1. I yini lexi hi kholwisaka leswaku hi hanya a ‘masikwini ya wugamu’?

LOKO u pswaliwe ntsrhaku ka lembe dzra 1914, swi hlaya leswaku u hanye wutomi byaku hinkwabyu a ‘masikwini ya wugamu’ ya xiyimu lexi xa mintxhumu. (2Tm 3:1) Hinkwezru hi swi twile leswi Yesu a nga profeta leswaku a swi ta yentxeka a nkameni lowu. Swoswo swi patsra tiyimpi, tindlala, ku tsrekatsreka ka misava, mintungu, ku tshima ka wuhoni ni ku xanisiwa ka vhanu va Yehovha. (Mt 24:3, 7-9, 12; Lk 21:10-12) Nakone hi vona hanyela dzra vhanu ledzri nga profetiwa ha mupostola Pawulo (Vona bokisi ledzri liki “ Leswi Vhanu Va Nga Xiswone Namunhla”.) Swanga vagandzreli va Yehovha, hi kholwa leswaku hi hanya a ‘masikwini ya wugamu’.​—Mik 4:1.

2. I tinhlamulo ta swivutiso swini leti hi fanelaka ku ti tiva?

² Leswi kutani ku khalutiki nkama wunyingi ku sukela hi 1914, swi komba leswaku swoswi hi hanya a wugan’wini bya ‘masiku ya wugamu’. Leswi wugamu byi nga kusuhi swinene, hi fanela ku tiva tinhlamulo ta swivutiso swa kukazri swa lisima, i nga leswi: I mintxhumu yini leyi taka yentxeka a ‘masikwini ya wugamu’? Mfuzri i mpswini leswi Yehovha a laviselaka leswaku hi swi yentxa na ha ha yimela mintxhumu yoleyo?

3. Mayelanu ni wuprofeta bya 1 Ba-le-Thesalonika 5:1-3, xana matiko ma ta huwelela yini?

³ Dondzra 1 Ba-le-Thesalonika 5:1-3. Pawulo a phata ‘siku dzra Hosi’. Hi ku ya hi mongo wa tsralwa ledzri, leswi swi hlaya nkama lowu sungulaka hi ku pfukeliwa ka ‘Babilona lwenkulu’, wu va wu gama hi Armagedon. ‘Babilona lwenkulu’ ku hlayiwa mfumu wa misava wa wukhongoti bya madzrimi. (Mpf 16:14, 16; 17:5) Na ke sala nkamanyana kuva “siku” ledzro dzri sungula, a tihosi ta misava ti ta huwelela leswi: ‘Ku zrulile, a ku na khombo!’ (Wundzruluteli byin’wana byi li: ‘Hi hanya hi ku zrula ni ku bekiseka!’) Vafumi va misava nkama  wun’wana va hlayisa xiswoswo loko va vulavula hi ku beka ku zrula ni ntwananu a makazri ka matiko. * Nambitanu, ku huwelela ka leswaku ‘ku zrulile, a ku na khombo’, loku hlayiwaka hi Bibele ku ta va ku hambanile. Ha yini? Loko ku tlhasa nkama lowo, swi nga yentxeka leswaku a vhanu va pimisa leswaku a vafumi va misava va swi kotile ku beka ku zrula ni ku yentxa misava yi va mbangu wa ku tsrhamiseka ni ku sizreleleka. Kambe ntiyiso wa mhaka hi leswaku ‘hi laha a mhangu yi ta [ka] txhuka yi va wela henhla xikan’we’, loko ku sungula ‘nhlomulo lowukulu’.​—Mt 24:21.

4. a) I yini leswi hi nga swi tivikiki mayelanu ni xitiviso xa leswaku ‘ku zrulile, a ku na khombo’? b) I yini leswi kutani hi swi tivaka mayelanu ni xitiviso lexo?

⁴ Ku ni swa kukazri leswi hi swi tivaka mayelanu ni xitiviso lexi liki ‘ku zrulile, a ku na khombo’. Nambitanu, ku ni swimbeni leswi hi nga swi tivikiki. A hi swi tivi leswi taka yentxa tihosi ti hlaya xitiviso lexo ni leswaku xi ta huwelelisiwa kuyini. Nakambe a hi swi tivi leswaku kumbexana i ta va xitiviso lexi taka hlayiwa kan’we swi hela kolanu kumbe swi ta va switiviso swa ku yentxa hi ku landzrelelana. A swi na mhaka leswaku swi ta yentxekisa kuyini, kambe lexi hi xi tivaka hi lexi: A hi fanelanga ku kanganyisiwa, hi pimisa leswaku tihosi ta misava ti nga beka ku zrula a misaveni. A matsrhan’wini ya leswo, xitiviso lexo xi ta va lexi hi nga byeliwa leswaku hi tivonela ka xone. Xi ta va xikombiso xa leswaku ‘siku dzra Hosi’ dzri kusuhi ni ku sungula!

