1. Kay ano nga kombinsido kita nga nagkikinabuhi na kita ha “kataposan nga mga adlaw”?

NATAWO ka ba katapos han 1914? Kon amo, tikang han imo katawo nagkikinabuhi ka na ha “kataposan nga mga adlaw” hini nga sistema. (2 Tim. 3:1) Kita ngatanan nakabati na mahitungod han panhitabo nga igintagna ni Jesus para hini nga panahon. Nag-uupod ini han girra, kakulang hin pagkaon, linog, epidemya, pag-uswag han pagkamatinalapason, ngan pagtimaraot ha katawohan ni Jehova. (Mat. 24:3, 7-9, 12; Luc. 21:10-12) Nakikita liwat naton nga an mga tawo nagawi pariho han igintagna ni apostol Pablo. (Kitaa an kahon nga “ An Panggawi Yana han mga Tawo.”) Sugad nga magsiringba ni Jehova, kombinsido kita nga nagkikinabuhi na kita ha “ultimo nga bahin han mga adlaw.”​—Mic. 4:1.

2. Ano nga mga pakiana an kinahanglan naton hibaroan an baton?

² Tungod kay hilawig na nga panahon an naglabay tikang han 1914, sigurado nga nagkikinabuhi na kita ha ultimo nga bahin han “kataposan nga mga adlaw.” Tungod kay an kataposan hirani na gud, kinahanglan naton hibaroan an mga baton han pipira nga importante nga pakiana: Ano an mahitatabo ha ultimo nga bahin han “kataposan nga mga adlaw”? Ngan ano an ginlalaoman ni Jehova nga bubuhaton naton samtang naghuhulat kita hito nga mga panhitabo?

3. Sumala han tagna ha 1 Tesalonica 5:1-3, ano nga proklamasyon an paghihimoon han mga nasud?

³ Basaha an 1 Tesalonica 5:1-3. Hi Pablo nag-unabi hin “adlaw ni Jehova.” Hini nga konteksto, nagtutudlok ini ha peryodo  han panahon nga magtitikang kon atakehon na an “Babilonya nga Gamhanan,” an imperyo han buwa nga relihiyon ha kalibotan, ngan matatapos ini ha Armagedon. (Pah. 16:14, 16; 17:5) Antes gud magtikang ito nga “adlaw,” an mga nasud magpuproklamar hin “Kamurayawan ngan kasigurohan!” (An iba nga hubad nasiring: “Kamurayawan ngan katalwasan.”) Usahay, an mga lider han kalibotan nagamit hin pariho hito nga mga pulong kon nag-iistorya mahitungod han pagparig-on han relasyon han mga nasud. * Kondi, magigin iba an proklamasyon nga “kamurayawan ngan kasigurohan” nga gin-uunabi han Biblia. Kay ano? Kon mahitabo na ini, an mga tawo bangin maghunahuna nga an mga lider han kalibotan naglampos na ha paghimo ha kalibotan nga mas talwas ngan mas may kasigurohan. Kondi an tinuod, magtitikang an “daku nga kasakitan” ngan “tigda nga maabot . . . an kabungkagan.”​—Mat. 24:21.

4. (a) Ano an kinahanglan pa naton hibaroan mahitungod han proklamasyon nga “kamurayawan ngan kasigurohan”? (b) Ano an nahibabaroan na naton mahitungod hito?

⁴ May nahibabaroan na kita mahitungod han proklamasyon nga “kamurayawan ngan kasigurohan.” Pero may iba pa nga butang nga diri kita maaram. Diri kita maaram kon ano an mag-aaghat nga iproklamar ito o kon paonan-o ito bubuhaton. Diri liwat kita maaram kon ipuproklamar ba ito hin makausa la o usa ito nga serye hin mga proklamasyon. Anoman an mahitabo, ini an aton nahibabaroan: Kinahanglan diri kita malimbongan ha paghunahuna nga makakab-ot han mga lider han kalibotan an kamurayawan ha bug-os nga kalibotan. Lugod, ito nga proklamasyon an ginsiring nga kinahanglan naton bantayan. Ito an sinyales nga magtitikang na an “adlaw ni Jehova”!

5. Paonan-o an 1 Tesalonica 5:4-6 nabulig ha aton nga magin andam ha “adlaw ni Jehova”?

⁵ Basaha an 1 Tesalonica 5:4-6. Iginpapakita han sagdon ni Pablo kon paonan-o naton sisiguruhon nga andam kita ha “adlaw ni Jehova.” Kinahanglan “diri kita magpinangaturog sugad han ginbubuhat han iba.” Kinahanglan “padayon kita nga magmata” ngan magpabilin nga alerto. Pananglitan, kinahanglan magin alerto kita han peligro nga ikompromiso an aton neutralidad pinaagi ha pagpadara ha mga isyu han politika ha kalibotan. Kon makigbahin kita hito, magigin “bahin [kita] han kalibotan.” (Juan 15:19) Maaram kita nga an Ginhadian han Dios amo la an makakahatag hin kamurayawan ha kalibotan.

