1. Ovipuka patyi vitukalesa nonthumbi yokuti tukahi ‘mononthiki mbahulilila’?

OKUTI watyitua konyima yo 1914? Inkha ongotyo, opo watyitua ‘mononthiki mbahulilila’ mbouye uno. (2 Tim. 3:1) Atuho tuamona-le ine tueiva-le ovipuka Sesusi apopile okuti mavimoneka mononthiki mbonthyulilo. Ovipuka ovio, ovilwa, nondyala, novinimawe, nomauvela, nokuhetavela ovitumino, nokumonesa ononkhumbi ovaumbili va Siovaa. (Mat. 24:3, 7-9, 12; Luka 21:10-12) Tupu tumona ovanthu vena ovituwa ovivi apositolu Paulu apopile. (Tala okakasa kati: “Onkhalelo Ovanthu Vekahi Hono.”) Onthue tuna onthumbi yokuti tukahi “ kononthiki mbonthyulilo.” — Miq. 4:1.

2. Omapulo patyi tuesukisa okukumbulula?

² Tunde mo 1914 palambale omanima omanyingi. Otyo tyilekesa nawa okuti tukahi umwe unene konthyulilo. Iya mokonda onthyulilo ili unene popepi, tuesukisa okunoñgonoka omakumbululo omapulo amwe akolela. Ovipuka patyi maviendepo konthyulilo ‘yononthiki mbahulilila’? Oityi Siovaa ahanda tulinge putyina tukevelela ovipuka ovio vimoneke-po?

3. Ngetyi tyipopia 1 Ova Tesalonika 5:1-3, onondaka patyi mambukapopiwa novatumini?

³ Tanga 1 Ova Tesalonika 5:1-3. Paulu wapopia konthele ‘yonthiki ya Siovaa.’ Mono versikulu ombo, ondaka “onthiki ya Siovaa” ilekesa omuvo mauhimbika nehanyauno lyo “Mbambilonia Onene” alo onthiki yo Alumagedom. (Ehol. 16:14, 16; 17:5) Iya tyina “onthiki ya Siovaa” ihenehikepo, ovatumini mavakapopia okuti: “Tuna ombembwa, tukahi  metuliyo!” Pamwe ovatumini vapopia onondaka ombo tyina vahanda okupameka oupanga pokati kavo. * Mahi Ombimbiliya ipopia okuti apa katutu onondaka ombo mambukapopiwa monkhalelo yelikalela unene. Mokonda yatyi? Omokonda ovanthu mavasoko okuti pahe vena umwe ombembwa yotyotyili, mahi naina “ononkhumbi onene” mbukahi nokuhimbika. Iya konyima “avauhululwa nehanyauno.” — Mat. 24:21.

4. (a) Oityi tuhei konthele yomuvo ovatumini mavapopi okuti “tuna ombembwa, tukahi metuliyo”? (b) Oityi onthue twii konthele yotyo?

⁴ Onthue twii ovipuka vimwe maviendepo tyina ovatumini vamapopi okuti “tuna ombembwa, tukahi metuliyo.” Mahi pena ovipuka vimwe tuhei. Mongeleka, onthue katutyii oityi matyivelundu okupopia onondaka ombo. Katutyii inkha mavetyipopi ovikando ovinyingi ine mavetyipopi vala like. Mahi otyipuka twii nawa otyetyi: Onthue katupondola okusoka okuti ovatumini vaeta umwe ombembwa yotyotyili mouye auho. Mokonda ombo, onondaka ankho tukevelela-le mbupopiwe iya mambukalekesa okuti “onthiki ya Siovaa” maihimbika.

5. Ngetyi tyipopia 1 Ova Tesalonika 5:4-6, oityi tuesukisa okulinga opo tulifuike pala “onthiki ya Siovaa”?

⁵ Tanga 1 Ova Tesalonika 5:4-6. Paulu wapopia etyi tuesukisa okulinga opo tulifuike pala “onthiki ya Siovaa.” Wati: “Tuhalalei ngetyi ovanthu ovakuavo valinga.” Tupu tuesukisa ‘okukala tyipahi’ nokukala tyalunguka. Mongeleka, tuesukisa okulunguka opo tuhelipake mopulitika. Mokonda inkha tulipaka mopulitika, ngotyo tukahi nokulinga “onthele youye.” (Suau 15:19) Onthue tutyii nawa okuti Ouhamba wa Huku, oo vala maukaeta ombembwa yotyotyili mouye auho.