5. Xana 1 Ba-le-Thesalonika 5:4-6 yi hi byela leswaku hi fanela ku yentxa yini ku komba leswaku hi tibekiselile ku yamukela ‘‘siku dzra Hosi’?

⁵ Dondzra 1 Ba-le-Thesalonika 5:4-6. Ku hi tsratsriya ka Pawulo ku hi pfuna ku vona leswi hi fanelaka ku swi yentxa ku tiva leswaku hi tibekiselile ku yamukela ‘siku dzra Hosi’. A te: ‘Hi nga khutsriyeleni swanga hi van’wana.’ Hi fanela ‘ku hiteka’ hi tsrhama na hi tivonela. Hi xikombiso, ku djuleka hi tivonela ka khombo dzra ku va hi nhingenela timhaka ta mafumela ya misava. Loko ho wela khombyeni ledzro, hi nga ndzruluka ‘va misava’. (Yh 15:19) Ha swi tiva ha kan’we leswaku a Mfumu wa Xikwembu Nkulukumba hi wone ntsena wu hi nyikaka ku lavisela ka leswaku wu ta beka ku zrula a misaveni hinkwayu.

6. I mpswini leswi hi djulaka ku pfuna vambeni ha swone, nakone ha yini?

⁶ Ina, hi fanela ku tsrhama na hi hiteka. Kambe, hi nkama wun’we hi djula ku pfuna van’wana leswaku va pfuka va twisisa leswi Bibele dzri nga swi profeta leswaku a swi ta humelela a misaveni. A hi dzrimukeni leswaku loko nhlomulo lowukulu wo za wu sungula, ku ta va ku nge he na nkama wa leswaku vhanu va sungula ku tizrela Yehovha. Leswo hi swone swi yentxaka leswaku ntizro wezru wa ku zrezra wu va wa xihatla ngopfu! *

7. Xana Yehovha a yimela leswaku hi yentxa yini ka nkama lowu?

⁷ Na ka ha sale nkamanyana akuva ku sungula “siku” dzrakwe, Yehovha a yimela leswaku hi tsrhama na hi khomekile a ntizrweni wa ku zrezra. Hi fanela ku tiyiseka leswaku hi na swinyingi swa ku swi yentxa a ntizrweni wa Hosi. (1Ko 15:58) Yesu a  profete leswaku i ntizro muni lowu a hi ta wu yentxa. Loko a khanela hi mintxhumu hinkwayu leyi a yi ta yentxeka swanga xikombiso xa masiku ya wugamu, a yengetele leswi: ‘Swi fanekeli leswaku evhangeli dzri zranga dzri hlayiwa matikweni hinkwawu.’ (Mr 13:4, 8, 10; Mt 24:14) Hi nga vona leswi: Nkama hinkwawu lowu u yaka ku zrezreni, u nhlengela a ku hetisiseni ka wuprofeta lebyi bya Bibele.

8. Xana hi swi tivisa ku yini leswaku a ntizro wa ku zrezra madzrungula ya Mfumu wu ya wu kula?

⁸ Xana hi nga hlaya yini mayelanu ni ku kula ka ntizro wa ku zrezra madzrungula ya Mfumu? Lembe ni lembe, a ntizro lowu wo ya wu kula. Hi xikombiso, pimisa hi ku yengeteleka ka nhlayu ya vazrezri va madzrungula ya Mfumu a misaveni hinkwayu ka masiku lawa ya wugamu. Hi 1914, a ku ni 5.155 wa vazrezri a matikweni lawa ma dzringanaka 43. Namunhla, ku ni kolomu ka 8.500.000 wa vazrezri ka 240 wa matiko! Nambi leswo, a ntizro wezru a wu si na gama. Hi fanela ku tama hi zrezrela vhanu leswaku i Mfumu wa Yehovha ntsena lowu taka lulamisa swizralanganya swa vhanu hinkwavu.​—Ps 145:11-13.