6. Karuyag naton buligan an mga tawo nga buhaton an ano, ngan kay ano?

⁶ Labot la han aton pagpabilin nga nagmamata, karuyag liwat naton buligan an iba nga mahibaro han igintagna han Biblia nga mahitatabo ha kalibotan. Hinumdoman naton nga kon magtikang na an daku nga kasakitan, urhi na para ha mga tawo nga mag-alagad kan Jehova. Salit apurado gud an aton pagsangyaw nga buruhaton! *

7. Ano an ginlalaoman ni Jehova nga bubuhaton naton yana?

⁷ Hinin halipot na la nga panahon nga nahibibilin antes magtikang an “adlaw” ni Jehova, naglalaom hiya nga padayon kita nga magigin sagipo ha pagsangyaw. Kinahanglan siguruhon naton nga “pirme damu an [aton] ginbubuhat ha buruhaton han Ginoo.” (1 Cor. 15:58) Igintagna ni Jesus an aton bubuhaton. Han gin-unabi niya an mahitungod han ngatanan nga makatirigamnan nga mahitatabo ha kataposan nga mga adlaw, hiya nagdugang: “Sugad man, an maopay nga sumat kinahanglan isangyaw anay ha ngatanan nga nasud.” (Mar. 13:4, 8, 10; Mat. 24:14) Hunahunaa la: Ha kada mo pakikigbahin ha ministeryo, nakikigbahin ka ha katumanan hito nga tagna han Biblia!

8. Paonan-o padayon nga nag-uuswag an pagsangyaw nga buruhaton?

⁸ Ano an aton masisiring mahitungod han pag-uswag han pagsangyaw nga buruhaton? Kada tuig, nag-uuswag ini. Pananglitan, hunahunaa an pagdamu han magwarali ha bug-os nga kalibotan durante han kataposan nga mga adlaw. Han 1914, may 5,155 nga magwarali ha 43 nga nasud. Yana, may mga 8.5 ka milyon na nga magwarali ha 240 nga nasud! Kondi, diri pa tapos an aton buruhaton. Kinahanglan padayon naton isangyaw nga an Ginhadian han Dios amo la an solusyon han ngatanan nga problema han katawohan.​—Sal. 145:11-13.

9. Kay ano nga kinahanglan padayon naton nga isangyaw an mensahe han Ginhadian?

⁹ An aton pagsangyaw magpapadayon tubtob nga sumiring hi Jehova nga tapos na ito. Pira pa nga panahon an nahibibilin basi makilala han mga tawo hi Jehova nga Dios ngan hi Jesu-Kristo? (Juan 17:3) Diri kita maaram. Maaram la kita nga samtang diri pa nagtitikang an daku nga kasakitan, an bisan hin-o nga “may husto nga disposisyon basi magkaada kinabuhi nga waray kataposan” mahimo pa kumarawat han maopay nga sumat. (Buh. 13:48) Paonan-o naton mabubuligan ini nga mga tawo samtang may panahon pa?

10. Ano nga bulig an iginhahatag ha aton ni Jehova basi matutdoan an mga tawo han kamatuoran?

¹⁰ Pinaagi han organisasyon ni Jehova, gintatagan kita niya han ngatanan naton nga ginkikinahanglan basi matutdoan an mga tawo han kamatuoran. Pananglitan, ginbabansay kita kada semana ha katirok ha midweek. Ito nga katirok nabulig ha aton nga mahibaro han aton isisiring ha siyahan nga mga pagbisita ngan mga pagbalik-bisita. Nagtututdo liwat ito ha aton kon paonan-o magdudumara hin mga pag-aram ha Biblia. An organisasyon ni Jehova nagtatagana liwat hin  mga garamiton ha aton Toolbox ha Pagpanutdo. Ini nga mga garamiton nabulig ha aton ha . . .

• pagtikang hin pakiistorya,

• pagpukaw hin interes,

• pagpagios ha mga tawo nga maghingyap nga mahibaro hin dugang pa,

• pagtutdo han kamatuoran kon nagdudumara hin mga pag-aram ha Biblia, ngan

• pag-imbitar ha mga interesado nga bumisita ha aton website ngan ha Kingdom Hall.

Syempre, diri igo an pagkaada la hini nga mga garamiton. Kinahanglan gamiton naton ito. * Pananglitan, kon nagbibilin ka hin tract o magasin ha usa nga interesado katapos han iyo maopay nga pag-istorya, magkakaada hiya higayon nga magbasa hin dugang tubtob nga makabalik ka. Responsabilidad naton nga padayon nga magin sagipo kada bulan ha pagsangyaw nga buruhaton.

