1. Аци дуйней «фӕстаг бӕнтти» ке цӕрӕн, уой кӕцӕй зонӕн?

КӔД 1914 анзи фӕсте райгурдтӕ, уӕд де ’гас цард дӕр аци цардӕвӕрдӕн ӕ фӕстаг бӕнтти рацудӕй (2 Тим. 3:1). Мах ӕй зонӕн, нӕ рӕстӕги ци хабӕрттӕ цӕуй, уони туххӕй Киристе дӕр ке дзурдта. Е дзурдта тугъдтитӕ, стонгдзамантӕ ӕма незтӕ ке уодзӕй, удта фудгъуддӕгтӕ фулдӕр ке кӕндзӕнцӕ ӕма Йегови адӕн ӕфхуӕрд ке ӕййафдзӕнцӕ (Матф. 24:3, 7–9, 12; Лук. 21:10–12). Уомӕй уӕлдай ма апостол Павел адӕни туххӕй ци ниффинста, е дӕр ӕнхӕст кӕнуй. (Кӕсӕ рамкӕ « Адӕн цӕхуӕн иссӕнцӕ».) Йегови лӕггадгӕнгутӕ ке ан, уомӕ гӕсгӕ ӕй федарӕй зонӕн, аци дуйней «фӕстаг бӕнтти» ке цӕрӕн, уой (Мих. 4:1).

2. Цӕхуӕн фарстатӕбӕл нӕ гъӕуй дзуапп базонун?

² 1914 анзӕй нурмӕ минкъий рӕстӕг нӕ рацудӕй. Мадта нур, зӕгъӕн ес, ӕма «фӕстаг бӕнттӕн» сӕ фӕстаг бӕнтти цӕрӕн. Мадта уӕд гъӕуй базонун дзуапп аци ӕхсидзгӕ фарстатӕбӕл: «фӕстаг бӕнтти» кӕрон цӕхуӕн хабӕрттӕ цӕудзӕй? Цалинмӕ еци хабӕрттӕ нӕма райдӕдтонцӕ, уӕдмӕ нӕ ци кӕнун гъӕуй ӕма нӕмӕ Йеговӕ цӕмӕ ӕнгъӕлмӕ кӕсуй?

3. 1 Фессалоникӕгтӕмӕ 5:1–3 куд финст ӕй, уомӕ гӕсгӕ дуйней хецауӕдтӕ ци фегъосун кӕндзӕнцӕ?

³ Бакӕсӕ 1 Фессалоникӕгтӕмӕ 5:1–3. Ами Павел «Йегови бони» кой кӕнуй. Йегови бон райдайдзӕй «Устур Вавилон», гъома ӕгас дуйней мӕнгӕ динтӕ пурхӕ кӕнун ку райдайонцӕ, уӕд ӕма фӕууодзӕй Армагеддонӕй (Рарг. 16:14, 16; 17:5). Ӕрмӕст еци хабӕрттӕн сӕ хуӕдразӕй хецауӕдтӕ  раседдзӕнцӕ: «Сабурдзийнадӕ ӕма ӕдасдзийнадӕ!» Еуӕй-еухатт хецауӕдтӕ уӕхӕн дзурдтӕ фӕззӕгъӕунцӕ, адӕнихӕттитӕ кӕрӕдзей хӕццӕ ке гъӕуама федауонцӕ, уой кой ку фӕккӕнунцӕ, уӕд *. Фал Библий ци «сабурдзийнадӕ ӕма ӕдасдзийнади» кой цӕуй, е ӕндӕрхузи исӕнхӕст уодзӕй. Цӕмӕн ес уотӕ зӕгъӕн? Уомӕн ӕма еци рӕстӕги адӕнмӕ уотӕ кӕсдзӕй, ӕма хецауӕдтӕн бантӕстӕй цард ӕдасдӕр искӕнун. Фал ӕцӕгӕй ба гъе уӕд «ӕнӕнгъӕлти ӕрцӕудзӕй сӕ исӕфт» (Матф. 24:21).

4. а) «Сабурдзийнадӕ ӕма ӕдасдзийнадӕ» куд фегъосун кӕндзӕнцӕ, уой туххӕй ма ци базондзиан? б) Нур бал федарӕй ци зонӕн?

