1. Exeeni ennikupaliha wira ninkhala mahiku ookiserya?

NIIREKE muyariwe nuuvira mwaakha wa 1914? Akhala wira ti siiso, okumi anyu wotheene, nyuwo munikhala “okathi wokiserya” wa olumwenku ola wootakhala. (2 Tim. 3:1) Otheene ahu ninniiwa siiraneyaka itthu Yesu aahimmye awe vahinatthi voohimya sa mahiku ahu ala. Itthu iyo sinihela muhina: Etala, itetere, iretta, wuncerereya wa atthu ahiniiwelela malamulo ni olupatthiwa wa arumeyi a Yehova. (Math. 24:3, 7-9, 12; Luka 21:10-12) Nave ninniwoona atthu arina mweettelo waahimmwale vahinatthi ni murummwa Paulo. (Nwehe ekaaxa eni: “ Mikhalelo sa Atthu a Mahiku Ala”.) Hiyo Anamoona a Yehova, ninnikupali wira ninkhala wanikisa wa mahiku ookiserya.​—Mik. 4:1.

2. Makoho xeeni nintthuneya ahu osuwela waakhuliwa waya?

² Tthiri soovira iyaakha sinceene okhuma 1914, nto vannooneya wira ninkhala wanikisa wa mahiku ookiserya. Nave okhala wira olumwenku ola ohanle opwetexiwa, nihaana osuwela waakhuliwa wa makoho ootepa otthuneya ani: Itthu xeeni sinrowa wiiraneya wanikisa wa mahiku ookiserya? Yehova oniphavela wira nipakeke exeeni vaavo ninlipelela ahu wiiraneya itthu iyo?

3. Moovarihana ni 1 aTesalonika 5:1-3, makhulupale a mulaponi anrowa olaleya exeeni?

³ Mmusome 1 aTesalonika 5:1-3. Murummwa Paulo aahihimya “orwa w’Apwiya” wala nihiku na Yehova. Ntoko enooniherya aya yoolepa ela, nihiku na Yehova onihimmwa okathi onrowa awe opacerya opwetexiwa “Babilonia, ‘Muttetthe Mulupale’”, yoowo ori mutthenkeso wa olumwenku wotheene wa etiini yoowootha ni Armagedoni. (Wis. 16:14, 16; 17:5) Nihinatthi opacerya nihiku na Yehova, onrowa olaleiwa wira “Nokhalana Murettele” ni  Ovareleleya! (ABiibiliya akina ataphuleliwe so: “Murettele n’ikumi!”) Makhulupale a mulaponi annirumeela nuulumo nimosaru okathi aniphavela aya wiiraaniha ilapo sihiniiwanana. * Masi musuweleke wira Biibiliya onihimya wira olaleiwa wa murettele ni ovareleleya onrowa okhala woovirikana. Mwaha wa xeeni? Mwaha woowi, okathi eyo enrowa aya wiiraneya, atthu anrowa wuupuwelaka wira makhulupale a epoliitika aakumiherya murettele ni ovareleleya moolumwenkuni. Masi okathi “yowo, anokhala maxakha malupale” ni onimwaarweela “opweteya nananoru”.​—Math. 24:21.

4. (a) Itthu xeeni nihinsuwela ahu voohimya sa olaleiwa “murettele” ni ovareleleya? (b) Etthu xeeni ninsuwela ahu?

⁴ Noosuwela itthu sikina voohimya sa olaleiwa wira “nokhalana murettele” ni ovareleleya. Masi muhiliyale wira itthu sikina khaninsuwela. Mwa ntakiheryo, khaninsuwela etthu enrowa owiiriha makhulupale a mulaponi olaleya murettele ni ovareleleya. Nave khaninsuwela akhala wira anrowa olaleya ikwaha sinceene wala ekwaha emosa paahi. Moohicikha ele enrowa wiiraneya, hiyo ninnisuwela ela: Nihikhala-khale niwokiwaka ni muupuwelo woowi ahooleli a mulaponi anookumiherya murettele wekeekhai. Ohiya-vo, nihaana okhalana ephoole ni itthu anrowa aya olaleyaka, maana eyo ti etthu Biibiliya onihimya awe wira nilipeleleke. Maana eyo enrowa okhala ekanyeryo enooniherya wira nihiku na Yehova nihanle opacerya!

5. Moovarihana ni 1 aTesalonika 5:4-6, nihaana opaka exeeni wira niilokiherye voohimya sa nihiku na Yehova?

⁵ Mmusome 1 aTesalonika 5:4-6. Murummwa Paulo onninleela etthu nikhanle ahu oopaka wira niilokiherye nihinatthi ophiya nihiku na Yehova. Owo ohimmye wira “nihirupé ntoko atthu akina”, ohiya-vo nihaana ‘olipelela’. Mwa ntakiheryo, nihaana okhalana ephoole wira nivikanihe ohiirela mpantta myaha sa epoliitika. Akhala wira nnoopaka eyo, nnimwiirela mpantta olumwenku. (Yoh. 15:19) Hiyo noosuwela wira Omwene wa Muluku paahi tonrowa okumiherya murettele wekeekhai olumwenku wotheene.