6. Tuesukisa okukuatesako vakuetu okulinga-tyi, iya omokonda yatyi?

⁶ Tyihe-okukala vala tyipahi, tupu tuesukisa okupahulapo vakuetu. Otyo tyilekesa okuti tuna okuvekuatesako okunoñgonoka etyi matyikamonekela ouye uno. Iya tuhinangelei okuti omuvo wokuivisa oputyina ononkhumbi ononene mbuhenehimbike. Mokonda tyina mbamehimbika, onthue kamatukakuatesako vali ovanthu okufenda Siovaa. Otyo tupopila okuti ovilinga viokuivisa vialumbanesa! *

7. Oityi Siovaa ahanda tulinge pehepano?

⁷ “Onthiki” ya Siovaa ikahi unene popepi. Oityi Siovaa ahanda tulinge momuvo wahupapo? Uhanda tutualeko okuivisa nombili. Onthue tuesukisa ‘okuundapa unene apeho movilinga vya Tatekulu.’ (1 Kol. 15:58) Sesusi waulile-ale konthele yotyo. Etyi apopia konthele yovipuka mavikamoneka konthyulilo, ayawisako okuti “onondaka onongwa mbuna  okuiviswa tete movanthu vomalongo aeho.” (Malu. 13:4, 8, 10; Mat. 24:14) Soka vala ku etyi: Apeho tyina wenda movilinga viokuivisa ukahi nokukuatesako okufuisapo eulo lyo Mbimbiliya!

8. Oñgeni tutyii okuti ovilinga viokuivisa vikahi nokufuisuapo nawa?

⁸ Okuti ovilinga viokuivisa vikahi umwe nokufuisuapo nawa? Omanima aeho ovanthu ovanyingi vekahi nokutavela onondaka onongwa Mbouhamba. Mongeleka, soka oñgeni ovaivisi veliyawisa unene mononthiki mbuno mbonthyulilo. Mo 1914, movilongo vina 43 ankho muna ovaivisi 5.155. Hono, movilongo vina 240 muna ovaivisi valamba ponomiliau etyinana! Mahi nkhele katunelipue-ko. Tuesukisa okutualako okupopila vakuetu okuti Ouhamba wa Huku oo vala maukamanako ovitateka viovanthu. — Sal. 145:11-13.

9. Omokonda yatyi tuesukisila okutualako okuivisa onondaka onongwa Mbouhamba?

⁹ Ovilinga viokuivisa mavikapwa vala tyina Siovaa amati tyapwa. Mahi onalupi meketyipopia? (Suau 17:3) Onthue katutyii. Onthue twii vala okuti tyina ononkhumbi ononene mbuhenehimbike, aveho “vahanda omuenyo uhapu” vapondola okutavela onondaka onongwa. (Ovil. 13:48) Oñgeni tupondola okukuatesako ovanthu ovo tyina nkhele vena omuvo wokupiluluka?

10. Oityi Siovaa etuavela opo tulongese ovanthu otyili?

¹⁰ Siovaa undapesa eongano liae opo etuavele atyiho tuesukisa pala okulongesa ovanthu otyili. Mongeleka, utulongesa meliongiyo lyo mokati kosimanu. Meliongiyo olio, tulongeswa oñgeni matuhimbika etompho novanthu, no ñgeni matukevetalela-po, no ñgeni tyilongeswa Ombimbiliya. Tupu eongano lituavela Oviti Viokulongesa. Oviti ovio vitukuatesako . . .

• okuhimbika etompho

• okukalesa ovanthu nolumbwe

• okulunda ovanthu okuhanda okulilongesa Ombimbiliya

• okulongesa ovanthu Ombimbiliya

• okupopila ovanthu vesuka opo vanyingile mo site yetu, nokuvekonga veye komaliongiyo.

Mahi okukala vala noviti ovio katyituuka. Tuesukisa okuviundapesa. * Mongeleka, inkha  utomphola nomunthu umwe walekesa esuko, muhila o tratadu ine omukanda omukuavo opo esale nokuutanga alo ukondokako vali. Otyilinga tyetu, okuivisa nombili onondaka onongwa onohanyi mbatyo ambuho.