⁴ Мах ӕй нӕ зонӕн, хецауӕдтӕ «сабурдзийнадӕ ӕма ӕдасдзийнадӕ» цӕмӕ гӕсгӕ фегъосун кӕндзӕнцӕ ӕма ’й куд фегъосун кӕндзӕнцӕ, уой. Удта ’й нӕ зонӕн еу хатт ӕй фегъосун кӕндзӕнцӕ ӕви цалдӕр хатти. Фал еу гъуддаг ба бӕлвурдӕй зонӕн: хецауӕдтӕн дуйней ӕцӕг «сабурдзийнадӕ ӕма ӕдасдзийнадӕ» искӕнун нӕ бантӕсдзӕй ӕма нӕ гъӕуама е ма фӕссайа. Еци хабар ке фегъосун кӕндзӕнцӕ, уомӕй Библий пахампарадӕ исӕнхӕст уодзӕй ӕма е уодзӕй бӕрӕггӕнӕн, «Йегови бон» мӕнӕ-мӕнӕ ке райдайдзӕй, уомӕн!

5. 1 Фессалоникӕгтӕмӕ 5:4–6 финст дзурдтӕ нин куд ӕнхус кӕнунцӕ нӕхе «Йегови бонмӕ» бацӕттӕ кӕнун?

⁵ Бакӕсӕ 1 Фессалоникӕгтӕмӕ 5:4–6. Павели дзурдтӕ нӕ разӕнгард кӕнунцӕ, цӕмӕй расагъӕс кӕнӕн, «Йегови бонмӕ» цӕттӕ ан ӕви нӕ, уобӕл. Мах гъӕуама «иннети хузӕн фунӕй ма кӕнӕн», фал алкӕддӕр уӕн «къӕрцгъос». Зӕгъӕн, политики хӕццӕ нин еумӕйагӕй ке неци ес, уой гъӕуама ма иронх кӕнӕн ӕма сӕ гъуддӕгти нӕхе ма цӕвӕн. Кенӕ ба уотӕ рауайдзӕй, ӕма мах дӕр «аци дуйнейӕй» исуодзиан (Иоан. 15:19). Мах ӕй зонӕн ӕцӕг фарнӕ ӕрмӕстдӕр Хуцауи Паддзахадӕ ке искӕндзӕй.

6. Цӕхуӕн гъуддаги нӕ фӕндуй адӕнӕн ӕнхус кӕнун ӕма цӕмӕн?

⁶ Нӕхуӕдтӕ къӕрцъос ке ан, уомӕй уӕлдай ма гъӕуама иннетӕн дӕр ӕнхус кӕнӕн, цӕмӕй базононцӕ, Библий мах рӕстӕги туххӕй ци финст ес, уой ӕма райгъал уонцӕ. Гъӕуама нӕ зӕрдӕбӕл дарӕн еу гъуддаг: устур бӕллӕх ку райдайа, уӕд адӕнӕн Йегови фарс ислӕуунмӕ фадуат нӕбал уодзӕй. Ӕма гъе уой туххӕй нур гъӕуй игъосун кӕнуни гъуддаги архайун! *

7. Йеговӕ нӕмӕ цӕмӕ ӕнгъӕлмӕ кӕсуй?

⁷ «Йегови бонмӕ» ма хъӕбӕр минкъий рӕстӕг байзадӕй ӕма ’й уомӕ гӕсгӕ фӕндуй, цӕмӕй зингзӕрдӕй игъосун кӕнӕн. Гъӕуама нӕхе бафӕрсӕн: «„Хецауи гъуддаги“ цӕйбӕрцӕ мӕ бон ӕй, уойбӕрцӕ хъиамӕт  кӕнун?» (1 Кор. 15:58). Йесо дзурдта, аци рӕстӕги цӕхуӕн гъуддаги архайдзиан, уой. Фӕстаг бӕнтти ци хабӕрттӕ цӕудзӕй, уой туххӕй ку дзурдта, уӕд ма загъта: «Раздӕр [бал] гъӕуама хуарз хабар ӕгас адӕнихӕттитӕн дӕр игъустгонд ӕрцӕуа» (Мар. 13:4, 8, 10; Матф. 24:14). Расагъӕс кӕнӕ: алли хатт дӕр игъосун кӕнунмӕ ку рацӕуис, уӕд аци пахампарадӕ фенхӕст кӕнуй.

