1. Oshike she tu tompa kutya otu li ‘momasiku gahugunina’?

MBELA owa valwa konima yomumvo 1914? Ngele osho, nena onkalamwenyo yoye ayihe, owa kala wu li ‘momasiku gahugunina’ guuyuni mbuka. (2 Tim. 3:1) Atuheni otwa uva kombinga yiiningwanima mbyoka Jesus a hunganeke kutya otayi ka ningwa pethimbo ndika. Oya kwatela mo iita, omakakamo gevi, oondjala nomalega, uulunde tawu lundu pombanda nosho wo okuhepekwa kwoshigwana shaJehova. (Mat. 24:3, 7-9, 12; Luk. 21:10-12) Otwa mona wo nkene aantu tayi ihumbata momukalo ngoka gwa hunganekwa komuyapostoli Paulus. (Tala oshimpungu “ Iikala yaantu kunena.”) Tu li aalongeli yaJehova, otwa tompwa kutya otu li “pomahulilo gomasiku.” — Mika 4:1, OB-1954.

2. Omapulo geni twa pumbwa okutseya omayamukulo gago?

² Okuza mo 1914, opwa pita ethimbo olindji noonkondo, nomolwaashoka ngashingeyi tu na okukala tu li pehulilo ‘lyomasiku gahugunina.’ Molwaashoka ehulilo oli li popepi, otwa pumbwa okutseya omayamukulo gomapulo gamwe ngoka ga simana, ngaashi: Iiningwanima yini tayi ka ningwa pehulilo ‘lyomasiku gahugunina’? Jehova okwa hala tu ninge shike, manga twa tegelela iiningwanima mbyoka?

3. Shi ikolelela kehunganeko ndyoka li li mAatessalonika yotango 5:1-3, eigidho lini tali ka ningwa kiigwana?

³ Lesha 1 Aatessalonika 5:1-3. Paulus okwa popi “esiku lyOmuwa.” Ngaashi lya popiwa menyolo ndika, otali ulike kethimbo ndyoka tali tameke nokuponokelwa ‘kwaBabiloni Oshinene,’  ano uukwaniilwa womalongelokalunga giifundja, e tali ka hula naArmagedon. (Eh. 16:14, 16; 17:5) Manga esiku ndyoka inaali tameka, iigwana otayi ka igidha kutya opu na ‘ombili negameno!’ Omathimbo gamwe, aakwanepangelo ohaya longitha uutumbulilo wa fa mboka, uuna taya popi kombinga yokuhwepopaleka ekwatathano pokati kiigwana. * Nonando ongawo, etseyitho ‘lyombili negameno’ ndyoka lya popiwa mOmbiimbeli, otali ka kala lyi ili. Omolwashike? Omolwaashono ngele shoka osha ningwa, aantu otashi vulika ya dhiladhile kutya aakwanepangelo oye shi pondola mokuninga uuyuni ehala lya gamenwa lela. Ihe paushili wo wene, “ohaluka ehanagulo otali ya adha,” konima ‘yuudhigu uunene.’ — Mat. 24:21.

4. (a) Otwa tegelela natango okutseya shike kombinga yeigidho ‘lyombili negameno’? (b) Oshike tu shi nale kombinga yalyo?

⁴ Otu shi iinima yontumba kombinga yeigidho ‘lyombili negameno.’ Nonando ongawo, opu na iinima yilwe mbyoka kaatu shi. Katu shi kutya oshike tashi ka ningitha aakwanepangelo ya igidhe ngawo nenge nkene taye ke shi ninga. Katu shi wo ngele otapu ka ningwa owala etseyitho limwe nenge ogendji. Kutya nduno oshike tashi ka ningwa po, shoka tu shi osho kutya: Katu na okupukithwa tu dhiladhile kutya aakwanepangelo otaya vulu okweeta ombili muuyuni. Pehala lyaashono, otali ka kala eigidho ndyoka twa lombwelwa tu kale twa kotokela. Oli li endhindhiliko kutya “esiku lyOmuwa” oli li pokutameka!

