1. Kumbi tiziŵa wuli kuti tija mu “mazuŵa ngakumaliya”?

KUMBI munguwaku chati chajumpha chaka cha 1914? Asani ndi viyo, ndikuti mukuwiya mu “mazuŵa ngakumaliya” nga mugonezi wunu. (2 Timo. 3:1) Tosi tikuvwapu vinthu vinyaki vo Yesu wangukambiya limu kuti vazamuchitika mazuŵa nganu. Vinyaki mwa vinthu ivi ndi nja, vidilirisi, milili, kuleka kuvwiya marangu ndipuso kutombozgeka kwa ŵanthu aku Yehova. (Mate. 24:3, 7-9, 12; Luka 21:10-12) Kweniso ŵanthu ŵe ndi mijalidu yo wakutumika Paulo wangukamba. (Wonani bokosi lakuti “ Mijalidu yo Ŵanthu Ŵenayu Mazuŵa Nganu.”) Isi ateŵeti aku Yehova tiziŵa kuti tija “mu mazuŵa ngakumaliya.”​—Mika 4:1.

2. Kumbi tikhumbika kuziŵa kwamuka kwa mafumbu nanga?

² Chifukwa chakuti pajumpha nyengu yitali kutuwa mu 1914, titenere kuti tija kukumaliya kwa “mazuŵa ngakumaliya.” Pakuti umaliru we pafupi ukongwa, tikhumbika kuziŵa kwamuka kwa mafumbu ngakukhumbika yanga: Kumbi ndi vinthu wuli vo vazamuchitika asani “mazuŵa ngakumaliya” ngazimala? Kumbi Yehova wakhumba kuti tichitengenji penipo tilindizga vinthu venivi?

3. Mwakukoliyana ndi uchimi wo we pa 1 Atesalonika 5:1-3, kumbi alongozgi a vyaru azamukambanji?

³ Ŵerengani 1 Atesalonika 5:1-3. Mu lemba ili, mazu ngakuti “zuŵa laku Yehova” ngo Paulo wangukamba, ngang’anamuwa nyengu yo vyaru vazamuyukiya “Babiloni Mukulu” kuzifika pa nkhondu ya Aramagedoni. “Babiloni Mukulu” wamiya visopa vosi vaboza. (Chivu. 16:14, 16; 17:5) Asani kwaja kamanavi kuti “zuŵa” ili liyambi, alongozgi a vyaru azamudaniriza kuti “Chimangu ndi kuvikilirika!” Nyengu zinyaki alongozgi yaŵa agwiriskiya ntchitu mazu ngenanga asani akamba za kujalikiska  chimangu pakati pa vyaru. * Kweni kudaniriza kuti “chimangu ndi kuvikilirika” ko Bayibolu likamba, kwazamupamphana ndi ko alongozgi ŵenaŵa akamba mazuŵa nganu. Chifukwa wuli? Chifukwa asani ivi vazichitika, ŵanthu azamuŵanaŵana kuti alongozgi a vyaru akwaniska kujalikiska chimangu pacharu chosi chapasi. Kweni uneneska wazamukuŵa wakuti “chisuzgu chikulu” chazamukwamba ndipu pavuli paki “pharanyiku lamabuchibuchi” lazakuŵawiya.​—Mate. 24:21.

4. (a) Kumbi ndi vinthu wuli vo tiziŵa cha vakukwaskana ndi kudaniriza kuti “chimangu ndi kuvikilirika”? (b) Kumbi ndi vinthu wuli vo tiziŵa?

⁴ Pe vinthu vinyaki vo tiziŵa vakukwaskana ndi kudaniriza kuti “chimangu ndi kuvikilirika!” Kweni pe vinthu vinyaki vo tiziŵa cha. Mwakuyeruzgiyapu, tiziŵa cha vo vazamuchitiska kuti alongozgi a charu azikambi mazu ngenanga. Ndipuso tiziŵa cha asani azamukamba kamoza pe mazu yanga pamwenga kananandi ŵaka. Kweni mwemosi mo vazamuŵiya, tiziŵa fundu iyi: Titenere cha kulandizgika kuti ŵanthu angafiska kujalikiska chimangu pacharu chosi chapasi. Mumalu mwaki, Bayibolu lititikambiya kuti tikhazgengi po azamukambiya mazu ngenanga. Mazu yanga ngazamulongo kuti “zuŵa laku Yehova” le pafupi!

