1. Tiheeni enanlekecha wi nnakhala “mmahiku okuchula”?

APWANNE muyariwe emanle ovira eyaakha ya 1914? Waakhanle wi ti hiiha, nyuwo mukhanle okumi anyu woothene variyari va “mahiku okuchula” a mukhalelo yoola wa ichu. (2 Tim. 3:1) Oothene ahu nohiiwa vooloca sa saweereya seiho Yesu aalohenryeiye ntakhara elukuluku yeela. Iha inaphitaanyerya ikhoco, othowa wa soolya, ocikinyeya wa elapo, ipahu, waaceereryeya wa achu oohiiwelela malamulo, ni wiikariwa wa achu a Yehova. (Mat. 24:3, 7-9, 12; Luka 21:10-12) Ninnawoona tho achu anapaka ichu mmukhalelo waaloheryiwe ni murummwa Paulo. (Moone ekaaxa “ Mukhalelo Achu Aryaaya Olelo.”) Ntoko alapeli a Yehova, nri oolekecheya wi nnakhala omakuchuwelo wa “mmahiku ookuchula.”—Mik. 4:1.

2. Makoho taani nnachunaahu osuwela maakhulo aya?

² Woona wi yooviravo elukuluku yawaaca ovinyerya 1914, hiihaano nnakhala omakuchuwelo wa “mmahiku okuchula.” Woona wi makuchuwelo ahaacamela, hiyaano ninnachuna osuwela maakhulo a makoho ookhweleyasa: Saweereya taani sinahaala weereya omakuchuwelo wa “mmahiku okuchula”? Nave tiheeni Yehova onaweheryeiye wi nipake vaavaa nnaweheryaahu saweereya seiyo?

3. Mwawiiwanana ni yooloherya enaphwanyeya mu 1 Tesalónika 5:1-3, yoolokoha taani achu a maloko anahaalaaya opaka?

³ Mwaalakhanye 1 Tesalónika 5:1-3, NN. Vala, Paulo oothariha “nihiku na Aphiya [Yehova].” Ntoko niphariheliwaaya mu yoorepa yeela, enaahiwa elukuluku yeeyo enapacerya ni ohipheliwa wa Papulu Mutokotoko (olamulelo wa elapo yoothene wa malapelo atheru), nave nnamala ni Armaketo. (Wup. 16:14, 16; 17:5) Mu elukuluku vakhaani nihaakumve opacerya “nihiku” nlo, achu a maloko anahala olokoha: “murechele ni ohúkhuwa.” Eparipari wi  ahooleli akina a epoliitika annapharihela masu oolikana vaavaa onakhalaayavo wiiwanana wa ilapo. * Nyenya olokohiwa wa “murechele ni ohúkhuwa,” olociwe Mpiipiliyani enaya okhala yoohiyana. Ntakhara heeni? Nthowa nawi, vaavaa eneeraaya epakiwe yoolokoha eyo, achu awaaca anahaala wuupuwela wi chiryene ahooleli a epoliitika aawerya weeriha elapo okhala mpuro wookhapeleleya, ni wa murecele. Nyenya, “ekoi etokotoko” enahaala opacerya nave “mootutusha anamutoloshiwa.”— Mat. 24:21, BNM.

4. (1) Ichu taani nihinasuwelaahu vooloca sa yoolokoha ya “murechele ni ohúkhuwa”? (2) Tiheeni nnasuwelaahu vooloca sa yoolokoha yeeyo?

⁴ Noosuwela ichu ikina vooloca sa olokohiwa wa “murechele ni ohúkhuwa.” Nyenya ichu ikina nlelo hannasuwela. Ntoko yootakiherya, hannasuwela echu enahaala waaceenyerya achu a maloko opaka yoolokoha yeeyo naari mukhalelo eneeraaya epakiwe. Nave tho hannasuwela waakhanle wi enaya okhalavo yoolokoha emoharu pahi naari sinahaala okhalavo soolokoha soohiyanahiyana. Moohipwacha mukhalelo ene, hiyaano noosuwela echu emoha: hannaphwanela wiiwoka, nuupuwelaka wi ahooleli a epoliitika aawerya otikitherya murecele mu elapo yoothene. Ohiya yeeyo, eyo yoolokoha yeeyo Piipiliya onileenleiye wi niweheryeke. Eyo enahaala okhala eneneeryo yawi “nihiku na Aphiya [Yehova]” nnahaala opacerya.