5. Aatessalonika yotango 5:4-6, otaye tu kwathele ngiini tu kale twi ilongekidhila “esiku lyOmuwa”?

⁵ Lesha 1 Aatessalonika 5:4-6. Paulus okwe tu kumagidha nkene tatu vulu okwiilongekidhila “esiku lyOmuwa.” Okwa ti: “Inatu kaleni twa kotha ngaashi yalwe.” Otu na okukala “twa tonata.” Pashiholelwa, otwa pumbwa okukala twa kotoka kaatu kuthe ombinga miinima yopapolitika. Ngele otwa kutha ombinga muyo, otatu ka kala ‘oshitopolwa shuuyuni.’ (Joh. 15:19) Otu shi kutya Uukwaniilwa waKalunga, owo owala tawu ka etela aantu ombili muuyuni.

6. Otwa hala okukwathela aantu ya ninge shike, nomolwashike?

⁶ Kakele kokukala twa tonata, otwa hala wo okukwathela yalwe ya tseye shoka Ombiimbeli ya hunganeka tashi ka ningwa muuyuni. Natu dhimbulukwe kutya ngele uudhigu uunene owa tameke, aantu itaya ka mona we ethimbo lyokutameka okulongela Jehova. Nomolwaashoka iilonga yetu yokuuvitha ya endelela noonkondo! *

7. Jehova okwa tegelela tu ninge shike ngashingeyi?

⁷ Methimbo ndika efupi lya hupa ko, manga “esiku” lye inaali tameka, Jehova okwa tegelela tu tsikile okukala twi ipyakidhila niilonga yokuuvitha. Otwa pumbwa okutseya kutya otu na okukala twi “ipyakidhila aluhe niilonga yOmuwa.” (1 Kor. 15:58) Jesus okwa hunganeke shoka tu na okuninga. Sho a popi kombinga yiinima ayihe ya simana mbyoka tayi ka ningwa momasiku gahugunina, okwa gwedha ko a ti: “Ihe tangotango  elaka etoye oli na okuuvithilwa aantu ayehe.” (Mark. 13:4, 8, 10; Mat. 24:14) Dhimbulukwa kutya ethimbo kehe to yi muukalele, oto kutha ombinga mokugwanitha po ehunganeko ndyoka lyOmbiimbeli.

8. Otu shi shi ngiini kutya iilonga yokuuvitha yUukwaniilwa otayi tsikile okuhuma komeho?

⁸ Oshike tatu vulu okutya kombinga yehumokomeho lyiilonga yokuuvitha yUukwaniilwa? Iilonga mbika ohayi humu komeho, omumvo kehe. Pashiholelwa, dhiladhila kombinga yomwaalu gwaauvithi yUukwaniilwa muuyuni awuhe nkene tagu indjipala, momasiku ngaka gahugunina. Mo 1914, aauvithi oya li 5 155 miilongo 43. Kunena, aauvithi oye li omamiliyona 8,5 lwaampono, miilongo 240. Nonando ongawo, iilonga yetu onkee ngaa tayi pula komeho. Otu na okutsikila okuuvitha kutya Uukwaniilwa waKalunga, owo owala ekandulopo lyomaupyakadhi agehe gaantu. — Eps. 145:11-13.

9. Omolwashike tu na okutsikila okuuvitha etumwalaka lyUukwaniilwa?

⁹ Iilonga yetu yokuuvitha yUukwaniilwa, otayi ka longwa sigo Jehova ta ti opuwo. Okwa hupa ethimbo li thike peni, opo aantu mboka inaaya tseya Jehova Kalunga naJesus Kristus, ye ya tseye? (Joh. 17:3) Katu shi shi. Otu shi owala kutya manga uudhigu uunene inaawu tameka, kehe gumwe ngoka a “halelela oku ka mona omwenyo gwaaluhe” (NW), ota vulu okutaamba ko onkundana ombwanawa. (Iil. 13:48) Ongiini tatu vulu okukwathela aantu mbaka, manga pu na ethimbo?

