1. ¿Imanirtaq nintsik ‘ushanan junaqkunachöna’ kawëkanqantsikta?

1914 wata pasarinqanchö yurikushqa karqa, yurikunqantsikpita patsëmi kë mundupa ‘ushanan junaqninkunachöna’ kawëkarquntsik (2 Tim. 3:1). Kanan witsan imakuna pasakunampaq kaqta Jesus musyatsikunqan cumplikëkanqantaqa, llapantsikmi noticiakunapa wiyarquntsik. Y tsëkunaqa kayan guërrakuna, mallaqë, muyakoq qeshyakuna, mana alli rurëkuna miranqan, patsa feyupa kuyunqan y Diosta sirweqkunata chikir sufritsiyanqanmi, jina juk cösaskunapis pasakïkanmi (Mat. 24:3, 7-9, 12; Lüc. 21:10-12). Jina apostol Pablu musyatsikunqannö portakoq nunakunatapis rikëkantsikmi (rikäri “ ¿Imanötaq kanan witsan nunakuna kayan?” nishqan recuadruta). Jehoväta sirweqkunaqa, segürum kantsik ‘ushanan junaqkunapa ushëninchöna’ kawëkanqantsikta (Miq. 4:1).

2. ¿Ima tapukïkunapa respuestanmantaq yarpachakunantsik?

² 1914 watapita mëtsika watakunana pasashqa këkaptinqa, kanan witsankunaqa “ushanan junaqkunapa” ushëninchönachi këkantsik. Kë munduchö mana alli kaqkuna ushakänampaqqa ichikllanam pishin, tsëmi kë ishkan tapukïkunapa respuestanman yarpachakunantsik: ¿imataq pasakunqa ‘ushanan junaqkuna’ ushariptin? Y tsëyaqqa, ¿imata ruranatataq Jehoväqa shuyaran?

3. 1 Tesalonicensis 5:1 a 3 textuchö ninqannö, ¿imatataq llapan nacionkuna niyanqa?

³ (Leyi 1 Tesalonicensis 5:1-3). Pabluqa ‘Jehoväpa junaqnimpaqmi’ parlarqan. Kë textuchöqa ‘Alläpa Puëdeq Babiloniata’ o juk parlakïchöqa, llapan mana alli religionkunata ushakäratsiyaptinmi  Jehoväpa junaqninqa qallan, y Armagedonchömi usharinqa (Rev. 16:14, 16; 17:5). Jehoväpa junaqnin manaraq qallaptinmi, entëru Patsachö nacionkunaqa “¡yamënam y segürunam kantsik!” niyanqa. Patsachö mandakoqkunaqa, wakin nacionkunawan yamë kawakïta munayanqampaq parlarmi, höraqa tsë palabrakunata utilizäyan. * Peru nacionkuna “¡yamënam y segürunam kantsik!” niyänampaq kaqta Bibliachö willakunqanqa jukläyam kanqa. ¿Imanir? Tsënö niyanqanta wiyëkurqa, nunakunaqa Patsachö gobiernukuna mas següru kawakuyänampaq kaqta lograrishqa kayanqantam creiyanqa. Peru rasumpa kaqchöqa, “alläpa jatun sufrimientum” qallëkunqa y ‘illaqpita ushakëchömi’ usharinqa (Mat. 24:21).

4. (1) “¡Yamënam y segürunam kantsik!” niyänampaq kaqpitaqa, ¿imakunatataq musyantsiktsu? (2) Nacionkuna tsënö niyanqampitaqa, ¿imapitataq cuidakunantsik?

