1. Nagnino tikagne ro rese lahatse tie miaigne amy ty “andro fara’e”?

 TAFARA ty taogne 1914 vao ty niterahagne azo? Naho izay, le niaigne tagnate ty “andro fara’e” avao rehe. (2 Tim. 3:1) Nagnino tikagne mpanompo i Jehovah ro rese lahatse tie “andro fara’e” zao? Satria itikagne iaby ro fa naharey miomba i raha nirehafe i Jesosy tie hiseho amy ty andro fara’ey. Agnisa izay ty aly, keré, horohoron-tane, aretegne manjamagne, fitomboa ty fandikan-dalàna, vaho ty fagnenjehagne ty vahoa i Jehovah. (Mat. 24:3, 7-9, 12; Lioka 21:10-12) Treantikagne tie managne i toetse nirehafe i apostoly Paoly rey o ndatio.​—Henteo tihoe “ Manao Akore ty Ndaty amy Izao?”

2. Ino ty fagnonteneagne toko’e hoeretseretentikagne?

² Fa ela bey ze 1914 zay, le azo antoke fa miaigne amy ty tapa’e fara’e amy ty “andro fara’e” tikagne. Fa marine vata’e areke ty fara’e, le mila mahafantatse ty vale iretoa tikagne: Ino ty hiseho amy ty fara ty “andro fara’e”? Ino ty tea i Jehovah hataontikagne am-pandignisagne izay?

3. Ino ty fagnambaragne hatao o mpitondra fanjakagneo arake ty 1 Tesalonianina 5:1-3?

³ Vakio ty 1 Tesalonianina 5:1-3. Tihoe “andro i Jehovah” rehafe i Paoly eo, le i fe-potoagne manomboke amy ty fanafiha i “babilona lahibeỳ”, ndra ty fivavahan-diso iaby, le mifaragne amy ty Hara-magedona. (Apok. 16:14, 16; 17:5) Aloha kede o “andro i Jehovah” iohoe, le hirehake o mpitondra fanjakagne reo tie misy “fandriampahalemagne naho filaminagne.” Mampiasa rehake mitovy amy ireo o mpitondrao kindraike, naho fa mirehake ty kezake atao iareo mba hampilongoagne o firenenao. * Faie tena hafa i fagnambaragne “fandriampahalemagne naho filaminagne” rehafe ty Baibolỳ. Ino ty anto’e? Satria hieretseretse o ndatio amo o fotoagne iohoe fa tena nahavita nampilamigne ty tontolo toy o mpitondrao. Faie hisy “fandringanagne tampoke” afara izay.​—Mat. 24:21.

4. a) Ino ty tsy fantantikagne? b) Faie ino ty fantantikagne?

⁴ Misy raha ila’e tsy fantantikagne miomba i fagnambaragne “fandriampahalemagne naho filaminagney.” Tsy haintikagne ohatse tie ino ty hahavy o mpitondra fanjakagneo hanao o fagnambaragne iohoe, ndra akore ty fomba hanoa iareo aze. Tsy haintikagne ka tie fagnambaragne miambake indraike avao vao io, sa fagnambaragne maromaro mifampitohitohy. Faie fantantikagne fa tsy toko’e hino tikagne tie nahavita nampisy fandriampahalemagne magneran-tane o mpitondrao. Itika aza toko’e ho tonga saigne tie inay i fagnambaragne nampandignisegne antikagney. Io ty ho famantaragne fa hanomboke i “andro i Jehovah-y.”

5. Nagnino ty 1 Tesalonianina 5:4-6 ro magnampe antikagne ho vognogne amy i “andro i Jehovah-y”?

⁵ Vakio ty 1 Tesalonianina 5:4-6. Ino ty azontikagne atao mba ho vognogne amy i “andro i Jehovah-y”? Treantikagne boake amo o reha i Paoly reo tie tsy toko’e “hiroro manahake ty hafa” tikagne. Tsy maintsy ‘mifoha lognandro’ tikagne, le hitao avao. Toko’e hitao avao ohatse tikagne mba tsy hanohagne ty atia naho ty aroa, sady tsy hizilike amy ty politike. Hanjare ho “agnisa ty tontolo toy” tikagne naho manao izay. (Jaona 15:19) Fantantikagne fa ty Fanjakàn’Andrianagnahare avao ro tamaegne hampisy fandriampahalemagne magneran-tane.

