1. Heeˈnoommohu ‘goofimarchu barri’ jeefora ikkinota huluullammeemmokkihu mayiraati?

ATI ilamoottohu 1914 kawaati? Hatto ikkiro, heeshshokki diro woˈma heeˈroottohu alamete “goofimarchi barri” giddooti. (2 Xim. 3:1) Ninke baalunku Yesuusi heeˈnoommo yanna daafira masaalinori woˈmanna macciishshinoommo. Kuri giddo gamu olaho, hudete, baattote huxanooti, dhibbu batiˈrate, bunshe batiˈratenna Yihowa mannira dartu iillate. (Mat. 24:3, 7-9, 12; Luq. 21:10-12) Qoleno, mannu akati soqqamaasinchu Phaawuloosi masaalotenni kulinohu gedeeha ikkinota laˈnoommo. (“ Xaa Yannara Mannu Hiittooho?” yitanno saaxine lai.) Yihowa magansiˈneemmore ikkinoommo daafira heeˈnoommohu ‘goofimarchu barri’ jeefora ikkinota dihuluullammeemmo.—Mik. 4:1.

2. Dawaro afiˈra hasiissannonke xaˈmuwa hiikkuriiti?

² Goofimarchu barri 1914 hanafinkunni lowo diri saino daafira heeˈnoommohu goofimarchu barri jeeforaati. Alamete goofimarchi lowo geeshsha gambisino daafira aante noo xaˈmuwara dawaro afiˈra hasiissannonke: ‘Goofimarchu barri’ jeefora mayi ikkanno? Yihowa hakka geeshsha ninke maa assinammora hasiˈranno?

3. Umi Teselonqe 5: 1-3 masaalloonni garinni buusantino daga mayite lallabbanno?

³ Umi Teselonqe 5:1-3 nabbawi. Kowiicho Phaawuloosi Yihowa barri daafira xawisino. Konni qummeeshshi giddo kulloonnihu Yihowa barri alame woˈmate noota kaphu ammaˈno  riqibbannote “Bayira Baabiloone” baonni kayise Armagedooni oli jeefo geeshsha noo yanna kulannoho. (Aju. 16:14, 16; 17:5) Kuni barri hanafara albaanni buusantino daga “salaamenna teense heeˈnanni yanna daggino!” yite lallabbanno. Alamete gashshaano mito woyite gobbuwate mereero noo xaadooshshi woyyaawinota xawisateno togoo yaatto horoonsidhanno. * Kayinni Qullaawu Maxaafi kulannohu “salaamenna teense heeˈnanni yanna daggino” yine lallambanni lallawi konninni baxxinoho. Mayira? Korkaatuno konne lallawo lallambanni woyite mannu alamete gashshaano alame keeru woˈminotanna teense heeˈnannita assitino yee hedara dandaanno. Adda coyiˈniro kayinni hakka woyintenni bayiru qarri hanafanno daafira “bao hedeweelcho” daggannonsa.—Mat. 24:21.

4. (a) “Salaamenna teense heeˈnanni yanna daggino!” yine lallambanni lallawi daafira anfoommori maati? (b) Konni lallawi daafira anfoommokkiri maati?

⁴ “Salaamenna teense heeˈnanni yanna daggino” yine lallambanni lallawi daafira anfoommorinna anfoommokkiri no. Konne lallawo lallambanni gede assannori maatironna hiittoonni lallambanniro dianfoommo. Qoleno, duucha hinge ikko mitte hinge calla lallambe agurannirono dianfoommo. Ikkihano ikkiro, alamete gashshaano alamete addu salaame abbitino yine hende dogama dihasiissannonke. Isinni baqqi yine agadhine keeshshinoommohu konne lallawooti. Kuni lallawi Yihowa barri hanafara kae noota leellishanno malaateeti!

5. Umi Teselonqe 5:4-6 noo amaale Yihowa barrira qixxaawate kaaˈlitannonkehu hiittoonniiti?

⁵ Umi Teselonqe 5:4-6 nabbawi. Phaawuloosi amaalino amaale Yihowa barrira qixxaawate maa assa hasiissannonkero kultannonke. Konnira “wolootu gede goxa agurre” “baqqi yine” heeˈra hasiissannonke. Lawishshaho, tenne alamehu poletiku hajora anga wodhineemmokki gede qoropha hasiissannonke. Poletiku hajora anga wodhineemmoha ikkiro tenne alame wido ikkineemmo. (Yoh. 15:19) Alamete salaame abbitannoti Maganu Mangiste calla ikkitinota anfoommo.

