1. Малы ми оскиськомы, «берпум аръёсы» улӥськомы шуыса?

 ТӤ 1914-тӥ ар бере вордӥськиды ке, озьыен, тӥляд быдэс улонды та дуннелэн «берпум аръёсаз» ортче (2 Тим. 3:1). Ваньмы ми кылӥмы Иисусэн азьло ик верам югдуръёс сярысь. Со вераз сютэм аръёс, музъем зурканъёс, урод черъёс, законлы пумит улонлэн вӧлмемез но Иеговалэсь калыксэ уйылон-уллянъёс сярысь (Матф. 24:3, 7—9, 12; Лука 21:10—12). Озьы ик ми адӟиськомы, адямиос асьсэды возё шуыса озьы, кызьы апостол Павел азьло ик вераз вал. (Учке « Кыӵеесь луизы адямиос» рамкаез.) Ваньмыз та оскытэ милемыз, ми та дуннелэн берпум аръёсаз улӥськомы шуыса (Мих. 4:1).

2. Кыӵе юанъёслы валэктонъёс шедьтоно?

² Трос аръёс ортчизы ини 1914-тӥ арысен, озьыен, ми «берпум аръёслэн» берпуметӥ нуналъёсазы улӥськомы. Та дуннелэн пумыз сокем матын ини бере, милемлы валэктонъёс шедьтоно кулэ луись юанъёслы: мар луоз «берпум аръёслэн» пумаз? Мае соин сэрен возьма милесьтым Иегова?

3. Мае ялозы политика удысысь кивалтӥсьёс, 1 Фессалоникаослы 5:1—3 лыдэ басьтыса?

³ Лыдӟе 1 Фессалоникаослы 5:1—3. Татын Павел «Кузё-Инмарлэн нуналыз» сярысь вера. Та кылбуръёсын «Кузё-Инмарлэн нуналыз» возьматэ дырез, кудӥз кутскоз «Быдӟым Вавилон» вылэ, яке дунне вылысь вань зэмос луисьтэм  религиос вылэ, урдсконысен но йылпумъяськоз Армагеддонэн (Усьт. 16:14, 16; 17:5). Ӵапак со нунал вуон азьын калыкъёс ялозы: «Тупаса улон, кышкатэк улон!» Куддыръя политика удысысь кивалтӥсьёс та выллем кылъёсты куто, калыкъёслэн кусыпъёссы тупамзы сярысь веракузы b. Нош тупаса но кышкатэк улон сярысь ялон, кудӥз сярысь Библиын вераське, аспӧртэмлыко луоз. Малы? Со дыре адямиос малпалозы: быдэс дунне вылысь кивалтӥсьёслэн тыршемзылы луыса, улон сокем кышкыт ӧвӧл ини. Нош зэмзэ вераса, соос шӧдтэк шорысь быдтэмын луозы (Матф. 24:21).

4. а) Мае ми ум тодӥське «тупаса улон, кышкатэк улон» шуыса ялон сярысь? б) Мае ми тодӥськомы ини?

⁴ Зэм но, «тупаса улон, кышкатэк улон» шуыса ялон сярысь ми мае ке но тодӥськомы, нош ваньзэ ум. Ми ум тодӥське, малы кивалтӥсьёс таӵе ялон лэсьтозы. Ум тодӥське, кызьы со верамын луоз. Ум тодӥське: со сярысь одӥг пол ялэмын луоз яке кӧня ке пол. Но ми умой тодӥськомы: милемлы осконо ӧвӧл, адямиослэн кивалтӥсьёссы музъем вылэ тупаса улон ваёзы шуыса. Соослэн кылъёссы — со Библиысь азьпалзэ ивортонлэн быдэсмонэз. Ялонзы возьматоз, Иеговалэн нуналыз тани-тани вуоз ини шуыса.

5. Кызьы 1 Фессалоникаослы 5:4—6 кылъёс юртто милемлы Иеговалэн нуналызлы дасяськыны?

⁵ Лыдӟе 1 Фессалоникаослы 5:4—6. Павеллэн кылъёсыз юртто милемлы Иеговалэн нуналызлы дасяськыны. Ми «мукетъёс кадь ум изе». Ми сэзь-сэзь кариськомы, сазь уломы. Кылсярысь, милемлы чакласьконо, политикаен герӟаськем ужъёсы медам пыриське но нокин пала кариськытэк мед уломы шуыса. Озьы ӧм лэсьтэ ке, ми «та дуннелэн адямиосыз» луомы (Иоанн 15:19). Ми оскиськомы, Инмарлэн Эксэйлыкез гинэ зэмос тупаса улон ваёз шуыса.

