1. Со уверинела амен кај живинаја ко „последна диве“?

АКО сиан бијамо пало 1914 берш, тегани цело време живинеа ко „последна диве“ акале светоскере (2. Тим. 3:1). Сарине амен шунѓем башо буќа кола со о Исус вакерѓа кај ка овен ко амаро време. Сегде иси војне, бокхалипе, земјотресија, заразна насвалипа, о беззаконие бајрола хем е Јеховаскоро народо тано прогонимо (Мат. 24:3, 7-9, 12; Лука 21:10-12). Исто аѓаар, дикхаја кај о мануша понашинена пе баш сар со пророкујнѓа о апостол Павле. (Дикх и рамка „ Саве тане о мануша авдиве“.) Сар слуге е Јеховаскере, амен сием увериме кај живинаја ко „последна диве“ (Мих. 4:1).

2. Кола важна пучиба ваљани те овен одговориме?

² Акана живинаја ко крајо таро „последна диве“ соске таро 1914 берш накхља бут време. О крајо акале светоскоро тано бут паше хем адалеске ваљани те џана о одговор башо некобор важна пучиба: Кола буќа ка случинен пе ко крајо таро „последна диве“? Хем со аџикерела о Јехова те кера џикоте на овена адала буќа?

3. Спрема о пророштво таро 1. Солуњаните 5:1-3, со ка објавинен панда хари о светска водачија?

³ Читин 1. Солуњаните 5:1-3. О Павле керѓа лафи башо „е Јеховаскоро диве“. Ко акала стихија, адава „диве“ тано о периоди кова со ка почминел е нападеа упро „Баро Вавилон“, о светско царство е ховавне религијакоро, хем ка завршинел е војнаја Армагедон (Отк. 16:14, 16; 17:5). Кратко англедер те почминел адава  „диве“, о светска водачија ка објавинен кај анѓе „мир хем сигурност“. (Несаве преводија вакерена: „Мир хем безбедност“.) О политичарија понекогаш користинена слична изразија кеда керена лафи башо пошукар односија машкар о пхувја. * Ама, и објава башо „мир хем сигурност“ колаке со и Библија керела лафи ка овел појавер. Соске? Кеда ка овел денди, бут мануша ка мислинен кај о светска водачија чаче успејнѓе те керен о свето посигурно хем побезбедно тхан живибаске. Ама, адава само ка дикхјол аѓаар. Уствари, пало адава изненадено ка овен уништиме (Мат. 24:21).

4. а) Кола буќа поврзиме е објаваја башо „мир хем сигурност“ на џанаја лен панда? б) Со џанаја панда акана?

⁴ Џанаја више несаве буќа сој поврзиме е објаваја башо „мир хем сигурност“. Ама, иси несаве буќа со на џанаја лен. На џанаја со ка анел џи ки адаја објава, а ни о начин сар ка овел денди. Хем на џанаја дали ка овел само јекх објава или некобор објаве вакерде јекх пало јекх. Ама било со те случинел пе, акава џанаја: О светска водачија нашти те анен мир. Адалеске, на смејнаја те ховавѓова хем те верујна ко адава со ка вакерен. Уствари, адаја тани и објава колаке со и Библија вакерела кај ваљани те аџикера ла. Адава ка овел знако кај „е Јеховаскоро диве“ само со на почминѓа!

5. Сар о лафија таро 1. Солуњаните 5:4-6 поможинена аменге те ова спремна башо „е Јеховаскоро диве“?

⁵ Читин 1. Солуњаните 5:4-6. Таро е Павлескоро совет дикхаја со ваљани те кера те шај те спремина амен башо „е Јеховаскоро диве“. На ваљани те „сова сар о јавера“. Ваљани „те ова џангавде“. На пример, мора те пазина те ачхова неутрална хем те на мешина амен ки политика. Ако ко несаво начин мешинаја амен ки политика, шај те ова „дело таро свето“ (Јован 15:19). Амен џанаја кај само е Девлескоро Царство шај те анел мир ко свето.

6. Со мангаја те поможина е јаверенге те керен, хем соске?

⁶ Освен со коркори амен ваљани те ачхова џангавде, мангаја те „џангава“ е јаверен да. Ола ваљани те џанен со пророкујнѓа и Библија башо адава со ка случинел пе ко свето. Те на бистра кај, откеда ка почминел и бари неволја, ка овел бут касно е манушенге те почминен те служинен е Јеховаске. Адалеске бут тано важно те проповедина авдиве! *

7. Со аџикерела о Јехова амендар авдиве?

⁷ Ко акава кратко време со ачхило англедер те почминел лескоро диве, о Јехова аџикерела амендар понадари да те проповедина. Ваљани те трудина амен те ова „секогаш зафатиме ки бути е Господареске“ (1. Кор. 15:58). О Исус пророкујнѓа со ка  кера. Кеда керѓа лафи башо са о важна буќа со ка случинен пе ко последна диве, ов пхенѓа акава да: „Хем ко са о народија најангле мора те проповединел пе о шукар хабери“ (Мар. 13:4, 8, 10; Мат. 24:14). Размислин башо акава: Секогаш кеда сиан ки служба, ту поможинеа те исполнинел пе акава библиско пророштво!