6. Nihaana waakhaliherya atthu opaka exeeni ni nthowa xeeni?

⁶ Khivaniphiyerya ohirupa paahi, nihaana waakhaliherya atthu akina osuwela ele Biibiliya aahimmye awe vahinatthi wira yaamukhumelela. Vano nrowe nuupuwele ele nikhanle ahu oopaka niinaano-va ahinatthi opacerya maxakha maalupale ni etthu nikhanle ahu oopaka wira naakhaliherye akina omurumeela Yehova. Eyo ti etthu enniiriha oluttuweliwa olaleerya niinaano-va! *

7. Yehova oniphavela wira nipakeke exeeni?

⁷ Okathi ola vakhaani ohanle nihinatthi opacerya nihiku nawe, Yehova oniphavela wira niluttuweliweke olaleerya. Nihaana wiimananiha  “okelela oholo mmutekoni mw’Apwiya”. (1 aKor. 15:58) Yesu aahihimya vahinatthi etthu ninreerela ahu opaka. Okathi aalavula awe itthu sotheene saarowa okhumelela mahiku ookiserya, Yesu aahincererya oriki: “Vano, ehapari yorera ehana olaleiwa toko mulaponi mothene”. (Mar. 13:4, 8, 10; Math. 24:14) Nkahaya muupuwele ela: Khula okathi munrowa anyu olaleerya, nyuwo munnikhaliherya wiiraneya eprofesia ela ya mBiibiliyani!

8. Ninsuwela sai wira muteko woolaleerya onnikhumela saana?

⁸ Hiyo ninnisuwela wira muteko woolaleerya onnikhumela saana. Moota xeeni? Khula mwaakha, atthu anceene anniwiriyana ihapari sooreera sa Omwene. Mwa ntakiheryo, nkahaya muupuwele moota nummuru na anamalaleerya nincerereyale aya mahiku ala ookiserya. Moovarihana ni irelatoorio, mwaakha wa 1914 yaahikhala anamalaleerya 5.155 ilapo 43. Masi olelo-va aakhala anamalaleerya anivikana imilyau 8.5 ilapo 240 olumwenku wotheene! Masi, hata vari siiso muteko woolaleerya khomanle. Nihaana ovikaniha oluttuweliwa olaleya Omwene wa Muluku yoowo onrowa omaliha mixankiho sa apinaatamu.​—Esal. 145:11-13.

9. Xeeni ninreerela ahu ovikaniha olaleya ihapari sooreera?

⁹ Muteko ahu woolaleya ihapari sooreera onoovikaniha mpakha Yehova ohimya wira woomala. Okathi mikavi ohanle wira atthu amusuwele Yehova Muluku ni Yesu Kristu? (Yoh. 17:3) Hiyo khaninsuwela. Etthu ninsuwela ahu okhala wira mpakha opacerya maxakha maalupale, khula mutthu oniphavela ekumi yoohimala onimweemererya ihapari sooreera. (Mit. 13:48) Nto ninrowa waakhaliherya sai atthu awo ohinatthi okathi omala?

10. Itthu xeeni Yehova onivanhe awe sinnikhaliherya owiixuttiha atthu ekeekhai?

¹⁰ Orumeelaka mutthenkeso awe, Yehova onninivaha itthu sotheene nimphavela ahu wira niwiixuttihe atthu ekeekhai. Mwa ntakiheryo, khula esumana ninnixuttihiwa itthu sinceene muthukumano wa eriyari ya esumana. Muthukumano owo onninikhaliherya osuwela etthu yoohimya ekwaha yoopacerya oxukurya ni opaka irevisita. Nave ninniixutta moota wowiiriha soosoma sa Biibiliya. Ohiya-vo, mutthenkeso wa Yehova woonivaha Ekaaxa ya Ikaruma Sinnikhaliherya Wiixuttiha. Ikaruma iyo sinninikhaliherya . . .

• opaceriha ovaanela,

• olaleerya mwa enamuna yoovara murima,

•   owiiriha atthu ophavela wiixutta itthu sikina,

• wiixuttiha ekeekhai okathi nniiriha ahu soosoma sa Biibiliya ni

• owiiriha ale anisiveliwa ekeekhai oxukurya esaiti ahu ni orowela mithukumano Empa ya Omwene.