6. Мар карыны ми мукетъёсызлы юрттыны кулэ но малы?

⁶ Милемлы сэзь-сэзь кариськоно гинэ ӧвӧл, нош озьы ик мукетъёсызлы тодыны юрттоно, мар вера Библия дунне вылысь вуоно югдуръёс сярысь. Ойдолэ ум вунэтэ: бадӟым куректон вуиз ке, Иегова пала кариськыны туж бер луоз ини. Тӥни малы али туж кулэ тодытон уже пыриськыны! c

7. Мае возьма милесьтым Иегова?

⁷ Иеговалэн нуналыз вуытозь, туж ӧжыт дыр кылемын ини, соин ик Инмар возьма, ми мылысь-кыдысь тодытомы шуыса. Аслэсьтыд юано: «Тыршисько-а мон  „Кузё-Инмарлы ужаны“, вань кужымме поныса?» (1 Кор. 15:58). Иисус азьло ик вераз, кыӵе уже ми пыриськомы. Куке Иисус вераз со сярысь, мар луоз берпум нуналъёсы, со ватсаз: «Азьвыл вань калыкъёс пӧлын Евангелие тодытэмын луыны кулэ» (Марк 13:4, 8, 10; Матф. 24:14). Малпалэ гинэ: котьку, куке тӥ тодытыны мынӥськоды, тӥ юрттӥськоды та азьпалзэ ивортонэз быдэстыны!

8. Кызьы Эксэйлыкез тодытон уж азьланьтӥське?

⁸ Мар вераны луоз со сярысь, кызьы Эксэйлыкез тодытон уж азьланьтӥське? Котькуд ар быдэс дунне вылын тросгес но тросгес адямиос ӟеч иворез кыло. Кылсярысь, малпаське, макем йылӥз Эксэйлык сярысь ивортӥсьёслэн лыдзы та берпум нуналъёсы. 1914-тӥ арын 43 шаеръёсын 5 155 ивортӥсьёс вал. Нош туннэ 240-лэсь тросгес шаеръёсын но интыосын ог 8,5 миллион ивортӥсьёс ужало-тыршо! Озьы ке но уж йылпумъяськемын ӧвӧл на. Милемлы азьланяз но адямиослы верано, Инмарлэн Эксэйлыкез гинэ адямиослэсь шуг-секытъёссэс сэрттыны-пертчыны быгатоз шуыса (Пс. 144:11—13).

9. Малы милемлы азьланяз но Эксэйлык сярысь иворез тодытоно?

⁹ Тодытон уж азьланьтӥськоз со дырозь, куке Иегова вералоз, уж йылпумъяськиз шуыса. Ми ум тодӥське, кӧня дыр кылиз на, адямиос Иегова но Иисус Христос сярысь тодыны мед быгатозы шуыса (Иоанн 17:3). Но ми умой тодӥськомы, бадӟым куректон вуытозь, ваньмызлэн, «кин быронтэм улон шоры шонер амалэн учке», ӟеч иворлы вазиськыны луонлыксы вань шуыса (Ап. уж. 13:48, ВД). Кызьы ми сыӵе адямиослы юрттыны быгатӥськомы, али кӧня ке дыр вань на бере?

10. Кызьы Иегова юрттэ милемлы адямиосты зэмлыклы дышетыны?

¹⁰ Аслаз организациез пыр Иегова сётэ милемлы ваньзэ кулэзэ, адямиосты зэмлыклы дышетон понна. Кылсярысь, ми ум кельтылӥське арня куспын ортчытӥськись пумиськонэз. Отын ми дышетскиськомы нырысетӥ вераськонъёсты кутскыны, адямиос доры выльысь лыктылыны яке Библиез дышетонъёсты ортчытъяны. Озьы ик Иеговалэн организациез сётӥз милемлы тодытон понна тӥрлыкъёсты. Та тӥрлыкъёс юртто:

•    вераськонэз кутскыны,

•   маин ке тунсыкъяськытыны,

•   адямиослэсь мылкыдзэс ӝутыны Библия сярысь тросгес тодыны,

•   Библиез дышетон дыръя зэмлыклы дышетыны,

•   тунсыкъяськись адямиослэсь мылкыдзэс ӝутыны сайтамы пырыны но соосты Эксэйлык юртэ ӧтьыны.

