1. ‘Tucurimui punllacunapi’ causajushcataca ¿imamandata seguro capanchi?

ÑUCANCHICUNA huata 1914 jipa nacirishca cashpaca, cai nali mundopa ‘tucurimui punllacunapi’ causanajushcatami cuenta japipashcanchi (2 Tim. 3:1). Tucuicunallatami cai punllacunapi imacunalla pasanamanda Jesús parlashca shimicuna pactarijujta ricupanchi. Jesusca nircami guerracuna, ninan yarjaicuna, ungüicuna, nali gentecuna, Diosta sirvijcunata catiriajcuna, shuj shuj llaquicunapashmi tianga nishpa (Mat. 24:3, 7-9, 12; Luc. 21:10-12). Apóstol Pablopashmi cai punllacunapi imashina gentecuna tianata villarca (“ Imashina gentecunata cunanbica tian” nishca recuadrota ricupangui). Testigo de Jehovacunaca ‘tucurimui punllacunapi’ causajushcataca seguromi capanchi (Miq. 4:1).

2. ¿Imacunatata tapurina capanchi?

² 1914 huatamandaca ashtaca llaquicunami tiashca, chaimandami tucurimui punllacunapi causajushcata cuenta japipanchi. Cai nali mundoca ñallapachami tucurigrin. Chaimi cashna tapurina capanchi, ‘tucurimui punllapica’ ¿imata pasagrin? Chaicamanga ¿imata rurachunda Jehová Diosca munan? nishpa.

3. Gobiernocunaca ¿imatata 1 Tesalonicenses 5:1-3​pi nishca shinaca ni callaringa?

³ (1 Tesalonicenses 5:1-3, liingui). Apóstol Pabloca [“Jehovapa”, NM] punllamandami parlajurca. Jehovapa punllaca ‘Babilonia shuti jatun pueblota’ o tucui panda religiongunata  llaquichijpimi callaringa. Shinallata Armagedonbimi tucuringa (Apoc. 16:14, 16; 17:5). Chai ‘punlla’ nara callarijpillatami gobiernocunaca “casilla aliguta, imatapash na manllashpami causanajunchi” nishpa villanga. Gobiernocunaca tucui llactacunapi ali causaita mascashpaca, casilla alimi causashun nishpami randimanda parlarin. * Shinapash Bibliapi “casilla aliguta, imatapash na manllashpami causanajunchi” nishca shimicunaca diferentemi can. Gobiernocuna “casilla aliguta, imatapash na manllashpami causanajunchi” nijpica, mundo enteromanda gentecunami chaita crishpa ñami cushilla causai ushashun nishpa pensanga. Shinapash gobiernocuna chaita nishca jipallami, ‘ninan manllanayai llaqui punllacunaca’ callaringa (Mat. 24:21).

4. a) ¿Imatata na yachapanchi? b) Chaipa randica ¿imatata intindipashun?

⁴ “Casilla aliguta, imatapash na manllashpami causanajunchi” nishpa gobiernocuna ni callarinataca yachapanchimi. Shinapash ima punlla, imashina chaita ni callarinataca na yachapanchichu. Shuj punllapilla o shuj shuj punllacunapi chaita villana cashcatapash na yachapanchichu. Imashina pasana cajpipash gobiernocuna casilla ali causaiguta na cui ushanataca alipachami yachapanchi. Chaimandami gobiernocunapa nishcacunapica na crina capanchi. Chaipa randica “Jehovapa punlla” ña callarina cashcatami chai ratoca intindipashun.

5. ¿Imashinata 1 Tesalonicenses 5:4-6​pi shimicunaca ‘Jehovapa punllapa’ rijcharianshna causachun ayudan?

⁵ (1 Tesalonicenses 5:4-6, liingui). Apóstol Pabloca ‘Jehovapa punlla’ chayamungacaman imata rurana cashcatami nirca. Paica nircami, ‘caishujcuna puñunajunshnaca, na causanachu canguichi’ nishpa. Shinaca rijchariashnami causana capanchi. Chaimandami imahorapash politicapi chapurinamandaca cuidarina capanchi. Politicapi chapurishpaca ‘cai mundopa ruraicunapimi’ chapurinajunchiman (Juan 15:19). Mundo enteropi cushilla, ali causaigutaca Diospa Reinollami apamunga.

6. a) ¿Imata rurashpata shuj gentecunata ayudangapaj munapanchi? b) ¿Imamandata gentecunamanga villachina capanchi?

