1. Ngmekera e mo ulterekokl a rengud el kmo kede kiei er a “uriul sils”?

KAU, ke milechell er a uriul er a rak er a 1914? A lsekum nguaisei, e ke mla kiei el klengar er kau a ngar a taem er a “uriul sils” er tia el blekeradel er a beluulechad. (2 Ti. 3:1, BT) Me kid el rokui a mla remenges a tekoi el Jesus a ulemlaoch el kirel tia el taem. Aikang a uldimukl er a mekemad, me a bosech er a kall, me a desiu, me a bekoiueiuul el rakt, me a chelebirukel el di meleketek, me a dirrek el odechelakl el mora rechedal a Jehovah. (Mt. 24:3, 7-9, 12; Lk. 21:10-12) Kede dirrek el mla mes a omerellir a rechad el ua lulemlaoch a apostol Paulus. (Momes er a baks el “ A Blekerdelir a Rechad er Chelecha el Taem.”) Me kid el mengull er a Jehovah a kmal ulterekokl a rengud el kmo kede kiei er a ulebengelel “a ikel ngar medad el sils.”​—Mik. 4:1.

2. Ngera el ker a kired el mo medengei a nger er ngii?

² Me a rak er a 1914 a kmal meketeketang er a lemocheuekl me ngkmal ulterekokl a rengud el kmo kede kiei er a ulebengelel a “uriul sils.” Me tia el taem a kmal di olekedang, me ngkired el mo medengei a nger er a bebil meklou a ultutelel ker el kmo: Ngera mo duubech er a ulebengelel a “uriul sils”? E ngera ngmengerechir er ngii a Jehovah el soal a doruul er chelecha el dongiil aika el tekoi el mochu er ngii?

3. A doltirakl er a ulaoch el ngar a 1 Thesalonika 5:1-3, e ngera el subed a mo er ngii?

³ Monguiu er a 1 Thesalonika 5:1-3. A Paulus a milsaod er a “Sils er a Rubak.” Me ngar tia el bades e ngmelutk el kirel a taem el lomuchel a odechelakl el mora “Kloul Babilon,” el cheldellel a rokui el klsuul klechelid, e mo merekui er ngii er a Armakedon. (Och. 16:14, 16; 17:5, BT) Telkib el taem er a uchei er a lomuchel tia el “Sils,” e a betok el renged a mo mesubed el kmo “ng budech ma rokui el tekoi a di ungilbesul!” (A bebil oidel tia el tekoi a kmo: “Ngbudech me  a ulekerreu!”) A remengeteklel a beluulechad a ousbech er tia el tekoi a lebebil er a taem sel losaod el kirel a omeleketek el ungil deleuill er a delongelel a beluu. * Me nguaisei, engdi a subed el kmo “ng budech ma rokui el tekoi a di ungilbesul” el losaod er ngii a Biblia a kuk ngodech. E ngera uchul? E le sel leduubech tia el tekoi, e a rebetok a mo omdasu el kmo a remengeteklel a beluulechad a mla toketekii a ulekerreu el beluulechad. Engdi a mera er ngii, “ng di mereched el mer tir a kloul tellemall” el okiuellel a “kloul ringel.”​—Mt. 24:21, BT.

4. (a) Ngera el tekoi a dirk dongiil er ngii el kirel a subed el kmo “ng budech me a rokui el tekoi a di ungilbesul”? (b) E ngera bla bo dodengei el tekoi?

⁴ Kid a medengei a bebil er a tekoi el kirel a subed el kmo “ng budech ma rokui el tekoi a di ungilbesul.” Me nguaisei, engdi ngar ngii a bebil er a tekoi el diak dodengei. Ngdiak dodengei el kmo ngera rulleterir a remengedereder me te mo melekoi er tia el subed. E dirrek el diak dodengei el kmo ngdi mo chimong el subed me a lechub e ngmo betok el subed. Engdi kede medengei el kmo: Ngdiak el kired el mecheblad e bo domdasu el kmo a remengeteklel a beluulechad a sebechir el toketekii a mera el budech er tia el beluulechad. A Biblia a mesaod el kmo tiang a subed el dongiil er ngii. Tiang a olangch el kirel a “Sils er a Rubak” el kmedu el mo omuchel!

