1. Kasi tikumanya wuli kuti tikukhala “mu mazuŵa ghaumaliro”?

KASI mukababika chaka cha 1914 chikati chajumpha? Para ni nthena, ndikuti mwakhala umoyo winu wose “mu mazuŵa ghaumaliro” gha charu ichi. (2 Tim. 3:1) Tose tili kupulikapo za vinthu ivyo Yesu wakayowoyerathu kuti vizamuchitika mu nyengo yithu yino. Vinthu ivi ni nkhondo, njara, vindindindi, nthenda zakwambukira, uchikanamalango, na kutambuzgika kwa ŵanthu ŵa Yehova. (Mat. 24:3, 7-9, 12; Luka 21:10-12) Tawonaso kuti ŵanthu ŵali na nkharo izo mpositole Paulosi wakayowoyerathu. (Wonani bokosi lakuti “Umo Ŵanthu Ŵaliri Mazuŵa Ghano.”) Ise pakuŵa Ŵakaboni ŵa Yehova, tikusimikizga kuti tikukhala nadi “mu mazuŵa ghaumaliro.”—Mika 4:1.

2. Kasi tizgorenge mafumbo wuli?

² Chifukwa chakuti pajumpha nyengo yitali kufuma mu 1914, sono tikwenera kuti tili kuumaliro chomene wa “mazuŵa ghaumaliro.” Pakuti umaliro wa charu ichi uli pafupi chomene, tikwenera kumanya mazgoro gha mafumbo ghakuzirwa agha: Kasi ntchivichi chizamuchitika para “mazuŵa ghaumaliro” ghali pafupi kumara? Kweniso kasi Yehova wakukhazga vichi kwa ise apo tikulindilira vinthu ivi?

3. Kuyana na uchimi wa pa 1 Ŵatesalonika 5:1-3, kasi mitundu yizamuchemerezga vichi?

³ Ŵazgani 1 Ŵatesalonika 5:1-3. Paulosi wakazunura vya “zuŵa la Yehova.” Pa lemba ili, mazgu agha ghakung’anamura  nyengo iyo “Babuloni Mukuru,” uyo ni nyina wa chisopa chautesi wazamuparanyikira, m’paka kufika pa nyengo ya Aramagedoni. (Chivu. 16:14, 16; 17:5) Para kwazakakhala nyengo yichoko waka kuti “zuŵa” ili likwane, mitundu yizamupharazga kuti kuli “bata na mtende!” Nyengo zinyake ŵalongozgi ŵa charu ŵakuyowoya mazgu agha para ŵakukhumba kunozgaso ubali wawo na vyaru vinyake. * Ndipouli, ntchemerezgo ya “bata na mtende” iyo Baibolo likuyowoya yizamuŵa yakupambanako. Chifukwa wuli? Para ntchemerezgo iyi yazakachitika, ŵanthu ŵazamughanaghana kuti ŵalongozgi ŵa charu ŵafiska chilato chawo chakuti pa charu chapasi paŵe mtende. Kweni unenesko ngwakuti, “suzgo yikuru” yizamwamba ndipo pamanyuma pazamuŵa “pharanyiko lamabuchi.”—Mat. 24:21.

4. (a) Kasi ni vichi ivyo tikumanya yayi vyakukhwaskana na ntchemerezgo ya “bata na mtende”? (b) Kasi ni vichi ivyo tikumanya kale vyakukhwaskana na ntchemerezgo iyi?

⁴ Vinyake vyakukhwaskana na ntchemerezgo ya “bata na mtende” tikuvimanya. Ndipouli, pali vinyake ivyo tikuvimanya yayi. Tikumanya yayi ivyo vizamupangiska ŵalongozgi ŵandyali kuti ŵayowoye ntchemerezgo iyi, kweniso umo yizamuchitikira. Tikumanyaso yayi usange yizamupharazgika kamoza panji kanandi waka. Mulimose umo vizamuŵira, kweni fundo iyo tikumanya njakuti: Ŵanthu ŵangiziska yayi mtende pa charu chose, ntheura tingazapusikikanga chara na ntchemerezgo iyi. M’malo mwake, tizakaŵe maso chifukwa Baibolo likuti ichi chizamuŵa chimanyikwiro chakuti “zuŵa la Yehova” lili pafupi kwamba.