5. Mwawiiwanana ni 1 Tesalónika 5:4-6, nni niwerye hai okhala ooreheryeya ntakhara “nihiku na Aphiya [Yehova]”?

⁵ Mwaalakhanye 1 Tesalónika 5:4-6. Olopola wa Paulo onnanooniherya echu nnaphwanelaahu opaka wi nikhale ooreheryeya ntakhara “nihiku na Aphiya [Yehova].” Wanthowa nenla “nihirupeke ntoko akina aneeraaya.” Nto “niwehereryeke” nri ovinya ene nave nikhaleno ephoole. Ntoko yootakiherya, nnaphwanela okhalano ephoole wi nihiivoliiherye mu miyaha sa epoliitika sa elapo yeela. Wakhala wi nohiivoliiherya mu epoliitika, nnahaala opaka makupa ni okhala a “elapo” yeela. (Yoh. 15:19) Hiyaano noosuwela wi pahiru Omwene wa Muluku tonahaala oruuha murecele wa elapo yoothene.

6. Nikhaviheryo taani nnaphwanelaahu waavaha achu, nave ntakhara heni?

⁶ Nyenya hannaphwanela pahiru okhala ovinya ene. Nnaphwanela waaviha akina wi esuwele yeeyo Piipiliya onahusiheiye vooloca sa muhoolo. Muupuwele wi vaavaa ekoi etokotoko enahaalaaya opacerya, hekhalavo elukuluku wi achu epake yoolakelela ya omulapela Yehova. Ti nthowa nene muteko ahu woolaleerya oryaaya wawaakuveya! *

7. Tiheeni Yehova onaweheryeiye wa hiyaano olelo?

⁷ Mu elukuluku yeela yavakhaani ehanle nihaakumve ophiya “nihiku” nawe, Yehova onaweherya wi nikhale oweiwa mmuteko woolaleerya. Oothene ahu nnaphwanela “oopharasha muteko wa Apwiya mahiku oothene.” (1 Kor. 15:58) Yesu aahiloherya yeeyo naaphwanelaahu opaka. Vaavaa aalonceiye ichu soothene sookhweleya  saahaala weereya mmahiku ookuchula, owo aahaaceererya: “Onnaphwanela wi epacerye olaleeriwa Michaka Yaphaama wa maloko oothene.” (Mar. 13:4, 8, 10; Mat. 24:14) Muupuwele ela: mu ikwaha soothene munayaanyu mmuteko woolaleerya, munakhwaaniherya yooloherya yeela ya Mpiipiliyani!

8. Muteko woolaleerya onaaceereryeya hai?

⁸ Tiheeni nnahaalaahu oloca sa waacereryeya wa muteko woolaleerya? Mu eyaakha ti eyaakha, achu awaaca anniiwa michaka saphaama sa Omwene. Muupuwele vooloca sa waacereryeya wa alaleeryi mu elapo yoothene variyari va mahiku yaala ookuchula. Mu 1914 yaarivo alaleeryi awaakhwana 5.155 mu ilapo 43. Olelo aakhalavo amilyawu 8.5 a alaleeryi mu ilapo 240 ni mmicecheni! Nyenya nlelo muteko ahu hophin’ye omakuchuwelo. Nnaphwanela otitelela waaleela achu wi omwene wa Muluku tonahaala omaliha makacamiho oothene a achu.—Sal. 145:11-13.