⁴ “¡Yamënam y segürunam kantsik!” nacionkuna imanö niyänampaq kaqtaqa, wakin wakintaqa musyantsikmi. Tsënö kaptimpis, nacionkuna imarëkur o imanö tsënö niyänampaq kaqtaqa manam musyantsiktsu. Jina manam musyantsiktsu juk kutilla o atska kuti tsënö niyänampaq kaqtaqa. Imanö kanan kaptimpis, nunakuna yamëna y següruna kawakuyänampaq nacionkunata gobernaqkuna lograrishqa kayanqantaqa, manam creishwantsu ni tsëkuna engañamänataqa jaqishwantsu. Tsëpa rantinqa, nacionkuna tsënö niyänantaqa shuyarëkantsikmi, y tsëqa ‘Jehoväpa junaqnin’ qallarinampaqna këkanqantam rikätsikunqa.

5. 1 Tesalonicensis 5:4 a 6 textuchö ninqan, ¿imanötaq yanapamantsik ‘Jehoväpa junaqnimpaq’ listu këkänapaq?

⁵ (Leyi 1 Tesalonicensis 5:4-6). ‘Jehoväpa junaqnimpaq’ listu këkänapaq imata ruranapaq kaqtam apostol Pablu consejakurqan. Peqa, “ama wakinkunanöqa punur sïguishuntsu, sinöqa riyaqlla këkäshun y alli juiciuyoq imëpis këkäshun” nirqanmi. Polïtica asuntukunaman mëtikur gobiernukunaman mana qaqänapaqmi cuidakunantsik. Tsëpita mana cuidakushqaqa, ‘mana cäsukoq nunakunanömi’ tikrakurishwan (Juan 15:19). Diospa Gobiernunlla yamë kawakïta apamunampaq kaqtaqa musyantsikmi.

6. ¿Nunakuna imapita altantu kayänampaqtaq yanapëta munantsik, y imanir?

⁶ Tsëkuna pasakunan kaqpitaqa manam noqantsikllatsu altantu këkänantsik, sinöqa wakin nunakuna altantu kayänampaqpis yanapanantsikmi, juk parlakïchöqa, kanan witsan imakuna pasakunampaq kaqta Bibliachö willakunqantam yachatsinantsik. Yarpäshun, alläpa jatun sufrimientukuna qallëkuptinqa, manam Jehoväpita yachakïta puëdiyanqanatsu. Tsëmi Diospita kanan witsankuna yachatsikunantsikqa alläpa urgenti. *

7. Kanan witsan, ¿imata ruranatataq Jehovä munan?

⁷ ‘Jehoväpa junaqnin’ qallëkunampaqqa ichikllanam pishin, y tsë junaq chämunqanyaq pëpita yachatsikur këkänantam Jehoväqa munan. Diospita yachatsikurmi imëkata rurar këkänantsik (1 Cor. 15:58). Kanan witsankuna pasakunampaq kaqta willakurqa, Diosta sirweqkuna imata rurëkänapaq kaqtapis Jesusqa willakurqanmi. Pëmi kënö nirqan: “Jina llapan nacionkunachömi puntataqa alli willakïkunaraq willakushqa kanan” (Mar. 13:4, 8, 10; Mat. 24:14). Këta yarpäshun: Diospita yachatsikoq cada yarqurmi, Jesus ninqan cumplikänampaq yanapakïkantsik.

8. ¿Imanötaq musyantsik Diospa gobiernumpita willakïta mas nunakuna chaskikïkäyanqanta?

⁸ Diospa Gobiernumpita alli willakïkunataqa cada watam mas nunakuna wiyakuyan. Kë ushanan junaqkunachö Diospita yachatsikoqkuna entëru Patsachö ëka miranqantsikta rikärishun. 1914 watachöqa, 43 nacionkunachöran 5.155 yachatsikoqkuna kayarqan. Peru kanan witsanqa 240 nacionkunachö y sitiukunachömi, öchu millon quinientus milpitapis (8.500.000) masna kantsik. Tsënö karpis, Diospita yachatsikïtaqa manaran usharquntsikraqtsu. Imëka problëmakunata Diospa Gobiernunlla ushakätsinampaq kaqtaqa willakurmi sïguinantsik (Sal. 145:11-13).

9. ¿Imanirtaq Diospa gobiernumpita willakur sïguinantsik?

