WOTO 40
I musu abi hia soni ta du da Gadu a di kaba pisi u „dee lasiti daka” aki
„Un musu tan gingin a di biibi un ta biibi Masa Jesosi dë. Wan musu disa möönsö. Un musu ta biinga hiniwanten a di wooko u Masa.”—1 KOL. 15:58.
KANDA 58 Suku sëmbë di lobi Gadu
WANTU SONI U DI WOTO *
1. Unfa u du dë seiki taa u ta libi a „dee lasiti daka”?
DE PAI i baka di jaa 1914 u? Wë ee de pai i baka di jaa dë, hën da sensi di de pai i, hën i ta libi a dee lasiti daka u di goonliba aki (2 Tim. 3:1). Hii u tuu ta si fa dee soni dee Jesosi bi taki u dee lasiti daka, ta pasa a di ten fuu aki, söseei u ta jei taa de ta pasa. Jesosi bi taki taa gaan feti bi o dë, hangi pena bi o dë, goon bi o ta seki ta latja kamian, taku siki bi o dë, sëmbë bi o ta ko möön hogi, söseei a bi taki taa sëmbë bi o ta du ku dee sëmbë u Jehovah (Mat. 24:3, 7-9, 12; Luk. 21:10-12). U ta si tu taa sëmbë ta libi kumafa apösutu Paulosu seei bi taki. (Luku di pisi „ Di fasi fa sëmbë dë a di ten aki”.) U dee dinima u Jehovah dë seiki taa u ta libi a di kaba pisi u „dee lasiti daka”.—Mik. 4:1.
2. Un hakisi woo piki a di woto aki?
2 U di sömëni jaa pasa kaa sensi di jaa 1914, mbei a musu u dë sö taa nöunöu u ta libi a di kaba pisi u „dee lasiti daka”. U di di kaba ko zuntu sö, mbei a dë fanöudu fuu feni di piki u wantu fanöudu hakisi. Dee hakisi aki da: Andi da wantu soni di o pasa a di kaba pisiten u „dee lasiti daka”? Nöö andi Jehovah kë fuu ta du ufö dee soni dë ko pasa?
ANDI O PASA A DI KABA PISITEN U „DEE LASITI DAKA”?
3. Andi dee tiima o taki, te u luku di tjabukama woto di sikifi a 1 Tesalonika 5:1-3?
3 Lesi 1 Tesalonika 5:1-3, NW. Paulosu bi taki soni u „di daka u Jehovah”. Di daka u Jehovah di di tëkisi aki ta taki, da di pisiten di de o hopo go feti ku di „Gaan Babilon”, te go miti di ten u di feti u Amagedon. Di „Gaan Babilon” aki da hii dee poipoi keiki u goonliba tuu (Ako. 16:14, 16; 17:5). Ufö di daka aki bigi, nöö dee tiima o taki taa: „Aai, hii soni dë bunu kaa. An dë fuu fëëë möön.” Dee tiima lo’ u taki wanlö soni kuma di soni aki, te de kë lei taa de ta seeka soni u mbei sëmbë u tookatooka köndë ko ta libi fiifii ku deseei. * Ma te de o taki di soni aki, nöö soni an o waka kumafa sëmbë o mëni. Faandi mbei u taki sö? Wë te dee tiima taki di soni dë, nöö sëmbë o mëni taa dee tiima feni wan fasi u mbei soni ko ta waka möön bunu a goonliba. Ma te u de kë mëni, nöö di „gaan fuka” o bigi, nöö kaba seei de o kaba a sösö.—Mat. 24:21.
4. (a) Un soni u musu ko sabi jeti te a nama ku di taki di dee tiima o taki taa: „Aai, hii soni dë bunu kaa. An dë fuu fëëë möön”? (b) Un soni u sabi kaa?
4 U sabi so soni di nama ku di taki di dee tiima o taki taa: „Aai, hii soni dë bunu kaa. An dë fuu fëëë möön.” Ma so soni dë tu di wa sabi. Wa sabi andi o mbei dee tiima taki di soni aki, söseei wa sabi na un fasi de o taki ën. Boiti di dë, wa sabi ee de o taki di soni aki sömëni pasi, nasö ee de o taki ën wan kodo pasi be hii sëmbë jei nöö a kaba. Ma di soni di u sabi, hën da libisëmbë an sa mbei bööböö libi ko dë a goonliba. Fëën mbei wa musu mbei de ganjan u kisi ku di soni u de di de o taki dë. Ma u musu hoi a pakisei taa di soni di de o taki dë, da di soni di di Bëibel bi taki gaanduwe kaa taa u musu dë setiseti ta wakiti. Di soni dë hën o lei taa a fika piki, nöö di „daka u Jehovah” dou!