5. Kumbi lemba la 1 Atesalonika 5:4-6 lititiwovya wuli kunozgeke “zuŵa laku Yehova”?

⁵ Ŵerengani 1 Atesalonika 5:4-6. Paulo wangukamba vo titenere kuchita kuti tinozgeke “zuŵa laku Yehova.” Titenere cha ‘kugona nge mo anyaki wosi achitiya.’ Kweni tikhumbika ‘kuja masu.’ Mwakuyeruzgiyapu, titenere kuja masu kuti tileki kusereliyapu pa nkhani za ndali. Asani tingasereliyapu, tingaŵa chigaŵa cha “charu.” (Yoha. 15:19) Tiziŵa kuti Ufumu waku Chiuta pe ndiwu wazamujalikiska chimangu pacharu chosi chapasi.

6. Kumbi tikhumba kuti anyidu achitenji, ndipu ntchifukwa wuli?

⁶ Kusazgiyapu pa kuja masu, tikhumbika so kuwovya anyidu kuti nawu ayuki, pamwenga kuti aziŵi vo Bayibolu likukambiya limu kuti vazamuchitika. Titenere kukumbuka kuti asani chisuzgu chikulu chaziyamba, ŵanthu azamuŵavi mwaŵi wakuti ayambi kusopa Yehova chifukwa maji ngazamuŵa kuti ngafika kali mukhosi. Ndichu chifukwa chaki ntchitu yakupharazga njakukhumbika ukongwa mazuŵa nganu! *

7. Kumbi Yehova wakhumba kuti tichitengenji mazuŵa nganu?

⁷ Mu nyengu yimanavi yo yajaku kuti “zuŵa” laki liyambi, Yehova wakhumba kuti titangwanikengi ndi ntchitu yakupharazga. Tikhumbika kuja ndi “vakuchita vinandi mu ntchitu ya Ambuya.” (1 Akori. 15:58) Yesu wangukambiya limu vo tikhumbika kuchita. Wati wakamba  vinthu vo vazamuchitika mu mazuŵa ngakumaliya, wangusazgiyapu kuti: “Ndipuso uthenga wamampha utenere kupharazgika dankha ku mitundu yosi.” (Mariko 13:4, 8, 10; Mate. 24:14) Ŵanaŵaniyani waka fundu iyi: Asani mwasere mu upharazgi, mufiska uchimi wenuwu!

8. Kumbi ntchitu yakupharazga yaluta wuli panthazi?

⁸ Kumbi ntchitu yakupharazga yaluta wuli panthazi? Chaka chechosi ŵanthu anandi atuvwa uthenga wamampha wa Ufumu. Mwakuyeruzgiyapu, ŵanaŵaniyani ŵaka mo chiŵerengeru cha apharazgi a Ufumu chakuliya mazuŵa nganu ngakumaliya. Mu 1914, pacharu chosi chapasi penga apharazgi 5,155 muvyaru 43. Kweni mazuŵa nganu pe apharazgi akujumpha 8.5 miliyoni muvyaru 240! Chinanga kuti ve viyo, ntchitu yidu yechendamali. Titenere kulutirizga kupharazga kuti Ufumu waku Chiuta pe ndiwu wazamutuzgapu masuzgu ngosi nga ŵanthu.​—Sumu 145:11-13.

9. Ntchifukwa wuli tikhumbika kulutirizga kupharazga uthenga wa Ufumu?

⁹ Ntchitu yakupharazga Ufumu yimalengi cha mpaka po Yehova wazamukambiya kuti yamala. Kumbi kwaja nyengu yitali wuli kuti ŵanthu aziŵi vakukwaskana ndi Yehova Chiuta kweniso Yesu Khristu? (Yoha. 17:3) Tiziŵa cha. Kweni cho tiziŵa ntchakuti mpaka po chisuzgu chikulu chazamuyambiya, weyosi yo ‘we ndi maŵanaŵanu ngamampha ngakumuwovya kuti wazisaniyi umoyu wamuyaya,’ wangavwisiya uthenga wamampha ndi kusankha kuteŵete Yehova. (Machi. 13:48) Kumbi tingaŵawovya wuli ŵanthu ŵenaŵa maji ngechendafiki mukhosi?