 Умой, куке милям та тӥрлыкъёсмы вань, нош со тырмыт ӧвӧл. Ми соосты уже кутыны кулэ d. Кылсярысь, адямиен умой вераськемды бере, тӥ солы буклет яке журнал кельтӥды ке, со доры выльысь лыктытозяды, со соосты лыдӟыны быгатоз. Ваньмылы кулэ котькуд толэзе Эксэйлык сярысь иворез мылысь-кыдысь тодытыны.

11. Кыӵе ужпумез Библиез дышетонъя онлайн-курслэн?

¹¹ Эшшо одӥг амал, кудӥзлы луыса Иегова юрттэ адямиослы зэмлыкез тодыны — со jw.org^® сайтысь Библиез дышетонъя онлайн-курс. Кыӵе ужпумез та курслэн? Котькуд толэзе быдэс дунне вылысь трос сюрс адямиос интернетысь Библиез дышетонъя курсъёсты утчало. Милям онлайн-курсмы адямиослы юрттыны быгатэ Инмарлэн Кылысьтыз зэмлыкен тодматскыны. Куд-огъёсыз милемын Библиез дышетыны уг дӥсьто, дыр. Возьматэ сыӵе адямиослы сайтысьтымы та онлайн-курсэз яке лэзе соослы та курслы ссылкаез e.

12. Кыӵе юанъёслы валэктонъёс шедьтыны юрттэ Библиез дышетонъя онлайн-курс?

¹² Библиез дышетонъя онлайн-курс эскере таӵе темаосты: «Библия но солэн Авторез», «Кинъёс сярысь вераське Библиын» но «Библиысь ивор, кудӥз вуоноезлы оскон сётэ». Та курс юрттэ валэктонъёс шедьтыны таӵе юанъёслы:

•   Кызьы юрттыны быгатэ Библия?

•   Кинъёс со Иегова, Иисус Христос но кылчинъёс?

•   Малы Инмар адямиосты кылдытӥз?

•   Малы котырамы сокем трос лек ужъёс но курадӟонъёс?

 Озьы ик та курсын эскериське, кызьы Иегова:

•   курадӟонъёсты но кулонэз быдтоз,

•   кулэмъёсты улӟытоз но

•   адями кивалтэтъёсты Инмарлэн Эксэйлыкеныз воштоз.

13. Воштэ-а онлайн-курс дышетӥсен ӵош Библиез дышетонэз? Валэктэ.

¹³ Та онлайн-курс уг вошты дышетӥсен ӵош Библиез дышетонэз. Дышетскисьёсты дасяны Иисус милемыз косӥз. Ми оскиськомы, тунсыкъяськись адями та курсэз ортчоз, дышетон программа солы кельшоз но солэн тросгес тодэмез потоз шуыса. Соку со Библиез дышетыны соглаш луоз, вылды. Котькуд уроклэн пумаз адямилы ӵектӥське дышетӥсен ӵош Библиез дышетон курыны. Котькуд нунал быдэс дунне вылысь милемлы ог 230 сыӵе куронъёс вуо! Дышетӥсен ӵош Библиез дышетон туж кулэ!

14. Мар милемлы кароно, Матфейлэсь 28:19, 20 лыдэ басьтыса, но малы?

¹⁴ Лыдӟе Матфейлэсь 28:19, 20. Библия дышетонъёсты ортчытыкумы, милемлы вань калыкъёсты дышетоно, яке дышетскисьёсты дасяно, соосты быдэсъяны дышетыса ваньзэ, мае Иисус милемыз косӥз. Адямиослы валаны юрттоно, макем кулэ  Иегова пала но солэн Эксэйлыкез пала кариськыны. Со понна соослэсь мылкыдзэс ӝутоно Библиысь зэмлыкъя улыны, улонзэс Иеговалы сӥзьыны но пылатӥськыны. Озьы гинэ соос Иеговалэн нуналыз дыръя утиськыны быгатозы (1 Пётр 3:21).

15. Мар каронлы дырез быдтоно ӧвӧл но малы?

¹⁵ Кызьы гожтэмын вал ини, та дуннелэн пумыз вуытозь туж ӧжыт дыр кылиз. Соин ик ми ум быгатӥське дырмес быдтыны со адямиослы, кудъёсызлэн, Христослэн дышетскисез луон понна, воштӥськемзы уг поты (1 Кор. 9:26). Дыр уг возьма! Али кӧня ке дыр вань на бере, трос адямиослы Эксэйлык сярысь иворез кылыны кулэ на!

16. Мар кароно котькудмылы, Усьтӥськонэз 18:2, 4, 5, 8 лыдэ басьтыса? (Озьы ик учке сноскаез.)

