1. «Ахирқи заманларда» яшаватқанлиғимизға қандақ испатлар бар?

 СИЗ 1914-жилдин кейин туғулған болсиңизму, мошу дунияниң «ахирқи күнлиридә» һаят кәчүрүватисиз (Тим. 2-х. 3:1). Әйса мошу вақитта қандақ вақиәләр йүз беридиғанлиғини алдин-ала ейтип кәткән. Мәсилән, у урушлар, ачарчилиқлар, йәр тәврәшләр, жуқумлуқ кесәлликләр болидиғанлиғини, җинайәтчиликниң көпийидиғанлиғини вә Йәһва Худаниң хизмәтчилири зиянкәшликкә учрайдиғанлиғини ейтқан (Мәт. 24:3, 7—9, 12; Луқа 21:10—12). Шундақла адәмләрниң мүҗәз-хулқи дәл әлчи Паул ейтқандәк болуватқанлиғини көрүватимиз (« Ахирқи күнләрдә адәмләр қандақ болиду?» дегән рамкиға қараң.). Биз, Йәһва гувачилири, «ахирқи заманда» яшаватқанлиғимизға һеч гуман қилмаймиз (Мика 4:1).

2. Биз қандақ соалларниң җававини билишимиз керәк?

² 1914-жилдин бери көп вақит өтүп кәтти, һазир биз «ахирқи заманниң» әң ахирқи күнлиридә яшаватимиз. Мошу дунияниң ахири йеқинлишип қалғанлиқтин, биз төвәндики муһим соалларниң җававини билишимиз керәк: «ахирқи заманниң» әң ахирқи күнлиридә қандақ вақиәләр йүз бериду? Шу вақиәләрниң йүз беришини күтүватқан вақтимизда Йәһва Худа немә қилишимизни халайду?

3. Салоникилиқларға 1-хәт 5:1—3кә асасән, дөләт рәһбәрлири немини елан қилиду?

³ Салоникилиқларға 1-хәт 5:1—3ни оқуң. Әлчи Паул «Йәһва Худаниң улуқ күни» тоғрилиқ ейтқан. Бу вақит «Бүйүк Бабилға», йәни сахта динниң дуниявий империясигә, һуҗум қилиштин башлиниду вә Армагедон уруши  билән аяқлишиду (Вәһ. 16:14, 16; 17:5). Йәһваниң күни башлиништин авал «течлиқ вә бехәтәрлик» елан қилиниши керәк (Бәзи тәрҗимиләрдә «дуния теч-аман» дәп йезилған.). Дөләт рәһбәрлири хәлиқара мунасивәтни яхшилаш тоғрилиқ гәп қозғиғанда, охшаш ибариләрни қоллиниду b. Бирақ Муқәддәс китапта тилға елинған «течлиқ вә бехәтәрлик» тоғрилиқ хәвәр тамамән башқичә болиду. Немә үчүн? Чүнки бу вақиәләр йүз бәргәндә, адәмләрниң көпинчиси дөләт рәһбәрлири дунияда бехәтәрлик вә течлиқни орнитишта нәтиҗә қазанди дәп ойлайду. Әмәлийәттә, «дәһшәтлик балаю-апәттә» сахта динлар вә һөкүмәтләр «туюқсиз һалакәткә» дучар болиду (Мәт. 24:21).

4. а) «Течлиқ вә бехәтәрлик» хәвири тоғрилиқ немиләрни билмәймиз? ә) Бу елан тоғрилиқ бизгә һазир немә мәлум?

⁴ Һөкүмәт рәһбәрлириниң «течлиқ вә бехәтәрликни» җакалишиға немә сәвәп болидиғанлиғини яки бу хәвәрниң қандақ елан қилинишини билмәймиз. Уни бирнәччә қетим яки пәқәт бирла қетим елан қиламду, шуниму билмәймиз. Қандақ вақиәләр йүз бәрмисун, бизгә дөләт рәһбәрлири течлиқни орниталмайдиғанлиғи мәлум. Шуңа биз уларниң сөзлиригә алдинип қалмай, әксинчә Муқәддәс китапта йезилғандәк, бу хәвәрниң елан қилинишини күтишимиз керәк. «Течлиқ вә бехәтәрликниң» елан қилиниши — «Худаниң күни» башлинишиға азла қалғанлиғиниң бәлгүсидур!

