1. ¿Imaynapitaj yachanchej ‘qhepa pʼunchaykunaj’ tukukuyninpi kausashasqanchejta?

KAY 1914 watamanta qhepaman nacekorqanchej chayqa, nacekusqanchejmantapacha ‘qhepa pʼunchaykunapi’ kausashanchej (2 Tim. 3:1). Jesusqa nerqa qhepa pʼunchaykunapi guerras, yarqhaykuna, terremotos, wañuchej onqoykuna ima kananta. Nillarqataj runas astawan sajrayanankuta, Diospa kamachisnin qhatiykachasqas kanankuta, waj imas kananta ima. Tukuy chay imastataj noticiaspi uyarinchej (Mat. 24:3, 7-9, 12; Luc. 21:10-12). Apóstol Pablopis qhepa pʼunchaykunapi imaynachus runas kanankuta nerqa (“ ¿Imaynataj kay tiempopi runas kanku?” nisqa recuadrota leeriy). Kay tiempomanta runastaj ajinapuni kanku. Jehová Diosta sirvejkunaqa, sutʼita yachanchej ‘qhepa pʼunchaykunaj’ tukukuyninpi kausashasqanchejta (Miq. 4:1).

2. ¿Ima tapuykunamantaj kutichinanchej tiyan?

² Kay 1914 watamantapacha ashkha watasña pasan. Chayrayku nisunman ‘qhepa pʼunchaykunaj’ tukukuyninpiña kashasqanchejta. Kay sajra mundoj tukukuynenqa, may qayllitapiña kashan. Chayrayku kay tapuykunaj kutichiyninta yachananchej tiyan: ¿Imastaj kanqa kay ‘qhepa pʼunchaykunaj’ tukukuyninpi? Chay tiempo chayamunankama, ¿imata ruwananchejtataj Jehová Dios munan?

3. 1 Tesalonicenses 5:1-3 nisqanman jina, ¿imatá gobiernos nenqanku?

³ (1 Tesalonicenses 5:1-3 leey). Apóstol Pabloqa ‘Jehová Diospa pʼunchaynin’ nispa, uj tiempomanta parlasharqa. Chay tiempoqa qallarenqa, gobiernos ‘Jatun Babiloniata’, nisunman tukuy llulla religionesta chinkachinankupaj oqharikojtinku,  tukukonqataj Armagedonpi (Apo. 16:14, 16; 17:5). ‘Jehová Diospa pʼunchaynin’ qallarinanpajña kashajtin, kay mundomanta gobiernosqa nenqanku: “Tukuy imapis allillan, ni imamanta llakikuna kanchu”, nispa. Chayta nenqanku, mundontinpi runaspaj allin kausayta apamusqankuta yuyasqankurayku. Kay tiempopi gobiernosqa, nacionespura allinta kausakunankumanta parlajtinku, casi kikin palabrasllatataj oqharinku. * Jinapis 1 Tesalonicenses 5:3 versiculoqa, mana kay tiempopi gobiernospa nisqankumantachu parlashan. ¿Imaraykutaj chayta ninchej? Imajtinchus chay versículo juntʼakojtenqa, ashkha runas creenqanku gobiernos mundontinpi allin kausayta sayarichisqankuta. Jinapis chayllapi “manchay ñakʼariy” qallarenqa, paykunaj tukukuyninkutaj “ujllata chayamonqa” (Mat. 24:21).

4. 1) ¿Imastataj mana yachanchejchu “tukuy imapis allillan, ni imamanta llakikuna kanchu” nisqa profeciamanta? 2) ¿Imatataj sutʼita yachanchej?

⁴ “Tukuy imapis allillan, ni imamanta llakikuna kanchu” nisqa profeciamanta, wakin imasta yachanchej. Chaywanpis mana yachanchejchu, imaraykuchus gobiernos chayta ninankuta, imaynatachus chayta ninankutapis. Nillataj yachachejchu, uj kutillatachus chayri kutin kutitachus chayta ninankuta. Jinapis sutʼita yachanchej, chay nisqankuta mana creenanchejchu kasqanta. Imajtinchus gobiernosqa manapuni allin kausayta apamonqankuchu. Astawanpis chayta nejtinku, sutʼita yachasun “Jehová Diospa pʼunchaynenqa” qallarinanpajña kashasqanta.

5. ¿Imaynatá 1 Tesalonicenses 5:4-6 yanapawanchej ‘Jehová Diospa pʼunchayninpaj’ wakichisqa kanapaj?