6. Ampeantikagne hanao ino o ndatio, sady ino ty anto’e?

⁶ Tsy tihoe mikezake tsy hiroro avao tikagne, fa magnampe ty hafa mba hifoha avao ka. Ampeantikagne iareo mba hahafantatse ty raha rehafe ty Baiboly fa hiseho magneran-tane. Tsiarovo fa tena fa tara naho fa manomboke i haoreagne lahibeỳ ro vaho hanapa-kevetse ty hanompo i Jehovah o ndatio. Tena meke areke i asa fitoriagney! *

7. Ino ty tea i Jehovah hataontikagne?

⁷ Kede sisa le hanomboke i “andro i Jehovah-y”, le tea’e hitory lognandro tikagne. Toko’e “ho maro raha atao amy ty asa i Tompo” areke tikagne. (1 Kor. 15:58) Fa nirehake mialoha ty Jesosy tie izay ty toko’e hataontikagne. Naho fa nirehake i raha lahibey hiseho amy ty andro fara’ey reke, le nirehake ka tie: “Hotoriegne magneran-tane ty talily soa i Fanjakagney toy, ho vavolombelogne amy ty firenena iaby, vaho izay ho avy ty fara’e.” (Mar. 13:4, 8, 10; Mat. 24:14) Eretsereto moa! Isake tie mitory rehe, le agnisa ty magnatanterake o faminaniagne iohoe.

8. Manao akore ty fandrosoa i asa fitoriagney?

⁸ Mihamaro ty ndaty maharey i talily soa miomba i Fanjakagney isan-taogne. Eretsereto ohatse ty fitomboa ty isa ty mpitory magneran-tane amy i andro fara’ey. Nisy mpitory 5 155 tamy ty tane 43 tamy 1914. Faie fa ho 8 500 000 eo ho eo zao ty mpitory amy ty tane 240 agne. Ndra tie izay, le mbe tsy vita i asantikagney. Mila mitory ty miomba i Fanjakàn’Andrianagnaharey avao tika, le mampahafantatse tie io avao ro vahaolagne amy ty raha manahiragne iaby mahazo o ndatio.​—Sal. 145:11-13.

9. Nagnino tikagne ro toko’e hitory lognandro?

⁹ Tsy ho tapetse i asa fitoriagney naho tsy fa misaontsy ty Jehovah tie vita zay. Manao akore ty fotoagne sisa mba hahafantara o ndatio i Jehovah Andrianagnahare naho i Jesosy Kristy? (Jaona 17:3) Tsy fantantikagne zay. Faie haintikagne fa amparake ty hiavia i haoreagne lahibeỳ, le mbe afake magneke i talily soay sady mifily ty hanompo i Jehovah ze ‘managne toe-po soa hahazoagne i havelogne nainai’ey.’ (Asa. 13:48) Akore ty azontikagne agnampeagne i ndaty rey amy ie mbe tsy tarao?

10. Akore ty agnampea i Jehovah antikagne mba hahay hampianatse ty maregne?

¹⁰ Magnomey ze raha ilaentikagne ty Jehovah mba hampianarantikagne ty maregne. Mampiasa ty fandamina’e reke amy izay. Ampiofagne’e ohatse tikagne isan-keregnandro amy ty fivoriagne andavanandro. Manjare mahay manombo-drehake naho manao fiheregnagne mitilike areke tikagne. Ampiofagnegne hampianatse Baiboly ka tikagne amo o fivoriagne iohoe. Tsy izay avao fa nimea ty fandamina i Jehovah Fitaovagne Fampianaragne tikagne. Magnampe antikagne rey mba...

•   hanombo-drehake,

•   hanao ze hahaliagne o ndatio,

•   handrisike o ndatio hazoto hianatse o Baibolio,

•   hampita ty hamarenagne naho fa mampianatse Baiboly, vaho

•   handrisike o ndaty liagneo hagnente ty tragnom-porarontikagne sady hivory.

 Faie tsy ampe ty managne o fitaovagne reo avao. Tsy maintsy ampiasaentikagne reo. * Akore ohatse naho mahatrea ndaty liagne rehe le mahafinaritse ty raha ifampirehafa’areo? Azo’o meagne taratasy milimpy ndra gazete reke, amy izay reke managne raha hovakiegne amparake ty hiheregna’o ama’e agne. Managne andraikitse tikagne tsikiraidraike isam-bolagne, le ty mikezake ho maro raha atao amy ty asa fitoriagne.