8. Паддзахади хабар игъустгонд куд цӕуй?

⁸ Паддзахади хабар куд игъустгонд цӕуй, уой туххӕй ба ци ес зӕгъӕн? Алли анз дӕр ӕгас зӕнхӕбӕл еци хабар фулдӕрӕй-фулдӕр адӕн фегъосунцӕ. Расагъӕс кӕнӕн, аци фӕстаг бӕнтти игъосунгӕнгути нимӕдзӕ куд фӕффулдӕр ӕй, уобӕл. 1914 анзи 43 бӕстеми адтӕй 5 155 игъосунгӕнӕги. Абони ба сӕ нимӕдзӕ иссӕй 8,5 милиуани ӕма игъосун кӕнунцӕ 240 бӕстеми. Ӕма еци куст нӕма фӕцӕй. Идарддӕр дӕр гъӕуй адӕнӕн лӕдӕрун кӕнун, сӕ зиндзийнӕдтӕн кӕрон ӕрмӕстдӕр Хуцауи Паддзахадӕ ке искӕндзӕй (Пс. 145:11–13).

9. Паддзахади хабар идарддӕр дӕр игъосун кӕнун цӕмӕн гъӕуй?

⁹ Игъосун кӕнуни гъуддаг цӕудзӕй, цалинмӕ ’й Йеговӕ ӕхуӕдӕг не ’рлӕуун кӕна, уӕдмӕ. Адӕнӕн ма цӕйбӕрцӕ рӕстӕг байзадӕй, цӕмӕй Йегови ӕма Киристей базононцӕ? (Иоан. 17:3). Нӕ ’й зонӕн. Фал еу гъуддаг ба бӕлвурдӕй зонӕн: цалинмӕ устур бӕллӕх нӕ райдӕдта, уӕдмӕ, «ӕносон царди надбӕл цӕун ке фӕндуй», уонӕн ес фадуат, цӕмӕй хуарз хабармӕ байгъосонцӕ ӕма Йеговӕн лӕггадӕ кӕнун райдайонцӕ (Гъуд. 13:48). Мадта нӕ бон куд ӕй адӕнӕн банхус кӕнун, цалинмӕ рӕстӕг ес, уӕдмӕ?

10. Йеговӕ нин адӕнӕн рӕстдзийнадӕ амонунмӕ куд ӕнхус кӕнуй?

¹⁰ Йеговӕ нин ӕ организаций фӕрци адӕнӕн рӕстдзийнадӕ амонунмӕ алцидӕр дӕттуй. Зӕгъӕн, алли къуӕре дӕр нин фӕууй фембӕлд къуӕрей астӕу. Еци фембӕлди фӕййахур кӕнӕн, куд ӕнгъезуй адӕймаги хӕццӕ фиццаг хатт радзорун, дуккаг бацуд искӕнун ӕма Библий ахур райдайун. Уомӕй уӕлдай ма нин нӕ организаци дӕттуй аллихузи косӕндзаумӕуттӕ рӕстдзийнадӕ амонунмӕ. Уони фӕрци нӕ бон ӕй...

• дзубанди райдайун,

• адӕймаги сагъӕсти бафтаун,

• фулдӕр базонунмӕ разӕнгард кӕнун,

•   Библи ке хӕццӕ ахур кӕнӕн, уонӕн рӕстдзийнадӕ амонун,

• фулдӕр базонун ке фӕндуй, еци адӕнӕн нӕ сайт байамонун ӕма сӕ ӕмбурдмӕ ӕрбахонун.

Уӕхӕн косӕндзаумӕуттӕ нӕмӕ ке ес, айдагъ е фагӕ нӕй. Гъӕуама си пайда кӕнӕн *. Зӕгъӕн, адӕймаги хӕццӕ нин дзӕбӕх дзубанди ку рауайа, уӕд ин нӕ бон ӕй ниууадзун буклет кенӕ журнал. Ӕма бал сӕ кӕсдзӕй, цалинмӕ нӕуӕгӕй нӕ фӕййеу уӕн, уӕдмӕ. Алкӕмӕн дӕр ни ӕ ихӕс ӕй, алли мӕйӕ дӕр Паддзахади хабар игъосун кӕнун.