10. Ekwatho lini Jehova he tu pe tu longe aantu oshili?

¹⁰ Jehova ohe tu pe ashihe shoka twa pumbwa okupitila mehangano lye, tu longe aantu oshili. Pashiholelwa, oshiwike kehe, ohatu dheulwa pokugongala kwomokati koshiwike. Pokugongala hoka ohatu kwathelwa tu tseye shoka tu na oku ka popya petalelopo lyotango nokomaishunoko. Ohatu longwa po wo nkene tu na okuninga omakonakonombiimbeli. Ehangano lyaJehova olye tu pa wo iilongitho mOkaketha kiilongitho yokulonga aantu. Iilongitho mbyoka otayi tu kwathele . . .

•   tu tameke oonkundathana,

• tu penduthe ohokwe yomupulakeni,

• tu kwathele aantu ya kale ya hala okwiilonga oshindji,

• tu longe aantu oshili, sho tatu konakona nayo Ombiimbeli

• nosho wo tu tseyithile mboka ye na ohokwe, ya ye kepandja lyetu lyokointaneta nokokugongala.

Odhoshili kutya inashi gwana owala okukala tu na iilongitho mbyoka. Otu na oku yi longitha. * Pashiholelwa, konima ngele wa kundathana nomuntu ngoka a ulika ohokwe, oho mu thigile okafo nenge oshifo, opo a vule oku ka lesha mo sigo we mu galukile ishewe. Oshi li oshinakugwanithwa shetu pauhandimwe, tu kale twi ipyakidhila niilonga yUukwaniilwa omwedhi kehe.

11. Omolwashike pwa ningwa elongekidho lyokwiilonga Ombiimbeli kointaneta?

¹¹ Okwiilonga Ombiimbeli kOintaneta (Online Bible Study Lessons) kepandja lyetu jw.org, oku li omukalo gumwe ngoka Jehova ha longitha a kwathele aantu yi ilonge oshili. (Tala mpoka pwa nyolwa BIBLE TEACHINGS > ONLINE LESSONS.) Omolwashike pwa ningwa elongekidho ndyoka? Omwedhi kehe, aantu omayovi muuyuni awuhe, ohaya yi kointaneta ya hala okwiilonga Ombiimbeli. Iiyilongomwa yokepandja lyetu lyokointaneta, otayi vulu okukwathela aantu yi ilonge oshili yOohapu dhaKalunga. Yamwe mboka ho uvithile, otashi vulika ya kakadhale okutaamba ko ekonakonombiimbeli. Ngele osho, ya ulukila oshitopolwa shika kepandja lyetu nenge wu ya tumine olinka yasho. *

12. Oshike shoka omuntu ta vulu okwiilonga kepandja lyetu lyokointaneta, kohi yoshitopolwa Online Bible Study Lessons?

¹² Kepandja lyetu oku na iiyilongomwa yi na iipalanyolo ngaashi: “The Bible and Its Author” (Ombiimbeli nOmunyoli gwayo), “The Bible’s Main Characters” (Mboka taya dhana onkandangala mOmbiimbeli) nosho wo “The Bible’s Message of Hope” (Etumwalaka lyOmbiimbeli kombinga yetegameno). Sho omuntu ta konakona iipalanyolo mbyoka, oti ilongo:

• Nkene Ombiimbeli tayi vulu okukwathela omuntu

• Kutya Jehova, Jesus nosho wo aayengeli oyo oolye

• Kutya omolwashike Kalunga a shita aantu

• Kutya omolwashike muuyuni mu na okumona iihuna nosho wo uukolokoshi

Iiyilongomwa mbyoka oya popya wo nkene Jehova ta ka . . .