9. Ha yini hi fanela ku tama hi zrezra madzrungula ya Mfumu?

⁹ Na Yehovha a nga si na hlaya leswaku hi yima, a ntizro wa ku zrezra madzrungula ya Mfumu wu ta va na wu nga si na gama. Xana i nkama wungani lowu saliki akuva vhanu va tiva Yehovha Xikwembu Nkulukumba na Yesu Kriste? (Yh 17:3) A hi swi tivi. Kambe, lexi hi xi tivaka hi lexi: Na nhlomulo lowukulu wu nga si na sungula, mun’wana ni mun’wana lweyi a ‘bekiseliwiki vutomi lebyi nga helikiki’ a nga ha yamukela madzrungula lamanene ya Mfumu a va a hlawula ku tizrela Yehovha. (Min 13:48) Xana hi ta va pfunisa kuyini vhanu lava na we he nkama ke?

10. Hi wini mpfunu lowu Yehovha a hi nyikaka wone akuva hi dondzrisa vhanu ntiyiso?

¹⁰ Yehovha a tizrisa nhlengeletanu yakwe kuva a hi nyika hinkwaswu leswi hi swi vilelaka akuva hi dondzrisa vhanu ntiyiso. Hi xikombiso, ha wupfisiwa ka ntlhanganu wa le makazri ka vhiki. A ntlhanganu lowu wu hi pfuna ku tiva leswi hi fanelaka ku swi hlaya ka liyendzro dzra ku sungula ni le ka timpinda. Nakone wu hi dondzrisa leswi hi fanelaka ku fambisisa xiswone swidondzro swa Bibele. A nhlengeletanu ya Yehovha yi lulamisele Switizro Swa Ku Dondzrisa. Switizro leswi swi hi pfuna . . .

• ku sungula mabulu,

• ku yentxa vhanu va nyonxela ntiyiso,

• ku susumetela vhanu ku djula ku tiva leswi yengetelekiki,

• ku dondzrisa ntiyiso loko hi fambisa swidondzro swa Bibele, ni

• ku zramba lava nyonxelaka leswaku va yendzrela  pajina dzrezru dzra internet ni Tiyindlu ta Mfumu leti hi tlhanganaka ka tone.

Swi le livaleni leswaku a swi dzringani ku va ni switizro leswi ntsena. Ku djuleka hi swi tizrisa. * Hi xikombiso, loko u siyela xipapelana kumbe revhixta mhunu lweyi u viki ni bulo dzra ku nyonxisa naye, a ta swi kota ku sala a dondzra swin’wana ku ko u mu phindelela. Mun’wana ni mun’wana wezru a fanela ku tsrhama na a khomekile hweti ni hweti hi ku yentxa ntizro wa ku zrezra Mfumu.

11. Xana Tidondzro ta Bibele ka Internet ti hambeliwe yini?

¹¹ Vona xikombiso xin’wana xa ndlela leyi Yehovha a pfunaka vhanu ha yone ku dondzra ntiyiso, ku nga Tidondzro ta Bibele ka Internet ka jw.org/pt. (Lavisa ka ENSINOS BÍBLICOS > LIÇÕES ON-LINE.) Xana tidondzro leti ti hambeliwe yini? Hweti ni hweti, magidi-gidi ya vhanu va misava hinkwayu va djuletela tidondzro ta Bibele ka internet. Tidondzro leti nga ka pajina dzrezru dzra internet ti nga pfuna vhanu lavo ku sungula ku twisisa ntiyiso wa Zritu dzra Xikwembu Nkulukumba. Van’we va lava u khanelaka navu va nga ha ganaganeka ku pfumela ku fambiseliwa xidondzro xa Bibele. Loko swi li tanu, va kombe xiyenge lexi ka pajina dzrezru dzra internet kumbe u va zrumelela link dzra tidondzro leti. *

12. I yini leswi mhunu a nga swi dondzraka ka xiyenge xa Tidondzro ta Bibele ka Internet?

¹² Xiyenge xezru xa Tidondzro ta Bibele ka Internet xi vulavula hi tinhloko-mhaka leti: “Bibele Ni Mutsrali Wa Dzrone”, “Vhanu Lava Bibele Dzri Khanelaka Ha Vone Ngopfu” ni “Dzrungula Dzra Bibele Ledzri Nyikaka Dumbo”. Ka tinhloko-mhaka leto, ku dondzrisiwa leswi:

• Ndlela leyi Bibele dzri nga pfunaka mhunu ha yone

• I mani Yehovha, Yesu ni tintsrumi

• Leswi Xikwembu Nkulukumba a hambeliki swone vhanu

• Ha yini ku ni ku xaniseka ni wubihi

Tidondzro leti ti tlhela ti komba tindlela leti ha tone Yehovha . . .