11. Omokonda yatyi eongano lilongesila ovanthu Ombimbiliya mo Internete?

¹¹ Siovaa tupu ukahi nokuundapesa onkhalelo onkhuavo opo akuateseko ovanthu okunoñgonoka otyili: Okulongesa Ombimbiliya mo Internete Omokonda yatyi ovanthu valongesilwa mo Internete? Omokonda onohanyi ambuho, ovanthu ovanyingi vanyingila mo Internete okuovola omunthu uvelongesa Ombimbiliya. Omalongeso ekahi mo site yetu, apondola okukuatesako ovanthu okunoñgonoka Ondaka ya Huku. Tupu ovanthu vamwe upopia navo movilinga viokuivisa, ponthyimbi vaanya okulongeswa Ombimbiliya. Ngotyo, upondola okuvelekesa oñgeni vapondola okulilongesa Ombimbiliya mo site yetu, ine upondola okuvetuma enyingilikilo livetuala mo site. *

12. Oityi ovanthu vanoñgonoka tyina velilongesa Ombimbiliya mo site yetu?

¹² Omalongeso oo, apopia konthele yovipuka evi: “Ombimbiliya na Hekulu Yayo;” “Ovalie Vapopiwa Vali Unene mo Mbimbiliya;” “Ekevelelo Patyi Livasiwa mo Mbimbiliya?” Tyina omunthu elilongesa onosapi ombo, unoñgonoka:

• Oñgeni Ombimbiliya ipondola okumukuatesako

• Olie Siovaa na Sesusi no noandyu

• Omokonda yatyi Huku atungila ovanthu

• Omokonda yatyi tumonena ononkhumbi iya omokonda yatyi kunela ovivi

Tupu unoñgonoka oñgeni Siovaa . . .

• makamanako ononkhumbi nononkhia

• makatutilisa vokuankhia

• makamanako outumini wovanthu apingiyako Ouhamba wae.

13. Okuti pahe katuesukisile vali okulongesa ovanthu momaumbo avo mokonda vapondola-le okulilongesila Ombimbiliya mo Internete? Hangununa.

¹³ Mahi otyo katyilekesa okuti pahe katuesukisile vali okulongesa ovanthu Ombimbiliya. Sesusi wetuavela otyilinga tyokulinga ovalongwa. Onthue tukevelela okuti ovanthu vokuesuka notyili, mavanyingila mo site yetu opo velilongese-mo Ombimbiliya. Tukevelela okuti mavapande etyi mavelilongesa iya avahande okunoñgonoka vali Ombimbiliya. Inkha valinga ngotyo, hamwe konyima vapondola okutavela okulilongesa Ombimbiliya momaumbo avo. Tyina omunthu amamane okulilongesa onthele imwe mo site, pamoneka onondaka mbumupopila aite Ombangi ya Siovaa imulongese Ombimbiliya meumbo liae. Mouye auho, ononthiki ambuho ovanthu valamba po 230 vanyingila mo site yetu okuita opo valongeswe Ombimbiliya meumbo liavo! Okulongesa ovanthu momaumbo avo, otyipuka tyakolela unene!

14. Ngetyi Sesusi apopia mu Mateusi 28:19, 20, tuesukisa okulinga ononkhono mbokulinga-tyi, iya omokonda yatyi?

¹⁴ Tanga Mateusi 28:19, 20. Tyina tulongesa ovalongwa vetu, tuesukisa okulinga ononkhono mbokuvekuatesako opo ‘vakale ovalongwa, nokuvelongesa okuendela movipuka aviho Sesusi etutuma.’ Onthue tuesukisa okukuatesako ovanthu okunoñgonoka omokonda yatyi tyakolela okuumbila Siovaa, nokuhula Kouhamba wae. Otyo tyilekesa okuti tuesukisa okulinga ononkhono opo tulunde ovanthu okuendela muetyi velilongesa, avelipakula ku Siovaa iya avambatisalwa. Okulinga  ngotyo, otyo vala matyikevehupisa monthiki ya Siovaa. — 1 Pet. 3:21.

15. Oityi tuhapondola okulinga iya omokonda yatyi?

¹⁵ Ngetyi tuelilongesa-le konyima, kuakambela vala katutu opo ouye uno uhanyueko. Ngotyo, katupondola okumanena omuvo wetu nokulongesa ovanthu valekesa okuti kavahande okukala ovalongwa va Kilisitu. (1 Kol. 9:26) Ovilinga vietu vialumbanesa unene! Nkhele pena ovanthu ovanyingi vesukisa okunoñgonoka onondaka onongwa Mbouhamba tyina nkhele pena omuvo.