5. Ngmekera bades er a 1 Thesalonika 5:4-6 e ngosukid el mo kltmokl el kirel a “Sils er a Rubak”?

⁵ Monguiu er a 1 Thesalonika 5:4-6. A tekingel a Paulus a mesaod er a rolel e kede mo ungil kltmokl el kirel a “Sils er a Rubak.” Ngdiak el kirel ‘el imiit a medad el ua re bebil er a re chad.’ Ngkmal kired el ‘di mekar.’ El ua tiang, ngkired el kerekikl me lak bo domekbitang e dirrek el diak dongesechusem er kid er a ngii di el tekoi er a balatiks. E le lsekum kede mo teloi aika el tekoi, e kede mocha “chedal a beluulchad.” (Jn. 15:19) Kede ungil medengei el kmo ngdi ta el Rengedel a Dios a sebechel toketekii a budech er a beluulechad.

6. Ngsoad el ngosuterir a rechad el mo mekerang, e ngera uchul?

⁶ Kid a soad el melemolem el mekar e dirrek el soad lolengeseu er a rebebil el mesuub el mo medengei a ulaoch er a Biblia el kirel a tekoi el mo duubech er tia el beluulechad. Me lak dobes, sel lomuchel a kloul ringel, e ngdikea techellir a rechad el obult el mora Jehovah. Tiaikid a uchul me a urered er a berkel a klumech er chelechang a kmal orechudel! *

7. Ngera ngmengerechir er ngii a Jehovah er kid er chelechang?

⁷ Me ngar a chelsel aika el di kesai el taem er a uchei er a lomuchel a “Sils” er ngii, e a Jehovah a mengerechir er kid el mo melemolem lomerk er a klumech. Me ngkired el kongei el mo ‘blak a rengud el oureor el kirel a Rubak.’ (1 Ko. 15:58) A Jesus a milsaod a tekoi el kired el meruul. Me sera losaod el kirel a rokui el olangch el mo duubech er a taem er a uriul sils, e ngdirrek el dilu el kmo: “A Ebangkelio a kirel el mosisechakl el mor a rokui el chad.” (Mk. 13:4, 8, 10; Mt. 24:14) Me ka di  molatk: A bek el taem el bo moldingel, e ke dirrek el olengeseu el oltaut er tia el ulaoch er a Biblia!

8. Kede mekera e medengei el kmo a ureor er a berkel a klumech er a Renged a dirk meleketek?

⁸ Ngua ngera ngelsecheklel a ureor er a berkel a klumech er a Renged? Bek el rak, e tia el ureor a di meleketek. El ua tiang, ka di molatk er a ngelsecheklel a ildisir a rumerk er a Renged er chelecha el taem er a uriul sils. Sera rak er a 1914, e ngmla er ngii a 5,155 el publisher er a chelsel a 43 el beluu. E chelechang, e te ngar ngii a bekord el 8.5 el miliol el publisher er a chelsel a 240 el beluu! Me nguaisei, engdi a ureor a dirk melemolem. Me ngkmal kired el melemolem el ouchais er a rechad el kmo a Rengedel a Dios a di ta el renged el sebechel mo sumechokl a rokui el mondai er a klechad.​—Psa. 145:11-13.

9. Ngera uchul me ngkmal kired el melemolem el omerk er a klumech er a Renged?

⁹ Tia el urered er a berkel a klumech er a Renged a diak lsebechel mo merek el mo lmuut er a taem el Jehovah a dmu el kmo ngmerekong. Me ngua ngera klemengetel el taem a dirk medechel el kirir a rechad el mo medengelii a Jehovah el Dios me a Jesus Kristus? (Jn. 17:3) Ngdiak dodengei. Engdi kede bai medengei el kmo ngmo lmuut er sel taem el lomuchel a kloul ringel, e a ngii di el chad el “rredemelel a diak a ulebengelel el klengar” a dirk ngar ngii a techellel el kongei er a ungil chais. (Rel. 13:48, NW) Me ngmekera e mo sebeched el ngosuterir tirka el chad er a uchei er a bo lak a taem?