6. Wolootu ma assitanno gede kaaˈla hasiissannonke? Mayira?

⁶ Ninke baqqi yine heeˈneemmoti egennantinote; qoleno wolootuno baqqi yite heedhanno gedenna Qullaawu Maxaafi tenne alame aana ikkanno yee kulinore huwattanno gede kaaˈla hasiissannonke. Bayiru qarri hanafihu gedensaanni mannu Yihowawa higanno gede faˈnaminonsa waalchi cufamannota qaaga hasiissannonke. Sabbakate looso wiinamme loosa hasiissannonkehu iseraati! *

7. Yihowa xaa yannara ma assinammora hasiˈranno?

⁷ Yihowa ‘barrisi’ hanafara gatte noote tenne shiima yanna giddo diinaggaambe sabbankammora hasiˈranno. Konni daafira, ‘Mootichu  loosi’ batiˈrinonkere ikkate sharrama hasiissannonke. (1 Qor. 15:58) Yesuusi ma assa hasiissannonkero balaxe kulinonke. Isi goofimarchu yannara ikkannoha qara qara coye kuli yannara togo yiino: “Gosa baalate naqaashshe ikkanno gede kuni Maganu Gashshootihu Danchu Duduwi gobba baalate kulamanno.” (Maq. 13:4, 8, 10; Mat. 24:14) Soqqansho fulleemmo kiiro tini Qullaawu Maxaafi masaalo woˈmitanno gede kaaˈlinanni heeˈnoommo.

8. Maganu Mangistehu sabbakate loosi halaˈlanni noota mayinni anfeemmo?

⁸ Maganu Mangistehu sabbakate loosi mageeshshi geeshsha halaˈlino? Diru kiiro lowo manni Maganu Mangisteha dancha duduwo macciishshanni no. Hanni goofimarchu barri giddo alamete doyichora Maganu Mangiste halashshaano kiiro lexxitino gara laˈno. Alba 1914nni 43 gobbuwara halashshaanote kiiro 5,155 ikkitanno. Xaa yannara kayinni 240 gobbuwara 8.5 miliyoone saˈanno halashshaano no. Ikkirono xaano sabbakate loosinke dikaino. Mannu ooso qarra tirtannoti Maganu Mangiste calla ikkitinota woˈmanka woyite duduwa hasiissannonke.—Far. 145:11-13.

9. Maganu Mangisteha dancha duduwo woˈmanka woyite sabbaka hasiissannonkehu mayiraati?

⁹ Yihowa ikkinona agurre yaa geeshsha sabbakate loosonke diagurreemmo. Ikkina mannu Maganu Yihowanna Yesuusi Kiristoosi daafira rosannoti mageeshshi yanna gattino? (Yoh. 17:3) Dianfoommo. Bayiru qarri hanafa geeshsha “hegere heeshsho afiˈrate gara ikkitinoti wodanu dooˈˈo noonsari” baalu dancha duduwo macciishshite Yihowara soqqantara dandiitannota anfoommo. (Soq. 13:48, NW) Barre baikki konne manna kaaˈla dandiineemmohu hiittoonniiti?

10. Yihowa mannaho halaale rosiisate kaaˈlannonkere maa uyinonke?

¹⁰ Yihowa dirijjitesi widoonni mannaho halaale rosiisate kaaˈlannonkere baala aannonke. Lawishshaho, lamalate kiiro Kiristaanu Heeshshonna Soqqansho Gambooshshiwa qajeelsha afiˈneemmo. Konni gambooshshiwa manna umo marre hasaawinseemmo woyitenna galagalle marre hasaawinseemmo woyite mayineemmoro ronseemmo. Qoleno Qullaawa Maxaafa xiinxallinseemmo gara ronseemmo. Yihowa dirijjite Rosiisate Horoonsiˈneemmo Borro qixxeessitinonke. Tini borro aane noore assate kaaˈlitannonke.

•   hasaawa hanafate

• mannu hasatto kakkayisate

• mannu lede rosa hasiˈranno gede kaaˈlate

• Qullaawu Maxaafi halaale rosiisatenna

• hasatto noonsa manni webisayitenke laˈˈanno gedenna Gambooshshu Addaraashenke daanno gede koyisate.

Rosiisate horoonsiˈneemmo borro afiˈranke calla diˈˈikkitanno. Seekke horooonsiˈra hasiissannonke. * Lawishshaho hasatto noosi manchi ledo dancha gede hasaawitto gedensaanni tiraakte woy metseete uyite harittosiro, wole woyite xaaddinanni woyitira nabbawe agarannohe. Aganu kiiro Maganu Mangisteha dancha duduwo diinaggaambe sabbaka mitti mittinke qeechaati.

