1. Fu san ede wi de seiker taki wi e libi na ini „den lasti dei”?

YU GEBORE baka a yari 1914? Efu dati de so, dan yu libi soso na ini „den lasti dei” (2 Tim. 3:1). Yesus ben taki dati feti, angriten, gronseki nanga takru siki ben o de. A taki tu dati sma ben o du furu ogri èn den ben o frufolgu a pipel fu Yehovah (Mat. 24:3, 7-9, 12; Luk. 21:10-12). Wi alamala e yere fu den sani disi. Wi e si tu taki sma e tyari densrefi soleki fa na apostel Paulus ben taki. (Luku a faki „ A fasi fa sma de now”.) Wi leki anbegiman fu Yehovah de seiker taki wi e libi na ini „den lasti dei”.​—Mika 4:1.

2. Sortu aksi wi o luku?

² Fu di someni yari pasa sensi 1914, meki a musu de so taki wi e libi na a kaba fu „den lasti dei”. Dati meki wi musu kon sabi a piki tapu den prenspari aksi disi: Sortu sani o pasa na a kaba fu „den lasti dei”? Èn san Yehovah wani taki wi musu du fosi den sani dati pasa?

3. Soleki fa 1 Tesalonikasma 5:1-3 e sori, dan san den tiriman o taki?

³ Leisi 1 Tesalonikasma 5:1-3. Paulus e taki dyaso fu „a dei fu Yehovah”. Na ini den vers disi, „a dei fu Yehovah” e sori go na a pisi ten di o bigin te „Babilon a Bigiwan” (ala den falsi kerki) o kisi pori èn di o kon na wan kaba nanga a feti fu Armagedon (Openb. 16:14, 16; 17:5). Syatu fosi a „dei” dati bigin, den tiriman fu grontapu o taki dati „freide de èn ala sani e waka bun!” Son leisi den  tiriman fu grontapu e taki dati freide de te den e seti sani fu wroko moro bun nanga makandra. * Ma Bijbel e taki fu wan heri tra sani. Fu san ede wi kan taki dati? Te den tiriman o taki dati „freide de èn ala sani e waka bun” na ini a ten di e kon, dan furu sma o bribi trutru taki freide de na grontapu èn taki sani e waka bun. Ma „wantronso wan pori” o kon na den tapu te a „bigi banawtu” bigin.​—Mat. 24:21.

4. (a) San wi no sabi fu a ten te sma o taki „freide de èn ala sani e waka bun”? (b) San wi sabi kaba fu a ten dati?

⁴ Wi no sabi fu san ede den tiriman o taki dati „freide de èn ala sani e waka bun”. Wi no sabi tu efu den o taki a sani disi wán leisi nomo noso efu den o taki en wan tu leisi. Ma awinsi fa sani o waka wi sabi a sani disi: Den tiriman no o man tyari freide kon na grontapu. Dati meki a sani di den o taki no musu kori wi. Na presi fu dati wi musu frustan taki a sani di Bijbel ben taki kon tru. A sani di den o taki o sori taki „a dei fu Yehovah” o bigin!

5. Fa 1 Tesalonikasma 5:4-6 e yepi wi fu sreka wisrefi gi „a dei fu Yehovah”?

⁵ Leisi 1 Tesalonikasma 5:4-6. Paulus e sori wi fa wi kan sreka wisrefi gi „a dei fu Yehovah”. A e sori taki wi ’no musu sribi go doro leki fa den tra sma e sribi’. Wi musu „tan wikiwiki”, sobun wi musu tan na ai. Fu eksempre, wi musu luku bun taki wi no e bumui nanga politiek. Efu wi ben o du dati, dan wi ben o tron „wan pisi fu grontapu” (Yoh. 15:19). Wi sabi taki na Gado Kownukondre wawan kan tyari freide kon na grontapu.

6. San wi musu yepi trawan fu du èn fu san ede a prenspari taki wi du disi?

⁶ Boiti taki wi e tan na ai, wi musu yepi trawan tu fu kon sabi san Bijbel e taki fu den sani di o pasa na grontapu. Wi musu hori na prakseri taki te a bigi banawtu bigin, a o lati tumusi gi sma fu kon dini Yehovah. Dati meki a prenspari taki wi e du a preikiwroko na ini a ten disi! *

7. San Yehovah e fruwakti fu wi na ini a ten disi?

⁷ Furu ten no de moro fosi „a dei fu Yehovah” bigin. Dati meki Yehovah e fruwakti taki wi e preiki fayafaya. Wi musu sorgu taki wi „abi furu fu du na ini a wroko fu Masra” (1 Kor. 15:58). Yesus ben taki na fesi san wi ben o du na ini a ten disi. Di a ben taki fu ala den sani di ben o pasa na ini den lasti dei, a taki tu:  „Sosrefi, a bun nyunsu musu preiki fosi na ala kondre” (Mark. 13:4, 8, 10; Mat. 24:14). Hori na prakseri taki ibri leisi te yu e go na ini a preikiwroko, yu e yepi fu meki a profeititori disi kon tru.

