1. Luholo lutshi tudi mujiya egi tudi mujinga diago mu “masugu a gisugishilo”?

GILA wavalewe gungima dia 1914, jiya egi monyo waye wagasue, wakhala gaye mu “masugu a gisugishilo” gia mavu awa. (2 Tim. 3:1) Mukut’etu agasue tuanavua mene jia ndaga jiazuelele Yesu egi, mbajitagenesewa mu masugu a gisugishilo. Mukatshi dia ndaga jiene, tuajiya gutanga ita, nzala, gudigita gua mavu, misongo, gutuna gutumagela mikhuala ya Nzambi, nu gusagesewa gua akombeledi a Yehowa. (Mat. 24:3, 7-9, 12; Luka 21:10-12) Luko, tuanamona athu mutshita ndaga gifua luholo luadiangele guzuela mupostolo Phaula. (Tala galuanda “ Makalegelo Adi Nawo Athu Mangingo.”) Esue akombeledi a Yehowa, tudi mujiya diago egi tudi gu gisugishilo gia “masugu awa a gisugishilo.”—Mika 4:1.

2. Mihu itshi tudi naye gukamba kueteya?

² Sendese mu 1914, ivo yavula yabalega gale. Idi mumonesa egi tuaheta lume gu gisugishilo gia “masugu a gisugishilo.” Luholo gisugishilo gia mavu awa giasuena diago hehi, tudi naye gujiya kueteya gua mihu eyi ya ndando: Ndaga jitshi mbajikalegewa gu gisugishilo gia “masugu a gisugishilo”? Itshi Yehowa adi gututoga ha gutshita gutuama egi ndaga jiene jikalegewe?

3. Ha gutadila profesi idi mu 1 Tesalonike 5:1-3, mbimbi jitshi mbajizuela mafumu a ha mavu awa?

³ Tanga 1 Tesalonike 5:1-3. Mupostolo Phaula udi muzuelela “lusugu lua Yehowa.” Ndaga jidi gutuama nu gungima dia verse eji, jidi mumonesa egi lusugu lua Yehowa ludi sungi. Sungi  yene mbayisendesa nu gushiyiwa gua “Babilone Yakoma,” ikombelelo yagasue ya mambo, nu mbayisuga nu ita ya Armaguédon. (Yat. 16:14, 16; 17:5) Gutuama egi “Lusugu lua Yehowa” lusendese, athu mbaazuela egi tudi mu “guhuima nu ubambi!” Matangua ako, mafumu a ha mavu awa ana gukalegela mbimbi jia luholo lumoshi nu eji tangua ana guzuelela gudivua guabonga gua ifutshi. * Uvi, mbimbi “guhuima nu ubambi” jidi muzuelela Biblia mbajikhala jia gudisha. Mukunda natshi? Tangua mbaazuela ngenyi, athu mbaatangiza egi mafumu a ha mavu awa ahetesa guhuima ha mavu. Uvi mu tangua diene, “lamba diakola” mbadisendesa, nu mbayikhala “gushiyiwa gua gisagumuisa.”—Mat. 24:21.

4. (a) Itshi tudi munengena gumona mu ndaga yatadila “guhuima nu ubambi”? (b) Itshi tudi mujiya mukunda nu ndaga yene?

⁴ Gudi nu ndaga tudi mujiya jiatadila mbimbi eji “guhuima nu ubambi.” Uvi, gudi nu ndaga jiko tushigo mujiya. Tushigo mujiya ndaga mbajituma mafumu a ha mavu awa ha guzuela mbimbi jiene, nu luholo mbaajizuela. Luko, tushigo mujiya gula mbimbi jiene mbajizuelewa iphungu yavula, nga ndo gula mbajizuelewa phamba giphungu gimoshi. Uvi tudi mujiya egi: Mafumu a ha mavu awa ajiyilego nga hazonda gubata guhuima ha mavu agasue. Hene, tuhuigiwago gu mbimbi jiawo. Biblia idi gututoga ha gunengena gutagenesewa gua mbimbi jiene. Mbayikhala gijiyishilo gidi mumonesa egi “lusugu lua Yehowa” ludi mutshigina gusendesa!

5. Luholo lutshi 1 Tesalonike 5:4-6 idi gutukuatesa ha gudilondega mukunda nu “lusugu lua Yehowa”?

⁵ Tanga 1 Tesalonike 5:4-6. Mbimbi jia Phaula jidi gutumonesa ndaga tudi naye gukalagala ha gudilondega mukunda nu “lusugu lua Yehowa.” Tushigo naye ‘gubanda tulo gifua mudi athu ako mutshita, uvi tudi naye gukhala gikole-kole.’ Tufezegese gale. Tudi naye gutema hagula tudinginyisago mu ndaga jia politike jia ha mavu awa. Handaga gula tuadinginyisa mu ndaga jia politike, mbatudibuisa ‘athu a ha mavu awa.’ (Yone 15:19) Tudi mujiya egi phamba Ufumu wa Nzambi mbawuhetesa athu guhuima ha mavu agasue.