• a taka helisa ku xaniseka ni ku fa,

• a taka pfuxa vafi, a tlhela a

• siva mimfumu ya vhanu hi Mfumu Wakwe.

13. Xana tidondzro leti nga ka internet ti siva lulamiselo dzra ku fambisa swidondzro swa Bibele? Tlhamuxela.

¹³ Tidondzro leti nga ka internet a ti sivi lulamiselo dzra ku fambisa swidondzro swa Bibele. Yesu a hi nyike ntizro wa lisima wa ku yentxa vadondzrisiwa. Hi lavisela leswaku vhanu lava nyonxelaka va ta kambela tidondzro leti nga ka internet, va nyonxela leswi va swi dondzraka, va tlhela va navela ku dondzra leswi yengetelekiki. Loko swi li tanu, swi nga yentxeka va pfumela ku fambiseliwa xidondzro xa Bibele. A wugan’wini bya dondzro yin’wana ni yin’wana, mudondzri a kutxiwa ku zrumela xikombelo akuva a kuma mhunu wa ku dondzra na yene Bibele hi ku kongoma. Hi kola ka pajina dzrezru dzra internet, hi xidzringaniso xa misava hinkwayu, hi yamukela swikombelo swa ku fambiseliwa xidondzro xa Bibele swa ku tlula 230 hi siku! I swa lisima kuva mhunu a fambiseliwa xidondzro xolexo hi ku kongoma!

14. Hi ku ya hi swileleto swa Yesu leswi nga ka Mattheo 28:19, 20, i yini leswi hi djulaka ku tikazratela swone, nakone ha yini?

¹⁴ Dondzra Mattheo 28:19, 20. Loko hi fambisa swidondzro swa Bibele, hi fanela ku yentxa hinkwaswu leswi hi nga swi kotaka akuva hi ‘dondzrisa matiko hinkwawu [yentxa vadondzrisiwa, Tradução do Novo Mundo] . . . , [hi] va dondzrisa ku bekisa hinkwaswu leswi [Yesu a hi] leletiki swone’. Hi fanela ku pfuna vhanu ku twisisa ndlela leyi swi nga swa lisima ha yone kuva va yima na Yehovha ni Mfumu wakwe. Leswi swi tlhamuxela leswaku hi fanela ku dzringisa ku kutxa vhanu ku yentxa ntiyiso wu va wavu hi ku tizrisa leswi va swi dondzraka, va  nyiketela wutomi byavu ka Yehovha, va tlhela va babatisiwa. Hi kone va taka kota ku huluka ka siku dzra Yehovha.​—1Pe 3:21.

15. I yini leswi hi ngeke na ku swi yentxa, nakone ha yini?

¹⁵ Hi laha swi khumbiwiki ha kone ku sunguleni, ke sala nkamanyana akuva ku hela xiyimu lexi xa mintxhumu. Xileswo, a hi nge heti nkama hi ku dondzra Bibele ni vhanu lava ngeke na ku navela loku vonekaka ka ku va vadondzrisiwa va Kriste. (1Ko 9:26) Ntizro wezru i wa xihatla! Ku ni vhanu vanyingi lava va ha fanelaka ku yingela dzrungula dzra Mfumu na dambu dzri nga si na pela.

16. Hi ku ya hi Apfuletelo 18:2, 4, 5, 8, xana hinkwezru hi fanela ku yentxa yini? (Vona ni ntlhamuxelo wa le hansi.)

¹⁶ Dondzra Apfuletelo 18:2, 4, 5, 8. Tindzri mana leti ti beka livaleni swin’wana leswi Yehovha a yimelaka leswaku vagandzreli vakwe va swi yentxa. Vakriste hinkwavu va ntiyiso va fanela ku fambela kule na Babilona Lwenkulu. Loko mhunu lweyi a fambiseliwaka xidondzro a nga si na sungula ku dondzra ntiyiso, swi nga yentxeka a ve xizro xa wukhongoti bya kukazri bya madzrimi. A nga ha va a yile tinsontweni a tlhela a nhingenela swihena swa wukhongoti byobyo bya madzrimi. Kumbe swi nga yentxeka a hlenge mali ku pfuna nhlengeletanu yoleyo. Xileswo, loko a nga si na pfumeleliwa ku va muzrezri lwa nga babatisiwangakiki, mhunu lweyi a fambiseliwaka xidondzro xa Bibele a fanela ku tsrema xwavi ni wukhongoti bya madzrimi. A fanela ku tsrala papela a tivisa khale ka kezreke ledzri a a khongela ka dzrone leswaku a humile. Kumbe a fanela ku tizrisa tindlela timbeni ta ku dlaya wuxaka byakwe ni kezreke ledzro ni tinhlengeletanu tini na tini leti yentxaka tlhelo ka Babilona Lwenkulu. *

