1. Tua kũlĩha ndati okuti tu kasi kesulilo ‘lioloneke via sulako?’

OVE hẽ wa citiwa noke liunyamo wo 1914? Nda oco, limbuka okuti tunde opo o sangiwa kesulilo ‘lioloneke via sulako’ violuali lulo. (2 Tim. 3:1) Yesu wa tukula ovina vialua via laikele oku tẽlisiwa koloneke vilo okuti: Ovoyaki, onjala, ovilemawe, afengi, oku livokiya kuevĩho kuenda oku lambalaliwa kuafendeli va Yehova. (Mat. 24:3, 7-9, 12; Luka 21:10-12) Ocili okuti, tua siata oku mola, ale oku yeva ovina viaco. Tua siatavo oku mola omanu va lekisa ovituwa ndevi upostolo Paulu a tukula. (Tanga okakasia losapi hati, “ Ndomo Ekalo Liomanu li Kasi Koloneke Vilo.”) Etu tuafendeli va Yehova, tua kũlĩha okuti tu kasi kesulilo ‘lioloneke via sulako.’—Mika 4:1.

2. Apulilo api tu sukila oku tambulula?

² Omo okuti pa pita ale otembo yalua tunde kunyamo wo 1914, cilo tu kasi kesulilo ‘lioloneke via sulako.’ Omo okuti esulilo li kasi ale ocipepi, tu sukila oku kũlĩha atambululo apulilo amue a velapo ndeci: Ovina vipi vi ka pita kesulilo ‘lioloneke via sulako’? Nye Yehova a yongola okuti oco tu linga osimbu tu lavoka ovina viaco?

3. Ndomo ci lekisa ocitumasuku ci sangiwa 1 Va Tesalonike 5:1-3, esapulo lipi olofeka vi ka eca?

³ Tanga 1 Va Tesalonike 5:1-3. Paulu wa tukula “eteke lia Yehova.” Ndomo ca tukuiwa vocisonehua eci, ondaka yaco yi lomboloka otembo va ka fetika oku ñualelapo o “Bavulono Yinene,” okuti atavo osi esanda kuenje ci ka sula lo Harmagedo. (Esit. 16:14, 16; 17:5) Osimbu ovina viaco ka vieyile, olofeka vi ka eca esapulo  liokuti, “Tua kolapo, tu kasi lombembua!” (Ambimbiliya amue a tukula ondaka yaco hati: “Tu kasi lombembua kuenda tua teyuiwa.”) Olombiali violuali via siatavo oku tukula olondaka vimuamue eci va popia catiamẽla koku mioñolola ekalo liomanu pokati kolofeka. * Pole, esapulo lia lomboluiwa Vembimbiliya liokuti, “tua kolapo, tu kasi lombembua,” lia litepa. Momo lie? Eci otembo yaco yi pitĩla, omanu va ka sima okuti olombiali violuali via tẽla oku nena ombembua pokati komanu loku kolapo. Pole, “ohali ya piãla” yi ka fetika kuenje ‘enyõleho likeya kokuavo vocipikipiki.’—Mat. 24:21.

4. (a) Ovina vipi ka tua kũlĩhĩle viatiamẽla kesapulo liokuti, “tua kolapo, tu kasi lombembua?” (b) Ovina vipi tua kũlĩha ale viatiamẽla kesapulo liaco?

⁴ Tua kũlĩha ovina vimue viatiamẽla kesapulo liokuti, “tua kolapo, tu kasi lombembua.” Pole, kuli ovina vikuavo ka tua kũlĩhĩle. Ndeci, ka tua kũlĩhĩle eci ci ka vetiya olombiali oku eca esapulo liaco, ale ndomo esapulo liaco li ka eciwa. Ka tua kũlĩhĩlevo nda ku ka eciwa asapulo alua, ale ku ka eciwa lika esapulo limosi. Olonjila viosi vi ka kuamiwa, tua kũlĩha okuti: Ka tu ka yapuisiwa lovisimĩlo viokuti olombiali violuali vi pondola oku nena ombembua koluali luosi. Momo Embimbiliya lia tu sapuila ale catiamẽla kesapulo liaco. Esapulo liaco li ka kala ondimbukiso yokuti “eteke lia Yehova” li kasi ocipepi!

