1. Niki ekirikutuhamiza ngu turi omu ‘biro by’emperu’?

WAABA waazairwe bwanyima ya 1914, nikimanyisa ngu otwireho omu ‘biro by’emperu’ byona eby’obusingye obu. (2 Tim. 3:1) Twena nituhurira amakuru agarikukwata aha bintu ebi Yesu yaagambire ebirikukwata aha bunaku obu turimu. Ebintu ebyo nibitwariramu entaro, eibura ry’eby’okurya, emitsitsa, endwara, okweyongyera kw’obugomi, n’okuhiiganisibwa kw’abaheereza ba Yehova. (Mat. 24:3, 7-9, 12; Luk. 21:10-12) Kandi tureebire abantu nibatwaza omu muringo ogu entumwa Paulo yaagambireho. (Reeba akabokusi “ Oku Abantu Bari Hati.”) Itwe abarikuramya Yehova, nituhamiza kimwe ngu nitutuura omu ‘biro by’emperu.’​—Mik. 4:1.

2. Nituza kugarukamu bibuuzo ki?

² Ahabw’okugira ngu haahingwireho obwire bwingi kuruga 1914, tushemereire kuba turi omu biro ebirikuhererukayo ‘eby’emperu.’ Obu emperu eri haihi munonga, twine kumanya eby’okugarukamu eby’ebibuuzo bikuru ebi: Niki ekiraabeho aha muheru ‘gw’ebiro by’emperu’? Kandi niki eki Yehova arikwenda tukore twaba tutegyereize ebirikuza kubaho?

3. Kurugiirira aha bunabi oburi omu 1 Abatesalonika 5:1-3, amahanga nigaija kurangirira ki?

³ Shoma 1 Abatesalonika 5:1-3. Paulo naagamba aha “kiro kya” Yehova. Kuhikaana n’ebihereire ekyahandiikirwe eki, obu n’obwire oburikutandika n’okutaahirirwa kwa ‘Babulooni Orukuru,’  ediini y’ebishuba, kandi bukahendera na Haramagedoni. (Kush. 16:14, 16; 17:5) “Ekiro” ekyo kirikuza kutandika, amahanga nigaija kuba nigagira ngu “n’obusingye, tihariho kabi!” (Envunuura ezimwe nizikoresa ebigambo: “Obusingye n’oburinzi.”) Abategyeki b’ensi obumwe nibakoresa ebigambo nk’ebyo baaba nibagamba aha kwongyera kureetaho obuteeka aha gati y’amahanga. * Kwonka, okurangirira oku Baibuli erikugambaho ngu “n’obusingye tihariho kabi” nikutaana ahari ekyo. Ahabw’enki? Ahakuba ekyo ku kiraabeho, abantu nibabaasa kuteekateeka ngu abategyeki b’ensi babaasize kureetera ensi kwongyera kubamu oburinzi n’obuteeka. Kwonka omu mazima, ekirikuza kukurataho ‘n’okucwekyerera okurabagweho’ ahonaaho.​—Mat. 24:21.

4. (a) Niki eki twine kutegyereza kureeba aha kikwatiraine n’okurangirira ngu “n’obusingye tihariho kabi”? (b) Niki eki turikumanya aha kurangirira okwo?

⁴ Nitumanya bimwe ebirikukwata aha kuranga okwo ngu “n’obusingye tihariho kabi.” Kwonka hariho ebindi ebi tutarikumanya. Titurikumanya ekiraareetere abategyeki kurangirira batyo n’oku baraarangirire. Kandi titurikumanya yaaba okuranga okwo nikwija kubaho omurundi gumwe nari emirundi mingi. Ekiraabeho kyona, eki turikumanya n’eki: Abategyeki b’ensi tibarikubaasa kureetaho obusingye omu nsi, n’ahabw’ekyo titushemereire kubeihwabeihwa okurangirira okwo. Kwonka, okurangirira okwo nikwo Baibuli erikutugambira kutegyereza. Niko kamanyiso akaraayoreke ngu “ekiro kya” Yehova kiri haihi kutandika!

5. Ebiri omu 1 Abatesalonika 5:4-6 nibituhwera bita kwetebeekanisiza “ekiro kya” Yehova?

⁵ Shoma 1 Abatesalonika 5:4-6. Okwehanangiriza kwa Paulo nikutumanyisa oku twine tweteekateekyera “ekiro kya” Yehova. Titwine “kugwejegyera nk’abandi.” Kureka twine ‘kuguma nitureeba’ kandi tweteekateekire. Nk’eky’okureeberaho, twine kuguma tweteekateekire kutejwanzya omu by’obutegyeki eby’ensi egi. Twabyejumbamu, nituba ab’ensi. (Yoh. 15:19) Nitumanya ngu Obukama bwa Ruhanga nibwo bwonka oburaareete obusingye omu nsi.