5. Салоникилиқларға 1-хәт 5:4—6дики сөзләр «Худаниң күнигә» тәйяр болушимизға қандақ ярдәм бериду?

⁵ Салоникилиқларға 1-хәт 5:4—6ни оқуң. Әлчи Паул «Худаниң күнигә» тәйяр болушимиз үчүн немә қилишимиз керәклигини ейтқан. Биз «қалғанлиридәк ухлимай», «һошияр болуп, сәгәкликни сақлишимиз» лазим. Мәсилән, биз бетәрәпликни сақлап, бу дунияниң сәясий ишлириға арилишиштин пәхәс болушимиз керәк. Әгәр биз сәясий ишларға арилашсақ, «бу дуниядин» болуп қалимиз (Йоһ. 15:19). Биз билимизки, пәқәт Худаниң Падишалиғи йәр йүзидә һәқиқий течлиқни орниталайду.

6. Башқиларниң немә қилишиға ярдәм беришни халаймиз вә немә үчүн?

⁶ Пәқәт өзүмизла һошияр болуп жүрмәй, башқиларниңму Муқәддәс китаптин келәчәктики вақиәләр тоғрилиқ билим елип, һошияр болушиға ярдәм беришни халаймиз. Буни һазир қилмисақ, дәһшәтлик балаю-апәт башланғанда адәмләр үчүн Йәһваға ибадәт қилиш бәк кәч болуп қалиду. Шуңа вәз ишиға қатнишиш наһайити муһим c!

7. Йәһва Худа бизниң немә қилишимизни халайду?

⁷ Йәһва Худа Униң «күни» башланғичә, қалған аз вақитта вәз иши билән бәнт болушимизни халайду. Биз «Пәрвәрдигарниң хизмитидә көп ишлишимиз» керәк (Кор. 1-х. 15:58). Әйса бизниң немә қилидиғанлиғимизни алдин-ала ейтип кәткән.  Ахирқи заманда йүз беридиған муһим вақиәләр тоғрилиқ ейтқанда у йәнә: «Авал барлиқ хәлиқләрдә хуш хәвәр вәз қилиниши лазим»,— дегән еди (Марк 13:4, 8, 10; Мәт. 24:14). Әнди ойлап көрүңа: һәр қетим вәз қилғиниңизда, сиз Муқәддәс китаптики бу пәйғәмбәрлик сөзләрниң орунлинишиға өз һәссиңизни қошисиз.

8. Вәз иши қандақ илгири басмақта?

⁸ Падишалиқ тоғрилиқ хуш хәвәрни вәз қилиш иши қандақ илгири басмақта? Жилдин жилға техиму көп адәмләр хуш хәвәрни аңлимақта. Мәсилән, ахирқи күнләрдә пүтүн дунияниң җай-җайлирида вәз ейтқучиларниң сани көпәйгәнлиги тоғрилиқ ойлап көрүң. 1914-жили 43 мәмликәттә 5155 Йәһва гувачиси болса, һазир 240 дөләттә тәхминән 8,5 миллион вәз ейтқучи хизмәт қилмақта. Шундақ болсиму, вәз иши техи пүтмиди. Биз башқиларға инсанийәтниң һәммә қийинчилиқлирини пәқәт Худаниң Падишалиғи һәл қилалайдиғанлиғи тоғрилиқ ейтишни давамлаштурушимиз керәк (Зәб. 145:11—13).

9. Биз немә сәвәптин вәз қилишни давамлаштурушимиз муһим?