11. Библи ахур кӕнунмӕ онлайн-курс цӕмӕн ӕрцудӕй конд?

¹¹ Йеговӕ ма адӕнӕн рӕстдзийнадӕ базонунмӕ ӕнхус кӕнуй еу мадзали фӕрци дӕр. Нӕ сайти jw.org^® ес Библи ахур кӕнунмӕ онлайн-курс. Еци курс цӕмӕн ӕрцудӕй конд? Алли мӕйӕ ӕгас зӕнхӕбӕл дӕр мингай адӕн интернети фӕййагорунцӕ, Библи ахур кӕнунмӕ мадзӕлттӕ. Гъема нӕ онлайн-курси фӕрци сӕ бон ӕй Библий рӕстдзийнадӕ базонун. Кӕмӕн фегъосун кӕнӕн, уонӕй кедӕрти нӕма фӕффӕндуй, цӕмӕй имӕ еске цӕуа ӕма Библи ахур кӕна. Уӕхӕн адӕймагӕн нӕ бон ӕй нӕ сайти еци онлайн-курс * бавдесун кенӕ ба имӕ ссылкӕ рарветун.

12. Онлайн-курси фӕрци адӕймаг цӕхуӕн фарстатӕбӕл базонуй дзуӕппитӕ?

¹² Библи ахур кӕнунмӕ онлайн-курси ес уӕхӕн темитӕ: «Библи ка ниффинста», «Библий ке туххӕй финст ес» ӕма «Нифси хабар Библийӕй». Еци курси фӕрци адӕймаг базонуй дзуӕппитӕ аци фарстатӕбӕл:

• Библи адӕймагӕн куд ӕнхус кӕнуй?

• Йеговӕ, Йесо ӕма изӕдтӕ ка ’нцӕ?

• Хуцау адӕни цӕмӕн сфӕлдиста?

• Зӕнхӕбӕл уойбӕрцӕ гъезӕмӕрттӕ цӕмӕн ес?

Уомӕй уӕлдай ма си дзурд цӕуй, Йеговӕ...

• гъезӕмӕрттӕ ӕма мӕлӕтӕн кӕрон куд искӕндзӕй,

• ка рамардӕй, уони цардмӕ куд раздахдзӕй,

• зӕнхон хецауӕдти бӕсти ӕ Паддзахадӕ куд ӕрфедар кӕндзӕй.

13. Онлайн-курс ӕнӕуой Библий ахур ӕййевуй? Ба ’й лӕдӕрун кӕнӕ.

¹³ Еци онлайн-курс ӕнӕуой Библий ахур нӕ раййевдзӕй, уомӕн ӕма Йесо ахуркӕнуйнӕгтӕ цӕттӕ кӕнун махӕн баихӕс кодта. Нифс нӕ ес, адӕймагӕн еци курс ӕ зӕрдӕмӕ ке фӕццӕудзӕй ӕма ’й уой фӕсте фулдӕр базонун ке бафӕнддзӕй. Гӕнӕн ес, ӕма ’й Библи ахур кӕнун дӕр бафӕндӕуа. Алли урокки кӕрон дӕр ес Библи ахур кӕнуни туххӕй курдиадӕ ӕма адӕймаги ку бафӕндӕуа, уӕд ӕй ӕ бон уодзӕй байдзаг кӕнун ӕма имӕ еске цӕун райдайдзӕй. Алли бон дӕр ӕгас зӕнхӕбӕл еци курдиадӕ байдзаг кӕнунцӕ 230 адӕймагемӕй фулдӕр! Адӕймагӕн хъӕбӕр ӕхсидзгӕ ӕй еске хӕццӕ ахур кӕнун!

14. Матфеййи 28:19, 20 куд финст ӕй, уомӕ гӕсгӕ ци гъӕуама кӕнӕн ӕма цӕмӕн?