17. Xana vakriste va fanela ku tivonela ka ntizro wa ku tihanyisa wa muxaka muni, nakone ha yini?

¹⁷ Mukriste wa ntiyiso a fanela ku tiyiseka leswaku ntizro wakwe wa ku tihanyisa a wu na wuxaka ni byitsrongo na Babilona Lwenkulu. (2Ko 6:14-17) Hi xikombiso, a nge pfumeli ku tholiwa hi kezreke. Handle ka leswo, mukriste lweyi a tholiwiki hi komponi ya kukazri a nge pfumeli ku yentxa ntizro hi nkama wa ku leha ka yindlu leyi yisaka mahlweni wukhongoti bya madzrimi. Nakone loko a ni komponi ya ka kwakwe, nakunene a nge na ku titsralisa leswaku komponi yakwe yi langiwa kumbe yi yentxela ntizro xiyenge xini na xini xa Babilona Lwenkulu. Ha yini hi titwisa xileswo hi mhaka leyi? Hi leswi hi nga djulikiki ku hlangamela a mintizrweni ni le swidohweni swa tinhlengeletanu ta wukhongoti leti nyamiki a mahlweni ka Xikwembu Nkulukumba.​—Eza 52:11. *

18. Xana makwezru wa kukazri a namazrelise kuyini minsinya ya milawu mayelanu ni ntizro wa ku tihanyisa?

 ¹⁸ A malembeni lama khalutiki, nkulu mun’we wa bandla lweyi a o titizrela a kombeliwe hi n’wini wa komponi ya kukazri leswaku a yentxa xintizrwana xa wuvatli ka kezreke ledzri a dzri li doropeni ledzri makwezru lweyo a a tsrhama ka dzrone. N’winyi wa komponi a a swi tiva leswaku makwezru minkama hinkwayu a a yala ku tizra ka makezreke. Kambe ka nkama wolowo n’winyi wa komponi a a khamekile, xileswo a a djula mhunu wa ku ya yentxa ntizro lowo. Nambitanu, makwezru a namazrele minsinya ya milawu ya Bibele a va a yala ntizro lowo. Vhiki ledzri landzrelaka, jornali dzra doropa ledzro dzri kombise mufoto wa muvatli mun’wana na a bekela xihambanu a kezrekeni. Loko makwezru a e pfumela ku ya tizra, inha i ve yene lwa humiki ka mufoto ka jornali ledzriya. Yanakanya hi ndlela leyi a a ta va a tihone vito ha yone a makazri ka vakriste-kulobye! Nangweso, yanakanya hi leswi Yehovha inhaka a titwise xiswone.

19-20. a) Xana hi dondzre yini ka nhloko-mhaka leyi? b) Hi swini swin’wana leswi hi fanelaka ku swi dondzra?

¹⁹ Hi ku ya hi wuprofeta bya Bibele, ntxhumu wa wukulu lowu landzrelaka wu taka humelela ku nge kungani a misaveni hinkwayu i kuva matiko ma huwelela ma ku: ‘Ku zrulile, a ku na khombo!’ Hi ku dondzrisiwa hi Yehovha, ha swi tiva leswaku matiko a ma nga ti kuma ku zrula ka ntiyiso ni loku nga helikiki. Xana hi fanela ku yentxa yini na mhaka leyo yi nga si na yentxeka, leyi taka landzriwa hi ku helisiwa ka xitxhuketa? Yehovha a yimela leswaku hi tsrhama na hi khomekile a ntizrweni wa ku zrezra dzrungula dzra Mfumu ni ku dzringisa ku yentxa vadondzrisiwa lava yengetelekiki. Hi nkama wun’we, hi fanela ku hambana ni wukhongoti hinkwabyu bya madzrimi. Leswo swi patsra ku tsrhika ku va xizro xa tinhlengeletanu ta Babilona Lwenkulu ni ku yala mintizro leyi fambisanaka na yene.

²⁰ Ku ni swin’wana leswi taka yentxeka loko ku hela ‘masiku ya wugamu’. Nakone ku ni mintxhumu yin’wana leyi Yehovha a yimelaka leswaku hi yi yentxa. Hi yini mintxhumu leyi, nakone hi nga swi kotisa kuyini ku tibekisela akuva hi lavisana ni hinkwaswu leswi taka yentxeka ku nga li khale? Hi ta vona nhlamulo ka nhloko-mhaka leyi taka.