Inga muezaniso, kudari mukapera kubhuya no mundhu anodakarira, momupa taratadho kana revhista, iyena anosara eciverenga mbhera pamunohwirirazve kuti mubhuye naye. Umwe nga umwe wedu ano mutoro wo kuramba wakabatikana mu basa ro kucumaera masoko akanaka mweji ngo mweji.

11. Jijo yo Bhaibheri yo mu Interneti yakaitihwenyi?

¹¹ Besero rimweni raanopa Jehovha kuti vandhu vajije cokwadi, ngo ro kushandisa Curso da Bíblia On-line, (Jijo yo Bhaibheri yo mu Interneti) mu jw.org^®. Ngenyi pakaitwa nasiriro yo jijo iyi? Mweji jese, zviuru no zviuru zvo vandhu kutenderera pasi pase, zviri kupsaka mu interneti, zvijijo zvo Bhaibheri. Zvijijo zviri mu saiti yedu, zvingabesera vandhu vondhovo kuti vazive zvokadi zvinganani zviri mu Soko ra Mwari. Kusiyapo zvondhozvo, kuno vandhu vamweni vatinobhuya navo avadakariri kuashira jijo yo Bhaibheri. Pa mugariro uwu, vakhombijenyi jijo iyi inowanikari mu saiti kana kuvatumira rinki yo zvijijo. *

12. Mundhu angajijenyi pa Jijo yo Bhaibheri yo mu Interneti?

¹² Jijo yo Bhaibheri yo mu Interneti ino musoro jakasiyana-siyana, jakadari inga iji: “Bhaibheri no Mune Waro,” “Vandhu Vanonangwa mu Bhaibheri,” pomwe no “Masoko o Bhaibheri ngo Pamusoro po Kumbeji.” Pa musoro umwe nga umwe, muno zvijijo ngo pamusoro po:

• Bhaibheri ringabeseresa kudini vandhu,

• Jehovha ndiyani, Jesu ndiyani zve ngirozi icinyi

• Ngenyi Mwari wakasika vandhu

• Ngenyi kuno matambujiko no ushati

Cimwenizve, zvijijo izvi zvinosananguravo kuti Jehovha anozoitisa kudini kuti . . . 

• apeje matambujiko no rufu,

• amuse vandhu vakafa

• afakeye utongi hwo vandhu ngo Umambo hwake.

13. Kureva kuti Jijo yo Bhaibheri yo mu Interneti, inofakeya jijo yo Bhaibheri inoithwa ngo umwe wo Zvapupu zva Jehovha here? Sananguranyi.

¹³ Jijo yo Bhaibheri yo mu Interneti, aaivhiri kufakeya urongwa hwo kuita jijo yo Bhaibheri no umwe wo Zvapupu zva Jehovha. Jesu wakatipa basa ro kujijisa vandhu kuti vave vateveri vake. Jijo yo Bhaibheri yo mu Interneti, yakaitwa kuti imuse cidaka-daka co vandhu vanodakarira vanozoda kujija zvizinji ngo pamusoro po Bhaibheri. Kumbhiri ko cijijo cimwe nga cimwe, kuno rinki inoita kuti muverengi akumbire kuti umwe wo Zvapupu zva Jehovha, ajije naye Bhaibheri. Vecishandisa saite yedu, tinoashira zvikumbiro zvinopindirija 230 pa njiku imwe, kutenderera pasi pese! Pacina kukana-kana, kuva no jijo yo Bhaibheri no mundhu kamare zvinosisira maningi kusiyapo kujija ngo mu interneti basi!

14. Mukuzwirana no magama a Jesu ari pana Mateu 28:19, 20, tinodikana kuitenyi? Zve ngenyi zvinosisira?

¹⁴ Verenganyi Mateu 28:19, 20, Shanduro yeNyika Itsva. Pa kuitisa jijo jo Bhaibheri, tinodikana kuita zvese zvatinokwanisa kuti ‘vandhu vave vajiji . . . , no kuvajijisa kuteveja bzese bzo takatumwa [ndiyena].’ Tinodikana kubesera vandhu kuti vazwisise kuti zvinosisira maningi kwavari i kusana kushandira Jehovha no kubesera Umambo hwake. Izvi zvinoda kureva kuti tinodikana kubesera vandhu kuti vashandise zvavanojija, vazvipire kuna Jehovha perapo vobhabhatijwa. Vakaita kudaro, vanozopona mu njiku ya Jehovha.—1 Pedru 3:21.

15. Ativhiri kutamba no nguva yedu pacinyi zve ngenyi?

 ¹⁵ Inga zvanangwa pakutanga, kwasara nguva shoma kuti nyika ino ipere. Ngokudaro, ativhiri kutamba no nguva yedu ngo kujijisa vandhu Bhaibheri vacikadi kuita cinjo mu upenyu hwavo kuti vashandire Jehovha. (1 VaKorinto 9:26) Basa redu ngo ro kukasika ! Vandhu vakawanda vacada kuzwa masoko o Umambo nyika icito yapera.