8. Сар понадари да напредујнела о проповедибе?

⁸ Со шај те вакера башо адава сар напредујнѓа о проповедибе? Секова берш, са повише мануша шунена о шукар хабери башо Царство. На пример, размислин кобор барило о број таро објавителија ко цело свето ко акала последна диве. Ко 1914 берш, сине 5.155 објавителија ко 43 пхувја. А авдиве, иси околу 8,5 милионија објавителија ко 240 пхувја! Ама, амари бути нане панда готово. Амен ваљани понадари да те проповедина кај само е Девлескоро Царство ка решинел са о проблемија е манушенгере (Пс. 145:11-13).

9. Соске мора понадари да те проповедина о хабери башо Царство?

⁹ Амен понадари да ка проповедина са џикоте о Јехова на вакерела кај ваљани те чхинава. Панда кобор време ачховела е манушенге те пенџарен е Јехова хем е Исусе? (Јован 17:3). На џанаја. Ама, џанаја кај, са џикоте на почминела и бари неволја, сарине со исправно дикхена ко вечно живото панда иси лен прилика те прифатинен о шукар хабери (Дела 13:48). Сар шај те поможина адале манушенге англедер те овел бут касно?

10. Сар поможинела аменге о Јехова те сикава е манушен башо чачипе?

¹⁰ Преку пли организација, о Јехова дела амен са со ваљани аменге те шај те сикава е манушен башо чачипе. На пример, секова курко сикљоваја сар те кера адава ко состанок Амаро живото хем служба. Ки лесте сикљоваја со те вакера ко прво разговор хем ко повторна посете. Освен адава, добинаја упатствија сар те водина библиска курсија. Е Јеховаскири организација денѓа амен исто аѓаар главна публикацие службаке. Ола поможинена аменге...

• те почмина разговорија

• те бајрара о интерес ко јавера

• те поттикнина е манушен те манген те џанен нешто повише баши Библија

• те сикава башо чачипе кеда водинаја библиско курси, хем

•   те охрабрина адален со иси лен интерес те џан ки амари интернет-страница хем те канина лен те авен ко состанок.

Џанѓола пе, нане доволно само те овен амен акала публикацие. Мора те користина лен. * На пример, ако мукхеа трактати или списание некаске со интересинела пе откеда сине тут шукар разговор леа, ов ка шај те читинел панда нешто џикоте палем на посетинеа ле. Секоле јекхе амендар иси ле одговорност те проповединел кобор со шај секова масек.

11. Соске сине кердо о Онлајн курси?

¹¹ О Јехова поможинела е јаверенге те џанен о чачипе хем преку о Онлајн курси башо проучибе и Библија ки амари интернет-страница, jw.org^®. Соске сине кердо акава курси? Секова масек, бут баро број мануша ко цело свето родена ко Интернет те шај те џанен нешто повише баши Библија. О лекцие таро акава курси шај те поможинен ленге те џанен нешто повише башо е Девлескоро Лафи. Несаве таро мануша коленцар со кераја лафи шај нане спремна те проучинен и Библија аменцар. Тегани, шај те сикаве ленге акава дело тари амари страница или те бичхале ленге линк таро лекцие ки чхиб со хаљовена ла. *

12. Со шај те сикљовел пе таро Онлајн курси?

¹² Ко Онлајн курси башо проучибе и Библија керела пе лафи башо акала теме: „И Библија хем лакоро Автори“, „Пенџарде библиска личностија“ хем „О шукар хабери тари Библија“. Ко акала теме, тане одговориме акала пучиба:

• Сар шај и Библија те поможинел аменге?

• Кој тане о Јехова, о Исус хем о ангелија?

• Соске о Девел керѓа е манушен?

• Соске иси муке хем лошнипе?

Ко акала лекцие исто аѓаар керела пе лафи сар о Јехова...

• ка чхивел крајо е мукенге хем е мерибаске,

• ка ваздел е мулен, хем

• ка менинел о манушикане владе е Девлескере Царствоја.

13. Дали о онлајн курси тано замена башо библиско курси кова со нудинаја ле ки служба? Објаснин.

¹³ Акава онлајн курси нане замена башо библиско курси кова со нудинаја ле ки служба. О Исус денѓа амен задача те поможина е манушенге те овен лескере ученикија. Надинаја амен кај о мануша со интересинена пе ка накхавен о онлајн курси, ка свиџинел пе ленге адава со читинена, ка манген те џанен повише хем ка прифатинен те проучинен некасаја и Библија. Ко крајо тари секоја лекција, о мануш тано поттикнимо те родел те проучинел и Библија несаве Јеховаскере сведокоја. Преку амари интернет-страница, секова диве ко просек добинаја повише таро 230 молбе башо библиско курси таро цело свето. Бут тано важно лично те сикава е манушен баши Библија!

14. Спрема и заповед со денѓа о Исус која сој пишими ко Матеј 28:19, 20, со ваљани те трудина амен те кера, хем соске?