5. Kasi lemba la 1 Ŵatesalonika 5:4-6 likutovwira wuli kuti tinozgekere “zuŵa la Yehova”?

⁵ Ŵazgani 1 Ŵatesalonika 5:4-6. Ulongozgi wa Paulosi ukutovwira kumanya ivyo tingachita kuti tinozgekere “zuŵa la Yehova.” Tikwenera yayi “kugona tulo nga umo ŵakuchitira ŵanthu wose.” Kweni tikwenera ‘kuŵa maso.’ Mwachiyelezgero, tikwenera kuŵa maso kuti tileke kunjilirapo pa vya ndyali. Para tinganjilirapo mbwenu nase tiŵenge ku “chigaŵa cha charu.” (Yoh. 15:19) Tikumanya kuti Ufumu wa Chiuta wekha ndiwo ungiziska mtende pa charu chose chapasi.

6. Kasi tikukhumba kovwira ŵanyithu kuchita vichi, ndipo chifukwa wuli?

⁶ Padera pakuŵa maso, tikweneraso kovwira ŵanyithu kuti nawo ŵamanye ivyo Baibolo likayowoyerathu kuti vichitikenge mu charu. Tikwenera kukumbuka kuti para suzgo yikuru yamba, nyengo yakuti ŵanthu ŵambe kuteŵetera Yehova yizamuŵa kuti yamara. Lekani ntchakuzirwa kupharazgirathu sono! *

7. Kasi Yehova wakukhumba kuti tichite vichi sono?

⁷ Nyengo yichoko waka iyo yakhalako pambere “zuŵa” lake lindize, Yehova wakukhazga kuti  titangwanikenge na mulimo wakupharazga. Tikwenera kuwoneseska kuti “tili na vyakuchita vinandi mu mulimo wa Fumu.” (1 Kor. 15:58) Yesu wakayowoyerathu ivyo tichitenge. Apo wakayowoyanga vya vinthu ivyo vizamuchitika mu mazuŵa ghaumaliro, wakati: “Kweniso makani ghawemi ghakwenera kupharazgika dankha mu mitundu yose.” (Mrk. 13:4, 8, 10; Mat. 24:14) Ghanaghanirani fundo iyi: Nyengo zose para mwanjira mu uteŵeti ndikuti mukufiska uchimi wa mu Baibolo uwu.

8. Kasi tikumanya wuli kuti mulimo wakupharazga ukulutilira kukura?

⁸ Kasi mulimo wakupharazga waluta wuli panthazi? Chaka chilichose ŵanthu ŵanandi ŵakupulika uthenga uwemi wa Ufumu. Mwachiyelezgero, ghanaghanirani umo chiŵelengero cha ŵapharazgi ŵa Ufumu chasazgikira pa charu chose mu mazuŵa ghaumaliro agha. Mu 1914, ŵapharazgi ŵakaŵa 5,155 mu vyaru 43. Kweni sono pali ŵapharazgi, 8.5 miliyoni mu vyaru 240. Ndipouli, mulimo withu uchali undamare. Tikwenera kulutilira kupharazga Ufumu wa Chiuta kuti ndiwo wekha uzamumazga masuzgo ghose gha ŵanthu.—Sal. 145:11-13.