⁹ Йәһва Худа болди демигичә биз вәз қилишни тохтатмаймиз. Йәһва Худа вә Әйса Мәсиһ тоғрилиқ билим елиш үчүн адәмләрдә йәнә қанчә вақит бар? (Йоһ. 17:3). Биз буни билмәймиз. Лекин биз дәһшәтлик балаю-апәт техи башланмаста, һәқиқәтни қобул қилишқа майил адәмләрниң хуш хәвәрни аңлап, Йәһваға ибадәт қилишни башлаш вақти бар екәнлигини билимиз (Әлч. 13:48). Биз шу адәмләрниң бәкму кечикип қалмаслиғи үчүн қандақ ярдәм берәләймиз?

10. Йәһва Худа адәмләргә һәқиқәтни үгитишимизгә қандақ ярдәм бәрмәктә?

¹⁰ Йәһва Худа Өз тәшкилати арқилиқ адәмләргә һәқиқәтни үгитишимизгә ярдәм бериш үчүн керәклик нәрсиләрниң һәммисини бериватиду. Мәсилән, биз һәптә арилиғидики учришишта тәлим алимиз. Бу учришишта биз адәм билән биринчи қетим көрүшкәндә вә униңға қайта кәлгәндә немә ейтишни, адәмгә Муқәддәс китаптин тәлим беришниму үгинимиз. Тәшкилат бизни Тәлим бериш қураллири билән тәминлигән вә бу қураллар бизгә төвәндикиләрни қилишқа ярдәм бериду:

•   сөһбәтни башлаш;

•   адәмни хуш хәвәргә қизиқтуруш;

•   адәмниң Муқәддәс китап тоғрилиқ билиш истигини ашуруш;

•   адәм билән Муқәддәс китапни үгәнгәндә, һәқиқәтни үгитиш;

•    қизиққан адәмни торбетимизгә киришкә дәвәт қилиш вә Ибадәт өйигә чақириш.

 Әлвәттә, бу қуралларға егә болушниң өзи йетәрлик әмәс, утуқлуқ болуш үчүн биз уларни қоллинишимиз керәк d. Бир адәм билән қизиқарлиқ сөһбәт қилдиңиз дәйли. Әгәр униңға торбетимизни көрситип, журнал яки варақчини көчирип бәрсиңиз, сиз униң билән қайта алақә қилғичә, у шуни оқуп туралайду. Һәр айда вәз ишиға қатнишиш — һәрбиримиз үчүн шәхсий мәҗбурийәт.

11. Муқәддәс китапни торда үгиниш дәрислири немә үчүн орунлаштурулған?

¹¹ Йәһва Худа адәмләргә һәқиқәтни билишкә jw.org^® торбетидики Муқәддәс китапни торда үгиниш дәрислири арқилиқму ярдәм бериду. Бу дәрисләр немә үчүн орунлаштурулған? Һәр айда дунияниң җай-җайлиридики нурғунлиған адәмләр тордин Муқәддәс китапни үгиниш курслирини издәйду. Торбетимиздики дәрисләр адәмләргә Худа Сөзидики һәқиқәтни үгинишкә ярдәм бериду. Биз учритидиған бәзи адәмләр биз билән Муқәддәс китапни үгиништин тартиниши мүмкин. Шундақ адәмни учратсиңиз, униңға торбетимиздин у чүшинидиған тилдики торда үгиниш дәрислирини көрситиң яки уланмини әвәтиң e.

12. Адәм Муқәддәс китапни торда үгиниш дәрислиридин немини үгинәләйду?

¹² Муқәддәс китапни торда үгиниш дәрислиридә «Муқәддәс китап вә униң муәллипи», «Муқәддәс китапниң асасий қәһриманлири» вә «Муқәддәс китаптики үмүт беридиған хәвәр» дегәнгә охшаш мавзулар муһакимә қилиниду. Бу мавзулардин адәм төвәндикиләрни үгинәләйду:

•   Муқәддәс китап қандақ ярдәм берәләйду?

•   Йәһва Худа, Әйса Мәсиһ вә пәриштиләр кимләр?

•   Худа адәмләрни немә үчүн яратқан?

•   Рәзиллик вә азап-оқубәтләр немә үчүн шунчә көп?

 Шуниң билән бу тордики дәрисләрдә Йәһва Худаниң...