6. Tudi naye gukuatesa athu ha gutshita itshi? Mukunda natshi?

⁶ Luko, tudi naye gukuatesa athu ako ha gujiya ndaga jiazuelele Biblia egi mbajikalegelewa ha mavu mu masugu adi muza. Tudi naye guaalongesa henyaha handaga tangua lamba diakola mbadisendesa, mbatukhadigo luko nu tangua dia gukuatesa athu ha gukombelela Yehowa. Gishina giene tudi naye gulongesa henyaha! *

7. Itshi Yehowa adi gututoga ha gukalagala mangino?

⁷ Yehowa udi gututoga ha gudihana muavula mu mudimo wa gulongesa handaga tangua  diasala diazonda hagula egi “lusugu” luenji luze. Tudi naye gutshita yagasue ha “gukhala tangua diagasue nu ndaga jiavula jia gutshita mu mudimo wa Fumu.” (1 Kol. 15:58, NWT) Yesu watuwambelele gutuama ndaga tudi naye gutshita. Tangua gazuelele ndaga jiagasue jiakhalele naye gubua mu masugu a gisugishilo, wazuelele luko egi: ‘Lukuma luabonga ludi naye gudianga gulongesewa mu ifutshi yagasue.’ (Mako 13:4, 8, 10; Mat. 24:14) Jiya egi: Tangua wana guya mulongesa lukuma luabonga, wana gukuatesa ha gutagenesa profesi eyi ya Biblia.

8. Luholo lutshi tudi mujiya egi mudimo wa gulongesa Ufumu udi muya gutuama?

⁸ Luholo lutshi mudimo wa gulongesa Ufumu udi muya gutuama? Givo giagasue, athu avula ana guvua lukuma luabonga lua Ufumu. Tangiza gale luholo alongeshi adi muvula mu masugu awa a gisugishilo. Mu 1914, alongeshi akhalele 5155 mu ifutshi 43. Mangino, alongeshi adi 8,5 milio mu ifutshi 240! Uvi, mudimo wetu khenji uhua galego. Tudi naye gulandula guwambela athu egi phamba Ufumu wa Nzambi mbawumanesa malamba a athu.—Ngi. 145:11-13.

9. Mukunda natshi tudi naye gulandula gulongesa lukuma luabonga lua Ufumu?

⁹ Mbatulandula gulongesa Ufumu uu nu tangua Yehowa mbaazuela egi guahua. Matangua guvula gutshi asala hagula athu ajiye Yehowa Nzambi nu Yesu Klisto? (Yone 17:3) Tushigo mujiya. Tudi mujiya phamba egi, gutuama egi lamba diakola disendese, athu “adi nu mitshima yatagana ha guheta monyo wa mayilago” ajiya gutshigina lukuma luabonga. (Makal. 13:48, NWT) Luholo lutshi tuajiya gukuatesa athu ene hagidi gale tangua?

10. Ukuateshi utshi wana gutuhana Yehowa ha gulongesa athu giamatshidia?

¹⁰ Mu njila ya ulondegi wenji, Yehowa wana gutuhana ima yagasue tudi nayo funu ha gulongesa giamatshidia. Tufezegese gale. Phoso yagasue, tuana guheta formasio mu gudibungisa gua mukatshi dia phoso. Gudibungisa guene guana gutukuatesa ha gujiya mbimbi jia guzuela mu gudimona gua thomo nga mu tangua tudi muvutugila muthu. Guana gutulongesa luko luholo lua gulongesa athu Biblia. Organizasio wa Yehowa wana gutuhana nji Ikadigilo ya Gulongesela Biblia. Ikadigilo yene yana gutukuatesa ha . . .

•   gusendesa guta maga nu athu,

• guhana athu nzala ya gutshigina giamatshidia,

• gutuma athu ha gutshigina gujiya Biblia muavula,

• gulonguga nu athu Biblia,

• guwambela athu anyi asuanguluga nu giamatshidia ha gungina mu site internet yetu, nu ha guza mu Inzo ya Ufumu.

Gukhala nu ikadigilo eyi gudi mulonga wawaha. Uvi ndaga yabalega ndando idi guyikalegela. * Gungima dia guta maga nu muthu wasuanguluga nu giamatshidia, muhane trakte nga zulunalu hagula asale mutanga uu nu lusugu mbamudimona nenji luko. Tudi nu ginemo gia gudihana muavula ha gulongesa Ufumu mbeji yagasue.