6. Nitwenda kuhwera abandi kukora ki, kandi n’ahabw’enki?

⁶ Oyihireho okuguma nitureeba, nitwenda n’okuhwera abandi kumanya obunabi bw’omu Baibuli oburikworeka ekirikuza kubaho omu nsi. Ka tugume nitwijuka ngu okubonabona kwingi ku kuraatandikye, obwire bw’okuhwera abantu kuheereza Yehova nibwija kuba butakiriho. Niyo nshonga ahabw’enki ni kikuru munonga kubuurira abantu hati! *

7. Yehova naayenda ngu tukore ki obunaku obu?

⁷ Omu bwire bukye obutsigaireyo “ekiro” ekyo kikahika, Yehova naayenda ngu  tugumizemu nitwejumbira kimwe omu kubuurira. Twine kwongyera kukora n’obweziriki omu “murimo gwa Mukama.” (1 Kor. 15:58) Yesu akagamba eki twabaire nitwija kukora. Ku yaabaire naagamba aha bintu ebikuru ebirikwija kubaho omu biro by’emperu, akagira ati: “Kandi engiri egi ey’Obukama eshemereire kubanza kubuurirwa omu mahanga goona.” (Mak. 13:4, 8, 10; Mat. 24:14) Kiteekateekeho: Buri murundi ogu orikuza omu kubuurira, naiwe nooba noohikiiriza obunabi bwa Baibuli obu!

8. Omurimo gw’okubuurira nigweyongyera kutunguuka guta?

⁸ Mbwenu shi omurimo gw’okubuurira nigweyongyera kutunguuka? Buri mwaka, omurimo ogu nigugumizamu kugyenda omu maisho. Nk’eky’okureeberaho, teekateeka aha kweyongyera kw’ababuurizi b’Obukama omu nsi yoona omu biro ebi eby’emperu. Omuri 1914, hakaba hariho ababuurizi 5,155 omu mahanga 43. Obunaku obu, hariho ababuurizi obukaikuru nka munaana n’ekicweka omu mahanga 240! Kwonka nabwo, omurimo gwaitu nigugumizamu. Twine kugumizamu nitubuurira aha Bukama bwa Ruhanga ngu nibwo bwonka oburaamareho oburemeezi bw’abantu.​—Zab. 145:11-13.

9. Ahabw’enki twine kugumizamu nitubuurira amakuru marungi g’Obukama?

⁹ Omurimo gw’okubuurira aha Bukama nigwija kugumizamu kuhitsya obu Yehova araagire ngu gwahwa. Hatsigaireyo obwire burikwingana ki abantu kubaasa kumanya ebirikukwata ahari Yehova Ruhanga na Yesu Kristo? (Yoh. 17:3) Titurikumanya. Eki turikumanya kiri ngu okuhitsya obu okubonabona kwingi kuraatandikye, boona abaine ekyetengo ky’okutunga amagara agatahwaho bakiine omugisha gw’okwikiriza amakuru marungi. (Byak. 13:48) Nitubaasa kuhwera tuta abantu aba omu bwire bukye obutsigaireyo?

10. Yehova naatuha buhwezi ki omu kwegyesa abantu amazima?

¹⁰ Yehova naatuha byona ebirikwetengyesa kutuhwera omu kwegyesa abantu amazima kurabira omu kibiina kye. Nk’eky’okureeberaho, buri wiiki nitutendekwa omu ruteerane orw’aha gati ya saabiiti. Oruteerane oru nirutuhwera kumanya eky’okugamba twaba nitubuurira omuntu omurundi gw’okubanza na twaba tugarukireyo. Kandi nirutuhwera kumanya oku turikubaasa kwegyesa omuntu Baibuli. Ekibiina kya Yehova kituhaire eby’Okukoresa omu Kwegyesa. Ebi nibituhwera . . .

•   kutandika kugaaniira n’abantu,

• kureetera abantu kukunda Baibuli,

• kuhiga abantu kwongyera kumanya ebirikukiraho,

• kwegyesa abeegi ba Baibuli amazima,

• n’okuhiga abarikusiima kuza aha mukura gwaitu n’okwija omu nteerane aha Kyombeko ky’Obukama.

Okugira ebikoreso ebi kyonka tikirikumara. Twine kubikoresa. * Nk’eky’okureeberaho, bwanyima y’okugaaniira n’omuntu orikwenda kumanya ebirikukiraho, noobaasa kumuha turakiti nari magaziini abe naashoma kuhitsya obu oraagarukyeyo. Buri omwe aine obujunaanizibwa bw’okwejumbira kimwe omu murimo gw’okubuurira aha Bukama buri kwezi.