8. Fa wi du sabi taki a preikiwroko e go na fesi?

⁸ Fa a preikiwroko e go? Ibri yari moro nanga moro sma e yere a bun nyunsu fu a Kownukondre. Prakseri fa a nomru fu Kownukondre preikiman kren na ini den lasti dei disi. Na ini 1914 wi ben abi 5155 preikiman na ini 43 kondre. Now wi abi sowan 8.5 milyun preikiman na ini 240 kondre! Ma a wroko fu wi no kaba ete. Wi musu tan fruteri trawan taki na Gado Kownukondre wawan kan lusu ala den problema fu libisma.​—Ps. 145:11-13.

9. Fu san ede wi musu tan preiki a Kownukondre boskopu?

⁹ Wi o tan du a preikiwroko teleki Yehovah taki dati wi no abi fu preiki moro. O furu ten sma abi ete fu kon sabi Gado nanga Yesus Krestes? (Yoh. 17:3) Wi no sabi. Ma wi sabi taki fosi a bigi banawtu bigin sma di „abi a yoisti denki fu man kisi têgo libi” abi na okasi ete fu yere a bun nyunsu èn fu kon dini Yehovah (Tori 13:48). Fa wi kan yepi den sma disi fosi a lati tumusi?

10. Fa Yehovah e yepi wi fu leri sma den tru tori fu Bijbel?

¹⁰ Yehovah e gebroiki en organisâsi fu gi wi ala san wi abi fanowdu fu leri sma den tru tori fu Bijbel. Fu eksempre, wi e kisi leri ibri wiki na a mindriwiki konmakandra. Na a konmakandra disi wi e leri fa wi kan bigin wan takimakandra èn san wi kan taki te wi go baka na den sma. Wi e leri tu fa wi kan hori Bijbelstudie. Yehovah en organisâsi gi wi den wrokosani tu di de na ini a Teaching Toolbox. Den sani disi e yepi wi . . .

• fu bigin takimakandra nanga sma,

• fu preiki na so wan fasi taki sma o wani arki wi,

• fu gi sma deki-ati fu kon sabi moro,

• fu studeri Bijbel nanga sma,

• fu sori sma a website fu wi èn fu kari sma fu kon na den Kownukondre zaal fu wi.

A no de fu taki dati a no nofo fu abi den wrokosani disi. Wi musu gebroiki den  tu. * Fu eksempre, efu yu ben abi wan moi takimakandra nanga wan sma èn yu gi en wan traktaat noso wan tijdschrift, dan a o abi wan sani fu leisi, teleki yu go na en baka. Ibriwan fu wi abi a frantwortu fu preiki so furu leki wi man ibri mun.

11. Fu san ede den brada poti den Bijbel les tapu wi website?

¹¹ Wan tra sani di Yehovah e gebroiki fu yepi sma fu kon sabi den tru tori fu Bijbel na den Bijbel les tapu jw.org^® (Online Bible Study Lessons). * Fu san ede den brada meki den Bijbel les disi? Ibri mun bun furu sma na heri grontapu e go tapu Internet fu kon sabi moro fu Bijbel. Den Bijbel les tapu wi website kan yepi den sma disi fu kon sabi den tru leri na ini Gado Wortu. Wan tra sani na taki son sma e syen fu bigin studeri Bijbel nanga wi. Te dati de so, dan wi kan sori den den Bijbel les tapu wi website noso wi kan seni wan link gi den.

12. San wan sma kan leri fu den Bijbel les tapu wi website?

¹² Den Bijbel les tapu wi website e taki fu den tori disi: „Bijbel nanga a Skrifiman fu en”, „Den moro prenspari sma na ini Bijbel” nanga „A boskopu fu Bijbel di e gi wi howpu”. Te sma e studeri den les dati, den o kon sabi den sani disi:

• Fa Bijbel kan yepi wan sma?

• Suma na Yehovah, Yesus nanga den engel?

• Fu san ede Gado meki libisma?

• Fu san ede sma e pina èn e du ogri?

Den les tapu a website e leri sma tu. . .

• fa Yehovah o tyari wan kaba kon na pina nanga dede,

• fa a o tyari den dedewan kon na libi baka èn

• fa a o poti en Kownukondre na ini a presi fu libisma regering di no e tiri bun.

13. Efu wan sma leisi den Bijbel les tapu wi website, dan dati wani taki dati a no abi fu studeri moro nanga wan Kotoigi?

¹³ Den Bijbel les tapu a website no wani taki dati wi no o studeri Bijbel moro nanga sma. Yesus gi wi a grani fu meki disipel. Den brada meki den Bijbel les tapu a website fu di den e howpu taki sma o go leisi den les disi èn taki den o wani sabi moro. Efu dati de so, dan kande den o wani studeri Bijbel nanga wi. Na a kaba fu ibri les, wan sma kan poti en nen efu a wani taki wan Kotoigi kon studeri Bijbel nanga en. Ibri dei moro leki 230 sma fu ala sei fu grontapu e seni aksi wan Bijbelstudie tapu a website fu wi! A prenspari taki den sma disi e studeri Bijbel nanga wan Kotoigi!