10. Kumbi Yehova watitipaskanji vo vititiwovya kusambiza ŵanthu uneneska?

¹⁰ Yehova wagwiriskiya ntchitu gulu laki kuti watitipaski vosi vo tikhumbika kuti tisambizi ŵanthu uneneska. Mwakuyeruzgiyapu, sabata yeyosi pa Unganu wa Umoyu Widu Wachikhristu Ndipuso Uteŵeti, tisambizika mo tingapharazgiya. Unganu uwu utitiwovya kuziŵa vo tingakamba pa ulendu wakwamba kweniso asani taweriyaku ku munthu yo tingumupharazgiya. Ndipuso utitisambiza mo tingachitiskiya sambiri la Bayibolu. Gulu laku Yehova lititipaska so Vidya vo Tigwiriskiya Ntchitu Pakusambiza. Vidya venivi vititiwovya . . .

• kwamba kukambiskana ndi ŵanthu,

• kuti ŵanthu akhumbisiskengi kuvwisiya,

• kuti ŵanthu aje ndi mtima wakukhumba kuziŵa vinandi,

•   kuŵasambiza uneneska wo tisambira nawu Bayibolu kweniso

• kukambiya ŵanthu kuti ajulengi webusayiti yidu pamwenga kuŵadaniya ku Nyumba ya Ufumu.

Kuŵa waka ndi vidya ivi nkhwakukwana cha. Kweni titenere kuvigwiriskiya ntchitu. * Mwakuyeruzgiyapu, asani mwamupaska kapepala pamwenga magazini munthu yo wavwisiyanga po mwamupharazgiyanga, iyu wangaziŵerenga so fundu zinyaki asani yimwi mwaziweriyaku. Mbudindu wa munthu weyosi pakuyija kutangwanika ndi ntchitu yakupharazga Ufumu mwezi wewosi.

11. Ntchifukwa wuli pakupangika purogilamu yakuti ŵanthu asambirengi Bayibolu pa Intaneti?

¹¹ Yehova wagwiriskiya so ntchitu chigaŵa cha pa webusayiti yidu ya jw.org^® chakuti Online Bible Study Lessons kuti wawovyi wanthu kusambira uneneska. Ntchifukwa wuli gulu likuŵikapu chigaŵa ichi pa webusayiti yidu? Mwezi wewosi, ŵanthu anandi pacharu chosi afufuza pa Intaneti kuti asambirengi Bayibolu. Chigaŵa ichi chingawovya ŵanthu kuti ayambi kusambira uneneska wa mu Mazu ngaku Chiuta. Kweniso ŵanthu anyaki wo titiŵapharazgiya akana kusambira Bayibolu. Ŵanthu aviyo, mungaŵalongo chigaŵa ichi pa webusayiti yidu pamwenga mungaŵatumiziya waka linki. *

12. Kumbi munthu wangasambiranji pa chigaŵa chakuti Online Bible Study Lessons?

¹² Pa chigaŵa chakuti Online Bible Study Lessons pe mitu yakuti: “Bayibolu Ndipuso Yo Wakulilemba,” “Ŵanthu wo Azumburika Ukongwa mu Bayibolu,” ndipuso “Uthenga wa Chilindizga wo we mu Bayibolu.” Mu mitu iyi munthu:

• Wangasambira mo Bayibolu lingamuwovye

• Wangaziŵa kuti Yehova, Yesu ndi angelu mbayani

• Wangasambira chifukwa cho Chiuta wakulenge ŵanthu

• Wangaziŵa chifukwa cho taŵanthu tisuzgikiya ndipuso chifukwa cho vinthu viheni vichitikiya

Pa chigaŵa ichi pakonkhoska so mo Yehova . . .

• wazamumaliskiya masuzgu ndi nyifwa,

• wazamuyuskiya akufwa, ndipuso

• vo wazamuchita kuti Ufumu waki usere mumalu mwa maboma nga ŵanthu.

