1. Akapeea tatou i papu ei e te noo nei tatou i te “tuatau openga”?

ME KUA anauia mai koe i muri ua ake i te mataiti 1914, kua noo ana koe i te “tuatau openga” o teia akatereanga. (2 Timo. 3:1) Kua kite ana tatou i ta Iesu i akakite e ka tupu. Te tamaki, te onge, te ngaruerue enua, te maki mate, te kino, e ka takinokinoia te iti tangata o Iehova. (Mata. 24:3, 7-9, 12; Luka 21:10-12) Kua kite katoa ana tatou i te tu o te tangata tei akakiteia e te apotetoro ko Paulo. (Akara i te pia “ Te Tu o te Tangata i Teianei.”) Ei aronga akamori ia Iehova, kua papu ia tatou e te noo nei tatou i “te au rā openga.”—Mika 4:1.

2. Eaa te nga uianga ka anoanoia te pauanga?

² Kua roa ake nei te tuatau mei te 1914, te noo nei tatou i te openga tikai o te “tuatau openga.” Mei te mea, te vaitata maira te openga, ka inangaro tatou i te pauanga ki teia nga uianga: Eaa te ka tupu i te openga tikai o te “tuatau openga”? Eaa ta Iehova e tapapa maira ia tatou kia rave, ia tatou e tiaki ra?

3. I roto i te totou ia 1 Tesalonia 5:1-3, eaa te kapiki anga a te au pa enua?

³ E tatau ia 1 Tesalonia 5:1-3. Taiku a Paulo i te “rā o te Atu ra [“te ra o Iehova,” NW].” Te akakite ra te irava, ko te  tuatau teia me takoreia a “Babulonia Maata,” te au akonoanga pikikaa o teianei ao, e ka taopenga kia Aramagido. (Apo. 16:14, 16; 17:5) I mua ake ka akamata ai te reira “ra,” ka kapiki te au pa enua e “e au, e kare e kino.” E tuatua ana te au tutara o teianei ao no te akameitaki anga i te pirianga i rotopu i te au pa enua. * Inara, e tuke ta te Pipiria e akakite ra no te kapiki anga o te “au, e kare e kino.” Eaa te tumu? Me tupu teia, penei ka manako te tangata e kua rauka i te au tutara o teianei ao i te apai mai i te ‘au e te tinamou. Inara, te tika anga, ka tupu “te mate viviki” i muri ake i te “mate maata.”—Mata. 24:21.

4. (a) Eaa ta tatou ka tiaki atu no te kapiki anga “e au, e kare e kino”? (e) Eaa ta tatou i kite takere no te kapiki anga?

⁴ Kua kite tatou i tetai au apinga no te kapiki anga “e au, e kare e kino.” Te vaira tetai au apinga, kare tatou i kite. Kare tatou i kite eaa te ka taki atu ki te reira kapiki anga e akapeea te reira me akakiteia. E kare tatou i kite me e okotai rai e me maata te au akakite anga. Noatu eaa te tu, kua kite tatou: Eiaa e vare e ka rauka i te au tutara o teianei ao i te apai mai i te ‘au ki teianei ao. Mari ra, kia matakite tatou i te reira kapiki anga. Ko te akairo te reira e kare e roa ka akamata “te ra o Iehova”!

5. Akapeea a 1 Tesalonia 5:4-6 me akapapa ia tatou no “te ra o Iehova”?

⁵ E tatau ia 1 Tesalonia 5:4-6. Te akakite maira te ako a Paulo akapeea me akapapa ia tatou no “te ra o Iehova.” “Auraka tatou e moe, mei tetai papaki ra.” “Kia ara,” e kia noo matakite. Ei akaraanga, kia vai takake tatou mei te au angaanga poritiki o teianei ao. Te openga, e riro tatou “no teianei ao.” (Ioa. 15:19) Kua kite tatou e na te Patireia o te Atua e apai mai i te ‘au ki teianei ao.