• hulitha po okumona iihuna neso,

• yumudha aasi

• pingena po omapangelo gopantu nUukwaniilwa we.

13. Mbela okwiilonga Ombiimbeli okwa pingena po elongekidho lyokukonakona naantu Ombiimbeli? Shi yelitha.

¹³ Okwiilonga Ombiimbeli kointaneta inaku pingena po elongekidho lyokukonakona naantu Ombiimbeli. Jesus okwe tu pa uuthembahenda wokuninga aantu aalongwa. Otu na einekelo kutya mboka ye na ohokwe, otaye ki ilonga Ombiimbeli kointaneta, otaya ka pandula shoka tayi ilongo ko notaya ka kala ya hala okwiilonga oshindji. Ngele osho ya ningi, otashi vulika ya ka zimine ya konakone Ombiimbeli. Pehulilo lyoshitopolwa kehe, omuleshi oha ladhipikwa a pule a kwathelwe kugumwe gwomOonzapo a konakone naye Ombiimbeli. Konyala aantu 230 muuyuni awuhe, ohaya pula ekonakonombiimbeli kehe esiku, okupitila kepandja lyetu lyokointaneta. Osha simana lela omuntu a kwathelwe, pehala lyokwiilonga owala kuye mwene!

14. Shi ikolelela kwaashoka Jesus e tu lombwela muMateus 28:19, 20, oshike twa pumbwa okukambadhala okuninga, nomolwashike?

¹⁴ Lesha Mateus 28:19, 20. Uuna tatu konakona naantu Ombiimbeli, otu na okuninga ngaashi tatu vulu tu ‘ninge aantu aalongwa, tse tu ya longe ya dhiginine ayihe mbyoka Jesus e tu lombwela.’ Otwa pumbwa okukwathela aantu ya uve ko nkene sha simana kuyo okuhogolola okulongela Jehova nosho wo okwaambidhidha Uukwaniilwa we. Shika osha hala okutya, otu na okukwathela aantu ya ninge oshili yawo yene,  mokutula miilonga shoka tayi ilongo, mokwiiyapulila Jehova nomokuninginithwa. Kungawo, opo owala taya ka vula okuhupa mesiku lyaJehova. — 1 Pet. 3:21.

15. Oshike kaatu na okuninga, nomolwashike?

¹⁵ Ngaashi sha popiwa metetekelo, okwa thigala owala okathimbo okashona, uuyuni mbuka wu hanagulwe po. Nomolwaashono kaatu na okumana po ethimbo naantu mboka inaaya hala ya ninge aalongwa yaKristus. (1 Kor. 9:26) Iilonga yetu oya endelela! Opu na aantu oyendji natango ya pumbwa okuuva etumwalaka lyUukwaniilwa, manga ethimbo inaali thikana.

16. Shi ikolelela kEhololo 18:2, 4, 5, 8, oshike atuheni tu na okuninga? (Tala wo enyolo lyopevi.)

¹⁶ Lesha Ehololo 18:2, 4, 5, 8. Oovelise ndhoka odha popya oshinima shilwe shoka Jehova a tegelela aalongeli ye ya ninge. Aakriste ayehe yashili, oye na okwiikaleka kokule naBabiloni Oshinene. Manga omukonakoni ini ilonga oshili, otashi vulika a li oshilyo shelongelokalunga lyiifundja. Otashi vulika a li ha yi ko nokukutha ombinga mulyo. Nenge tashi vulika a li he li ambidhidha pashimaliwa. Manga omukonakoni inaa ninga omuuvithi inaa ninginithwa, tango okwa pumbwa i itete ko thiluthilu kelongelokalunga lyiifundja moka a li. Okwa pumbwa oku li nyolela ontumwafo ndjoka tayi ulike kutya ke shi we oshilyo shalyo, nokukala ihaa kutha we ombinga mehangano lyontumba li na ekwatathano naBabiloni Oshinene. *

