1. E mautinoa pefea i a tatou me ko ola tatou i “aso fakaoti”?

E MATA, a koe ne fanau mai tua o te tausaga e 1914? Kafai e penā loa, ko tena uiga, ko ola eiloa koe i te vaitaimi o “aso fakaoti” o te olaga tenei. (2 Timo. 3:1) Ko oti ne lagona ne tatou a tala e uiga ki mea kolā ne ‵valo mai ne Iesu me ka ‵tupu i te taimi tenei. E aofia i ei a taua, oge mea‵kai, mafuie, famai, mo te gasolo ki luga o amioga solitulafono, mo te fakasauaga o tino o Ieova. (Mata. 24:3, 7-9, 12; Luka 21:10-12) Ko lavea foki ne tatou a amioga a tino kolā ne ‵valo mai ne te apositolo ko Paulo. (Ke onoono ki te pokisi “ Faifaiga mo Amioga a Tino i Aso Nei.”) E pelā me ne tino tapuaki o Ieova, e tali‵tonu tatou me ko ola nei tatou i “te fakaotiotiga o aso fakaoti.”—Mika 4:1.

2. Ne a fesili e ‵tau o tali aka?

² Ona ko te leva o taimi ko ‵teka atu talu mai te 1914, ko ‵tau o ola nei tatou i te fakaotiotiga o “aso fakaoti.” Ona ko te pili ‵ki mai o te gataga, e ‵tau o iloa ne tatou a tali ki nisi fesili tāua: Ne a mea ka ‵tupu i te fakaotiotiga o “aso fakaoti”? Kae se a te mea e fakamoemoe a Ieova ke fai ne tatou i te taimi koi fakatali‵tali ei tatou ke ‵tupu a mea konā?

3. E ‵tusa mo te valoaga i te 1 Tesalonia 5:1-3, se a te faka‵pulaga telā ka fai ne takitaki o atufenua?

³ Faitau te 1 Tesalonia 5:1-3. Ne fakasae aka ne Paulo a te “aso o Ieova.” E pelā mo te mea ne fakaaoga i te tusi faitau, e fakasino atu te mea tenei ki te vaitaimi telā e kamata ki te fakaseaiga o “Papelonia te Sili,” te emupaea o lotu ‵se i te lalolagi kātoa, kae fakaoti ki a Amaketo. (Faka. 16:14, 16; 17:5) Mai mua malie o kamata a te “aso” tenā, ka faka‵pula atu ne atufenua me ko “Filemu kae tokagamalie!” (Nisi ‵fuliga e fai penei: “Filemu mo te saogalemu.”)  E fakaaoga ne takitaki o te lalolagi i nisi taimi a tugapati tai ‵pau penā māfai ko fai‵pati latou e uiga ki te faka‵leiga o fesokotakiga i vā o atufenua. * Kae ko te faka‵pulaga e uiga ki te “filemu kae tokagamalie” e fakamatala mai i te Tusi Tapu ka ‵kese eiloa. Kaia? Kafai ko tupu te mea tenei, e mafai o mafau‵fau a tino me ko manuia a taumafaiga a takitaki o te lalolagi ke fai a te lalolagi mo koga e maua i ei a te puipuiga mo te filemu. Kae ko te ‵tonuga loa, “ka oko fakapoi atu a te fakaseaiga” i te taimi o te “fakalavelave lasi.”—Mata. 24:21.

4. (a) Se a te mea e ‵tau o fakatali‵tali tatou ke lavea atu e uiga ki te kalaga o te “filemu kae tokagamalie”? (e) Se a te mea ko iloa ne tatou e uiga ki ei?

⁴ E iloa ne tatou a nisi fakamatalaga ki te kalaga e uiga ki te “filemu kae tokagamalie.” Kae e isi foki ne nisi mea e se iloa ne tatou. E se iloa ne tatou a mea kolā ka fakamalosi aka ei a takitaki ke fai atu ne latou a te faka‵pulaga tenā io me ko te auala ka fai ei a te faka‵pulaga tenā. Kae e se iloa ne tatou me e mata, ka aofia fua i ei se faka‵pulaga e tasi io me se fakasologa o faka‵pulaga. Faitalia me se a te mea e tupu, e iloa ne tatou a te mea tenei: E se ‵tau o fakaloiloigina tatou mai te mafau‵fau me e mafai ne takitaki o te lalolagi o aumai te filemu ki te lalolagi kātoa. Kae ko te mea tenā se faka‵pulaga telā ne fai mai te Tusi Tapu ke fakatali‵tali ki ei. Se fakailoaga me i te “aso o Ieova” ko pili o kamata!