5. Ndomo ca tangiwa 1 Va Tesalonike 5:4-6, tu lipongiyila ndati “eteke lia Yehova”?

⁵ Tanga 1 Va Tesalonike 5:4-6. Elungulo lia Paulu li lekisa eci tu sukila oku linga, oco tu lekise okuti tua lipongiyila “eteke lia Yehova.” Ka tu ka ‘pekeli ndeci ci linga omanu vakuavo.’ Tu sukila oku amamako “oku lavulula.” Ndeci, tu sukila oku kuata utate okuti lalimue eteke ka tu ka pangi onepa kovina viatiamẽla kopulitika. Momo nda tua litenga vovina evi, tu lekisa okuti tua tiamẽla ‘koluali.’ (Yoa. 15:19) Etu tua kũlĩha okuti Usoma wa Suku owo lika u ka nena ombembua koluali luosi.

6. Ekuatiso lipi tu sukila oku eca komanu kuenda momo lie?

⁶ Pole, oku amamako lika oku lavulula ka ci tẽla. Tu sukila oku kuatisa omanu oku pasuka kuenda oku va longisa ovina Embimbiliya li popia, viatiamẽla kueci ci laika oku pita voluali. Ivaluka okuti eci ohali ya piãla yi fetika, ka ku kala vali epuluvi oco amanu va nõle oku vumba Yehova. Eli olio esunga lieci upange woku kunda u sukilila onjanga! *

7. Nye Yehova a yongola okuti oco tu linga cilo?

⁷ Votembo yitito ya kambako osimbu “eteke” lia Yehova ka lieyile, eye o yongola okuti vosi yetu tuamamako oku lekisa ombili kupange woku kunda. Etu tu sukila oku limbila uvangi wokuti, ‘tuakuambili kupange wa Ñala.’ (1 Va Kor. 15:58) Yesu wa tukula eci tu sukila oku linga. Poku popia catiamẽla kovina viosi  via laikele oku pita koloneke via sulako, eye hati: “Kolofeka viosi, tete ku kundiwa olondaka viwa.” (Mar. 13:4, 8, 10; Mat. 24:14) Sokolola okuti: Olonjanja viosi eci enda kupange woku kunda, ove o kasi oku panga onepa koku tẽlisiwa kuovitumasuku Viembimbiliya.

8. Tua kũlĩha ndati okuti upange woku kunda u kasi oku livokiya?

⁸ Nye tu pondola oku popia catiamẽla koku livokiya kupange woku kunda? Unyamo lunyamo omanu valua va kasi oku yeva olondaka viwa Viusoma. Sokolola kevokiyo liakundi voluali luosi vokuenda kuoloneke via sulako. Kunyamo wo 1914, kua kala 5.155 kakundi kueci ci soka 43 kolofeka. Cilo, kuli eci soka olohuluwa 8 lomeyu viakundi kueci ci soka 240 kolofeka! Pole, handi upange wetu ka wa sulilile. Tu sukila oku amamako oku sapuila omanu okuti Usoma wa Suku owo lika u ka malako ovitangi viosi viomanu.—Osa. 145:11-13.

9. Momo lie tu sukilila oku amamako oku kunda esapulo Liusoma okuti ka tu liwekapo?

⁹ Etu tu kamamako oku kunda toke eci Yehova a popia hati, kaliye ca pua. Otembo yiñami ya kambako oco omanu va kũlĩhe Yehova Suku la Yesu Kristu? (Yoa. 17:3) Ka tua ci kũlĩhĩle. Pole, tua kũlĩha okuti osimbu ohali ya piãla ka ya fetikile, vosi vana “vakuotima wa sungulukila omuenyo ko pui” handi va ka tava olondaka viwa. (Ovil. 13:48) Tu kuatisa ndati omanu osimbu eteke liaco ka lieyile?