6. Eaa ta tatou ka inangaro i te tauturu i tetai ke, e eaa te tumu?

⁶ Kia ara ua, ka inangaro katoa tatou i tetai ke kia ara kia kite i ta te Pipiria e akakite ra e ka tupu i teianei ao. Kia maara ia tatou me akamata te mate maata, ka tureti no te tangata kia ariu mai kia Iehova. No reira ta tatou angaanga tutu aere i rapurapuia ai ei tauturu i te tangata! *

7. Eaa ta Iehova e tapapa maira ia tatou kia rave i teianei?

⁷ I te taime toe i mua ake ka akamata ai tona “ra,” te tapapa maira a Iehova ia tatou kia maroiroi i te tutu aere. “Kia  maata [ua atu ta tatou] rave anga i te angaanga a te Atu.” (1 Kori. 15:58) Kua akakite mai a Iesu eaa ta tatou ka rave. I tona tuatua anga mai i te au mea puapinga te ka tupu i te tuatau openga, karanga aia: “E na mua ra te evangelia nei i te akakiteia atu i to te pa enua ravarai e tikaʼi.” (Mare. 13:4, 8, 10; Mata. 24:14) Akamanako ana i teia: Me tutu aere koe, te piri ra koe ki roto i te akatupuanga i te totou a te Pipiria!

8. Eaa te tupu nei ki te angaanga tutu aere i te Patireia?

⁸ Eaa te tupu nei ki te angaanga tutu aere i te Patireia? Te tere nei teia angaanga ki mua i te au mataiti ravarai. Ei akaraanga, akamanako ana i te maata o te aronga tutu aere i te Patireia i te ao katoa o te tuatau openga. I te 1914, te vaira e 5,155 papuritia i roto i te 43 enua. I teia tuatau, te vaira e 8.5 mirioni papuritia i roto i te 240 enua! Noatu rai, e maata ta tatou angaanga ka rave. Kia maroiroi tatou i te tutu aere i te Patireia o te Atua, ko te ravenga anake ïa i te akakore i te manamanata o te tangata.—Sala. 145:11-13.

9. Eaa te tumu kia maroiroi tatou i te tutu aere i te Patireia?

⁹ Ka tutu aere tatou i te Patireia e tae ua atu ki te taime e karanga ai a Iehova kua rava rai. Eaa te roa o te tuatau no te tangata kia kite i te Atua ko Iehova e Iesu Karaiti? (Ioa. 17:3) Kare tatou i kite. Kua kite tatou e tae ua atu ki te taime me akamata te mate maata, ka rauka rai i “te aronga i akonoia no te ora mutu kore” kia ariu mai ki te nuti meitaki. (Anga. 13:48) Akapeea tatou me tauturu i teia aronga i mua ake ka tureti ei?

10. Eaa ta Iehova tauturu i oronga mai no te apii i te tuatua mou ki te tangata?

¹⁰ Na roto i tana akaaerenga, te oronga maira a Iehova i ta tatou i anoano no te apii i te tuatua mou ki te tangata. Ei akaraanga, te tereniia ra tatou i te au epetoma i ko i te uipaanga epetoma. Ka tauturu teia uipaanga ia tatou kia kite eaa te ka tuatua i te atoroanga mua e te atoro akaou anga. E te apii ra ia tatou akapeea me rave i te apii Pipiria. Kua oronga katoa mai ta Iehova akaaerenga i te au Apinga Apii. Ka tauturu teia ia tatou kia . . .

•   akamata i te au pukapuka anga,

• akakeu i tetai kia akarongo mai,

• tauturu i tetai kia inangaro i te kite maata atu,

• apii i te tuatua mou Pipiria, e e

• pati i te aronga tei inangaro kia aere ki te website e ki te Are Uipaanga Patireia.

Inara kare teia au apinga apii e rava ua. Mari ra ka taangaanga tatou i te reira. * Ei akaraanga, i muri ake i tetai uriuri anga maoraora ki te pu ngutuare, akaruke koe i tetai aenga pepa me kore makatini, ka tatau aia i te reira me atoro akaou iaia. Kia rave maroiroi tatou i te angaanga tutu aere i te Patireia, i te au marama ravarai.