9. Ntakhara heeni hannaphwanela omaala olaleerya?

⁹ Pahiru nnahaala ohiya olaleerya wakhala wi Yehova ooloca wi muteko yoola woomala. Elukuluku taani ehanle wi achu emusuwele Yehova Muluku ni Yesu Kristu? (Yoh. 17:3) Hiyaano hannasuwela. Echu nsuwenlaahu tiyawi, ophiyerya opacerya ekoi etokotoko, oothene yaale “yaalakhanyeriwe waakhela okumi woohimala” anamweemererya michaka saphaama. (Saw. 13:48) Nni naakhaviherye hai achu yaawo elukuluku ehaakumve omala?

10. Ichu taani Yehova onanivaheiye wi naahusihe achu eparipari?

¹⁰ Moorweela wa marehereryo awe, Yehova onnanivaha soothene nnachunaahu wi naahusihe achu eparipari. Ntoko yootakiherya, ninnavyakihiwa moorweela wa muthukumano wa veeri va esumana. Muthukumano yoola, onnanihusiha mukhalelo wa oloca mu ekwaha yoopacerya, opaka oxekurya ni mukhalelo wa weeciha yoohuserya ya Piipiliya. Opwaha yeeyo, marehereryo a Yehova aanivaha Ikaruma Soohusihano. Iho sinnanikhaviherya  . . .

•   opaceryiha ochekula,

• otannya nchuno,

• waaceenyerya achu ohuserya miyaha mikina,

• ohusiha eparipari moorweela wa opaka yoohuserya ya Piipiliya ni

• waawopa achu ovolowa mu esaiti ahu ni mu Empa ya Omwene.

Ti yawooneya wi honaakhwana pahiru okhalano ikaruma seiya. Nyenya nnaphwanela opharihela. * Ntoko yootakiherya, wakhala wi omakuchuwelo wa muthukumano wa muceche woohakalaliha ni muchu orino nchuno, momvaha etrataatu naari erevista, owo onahaala okhala ooreheryeya waalakhanya ophiyerya nyuwo nwenrye olocano wanawiili. Mmoha ti mmoha a hiyo ookhalano murici wa okhala oweiwa mmuteko woolaleerya michaka saphaama mweeri ti mweeri.

11. Ntakhara heeni yoopakiwa Ekursu ya Piipiliya mu esaiti?

¹¹ Nikhaviheryo nikina Yehova onaavaheiye achu ohuserya eparipari ori moorweela wa Curso da Bíblia On-line, mu jw.org^®. (Muye ENSINOS BÍBLICOS > LIÇÕES ON-LINE.) Ntakhara heeni epakiwaaya ekursu yeela? Mweeri ti mweeri, mamilyawu ni mamilyawu aachu mu elapo yoothene annaavya miyaha sa Piipiliya mu interneti. Miyaha sa esaiti ahu sinanwerya waakhaviherya achu yaawo osuwela iparipari ikina sa Mmasu a Muluku. Opwaha yeeyo, akhweya nyuwo munamuloca ni muchu yoowo ohinakhala ootaphuwa weemererya yoohuserya ya Piipiliya. Wakhala wi eyo yoheereya, mmoonihe ekursu mu esaiti ahu naari mumvonyerye linkhi a miyaha. *

12. Tiheeni muchu onahaaleiye ohuserya mu Ekursu ya Piipiliya mu esaiti?

¹² Ekursu ya Piipiliya mu esaiti enaloca miyaha iha inacharela: “Bíblia e seu Autor,” “Os principais personagens da Bíblia” ni “A mensagem da Bíblia sobre um futuro melhor.” Mpuwa mwa mwaha ti mwaha sookhalamo miyaha sinahusiha . . .

• Mukhalelo Piipiliya oneereiye amukhaviherye muchu,

• Yehova taani, Yesu taani nave ankeelo taani,

• Ntakhara heeni Muluku ohaapatuxa achu ni

• Ntakhara heeni oryaayavo ohooxeya wawaaca ni nlala.

Miyaha seiha sinnathariha tho mukhalelo Yehova onahaleiye  . . .

• omaliha ohooxeya ni okhwa,

• waaviiha alipa ookhwa ni

• oraceeliha olamulelo wa achu ni Omwene wa Muluku.