5. Unfa 1 Tesalonika 5:4-6 ta heepi u fuu sa dë ku wojo setiseti ta wakiti di „daka u Jehovah”?
5 Lesi 1 Tesalonika 5:4-6. Paulosu ta piki u andi u musu du fuu sa dë setiseti ta wakiti u te „di daka u Jehovah dou”. „Wa musu libi kuma u ta duumi” kumafa dee woto sëmbë ta du ën. Ma u musu „dë seei ku wojo setiseti” ta wakiti. U musu ta köni fu wa go nama ku politiki soni u di goonliba aki. Ee u go nama ku politiki soni, nöö a o ko dë taa u „dë ku [dee sëmbë u di goonliba aki] a wan së” (Joh. 15:19). U sabi taa di Könuköndë u Gadu wanwan nöö sa tja bööböö libi ko a goonliba aki.
6. Un soni u kë heepi woto sëmbë u de du, nöö faandi mbei u kë heepi de u de du di soni dë?
6 Boiti di dë di u musu dë setiseti ta wakiti, u musu ta heepi woto sëmbë tu u de ko sabi andi di Bëibel ta taki taa o pasa. U musu hoi a pakisei taa te di gaan fuka bigi kaa, nöö sëmbë an o sa feni pasi möön u de ko dini Jehovah. Fëën mbei a dë fanöudu fuu ta du di peleikiwooko ufö a lati poi! *
I MUSU TA PELEIKI HII JUU
7. Andi Jehovah kë fuu ta du a di ten aki?
7 U di „di daka” u Jehovah zuntu, mbei Jehovah kë fuu ta mbei taanga möiti fuu du di peleikiwooko a di kölö pisiten di fika aki. 1 Kol. 15:58). Jesosi bi taki a fesi andi u bi o ta du. Di a bi taki u dee peipei soni dee bi o ta pasa a dee lasiti daka, hën a bi taki tu taa: „Hii nasiön sëmbë u goonliba musu ko jei di bunu njunsu u Gadu, biga te a dë sö kaa ufö di kaba u goonliba sa dë” (Maik. 13:4, 8, 10; Mat. 24:14). Pakisei di soni aki: Hiniwan juu te i go a di peleikiwooko, nöö i ta mbei di tjabukama woto aki pasa tuutuu!
U „musu ta biinga hiniwanten a di wooko u Masa” (8. Faandi mbei u sa taki taa di peleikiwooko nango a fesi?
8 Unfa soni ta waka a di paaja di u ta paaja di buka u di Könuköndë? Hiniwan jaa, di peleikiwooko nango a fesi. Pakisei unfa dee Könuköndë peleikima ko möön hia. A di jaa 1914, nöö i bi abi 5155 peleikima a 43 köndë. Nöunöu söwan 8.500.000 peleikima ko dë a 240 köndë! Ma hii fa a dë sö, tökuseei wa kaba du di wooko fuu jeti. U musu ta piki sëmbë go dou taa di Könuköndë u Gadu nöö sa puu libisëmbë a fuka.—Ps. 145:11-13.
9. Faandi mbei u musu ta paaja di bunu buka u di Könuköndë go dou?
9 Solanga Jehovah an taki taa di wooko kaba, nöö woo ta paaja di bunu buka u di Könuköndë go dou. Un mëni ten fika jeti u sëmbë sa feni pasi ko sabi soni u Jehovah Gadu ku Jesosi Keesitu? (Joh. 17:3) Wë wa sabi un mëni ten fika. Ma u sabi taa solanga di gaan fuka an bigi jeti, nöö „dee sëmbë dee a kai da u de feni di libi u teego” sa haika di bunu buka, nöö de bia ko ta dini Jehovah (Tjab. 13:48). Unfa u sa heepi dee sëmbë aki ufö a ko lati poi?
10. Unfa Jehovah ta heepi u fuu sa ta lei sëmbë soni u di tuutuu lei?
10 Jehovah ta mbei di ölganisaasi fëën ta da u hii dee soni dee u abi fanöudu fuu sa ta lei sëmbë soni u Bëibel. De ta lei u soni hiniwan wiki a dee komakandi dee u ta hoi a mindi wiki. Dee komakandi aki ta heepi u fuu ko sabi andi u sa taki te u miti wan sëmbë di fosu pasi, nasö te woo toona go luku wan sëmbë di u bi miti kaa. De ta lei u tu unfa u sa ta lei sëmbë soni u Bëibel. Di ölganisaasi u Jehovah ta da u peipei soni tu di u sa ta tei u lei sëmbë soni u Bëibel. Dee soni aki ta heepi u fuu sa ta . . .