9. Chifukwa wuli tikwenera kulutilira kupharazga makani ghawemi gha Ufumu?

⁹ Ntchito yithu yakupharazga Ufumu, yilutilirenge m’paka apo Yehova wazamuyowoyera kuti yamara. Kasi pakhala nyengo yitali wuli yakuti ŵanthu ŵamanye Yehova Chiuta na Yesu Khristu? (Yoh. 17:3) Tikumanya yayi. Tikumanya waka kuti m’paka apo suzgo yikuru yizamwambira, waliyose uyo wali na “maghanoghano ghakwenelera umoyo wamuyirayira” wangapulika makani ghawemi na kusankha kuteŵetera Yehova. (Mil. 13:48) Kasi tingaŵawovwira wuli ŵanthu aŵa pambere nyengo yindamare?

10. Kasi Yehova wakutipa vichi kuti tisambizge ŵanthu unenesko?

¹⁰ Kwizira mu gulu lake, Yehova wakutipa vyose ivyo tikukhumbikwira kuti tisambizge ŵanthu unenesko. Mwachiyelezgero, tikukondwa kusambizgika sabata yiliyose pa maungano ghamukati mwasabata. Maungano agha ghakutovwira kumanya ivyo tingayowoya paulendo wakwamba na ulendo wakuwelerako. Ghakutisambizgaso umo tingachitiskira masambiro gha Baibolo. Gulu la Yehova latipa Ivyo Tikusambizgira Ŵanthu Baibolo. Vinthu ivi vikovwira kuti . . .

•   tiyambiske chidumbirano,

• ŵanthu ŵanweke na uthenga withu

• ŵanthu ŵaŵe na mtima wakukhumba kumanya vinandi

• tisambizge unenesko para tikuchitiska sambiro la Baibolo, kweniso

• tiphalire ŵanthu ŵakunweka vya webusayiti yithu na kuŵachemera ku Nyumba ya Ufumu.

Kweni ntchakukwana yayi kuŵa waka na vinthu ivi. Tikwenera kuvigwiliskira ntchito. * Mwachiyelezgero, para tadumbiskana na munthu wakunweka, ndipo tamulekera thirakiti panji magazini, wangasambira vinandi para tazakawelerako. Ni udindo withu kutangwanika na mulimo wakupharazga mwezi uliwose.

11. Chifukwa wuli pali kunozgeka Masambiro gha Baibolo gha pa Intaneti?

¹¹ Masambiro gha Baibolo gha pa Intaneti ni nthowa yinyake iyo Yehova wakovwilira ŵanthu kusambira unenesko. Chifukwa wuli pali kunozgeka masambiro agha? Mwezi uliwose, ŵanthu ŵanandi pa charu chose ŵakujura Intaneti kuti ŵasambire Baibolo. Masambiro agho ghakusangika pa webusayiti yithu ghangawovwira ŵanthu aŵa kuti ŵambe kusambira unenesko wa Mazgu gha Chiuta. Pali ŵanyake awo tikuŵapharazgira ŵangawoneka nga kuti ŵakukhumba viŵi yayi kusambira Baibolo. Para ndimo viliri, ŵalongorani chigaŵa ichi pa webusayiti yithu panji mungaŵatumizgira linki ya masambiro agha mu chiyowoyero icho ŵakuchimanya makora. *

12. Kasi munthu wangasambira vichi pa Masambiro gha Baibolo gha pa Intaneti?

¹² Masambiro gha Baibolo gha pa Intaneti ghali na mitu iyi: “Baibolo na Uyo Wali Kulilemba,” “Ŵanthu Awo Ŵakuzunulika Chomene mu Baibolo,” na “Chilindizga Icho Baibolo Likutiphalira.” Para munthu wangasambira mitu iyi, wangamanya:

• Umo Baibolo lingawovwilira munthu

• Yehova, Yesu, na ŵangelo

• Chifukwa icho Chiuta wakalengera ŵanthu

• Chifukwa icho pa charu pakuchitikira vinthu viheni

Masambiro agha ghakusambizgaso umo Yehova . . .