5. E fesoasoani mai pefea a te 1 Tesalonia 5:4-6 ke toka tatou mō te “aso o Ieova”?

⁵ Faitau te 1 Tesalonia 5:4-6. E fakaasi mai i te fakamalosiga tenei a Paulo a mea e ‵tau o fai ne tatou ke fakamautinoa aka me ko toka tatou mō te “aso o Ieova.” E se ‵tau mo tatou o “‵moe e pelā eiloa mo nisi tino.” E ‵tau mo tatou o “ala faeloa” kae tumau i te matapula‵pula. E pelā me se fakaakoakoga, e ‵tau mo tatou o matapula‵pula ki te fakamataku o te gutugutulua e uiga ki te sē ‵kau o tatou ki se feitu i mea fakapolitiki o te lalolagi nei. Kafai ne aofia tatou i ei, e mafai eiloa o fai tatou e pelā me ne “vaega o te lalolagi.” (Ioa. 15:19) E iloa ne tatou me i te Malo o te Atua ko te fakamoemoega fua e tasi ke maua i ei te filemu i te lalolagi kātoa.

6. Se a te mea e ma‵nako tatou o fai ke fesoasoani atu ki nisi tino, kae kaia?

⁶ I tafa o te matapula‵pula, e ma‵nako foki tatou o fesoasoani atu ki nisi tino ke tumau i te mataala ki mea kolā ne ‵valo mai i te Tusi Tapu me ka ‵tupu i te lalolagi. Ke masaua ne tatou me kafai ko kamata a te fakalavelave lasi, ka se toe maua ne tino a te avanoaga ke ‵fuli mai ki a Ieova. Tenā te pogai e tāua ‵ki eiloa ke na fakava‵vave a te ‵tou galuega talai! *

7. Se a te mea e manako a Ieova ke fai nei ne tatou?

⁷ I te taimi toetoe tenei koi ‵toe mai mua o oko mai tena “aso”, e manako a Ieova ke fakalave‵lave faeloa tatou i te galuega talai. E ‵tau o fakamautinoa aka ne tatou me e “uke [‵tou]  galuega e fai i te galuega a te Aliki.” (1 Koli. 15:58) Ne ‵valo mai ne Iesu a mea e ‵tau o fai ne tatou. I te taimi ne faipati ei a ia e uiga ki mea tāua katoa kolā ka ‵tupu i aso fakaoti, ne fakaopoopo mai a ia: “E ‵tau foki o talai muamua atu te tala ‵lei ki atufenua katoa.” (Male. 13:4, 8, 10; Mata. 24:14) Mafaufau aka la: I taimi katoa e fano koe i te galuega talai, e aofia eiloa koe i te fakataunuga o te valoaga tenei i te Tusi Tapu!

8. E iloa pefea ne tatou me i te galuega talai e gasolo aka faeloa ki mua?

⁸ Kae e a te gasolo ki mua o te galuega talai o te Malo? I tausaga katoa, e gasolo faeloa a te galuega tenei ki mua. E pelā me se fakaakoakoga, mafaufau ki te fanakaga o te aofaki o tino talai o te Malo i te lalolagi kātoa i aso fakaoti konei. I te 1914, ne nofo ki se 5,155 tino talai i atufenua e 43. I aso nei, ko nofo ki se 8.5 miliona o tino talai i atufenua e 240! Kae tiga te feitu tenā, seki gata eiloa a te ‵tou galuega. E ‵tau mo tatou o tumau i te folafola atu a te Malo o te Atua e pelā me ko te faka‵leiga fua e tasi ki fakalavelave o tino katoa.—Sala. 145:11-13.