Ekeekhai wira khivamphiyerya paahi okhalana ikaruma iyo. Nihaana orumeela oratteene. * Mwa ntakiheryo, nuumala ovaanela ni mutthu onisiveliwa ekeekhai, munnimuhiyerya efolyeeto wala erevista. Nto owo onnisoma muhinatthi otthikela ovaanela-tho ni yena. Tthiri ovikaniha oluttuweliwa olaleya ihapari sooreera khula mweeri, muritti ahu.

11. Exeeni yiirinhe opakiwa Eprograma ya Omusoma Biibiliya Onlaine?

¹¹ Enamuna ekina Yehova onaakhaliherya awe atthu osuwela ekeekhai, eri Eprograma ya Omusoma Biibiliya Onlaine va jw.org. Xeeni ehalaka opakiwa eprograma eyo? Mwaha woowi, khula mweeri atthu anceene olumwenku wotheene annikela munternetini anavekela Yoosoma ya Biibiliya. Eprograma eyo, ennaakhaliherya atthu awo opacerya wiixutta ikeekhai sa mBiibiliyani. Woonasa wene, atthu akina munvaanelana anyu annoovelela weemererya yoosoma ya Biibiliya. Akhala wira ti siiso, nwooniheryeke eprograma eyo va jw.org aahiiso mwaavaheke elinkhi ya eprograma eyo. *

12. Itthu xeeni mutthu okhanle awe oowiixutta Eprograma ya Omusoma Biibiliya Onlaine?

¹² Eprograma ya Omusoma Biibiliya Onlaine sinniphwanyaneya myaha ntoko: “Biibiliya ni Mwaneene Biibiliya”, “Atthu Anilavuliwa mBiibiliyani” ni “Nlipelelo na Muhoolo Biibiliya Onnivaha Awe”. Vaavo mutthu onisoma awe myaha iyo, owo onniixutta:

• Moota Biibiliya onimukhaliherya awe mutthu,

• Yehova, Yesu ni malaikha tani,

• Xeeni Muluku ohalaka waapattuxa apinaatamu ni

• Xeeni ohireere aya ohaawa ni itthu sootakhala.

Nave eprograma eyo ennooniherya moota Yehova onrowa awe . . . 

• omaliha ohaawa ni okhwa,

• waahihimuxa ale akhwiiye ni

• orantteliha iguvernu sa apinaatamu oruuhaka Omwene awe.

13. Niireke eprograma ya omusoma Biibiliya onlaine ennirantteliha osomihiwa Biibiliya? Mutthokiherye.

¹³ Eprograma ya omusoma Biibiliya onlaine khenrantteliha osomihiwa Biibiliya ni namalaleerya. Maana Yesu oonivaha eparakha ya waapaka awiixutti. Nto ninnikupali wira ale animusoma Biibiliya onlaine anoosiveliwa ele anrowa aya wiixutta ni anoophavelaka osuwela itthu sikina. Akhala wira ti siiso, awo animweemererya yoosoma ya Biibiliya. Nto wanikisa wa khula yoosoma, owo onnitumereriwa ovekela osomihiwa Biibiliya ni yookhala elinkhi akhanle aya oopaka eyo. Khula nihiku, mutthenkeso ahu onniwaakhela atthu 230 aniphavela Omusoma Biibiliya arumeelaka esaiti ahu! Tthiri yoosoma eyo ya mutthu mwaneene ti yootepa otthuneya!

14. Moovarihana ni moolumo a Yesu ari Matheyo 28:19, 20, nihaana wiimananiha opaka exeeni? Xeeni opaka eyo eri aya yootthuneya?

¹⁴ Mmusome Matheyo 28:19, 20. Vaavo nniiriha ahu soosoma sa Biibiliya, nihaana wiimananiha waapaka awiixutti ni waakhaliherya “wettela sothene” Yesu onrumme awe. Nave nihaana waakhaliherya atthu osuwela otthuneya waya omurumeela Yehova ni okhaliherya Omwene awe. Eyo entaphulela waakhaliherya ovarihela muteko ekeekhai aniixutta aya mookumini mwaya, wiivahererya wa Yehova ni opatisiwa. Yiira  siiso animoopowa nihiku na Yehova.​—1 Ped. 3:21.

15. Nihaana osyaka oyeeha okathi ahu ni atthu a mukhalelo xeeni ni nthowa xeeni?

¹⁵ Ntoko nilavunle ahu, ohanle okathi vakhaani wira olumwenku ola omale. Tivonto nihikhala-khale niyeehaka okathi ahu naasomihaka Biibiliya atthu ahiniphavela opaka marukunuxo wira amurumeeleke Yehova. (1 aKor. 9:26) Muteko woolaleerya ti wowaakuveya! Maana aakhala atthu anceene aniphavela owiriyana muhupi wa Omwene nihinatthi ophiya nihiku na Yehova.