¹⁶ Лыдӟе Усьтӥськонэз 18:2, 4, 5, 8. Та кылбуръёсын вераське со сярысь, мае эшшо возьма на Иегова ужась-тыршисьёсызлэсь. Зэмос христианъёслы Быдӟым Вавилонэн нокызьы но герӟаськыны уг яра. Иеговалэн Адӟись-Ивортӥсез луытозяз, адями зэмос луисьтэм религилэн ужъёсаз пыриськиз, вылды. Яке со ас мылкыд каремезъя та религиен герӟаськем организацилы коньдонзэ сётылӥз. Пылатӥськымтэ ивортӥсь луытозяз, адямилы со религиен нокызьы но герӟаськемын луыны кулэ ӧвӧл ни. Кылсярысь, солы гожтэт гожтоно яке мукет сямен верано, Быдӟым Вавилонэн герӟаськем черкысь яке организациысь со кошке шуыса f.

17. Кыӵе ужез быдэсъяны христиан мурт соглаш уз луы но малы?

¹⁷ Зэмос христиан муртлы эскерыны кулэ, солэн ужез Быдӟым Вавилонэн нокызьы но герӟаськемын ӧвӧл шуыса (2 Кор. 6:14—17). Кылсярысь, со уз мыны черке ужаны. Озьы ик христиан мурт соглаш уз кариськы кыӵе ке ужъёсты быдэсъяны со юртын, кудӥз зэмос луисьтэм йыбыртъян понна кутӥське. Нош со ужбергатӥсь луэ ке, со уз тыршы быдэсъяны со ужъёсты, кудъёсыз кызьы ке но Быдӟым Вавилонэн герӟаськемын. Малы ми та пумысен кутэм ужпуммес, номыр шоры учкытэк, ум воштӥське? Малы ке шуоно Инмарлэн син азяз чылкыт луисьтэм организациослэн ужъёсазы но сьӧлыкъёсазы милям пыриськеммы уг поты (Ис. 52:11) g.

18. Кызьы одӥг агай возьматӥз, уж пумысен со, номыр шоры учкытэк, Библиысь возетъёслэсь кылзӥське шуыса?

¹⁸ Кӧня ке аръёс талэсь азьло одӥг тӧроез,  кудӥз пуэн ужась вал, ас карысьтыз черкын кыӵе ке ужез быдэстыны куризы. Азьло агаймы черкын ужаны ноку но соглаш ӧз кариськылы, но сое ужаны курись мурт та сярысь тодэ вал. Нош таяз учырын, ужез быдэстон понна, соослы вакчи дыр куспын кинэ ке но шедьтоно вал. Нош агай Библиысь возетъёсъя лэсьтӥз но ужаны соглаш ӧз кариськы. Вуонояз арняе со интыысь газетын поттэмын вал туспуктэм, кудаз мукетыз ужась черк вылэ кирос пуктэ. Агаймы Библиысь возетъёслэсь ӧз кылзӥськысалыз ке, та туспуктэмысь со ассэ адӟысал. Пуктэ син азяды, мар малпасалзы со сярысь кенешысь вын-агайёс но сузэр-апайёс! Нош мар шӧдысал Иегова?

19, 20. а) Мае ми тодӥмы ини? б) Мае милемлы тодыны кулэ на?

¹⁹ Библия верамъя, ӝоген мукетыз кулэ луись азьпалзэ ивортон быдэсмоз — дуннеысь кивалтӥсьёс ялозы: «Тупаса улон, кышкатэк улон». Но Иеговалы луыса ми тодӥськомы, калыкъёс зэмос но кема дыр ӵоже кыстӥськись тупаса улонэз уз вае шуыса. Мар милемлы кароно, та ялонэз вератозязы но та дуннелэн шӧдтэк шорысь быронэз вуытозь? Иегова возьма, ми мылысь-кыдысь Эксэйлык сярысь иворез тодытомы но выль дышетскисьёсты утчаломы шуыса. Со дыре ик милемлы вань зэмос луисьтэм религиослэсь палэнскыса улоно. Со возьматэ, милемлы Быдӟым Вавилонэн герӟаськем организациосы пыриськемысь дугдоно шуыса, но эскероно, милям ужмы соин нокызьы но герӟаськемын медаз луы шуыса.

²⁰ «Берпум аръёслэн» берпум нуналъёсазы эшшо мар ке но луыны кулэ на. Но Иегова возьмалоз, ми кыӵе ке но ужъёсты быдэсъяломы шуыса. Кыӵе со ужъёс? Мар соку луоз? Но кызьы милемлы дасяськоно вуоно югдуръёслы? Эскеромы сое вуоно статьяын.