9. Kaia e ‵tau ei mo tatou o tumau i te talai atu a te fekau o te Malo?

⁹ Ka se gata eiloa a te ‵tou galuega talai o te Malo ke oko ki te taimi e fai mai ei a Ieova me ko gata. Pefea te uke o taimi koi ‵toe mō tino ke tauloto ki mea e uiga ki a Ieova te Atua mo Iesu Keliso? (Ioa. 17:3) E se iloa ne tatou. E iloa fua ne tatou me koi tuai o kamata a te fakalavelave lasi, koi mafai eiloa ne “tino loto ‵lei katoa kolā e ‵tau o maua ne latou a te ola se-gata-mai”o talia a te tala ‵lei. (Galu. 13:48) E mafai pefea o fesoasoani atu tatou ki tino konei manū koi maua te avanoaga?

10. Ne a fesoasoani e tuku mai ne Ieova ke akoako ne tatou a tino ki te munatonu?

¹⁰ E auala i tena fakapotopotoga, e tuku mai ne Ieova ki a tatou a mea kolā e manakogina ke akoako atu a tino ki te munatonu. E pelā me se fakaakoakoga, e maua ne tatou a akoakoga i vaiaso takitasi i te fakatasiga i loto i te vaiaso. E fesoasoani mai te fakatasiga tenei ke iloa ne tatou a pati e ‵tau o fai ne tatou i asiga muamua mo toe asiga. Kae e akoako mai foki i ei ke iloa ne tatou o fai a akoga faka-te-Tusi Tapu. Ne tuku mai foki ne te fakapotopotoga a Ieova a mea faigaluega i ‵tou Pusa mo fai a Akoakoga. E fesoasoani mai ki a tatou a mea faigaluega konei ko te mea ke . . .

• kamata aka a sau‵talaga,

• ati aka te fiafia i te tino,

• fakamalosi te tino ke manako o tauloto ki mea e uke atu,

•   akoako te munatonu i akoga faka-te-Tusi Tapu, kae

• ‵kami a tino fia‵fia ke olo atu ki te ‵tou fakatuatusi io me ki ‵tou Fale Tapuaki.

E tonu, e se lava fua i te mauaga o mea faigaluega konei. E ‵tau o fakaaoga ne tatou a mea konā. * E pelā me se fakaakoakoga, kafai ko oti ne sau‵tala mo se tino fiafia, kae tuku atu ne koe ki a ia se tamā pepa io me se mekesini, ka mafai eiloa o faitau ne ia ke oko ki te taimi e toe mafai o asi atu koe ki a ia. Se tiute eiloa o tatou ke fakalave‵lave faeloa i masina katoa i te talaiatuga o te Malo.

11. Kaia ne fakatoka i ei a Online Bible Study Lessons?

¹¹ A te Online Bible Study Lessons i te jw.org^® ko te suā mea faigaluega e fakaaoga ne Ieova ke fesoasoani atu ki tino ke tauloto ki te munatonu. (Onoono mai lalo o te vaega ko BIBLE TEACHINGS > ONLINE LESSONS.) Kaia ne fakatoka i ei a akoakoga konei? I masina takitasi, e fia afe o tino i te lalolagi kātoa e ‵sala ki akoakoga mai te Tusi Tapu i luga i te ‵tou fakatuatusi. A akoakoga i luga i te ‵tou fakatuatusi e mafai o fesoasoani atu ki tino ke tauloto ki te munatonu i te Muna a te Atua. A nisi tino kolā e faipati koe ki ei e mafai o se talia ne latou se akoga faka-te-Tusi Tapu i te taimi muamua. Kafai e penā loa, fakaasi atu ki a latou a te vaega tenei i te ‵tou fakatuatusi io me lafo atu ki a latou a te link ki akoakoga konā. *

12. Ne a mea e mafai o tauloto ne se tino mai te Online Bible Study Lessons?

¹² E aofia i te ‵tou Online Bible Study Lessons a mataupu konei: “Te Tusi Tapu mo te Tino ne Tusi ne Ia,” “Tino Kolā e Aofia i te Tusi Tapu,” mo “Te Fekau i te Tusi Tapu e Uiga ki te Fakamoemoega.” I te taimi e sukesuke ei ki akoakoga konei, ka tauloto ne se tino a:

• Te Auala e mafai o fesoasoani atu te Tusi Tapu ki se tino ke iloa ne ia me

• Ko oi a Ieova, Iesu, mo agelu

• Kaia ne faite ei ne te Atua a tino

• Kaia e isi ei ne logo‵maega mo amioga ma‵sei

E fakamatala mai foki i akoakoga konā a te auala ka gasuesue ei a Ieova o. . .