11. Eaa te Online Bible Study Lessons i te reo Papaa i akapapaia ai?

¹¹ Tetai tauturu ta Iehova e apii ana i te tuatua mou ki te tangata, ko te Online Bible Study Lessons i te reo Papaa i runga i te jw.org^®. (Akara i te BIBLE TEACHINGS > ONLINE LESSONS.)Eaa teia au apii i akapapaia ai? I te au marama, e tai ngauru ua atu tauatini tangata takapini i teianei ao te kimi ra i te au apii Pipiria i runga i te Initaneti. Ka tauturu ta tatou website i te tangata kia apii i te tuatua mou i roto i te Tuatua a te Atua. Penei ka emiemi tetai pae tangata taau ka tuatua atu, i te āriki i tetai apii Pipiria. E akaari i teia i runga i ta tatou website me kore e tuku i tetai link kia taki ia ratou ki te apii. *

12. Eaa ta tetai tangata ka apii i runga i te Online Bible Study Lessons?

¹² Tei runga i te Online Bible Study Lessons te au tumu manako: “The Bible and Its Author,” “The Bible’s Main Characters,” e “The Bible’s Message of Hope.” I roto i taua au tumu manako, te apiiia ra:

• Akapeea te Pipiria me tauturu i tetai tangata

• Koai a Iehova, a Iesu, e te au angera

• Te tumu i anga ai te Atua i te tangata

• Te tumu i tupu ei te mamae e te kino

Ka uriuri katoa te au apii akapeea a Iehova me . . .

• takore i te mamae e te mate,

• akaora mai i tei mate e te

• mono i te au kavamani tangata ki te Patireia o te Atua.

13. Ka mono ainei te au online lessons i te angaanga apii Pipiria ki te tangata? Akataka mai.

¹³ Kare te online lessons e mono i te angaanga apii Pipiria ki te tangata. Kua oronga mai a Iesu i te akameitakianga kia tatou kia akariro i te tangata ei pipi. Ka tapapa atu tatou e ka aere te aronga tei inangaro i te apii ki runga i te online lessons, ka āriki i ta ratou e apii ra, e ka inangaro i te apii ua atu. Me koia ia, penei ka āriki ratou i tetai apii Pipiria. I te openga o te apii okotai, ka patiia te tangata tatau kia pati i tetai tangata apii i te Pipiria kia atoro mai iaia. Na roto i ta tatou website, e 230 aronga tei pati mai i te apii Pipiria i te au rā! E mea puapinga tikai i te apii ki tetai puapii!

14. I ta Iesu akaueanga ia Mataio 28:19, 20, eaa ta tatou ka tauta i te rave, e eaa te tumu?

¹⁴ E tatau ia Mataio 28:19, 20. Ia tatou e apii ra i te Pipiria, ka tauta tatou i te “akariro i to te pa enua katoa ei pipi . . . ,  ma te apii atu ia ratou, kia akono i te au mea katoa [ta Iesu] i akaue atu.” Ka anoanoia tatou kia tauturu i te tangata kia kite i te puapinga no ratou kia tavini ia Iehova e kia turuturu i tona Patireia. Ka tauta tatou i te akakeu i te tangata kia āriki i te tuatua mou na te taangaanga anga i ta ratou e apii ra, akatapu i to ratou oraanga kia Iehova, e kia papetitoia. I reira ratou e ora ai i to Iehova rā.—1 Pete. 3:21.

15. Kare o tatou taime no te apii ua atu, eaa te tumu?

¹⁵ Mei tei taikuia i te akamata anga, te pou nei te tuatau i teianei e tae ua atu ki te openga o teia akatereanga. No reira, kare tatou e apii ua atu ki te aronga kare e inangaro kia riro mai ei pipi na Karaiti. (1 Kori. 9:26) E angaanga rapurapu ta tatou! E maata te aronga kare i rongo ake i te karere o te Patireia i mua ake ka tureti ei.