⁵ (1 Tesalonicenses 5:4-6 leey). Apóstol Pabloqa ‘Jehová Diospa pʼunchayninpaj’ wakichisqa kanapaj, imatachus ruwananchejta niwanchej. Pay nerqa: “Ama chay ujkuna jinaqa puñunachu. Astawanqa rijchʼarisqa, yuyayninchejpitaj kana”, nispa. ¿Imaynatá chayta ruwasunman? Ujqa kanman, politicaman mana chhapukunapaj allinta qhawarikuspa. Politicaman chhapukuspaqa, “kay mundomanta” runas jina kashasunman (Juan 15:19). Noqanchejtaj yachanchej, Diospa Gobiernollan allin kausayta apamunanta.

6. ¿Imajtintaj runasta usqhayllata yanaparina tiyan?

⁶ Mana noqallanchejchu rijchʼarisqas kananchej tiyan. Runastapis yanaparinanchej tiyan ‘rijchʼarisqas’ kanankupaj. Chaytataj ruwasunman, imatachus Biblia kay mundoj tukukuyninmanta nisqanta yachachimuspa. Manchay ñakʼariy qallarejtin, runasqa niña Jehová Diosmanta yachakuyta atenqankuchu. Chayrayku usqhayllata predicamunanchej tiyan. *

7. ¿Imata ruwananchejtataj Jehová Dios munan?

⁷ ‘Jehová Diospa pʼunchaynin’ chayamunanpajqa, pisi tiempollaña faltan. Jehová Diostaj tukuy atisqanchejta predicamunanchejta munan. Chayrayku “Señorpa ruwayninpi ashkhata” llankʼanallapuni tiyan (1 Cor. 15:58). Jesusqa qhepa pʼunchaykunapi imaschus kananta willashaspa, Diospa kamachisnin imatachus ruwanankutawan nerqa. Pay nerqa: “Ñaupajtaqa sumaj willaykunaraj tukuy laya runasman willakunan tiyan”, nispa (Mar. 13:4, 8, 10; Mat. 24:14). Sapa predicaj llojsejtinchej, chay profeciata juntʼashanchej.

8. ¿Imaynapí yachanchej Diosmanta willajkuna yapakushasqankuta?

⁸ Sapa wata, astawan ashkha runas Diospa Gobiernonmanta sumaj willaykunata uyarinku. Kay qhepa pʼunchaykunapi Diosmanta willajkunaqa, mayta yapakunku. Kay 1914 watapeqa 5.155 publicadores karqanku, 43 suyuspitaj predicasharqanku. Kunantaj 8 millones 500 mil jinaña kanchej, 240 suyuspitaj. Jinapis llankʼayninchejqa niraj tukukunchu. Runasman Diospa Gobiernollan allin kausayta apamunanta willamunallapuni tiyan (Sal. 145:11-13).

9. ¿Imaraykutaj Diospa Gobiernonmanta willamunallapuni tiyan?

⁹ Jehová Dios “kaykamalla” ninawanchejkama, predicanallanchejpuni tiyan. ¿Mashkha tiempotawantaj runas Jehová Diosta, Jesucristotawan rejsiyta atenqanku? (Juan 17:3). Mana yachanchejchu. Jinapis yachanchej, “manchay ñakʼariy” tiempoqa niraj qallarishasqanta. Chaykamataj “wiñay kausayta japʼinankupaj allin sonqoyoj” kajkunaqa, sumaj willaykunata japʼikuyta atinkuraj (Hech. 13:48). Qhepan parrafospi qhawarisunchej, tiempo kashajtillanraj imaynatachus chay runasta yanaparinata.

10. ¿Ima yanapastataj Jehová Dios qowanchej runasman yachachinapaj?

¹⁰ Jehová Diosqa runasman yachachimunapaj llajtannejta tukuy imata qoshawanchej. Payqa sapa semana Cristiano Kausayninchej tantakuypi yachachiwanchej, imaynatachus runasman predicanata, imaynatachus revisitasta ruwanata, imaynatachus runasman Bibliamanta yachachinata ima. Chantapis Jehová Diosqa, Bibliata estudiachinapaj yanapasta qollawanchejtaj. Chaytaj yanapawanchej:

•   runasman Diosmanta willarinapaj,

• runas uyariyta munanankupaj jina parlarinapaj,

• runas astawan yachakuyta munanankupaj jina parlarinapaj,

• runasman Bibliamanta yachachinapaj,

• yachakuyta munajkunata Internetpi jw.org^® nisqaman yaykunankuta ninapaj, tantakuykunaman wajyarinapaj ima.

Bibliata estudiachinapaj yanapastaqa, sumajta apaykachayta yachananchej tiyan. * Ichapis predicashajtinchej uj runa sumajta uyariwanchej. Payman uj tratadota chayri revistata saqesun chayqa, chay runaqa kutinanchejkama chayta leeyta atenqa. Sapa ujninchej, runasman tukuy atisqanchejta sapa killa willamunanchej tiyan.