• fakaseai atu a logo‵maega mo te mate,

• toe faka‵tu aka a tino ki te ola, kae

• sui a malo o tāgata ki te Malo o te Atua.

13. E mata, e sui ne te Online Bible Study Lessons a te fakatokaga masani ki te akoga faka-te-Tusi Tapu? Fakamatala mai.

¹³ E se sui ne akoakoga konei i te itaneti a te fakatokaga ki te akoga faka-te-Tusi Tapu. Ko oti ne tuku mai ne Iesu te tauliaga ke fai a soko. E fakamoe‵moe tatou me ka suke‵suke fua a tino fia‵fia ki akoakoga konei i te itaneti, fia‵fia ki mea e tauloto ne latou kae ma‵nako o tauloto ki mea e tai uke atu. Kafai e penā, kāti ka talia ne latou se akoga faka-te-Tusi Tapu. I te fakaotiga o akoakoga takitasi, e ‵kami atu te tino faitau ke lafo atu sena fakamolemole mō se faiakoga ke suke‵suke fakatasi mo ia ki te Tusi Tapu. E auala i te ‵tou fakatuatusi i te itaneti, e maua ne tatou a akoga faka-te-Tusi Tapu e silia atu mo te 230 i aso takitasi i te lalolagi kātoa! E tāua ‵ki eiloa ke fai a te akoga faka-te-Tusi Tapu a se tino i te auala masani!

14. E ‵tusa mo fakatonuga a Iesu kolā ne fakamau i te Mataio 28:19, 20, ne a mea e ‵tau o taumafai malosi tatou o fai, kae kaia?

¹⁴ Faitau te Mataio 28:19, 20. I te taimi e fai ne tatou a a‵koga faka-te-Tusi Tapu, e taumafai malosi eiloa tatou ke “fai a soko . . . , [ke] akoako atu latou ke faka‵logo ki mea katoa ne fakatonu [mai ne Iesu].” E ‵tau o fesoasoani atu tatou ki tino ke malamalama i te tāua ke filifili ke tavini atu latou ki a Ieova mo tena Malo. E fakauiga te mea tenei ki te taumafai ke fakamalosi aka a tino  ke puke ‵mau ki te munatonu mai te fakagalue aka a mea e tauloto ne latou, tuku atu olotou ola ki a Ieova, kae papatiso. I te faiga tenā, ka ‵sao atu ei latou i te aso o Ieova.—1 Pe. 3:21.

15. Se a te mea e se ma‵nako tatou o fai, kae kaia?

¹⁵ E pelā mo te mea ne fakasae atu muamua, ko toetoe ‵ki te vāsia o te taimi nei ke oko atu loa ki te gataga o te olaga tenei. Ona ko te mea tenei, e se ma‵nako tatou o fakamāumāu ‵tou taimi o suke‵suke faeloa ki te Tusi Tapu mo tino kolā e seai se manakoga tonu i a latou ke fai mo soko o Keliso. (1 Koli. 9:26) A te ‵tou galuega e ‵tau o fai fakavave! E tokouke a tino koi manakogina ke lagona ne latou a te fekau o te malo a koi tuai o tō talimuli.

16. E ‵tusa mo te Fakaasiga 18:2, 4, 5, 8, ne a mea e ‵tau o fai ne tatou katoa? (Ke onoono foki ki te fakamatalaga mai lalo.)

¹⁶ Faitau te Fakaasiga 18:2, 4, 5, 8. E fakaasi mai i fuaiupu konei se mea telā e manako a Ieova ke fai ne ana tino tapuaki. E ‵tau mo Kelisiano ‵tonu katoa o fakamautinoa aka me seai se sokoga o latou ki Papelonia te Sili. A koi tuai o tauloto ki te munatonu, kāti ne kau se akoga faka-te-Tusi Tapu ki lotu ‵se. Kāti ne kau sāle a ia ki mea fakalotu kae aofia i olotou faigāmea. Io me ne lafo sāle ana meaalofa ki vaegā fakapotopotoga konā. A koi tuai o fai se tino akoga mo fai se tino talai seki papatiso, e ‵tau o fakamautinoa aka ne ia me ko seai eiloa sena sokoga ki lotu ‵se. E ‵tau o tuku atu ne ia se tusi lisaina io me sē kau katoatoa atu ki te lotu io me ko so se vaegā fakapotopotoga telā e isi sena sokoga ki Papelonia te Sili. *