•   азап-оқубәтләр вә өлүмни йоқ қилидиғанлиғи;

•   өлгәнләрни тирилдүридиғанлиғи;

•   инсаний һөкүмәтләрниң орниға Худа Падишалиғини орнитидиғанлиғиму муһакимә қилиниду.

13. Тордики дәрисләрни өз алдиға оқуш Муқәддәс китапни бирси билән үгәнгәнниң охшаш үнүми барму? Чүшәндүрүп бериң.

¹³ Әлвәттә, тордики дәрисләр Муқәддәс китапни бирси билән үгиниш орунлаштурушиға охшаш үнүмгә егә әмәс. Әйса шагиртларни тәйярлаш тапшуруғини бизгә бәргән. Қизиққан адәмләр тордики дәрисләрни оқуп, билгәнлирини яқтуруп, көпирәк билишни халайду дәп үмүт қилимиз. Бәлким, улар Муқәддәс китапни үгиниш тәкливини қобул қилипму қалар. Тордики дәрисләрни пүтәргәндин кейин, адәм Йәһва гувачилириниң бирси билән Муқәддәс китапни үгиниш үчүн, илтимас әвәтишкә дәвәт қилиниду. Һәр күни тәшкилатимизға торбәт арқилиқ дунияниң җай-җайлиридин 230дин көпирәк илтимас келиду. Һәр адәмниң Гувачилар билән Муқәддәс китапни үгиниши интайин муһим!

14. Әйсаниң Мәтта 28:19, 20дә йезилған көрсәтмилиригә бенаән, биз бар күчимизни чиқирип немә иш қилишимиз керәк вә немә үчүн?

¹⁴ Мәтта 28:19, 20ни оқуң. Муқәддәс китап үгиниш дәрислирини өткүзгәндә,  биз «шагиртларни тәйярлашқа» бар күчимизни чиқирип, Әйса «буйриған барлиқ нәрсиләргә әмәл қилишни уларға үгитишимиз» муһим. Адәмләрниң Йәһва Худаға хизмәт қилишни таллап, Униң Падишалиғини қоллаш бәк муһим екәнлигини чүшинишигә ярдәм беришимиз керәк. Буниң үчүн адәмләрни үгәнгәнлирини әмәлийәттә қоллиниш, һаятини Йәһваға беғишлаш вә чөмдүрүлүшкә дәвәт қилишимиз лазим. Пәқәт шу чағдила улар Йәһва Худаниң күнидә аман қалиду (Пет. 1-х. 3:21).

15. Бизниң немә қилишқа вақтимиз йоқ вә немә сәвәптин?

¹⁵ Жуқурида ейтилғандәк, мошу дуния түзүлмисиниң ахирлишишиға интайин аз вақит қалди. Шуңа Йәһваниң хизмәтчиси болушни халимайдиған яки һаятини өзгәрткүси кәлмәйдиған адәмләр билән Муқәддәс китапни үгинишкә вақтимиз йоқ (Кор. 1-х. 9:26). Вәз ишимиз бәк муһим! Техи вақит бар чағда, Падишалиқ хәвирини нурғунлиған адәмләргә аңлитишимиз керәк.

16. Вәһий 18:2, 4, 5, 8гә асасән, биз немә қилишимиз керәк? (Изаһәткиму қараң.)

¹⁶ Вәһий 18:2, 4, 5, 8ни оқуң. Бу айәтләрдә Йәһва Худаниң Өз хизмәтчилиридин йәнә немә қилишни күтидиғанлиғи йезилған. Худаниң һәқиқий хизмәтчилириниң һәммиси ялған дин билән бағлинишлиқ һечқандақ ишқа арилишип қалмайватқанлиғиға көз йәткүзиши муһим. Адәм Муқәддәс китапни үгиништин авал, қандақту бир ялған динниң әзаси болғанду. Бәлким, у диний мәрасимларға яки йәнә башқа ишларға қатнашқан, яки болмиса шу диний тәшкилатқа пул ианә қилғанду. Муқәддәс китапни үгинип жүргән адәм чөмдүрүлүштин өтмигән вәз ейтқучи болуш үчүн, ялған дин билән болған һәрқандақ алақисини үзүши керәк. Бир киши ялған динниң яки ялған динни тәшвиқат қилидиған қандақту бир тәшкилатниң әзаси болса, әзалиқтин ваз кечимән дегән хәтни йезиши керәк f.