13. Apwanne ekursu mu esaiti ennaraceela yoohuserya yooluluwanya? Mutharihe.

¹³ Ekursu mu esaiti, henaraceela yoohuserya ya Piipiliya yeele enapakiwa mooluluwanya ni Namoona a Yehova. Mweeparipari, ti hiyo Yesu onivanheiye ekari ya waapaka oohuserya. Miyaha sinaphwanyeya mu esaiti irino yoolakelela ya otannya nchuno na achu. Voocharela, wakhala wi annasiveliwa ni yeeyo ahusenryaaya, akhweya anamukhala ootaphuwa ochuna osuwela sincipale ni weemererye yoohuserya ya Piipiliya. Omakuchuwelo wa mwaha ti mwaha, ookhalawo linkhi vaavaa mulipa awaalakhanya onaweryeiye omvekevo Namoona a Yehova wi amuhuseryeke Piipiliya ni yene. Moorweela wa esaiti ahu, ninnaakhela michaka 230 sinarweela mu elapo yoothene sivekaka soohuserya sa Piipiliya nihiku ti nihiku! Moohikhwa minikwa, okhalano yoohuserya ya Piipiliya ya muchu mukhateiye ni muhusiha enakhala yaphaama!

14. Mwawiiwanana ni masu a Yesu anaphwanyeya mu Mateu 28:19, 20, nnaphwanela wiilipiserya opaka eheeni? Nave ntakhara heeni opaka eyo eryaaya yoochuneya?

¹⁴ Mwaalakhanye Mateu 28:19, 20. Vaavaa nneecihaahu soohuserya sa Piipiliya, nnaphwanela opaka owetha wahu wi ‘naapake ohuserya ni waahusiha ochariha soothene Yesu onirummeiye.’ Nnaphwanela waakhaviherya achu wiiwexexa wi ori woochuneyasa wa yaawo wi ethanle omurumeela Yehova ni okhaviherya  Omwene awe. Eyotho enataphulela waaceenyerya achu opharihela muteko yeeyo anahuseryaaya, wiiveleela wa Yehova ni opatisiwa. Pahiru weerano hiiha, awo taneeraaya evuluwe mu nihiku na Yehova.—1 Ped. 3:21.

15. Hannaphwanela oyeleela elukuluku ni eheeni, nave ntakhara heeni?

¹⁵ Ntoko nonnaahu, ehanle elukuluku vakhaani wi okuchuwe mukhalelo yoola wa ichu. Mwa yeeyo, hannaphwanela oyeleela elukuluku neecihaka soohuserya sa Piipiliya wa achu yaawo ahinapaka matorokelo mu ekumi aya wi emulapele Yehova. (1 Kor. 9:26) Muteko ahu ti wawaakuveya! Achu ancipale annachuna wiiwa michaka sa Omwene, elukuluku ehaakumve omala.

16. Mwawiiwanana ni Wupulula 18:2, 4, 5, 8, tiheeni Akristu oothene eeparipari anaphwanelaaya opaka? (Moone tho masu a vathi.)

¹⁶ Mwaalakhanye Wupulula 18:2, 4, 5, 8. Iversikulu seiha sinnooniherya echu ekina Yehova onaweheryeiye wa alapeli awe. Akristu oothene eparipari anaphwanela ohiya vanlakani wi hanapaka makupa a Papulu Mutokotoko. Ahaakumve ohuserya eparipari, akhweya ohuserya a Piipiliya aanapaka makupa a malapelo atheru. Owo akhweya aanathukumana ni makhuuru ammoori naari aanapaka makupa mu saweera siniiwanana ni malapelo atheru. Akhweya owo aahikhovelela ovaha ikhorowa wi akhaviherye malapelo awe. Nyenya wakhala wi oohuserya a Piipiliya onnachuna okhala mulaleeryi oohipatisiwa, echu yoopacerya, owo onaphwanela okwatelela wiiwanana woothene ni malapelo atheru. Onaphwanela orepa ekaarata wi hanapaka makupa a malapelo awe akhalai naari wooniherya mmukhalelo mukina wi oohiya othukumanano ni yaawo. Owo onaphwanela opaka emohamoha ni marehereryo vyakala yaawo aniiwanana ni Papulu Mutokotoko. *