10. Ngera el ngeso a lomeskid a Jehovah me bo lsebeched lolisechakl er a klemerang el mora rechad?

¹⁰ Ngokiu a cheldebechelel e a Jehovah a omeskid aike el rokui el dousbech el mo olisechakl er a rechad er a klemerang. El ua tiang, kede ngmai a osisechakl er a bek el sandei lokiu a miting er kid er a Klengar er Kid a Rekristiano me a Omesiunged. Tia el miting a ngosukid el mo medengei a tekoi el dolekoi sel dekot el metik er a chad me a dirrek sel deluut el mo oldingel er tirke el semeriar. Ngdirrek losisecheklid er a rolel a dosuub a Biblia lobengkel a chad. Me a cheldebechelel a Jehovah a dirrek el mla meskid a Blil a Dongu el Kirel a Osisechakl. Chouaika el klekedall a ngosukid el mo . . .

• omuchel a cheldechedechad,

• omeksemeriar er a chad,

• rulleterir el mo sorir el mo medengei a lmuut el betok el kirel a klemerang,

• olisechakl er a klemerang el mo er tirke el dosuub a Biblia lobengterir, e dirrek el

• melisiich er a rechad el mo omes er a website er kid me a dirrek el Blil a Ongdibel er kid.

 Nguaisei, engdi ngdiak a ngera el lerellii a di dolab aika el dongu e lak dousbech. Ngkmal kired el mo ungil lousbech. * El ua tiang, a lsekum ke msa chad el semeriar a tract me a lechub e ng magazine, e ngsebechel el mo menguiu me sel omluut el mo oldingel er ngii. Ngerecheled el melemolem el omerk er a klumech er a Renged er a bek el buil.

11. Ngera uchul me ngmlo er ngii a Online Bible Study Lessons?

¹¹ A lmuut el ta er a rolel e a Jehovah olengeseu er a rechad el mo medengelii a klemerang, a okiu sel Online Bible Study Lessons el ngar a jw.org^®. * (Momes er cheungel a BIBLE TEACHINGS > ONLINE LESSONS.) Ngera uchul me ngmlo er ngii aika el suobel? A bek el buil, e a betok el ildois er a rechad el meliuekl er a beluulechad a mora Internet losiik a suobel er a Biblia. Me aika el suobel el ngar a website er kid a sebechel ngosuterir tirka el chad el omuchel el mesuub er a klemerang el ngar a Tekingel a Dios. A rebebil er tirke el mongedecheduch er tir a locha omai er a rengrir me ngdiak lekengei el mesuub er a Biblia. A leuaisei, e mochotii tiang el ngar a website er kid me a lechub e modureklii a link er ngii el suobel el mo er tir.

12. Ngera el tekoi a sebechel a chad el suub er a Online Bible Study Lessons?

¹² Ngar aika el Online Bible Study Lessons er kid e ngmesaod a tekoi el: “The Bible and Its Author,” me a “The Bible’s Main Characters,” me a dirrek el “The Bible’s Message of Hope.” E ngar a chelsel aika el suobel, e ngolisechakl el kmo:

• Ngmekera Biblia e sebechel ngosuir a chad

• Ngtecha Jehovah, me a Jesus, me a rechanghel

• Ngera uchul me a Dios a ulemeob er a rechad

• Ngera uchul me ngar ngii a ringel me a mekngit el tekoi

Aika el suobel a dirrek el mesaod er a rolel e a Jehovah a mo . . .

• okngemedii a ringel me a kodall,

• olekiis er a rulekoad el lmuut el me ngar, e dirrek el

• mo mtechei a rokui el kabelment er a klechad loba Rengedel a Dios.