¹⁴ Бакӕсӕ Матфеййи 28:19, 20. Адӕни хӕццӕ Библи ахур кӕнгӕй, гъӕуама цӕттӕ кӕнӕн ахуркӕнуйнӕгтӕ, цӕмӕй сӕ бон уа, Киристе «цидӕриддӕр ниффӕдзахста, уой ӕнхӕст кӕнун». Гъӕуама адӕнӕн ӕнхус кӕнӕн, цӕмӕй ӕй балӕдӕронцӕ, Йегови ӕма ӕ Паддзахади фарс ислӕуун куд ӕхсидзгӕ ӕй, уой. Уой туххӕй ба сӕ гъӕуама разӕнгард кӕнӕн, цӕмӕй Библий рӕстдзийнадӕмӕ гӕсгӕ цӕрун райдайонцӕ, сӕ цард Йеговӕн иснивонд кӕнонцӕ ӕма  донаргъуд райсонцӕ. Ӕрмӕстдӕр гъе уӕд фӕййервӕздзӕнцӕ, Йегови бон ку ’рцӕуа, уӕд (1 Петури 3:21).

15. Нӕ рӕстӕг цӕбӕл гъӕуама ма харз кӕнӕн ӕма цӕмӕн?

¹⁵ Минкъий раздӕр ӕй куд загътан, уотӕ аци дуйней кӕронмӕ берӕ рӕстӕг нӕбал байзадӕй. Уомӕ гӕсгӕ, ӕ цард ӕййевунмӕ ка нӕ гъавуй ӕма Киристей фӕдбӕлдзӕуӕг исун ке нӕ фӕндуй, уони хӕццӕ Библи ахур кӕнунбӕл рӕстӕг харз кӕнун нӕ гъӕуй (1 Кор. 9:26). Рӕстӕг нин берӕ нӕййес! Паддзахади хабар ма нӕ беретӕн гъӕуй фегъосун кӕнун, цалинмӕ ма рӕстӕг ес, уӕдмӕ!

16. Раргомади 18:2, 4, 5, 8 куд финст ӕй, уомӕ гӕсгӕ ни алкедӕр ци гъӕуама бакӕна? (Кӕсӕ ма феппайуйнаг дӕр.)

¹⁶ Бакӕсӕ Раргомадӕ 18:2, 4, 5, 8. Аци стихти дзурд цӕуй, Йеговӕ ма ӕ лӕггадгӕнгутӕмӕ цӕмӕ ӕнгъӕлмӕ кӕсуй, уобӕл. Ӕцӕг киристӕнттӕн Устур Вавилони хӕццӕ еумӕйагӕй гъӕуама ӕппундӕр маци уа. Рӕстдзийнадӕ ка базудта, уонӕй кадӕртӕ раздӕр мӕнгӕ динбӕл хуӕст адтӕнцӕ ӕма сӕ дини ӕгъдӕуттӕ дӕр ӕнхӕст кодтонцӕ. Кенӕ ба еци дини гъуддӕгтӕн нисайнӕгтӕ лӕвардтонцӕ. Ӕма, цалинмӕ уӕхӕн адӕймаг ӕнаргъуд игъосунгӕнӕг не ’ссӕй, уӕдмӕ гъӕуама мӕнгӕ динӕй рацӕуа. Зӕгъӕн, ӕ бон ӕй пъисмо ниффинсун аргъауӕнмӕ, кенӕ, кӕд, Устур Вавилони хӕццӕ баст ка ӕй, ӕндӕр уӕхӕн организаций адтӕй, уӕд уордӕмӕ дӕр, кенӕ ’й ӕндӕр ескуд балӕдӕрун кӕнун, цӕугӕ си ке кӕнуй, уой *.

17. Киристон цӕхуӕн кустбӕл не ’сарази уодзӕй ӕма цӕмӕн?