• wazamumazgira ulwari na nyifwa,

• wazamuwuskira ŵakufwa, na

• umo Ufumu wa Chiuta uzamumazgira maboma gha ŵanthu.

13. Kasi Masambiro gha Baibolo gha pa Intaneti ghakunjira m’malo mwa ndondomeko yakusambizga ŵanthu Baibolo nyumba na nyumba? Longosorani.

¹³ Masambiro gha Baibolo gha pa Intaneti ghakunjira m’malo mwa ndondomeko yakusambizga ŵanthu Baibolo nyumba na nyumba yayi. Yesu wali kutipa mulimo wakuti tizgore ŵanthu kuŵa ŵasambiri. Masambiro gha pa Intaneti agha ghali kupangika kuti ghawovwire ŵakunweka kuti ŵatemwenge ivyo ŵasambira, na kuŵa na mtima wakukhumba kumanya vinandi. Ivi vingawovwira kuti ŵazomere sambiro la Baibolo. Paumaliro wa sambiro lililose, pakuŵa pempho lakuti munthu wasange uyo wangasambira nayo Baibolo. Kwizira pa webusayiti yithu, ŵanthu pafupifupi 230, zuŵa lililose ŵakupempha kuti munthu waŵasambizgenge Baibolo. Nakuti ntchakuzirwa chomene kusambira Baibolo na munthu maso na maso.

14. Kuyana na mazgu gha Yesu agho ghali pa Mateyu 28:19, 20, kasi tikwenera kuchitachi, ndipo chifukwa wuli?

¹⁴ Ŵazgani Mateyu 28:19, 20. Para tikuchitiska masambiro gha Baibolo, tikwenera  kuŵikapo mtima kuti ‘tizgore ŵanthu kuŵa ŵasambiri na kuŵasambizga kusungilira vinthu vyose ivyo Yesu wali kutiphalira.’ Tikwenera kovwira ŵanthu kupulikiska kuzirwa kwa kuteŵetera Yehova na kukhozgera Ufumu wake. Ichi chikung’anamura kuti tikwenera kovwira ŵanthu kuchita ivyo ŵakusambira, ŵajipeleke kwa Yehova na kubatizika. Pekha para ŵangachita nthena ndipo ŵangazakapona pa zuŵa la Yehova.—1 Pet. 3:21.

15. Kasi tilije nyengo yakuchitira vichi, ndipo chifukwa wuli?

¹⁵ Nga umo tayowoyera kale mu nkhani iyi, kwakhala nyengo yichoko waka kuti charu ichi chimare. Ndicho chifukwa chake tilije nyengo yakuti tisambirenge Baibolo na ŵanthu awo ŵakukhumba yayi kusintha nkharo zawo na kuŵa ŵateŵeti ŵa Yehova. (1 Kor. 9:26) Ntchito yithu njaluŵiro. Pachali ŵanandi awo ŵakukhumbikwira kupulika uthenga wa Ufumu pambere nyengo yindamare.

16. Kuyana na Chivumbuzi 18:2, 4, 5, 8, kasi tose tikwenera kuchitachi? (Wonani mazgu ghamusi.)

¹⁶ Ŵazgani Chivumbuzi 18:2, 4, 5, 8. Mavesi agha ghakulongora chinthu chinyake icho Yehova wakukhumba ku awo ŵakumusopa. Ŵakhristu ŵaunenesko wose ŵakwenera kuwoneseska kuti ŵakuchitako yayi chilichose icho chikukhwaskana na Babuloni Mukuru. Pambere wandasambire unenesko, msambiri wa Baibolo wangaŵa kuti wakaŵa mu chisopa chautesi. Vingaŵa kuti wakalutanga ku ungano wa chisopa chake na kuchitako milimo yinyake ya chisopa. Panji wakapelekanga wovwiri wa ndalama ku wupu wa chisopa. Ntheura pambere msambiri wa Baibolo wandazomerezgeke kuŵa mupharazgi wambura kubatizika, wakwenera kufumirakothu ku chisopa chautesi. Wakwenera kulemba kalata yakulongosora kuti wafuma mu tchalitchi panji mu wupu uwo ukukolerana na Babuloni Mukuru. *