16. Mukuzwirana na Apokalipsi 18:2, 4, 5, 8, Makristu ese o cokwadi anodikana kuitenyi? (Vonanyi masoko o pasi.)

¹⁶ Verenganyi Apokalipsi 18:2, 4, 5, 8. Mavhesi aya anonasa kukhombija zvinoda Jehovha kuti vandhu vake vaite. Makristu ese ocokwadi aadikani kuita divi ro Bhabhironi Guru. Mujiji wo Bhaibheri, acito ajija cokwadi, zvingaita kuti waiita divi ro ciyara co manyepo. Kangaije waiyenda ku misa kana wainga ecitoitavo mabasa ariyese muciyaremo. Zvingaita kuti waipa mare mu ciyaremo. Asi, kudari mujiji wo Bhaibheri akada kuva mucumairi acikazivi kubhabhatijwa, iyena anodikana kugura ushamwari uriwese no ciyara co manyepo. Iyena anodikana kutara karata ngo pamusoro po kubuda kwake mu ciyara cokare kana anodikana kukhombija ngo maitiro ariese kuti aacaitizve divi ro ciyareco kamare. Cimwenizve, anodikana kuita zvondhozvo no cisungo ciricese cakabatana no Bhabhironi Guru. *

17. Mushovonyi wo basa, ricikadikani kutendehwa ngo Mukristu zve ngenyi?

¹⁷ Mukristu o cokwadi anodikana kuva no cokwadi co kuti basa rake aribatani no Bhabhironi Guru. (2 VaKorinto 6:14-17) Inga muezaniso, iyena aacaizoita basa mu gerejha. Kusiyapo zvondhozvo, Mukristu anoshanda mu empreza, aacaizotenda kuita basa pa nyumba inoita mabasa o ciyara co manyepo. Cimwenizve, Mukristu anoita nyagoso, aacaizopsaka kuita basa rakabatana no Bhabhironi Guru. Ngenyi tinodikana kuva no cisungo cakavanga? Ngokuti, Mwari anovona zvisungo izvi zvo zviyara inga zvakapsipa. Itusu atidi kubatana nawo nee kutora divi ro zvishaishi zvao.—Isaia 52:11. *

18. Hama imweni yakakhombijisa kudini kuti yaitevera ndhungamiro jo Bhaibheri pa basa royaiita?

¹⁸ Makore manganani apera, mukuru umweni waiita nyagoso, wakakumbihwa ngo mwanarume umweni kuti aite basa ro kuveza mu gerejha rimweni rainga mu dhorobhemo. Mwanarume uwu, waizviziva kuti mukuru wiya aacaitendera kuita basa mugerejha. Asi, iyena waida kuwana mundhu aite basa rondhoro. Pikija zvakadaro,  mukuru uwu wakabatisisa ndhungamiro jaakajija mu Bhaibheri. Ngokudaro, wakaramba basero. Sumana yakatevera, Jhoronari yo mu ndharaundhemo yakabudisa pikica yo muvezi ecidira ciphambano pa gerejha riya. Kudari hama iyi noyakatenda basa riya, zvingaita kuti pikica yaingaya pa jhoronari yaizova yavo. Zvokadi kamare, izvo zvaizokhuvaza mufambiro wo hama iyi. Cimwenizve, Jehovha aacaizovona ushoni hama iyi.

19-20. (a) Tajijenyi mbhera wari? (b) Ngozvapi zvimweni zvatinoda kujija?

¹⁹ Mukuzwirana no ciporofita co Bhaibheri, ciitiko cikuru cicada kuitika mu nyika, i kuziviswa ko ‘runyararo no rugarisiko.’ Asi, Jehovha wapera kutikhombija kuti majinja aakwanisi kupeja zvineso zvo mu nyika. Waro, zvicinyi zvatinodikana kuita ciziviso co ‘runyararo no rugarisiko’ cicito catanga pomwe no kuparajwa ngo civhumbu kuri kuviyari? Jehovha anoda kuti tibatikane mu basa ro kucumaera no kuita kuti vandhu vave vateveri va Jesu. Pa nguva yondhoyo, atidikani kubatana no ciyara co manyepo. Kuti tikwanise kuita zvondhozvo, tinodikana kugura ushamwari uri wese no Bhabhironi Guru no kutama kuita basa riri rese rinobatana naro.

²⁰ Kuno zviitiko zvimweni zvinozoitika kumbhiri ko “njiku jo kupejisira.” Asi kuno zviro zvimweni zvinoda Jehovha kuti tiite. Ngozvapi zviitiko zvondhozvo? Ngozvapi zviro zvimweni zvatinodikana kuita? Tingajinasiririsa kudini kuitira zvinozoitika kumbeji? Izvi tinozozvivona pa cijijo cinozari.