10. Ovina vipi Yehova a siata oku tu ĩha oco tu longise ocili komanu?

¹⁰ Yehova pocakati cocisoko caye, wa siata oku tu ĩha cosi tu sukila oco tu longise ocili komanu. Ndeci, tua siata oku longisiwa olosemana viosi kohongele yo vokati kosemana. Ohongele yaco, ya siata oku tu kuatisa ndomo tu fetika ombangulo kupange woku kunda, oku linga apasu kuenda oku songola alilongiso Embimbiliya. Handi vali, Ocisoko ca Yehova ca siatavo oku tu ĩha Ovimalẽho Vioku Longisa. Ovimalẽho viaco vi tu kuatisa kovina ndeci  . . .

•   oku fetika ombangulo,

• oku eca esapulo lonjila yimue yi vetiya,

• oku kuatisa omanu va yongola oku kũlĩha ovina vikuavo viatiamẽla Kembimbiliya,

• oku longisa ocili komanu pocakati celilongiso Liembimbiliya kuenda

• oku laleka omanu va kuete onjongole yoku iñila vonumbi yetu yo internet kuenda Vonjango yetu Yusoma.

Ocili okuti, oku kuata lika ovimalẽho viaco ka ci tẽla. Tu sukila oku talavaya lavio. * Ndeci, noke yoku sapela lomunu umue wa lekisa onjongole, citava okuti u sila ocicapa cimue, ale orevista yimue, eye o pondola oku yi tanga noke ove o ko pasuisa vali. Omunu lomunu pokati ketu o kuete ocikele coku kunda esapulo Liusoma olosãi viosi.

11. Momo lie kua lingiwila esokiyo lionepa losapi hati, Lilongisa Embimbiliya vo Internet?

¹¹ Onjila yikuavo ndomo Yehova a kasi oku kuatisa omanu oku kũlĩha ocili pocakati conepa losapi hati, Lilongisa Embimbiliya vo Internet.^®. (Kuende vonepa ALONGISO EMBIMBILIYA > LILONGISA EMBIMBILIYA VO INTERNET.) Momo lie ovipama viaco via pongiyiwila? Osãi losãi, omanu valua voluali luosi va siata oku linga akonomuiso vonumbi yetu yo internet vonepa hati, lições on-line. Ovipama vonumbi yetu yo Internet, vi pondola oku kuatisa omanu vaco oku kũlĩha ovina vimue viatiamẽla kocili Condaka ya Suku. Pamue, omanu vamue o sapela lavo ka va tava okuti umue o va longisa Embimbiliya. Nda wa siata oku sanga omanu vaco lekisa kokuavo onepa lições on-line, ale va lomboluila ndomo ovo muẽle va pondola oku iñila vonumbi yetu yo internet. *

12. Nye omanu va pondola oku lilongisa vocipama hati, Curso da Bíblia On-line?

¹² Vonepa hati, Lilongisa Embimbiliya vo Internet mu sangiwa ovipama evi: “A Bíblia e seu Autor,” “Os Principais Personagens da Bíblia” kuenda “A Mensagem da Bíblia Sobre um Futuro Melhor.” Osimbu omunu a lilongisa ovipama evi o ka kũlĩha:

• Ndomo Embimbiliya li kuatisa omanu

• Helie Yehova, Yesu kuenda ovangelo

• Esunga lieci Suku a Lulikila omanu kuenda

• Esunga lieci ku kasilili ohali kuenda evĩho

Ovipama viaco vi lombololavo ndomo Yehova . . .