11. Ino ty anto’e nanoagne i Fianaragne Baiboly amy Internet aoy?

¹¹ Misy fomba hafa ka agnampea i Jehovah o ndatio hahafantatse ty maregne, agnisa izay ty Fianarana Baiboly Amin’ny Internet amy jw.org® ao. * Fa nagnino ro nisiagne o fianaragne iohoe ty ao? Satria maro ty ndaty magneran-tane mipay fianaragne Baiboly amy Internet ao isam-bolagne. Afake magnampe iareo hahafantatse ty hamarenagne amy ty Saontsin’Andrianagnahare ao i fianaragne Baiboly amy i tragnom-porarontikagne aoy. Tsy le mazoto miara-mianatse Baiboly amantikagne ty ndaty ila’e. Naho mifankatrea amy ty ndaty hoe izay rehe, le atorò aze i Fianaragne Baiboly amy Internet aoy, ndra andefaso tohy reke hahatreava’e aze.

12. Ino ty hotrea o ndatio amy i Fianaragne Baiboly amy Internet aoy?

¹² Dinehegne amy i Fianaragne Baiboly amy Internet aoy ohatse ty miomba o Baibolio naho i Nampanoratse azey. Dinehegne ao iaby tie ia iaby ty rehafegne amy Baiboly ao, sady ino ty fanantenagne mea io. Intoagne iaby ty ianaragne amy izay:

•   Akore ty agnampea ty Baiboly azo?

•   Ia ty Jehovah naho i Jesosy vaho o anjelio?

•   Nagnino ty Andrianagnahare ro namorogne o ndatio?

•   Ino ty anto’e mampisy o fijaleagneo naho o haratiagneo?

 Ianaragne ama’e ka tie akore ty hatao i Jehovah mba...

•   hamoagnagne o fijaleagneo naho o fateo,

•   hamelomagne ty mate, vaho

•   hanoloagne ty fanjakàn’olombelogne amy ty Fanjakàn’Andrianagnahare.

13. Tsy mipay ndaty hampianatse aze Baiboly sasa vao ty ndaty raike naho fa mianatse amy Internet ao? Hazavao.

¹³ Faie tsy tihoe naho fa mianatse Baiboly amy Internet ao ty ndaty raike, le tsy mipay ndaty hampianatse aze sasa. Itikagne ty nimea i Jesosy tombotsoa hanao mpianatse. Mitamà tikagne fa hamaky naho hankasitrake i lesogne amy Internet aoy ty ndaty liagne, le naho fa avy eo te hahafantatse soa miomba ty raha trea’e ao. Va’e hagneke hampianaregne Baiboly reke ty amy izay. Isake tie tapetse ty lesogne raike, le risihegne reke mba hangatake ndaty hampianatse aze Baiboly. Losotse ty 230 isan’andro ty fangatahagne voaraentikagne amy Internet ao, sady boake amy ty ndaty magneran-tane. Tena ilaegne tihoe misy ndaty mampianatse.

14. Toko’e hikezake mafe hanao inogne tikagne, arake ty Matio 28:19, 20? Ino ty anto’e?

¹⁴ Vakio ty Matio 28:19, 20. Naho fa mampianatse Baiboly tikagne, le toko’e hikezake mafe ‘hanao mpianatse’, ty dika izay hagnampe i ndatỳ hanjare mpianatse ndra hanonjohy ty lia i Jesosy, le “hagnorike ze” raha nandilia’e. Mila ataontikagne azo i ndatỳ soa tie tena mila mifily ty hanompo i Jehovah naho hanohagne i Fanjakà’ey reke. Mila mikezake manohigne ty fo o ndatio areke tikagne mba hahavy iareo hampihatse ze raha ianara’e naho hanokan-tegna hoahy i Jehovah vaho hatao badisa. Naho manao ireo avao reke vaho ho votso-belogne amy i andro i Jehovah-y.​—1 Pet. 3:21.

15. Tsy toko’e handany fotoagne amy ia tikagne? Ino ty anto’e?

¹⁵ Nitreantikagne teo fa kede sisa le horinganegne ty tontolo toy. Naho izay areke, le tsy afake handany fotoagne fire amy ty ndaty trea fa tsy vognogne hanjare mpiana i Kristy tikagne le hanohy hampianatse aze avao. (1 Kor. 9:26) Meke i asantikagney! Mbe maro ty ndaty toko’e haharey i hafatse miomba i Fanjakagney amy ie mbe tsy tarao.