13. Aike el suobel el ngar a online, ngsebechel omtechei er a omesubel a Biblia lobengkel a Sioning? Mosaod.

¹³ Aika el suobel el ngar a online, a diak lomtechei er a mla meketmokl el omesubel a Biblia lobengkel a chad. A Jesus a mla meskid tia el ileakl el techall el mo meruul er a remo disaiplo. Kede oureng el kmo a online el omesuub a sebechel rullii a chad el mo semeriar a tekoi el losuub e mo soal lmuut el mesuub a betok. Seikid e nglocha mo kongei el mesuub a Biblia lobengkel a Sioning. Ngar a ulebongel er a bek el suobel, e ngika el mesuub a sebechel olengit er a Sioning el mo mesuub a Biblia lobengkel. Me ngokiu a website er kid, el meliuekl er a beluulechad, e kede ngmai a kuk betok er a 230 el ongit el kirel a omesubel a Biblia er a bek el sils! Me a omesubel a Biblia er a delongelel a chad me a Sioning a kmal klou a ultutelel!

14. A doltirakl er a ulekrael er a Jesus el ngar a Mateus 28:19, 20, e ngkired el mora tkurrebab el sebeched el mekerang, e ngera uchul?

¹⁴ Monguiu er a Mateus 28:19, 20. Sel dosuub a Biblia lobengterir a rechad, e kede melasem er a tkurrebab el sebeched el ‘meruul er tir el mo obengkel [a Jesus], . . .  e olisechakl er tir me bo loltirakl a ikel rokui el bla ledu er kid.’ Ngkmal kired el ngosuterir a rechad el mo medengelii a klungel a ultutelel a lengiltii el mo mesiou er a Jehovah e lolengeseu el melisiich er a Rengedel. Me ngbelkul a kmo kede melasem omeksemeriar a rengrir me bo lekengei er a klemerang lokiu sel loltaut a tekoi el lesuub, e bo letibir a klengar er tir el mora Jehovah, e dirrek bo lemetecholb. Tiaikid a di ta el rolel e ngsebechir el mo suobel er sel sils er a Jehovah.​—1 Pe. 3:21.

15. Ngdikea taem el dokerang? E ngera uchul?

 ¹⁵ Me ngua dulsaod er a uchei, ngkmal kosekedela taem er chelechang me a ulebengelel tia el blekeradel er a beluulechad. Tiaikid a uchul me ngkired el melasem lolengeseu er a rechad el mo oltaut er a klengar er tir aike el tekoi el lesuub, e bo letib a klengar er tir el mora Jehovah, e bo lemetecholb el mo ta er a disaiplo er a Kristus. (1 Ko. 9:26) Ngkmal orechudel tia el urered! E le te kmal betok a rechad el dirk kirir el rongesii tia el klumech er a Renged er a uchei er a bo lak a taem.

16. A doltirakl er a Ocholt 18:2, BT, 4, 5, 8, e ngkired el rokui el mekerang? (Dirrek el momes er a footnote.)

¹⁶ Monguiu er a Ocholt 18:2, BT, * 4, 5, 8. Aika el bades a mesaod el kmo ngar ngii a tekoi el Jehovah a mengerechir er ngii er tirke el mengull er ngii. A rokui el mera el Kristiano a kmal kirir el diak longesechusem er tir er a ngii di el tekoi el loruul a Kloul Babilon. A uchei er a bo lodengelii a klemerang a chad el mesuub a Biblia, e nglocha mle chedal a ta er aika el klsuul klechelid. Me nglocha mle teloi a tekoi me a omeruul er ngii el klechelid. Me a lechub e ngmillenget a udoud el mo er ngii el cheldebechel. Me a uchei er bo lsebechel mo ta er a dirkak lemetecholb el publisher, e ngkmal kirel ngubetii el mo diak el chelsechusem er a ngii di el tekoi er sel mle klechelid er ngii. Ngkirel luchesii a babilengel el ngubetii a ngklel me a lechub a llemeltel el mle chedal ngii el klechelid me a lechub e ngii di el cheldebechel el chelsechusem er a Kloul Babilon. *