11. Interneetete Widoonni Qullaawa Maxaafa Xiinxalla yaanno gafa qixxeessinoonnihu mayiraati?

¹¹ Yihowa mannu halaale rosara kaaˈlannoti wole doogo jw.org aana nooha Interneetete Widoonni Qullaawa Maxaafa Xiinxalla yaanno gafa horoonsiˈreeti. (QULLAAWU MAXAAFI ROSO > INTERNEETETE WIDOONNI QULLAAWA MAXAAFA XIINXALLA yaannohu hunda lai.) Konne roso qixxeessinoonnihu mayiraati? Aganu kiiro alamete doyichora lowo kume ikkanno manni Qullaawu Maxaafi halaale rosate Interneete laˈˈanno. Farcidhinanni manni giddo mitu Qullaawa Maxaafa xiinxallara koyissinanni woyite adha giwara dandaanno. Hatto ikkiro, webisayitenke aana nooha konne gafa leellishshinara woy linke sokkinansara dandiitinanni. *

12. Interneetete Widoonni Qullaawa Maxaafa Xiinxalla yaanno gafa xiinxallanno manchi maa rosanno?

¹² Interneetete Widoonni Qullaawa Maxaafa Xiinxalla yaanno gafira aane noo rosi no: “Qullaawa Maxaafanna Qullaawu Maxaafi Anna” “Qullaawu Maxaafi Giddo Kulloonnire” “Qullaawu Maxaafi Kulanno Hexxo.” Konni gafi widoonni Qullaawa Maxaafa xiinxallanno manchi aane noore rosanno:

• Qullaawu Maxaafi kaaˈlannonke gara

• Yihowa, Yesuusinna sokkaasinete daafira

• Maganu manna kalaqinohu mayiraatiro

• Qarrunna bunshe heedhinohu mayiraatiro

Qoleno konni gafira Yihowa. . .

• qarranna reyo hunannota

• reyitinore kayisannotanna

• mannu ooso qarra tira hooginoha uullate gashshoote hune umisi Mangiste xintannota xawinsoonni.

13. Interneetete Widoonni Qullaawa Maxaafa Xiinxalla yaanno gafi mannaho ninke Qullaawa Maxaafa xiinxallinseemmo qixxaawo riqiwanno? Xawisi.

¹³ Interneetete Widoonni Qullaawa Maxaafa Xiinxalla yaanno gafi mannaho ninke Qullaawa Maxaafa xiinxallinseemmo qixxaawo riqiwannoha diˈˈikkino. Yesuusi manna rosaano assate qoosso uyinonke. Interneetete Widoonni Qullaawa Maxaafa Xiinxalla yaanno gafi aana noo rosi, xiinxallanno manni rosinore naadanno gedenna lede rosa hasiˈranno gede assannonsa yine hendeemmo. Hatto ikkiro, insa Qullaawa Maxaafa xiinxallate sumuu yitara dandiitanno. Konni gafihu mittu mittunku rosi jeefora nabbawanno manchi Qullaawa Maxaafa xiinxallinsasira xaˈmiˈranno gede koyinsoonni. Alamete doyichora barru baala mereerimunni 230 saˈˈanno manni webisayitenke widoonni Qullaawa Maxaafa xiinxallinsanninsa gede xaˈmiˈranno. Xaano mannaho Qullaawa Maxaafa ninke xiinxallisa hasiissannonke.

14. Yesuusi Maatewoosi 28:19, 20 hajajino garinni maa assate sharrama hasiissannonke? Mayira?

¹⁴ Maatewoosi 28:19, 20 nabbawi. Manna Qullaawa Maxaafa xiinxallinseemmo woyite insa ‘Yesuusi hajajinore baala agadhitanno  gedenna rosaanosi’ ikkitanno gede kaaˈlate dandiinummore baala assineemmo. Yihowara soqqamanna Mangistesi kaaˈla mageeshshi geeshsha hasiissannota ikkitinoro mannu huwatanno gede kaaˈla hasiˈneemmo. Hatto assate mannu rosinore loosunni leellishe, heeshshonsa Yihowara sayise oyenna cuuame halaale seekke cuˈmiˈranno gede kaaˈlate sharrammeemmo. Mannu Yihowa barra gate saˈˈa dandaannohu hatto assiˈro callaati.—1 Phe. 3:21.

15. Maa assinanni yanna guda dihasiissannonke? Mayira?

¹⁵ Aleenni kulloonninte gede tenne alame goofimarchi daate gattino yanna lowo geeshsha shiimate. Hakko daafira Kiristoosi rosaancho ikka hasiˈrannokki manchira Qullaawa Maxaafa xiinxallinsanni yanna digundeemmo. (1 Qor. 9:26) Sabbakate loosinke wiinamme loonsanniho! Yanna goofukkinni Maganu Mangisteha dancha duduwo macciishshe adha hasiˈrannohu lowo manni no.