11. Internetnejtapis Bibliamanta yachakuyta atiwaj nisqa sección, ¿imapajtaj wakichikun?

¹¹ ¿Imaynasmantawantaj Jehová Dios runasta yanapashan payta rejsinankupaj? Internetpi jw.org nisqa paginanchejpi, Internetnejtapis Bibliamanta yachakuyta atiwaj nisqa sección tiyan. * ¿Imapajtaj chay wakichikun? Sapa killa mundontinpi may chhika runas, Bibliamanta yachakuyta munaspa Internetman yaykunku. Paginanchejpi chay secciontaj, runas Bibliamanta yachakunankupaj wakichikun. Wakin runasqa Bibliamanta yachachinanchejta nejtinchej, “amallaraj” niwanchej. Chay runasmanqa entiendesqan parlaypi chay seccionta rikuchisunman, chayri chay lugarman cheqanta yaykunanpaj direccionta apachisunman.

12. Bibliata estudianapaj wakichikun chay seccionpi, ¿imasmantataj runas yachakunkuman?

¹² Bibliata estudianapaj wakichikun chay seccionpi, runasqa yachakunkuman: Bibliamanta, pichus Bibliata ruwachisqanmanta, pikunamantachus Biblia parlasqanmanta, sumaj kausay kananmanta ima. Chaykunata estudiaspa, runasqa kay imasta yachakuyta atinkuman:

• imaynatachus Biblia yanapawasqanchejta,

• pikunachus Jehová Dios, Jesús, ángeles ima kasqankuta,

• imaraykuchus Dios runasta ruwasqanta,

• imaraykuchus ñakʼariy, sajra kausay ima kasqanta.

Chantapis runasqa yachakullankumantaj:

• imaynatachus Jehová Dios ñakʼariyta, wañuytawan chinkachinanta,

• imaynatachus Jehová Dios wañusqasta kausarichimunanta,

• imaynatachus Jehová Dios kay mundomanta gobiernosta chinkachispa, Gobiernonta sayarichinanta.

13. Bibliata estudianapaj Internetpi uj sección kajtinpis, ¿runas uj hermanowan chayri uj hermanawan estudianankupunichu kasqa?

¹³ Runas Internetnejta Bibliata estudiajtinkupis, uj hermanowan chayri uj hermanawan estudianankupuni tiyan. Jesusqa runasta yachachisqasninman tukuchinanchejta kamachiwanchej. Chantapis Internetpi Bibliata estudianapaj seccionninchejqa, runas yachakusqankuta jatunpaj qhawanankupaj wakichikun, astawan yachayta munanankupaj ima. Ajinata ruwaj runastaj, ichapis wasinkupi Bibliamanta yachachinata munanqanku. Imaraykuchus sapa yachaqanaj tukukuyninpi, runaman nin uj testigo wasinpi visitarinanta mañakunanta. Sapa día 230 runas jina jw.org nisqanejta Bibliamanta yachachinankuta mañakunku. Bibliata estudianapaj Internetpi uj sección kajtinpis, runasqa uj hermanowan chayri uj hermanawan yachakunankupuni tiyan.

14. Mateo 28:19, 20 nisqanman jina, ¿imata ruwanapajtaj kallpachakunchej, imaraykutaj?

¹⁴ (Mateo 28:19, 20 leey). Jesús nerqa: “Runasta yachachisqasniyman tukuchimuychej, [...] imastachus noqa kamacherqaykichej, chayta paykunapis kasukunankupaj”, nispa. Runasman Bibliamanta yachachishaspaqa, chayta ruwanapaj kallpachakunanchej tiyan. Paykunaqa entiendenanku tiyan, Jehová Diosta yupaychananku kasqanta. Chantapis runasta yanapananchej tiyan: yachakusqankuman jina kausakunankupaj, Jehová Diosman kausayninkuta qopunankupaj, bautizakunankupaj ima. Chayta ruwajtillanku, Jehová Diospa pʼunchayninmanta salvakuyta atenqanku (1 Ped. 3:21).

15. ¿Imapajtaj niña tiempo kanchu, imaraykutaj?

¹⁵ Yachakunchej jina, kay mundoj tukukuynin chayamunanpaj pisi tiempollaña faltan. Chayrayku niña tiempo kanchu, mana ñauparej estudiosta yachachimunallapajpuni (1 Cor. 9:26). Kay mundoj tukukuynenqa qayllitapiña kashan, ashkha runastaj Diospa Gobiernonmanta uyariyta necesitanku. Chayrayku usqhayllata willamunanchej tiyan.