17. Ni ntchito wuli izo Mkhristu wakwenera kugega, ndipo chifukwa wuli?

¹⁷ Mkhristu waunenesko wakwenera kuwoneseska kuti ntchito iyo wakugwira yileke kukhozgera chisopa chautesi munthowa yiliyose. (2 Kor. 6:14-17) Mwachiyelezgero, wangalembeka yayi ntchito na tchalitchi. Kweniso nanga vingaŵa kuti wali kulembeka ntchito na ŵanthu ŵanyake, kweni wangagwira yayi ntchito pa nyumba iyo pakusopera chisopa chautesi. Ndipo para Mkhristu wali na bizinesi yake, wangazomera yayi kupelekera katundu wake ku chisopa chilichose chautesi. Chifukwa wuli tikuchita  nthena? Chifukwa ntchakuti tikukhumba yayi kuchitako milimo ya visopa ivyo Chiuta wakuviwona kuti vyakufipirwa.—Yes. 52:11. *

18. Kasi mubali munyake wakalondezga wuli ulongozgi wa mu Baibolo pa nkhani ya ntchito?

¹⁸ Mu vyaka ivyo vyajumpha, mulara uyo wakugwira ntchito ya mawoko wakapempheka na chisopa chinyake kuti wakachite ukalipentara pa tchalitchi linyake, ilo likaŵa mu tawuni iyo wakakhalanga. Munthu uyo wakakhumbanga kuti wamulembe ntchito, wakamanyanga kuti mubali uyu wangazomera yayi kukagwira ntchito pa tchalitchi. Kweni panyengo iyi munthu uyu wakakhumbanga chomene wantchito. Nangauli ndimo vikaŵira, kweni mubali withu wakalondezga fundo za mu Baibolo ndipo wakayikana ntchito iyi. Mu sabata yakulondezgapo, mu nyuzipepara mukaŵa chithuzi cha kalipentara munyake wakuŵika mphinjika pa tchalitchi. Viŵenge kuti mubali withu wakayizomera ntchito iyi, mphanyi mu nyuzipepara iyi mukaŵa chithuzi chake. Ghanaghanirani waka umo Ŵakaboni ŵanyake ŵakatenge ŵayiwonerenge nkhani iyi, kweniso umo Yehova wakatenge wajipulikirenge.

19-20. (a) Kasi tasambira vichi? (b) Kasi tizamusambira vichi?

¹⁹ Baibolo likuti uchimi wakuzirwa chomene uwo ufiskikenge sonosono apa, ni ntchemerezgo ya “bata na mtende.” Chifukwa cha ivyo Yehova watisambizga, tikumanya kuti mitundu yingiza na mtende wenecho yayi. Kasi tikwenera kuchita vichi pambere ntchemerezgo iyi na pharanyiko lamabuchi vindachitike? Yehova wakukhumba kuti titangwanikenge na mulimo wakupharazga uthenga wa Ufumu na kovwira ŵanthu ŵanandi kuŵa ŵasambiri. Kweniso tikwenera kujipatura ku visopa vyose vyautesi. Ivi vikusazgapo kufuma mu chisopa chautesi na kugega kugwira ntchito yiliyose iyo yikukhozgera Babuloni Mukuru.

²⁰ Pali vinthu vinyake ivyo vichitikenge para “mazuŵa gha umaliro” ghali pafupi kumara. Kweniso pali vinthu vinyake ivyo Yehova wakukhazga kuti tichitenge. Kasi vinthu ivi ni vichi, ndipo tingachita wuli kuti tinozgekere vinthu vyose ivyo vikwiza munthazi? Tizamudumbiskana vinthu ivi mu nkhani yakulondezgapo.