17. Miteko sa mukhalelo taani Mukristu ohinaphwaneleiye weemererya, nave ntakhara heeni?

¹⁷ Mukristu eeparipari onaphwanela oolekecheya wi muteko awe honiiwanana ni Papulu Mutokotoko. (2 Kor. 6:14-17) Ntoko yootakiherya, owo hanaphwanela okhala namuteko a malapelo atheru. Opwaha yeeyo, Mukristu ori namalapa a empresa haahaala weemererya opaka miteko sammoori mu empa yeeyo enavuwiha malapelo atheru. Nave wakhala wi Mukristu ookhalano muteko awe, haahaala waavya muteko mu mapuro yaawo aniiwanana ni Papulu Mutokotoko, naari mano haahaala weemererya ovahiwa muteko ni yaawo. Ntakhara heeni ninnaphwanela okhalano moonelo yoola woolipa? Nthowa nawi, wa Muluku, marehereryo yaala a malapelo toothanyeya.  Hiyaano hinnachuna opaka makupa mu miteko saya ni soocheka saya.—Isa. 52:11. *

18. Munna oonihenrye hai wi aanachariha malakiheryo a Piipiliya mmuteko awe?

¹⁸ Mutokweene mmoha aahikhalano muteko awe. Iyaakha muculi, mulopwana mmoha aaheererya omwopa wi apake muteko mukhaani mu ekerexa ya vapooma. Mulopwana ole aanasuwela wi mutokweene heemererya opaka muteko mu ikerexa. Nyenya mulopwana owo aayeleela ewehereryo ya omphwanya muchu mukina aahaala apaka muteko yoole. Naamwiihiiha, mutokweene ole aahichariha malakiheryo a Piipiliya nave aakhooca muteko. Mu esumana yoocharela, eyornali yaahilaleya eruku ya muchu mukina akhomelaka mwikimanyo va ekerexa. Waakhanle wi munnihu oheemererya muteko, tiyawooneya wi eruku awe yaahaala okhuma mu eyornali yeele. Muupuwele mukhalelo eyo yaahaalaaya onanariha omuchu awe vamoha ni wa anna awe Eekristu! Muupuwele tho mukhalelo Yehova aahaleiye woona.

19-20. (1) Ophiyerya vaava tiheeni nihusenryaahu? (2) Nave tiheeni nnahaalaahu ohuserya?

¹⁹ Mwawiiwanana ni yooloherya ya Piipiliya, echu yoocharela enahaala weereya mu elapo yoothene eri yoolokoha ya “murechele ni ohúkhuwa.” Nyenya Yehova oonooniha wi achu a maloko hanahaala otikitherya murecele wa waakhwanela mweelaponi. Vano, tiheeni nnaphwanelaahu weera ehakumve yoolokoha ya “murechele ni ohúkhuwa” ni otoloxa yoowo onahaala ophiya mootutuxa? Yehova onachuna wi nikhale oweiwa mmuteko woolaleerya nave wi naapake oohuserya. Mu elukuluku emohamoha, hannaphwanela okhalano wiiwanana vyakala ni malapelo atheru. Mwa yeeyo, nnaphwanela okwatelela wiiwanana vyakala ni malapelo atheru nave tho niheemererye muteko onapaka makupa a Papulu Mutokotoko.

²⁰ Sookhalavo saweereya ikina inahaala weereya omakuchuwelo wa “mahiku okuchula.” Nave sookhalavo ichu ikina Yehova onakhweleiye wi nipake. Saweereya taani seiyo? Ichu taani ikina nnaphwanelaahu opaka? Nni niirehererye hai ntakhara ichu seiyo sinahaala weereya moohilekela? Ti yeeyo nnahaalaahu othokororya mmwaha onacharela.