-
bigi fan ku wan sëmbë,
-
taki soni di sa mbei di sëmbë kë haika u,
-
heepi sëmbë u de kë ko sabi möön soni u Bëibel,
-
lei sëmbë soni u Bëibel,
-
kai sëmbë u de ko a dee komakandi, söseei fuu sa ta da de taanga u de go a di website fuu.
Wë u ta fusutan taa na abi nöö u musu abi peipei soni di u sa ta tei u lei sëmbë soni u Bëibel. Ma u musu ta wooko ku de. * Ee i fan ku wan sëmbë di kë ko sabi möön soni u Bëibel, hën i dëën wan talakitaati nasö wan u dee buku fuu, nöö a o sa ta lesi dee soni dë u te i toona miti ën baka. Hiniwan liba, u musu ta du hii soni di u sa du a di peleikiwooko.
11. Faandi mbei de buta dee lësi aki a di website fuu?
11 Wan woto fasi fa Jehovah ta heepi sëmbë u de ko sabi soni u di tuutuu lei, hën da ku dee Bëibel lësi dee dë a jw.org® (Online Bible Study Lessons). * Faandi mbei de buta dee lësi aki a di website? Hiniwan liba dusudusu sëmbë a hii së u goonliba nango a Internet u de go suku woto di ta taki soni u Bëibel. Dee lësi dee dë a di website fuu sa heepi dee sëmbë aki u de ko sabi dee lei dee dë a di Wöutu u Gadu. Kandë so sëmbë di i ta miti an o kë fii ko a de ko lei de soni u Bëibel. Ee i miti dee lö sëmbë dë, nöö i sa lei de dee lësi aki a di website fuu, nasö i sa manda wan link da de di sa heepi de u de sa feni dee lësi aki.
12. Andi ku andi wan sëmbë sa lei a dee Bëibel lësi dee dë a di website fuu?
12 Dee Bëibel lësi dee dë a di website fuu, ta taki u dee soni aki: Di Bëibel ku di Sëmbë di sikifi ën, dee sëmbë di di Bëibel ta möön taki soni u de, ku di bosikopu u Bëibel di ta mbei u biibi taa soni o waka bunu da u a di ten di ta ko. Te wan sëmbë lei soni a dee lësi aki, nöö a o ko sabi:
-
Unfa di Bëibel sa heepi wan sëmbë
-
Ambë da Jehovah, ambë da Jesosi, söseei ambë da dee ëngëli
-
Faandi mbei Gadu mbei libisëmbë
-
Faandi mbei fuka ku hogilibi dë a goonliba
Dee lësi aki ta mbei sëmbë ko sabi tu unfa Jehovah . . .
-
o puu dëdë ku fuka a goonliba,
-
o weki dee sëmbë dee dëdë ko a libi baka, söseei unfa a
-
o puu di tii a libisëmbë maun, nöö a mbei di Könuköndë fëën tii.
13. A dë fanöudu u wan Kotoigi musu go lei wan sëmbë soni u Bëibel go dou, hii fa di sëmbë kaba lei soni a dee lësi dee u buta a di website fuu ö?
13 Hii fa u buta dee Bëibel lësi aki a di website fuu u heepi sëmbë u de ko sabi soni u Bëibel, tökuseei u musu go a de go lei de soni u Bëibel go dou. Jesosi bi piki u fuu heepi sëmbë u de ko dë bakama fëën. U bi o kë seei taa sëmbë di kë ko sabi möön soni u Bëibel go luku dee lësi aki, söseei taa de ko lobi dee soni di de lei, sö taa bakaten de sa kë ko sabi möön soni u Bëibel. Ee soni waka a di lö fasi aki, nöö kandë de o kë u sëmbë ko lei de soni u Bëibel. A kaba u hiniwan u dee lësi aki, wan pisi ta dë ka di sëmbë sa go fuu, u piki ee a kë u wan sëmbë ko lei ën soni u Bëibel. Möön leki 230 sëmbë ta piki hiniwan daka taa de kë u sëmbë ko lei de soni u Bëibel! Di lei di u nango ta lei sëmbë soni u Bëibel, da wan gaan fanöudu soni!