¹⁴ Читин Матеј 28:19, 20. Кеда водинаја библиска курсија, ваљани те да амендар са те поможина е манушенге те овен е Исусескере ученикија аѓаар со ка сикава лен те икерен са со ов заповединѓа. Ваљани те поможина ленге те хаљовен кобор тано ленге важно те анен одлука те служинен е Јеховаске. Акава значинела кај ваљани те поттикнина лен те керен адава со сикљовена, те ден лафи кај ка служинен е Јеховаске цело живото хем те крстинен пе. Само аѓаар  ка шај те преживинен е Јеховаскоро диве (1. Пет. 3:21).

15. Со нашти те дозволина аменге, хем соске?

¹⁵ Сар со више вакерѓем, ачхола панда бут хари време џи ко крајо таро акава свето. Адалеске, нашти те дозволина аменге понадари да те проучина манушенцар со на керена промене хем со нане лен намера те овен е Христосескере ученикија (1. Кор. 9:26). Амари задача тани итно! Иси панда бут мануша со ваљани те шунен о шукар хабери башо Царство англедер те овел бут касно.

16. Спрема Откровение 18:2, 4, 5, 8, со мора те керел секова јекх амендар? (Дикх хем и фуснота.)

¹⁶ Читин Откровение 18:2, 4, 5, 8. Акала стихија сикавена кај о Јехова аџикерела панда нешто пле слугендар. Нијекх чачутно христијани на смејнела ко нисаво начин те овел поврзимо е ховавне религијаја. Англедер те дознајнел о чачипе, шај некој сине члени ки несави ховавни религија. Шај учествујнела сине ко религиозна активностија, или, палем, дела сине прилогија. Англедер те овел некој некрстено објавители, мора те чхинавел секоја бути со поврзинела ле е ховавне религијаја. Ако тано члени ки несави црква или ки јавер организација која тани поврзими е Баре Вавилонеа, ов ваљани целосно те чхинавел пло членство аѓаар со, на пример, ка бичхалел јекх писмо коте со јасно ка пишинел кај на мангела те овел више лакоро члени. *

17. Сави световно бути нане прифатливо е христијаненге, хем соске?

¹⁷ Јекх чачутно христијани мора те пазинел лескири световно бути те на овел поврзими ко несаво начин е Баре Вавилонеа (2. Кор. 6:14-17). На пример, на ваљани те прифатинел бути тари несави црква. Исто аѓаар, чак ако некој више керела бути ки несави јавер фирма, нане те овел шукар те керел редовно или, палем, повише време бути ко несаво објекти тари ховавни религија. А ако иси ле пли фирма, сигурно нане те нудинел пле услуге несаве ховавне религијаке или те керел несаво договор баши бути лаја. Соске иси амен асавко одлучно стави башо акава? Адалеске со ко нисаво начин на мангаја те поможина те ширинен пе о сикљојба или о обичаија тари несави ховавни религија која со нане чисто англо е Девлескере јакхја (Иса. 52:11). *

18. Сар јекх пхрал ки пли бути сикавѓа кај шунела о библиска начелија?

¹⁸ Англедер бут берша, јекх предузимачи родинѓа таро јекх старешина коле со сине ле  пли фирма те завршинел јекх тикни столарско бути ки јекх црква ки диз коте со живинела сине. Иако џанља кај о пхрал секогаш одбинела те керел бути ко проектија сој поврзиме црквенцар, акава пути е предузимаче сине ле бари потреба некастар со шај те завршинел адаја бути. Ама, акава да пути о пхрал на мангља те пхагел о библиска начелија хем одбинѓа акаја бути. О јавер курко, ки локално новина иклили јекх слика таро јавер столари сар ковинела крсто ки црква. Ако амаро пхрал прифатинела сине и бути, ки новина шај ка овел сине слика лестар. Замислин туке кобор адава шај сине те руминел лескоро шукар анав машкар о пхраља хем о пхења! Исто аѓаар, замислин туке сар ка осетинел пе сине о Јехова.

19-20. а) Со сиклилем ки акаја статија? б) Башо со ка добина одговор ки наредно статија?

¹⁹ Спрема о библиска пророштвија, и наредно важно бути која со панда хари ка исполнинел пе ко свето тани и објава башо „мир хем сигурност“. Адалеске со о Јехова сикавела амен, џанаја кај о мануша нане те анен чачутно хем трајно мир, него изненадено ка овен уништиме. Со ваљани те кера англедер те случинел пе са адава? О Јехова аџикерела амендар понадари да те проповедина о шукар хабери башо Царство хем те трудина амен те кера ученикија. Исто аѓаар, ваљани те цида амен таро са сој поврзимо е ховавне религијаја. Акава значинела кај на ваљани те ова членија ки нијекх организација која сој дело таро Баро Вавилон хем на ваљани те прифатина бути сој поврзими лаја.

²⁰ Иси јавера да буќа со ка случинен пе ко крајо таро „последна диве“. А иси нешто јавер да со аџикерела амендар о Јехова. Кола тане адала буќа хем сар шај те спремина амен башо са адава со ка овел ки иднина? О одговор ка добина ле ки наредно статија.