• a ka malako ohali kuenda olofa,

• ndomo a ka pindula ava va fa kuenda

• ndomo usoma womunu u ka piñainyiwa Lusoma wa Suku.

13. Onepa, Curso da Bíblia On-line yi piñainya hẽ lesokiyo lioku songola elilogiso Liembimbiliya? Ci lombolola.

¹³ Onepa Curso da Bíblia On-line ka yi piñainyiwa lesokiyo lioku songola elilongiso Liembimbiliya lilingiwa Lombangi yimue ya Yehova. Yesu wa tu ĩha ocikele coku longisa omanu oco va linge olondonge. Ovipama viaco, via pongiyiwila oku vetiya ovitima viomanu va kuete onjongole. Nda ovo va sola ovina va lilongisa, citava okuti va ka lekisa onjongole yoku kũlĩha vali ovina vikuavo kuenje va tava oku lilongisa Embimbiliya. Kesulilo liocipama locipama, omunu o vetiyiwa oku pinga oco Ombangi yimue ya Yehova o longise Embimbiliya. Pocakati conumbi yetu yo internet, ocisoko ca siata oku tambula ci pitahãla 230 kapingilo oku lilongisa Embimbiliya veteke voluali luosi! Ocili okuti oku linga elilongiso liembimbiliya lomunu umue ci kuete esilivilo!

14. Ndomo Yesu a popia kelivulu lia Mateo 28:19, 20, tu sukila oku likolisilako oku linga nye? Kuenda momo lie ci kuetele esilivilo?

¹⁴ Tanga Mateo 28:19, 20. Osimbu tu songola elilongiso Liembimbiliya, tu sukila oku likolisilako oku linga cosi ci tava oco tu kuatise omanu oku ‘linga olondonge . . . loku va longisa oku linga ovina viosi Yesu a kundika.’ Tu sukila oku kuatisa omanu oku kuata elomboloko liokuti ci kuete esilivilo kokuavo oku nõla oku vumba  Yehova kuenda oku kuatisa Kusoma waye. Eci ci lekisa okuti tu sukila oku vetiya omanu oco va kapeko ovina va lilongisa, oku tumbika omuenyo wavo ku Yehova kuenda oku papatisiwa. Nda va ci linga, oco lika va ka popeliwa keteke lia Yehova.—1 Pet. 3:21.

15. Nye tu sukila oku yuvula kuenda momo lie?

¹⁵ Ndomo ca lomboluiwa ale, otembo ya kambako yitito calua, oco oluali lulo lu kunduiwe. Omo liaco, tu sukila oku yuvula oku pesela otembo yoku lilongisa lomanu vana okuti ka va yongola oku linga apongoloko oco va vumbe Yehova. (1 Va Kor. 9:26) Momo upange wetu u sukila onjanga! Handi vali, kuli omanu valua va yongola oku yeva esapulo Liusoma, osimbu kuli epuluvi.

16. Ndomo ca tangiwa kelivulu Liesituluilo 18:2, 4, 5, 8, Akristão vosi vocili nye va sukila oku linga? (Talavo etosi pombuelo yemẽla.)

¹⁶ Tanga Esituluilo 18:2, 4, 5, 8. Ovinimbu evi, vi lekisa vali ocina cikuavo Yehova a yongola okuti oco afendeli vaye va sukila oku linga. Akristão vosi vocili va sukila oku likũlĩhĩsa ovo muẽle okuti va litepa lo Bavulono Yinene. Osimbu omunu umue ka fetikile oku lilongisa ocili, pamue wa tiamẽlele ketavo liesanda. Citava okuti omunu waco, wa kuatele ovikele vimue vetavo kuenda wa pangaile onepa kovopange aco. Ale, pamue wa siataile oku eca olombongo oco vi kuatise etavo liaco. Kuenje osimbu omunu o lilongisa Embimbiliya ka taviwile ndukundi, o sukila tete oku litepa lovina viosi vi kuete elitokeko letavo liesanda. Eye o sukila oku soneha ukanda umue u lombolola okuti kaliye wa litepa letavo a kala tete ale oku lekisa okuti wa siapo muẽle etambo liaco. Eye o sukila oku linga cimuamue locisoko ci kuete elitokeko Lombavulono Yinene. *