16. Moovarihana ni Wisupulula 18:2, 4, 5, 8, maKristau ekeekhai ahaana opaka exeeni? (Nwehe enoota.)

¹⁶ Mmusome Wisupulula 18:2, 4, 5, 8. Iveersu iya sinnooniherya etthu ekina Yehova onaavekela awe arumeyi awe. MaKristau otheene ekeekhai ahaana wooniherya wira khaniirela mpantta itthu sinipakiwa ni Babilonia Muulupale. Ohinatthi wiixutta ekeekhai, woonasa wene namasoma a Biibiliya aaniirela mpantta etiini yowootha. Pooti wira aanikhaliherya itthu soohiloka simpakiwa ni etiini yowootha ni aanivaha musurukhu awe wira okhaliherye mitthenkeso iyo. Nto namasoma a Biibiliya ohinatthi weemereriwa okhala namalaleerya oohipatisiwa ohaana ohiya moomalela itthu sotheene sinivarihana ni etiini yoowootha. Vannireerela osuwela akhala wira oolepela ewarakha etiini eetta awe wala mutthenkeso iirela awe mpantta ohimyaka wira khoniphavela-tho wiirela mpantta ekerexa eyo wala mitthenkeso sinimukhaliherya Babilonia Muulupale. *

17. Miteko xeeni muKristau eekeekhai ohineemererya awe ni nthowa xeeni?

¹⁷ Nave maKristau eekeekhai ahaana osuwela oratteene akhala wira muteko aya wa mulaponi khonivarihana ni Babilonia Muulupale. (2 aKor. 6:14-17) Mwa ntakiheryo, khivanreerela muKristau eekeekhai ovara muteko okerexa. Nave khivanreerela muKristau weemererya oteka ipa sa ikerexa, muteko aahiiso omweetta nakoso onitumererya etiini wala okokhorela wowootha. Akhala wira onaavara attoottootto, owo khaarowa ophavelasa ovara muteko onivarihana ni Babilonia Muulupale. Xeeni nimpaka ahu eyo? Mwaha woowi, khanimphavela wiirela mpantta miteko ni itampi sa mitthenkeso sinivarihana ni etiini yowootha, maana iyo sookhalana nthowa wa Muluku.​—Yes. 52:11. *

18. Munna mmosa oonihenrye sai wira aanitthara malakiheryo a Biibiliya okathi aavara awe attoottootto?

 ¹⁸ Iyaakha sinceene sivinre, mutokweene mmosa, aavara attoottootto. Nto nihiku nimosa mutokweene ole aahiphwanyiwa ni mutthu wira avare muteko wa okalapinteero ekerexa ya epooma aakhala awe. Nnaamwi mulopwana ole aasuwela wira munna ole khaarowa weemererya ovara muteko okerexa, owo aahinvekela, mwaha woowi, mulopwana ole oona wira khaarowa omphwanya mutthu aarowa ovara muteko ole. Masi munna ole aahitthara malakiheryo a mBiibiliyani ni aahikhootta ovara muteko ole. Esumana yaattharelana, exornaali ya elapo ele yaahilaleya efootu ya kalapintero ori ene vasulu va mwiikimanyo. Vaakhanle wira munna ole aaheemererya ovara muteko ole, woonasa wene efootu awe yaamukhumela vamwiikimanyoni waalaleiwale ni exornaali ele. Nkahaya muupuwele moota eyo yaarowa aya ohonona mweettelo wa munna ole ni wa maKristau akhwaawe! Nave muupuwele moota Yehova aarowa awe woonela.

19-20. (a) Mpakha va, itthu xeeni mwiixuntte anyu? (b) Itthu xeeni sikina ninreerela ahu wiixutta?

¹⁹ Moovarihana ni iprofesia sa mBiibiliyani, etthu ekina yuulupale enrowa wiiraneya moolumwenkuni, onrowa okhala olaleiwa wira “nokhalana murettele” ni ovareleleya. Ninnimuxukhurela Yehova mwaha wooniixuttiha itthu sinrowa okhumelela, maana noosuwela wira apinaatamu khanrowa owerya okumiherya murettele wekeekhai. Nihaana opaka exeeni sihinatthi itthu iyo okhumelela ni opwetexiwa olumwenku ola? Yehova oniphavela wira niluttuweliweke olaleerya ni waapaka awiixutti. Okathi omosaru nihaana osyaka wiirela mpantta etiini yowootha. Eyo enihela muhina ohiirela mpatta itthu sinipakiwa ni Babilonia Muulupale ni ohivara muteko onikhaliherya etiini yowootha.

²⁰ Sookhala itthu sikina sinrowa okhumelela mahiku ala ookiserya. Nave sookhala itthu sikina Yehova oniphavela awe wira nipakeke. Itthu xeeni iyo? Itthu xeeni sikina Yehova oniphavela awe wira nipakeke? Ninrowa wiilokiherya sai mwaha wa itthu sinrowa okhumelela muhoolo moohipisa? Ninrowa oweha mwaha onittharelana.