16. Apocalipsis 18:2, 4, 5, 8 nisqanman jina, ¿imatataj ruwananchej tiyan? (Sutʼinchayninta qhawariy).

¹⁶ (Apocalipsis 18:2, 4, 5, 8 leey). Chay versículos nisqanman jina, Jehová Diosqa waj imastawan ruwananchejta munan. Cheqa cristianosqa Jatun Babiloniamanta tʼaqakunanchej tiyan. Bibliamanta yachakoj runasqa, Jehovata niraj rejsishaspa ichapis llulla religionpi kasharqanku. Paykunaqa ichá cultoman chayri misasman rej kanku. Manachayrí iglesiankoj waj ruwanasninman satʼisqa kasharqanku. Chayrí ofrendasta, diezmosta ima churaj kanku. Paykunaqa predicaj llojsinankupaj, llulla religionmanta tʼaqakunanku tiyan. Bibliamanta yachakojkunaqa iglesiankuman uj cartata apachispa, chaymanta llojsipushasqankuta ninanku tiyan. Chantapis llulla religionpa apaykachasqan organizacionesmanta, chayman rijchʼakoj gruposmanta ima tʼaqakunanku tiyan. *

17. Cheqa cristianos, ¿imastataj mana ruwanchejchu, imaraykutaj?

¹⁷ Cheqa cristianosqa sumajta qhawarikunanchej tiyan, ni trabajaspapis Jatun Babiloniawan chajrukunapaj (2 Cor. 6:14-17). Noqanchejqa mana mayqen iglesiapajpis trabajasunmanchu. Nillataj patronninchej kamachiwanjtinchejpis, iglesiaspaj trabajosta ruwasunmanchu. Uj oficioyoj chayri negocioyoj kanchej chaytaj, mana mayqen iglesiawanpis contratosta japʼikusunchu, nitaj paykunawan trabajayta maskʼasunchu. ¿Imaraykutaj chayta ruwanchej? Imaraykuchus mana Jatun Babiloniaj ruwasqasninman,  nitaj juchasninmanpis chajrukuyta munanchejchu. Paykunaqa Diospa ñaupaqenpi chʼichipaj qhawasqa kanku (Isa. 52:11). *

18. ¿Imatataj uj anciano ruwarqa iglesiapaj uj trabajota ruwananta nejtinku?

¹⁸ Pasaj wataspi, uj contratista uj ancianota iglesiapi uj trabajitota ruwananta nerqa. Chay ancianoqa carpinteriayoj karqa. Hermanonchejqa contratistaman ñaupajtaña nisqa, ni mayqen iglesiapaj trabajosta ruwananta. Jinapis contratistaqa, uj trabajadorta manchaytapuni necesitasharqa. Hermanonchejtaj Bibliaj nisqanta kasukuspa, mana chay trabajota japʼikorqachu. Semananmanqa, chay lugarmanta periodicopi uj foto llojserqa. Chaypitaj uj carpintero iglesiapi cruzta churasharqa. Hermanonchejchus chay llankʼayta japʼikunman karqa chayqa, pay chay periodicopi llojsinman karqa. ¿Imatá congregacionmanta hermanos paymanta ninkuman karqa? Jehová Diosrí, ¿chay hermanoj ruwasqanta allinpajchu qhawanman karqa?

19, 20. 1) ¿Imatataj kay yachaqanapi yachakunchej? 2) ¿Imatataj qhepan yachaqanapi yachakusun?

¹⁹ Biblia nisqanman jina, pisimantawan kay profecía juntʼakonqa: “tukuy imapis allillan, ni imamanta llakikuna kanchu” nispa nikusqan. Jinapis Jehová Diosqa yachachiwanchej, gobiernosqa allin kausayta ni jaykʼaj apamunankuta, apamunku chaypis uj tiempollapaj kananta. ¿Imatataj ruwananchej tiyan niraj chay profecía juntʼakushajtin? Diospa Gobiernonmanta tukuy atisqanchejta willamunallapuni, runastataj Jesuspa yachachisqasninman tukuchimuna. Jehová Diosqa chayta ruwananchejta munan, niraj manchay ñakʼariy qallarishajtin. Chantapis llulla religionesmanta tukuy imapi tʼaqakuna. Chaytataj ruwanchej, llulla religionesmanta llojsipuspa, Jatun Babiloniapaj mana trabajaspa ima.

²⁰ Kay qhepa pʼunchaykunapeqa waj profeciaspiwan juntʼakullanqataj. Jehová Diostaj waj imastawan ruwananchejta munan. ¿Mayqentaj chay profecías kanku? ¿Imaynatataj chaypaj wakichikunanchej tiyan? Chayta qhepan yachaqanapi yachakusun.