17. Upange upi Akristão va sukila oku yuvula kuenda momo lie?

¹⁷ Akristão vocili va sukila oku kũlĩhĩsa okuti upange wavo woku sanda eteku ka u pangi onepa ko Bavulono Yinene. (2 Va Kor. 6:14-17) Ndeci, Ukristão ka citava okuti o kala onalavayi yetavo limue liesanda. Handi vali, Ukristão ka citava okuti o linga upange umue u kuete elitokeko lefendelo liesanda. Nda ukristão umue o kuete omĩlu yimue, eye ka sandi upange kocitumãlo cimue ci kuete elitokeko lo Bavulono Yinene, ale oku tava elaleko lioku linga upange kocitumãlo caco. Momo lie tu sukilila oku yuvula onjila yaco? Momo ka tu yongola oku tiamẽla kovilinga kuenda kakandu ovisoko  vietavo liesanda omo okuti a vĩha kovaso a Suku.—Isa. 52:11. *

18. Manji umue wa lekisa ndati okuti wa kuama olonumbi Viembimbiliya poku linga upange waye?

¹⁸ Ukulu umue wekongelo wa kuata omĩlu yaye muẽle. Kanyamo a pita, ulume umue wo laleka oco a linge upange woku talavaya lavaya vonembele ya kala volupale. Ulume waco wa kũlĩhĩle ale okuti ukulu umue wekongelo ka tava oku linga upange watiamẽla konembele. Pole onjanja eyi, eye ka sangele laumue o linga upange waco. Ndaño ndoco, ukulu wekongelo wa kuama olonumbi Viembimbiliya kuenje wa likala upange waco. Vosemana ya kuamamo, ocicapa casapulo ca lekisa elitalatu liulume ukuavo kalupindelu okuti wo valela ekulusu konembele yaco. Nda manji wa tavele oku linga upange waco, citava okuti elitalatu liaye nda olio lia lekisiwa vocicapa casapulo. Sokolola ndomo nda ca nena esepu pokati ka vamanji vakuavo! Sokololavo ndomo Yehova nda a liyeva.

19-20. (a) Nye tua lilongisa toke cilo? (b) Ovina vipi tu ka lilongisa vali?

¹⁹ Ndomo ocitumasuku cimue Cembimbiliya ci lekisa, ocina ca velapo ci laika oku tẽlisiwa voluali luosi, esapulo liokuti: “tu kuete ombembua kuenda tua kolapo.” Pole, Yehova wa tu lekisa ale okuti olofeka ka vi ka tẽla oku nena ombembua yocili koluali luosi. Oco hẽ nye tu sukila oku linga osimbu esapulo liokuti: “tu kuete ombembua kuenda tua kolapo,” ka lieyile oku kongelamo enyõleho liya ocipikipiki? Yehova o yongola okuti, tu lekisa ombili kupange woku kunda kuenda oku longisa omanu, oco va linge olondonge. Handi vali, tu sukilavo oku amamako oku litepa kovina viosi vi panga onepa ketavo liesanda. Voku litepa kuaco, mua kongela oku yuvula ovina viosi viatiamẽla ko Bavulono Yinene kuenda kovopange ayo.

²⁰ Kuli ovina vikuavo vi keya vokuenda kuesulilo ‘lioloneke via sulako.’ Kuli vali ovina vikuavo Yehova a yongola okuti tu vi linga. Vipi ovina viaco? Ovina vipi vikuavo tu sukila oku linga? Tu lipongiyila ndati ovina vi keya ndopo? Tu ka ci konomuisa vocipama cikuãimo.