⁶ Rijchariashna causashca jahuapash, shuj gentecuna Bibliamanda yachajuchunmi ayudana capanchi. Villachijpimi jipa punllacunapi imacunalla pasanata yachajui ushanga. Ninan manllanayai llaqui punllacuna callarijpica ñana Jehovamanda yachajui ushangachu. Chaimandami uchalla villachinapacha capanchi. *

7. ¿Imata rurashpa catichunda Jehová Diosca munan?

⁷ Jehová Diosca paipa punlla chayamungacamanga villachishpa catichunmi munan. Chaimandami ‘imata rurachun pai mingashcatapash ashtahuan rurashpa catina’ capanchi  (1 Cor. 15:58). Tucurimui punllacunapi, Jehovapa sirvijcuna imata ruranamanda parlashpaca Jesusca nircami: “Tucurimui punllacuna nara chayamujpillatami, ali villaitaca tucui llactacunapi causajcunaman villanapacha” can nishpa (Mar. 13:4, 8, 10; Mat. 24:14). Villachingapaj llujshishpaca cai shimicuna pactarichunmi ayudanajupanchi.

8. Cai huatacunapica ¿imatata ricupanchi?

⁸ Cada huatami ashtaca ashtaca gentecuna Diospa Reinomanda villachijpica uyashca. Cai tucurimui punllacunapica mundo enteropimi ashtahuan publicadorcuna miranajushca. Huata 1914​pica, 5 mil 155 publicadorcunallami, 43 llactacunapi tiarca. Cutin cunanbica casi 8 millón 500 mil publicadorcunami, 240 llactacunapi capanchi. Shinapash Diospa Reinolla tucui llaquicunata tucuchinga nishpami villachina capanchi (Sal. 145:11-13).

9. ¿Imamandata villachishpa catina capanchi?

⁹ Jehová Dios, ñana villachinachu canguichi ningacamanmi villachishpa catina capanchi. Jehová Diosmanda, Jesusmandapash yachajuchunga ¿mashna tiempotata gentecunaca charin? Na yachapanchichu (Juan 17:3). Shinapash ninan manllanayai llaqui punllacuna chayamungacaman ‘causaita causagringapaj munaj gentecuna’ yachajungapaj munajpica yachachishpa catinallami capanchi (Hech. 13:48, NM). Shinapash ¿imashinata paicuna yachajushpa catichunga ayudai ushapanchi?

10. Gentecunaman cabalguta yachachichunga ¿ima ayudacunatata charipanchi?

¹⁰ Gentecunata cabalguta yachachingapami Jehová Diosca paipa organizacionda utilizashpa ñucanchita ashtahuan yachachishpa catijun. Por ejemplo, Jesuspa Chaquita Catishpa Causashunchi Yachachishunchi Tandanajuipica, parlai callaringapaj o primera vez visitajushpa imata nina cashcatami yachachin. Shinallata Bibliamanda imashina yachachina cashcatapashmi yachajupanchi. Jehová Diospa organizacionga ashtahuan villachingapami Yachachingapaj publicacionguna nishca parteta cushca. Cai Yachachingapaj publicaciongunaca caicunapimi ayudanga:

• parlai callaringapaj,

• gentecuna quiquinda uyangapaj munachun,

• gentecuna ashtahuan yachajushpa catingapaj munachun,

• Bibliamanda yachachijushpa cabalguta yachachingapaj,

•   shinallata pipash ashtahuan yachajungapaj munajpi, Internetpi jw.org paginaman yaicuchun o tandanajuicunaman invitachunmi ayudan.

Shinapash cai ayudacunata, Yachachingapaj publicaciongunatapash utilizanami capanchi. * Por ejemplo, ashtahuan yachangapaj munaj gentecunamanga shuj tratadota o shuj revistata saquinallami capanchi. Shinami paita visitangapaj tigrangacamanga revistata o tratadota liijuita ushan. Ñucanchicunaca, cada quilla villachinapi ocupado cana responsabilidadtami charipanchi.

11. ¿Imapata Internetpi Bibliamanda ashtahuan yachajungapaj nishca parteca rurashca can?

