1. So uverinela amen kaj živinaja ko „posledna dive“?

AKO sian bijamo palo 1914 berš, tegani celo vreme živinea ko „posledna dive“ akale svetoskere (2. Tim. 3:1). Sarine amen šungjem bašo bukja kola so o Isus vakergja kaj ka oven ko amaro vreme. Segde isi vojne, bokhalipe, zemjotresija, zarazna nasvalipa, o bezzakonie bajrola hem e Jehovaskoro narodo tano progonimo (Mat. 24:3, 7-9, 12; Luka 21:10-12). Isto agjaar, dikhaja kaj o manuša ponašinena pe baš sar so prorokujngja o apostol Pavle. (Dikh i ramka „ Save tane o manuša avdive“.) Sar sluge e Jehovaskere, amen siem uverime kaj živinaja ko „posledna dive“ (Mih. 4:1).

2. Kola važna pučiba valjani te oven odgovorime?

² Akana živinaja ko krajo taro „posledna dive“ soske taro 1914 berš nakhlja but vreme. O krajo akale svetoskoro tano but paše hem adaleske valjani te džana o odgovor bašo nekobor važna pučiba: Kola bukja ka slučinen pe ko krajo taro „posledna dive“? Hem so adžikerela o Jehova te kera džikote na ovena adala bukja?

3. Sprema o proroštvo taro 1. Solunjanite 5:1-3, so ka objavinen panda hari o svetska vodačija?

³ Čitin 1. Solunjanite 5:1-3. O Pavle kergja lafi bašo „e Jehovaskoro dive“. Ko akala stihija, adava „dive“ tano o periodi kova so ka počminel e napadea upro „Baro Vavilon“, o svetsko carstvo e hovavne religijakoro, hem ka završinel e vojnaja Armagedon (Otk. 16:14, 16; 17:5). Kratko angleder te počminel adava  „dive“, o svetska vodačija ka objavinen kaj angje „mir hem sigurnost“. (Nesave prevodija vakerena: „Mir hem bezbednost“.) O političarija ponekogaš koristinena slična izrazija keda kerena lafi bašo pošukar odnosija maškar o phuvja. * Ama, i objava bašo „mir hem sigurnost“ kolake so i Biblija kerela lafi ka ovel pojaver. Soske? Keda ka ovel dendi, but manuša ka mislinen kaj o svetska vodačija čače uspejngje te keren o sveto posigurno hem pobezbedno than živibaske. Ama, adava samo ka dikhjol agjaar. Ustvari, palo adava iznenadeno ka oven uništime (Mat. 24:21).

4. a) Kola bukja povrzime e objavaja bašo „mir hem sigurnost“ na džanaja len panda? b) So džanaja panda akana?

⁴ Džanaja više nesave bukja soj povrzime e objavaja bašo „mir hem sigurnost“. Ama, isi nesave bukja so na džanaja len. Na džanaja so ka anel dži ki adaja objava, a ni o način sar ka ovel dendi. Hem na džanaja dali ka ovel samo jekh objava ili nekobor objave vakerde jekh palo jekh. Ama bilo so te slučinel pe, akava džanaja: O svetska vodačija našti te anen mir. Adaleske, na smejnaja te hovavgjova hem te verujna ko adava so ka vakeren. Ustvari, adaja tani i objava kolake so i Biblija vakerela kaj valjani te adžikera la. Adava ka ovel znako kaj „e Jehovaskoro dive“ samo so na počmingja!

5. Sar o lafija taro 1. Solunjanite 5:4-6 pomožinena amenge te ova spremna bašo „e Jehovaskoro dive“?

⁵ Čitin 1. Solunjanite 5:4-6. Taro e Pavleskoro sovet dikhaja so valjani te kera te šaj te spremina amen bašo „e Jehovaskoro dive“. Na valjani te „sova sar o javera“. Valjani „te ova džangavde“. Na primer, mora te pazina te ačhova neutralna hem te na mešina amen ki politika. Ako ko nesavo način mešinaja amen ki politika, šaj te ova „delo taro sveto“ (Jovan 15:19). Amen džanaja kaj samo e Devleskoro Carstvo šaj te anel mir ko sveto.