HEEPI SËMBË GO DOU U DE KO DË BAKAMA U JESOSI
14. Andi u ta mbei möiti fuu du, te u luku di soni di Jesosi bi taki a Mateosi 28:19, 20, nöö faandi mbei u ta mbei möiti fuu du ën?
14 Lesi Mateosi 28:19, 20. Te u ta lei sëmbë soni u Bëibel, nöö u musu ta mbei hii möiti u heepi de u de ’bia ko dë bakama u Jesosi . . . U musu ta lei de u de piki hii dee soni tuu dee Jesosi manda u fuu ta du’. U musu heepi sëmbë u de ko fusutan taa a dë fanöudu u de dini Jehovah, söseei u de du soni u mbei di Könuköndë wooko go a fesi. Wë fuu sa du di soni aki, nöö u musu ta da sëmbë taanga u de ta du dee soni di de ta lei a di Bëibel, u de buta de libi a Jehovah maun, söseei u de tei dopu. Te de du dee soni aki ufö de o sa pasa di daka u Jehovah libilibi.—1 Pet. 3:21.
15. Andi wa musu du, nöö faandi mbei wa musu du di soni dë?
15 Kumafa u bi taki kaa, nöö ten an fika hia möön u di kaba u di goonliba aki dou. Fëën mbei wa musu ta lasi ten ta lei wan sëmbë soni u Bëibel nöömö, ee di sëmbë an ta tooka soni nëën libi u lei taa a kë ko dë wan dinima u Jehovah (1 Kol. 9:26). Ten an dë hia möön! Sömëni sëmbë dë jeti di musu jei di Könuköndë bosikopu ufö a lati poi.
KÖNI BE JA GO NAMA KU POIPOI KEIKI
16. Andi hiniwan fuu musu du, te u luku Akoalimbo 18:2, 4, 5, 8? (Luku di pisi a basu tu.)
16 Lesi Akoalimbo 18:2, 4, 5, 8. Dee tëkisi aki ta taki u wan woto soni di Jehovah kë u dee dinima fëën musu du. Hiniwan Keesitu sëmbë musu dë seiki taa de an ta nama ku di Gaan Babilon na wan pikisö seei. Kandë ufö wan sëmbë ko a di tuutuu lei, nöö a bi tei dopu a poipoi keiki. Kandë a bi nango a keiki, söseei kandë a bi ta du soni da di keiki. Nasö kandë a bi ta buta möni da di keiki. Ee wan sëmbë di ta lei soni u Bëibel kë ko dë wan peleikima, nöö a musu dë seiki taa a kumutu ku telu a poipoi keiki. A musu sikifi wan biifi manda da di keiki nasö da di keiki ölganisaasi ka a bi dë, u piki de taa an o dë a di keiki nasö a di ölganisaasi dë möön. *
17. Un pei wooko wan Keesitu sëmbë musu ta köni fu an go du, nöö faandi mbei a musu ta köni ku dee lö wooko dë?
17 Wan tuutuu Keesitu sëmbë musu dë seiki taa di wooko di a ta du an ta nama ku poipoi keiki a na wan futu seei (2 Kol. 6:14-17). Wan tuutuu Keesitu sëmbë an o go ta wooko da wan keiki. Boiti di dë, wan Keesitu sëmbë di ta wooko da wan masikapei, an bi o kë go du wan gaan wooko a wan kamian ka de ta du soni di nama ku poipoi keiki. Nöö ee a abi u fëën seei masikapei, nöö an bi o kë go suku u du wan wooko da di Gaan Babilon, söseei an bi o kë tei wan wooko di de kë dëën faa du da de, aluwasi de hakisi ën. Faandi mbei an bi o du di soni dë? Wë u di an kë go nama ku di Gaan Babilon a dee hogidu fëën a ta du, u di dee soni dë an ta kai ku Gadu.—Jes. 52:11. *