17. Худаниң хизмәтчиси қандақ иш қилиштин нери болуши керәк вә немә үчүн?

¹⁷ Һәқиқий мәсиһийләр қиливатқан ишиниң Бүйүк Бабил билән һечқандақ мунасивити йоқ екәнлигигә көз йәткүзүши бәк муһим (Кор. 2-х. 6:14—17). Мәсилән, у чирко яки мечиттә ишлимәслиги керәк. Униңдин башқа, Худаниң хизмәтчиси ялған динни тәшвиқ қилидиған имарәтләрни безәш ишлириға қатнашмайду,  лекин өрт өчүрүш яки җиддий ярдәмгә охшаш хәлиққә ярдәм көрситиш ишлирини қилалайду. Өз алдиға ширкити болса, мәсиһийниң Бүйүк Бабил билән хизмәтдаш болмайдиғанлиғи яки ялған дин билән тиҗарәт қилиштин баш тартидиғанлиғи ениқ. Буни немә үчүн шундақ муһим мәсилә дәп қараймиз? Сәвәви биз Худаниң көз алдида напак һесаплинидиған ялған динниң һәрқандақ ишлири билән гуналириға шерик болушни халимаймиз (Йәшая 52:11) g.

18. Бир бурадәр қандақ қилип Муқәддәс китап принциплириға мас һәрикәт қилған?

¹⁸ Өз алдиға тиҗарити бар бир ақсақал шәһәрдики бир чиркода яғашчилиқ ишни қилишқа тәклип қилинған. Иш бәргүчи бурадәрниң чиркода ишләштин баш тартидиғанлиғини билсиму, башқа һечкимни тапалмай, амалсиз бурадәрдин өтүнгән. Бирақ бурадәр Муқәддәс китап принциплириға мас һәрикәт қилип, шу тәклипни рәт қилған. Кейинки һәптидә йәрлик гезиткә шу чиркода чапрас орнатқан башқа яғашчиниң сүрити чиқипту. Бурадиримиз Муқәддәс китап принциплириға көз жумуп, мошу ишқа келишкән болса, гезиттә униң сүрити чиққан болатти. Бу униң қериндашлар алдидики нам-абройини төкүп, исмиға дағ кәлтүрәтти вә Йәһва Худани хапа қилатти, шундақ әмәсму?

19, 20. а) Бу мақалидин немини билдуқ? ә) Биз йәнә немини билишимиз керәк?

¹⁹ Муқәддәс китаптики пәйғәмбәрлик сөзләргә асасән, пат арида болидиған әң чоң вақиә — дөләт рәһбәрлириниң «течлиқ вә бехәтәрликни» елан қилиши. Йәһва Худаға миң мәртивә шүкри, У бериватқан тәлимләрниң ярдимидә биз дөләт рәһбәрлири йәр йүзидә һәқиқий вә мәңгү течлиқ орниталмайдиғанлиғини билимиз. Шу вақиә йүз берип, техи вәйранчилиқ башланмастин авал биз немә қилишимиз керәк? Йәһва Худа бизниң Падишалиқ тоғрилиқ хуш хәвәрни вәз ейтиш билән бәнт болушимиз вә көпирәк шагиртларни тәйярлишимизни халайду. Шуңа биз ялған диндин чиқип, Бүйүк Бабил билән бағлинишлиқ һәрқандақ тәшкилатниң әзаси болуштин яки ялған динни қоллайдиған ишларни қилиштин баш тартишимиз керәк.

²⁰ «Ахирқи заманниң» әң ахирқи күнлиридә буниңдинму башқа вақиәләр болиду. Йәһва Худа биздин башқиму ишларни қилишимизни күтиду. Булар немә? Йеқин арида болидиған вақиәләргә биз қандақ тәйярлансақ болиду? Бу тоғрилиқ кейинки мақалидин көпирәк биливалимиз.