11. Ahabw’enki ekicweka Online Bible Study Lessons kyatebeekanisiibwe?

¹¹ Teekateeka aha ky’okureeberaho ekindi ekirikworeka oku Yehova arikuhwera abantu kumanya amazima, omu kicweka Online Bible Study Lessons ekiri aha jw.org^®. Ahabw’enki ekicweka eki kyatairweho? Buri kwezi, abantu nyamwingi omu nsi yoona nibaza aha mikura ya Intaneeti kweyegyesa Baibuli. Ekicweka ky’okweyegyesa Baibuli ekiri aha mukura gwaitu nikihwera abantu nk’abo kutandika kwega amazima agari omu Kigambo kya Ruhanga. Bamwe abu turikubuurira nibabaasa kweziringa kwikiriza kwega Baibuli. Kyaba nikwo kiri, boorekye ekicweka eki aha mukura gwaitu, nari obahe endagiriro erikubahitsya aha kicweka eki. *

12. Omuntu naabaasa kwega ki omu kicweka Online Bible Study Lessons?

¹² Ekicweka Online Bible Study Lessons nikikwata aha nshonga ezi: “Baibuli n’Owaagihandiikiise,” “Abarikukira Kugambwaho omu Baibuli,” “n’Obutumwa bwa Baibuli Oburikutuha Amatsiko.” Ahansi y’emitwe egyo hariho ebindi eby’okwega nka:

• Oku Baibuli erikubaasa kuhwera omuntu

• Ebirikukwata ahari Yehova, Yesu, na baamaraika

• Enshonga ahabw’enki Ruhanga yaahangire abantu

• Enshonga ahabw’enki hariho okubonabona n’ebikorwa bibi

Kandi nikyoreka oku Yehova arikwija . . .

• kumaraho okubonabona n’okufa,

• kuzoora abaafiire,

• n’okwihaho obutegyeki bw’abantu oburemirwe, akataho Obukama bwe.

13. Okwegyera Baibuli aha mukura nikwihaho entebeekanisa y’okwegyesa abantu Baibuli? Shoboorora.

¹³ Okwegyera aha mukura tikurikwihaho entebeekanisa y’okwegyesa abantu Baibuli. Yesu atuhaire omugisha gw’okuhindura abantu abeegi. Twine amatsiko ngu abarikweyegyesa kurabira omu kicweka eki ekiri aha mukura, nibaija kukunda ebi barikwega bagire ekihika ky’okwenda kwega ebirikukiraho. Kyaba nikwo kiri, obundi nibabaasa kwikiriza kwega Baibuli. Aha muheru gwa buri ishomo, orikwega naabaasa kushaba kugira omuntu owaamutaayaayira kumwegyesa Baibuli. Abantu abarikurenga 230 omu nsi yoona buri izooba nibashaba kwegyesibwa Baibuli kurabira aha mukura! Entebeekanisa egi ey’omuntu kweyegyesa Baibuli ari wenka n’ey’omugasho!

14. Kurugiirira aha buhabuzi bwa Yesu oburi omu Matayo 28:19, 20 twine kuteeraho kukora ki, kandi ahabw’enki?

¹⁴ Shoma Matayo 28:19, 20. Abu turikwegyesa Baibuli, twine kuteeraho ‘kubahindura abeegi turikubeegyesa kworobera byona  ebi [Yesu] yaaragiire.’ Twine kuhwera abantu kwetegyereza obukuru bw’okucwamu hati kushagika Yehova n’Obukama bwe. Eki nikimanyisa okuteeraho kuhiga abantu okuhindura amazima agaabo barikuta omu nkora ebi barikwega, bakeehayo ahari Yehova kandi bakabatizibwa. Obwo nibwo baraije kuhonokaho aha kiro kya Yehova.​—1 Pet. 3:21.

15. Titwine bwire bw’okukora ki, kandi ahabw’enki?

¹⁵ Nk’oku kyaba kyagambirweho, hatsigaireyo obwire bukye munonga emperu y’obusingye obu ekahika. Ahabw’enshonga egi, titwine bwire bw’okugumizamu nitwegyesa abantu Baibuli abataine kigyendererwa ekirikureebwa butunu eky’okuba abeegi ba Kristo. (1 Kor. 9:26) Omurimo ogu gwine kukorwa ahonaaho! Hariho abantu baingi abarikwenda kuhurira amakuru marungi g’Obukama omu bwire bukye obutsigaireyo.