18. Unfa wan baaa bi hoi hënseei a dee mama wëti u Bëibel, di de bi kë dëën wan wooko faa du?
18 Wantu jaa pasa, hën wan womi di bi ta tei sëmbë a wooko, bi hakisi wan gaanwomi di bi nango ta wooko da sëmbë, faa go du wan wooko
dëën a wan keiki wosu di bi dë a di foto ka di baaa bi ta dë. Di womi di ta tei sëmbë a wooko bi sabi taa di baaa bi lo’ u taki taa an o go du wooko a keiki wosu. Ma u di di womi an bi sa feni woto sëmbë u du di wooko dëën, mbei a bi go hakisi di baaa. Ma tökuseei di baaa bi hoi hënseei a dee mama wëti u Bëibel, hën an tei di wooko. Di woto wiki fëën, hën de bi buta wan footoo a wan kolanti di de ta doloki a di foto dë. De bi buta wan footoo u di womi di bi go du di wooko a di baaa kamian. De bi ta lei fa a bi ta buta wan lakpa pau a di keiki wosu. Ee di baaa bi tei di wooko söndö faa buta pakisei a dee mama wëti u Bëibel, nöö kandë hën de bi o puu a footoo buta a di kolanti. Pakisei unfa dee baaa ku dee sisa fëën bi o si ën, ee hën bi dë a di footoo! Pakisei tu unfa Jehovah bi o fii.ANDI KU ANDI U LEI?
19-20. (a) Andi u lei a di woto aki? (b) Andi u musu ko sabi jeti?
19 Di Bëibel ta lei taa di tjabukama woto di musu pasa abiti möön, da di taki di dee tiima o taki taa: „Aai, hii soni dë bunu kaa. An dë fuu fëëë möön.” U di Jehovah lei u soni, mbei u sabi taa libisëmbë an o sa mbei soni ko ta waka bunu a goonliba tuutuu. Andi u musu du ufö dee tiima taki di soni dë, söseei ufö di Gaan daka u Jehovah dou? Wë Jehovah kë fuu ta paaja di bunu buka u di Könuköndë nöömö, ta heepi möön sëmbë u de ko dë bakama u Keesitu. Ma u musu ta mbei möiti tu fu wa go nama ku poipoi keiki. Di soni aki kë taki taa u musu kumutu a di Gaan Babilon, söseei taa wa musu du wan wooko di nama ku di Gaan Babilon.
20 Woto soni musu pasa jeti a di kaba pisiten u „dee lasiti daka” aki, söseei Jehovah kë taa u musu du woto soni tu. Andi da dee soni aki, nöö unfa u sa seeka useei da dee soni dee musu pasa jeti? Woo taki u dee soni aki a di woto di ta ko.
KANDA 71 U ta feti da Jehovah!
^ pal. 5 U sabi taa abiti möön dee tiima u di goonliba aki o taki taa: „Aai, hii soni dë bunu kaa. An dë fuu fëëë möön.” Te de taki di soni aki, nöö woo sabi taa di gaan fuka o bigi. Andi Jehovah kë fuu ta du nöunöu kaa te go miti di ten di dee tiima o taki di soni dë? Woo piki di hakisi aki a di woto aki.
^ pal. 3 Di ölganisaasi de kai De Verenigde Naties ta taki a di website fëën taa „a ta mbei soni ta waka bunu a goonliba”.
^ pal. 6 Luku di woto „Di fasi fa Gadu ta kuutu soni—A ta da sëmbë ten tjika u de bia de libi te a bai de a soni ö?”, di dë a di Hei Wakitimawosu aki.
^ pal. 10 Ee i kë sabi unfa i sa wooko ku dee peipei soni di u sa ta tei u lei sëmbë soni u Bëibel, nöö i sa luku di woto „Lei sëmbë soni u di tuutuu lei”, di dë a di Hei Wakitimawosu u tinimu-liba u di jaa 2018.
^ pal. 11 Dee lësi aki dë a di Ingisitöngö website ku di Potogisitöngö website. Ma de o ko a dee woto töngö jeti.
^ pal. 16 So keiki ölganisaasi dë di ta seti soni da njönkuwan u de sa nango a kamian u du soni makandi. U musu ta köni tu fu wa go nama ku dee ölganisaasi aki. Sömëni u dee ölganisaasi aki ta du kuma de an ta nama ku keiki, ma tökuseei de ta nama ku keiki.
^ pal. 17 Ee i kë ko sabi andi di Bëibel ta taki u wooko di nama ku keiki ölganisaasi, nöö i sa luku di pisi „Aksi foe leisiman”, di dë a di Waktitoren u 15 u piki-deewei-liba u di jaa 1999.
^ pal. 83 DEE SONI DI DEE PEENTJE KË TAKI: Wanlö sëmbë dë ta luku njunsu a wan kamian ka sëmbë nango ta bebe kofi. De ta jei dee tiima ta taki taa: „Aai, hii soni dë bunu kaa. An dë fuu fëëë möön.” Di soni dë ta bigi da de. Wan baaa ku hën mujëë kumutu a di peleikiwooko go ta bebe wan soni a di seei kamian. Ma de an ta mbei di soni di de jei dë ganjan de.