16. Arake ty Apokalypsy 18:2, 4, 5, 8, ino ty tsy maintsy ataontikagne iaby? (Henteo i fagnamarehagne ambane pejey.)

¹⁶ Vakio ty Apokalypsy 18:2, 4, 5, 8. Treantikagne amo o andine’e reo fa misy raha hafa tea i Jehovah hatao ty mpanompo’e. Toko’e hitao soa ty tena Kristiana mba tsy hifandrambe amy i Babilona Lahibey. Va’e niangogne amy ty fivavahan-diso agne ty mpianatse Baiboly raike taloha ty nianara’e ty hamarenagne. Va’e ho nandrambe anjara tamy ze raha natao i fivavahagney reke, ndra nagnomey vola hanohagnagne aze. Toko’e fa tsy mifandrambe amy ty fivavahan-diso ty ndaty raike mianatse Baiboly, vaho izay ekegne ho mpitory. Toko’e hanoratse taratasy fialàgne amy i fiangona’e talohay agne reke, ndra hanao raha hafa hampisehoagne fa tsy mpikambagne agne sasa. Hoe izay ka ty toko’e hatao amy ze fikambanagne misy ifandrambesa’e amy Babilona Lahibey, naho mpikambagne agne reke. *

17. Asa manao akore ty tsy toko’e hatao ty Kristiana? Ino ty anto’e?

¹⁷ Tsy maintsy atao ty tena Kristiana azo antoke tie tsy misy ifandrambesa’e amy Babilona Lahibey ty asa’e. (2 Kor. 6:14-17) Tsy hagneke ho mpiasa karamae o fiangonagneo ohatse reke. Naho ndaty hafa ndra orinasa ty magnarama aze, le ampanoe iareo asa amy ty tragno natao hampandrosoagne fivavahan-diso reke, le tsy hagneke hiasa bey ao reke, ndra tie va’e ho azo’e atao avao aza ty manao raha tsy le maharetse ohatse mamonje aigne. Naho mampiasa vatagne reke, le tsy hipay asa amy ty fivavahan-diso agne, ndra hanao fifagnarahagne hiasa hoahy iareo. Mila mandineke soa i lahatsoratse amy i fagnamarehagne ambane pejey tikagne naho fa hanapa-kevetse miomba ireo. Fa magnino tikagne ro hentetse hoe izay? Satria tsy te handrambe anjara amy ze raha atao o fivavahan-disò naho ty fahota’e tikagne. Maloto rey tie aman’Andrianagnahare.​—Isaia 52:11. *

18. Akore ty nampisehoa i rahalahỳ fa nagnorike ty toro lala ty Baiboly avao reke?

¹⁸ Eretsereto ty nanjò ty androanavi-pagnahy raike nanao asa vatagne toy. Nisy ndaty nangatake aze mba handrafitse kede tamy ty fiangonagne raike tamy i tanà iareoy eo. I ndatỳ ty hagnarama aze fa tsy i fiangonagney. Fa nirehake avao i rahalahỳ hatrake amy izay fa tsy hanao asa hoahy ty fiangonagne. Fa fanta i ndatỳ zay, faie tsy nisy mpandrafitse nagneke i asay, le izay ty nahavy aze nirehake tamy i rahalahỳ. Faie nagnorike ty toro lala ty Baiboly avao i rahalahỳ le nandietse i asay. Nisy raha niseho heregnandro magnarake. Niboake tamy ty gazete ty sare ty mpandrafitse raike mametake lakroa tamy i fiangonagney. Fa ho nisare i rahalahỳ ty teo naho nandefetse reke! Le akore ty ho nieretserete o mpiara-manompò naho izay ty raha niseho? Ho simba ty laza’e. Akore ty ho nifihetseham-po i Jehovah amy izay?

19-20. a) Inogne iaby ty nianarantikagne tato? b) Ino ty mbe toko’e hianarantikagne?

¹⁹ Naho ty faminania ty Baiboly ro henteagne, le i fagnambaragne tihoey “fandriampahalemagne naho filaminagney” ro raha miambake hiseho tsy ela. Faie soa avao fa nampianare i Jehovah tikagne, le fantantikagne fa saretsare’e avao i fandriampahalemagne hisy amy izaỳ sady tsy haharetse. Ino ty toko’e hataontikagne manomboke amy izao amy ie mbe tsy misehò naho i fandringanagne tampoke afara izaỳ? Tea i Jehovah ho maro raha atao amy ty fitoriagne sady hikezake hanao mpianatse maro tikagne. Tsy toko’e hifandrambe amy i Babilona Lahibey ka tikagne, ty dika izay hisintake tsy ho agnisa ty fivavahan-diso sady tsy hanao asa misy ifandrambesa’e amy io.

²⁰ Mbe hisy raha hafa hiseho afara izay, agnate ty fara ty “andro fara’e.” Misy raha hafa ka tea i Jehovah hataontikagne. Ino zay, sady akore ty hiomanantikagne amy ze raha hiseho afarafarao zay? Izay ty hodinehentikagne amy ty lahatsoratse magnarake.