16. Kurugiirira aha biri omu Okushuuruurwa 18:2, 4, 5, 8, twena twine kukora ki? (Reeba obugambo obw’ahansi.)

¹⁶ Shoma Okushuuruurwa 18:2, 4, 5, 8. Ebyahandiikirwe ebi nibyoreka ekindi eki Yehova arikwenda abarikumuramya kukora. Abakristaayo ab’amazima boona baine kuhamya ngu tibaine kakwate koona na Babulooni Orukuru. Omwegi wa Baibuli naabaasa kuba yaabaire ari omu kibiina ky’ediini y’ebishuba obu yaabaire atakatandikire kwega amazima. Obundi naabaasa kuba yaabaire naaza aha mikoro y’ediini kandi akagyejumbamu. Nari obundi akaba naahayo esente kushagika ekibiina ekyo. Omwegi wa Baibuli ataikiriziibwe kubuurira nk’omubuurizi otakabatiziibwe, aine kwecwa aha kintu kyona ekiine akakwate n’ediini y’ekishuba. Aine kubahandiikira ebaruha y’okuruga omu kibiina ekyo nari kworeka ngu takiri omwe aharibo, kandi akeetaanisa aha kigombe kyona ekiine akakwate na Babulooni Orukuru. *

17. Ni mirimo ki ei Abakristaayo baine kwetantara kukora, kandi ahabw’enki?

¹⁷ Omukristaayo ow’amazima aine kuhamya ngu omurimo ogu arikukora tigwine kakwate na Babulooni Orukuru. (2 Kor. 6:14-17) Nk’eky’okureeberaho, tarikubaasa kwikiriza kuba omukozi w’ekanisa. Okwongyera ahari ekyo, Omukristaayo orikukoresibwa abandi aine kuhamya ngu tibaamuha omurimo ogwine akakwate n’ekyombeko ky’okuramya kw’ebishuba.  Kandi yaaba naayekoresa, taine kwikiriza omurimo gwa Babulooni Orukuru nari kumushaba kugira eki yaabakorera. Ahabw’enki nitugira okumariirira nk’oku? Ahakuba titurikwenda kugira akakwate koona n’ebikorwa by’ediini y’ebishuba ei Yehova atarikusiima.​—Isa. 52:11. *

18. Ow’eishe-emwe omwe akooreka ata ngu naahamira aha misingye ya Baibuli aha bikwatiraine n’emirimo?

¹⁸ Emyaka mikye enyima, omureeberezi orikwekoresa, omushaija akamushaba kugira akantu kakye ku yaabaija aha kanisa omu rurembo oru yaabaire naatuuramu. Omushaija ogwo akaba naamanya ngu ow’eishe-emwe butoosha naayanga kukora aha kanisa. Kwonka aha murundi ogu omushaija ogu akaba naayendera kimwe omuntu w’okukora omurimo ogu. Kwonka nabwo, ow’eishe-emwe akahamira aha misingye ya Baibuli yaagwanga. Saabiiti eyaakuratsireho, orupapura rw’amakuru rukooreka ekishushani omubaizi ondiijo arikuhanika omusharaba aha kanisa. Ku ogire ngu ow’eishe-emwe akaikiriza kugukora, niwe yaabaire naija kuba ari omu kishushani ekyo omu rupapura rw’amakuru. Teekateeka aha ku ekyo kyabaire nikiza kushiisha eiziina rye omu Bakristaayo bagyenzi be! Kandi teekateeka oku Yehova yaabaire naija kwehurira.

19-20. (a) Twaheza kwega ki? (b) Nituza kwongyera kwega ki?

¹⁹ Kurugiirira aha bunabi bwa Baibuli, ekintu kikuru ekirikwija kubaho omu nsi n’okurangirira ngu “n’obusingye tihariho kabi.” Nitusiima Yehova ahabw’ebi atwegyeise, nitumanya ngu amahanga tigarikubaasa kureetaho obusingye obwabuzima kandi obw’obutwire. Tushemereire kukora ki okuranga okwo kutakabaireho n’okucwekyerera okuraakurateho? Yehova naayenda ngu tugumizemu nitubuurira amakuru g’Obukama n’okuteeraho kuhindura baingi abeegi ba Kristo. Kandi, twine n’okwetanisa aha diini y’ebishuba. Eki nikitwariramu okwecwa aha bibiina by’ediini y’ekishuba kandi tukeetantara emirimo eine akakwate na Babulooni Orukuru.

²⁰ Hariho ebindi ebirikuza kubaho omu ‘biro by’emperu’ ebi ebirikuhererukayo. Kandi hariho n’ebindi ebi Yehova arikwenda tukore. Nibyo biiha, kandi nitubaasa kwetebeekanisiza tuta ebiri haihi kubaho? Nituza kubireeba omu kicweka ekirikukurataho.