17. Ne a vaegā galuega e ‵tau o ‵kalo kea‵tea so se Kelisiano mai i ei, kae kaia?

¹⁷ E ‵tau o fakamautinoa aka ne se Kelisiano tonu me i tena galuega ‵togi e seai sena sokoga ki Papelonia te Sili. (2 Koli. 6:14-17) E pelā me se fakaakoakoga, e se mafai o galue a ia i se lotu. E se gata i ei, a te Kelisiano telā e fakagalue ne se pisinisi e se ‵tau o uke ana galuega e fai i se fale telā e fakaaoga mō tapuakiga ‵se. Kae kafai e isi sena pisinisi totino, e mautinoa eiloa me ka sē talia ne ia so se galuega telā e manako se lotu o Papelonia te Sili ke fai ne ia. Kaia e ‵tau o ‵mautakitaki tatou i se vaegā tulaga penei? Me e se ma‵nako tatou ke aofia i galuega mo agasala a fakapotopotoga fakalotu kolā e se ‵mā i te kilokiloga a te Atua.—Isa. 52:11. *

18. I te auala fea ne ‵piki ‵mau se taina ki fakatakitakiga i te Tusi Tapu e uiga ki se galuega ne ofo atu ke fai ne ia?

¹⁸ I se fia tausaga ko ‵teka, ne fakamolemole atu se tagata ki se toeaina telā e isi sena pisinisi  ke talia ne ia se tamā galuega kamuta i se lotu i te fakai e nofo i ei te taina tenei. Ne iloa ne te tino tenei me ne fai atu faeloa te taina me e se mafai o galue a ia i falesa. Kae ne manako malosi a te tagata tenei ki se tino ke fai ne ia te galuega. Kae ne ‵piki ‵mau te taina ki fakatakitakiga mai te Tusi Tapu kae ne seki talia ne ia te galuega. I te suā vaiaso, ne ‵pa i luga i te nusipepa a te ata o te suā kamuta mo te ata o te sataulo o te lotu i ei. Moi ne gutugutulua a te taina o talia ne ia te galuega tenā, penei ne mafai loa o ‵pa tena ata i luga i te nusipepa. Mafaufau aka la ki te lasi o te fakamaseiga ki ana taina tali‵tonu moi ne fai ne gutugutulua a ia! Mafaufau foki ki lagonaga o Ieova e uiga ki ei.

19-20. (a) Ne a mea ko oti ne tauloto ne tatou? (e) Ne a nisi mea ka tauloto tatou ki ei?

¹⁹ E ‵tusa mo valoaga i te Tusi Tapu, a te suā mea tāua telā ko pili o fakataunu ko te faka‵pulaga a atufenua e uiga ki te “filemu kae tokagamalie.” Fakafetai ki a Ieova mo ana akoakoga, ko iloa nei ne tatou me ka se mafai o maua ne atufenua a te filemu tonu kae tumau. Ne a mea e ‵tau o fai ne tatou mai mua o ‵tupu a mea konā fakatasi mo te fakaseaiga fakapoi telā ka oko mai? E fakamoemoe a Ieova ke fakalave‵lave faeloa tatou i te talaiatuga o te fekau o te Malo kae taumafai o fai a soko e tokouke. E se gata i ei, e ‵tau o ‵vae kea‵tea tatou mai lotu ‵se katoa. E aofia i ei a te se fai mo vaega io me ‵kalo kea‵tea mai so se galuega telā e isi sena sokoga ki Papelonia te Sili.

²⁰ E isi ne nisi mea ka ‵tupu i te vaitaimi tenei i te fakaotiotiga o “aso fakaoti.” E isi aka foki ne nisi mea e manako a Ieova ke fai ne tatou. Ne a la a mea konei, kae e mafai pefea o fakatoka tatou mō mea katoa kolā ka oko mai i aso mai mua nei? Ka onoono tatou ki ei i te suā mataupu.