16. Ngetyi tyipopia Eholololo 18:2, 4, 5, 8, oityi atuho tuesukisa okulinga? (Tupu tala okatoi.)

¹⁶ Tanga Eholololo 18:2, 4, 5, 8. Ono versikulu ombo, mbupopia otyipuka otyikuavo Siovaa akevelela kovaumbili vae. Ovaumbili aveho va Siovaa vesukisa okulekesa nawa okuti velityilika Ombambilonia Onene. Hamwe etyi omulongwa umwe wo Mbimbiliya ehenelilongese otyili, ankho uli mongeleya yomatutu. Hamwe ankho ulinga ovilinga ovinyingi mongeleya yae ine hamwe ankho wava onombongo. Tyina omulongwa wo Mbimbiliya ehenekale omuivisi, tete wesukisa okulekesa okuti watunda mongeleya yomatutu. Wesukisa okuhonekela omukanda ongeleya yae opo alekese okuti watunda-mo, iya kahande vali okulinga natyike tyelikuata nongeleya yomatutu. *

17. Ovilinga patyi ovaumbili va Siovaa vesukisa okulityilika, iya omokonda yatyi?

¹⁷ Ovaumbili va Siovaa vena okulinga atyiho opo ovilinga viavo vihelikuate no Mbambilonia Onene. (2 Kol. 6:14-17) Mongeleka, katupondola okuundapela ongeleya. Tupu, katupondola okutavela tyina omuhona wetu etuita tulinge ovilinga vimwe momphangu yuundapeswa nonongeleya mbomatutu. Iya katupondola okutavela okuundapa na kese tyipuka tyelikuata no Mbambilonia Onene. Omokonda yatyi tuatokolela ngotyo? Omokonda valongesa omatutu nokulinga ovipuka ovivi. Huku uyele unene ovipuka ovio, iya onthue katuhande okuliwaneka navo. — Isa. 52:11. *

18. Oñgeni omukuatate umwe aendelele monondonga mbo Mbimbiliya konthele yokuanya nokutavela ovilinga?

¹⁸ Omanima amwe okualamba, omukuatate umwe omukulu wewaneno waitilwe opo akalinge otyilinga tyimwe mokapela. Okapela oko ankho kekahi motyilongo tyae. Omukuatate oo ankho omuhongi womavai. Iya omunthu  wokuemuihana ankho utyii nawa okuti omukuatate kametavela okuundapela mokapela mokonda waanyene-ale ovikando ovikuavo. Mahi pahe ankho omulume oo wehulilwa unene. Ankho wesukisa umwe omunthu wokulinga otyilinga otyo. No ngotyo omukuatate akakatela monondonga mbo Mbimbiliya iya ehetavela. Osimanu onkhuavo, mo jornale amumoneka olutalatu luo muhongi womavai ukahi nokupapela ekulusu mokapela kana omukuatate wetu aitilwe opo akaundape-mo. Pahe soka vala inkha omukuatate wetavelele. Ñgeno oe wapolwa olutalatu apakua mo jornale. Iya otyo ñgeno tyasilisa ovituwa viae pokati kovakuatate. Tupu soka oñgeni otyo ñgeno tyakalesile Siovaa.

19-20. (a) Oityi tuelilongesa monthele ei? (b) Oityi matulilongesa monthele mailandulako?

¹⁹ Ngetyi tyipopia Ombimbiliya, otyipuka tyakolela unene matyimoneka apa katutu mouye auho, oputyina ovatumini vamapopi okuti “tuna ombembwa, tukahi metuliyo!” Onthue tupandula unene Siovaa utulongesa. Mokonda yotyo, onthue tutyii nawa okuti ovatumini nalumwe mavavasi ombembwa yotyotyili. Oityi tuesukisa okulinga tyina tukevelela ovipuka ovio? Siovaa uhanda onthue tuivise onondaka onongwa, nokulinga ononkhono mbokulinga ovalongwa. Tupu tuesukisa okutualako okulityilika onongeleya mbomatutu. Otyo tyilekesa okuti tuesukisa okulityilika onongeleya mbomatutu mononkhalelo ambuho, nokuhalingi ovilinga vielikuata nambo.

²⁰ Pena ovipuka ovikuavo mavimoneka mokueenda kuononthiki mbuno mbonthyulilo. Mahi tupu pena ovipuka ovikuavo Siovaa akevelela tulinge. Ovipuka patyi? Oñgeni tupondola okulifuiika opo tukoleleye movipuka mavimoneka apa katutu? Onthele mailandulako, maikumbulula omapulo oo.