13. Asani munthu wamaliza kusambira Bayibolu pakuyija pa Intaneti, kumbi wakhumbika so kusambira ndi Kaboni? Konkhoskani.

¹³ Asani munthu wamaliza kusambira Bayibolu pakuyija pa Intaneti, wakhumbika so kusambira ndi Kaboni. Yesu wakutipaska ntchitu yakusambiza ŵanthu kuti aje akusambira. Tigomezga kuti ŵanthu akunweka asambirengi vo ve pa chigaŵa ichi, aviyanjengi ndipuso akhumbisiskengi kuti asambiri vinandi. Asani ndi viyo, mbwenu panyaki angazomera kusambira Bayibolu ndi Kaboni. Pakumaliya pa sambiru lelosi, munthu wapempheka kuti wapemphi Kaboni kuti wasambirengi nayu Bayibolu. Pa zuŵa lelosi, ŵanthu akujumpha 230 apempha kuziya pa webusayiti yidu kuti Akaboni asambirengi nawu Bayibolu. Kusambira Bayibolu ndi munthu masu ndi masu nkhwakukhumbika ukongwa!

14. Mwakukoliyana ndi vo Yesu wangukamba pa Mateyu 28:19, 20, kumbi tikhumbika kuyesesa kuchitanji? Nanga ntchifukwa wuli tikhumbika kuchita viyo?

¹⁴ Ŵerengani Mateyu 28:19, 20. Penipo tisambira Bayibolu ndi ŵanthu, titenere kuyesesa kuŵawovya ‘kuti aje akusambira . . . , kuŵasambiza kuti asungengi vinthu vosi vo [Yesu] wakutilamula.’ Tikhumbika kuwovya ŵanthu kuziŵa chifukwa cho akhumbikiya kusankha kuteŵete Yehova ndi kuja kuchigaŵa cha Ufumu waki. Venivi ving’anamuwa kuti tikhumbika  kuŵawovya kuti agwiriskiyengi ntchitu vo asambira, ajipatuliyi kwaku Yehova ndi kubatizika. Asani achita viyo ndipu angazitaskika pa zuŵa laku Yehova.​—1 Petu. 3:21.

15. Kumbi tilivi nyengu yakuchitiyanji, ndipu ntchifukwa wuli?

¹⁵ Nge mo takambiyapu kali, kwaja kanyengu kamanavi ukongwa kuti mugonezi uwu utuwepu. Pa chifukwa ichi, tilivi nyengu yakulutirizgiya kusambira Bayibolu ndi ŵanthu wo akhumba cha kusintha umoyu wawu kuti aje akusambira aku Khristu. (1 Akori. 9:26) Ntchitu iyi yikhumbika kugwirika mwaliŵi ukongwa! Pe che ŵanthu anandi wo akhumbika kuvwa uthenga wa Ufumu maji ngechendafiki mukhosi.

16. Mwakukoliyana ndi Chivumbuzi 18:2, 4, 5, 8, kumbi tosi tikhumbika kuchitanji? (Wonani so mazu ngamumphata.)

¹⁶ Ŵerengani Chivumbuzi 18:2, 4, 5, 8. Mavesi yanga ngalongo chinthu chinyaki cho Yehova wakhumba kuti ateŵeti ŵaki achitengi. Akhristu wosi auneneska akhumbika cha kuchita chechosi cho chikoliyana ndi Babiloni Mukulu. Munthu wechendasambiri uneneska, wangaŵa kuti wenga muchisopa chaboza. Iyu wangaŵa kuti wachitangaku vinthu vinyaki vo chisopa cho chichita pamwenga kupereka ndalama. Kuti waje mupharazgi wambula kubatizika, watenere dankha kuleka kuchitaku vinthu vosi vo vikoliyana ndi chisopa chaboza. Iyu watenere kulemba kalata kuti waziŵiski tchalitchi lo wengamu kweniso wupu wewosi wo ukoliyana ndi Babiloni Mukulu kuti watuwamu. *