11. Kay ano nga ginhimo an Online Bible Study Lessons?

¹¹ Sugad nga usa pa nga ehemplo kon paonan-o ginbubuligan ni Jehova an mga tawo nga mahibaro han kamatuoran, tagda an Online Bible Study Lessons ha jw.org^®. Kay ano nga ginhimo ini? Kada bulan, yinukot nga tawo ha bug-os nga kalibotan an namimiling ha Internet hin mga leksyon ha Biblia. An mga leksyon ha aton website mabulig ha ira nga mahibaro han kamatuoran han Pulong han Dios. Dugang pa, an pipira nga imo nakakaistorya bangin mag-alang pagkarawat hin personal nga pag-aram ha Biblia. Kon ito an kahimtang, ipakita ha ira ini nga seksyon han aton website o padad-i hira hin link hini nga mga leksyon. *

12. Ano an mahibabaroan han usa tikang ha Online Bible Study Lessons?

¹² An aton Online Bible Study Lessons naghihisgot hini nga mga topiko: “The Bible and Its Author,” “The Bible’s Main Characters,” ngan “The Bible’s Message of Hope.” Ito nga mga topiko nagtututdo kon:

• Paonan-o makakabulig an Biblia ha usa nga indibiduwal

• Hin-o hi Jehova, hi Jesus, ngan an mga anghel

• Kay ano nga ginlarang han Dios an mga tawo

• Kay ano nga may-ada pag-antos ngan karaotan

Ginhihisgotan liwat hini nga mga leksyon kon paonan-o ni Jehova . . .

• tatapuson an pag-antos ngan kamatayon,

• bubuhion an mga patay, ngan

• sasaliwanan han Ginhadian han Dios an pakyas nga tawhanon nga mga gobyerno.

13. An mga leksyon ba ha online kasaliwan han kahikayan han pag-aram ha Biblia? Isaysay.

¹³ Ini nga mga leksyon ha online diri kasaliwan han kahikayan han pag-aram ha Biblia. Iginhatag ha aton ni Jesus an pribilehiyo ha panhimo hin mga disipulo. Naglalaom kita nga an mga interesado magbabasa hini nga mga leksyon ha online, mag-aapresyar han ira nahibabaroan, ngan maghihingyap nga mahibaro hin dugang pa. Kon ito an mahitabo, bangin kumarawat hira hin pag-aram ha Biblia. Ha katatapos han tagsa nga leksyon, gin-aaghat an magbarasa nga magpasa hin request para hin personal nga magdudumara ha iya hin pag-aram ha Biblia. Pinaagi han aton website, ha aberids ha bug-os nga kalibotan, nakakakarawat kita hin sobra 230 nga naghahangyo hin pag-aram ha Biblia kada adlaw! Ito nga personal nga pagtutdo importante gud!

14. Sumala ha iginsugo ni Jesus nga mababasa ha Mateo 28:19, 20, ano an kinahanglan naton paningkamotan, ngan kay ano?

¹⁴ Basaha an Mateo 28:19, 20. Kon nagdudumara kita hin mga pag-aram ha Biblia, ginhihimo  naton an gimaopayi ha ‘panhimo hin mga disipulo, gintututdoan hira nga tumanon an ngatanan nga iginsugo’ ni Jesus. Kinahanglan naton buligan an mga tawo nga masabtan nga importante gud nga dumapig hira kan Jehova ngan ha iya Ginhadian. Nagpapasabot ini nga kinahanglan naton maningkamot nga pagiuson hira nga higugmaon an kamatuoran pinaagi ha pag-aplikar han ira nahibabaroan, pagdedikar han ira kinabuhi kan Jehova, ngan pagpabawtismo. Hito la nga paagi matatalwas hira ha adlaw ni Jehova.—1 Ped. 3:21.

15. Waray kita panahon para ha ano, ngan kay ano?

¹⁵ Sugad han gin-unabi na, gutiay na gud la nga panahon an nahibibilin tikang yana tubtob ha kataposan hini nga sistema. Salit, waray na kita panahon nga padayon nga dumarahan hin pag-aram an mga tawo nga diri klaro an intensyon kon karuyag ba nira magin mga disipulo han Kristo. (1 Cor. 9:26) Apurado an aton buruhaton! Damu pa nga tawo an kinahanglan makabati han mensahe han Ginhadian samtang may panahon pa.