¹¹ Jehová Diosca gentecuna Bibliamanda yachajui ushachunga ¿imashinata ayudajun? Paicunallata yachajui ushachunmi, Internetpi Bibliamanda ashtahuan yachajungapaj * nishca parteta charipanchi. Caitaca jw.org paginapimi ricuita ushapanchi. ¿Imapita ayudan? Cada quillami ashtaca ashtaca gentecuna Bibliamanda yachajungapaj munashpa Internetpi ayudacunata mascan. Shinapash, ñucanchipa Internet paginapimi Jehová Diospa Shimimanda cabalguta yachajuita ushapan. Villachijujpica huaquin gentecunaca ñucanchicuna Bibliamanda yachachichunga na munanllu. Paicunamanga Internetpipash Bibliamanda yachajuita ushapangui nishpami villachita ushapanchi. Na cashpaca, paicuna munashca shimipi mascachunmi ñucanchi paginapa direccionda shuj mensajepi escribita ushapanchi.

12. Internetpi Bibliamanda ashtahuan yachajungapaj nishca partepica ¿ima temacunatata yachajuita ushapanchi?

¹² Internetpi Bibliamanda ashtahuan yachajungapaj nishcapica cai temacunatami yachajuita ushapanchi: “Bibliata, pi escribishcatapash yachajupashunchi”, “Bibliapi parlashca gentecuna”, “Shamuj punllacunapa ali villaigucuna”. Cai temacunamanda yachajushpami caicunata yachajuita ushapanchi:

• Bibliaca ¿imashinata ñucanchita ayudan?

• Jehová, Jesús, angelcunapash ¿picunata can?

• Jehová Diosca gentecunata ¿imapata rurarca?

• ¿Imamandata llaquicunaca tian?

Internetpi Bibliamanda ashtahuan yachajungapaj nishcapica caicunatapashmi yachajuita ushapanchi:

• Llaquicunata, huañuitapash Jehová Diosca tucuchingami,

• Jehová Diosca huañushcacunata causachingami,

• Jehovapa Reinoca cai Alpapi gobiernocuna mandashpa catichunga ñana saquingachu.

13. Internetpi Bibliamanda ashtahuan yachajungapaj nishca parteca ¿publicadorcunapa randichu yachachijun? Intindichipai.

¹³ Cai temacunamanda Internetpi yachajuita ushashpapash Bibliamanda pipash yachachichunmi minishtipanchi. Jesusca ashtahuan catijcunata mascana privilegiotami ñucanchimanga cushca. Ashtahuan yachajungapaj munaj gentecuna Internetpi Bibliamanda ashtahuan yachajungapaj nishcata liichun, chai yachajushcacunata alicachichun, shinallata gentecuna ashtahuan yachajungapaj munaita charichunmi munapanchi. Chai munaita charishpami gentecunaca paicunaman pipash yachachichun mañanga. Internetpi Bibliamanda ashtahuan yachajungapaj nishcapi cada temata yachajushca jipami pipash ashtahuan yachachishpa catichun mañanalla can. Cada punllami ñucanchi Internet paginapica, Bibliamanda yachajungapaj munaj gentecunapa casi 230 solicitudcunata chasquipashcanchi. Cada unomi pipash cabalguta yachachichun minishtipanchi.

14. Mateo 28:19, 20​pi nishca shinaca ¿imatata Jesusca mandarca?

¹⁴ (Mateo 28:19, 20, liingui). Gentecunaman Bibliamanda yachachishpaca Jesuspa ali catijcuna tucuchun, Jesuspa mandashcacunata cazuchunmi yachachina capanchi. Shinallata Jehovapa lado tucushpa, paipa Reino imamanda minishtirishca cashcata intindichunbashmi ayudana capanchi. Shina ayudajpimi paicunaca paicunapa causaipi imata yachajushcata pactachishpa, Jehová Diosta candallami sirvisha nishpa mañashpa bautizaringa. Shinallami Jehovapa punlla chayamujpica paicunapash salvarita ushanga (1 Ped. 3:21).

15. Jehovapa punlla nara chayamujpillata ¿imatata rurana capanchi?

¹⁵ Imashinami ña yachajupashcanchi, cai mundomanda nali ruraicunaca ñallapachami tucuringa. Chaimi pipash Bibliamanda yachajujushpapash na cambiangapaj munajpica Bibliamanda yachachishpaca na catinachu capanchi (1 Cor. 9:26). Ashtahuanbachaca ciertopacha Diospa Reinomanda yachajungapaj munaj gentecunata mascapashunchi. Jehovapa punlla nara chayamujpillatami shina rurana capanchi.