14. Soleki fa Yesus taki na Mateyus 28:19, 20, dan san wi musu du èn fu san ede?

¹⁴ Leisi Mateyus 28:19, 20. Te wi e studeri nanga sma, wi e yepi den fu ’tron disipel èn wi e leri den fu du ala san Yesus taigi wi fu du’. Wi musu yepi sma fu frustan fu san ede a prenspari taki den kon dini Yehovah èn taki den e horibaka gi a Kownukondre fu en. Disi wani taki dati wi musu yepi den fu du san den e leri, fu gi densrefi abra na Yehovah èn fu dopu.  Na den sani disi wawan kan yepi den fu tan na libi te Yehovah en dei kon.​—1 Petr. 3:21.

15. Sortu sani wi no o du èn fu san ede?

¹⁵ Soleki fa wi si kaba, dan furu ten no de moro fosi a grontapu disi kisi pori. Dati meki wi no o tan studeri Bijbel nanga sma di no e tyari kenki kon fu sori taki den wani dini Yehovah (1 Kor. 9:26). Wi no abi furu ten moro fu du a prenspari wroko disi. Furu sma de ete di musu yere a Kownukondre boskopu fosi a dei fu Yehovah kon.

16. Soleki fa Openbaring 18:2, 4, 5, 8 e sori, dan san wi alamala musu du? (Luku sosrefi a futuwortu.)

¹⁶ Leisi Openbaring 18:2, 4, 5, 8. Den vers disi e sori wi wan tra sani di Yehovah e fruwakti fu den anbegiman fu en. Ala tru Kresten musu sorgu taki den no abi noti fu du nanga falsi bribi. A kan taki fosi wan sma bigin studeri Bijbel a ben de wan memre fu wan kerki. Kande a ben go na den konmakandra fu a kerki èn a ben teki prati na den sani di a kerki e du. Kande a ben gi moni tu fu horibaka gi a kerki. Fosi wan Bijbelstudie kan tron wan preikiman a musu sorgu taki a no de wan pisi moro fu falsi bribi. A musu seni wan brifi go na a kerki fu en noso iniwan tra organisâsi di de wan pisi fu falsi bribi fu taigi den taki a no wani de wan memre moro. *

17. Sortu wroko wan Kresten no musu teki èn fu san ede?

¹⁷ Wan tru Kresten musu sorgu taki a wroko fu en no abi noti fu du nanga falsi bribi (2 Kor. 6:14-17). Fu eksempre, wan kresten no kan wroko gi wan kerki. Boiti dati, wan kresten di e wroko gi wan bedrijf (soleki wan bedrijf di e seti watra noso stroom) no o du bigi wroko na wan gebow di wan kerki e gebroiki. Èn efu wan Kresten abi en eigi bedrijf, a no o du bisnis nanga nowan pisi fu Babilon a Bigiwan. Fu san ede wi e si a sani disi leki wan seryusu sani? Fu di wi no wani abi noti fu du nanga den leri èn den wroko fu den falsi kerki di no krin na ini Gado ai.​—Yes. 52:11. *

18. Fa wan brada hori ensrefi na Bijbel gronprakseri?

 ¹⁸ Wan tu yari pasa wan sma ben aksi wan owruman di ben abi en eigi bedrijf fu du temrewroko gi wan kerki na ini a foto pe a brada e tan. A sma disi ben sabi taki noiti a brada ben wani du wroko gi wan kerki. Ma disi leisi a no ben man feni nowan tra sma fu du a wroko. Toku a brada hori ensrefi na Bijbel gronprakseri èn a weigri fu teki a wroko. A tra wiki, wan fowtow ben de na ini koranti fu wan tra temreman di ben fasi wan kroisi na a kerki. Efu a brada no ben hori ensrefi na Bijbel, dan na en fowtow ben o de na ini a koranti. A sani disi ben kan meki taki den brada nanga sisa no si a brada disi moro leki wan bun eksempre. Prakseri tu fa Yehovah ben o firi.

19-20. (a) San wi leri na ini na artikel disi? (b) Sortu tra sani wi musu kon sabi ete?

¹⁹ Wan prenspari Bijbel profeititori di o kon tru heri esi na taki den tiriman fu grontapu o taki dati „freide de èn ala sani e waka bun”. Ma Yehovah leri wi taki noiti den tiriman o man tyari trutru freide kon na grontapu. San wi musu du fosi a ten dati doro èn fosi a grontapu disi kisi pori? Yehovah e fruwakti fu wi taki wi e tan preiki a Kownukondre boskopu èn taki wi e pruberi fu yepi sma fu tron disipel. Boiti dati, wi e sorgu taki wi no abi noti fu du nanga falsi bribi. Dati wani taki dati wi o puru wi nen na den kerki dati èn wi no o du nowan wroko di abi fu du nanga Babilon a Bigiwan.

²⁰ Tra sani de di musu pasa ete na a kaba fu „den lasti dei”. Yehovah e fruwakti tu taki wi du wan tu tra sani. San na den sani disi èn fa wi kan sreka wisrefi gi ala den sani di o pasa heri esi? Na ini a tra artikel wi o piki den aksi disi.