¹⁷ Ӕцӕг киристонӕн ӕ куст дӕр гъӕуама Устур Вавилони хӕццӕ баст макуд уа (2 Кор. 6:14–17). Зӕгъӕн, аргъауӕни косунмӕ ’й ку ихуӕрсонцӕ, уӕд не ’сарази уодзӕй. Кенӕ ба, мӕнгӕ динтӕ кӕмӕй пайда кӕнунцӕ, уӕхӕн бунати ести устур куститӕ кӕнун ку гъӕуа, уӕддӕр не ’сарази уодзӕй. Ӕхе бизнес кӕмӕн ес, уӕхӕн киристон ба мӕнгӕ дини хӕццӕ баст организацитӕй заказтӕ нӕ есдзӕй. Цума аци гъуддӕгтӕмӕ уӕхӕн цӕстӕй цӕмӕн кӕсӕн? Уомӕн ӕма нӕ нӕ фӕндуй, Хуцауи цӕсти цъумур ка ӕй, еци динтӕн сӕ тӕрегъӕдгун гъуддӕгти сӕ къох аразун * (Ис. 52:11).

18. Еу ӕнсувӕр ӕ кусти Библий уагӕвӕрдтӕмӕ гӕсгӕ федарӕй куд архайдта?

 ¹⁸ Цалдӕр анзей разӕй, гъӕдиндзаумӕуттӕгӕнӕгӕй ка куста, еу уӕхӕн хестӕр нӕлгоймагмӕ ӕ горӕти аргъауӕнӕй заказ ӕрбацудӕй. Ӕнсувӕр некӕд арази кодта аргъауӕни косунбӕл. Ӕма ин куст ка агурдта, е дӕр уой зудта, фал аци хатт неке ирдта. Фал ӕнсувӕр уӕддӕр Библий уагӕвӕрдти сӕрти нӕ рахизтӕй ӕма еци кустбӕл не ’сарази ӕй. Иннӕ къуӕре газзетти фӕззиндтӕй, ӕндӕр гъӕдиндзаумӕуттӕгӕнӕг аргъауӕни сӕрбӕл крест куд федар кодта, уӕхӕн хузӕ. Ӕнсувӕр еци кустбӕл ку исарази адтайдӕ, уӕд газзетти ӕхе хузӕ фӕууидтайдӕ. Расагъӕс кӕнӕ, гъе уӕд ӕхецӕн цӕхуӕн ном искодтайдӕ ӕма ибӕл ӕмбурди хуӕртӕ ӕма ӕнсувӕртӕ ци рагъуди кодтайуонцӕ! Удта ибӕл Йеговӕ дӕр ци рагъуди кодтайдӕ?

19, 20. а) Абони уӕнгӕ ци базудтан? б) Ци ма нӕ гъӕуй базонун?

¹⁹ Библи куд зӕгъуй, уомӕ гӕсгӕ тагъд рӕстӕги исӕнхӕст уодзӕй еу ӕхсидзгӕ пахампарадӕ – дуйней хецауӕдтӕ фегъосун кӕндзӕнцӕ: «Сабурдзийнадӕ ӕма ӕдасдзийнадӕ!» Фал нин Йеговӕ рагацау зӕгъуй, е ӕцӕг сабурдзийнадӕ ке нӕ уодзӕй, удта берӕ дӕр ке нӕ рахӕсдзӕй. Цалинмӕ еци хабар не ’рцудӕй, уӕдмӕ ба нӕ ци кӕнун гъӕуй? Йегови фӕндуй, цӕмӕй Паддзахади хабар зингзӕрдӕй игъосун кӕнӕн ӕма идарддӕр дӕр нӕуӕг ахуркӕнуйнӕгтӕ агорӕн. Удта ма, цӕмӕй мӕнгӕ динтӕй дӕр нӕхе еуварс дарӕн, гъома Устур Вавилонмӕ ка хауй, еци организацитӕй рацӕуӕн, удта сӕ хӕццӕ баст ка ӕй, уӕхӕн куститӕй дӕр нӕхе еуварс дарӕн.

²⁰ «Фӕстаг бӕнттӕн» сӕ фӕстаг бӕнтти ма ӕндӕр хабӕрттӕ дӕр ӕрцӕудзӕй. Ӕма нӕмӕ еци рӕстӕги дӕр Йеговӕ цӕхуӕндӕр гъуддӕгтӕмӕ ӕнгъӕлмӕ кӕсдзӕй? Цӕхуӕн гъуддӕгтӕмӕ? Удта нӕ бон куд ӕй нӕхе бацӕттӕ кӕнун тагъд рӕстӕги ци хабӕрттӕ цӕудзӕй, уонӕмӕ? Уой ба базондзиан иннӕ статьяй.