16. Ia Apokalupo 18:2, 4, 5, 8, eaa ta tatou ka rave? (Akara katoa i te tataanga rikiriki.)

¹⁶ E tatau ia Apokalupo 18:2, 4, 5, 8. Akakite maira teia au irava i ta Iehova e anoano ra i te aronga e akamori ra iaia. Kia akataka ke mai te au Kerititiano mou ia ratou uaorai mei ia Babulonia Maata. I mua ake ka apii ei i te tuatua mou, penei no roto mai tetai tangata apii Pipiria i te akonoanga pikikaa. Penei kua aere ana aia e kua piri ki roto i ta ratou akonoanga. Penei kua oronga aia i te moni ki te reira akaaereanga. I mua ake ka akapapuia ai ei papuritia kare i papetitoia, ka anoanoia aia kia akaatea mai ki vao i te akonoanga pikikaa. Ka anoanoia aia kia tata i tetai reta no te akaruke i tana akonoanga e tetai atu akaaereanga o Babulonia Maata. *

17. Eaa te au tu ngai angaanga ka kopae tetai Kerititiano, e eaa te tumu?

¹⁷ Kia akapapu tetai Kerititiano mou e kare tana ngai angaanga e ō atu ki roto ia Babulonia Maata. (2 Kori. 6:14-17) Ei akaraanga, kare aia e angaanga na tetai are pure. Pera katoa, kare tetai Kerititiano tei angaanga na tetai pitiniti e rave i tetai angaanga tei turuturu i te akamorianga pikikaa. Me e pitiniti tana, kare aia e āriki e kare e rave i tetai ua atu angaanga a Babulonia Maata. Eaa te tumu ka patoi tatou i teia tu angaanga? No te mea, kare tatou e inangaro i te kapiti atu ki te au apiianga pikikaa e te au angaanga tau  kore a te akonoanga pikikaa, e mea viivii i mua i te aroaro o te Atua.—Isa. 52:11. *

18. Akapeea tetai taeake te akono anga i te au kaveinga Pipiria no tana ngai angaanga?

¹⁸ Kua topa akenei te tuatau, kua patiia tetai tangata pakari e tetai pitiniti kia āriki i tetai angaanga kamuta i ko i tetai are pure i te ngai e noo ra aia. Kua kite te tangata nana te pitiniti e kare te taeake e angaanga ki runga i te are pure. I teia taime ra, kua inangaro tikai te tangata pitiniti i tetai kia rave i te angaanga. Noatu rai, kua aru te taeake i te au kaveinga Pipiria e kua patoi i te rave i te reira angaanga. Tera mai epetoma, kua akaari te nutipepa i tetai tutu o tetai kamuta e tamou ra i te koroti ki runga i te are pure. Naringa to tatou taeake i tuku ua atu, kua ira mai tona tutu ki roto i te nutipepa. Akamanako ana i te kino ka tupu ki tona pirianga ki te au taeake Kerititiano e kia Iehova!

19-20. (a) Eaa ta tatou i apii mai i teianei? (e) Eaa atu ta tatou ka anoanoia kia apii?

¹⁹ Kia tau ki te totou Pipiria, kare e roa ka kapiki te au pa enua i teianei ao “e au, e kare e kino.” No te mea kua apiiia tatou e Iehova, kua kite tatou kare e rauka i te au pa enua i te akatupu i te ‘au. Eaa ta tatou ka rave i mua ake ka tupu ei te reira e ka aru mai te mate viviki? Te tapapa maira a Iehova ia tatou kia maroiroi i te tutu aere i te Patireia e te akariro i te tangata ei pipi. E kia akatakake mai ia tatou mei te au akonoanga pikikaa. Pera katoa kia akaruke e kia kopae i te au angaanga tei ō atu kia Babulonia Maata.

²⁰ Te vai atura te ka tupu i te openga tikai o te “tuatau openga.” Te vai katoa ra tetai au mea te tapapa maira a Iehova ia tatou kia rave. Eaa ra teia au mea, e akapeea tatou me akapapa no te au mea ka tupu a te tuatau ki mua? Ka kite tatou i te atikara ka aru mai.