16. Yohaannisi Ajuuja 18:2, 4, 5, 8 kultanno garinni baalunku maa assa hasiissannonke? (Lekkaalliidi qaagiishshano lai.)

¹⁶ Yohaannisi Ajuuja 18:2, 4, 5,  8 nabbawi. Kuri qummeeshshuwa Yihowa magansidhannosiri assitara hasiˈrannoha wole coye kultanno. Baalunku addu Kiristaani Bayira Baabiloone ledo xaadooshshe afiˈrinohu aye coyiwiinnino xeertiˈra hasiissannonsa. Mittu Qullaawu Maxaafi rosaanchi halaale rosara albaanni kaphu ammaˈno miila ikkara dandaanno. Isi insa ledo magansiˈrannohanna addi addi doogonni kaaˈlannoha ikkara dandaanno. Woy hatte dirijjite woxunni kaaˈlannoha ikkara dandaanno. Qullaawu Maxaafi rosaanchi cuuaminokki halashshaancho ikke soqqamanno gede fajjinasira albaanni kaphu ammaˈno ledo noosi lase baala agura hasiissannosi. Isi alba eanno Beetekiristaanera xaate miillansa ikkinokkita kule sokkate borro borreessa, hattono Bayira Baabiloone ledo xaado afidhinote baalante dirijjite ledo noosi aante agura hasiissannosi. *

17. Mittu Kiristaanchi hiittoo looso diloosanno? Mayira?

¹⁷ Addu Kiristaanchi loosanno loosi Bayira Baabiloone ledo xaadooshshe afiˈrinoha ikkannokki gede qoropha hasiissannosi. (2 Qor. 6:14-17) Lawishshaho, Beetekiristaanete qaxarame diloosanno. Qoleno, wole dirijjitera qaxarame loosanno Kiristaanchi kaphu ammaˈnora horoonsiˈnanni minna ledo xaadooshshe afiˈrinoha lowo looso diloosanno. Hattono, mittu Kiristaanchi Bayira Baabiloone ledo xaadooshshe afidhino dirijjite giddo mitore loosate dicaratanno woy togoo dirijjitewiinni kontiraata adhe diloosanno. Togoore effiˈne gimbeemmohu mayiraati? Korkaatuno Maganu illera baattaame  ikkitinotehu kaphu ammaˈno loosiranna cubbisera karsama hasiˈneemmokki daafiraati.—Isa. 52:11. *

18. Mittu rodii loosanno looso lainohunni Qullaawu Maxaafi biddishsha seekke cuˈmiˈrinohu hiittoonniiti?

¹⁸ Boodu dirira albaanni mitto hanaatsimmate looso loosannoha songote cimeessa isi heeˈranno katami giddo noo Beetekiristaanera shiima hanaatsimmate looso loosanno gede xaˈminoonnisi. Loosanno gede xaˈminosi manchi roduu Beetekiristaanete ledo xaado afiˈrino looso loosa hasiˈrannokkita afino. Tenne yannara kayinni kuni manchi loosanno manna lowo geeshsha hasiˈrino. Roduu kayinni Qullaawu Maxaafi biddishsha seekke cuˈmiˈrino daafira konne looso loosa giwino. Aantino lamalara wolu hanaatsichi Beetekiristaanete masqala sutanna leellishshanno foto hakko qooxeessira attammanni gaazeexira fultino. Rodiinke hakko looso adhinoha ikkoommero gaazeexu aana fultannoti isi fotooti. Hatto ikkiro ammanate roduuwisira isira mayi lao heedhannonsaro heda dandiineemmo! Qoleno Yihowara mayi macciishshamasira dandaannoro hedde!

19-20. (a) Konni birxichira maa ronsoommo? (b) Aananno birxichira maa ronseemmo?

¹⁹ Qullaawu Maxaafi masaalo garinni aantete alamete aana ikkitannoti qara ikkito buusantino daga muli yanna giddo “salaamenna teense heeˈnanni yanna daggino!” yite lallabbanno lallawooti. Yihowa rosiisinonke daafira buusantino daga alamete geeddanno salaame abbite affannokkita anfoommo. Konni lallawiranna aante daggannote hedeweelcho baora albaanni maa assa hasiissannonke? Yihowa Mangistesiha dancha duduwo diinaggaambe sabbankammoranna albinni roore manna rosaano assinammora hasiˈranno. Qoleno kaphu ammaˈno baalantewiinni xeertiˈra hasiissannonke. Hatto assa dandiineemmo doogga giddo mitte, kaphu ammaˈno ledo xaadooshshe afidhino dirijjittawiinni xeertiˈratenna Bayira Baabiloone ledo xaado afiˈrino looso giwate.

²⁰ ‘Goofimarchu barri’ jeefora ikkannori wolurino no. Qoleno Yihowa assinammora hasiˈrannohu wolu coyino no. Kuri coyibba maati? Muli yannara ikkanno coyi baalunkura qixxaawa dandiineemmohu hiittoonniiti? Aananno birxichira tenne daafira ronseemmo.