6. So mangaja te pomožina e javerenge te keren, hem soske?

⁶ Osven so korkori amen valjani te ačhova džangavde, mangaja te „džangava“ e javeren da. Ola valjani te džanen so prorokujngja i Biblija bašo adava so ka slučinel pe ko sveto. Te na bistra kaj, otkeda ka počminel i bari nevolja, ka ovel but kasno e manušenge te počminen te služinen e Jehovaske. Adaleske but tano važno te propovedina avdive! *

7. So adžikerela o Jehova amendar avdive?

⁷ Ko akava kratko vreme so ačhilo angleder te počminel leskoro dive, o Jehova adžikerela amendar ponadari da te propovedina. Valjani te trudina amen te ova „sekogaš zafatime ki buti e Gospodareske“ (1. Kor. 15:58). O Isus prorokujngja so ka  kera. Keda kergja lafi bašo sa o važna bukja so ka slučinen pe ko posledna dive, ov phengja akava da: „Hem ko sa o narodija najangle mora te propovedinel pe o šukar haberi“ (Mar. 13:4, 8, 10; Mat. 24:14). Razmislin bašo akava: Sekogaš keda sian ki služba, tu pomožinea te ispolninel pe akava biblisko proroštvo!

8. Sar ponadari da napredujnela o propovedibe?

⁸ So šaj te vakera bašo adava sar napredujngja o propovedibe? Sekova berš, sa poviše manuša šunena o šukar haberi bašo Carstvo. Na primer, razmislin kobor barilo o broj taro objavitelija ko celo sveto ko akala posledna dive. Ko 1914 berš, sine 5.155 objavitelija ko 43 phuvja. A avdive, isi okolu 8,5 milionija objavitelija ko 240 phuvja! Ama, amari buti nane panda gotovo. Amen valjani ponadari da te propovedina kaj samo e Devleskoro Carstvo ka rešinel sa o problemija e manušengere (Ps. 145:11-13).

9. Soske mora ponadari da te propovedina o haberi bašo Carstvo?

⁹ Amen ponadari da ka propovedina sa džikote o Jehova na vakerela kaj valjani te čhinava. Panda kobor vreme ačhovela e manušenge te pendžaren e Jehova hem e Isuse? (Jovan 17:3). Na džanaja. Ama, džanaja kaj, sa džikote na počminela i bari nevolja, sarine so ispravno dikhena ko večno životo panda isi len prilika te prifatinen o šukar haberi (Dela 13:48). Sar šaj te pomožina adale manušenge angleder te ovel but kasno?

10. Sar pomožinela amenge o Jehova te sikava e manušen bašo čačipe?

¹⁰ Preku pli organizacija, o Jehova dela amen sa so valjani amenge te šaj te sikava e manušen bašo čačipe. Na primer, sekova kurko sikljovaja sar te kera adava ko sostanok Amaro životo hem služba. Ki leste sikljovaja so te vakera ko prvo razgovor hem ko povtorna posete. Osven adava, dobinaja upatstvija sar te vodina bibliska kursija. E Jehovaskiri organizacija dengja amen isto agjaar glavna publikacie službake. Ola pomožinena amenge...

• te počmina razgovorija

• te bajrara o interes ko javera

• te pottiknina e manušen te mangen te džanen nešto poviše baši Biblija

• te sikava bašo čačipe keda vodinaja biblisko kursi, hem

•   te ohrabrina adalen so isi len interes te džan ki amari internet-stranica hem te kanina len te aven ko sostanok.

Džangjola pe, nane dovolno samo te oven amen akala publikacie. Mora te koristina len. * Na primer, ako mukhea traktati ili spisanie nekaske so interesinela pe otkeda sine tut šukar razgovor lea, ov ka šaj te čitinel panda nešto džikote palem na posetinea le. Sekole jekhe amendar isi le odgovornost te propovedinel kobor so šaj sekova masek.