⁹ “¡Këyaqllana!” Jehovä nimanqantsikyaqmi, yachatsikurnin sïguikäshun. Jehoväpita y Jesucristupita nunakuna yachakuyänampaqqa, ¿ëka tiempuraqtaq kan? (Juan 17:3). Manam musyantsiktsu. Imatam sïqa musyantsik, alläpa jatun sufrimientu manaraq qallaptinqa, “imëyaqpis kawakïta chaskiyänampaq kallpachakïkaqkunam” Diospita alli willakïta wiyakïta puëdiyanqa (Hëch. 13:48). ¿Imanötaq tsë nunakunata yanapashun ‘Jehoväpa junaqnin’ manaraq chämuptin?

10. Nunakunata yachatsinapaqqa, ¿imakunawantaq Jehovä yanapamantsik?

¹⁰ Jehoväqa sirweqninkunata pushaqninkunawanmi, nunakunata pëpita yachatsinapaqqa llapan wananqantsikta procurëkämun. Këkunallata yarpärishun: pullan semäna reunionchöqa, nunakunata imanö parlapar qallanapaq, watukaq kutir ima ninapaq y Bibliapita imanö estudiatsinapaqmi cada semäna yachatsimantsik. Jina Jehoväta sirweqkunata pushaqkunaqa,  yachatsikunapaq publicacionkunatam alistayämushqa. Tsëkunaqa këkunachömi yanapamantsik:

• nunakunata parlapar qallanapaq,

• nunakuna masta musyarita munayänampaq,

• maslla yachakïta munayänampaq,

• Bibliapita estudiatsinqantsik höra rasumpa kaqta yachatsinapaq y

• yachakïta munaqkunata, Internetchö päginantsikta rikäyänampaq y Diospita Yachatsikunantsik Wayiman shayämunampaq invitarinapaqmi.

Peru yachatsikunapaq Diosnintsik alistamunqankunataqa utilizänantsikmi. * Këllaman pensarishun: pillawampis wiyakïta munaqwan shumaq parlakurishqa y juk tratäduta o revistata jaqipushqaqa, parlanqantsik asuntupitam pëwan yapë parlanqantsikyaq masllata leyikanqa. Diospita yachatsikïchöqa, llapantsikmi cada killa imëka rurëyoq kanantsik.

11. ¿Imanirtaq Internetpa Bibliata estudiayänampaq päginata rurayämushqa?

¹¹ Bibliapita yachakïta munaqkunata Jehovä juknöpa imanö yanapëkanqanta rikärishun. Wakin idiömakunachöqa, Internetchö jw.org^® päginachömi, Bibliapita yachakïta puëdiyan. * ¿Imapaqtaq tsëtaqa rurayashqa? Llapan killakuna mëtsika waranqa nunakuna Bibliapita Internetpa yachakïta munayaptinmi. Internet päginantsikchö këkaqqa, Diospa Palabrampita rasumpa kaqta yachakuyänampaqmi yanapakun. Diospita parlapanqantsik wakin nunakunaqa, itsa Bibliapita estudiatsinantsiktaqa mana munayanqatsu. Tsënö kaptinqa, Bibliata estudiayänampaq Internet päginantsikchö rikäratsishun o entiendiyanqan idiömachö tsë päginata rikäyänampaq escribirishun.

12. ¿Imakunapitataq Internet päginantsikchö nunakuna yachakuyanqa?

¹² Tsë päginachöqa Bibliapita y escribitseqnimpita, Biblia willakunqan mas reqishqa nunakunapita y shamoq tiempupaq shuyaranqantsik willakïkunatam tarintsik. Tsëkunata estudiarqa, nunakunaqa këkunatam yachakuyanqa:

• Bibliachö këkaq consëjukuna imanö yanapamanqantsikta,

• Jehovä, Jesus y angelkuna pikuna kayanqanta,

• nunakunata Dios imanir kamanqanta y

• sufrimientukuna y mana alli kaq rurëkuna imanir kanqanta.