16. Apocalipsis 18:2, 4, 5, 8​pi nishca shinaca Jehová Diosca paipa sirvijcuna ¿imata rurachunda munan? (Notatapash ricupangui).

¹⁶ (Apocalipsis 18:2, 4, 5, 8, liingui). Cai textocunapica, Jehová Dios paipa sirvijcuna ‘Babilonia shuti jatun pueblomanda’ o panda religiongunamanda llujshichun munashcatami ricuchin. Bibliamanda huaquin yachajujcunaca talvez panda religión ucupimi imacunatapash rurashpa ayudan cashcanga o culquitaiman cushpa causan cashcanga. Shinapash publicador tucungapaj munashpaca, chaicunataca ña saquishcatami ricuchina can. Shinallata cai iglesiapi ñana cangapaj munanichu nishpami shuj cartata escribishpa cachanalla can. Na cashpaca panda religionbi rurashpa causashca cosascunatapash ñana rurashpa catinachu can. Shinami ‘Babilonia shuti jatun pueblomanda’ o panda religiongunamanda ña llujshishcata ricuchi ushanga. *

17. Jehovata ciertopacha sirvijcunaca ¿imatata na rurapanchi?

¹⁷ Jehovata ciertopacha sirvijcunaca imapash trabajocunapi, Babilonia shuti jatun pueblopa panda yachachishcacunapipash na chapurinllu (2 Cor. 6:14-17). Chaipaca caipi yuyapashunchi. Shuj iglesia ucupi trabajachun mañajpica na trabajanachu capanchi. Shinallata imagutapash chai iglesiaman jatushpa  o paicuna shuj trabajota chai iglesiapi cusha nijujpipash na nishpami nina capanchi. Chaicunataca ¿imashpata na rurapanchi? Chai panda religionba yachachishcacunapi chapurishca cangapaca na munapanchichu. Chai ruraicunaca Taita Diospa ñaupajpica nalipachami can (Is. 52:11). *

18. Shuj iglesiapi trabajapai nijpica ¿imatata shuj anciano huauquica rurarca?

¹⁸ Tauca huatacunatami shuj anciano huauquica carpintero shina trabajan carca. Shuj punllaca shuj iglesiapi imatapash rurashpa trabajapai ningapami shuj jarica shamurca. Chai anciano huauquica shuj iglesiapi imatapash trabajocunata rurashpa trabajaitaca nunca na trabajashachu nishcami carca. Shinapash chai jarica chai iglesiapi uchalla shuj carpintero imatapash rurachunmi mascajurca. Masqui ali pagasha nijujpipash huauqui ancianoca chai trabajotaca na chasquircachu. ¿Imashpata chai trabajotaca na chasquirca? Bibliapa yachachishcacunata cazuimandami chai trabajotaca na chasquirca. Semana jipaca shuj periódico fotopimi shuj carpintero chai iglesiapi shuj cruzta churajushcata llujchirca. Huauqui anciano chai trabajota ari nishca cashpaca chai ancianomi chai periodicopica llujshinman carca. Chai trabajota ari nishpa trabajashca cashpaca anciano huauquica shuj huauquipanicunapa ñaupajpimi nali, pingaipi quedanman carca. Shinallata Jehová Diostami llaquilla sintichinman carca.

19, 20. a) Caicamanga ¿imatata yachajupashcanchi? b) Cati temapica ¿imatata yachajupashun?

¹⁹ Bibliapi nishcashnaca ‘casilla aliguta, imatapash na manllashpa causanajunchi’ nishca profeciaca ñallapachami pactaringa. Shinapash Jehová Diosca, gobiernocunaca casilla ali causaita gentecunaman cuitaca na ushangachu nishpami ñucanchimanga yachachishca. Shinaca ñucanchicunaca ¿imatata rurajuna capanchi? Diospa Reinomanda villachishpa, Jesuspa ali catij gentecuna tucuchunmi villachishpa catina capanchi. Shinallata panda religionmanda o shuj iglesiacunapa panda ruraicunataca ñana rurashpa catinachu capanchi. Shinallata shuj iglesiapi trabajachun nijpipash na trabajanachu capanchi.

²⁰ “Tucurimui punllacunapica” ashtaca cosascunami pasanara can. Chai punllapi ñucanchicuna ¿imata rurachunda Jehová Diosca munan? Shamuj punllacunapi imalla pasanamandaca ¿imatata cunanmandallata rurashpa catina capanchi? Chaitaca cati temapimi yachajupashun.