16. Sumala ha Pahayag 18:2, 4, 5, 8, ano an kinahanglan buhaton naton ngatanan? (Kitaa liwat an footnote.)

¹⁶ Basaha an Pahayag 18:2, 4, 5, 8. Iginpapakita hini nga teksto an dugang pa nga ginlalaoman ni Jehova ha iya mga magsiringba. Kinahanglan tipigan han ngatanan nga tinuod nga Kristiano an ira matin-aw nga kaibahan ha Babilonya nga Gamhanan. Antes mahibaro han kamatuoran, an usa nga estudyante ha Biblia bangin membro hin buwa nga relihiyon. Bangin nagtinambong hiya ngan nakigbahin ha relihiyoso nga mga buruhaton hito. O bangin nahatag hiya hin donasyon para hito nga organisasyon. Antes aprobaran an usa nga estudyante nga magin diri-bawtismado nga magwarali, kinahanglan utdon niya an ngatanan niya nga koneksyon ha buwa nga relihiyon. Kinahanglan niya magsurat nga mabaya na hiya o diri na niya karuyag magin membro ha iya relihiyon hadto o ha bisan ano nga organisasyon nga konektado ha Babilonya nga Gamhanan. *

17. Ano nga klase hin sekular nga trabaho an kinahanglan likyan han usa nga Kristiano, ngan kay ano?

¹⁷ Kinahanglan siguruhon han usa nga tinuod nga Kristiano nga an iya sekular nga trabaho diri konektado ha Babilonya nga Gamhanan. (2 Cor. 6:14-17) Pananglitan, kinahanglan diri hiya nagtatrabaho ha usa nga relihiyoso nga organisasyon. Dugang pa, an usa nga Kristiano nga nangingimpleyo diri maruruyag pagbuhat hin damu nga trabaho ha usa nga pasilidad nga ginagamit para ha buwa nga pagsingba. Ngan kon may-ada hiya kalugaringon nga pakabuhi, diri hiya makarawat o magkukontrata hin trabaho nga konektado ha Babilonya nga Gamhanan. Kay ano  nga sugad hito karig-on an aton panindogan? Kay diri naton karuyag makigbahin ha mga buruhaton ngan sala han relihiyoso nga mga organisasyon nga mahugaw para ha Dios.​—Isa. 52:11. *

18. Paonan-o ginsunod han usa nga bugto an mga prinsipyo ha Biblia may kalabotan ha iya sekular nga trabaho?

¹⁸ Mga tuig na an naglabay, usa nga tigurang nga naglulugaring nga panday an ginhangyo hin kontraktor para ha gutiay la nga trabahoon ha usa nga singbahan ha bungto nga gin-uukyan hini nga bugto. Maaram an kontraktor nga diri maruruyag an bugto kay pirme ito nasiring nga diri hiya magtatrabaho ha mga singbahan. Pero hini nga takna, an kontraktor waray nabibilngan nga panday. Bisan pa hito, padayon nga ginsunod han bugto an mga prinsipyo ha Biblia ngan waray niya karawata an trabaho. Han sumunod nga semana, iginbutang ha dyaryo an usa nga retrato hin lain nga panday nga nagtataod hin krus hito nga singbahan. Kon nagkompromiso an aton bugto, iya unta retrato an nakadto ha dyaryo. Hunahunaa la, nadaot gud unta an iya reputasyon ha iya mga igkasi-Kristiano! Hunahunaa liwat an gin-abat unta ni Jehova.

19-20. (a) Ano na an aton nahibaroan? (b) Ano pa an kinahanglan naton mahibaroan?

¹⁹ Sumala han tagna han Biblia, an sunod nga makatirigamnan nga mahitatabo ha kalibotan ha diri na maiha amo an pagproklamar han mga nasud han “kamurayawan ngan kasigurohan.” Tungod kay gintutdoan kita ni Jehova, maaram kita nga diri makakab-ot han mga nasud an tinuod ngan nagpapadayon nga kamurayawan. Ano an kinahanglan naton buhaton antes ito mahitabo ngan an masunod nga tigda nga kabungkagan? Naglalaom hi Jehova nga padayon kita nga magigin sagipo ha pagsangyaw han mensahe han Ginhadian ngan maniningkamot ha panhimo hin damu pa nga disipulo. Kinahanglan liwat kita padayon nga bumulag ha ngatanan nga buwa nga relihiyon. Nag-uupod ito han pagbaya ha pagin membro han Babilonya nga Gamhanan ngan paglikay ha mga trabaho nga konektado hito.

²⁰ May masunod pa nga mga mahitatabo ha ultimo nga bahin han “kataposan nga mga adlaw.” May iba pa liwat nga butang nga ginlalaoman ni Jehova nga bubuhaton naton. Ano ito, ngan paonan-o kita magigin andam ha ngatanan nga mahitatabo ha diri na maiha? Hihisgotan naton ito ha sunod nga artikulo.