Jina tsë päginachöqa kë yachatsikïkunapis këkanmi:

• sufrimientukunatawan wanïta Jehovä imanö ushakätsinampaq kaqta,

• wanushqakunata imanö kawaritsimunampaq kaqta y

• imapaqpis mana sirweq gobiernunkunapa rantin Gobiernunta Dios imanö churamunampaq kaqta.

13. ¿Cada nunawan Bibliata estudianantsikpa rantinku Internet päginantsikchö yachatsikïkunaqa këkan? Entienditsikaramï.

¹³ Tsë päginachö këkaq yachatsikïkunaqa, manam cada nunawan Bibliata estudianantsikpa rantin kanampaqtsu rurakämushqa. Jesusqa noqantsiktam mandamarquntsik nunakunata yachatsinapaq. Tsë päginantsikta leyeq nuna Bibliapita yachakï alläpa precisanqanta rikänampaq y masta yachakïta munananllapaqmi rurakashqa. Masta estudiëta munaptinqa, itsa juk wawqi o pani Bibliapita yachatsinanta munarinqa. Internet päginantsikchö cada yachatsikï ushariptinmi, tsë nunata nin juk Testïgu watukananta mañakunampaq. Cada junaqmi, Internet päginantsikpa 230 nunakunapitapis mas Bibliapita yachatsiyänampaq mañakuyan.  Alläpam precisan cada nunata Bibliapita noqantsik yachatsinantsik.

14. Mateu 28:19 y 20 textuchö Jesus mandakunqannö, ¿imata ruranapaqtaq kallpachakuntsik, y imanir?

¹⁴ (Leyi Mateu 28:19, 20). Nunakunawan Bibliata estudiarninqa, Diosta sirwiyänampaq y Jesus llapan mandakunqankunata wiyakuyänampaqmi yachatsinantsik. Jehoväman qaqäyänan y Gobiernunchö yanapakuyänan imanir precisanqantam entienditsinantsik. Tsëtaqa rurayanqa, yachakuyanqanmannö kawarnin, Jehovä Diosllatana sirwiyänampaq änikurnin y bautizakurninmi. Tsëta rurarllam Jehoväpa junaqnin chäramuptinqa salvakuyanqa (1 Pëd. 3:21).

15. ¿Pikunawantaq tiempuntsikta perdishwantsu, y imanir?

¹⁵ Rikärinqantsiknöpis, kë munduchö mana alli kaqkuna ushakäyänampaqqa ichikllanam pishin. Tsëmi Cristu Jesuspa qateqninkuna këta mana munaqkunata yachatsirninqa, tiempuntsikta perdinantsiktsu (1 Cor. 9:26). Diospa Gobiernumpita willakïtaqa, mëtsika nunakunaran wiyayänan y tsëpaqqa, tiempuqa ushakëkannam, tsëmi Diospita yachatsikunantsikqa alläpa urgenti.

16. Revelacion 18:2, 4, 5 y 8 versïculukunachö ninqannö, ¿imatataq llapantsik ruranantsik? Päginapa ura kuchunchö këkaq nötata rikäri.

¹⁶ (Leyi Revelacion 18:2, 4, 5, 8). Kë versïculukunachöqa Jehoväta adoraqkuna ima masta rurayänampaq kaqtam rikantsik. Diosta rasumpa sirweqkunaqa, Alläpa Puëdeq Babiloniapita o juk parlakïchöqa, mana alli religionkunapitam yarqukurinantsik. Itsa Bibliapita tsëllaraq yachakïkaqkunaqa, Diospita rasumpa kaqta manaraq yachakur mana alli kaq religionkunachö kayashqa. Itsa misankunaman o cultunkunaman ëwaräyarqan o qellëninkunawan yanapakuyaq. Manaraq bautizakur Diospita yachatsikuyänampaqqa, unë kayanqan religionninkunapitam chipyëpa rakikäkuriyänan. Unë religionninkunapita o mana alli religionkuna patsätsiyanqan grüpukunapita chipyëpa rakikäkuriyanqanta nirmi juk cartata rurayänan. *