11. Mukunda natshi yalondewe egi athu alonguge Biblia mu jw.org?

¹¹ Yehowa wana gukuatesa luko athu ha gujiya giamatshidia mu njila ya Gulonguga Biblia mu internet mu jw.org^®. Mukunda natshi yalondewe egi athu alonguge Biblia mu jw.org? Mbeji yagasue, athu avula ana gungina mu internet ha gukamba gulonguga Biblia. Ngenyi gulonguga gua Biblia mu jw.org guajiya guaakuatesa ha gujiya giamatshidia gia Mbimbi ya Nzambi. Athu ako wana guta nawo maga, ajiya gutuna egi waalongese Biblia. Gula idi ngenyi, adijige luholo lua gulonguga Biblia mu jw.org. * Gula luholo ludi guene, awambele ha gungina mu jw.org ha gulonguga mu zuelelo ana gukotelesa muabonga.

12. Gulonguga gua Biblia mu jw.org guajiya gukuatesa muthu ha gujiya itshi?

¹² Gulonguga gua Biblia mu jw.org guana guzuelela malongo awa: “Biblia nu Fumi’ayo,” “Athu Biblia Idi Muzuelela,” nu “Mene jia Biblia Jidi Muhana Felela.” Gulonguga gua Biblia mu jw.org guajiya gukuatesa muthu ha gujiya:

• Luholo lutshi Biblia yajiya gukuatesa muthu

• Yehowa, nu Yesu, nu anjelo adi akuatshi

• Mukunda natshi Nzambi afugile athu

• Mukunda natshi tuana gumona malamba, nu mukunda natshi gubola gudi guene

Malongo awa ana gumonesa nji luholo Yehowa . . .

• mbaamanesela malamba nu gufua,

• mbaafuzumuna athu

• mbaakatula ufumu wa athu ha mavu awa ha guhaga Ufumu wenji.

13. Gutuma muthu ha gulonguga Biblia mu jw.org guakotelesa egi tubembe gulonguga nu athu Biblia ba? Kotelesa.

¹³ Gutuma muthu ha gulonguga Biblia mu jw.org gushigo mukotelesa egi tubembe gulonguga nu athu Biblia. Yesu watuhanele ginemo giagubuisa athu alandudi. Tudi nu felela egi athu anasuanguluga nu giamatshidia, mbaangina mu jw.org, mbaasuanguluga nu malongo ene, nu mbaatshigina gulonguga ndaga jiavula. Gula idi ngenyi, athu ene ajiya gutshigina gulonguga Biblia nu Matemue a Yehowa. Gu gisugishilo gia longo diagasue, adi muwambela athu ha gutoga egi Temue wa Yehowa aze guaalongesa Biblia. Lusugu luagasue, athu gubalega 230 ha mavu agasue ana gungina mu site yetu jw.org ha gutoga egi Matemue a Yehowa a alongese Biblia! Gulonguga Biblia nu Temue wa Yehowa gudi nu ndando!

14. Ha gutadila mbimbi jiazuelele Yesu mu Matayo 28:19, 20, itshi tudi naye gukalagala ngolo ha gutshita? Mukunda natshi?

¹⁴ Tanga Matayo 28:19, 20. Tangua tudi mulongesa Biblia, tudi naye gukalagala ngolo ha ‘gubuisa athu alandudi . . . , nu guaalongesa  ha gutumagela ndaga jiagasue jiazuelele Yesu.’ Tudi naye gukuatesa athu ha gujiya egi idi nu ndando ha gukombelela Yehowa nu gutumagela Ufumu wenji. Yakotelesa egi tudi naye gukuatesa athu ha gutumagela ndaga adi mulonguga, nu ha gudihana gudi Yehowa mu gisambu, nu ha gubatijiwa. Phamba yene adi naye gutshita ha guhuluishiwa mu lusugu lua Yehowa.—1 Phet. 3:21.

15. Luholo tuasala nu tangua diazonda, itshi tudi naye gukalagala? Mukunda natshi?

¹⁵ Gifua luholo tuayimonyi mu paragrafe jiabalega, guasala tangua diazonda diago hagula gisugishilo gia mavu awa gize. Hene, tushigo naye gulunduga gulonguga Biblia nu athu ashigo musombegesa makalegelo awo ha gumonesa egi atshigina gukombelela Yehowa. (1 Kol. 9:26) Tuasala nu tangua diazonda ha gukalagala mudimo wetu! Gudi nu athu avula adi naye guvua lukuma luabonga lua Ufumu gutuama egi gisugishilo gize.