11. Soske sine kerdo o Onlajn kursi?

¹¹ O Jehova pomožinela e javerenge te džanen o čačipe hem preku o Onlajn kursi bašo proučibe i Biblija ki amari internet-stranica, jw.org^®. Soske sine kerdo akava kursi? Sekova masek, but baro broj manuša ko celo sveto rodena ko Internet te šaj te džanen nešto poviše baši Biblija. O lekcie taro akava kursi šaj te pomožinen lenge te džanen nešto poviše bašo e Devleskoro Lafi. Nesave taro manuša kolencar so keraja lafi šaj nane spremna te proučinen i Biblija amencar. Tegani, šaj te sikave lenge akava delo tari amari stranica ili te bičhale lenge link taro lekcie ki čhib so haljovena la. *

12. So šaj te sikljovel pe taro Onlajn kursi?

¹² Ko Onlajn kursi bašo proučibe i Biblija kerela pe lafi bašo akala teme: „I Biblija hem lakoro Avtori“, „Pendžarde bibliska ličnostija“ hem „O šukar haberi tari Biblija“. Ko akala teme, tane odgovorime akala pučiba:

• Sar šaj i Biblija te pomožinel amenge?

• Koj tane o Jehova, o Isus hem o angelija?

• Soske o Devel kergja e manušen?

• Soske isi muke hem lošnipe?

Ko akala lekcie isto agjaar kerela pe lafi sar o Jehova...

• ka čhivel krajo e mukenge hem e meribaske,

• ka vazdel e mulen, hem

• ka meninel o manušikane vlade e Devleskere Carstvoja.

13. Dali o onlajn kursi tano zamena bašo biblisko kursi kova so nudinaja le ki služba? Objasnin.

¹³ Akava onlajn kursi nane zamena bašo biblisko kursi kova so nudinaja le ki služba. O Isus dengja amen zadača te pomožina e manušenge te oven leskere učenikija. Nadinaja amen kaj o manuša so interesinena pe ka nakhaven o onlajn kursi, ka svidžinel pe lenge adava so čitinena, ka mangen te džanen poviše hem ka prifatinen te proučinen nekasaja i Biblija. Ko krajo tari sekoja lekcija, o manuš tano pottiknimo te rodel te proučinel i Biblija nesave Jehovaskere svedokoja. Preku amari internet-stranica, sekova dive ko prosek dobinaja poviše taro 230 molbe bašo biblisko kursi taro celo sveto. But tano važno lično te sikava e manušen baši Biblija!

14. Sprema i zapoved so dengja o Isus koja soj pišimi ko Matej 28:19, 20, so valjani te trudina amen te kera, hem soske?

¹⁴ Čitin Matej 28:19, 20. Keda vodinaja bibliska kursija, valjani te da amendar sa te pomožina e manušenge te oven e Isuseskere učenikija agjaar so ka sikava len te ikeren sa so ov zapovedingja. Valjani te pomožina lenge te haljoven kobor tano lenge važno te anen odluka te služinen e Jehovaske. Akava značinela kaj valjani te pottiknina len te keren adava so sikljovena, te den lafi kaj ka služinen e Jehovaske celo životo hem te krstinen pe. Samo agjaar  ka šaj te preživinen e Jehovaskoro dive (1. Pet. 3:21).

15. So našti te dozvolina amenge, hem soske?

¹⁵ Sar so više vakergjem, ačhola panda but hari vreme dži ko krajo taro akava sveto. Adaleske, našti te dozvolina amenge ponadari da te proučina manušencar so na kerena promene hem so nane len namera te oven e Hristoseskere učenikija (1. Kor. 9:26). Amari zadača tani itno! Isi panda but manuša so valjani te šunen o šukar haberi bašo Carstvo angleder te ovel but kasno.