17. Iilonga yini yokwiikongela omboloto Omukriste e na okuyanda, nomolwashike?

¹⁷ Omukriste gwashili oku na okushilipaleka kutya iilonga ye yokwiikongela omboloto, kayi na ekwatathano naBabiloni Oshinene. (2 Kor. 6:14-17) Pashiholelwa, ke na okukala ha longele ongeleka yontumba. Shimwe ishewe, Omukriste ngoka ha longele ongeshefa yontumba, ita ka hala okulongela pehala ndyoka tali humitha komeho elongelokalunga lyiifundja. Ngele oku na ongeshefa ye mwene, osha yela kutya ita ka taamba ko nando iilonga yontumba yi na ekwatathano naBabiloni Oshinene, mbyoka tashi vulika a pulwe a longe. Omolwashike hatu ningi ngawo? Omolwaashoka inatu hala okukutha ombinga miilonga nomomayono gomalongelokalunga ngoka ga nyata koshipala shaKalunga. — Jes. 52:11. *

18. Omumwatate gumwe okwa dhiginine ngiini omakotampango gOmbiimbeli ge na ko nasha niilonga ye yokwiikongela omboloto?

 ¹⁸ Omimvo dha ka pita, omukuluntugongalo gumwe ngoka ha longo kuye mwene, okwa li a pulwa komugandji gwiilonga gumwe, a longe po uulonga wokuhonga iipilangi yongeleka yomoshitopolwa shawo. Omugandji gwiilonga ngoka, okwa li e shi nale kutya omumwatate aluhe ohe mu lombwele kutya iha longo iilonga ya kwatathana noongeleka. Ihe oshikando shika okwa li lela a pumbwa omuntu e yi longe. Nonando ongawo, omumwatate okwa dhiginine omakotampango gOmbiimbeli, e te yi tindi. Oshiwike sha ka landula ko, moshifokundaneki shomoshitopolwa omwa li ethano lyomuhongi gwiipilangi gulwe, ta dhengele omushigakano kongeleka. Andola omumwatate okwa ziminine, ando ethano lye olyo lyi li mo. Ando shika inashi nyateka tuu edhina lye mokati kAakriste ooyakwawo! Dhiladhila wo kunkene Jehova ando a ka kala e shi uvitile.

19-20. (a) Oshike twi ilonga sigo opo mpaka? (b) Oshike ishewe twa pumbwa okwiilonga?

¹⁹ Shi ikolelela kehunganeko lyOmbiimbeli, oshiningwanima oshinene sha landula ko shoka masiku tashi ka ningwa muuyuni, iigwana tayi ka igidha ‘ombili negameno.’ Molwaashoka otwa longwa kuJehova, otu shi kutya iigwana itayi ka pondola mokweetela aantu ombili yashili notayi kalelele. Oshike tu na okuninga, manga oshiningwanima shoka nosho wo ehanagulo lyohaluka inaayi ningwa? Jehova okwa tegelela tu kale twi ipyakidhila nokuuvitha etumwalaka lyUukwaniilwa nokukambadhala okuninga aantu oyendji aalongwa. Pethimbo olyo tuu ndyoka, otwa pumbwa okwiikaleka kokule nomalongelokalunga giifundja. Shoka osha kwatela mo okukala kuu li we oshilyo shago nokuyanda iilonga mbyoka ya kwatathana nago.

²⁰ Opu na iiningwanima yilwe tayi ka ningwa pehulilo ‘lyomasiku gahugunina.’ Opu na wo iinima yilwe mbyoka Jehova a tegelela tu ninge. Iinima mbyoka oyini, nongiini tatu vulu okwiilongekidhila ashihe shoka tashi ka ningwa monakuyiwa yi li popepi? Shoka otashi ka kundathanwa moshitopolwa tashi landula.