17. Ngera el rolel a ureor a kmal kirel a Kristiano el mengeroid er ngii er ngii? E ngera uchul?

¹⁷ A mera el Kristiano a kirel kerekikl me a urerel a diak el chelsechusem er a klsuul klechelid. (2 Ko. 6:14-17) El ua tiang, ngdiak bo loureor er a ngii di el ikelesia. Ngdirrek, a Kristiano el oureor el mora ta er a siobai, a diak lekengei el mo meruul a ngii di lureor el melisiich a klsuul omengull. E a lsekum ngar ngii a siobai er ngii, e ngdiak lekengei a ngii di el bid me a lechub e ngureor el kirel a Kloul Babilon. Ngera uchul me ngkmal mesisiich a uldesued el kirel tiang? E le kid el diak lsoad el teloi a urerel me a kngtil a klsuul cheldebechel el ngii a kikiongel er a osengel a Dios.​—Isa. 52:11. *

18. Ngmilekera ta el odam e millemolem el olengesenges a omellach er a Biblia?

 ¹⁸ Betok el rak er a uchei, e a ta el contractor a ullengit er a ta el odam el ngar ngii a siobai er ngii el mo meruul er a kekerei el ureor er a kldaiksang er a ta er a ikelesia er a belual. Ngika el contractor a mle medengei el kmo ngika el odam a di blechoel el melekoi el kmo ngdiak lekengei el mo meruul a ngii di lureor el mora ikelesia. Engdi ngar tiaikid el taem, e ngika el contractor a kmal mlo diak lebetik er a chad el mo meruul er tia el ureor. Me nguaisei, engdi ngika el odam a di mle mesisiich a uldesuel loltirakl a omellach er a Biblia, e dimlak lekengei el mo meruul er tia lureor. Me a ta el sandei er a uriul, e a simbung er sel beluu a tilobed lolecholt er a siasing er a ta er a daiksang el meredem er a kerus er a ikelesia. Me oleko ngika lodam a mlo diak loltirakl a omellach er a Biblia, e ngulterekokl sel siasing el ngar a simbung er sel beluu el mlo siasing er ngii. Me ka di molatk er a metemellang el chisel er a delongelir a rekldemel el Kristiano! Me a lmuut el tang, ngmo uangera uldesuel a Jehovah el kirel tiang?

19-20. (a) Ngera kede mla suub? (b) E ngera dirk kired el mo mesuub?

¹⁹ A doltirakl a ulaoch er a Biblia, e sel kot el klou el tekoi el kmedu el mo tmaut a sel taem el remengeteklel a beluulechad a mo oltobed er a subed el kmo “ng budech ma rokui el tekoi a di ungilbesul.” Engdi ngokiu a tekoi el Jehovah a mla osisecheklid er ngii, e kede medengei el kmo a renged er tia el beluulechad a kmal diak lsebechel toketekii a mera el budech el diak a ulebengelel. Me ngkired el mekerang er a uchei er a leduubech tia el tekoi me a di mereched el telemall lebo er ngii? A Jehovah a mengerechir er kid el mo melemolem el omerk er a klumech er a Renged e dolasem el meruul er a remo disaiplo er a Kristus. E osisiu el taem, e ngkired el mengeroid er kid me lak bo dechelsechusem er a ngii di el klsuul klechelid. E tiang a belkul a kmo ngkired el tuobed el mo diak dechedal a Kloul Babilon, e diak dekengei el meruul a ngii di el ureor el chelsechusem er ngii.

²⁰ Ngar ngii a lmuut el bebil er a tekoi el mo duubech er a ulebengelel a “uriul sils.” Ngdirrek el ngar ngii a lmuut el bebil er a tekoi el Jehovah a mengerechir er kid el mo meruul. Me aikang ngera el tekoi, e mekera dongetmokl er kid el kirel a rokui el tekoi el kmedu el mei? Aikang a bo dosaod er a ongingil el suobel.