16. Ha gutadila Yatuwuwe 18:2, 4, 5, 8, itshi tudi naye gutshita mukut’etu agasue? (Tala nji mbimbi goshi’a diyiji.)

¹⁶ Tanga Yatuwuwe 18:2, 4, 5, 8. Verse eji jidi muzuelela ndaga iko Yehowa adi mutoga akombeledi enji ha gutshita. Aklisto agasue a giamatshidia ashigo naye gudibungisa nga hazonda nu Babilone Yakoma. Yajiya gukhala egi gutuama dia gujiya giamatshidia, tuakhalele mu gikombelelo gia mambo. Tuakhalele muya mu gikombelelo giene, nu tuakhalele gudihana muavula mu midimo yagio, nga ndo tuakhalele muhana falanga ha gugikuatesa. Uvi gutuama dia gubua mulongeshi udi khenji gabatijiwa galego, muthu udi naye guzoga mu gikombelelo gia mambo nu gutuna ndaga jiagasue jia gikombelelo giene. Udi naye gusonega mukanda nga guwambela mafumu a gikombelelo gienji egi muene wazoga mu gikombelelo giawo, nu gashigo mu ulondegi wagasue udi gudivua nu Babilone Yakoma. *

17. Midimo ya luholo lutshi Muklisto adi naye gutuna? Mukunda natshi?

¹⁷ Muklisto wa giamatshidia udi naye gukamba gujiya gula mudimo wenji wanago gudivua nu gikombelelo gia mambo nga mu ndaga imoshi. (2 Kol. 6:14-17) Muklisto gashigo naye gutshigina gukalagala mudimo umoshi ngenyi mukunda nu gikombelelo gia mambo. Luko, Muklisto wana gutshita mudimo mu société imoshi, gashigo naye gutshigina guya mukalagala mudimo wa gutunga nga gulondega inzo ya gikombelelo gia mambo. Gula Muklisto udi nu société yenji, ashigo naye nji gutshigina gukalagala mudimo mukunda nu Babilone Yakoma. Mukunda natshi tudi naye gutuna nu mutshima umoshi? Handaga tushigo naye gudinginyisa  nga gutshita ndaga jidi gudivua nu ikombelelo ya mambo yana gukhala ya usala gu meso a Nzambi.—Yesh. 52:11. *

18. Luholo lutshi phangi’etu mumoshi ganemesele mikhuala ya Biblia gu mudimo wenji?

¹⁸ Mukulu mumoshi wakhalele mutshitshi wa mudimo wa gukhokha mito ya jinzo. Amutamegele ha gulondega muto wa inzo ya gikombelelo gia mambo mu dimbo diawo. Muthu wamutamegele wakhalele mujiya egi phangi’etu wana guzuela egi gajiyilego gutshita mudimo gu inzo ya gikombelelo gia mambo. Uvi henyaha muthu muene gahetelego muthu muko wajiya gutshita mudimo wene. Ikhale ngenyi, phangi’etu wanemesele mikhuala ya Biblia, watunyine mudimo wene. Mu phoso yalanduile, journal ya mu dimbo diawo yazolele foto ya mu muthu mumoshi udi muhaga mutshi wa gudikikisa (croix) holu dia inzo yene ya gikombelelo. Henyaha, nga phangi’etu washiyile mikhuala ya Yehowa, nga foto yenji yazogele mu journal. Tangiza luholo yakhalele naye gubolesa lukuma luenji gudi aphangi’enji Aklisto! Tangiza nji luholo Yehowa akhalele naye gudivua.

19-20. (a) Itshi tualonguga mu longo edi? (b) Ndaga jiko jitshi tudi naye gujiya?

¹⁹ Biblia idi muzuela egi gualeha ndo, gudi nu ndaga jiakoma mbajitagenesewa: mafumu a ha mavu awa mbaazuela egi tudi mu “guhuima nu ubambi.” Tudi muhana Yehowa mvudi yavula luholo atulongesa ndaga eji. Tudi mujiya egi athu mbaashigo muhetesa guhuima gua giamatshidia nu gua mayilago ha mavu awa. Uvi, itshi tudi naye gutshita gutuama egi ndaga eji jize, nu gutuama egi gushiyiwa gua gisagumuisa guze? Yehowa udi gututoga ha gudihana muavula mu mudimo wa gulongesa Ufumu nu gubuisa athu avula alandudi. Luko, tudi naye gutuna gudinginyisa mu ndaga jiagasue jia ikombelelo ya mambo. Yakotelesa egi, tudi naye guzoga mu ulondegi wagasue wa ikombelelo ya mambo, nu gutuna midimo yagasue idi gudivua nu ikombelelo yene.

²⁰ Gudi nu ndaga jiko jidi naye gukalegelewa gu gisugishilo gia “masugu a gisugishilo.” Gudi nji nu ndaga jiko jidi gututoga Yehowa ha gutshita. Ndaga jitshi? Luholo lutshi tuajiya gudilondega mukunda nu ndaga mbajikalegewa gualeha ndo? Tuza guyimona mu longo dialandula.