17. Kumbi ndi ntchitu wuli zo Mkhristu wakhumbika cha kugwiraku, ndipu ntchifukwa wuli?

¹⁷ Mkhristu wauneneska watenere kuwonesesa kuti ntchitu yo wagwira yikoliyana cha ndi Babiloni Mukulu. (2 Akori. 6:14-17) Mwakuyeruzgiyapu, iyu wangasere cha ntchitu ku tchalitchi. Kweniso Mkhristu yo wagwira ntchitu ku kampani, watenere cha kugwira ntchitu kwa nyengu yitali mutchalitchi pamwenga muofesi yo muchitika vinthu vachisopa chaboza. Ndipu asani we ndi bizinesi yaki, wangato cha pamwenga kuzomera kontirakiti yakutuwa ku Babiloni Mukulu. Ntchifukwa wuli tikhumbika kuchita vinthu mwachiganga viyo? Chifukwa tikhumba cha kusangana maubudi ndi mawupu ngavisopa vaboza kweniso kuchitaku midawuku yo Chiuta watiyiwona kuti njaukazuzi.—Yesa. 52:11. *

18. Kumbi Mkhristu munyaki wangungangamiya wuli ku fundu za mu Bayibolu?

¹⁸ Vyaka vinandi vo vajumpha, mubali munyaki mura wagwiranga ntchitu ya ukalipentala. Mubali uyu wangudanika kuti wakagwiri ntchitu pa tchalitchi linyaki mutawuni yo wajanga. Munthu  yo wangumudana waziŵanga kuti nyengu zosi mubali uyu wakana kugwira ntchitu mutchalitchi. Kweni pa nyengu iyi, wangusuzgika kusaniya munthu wakuti wakagwiri ntchitu iyi. Chinanga kuti venga viyo, mubali uyu wangungangamiya ku fundu za mu Bayibolu ndipu wangukana kuchigwira ntchitu yo. Pati pajumpha sabata yimoza, munyuzipepala yinyaki angujambulamu chithuzi cho chalongonga munthu yo wanguzomera kugwira ntchitu iyi, wachikhoma mphinjika pa tchalitchi. Asani mubali uyu wanguzomera kugwira ntchitu iyi, chithuzi chaki ndichu chatingi chiŵengi munyuzipepala. Ŵanaŵaniyani waka mo Akhristu anyaki atingi akwaskikiyengi! Kweniso mo venivi vatingi vikwaskiyengi Yehova!

19-20. (a) Kumbi tasambiranji kufika yapa? (b) Kumbi tazamusambiranji mu nkhani ya sabata yamawa?

¹⁹ Mwakukoliyana ndi uchimi wa mu Bayibolu, chinthu chikulu ukongwa cho chichitikengi pambula kuswera yapa, ntchakuti alongozgi a vyaru adanirizgengi kuti “chimangu ndi kuvikilirika!” Kweni chifukwa cha vo Yehova wakutisambiza, tiziŵa kuti alongozgi ŵenaŵa angafiska cha kujalikiska chimangu cheneku kweniso cho chingaŵapu kwamuyaya. Kumbi tikhumbika kuchitanji alongozgi ŵenaŵa ŵechendadanirizgi mazu yanga ndipuso pharanyiku lamabuchibuchi lechendaŵawiyi? Yehova wakhumba kuti titangwanikengi ndi ntchitu yakupharazga uthenga wa Ufumu ndipuso kuti tifwiyengepu kuwovya ŵanthu anandi kuti aje akusambira. Kweni penipo tichita ntchitu iyi, tikhumbika cha kukoliyana ndi visopa vosi vaboza. Ivi visazgapu kutuwamu muchisopa chaboza ndi kukana kugwira ntchitu yeyosi yo yikoliyana ndi Babiloni Mukulu.

²⁰ Pe so vinthu vinyaki vo vazamuchitika kukumaliya kwa “mazuŵa ngakumaliya” asani azidaniriza kuti chimangu ndi kuvikilirika. Ndipuso pe vinthu vinyaki vo Yehova wakhumba kuti tichitengi. Kumbi Yehova wakhumba kuti tichitengenji ndipu ndi vinthu wuli vinyaki vo vichitikengi mumazuŵa nganu ngakumaliya? Kumbi tinganozgeke wuli vinthu vosi vo vichitikengi pambula kuswera yapa? Nkhani ya sabata yamawa yazamumuka mafumbu ngenanga.