17. Diosta sirweqkunaqa, ¿imakunachötaq mana trabajantsiktsu, y imanir?

¹⁷ Jehoväta sirweqkunaqa, allim segurakunantsik mana alli religionkunapaq mana trabajëkanqantsikta (2 Cor. 6:14-17). Manam ima iglesiachöpis trabajashwantsu. Jina juk emprësachö trabajarqa, manam mana alli religionkunapa localninkunachö atska tiempupaqa  trabajashwantsu. Y kikintsikpa negociuntsik kaptinqa, manam mana alli religionkunapaq trabajashuntsu ni manam pëkunapita trabäjuta chaskishuntsu. ¿Imanirtaq tsëtaqa rurantsik? Tsë mana alli religionkunapa rurëninkuna y yachatsikuyanqankuna Diospa contran kaptinmi. Tsëmi ni imanöpapis tsëkunachö yanapakïta munantsiktsu (Is. 52:11). *

18. Juk iglesiachö trabajanampaq niyaptin, ¿imatataq juk wawqi rurarqan?

¹⁸ Qepa atska watakunatam, täranqan markapa iglesianchö juk trabäjuta ruranampaq juk wawqita juk emprësa contratëta munarqan. Pëqa creikoqkunata rikarmi yanapakoq y carpintërum karqan. Contratëta munaq nunaqa, musyarqanmi tsë wawqiqa ima iglesiachöpis mana trabajanampaq nishqa kanqanta. Peru tsë kutiqa, alläpam wanarqan pillapis tsë trabäjuta rurananta. Tsënö kaptimpis, tsë wawqiqa Bibliachö ninqantam respetarqan y manam tsë trabäjuta chaskikurqantsu. Y qateqnin semänallatanam, tsë iglesiaman juk carpintëru cruzta churëkaqta fötuta tomayanqanta tsë markachö periödicu jorqamurqan. Tsë wawqi tsë trabäjuta chaskikushqa kaptinqa, tsë periödicuchöchi fötun yarqunman karqan. Tsënö pasakuptinqa, creikoq mayinkunachöchi mana allichö quedanman karqan y Jehoväpis llakikunmanchi karqan.

19, 20. (1) ¿Imatataq kananyaq yachakurquntsik? (2) ¿Ima mastataq yachakunantsik?

¹⁹ Bibliachöqa rikantsik, Patsachö mandakoqkuna “¡yamënam y segürunam kantsik!” niyänampaq kaq musyatsikï ichikllachöna cumplikänampaq kaqtam. Peru Jehoväqa, Patsachö nacionkuna rasumpa y imëyaqpis yamë y següru kawakïta mana lograyänampaq kaqtam musyatsimarquntsik. Manaraq tsë pasakuptin y illaqpita ushakë manaraq chämuptin, ¿imatataq ruranantsik? Diosnintsikqa, Gobiernumpita yachatsikur y pëpa sirweqninkuna kayänampaq nunakunata yanaparnin këkänatam munan. Jina manam ni imanöpapis mana alli kaq religionkunaman mëtikushwantsu. Tsëpaqqa, manam tsë religionkunachö ni patsätsiyanqan grüpukunachö kashwantsu, jina manam tsëkunapaqqa ima trabäjutapis rurashwantsu.

²⁰ “Ushanan junaqkunapa” ushëninchöqa, imëka maskunaran pasakunqa. Y tsë junaqkunachö juk cösaskunata ruranatapis Jehoväqa munanmi. ¿Imataq tsëkunaqa kayan? Y ¿imatataq rurashwan shamoq tiempuchö pasakunampaq kaqkunapaq listu këkänapaq? Qateqnin kaq yachatsikïchömi tsëta yachakushun.