16. Sprema Otkrovenie 18:2, 4, 5, 8, so mora te kerel sekova jekh amendar? (Dikh hem i fusnota.)

¹⁶ Čitin Otkrovenie 18:2, 4, 5, 8. Akala stihija sikavena kaj o Jehova adžikerela panda nešto ple slugendar. Nijekh čačutno hristijani na smejnela ko nisavo način te ovel povrzimo e hovavne religijaja. Angleder te doznajnel o čačipe, šaj nekoj sine členi ki nesavi hovavni religija. Šaj učestvujnela sine ko religiozna aktivnostija, ili, palem, dela sine prilogija. Angleder te ovel nekoj nekrsteno objaviteli, mora te čhinavel sekoja buti so povrzinela le e hovavne religijaja. Ako tano členi ki nesavi crkva ili ki javer organizacija koja tani povrzimi e Bare Vavilonea, ov valjani celosno te čhinavel plo členstvo agjaar so, na primer, ka bičhalel jekh pismo kote so jasno ka pišinel kaj na mangela te ovel više lakoro členi. *

17. Savi svetovno buti nane prifatlivo e hristijanenge, hem soske?

¹⁷ Jekh čačutno hristijani mora te pazinel leskiri svetovno buti te na ovel povrzimi ko nesavo način e Bare Vavilonea (2. Kor. 6:14-17). Na primer, na valjani te prifatinel buti tari nesavi crkva. Isto agjaar, čak ako nekoj više kerela buti ki nesavi javer firma, nane te ovel šukar te kerel redovno ili, palem, poviše vreme buti ko nesavo objekti tari hovavni religija. A ako isi le pli firma, sigurno nane te nudinel ple usluge nesave hovavne religijake ili te kerel nesavo dogovor baši buti laja. Soske isi amen asavko odlučno stavi bašo akava? Adaleske so ko nisavo način na mangaja te pomožina te širinen pe o sikljojba ili o običaija tari nesavi hovavni religija koja so nane čisto anglo e Devleskere jakhja (Isa. 52:11). *

18. Sar jekh phral ki pli buti sikavgja kaj šunela o bibliska načelija?

¹⁸ Angleder but berša, jekh preduzimači rodingja taro jekh starešina kole so sine le  pli firma te završinel jekh tikni stolarsko buti ki jekh crkva ki diz kote so živinela sine. Iako džanlja kaj o phral sekogaš odbinela te kerel buti ko proektija soj povrzime crkvencar, akava puti e preduzimače sine le bari potreba nekastar so šaj te završinel adaja buti. Ama, akava da puti o phral na manglja te phagel o bibliska načelija hem odbingja akaja buti. O javer kurko, ki lokalno novina iklili jekh slika taro javer stolari sar kovinela krsto ki crkva. Ako amaro phral prifatinela sine i buti, ki novina šaj ka ovel sine slika lestar. Zamislin tuke kobor adava šaj sine te ruminel leskoro šukar anav maškar o phralja hem o phenja! Isto agjaar, zamislin tuke sar ka osetinel pe sine o Jehova.

19-20. a) So siklilem ki akaja statija? b) Bašo so ka dobina odgovor ki naredno statija?

¹⁹ Sprema o bibliska proroštvija, i naredno važno buti koja so panda hari ka ispolninel pe ko sveto tani i objava bašo „mir hem sigurnost“. Adaleske so o Jehova sikavela amen, džanaja kaj o manuša nane te anen čačutno hem trajno mir, nego iznenadeno ka oven uništime. So valjani te kera angleder te slučinel pe sa adava? O Jehova adžikerela amendar ponadari da te propovedina o šukar haberi bašo Carstvo hem te trudina amen te kera učenikija. Isto agjaar, valjani te cida amen taro sa soj povrzimo e hovavne religijaja. Akava značinela kaj na valjani te ova členija ki nijekh organizacija koja soj delo taro Baro Vavilon hem na valjani te prifatina buti soj povrzimi laja.

²⁰ Isi javera da bukja so ka slučinen pe ko krajo taro „posledna dive“. A isi nešto javer da so adžikerela amendar o Jehova. Kola tane adala bukja hem sar šaj te spremina amen bašo sa adava so ka ovel ki idnina? O odgovor ka dobina le ki naredno statija.