ოგურაფალ სტატია 40
მონდომათ ემსახურით ღორონთის „ბოლო დღალეფიშ“ ბოლო პერიოდის
„მტკიცას რდათ, ირო ბრელ იხანდით უფალიშ საქმეს“ (1 კორ. 15:58)
ობირეში 58 დობგორათ მშვიდობაშ მეგობრეფი
შინაარსი *
1. მუ მარწმუნენა, ნამდა „ბოლო დღალეფს“ ფცხოვრენთ?
თქვა 1914 წანაშ უკულ ქიდებადით-და, თიმწკუმა თე სისტემაშ „ბოლო დღალეფს“ ცხოვრენთ (2 ტიმ. 3:1). არძას გამგონებნა იესოშ ნაწინასწარმეტყველებ თი მოვლენეფიშ შესრულება, ნამუთ თე პერიოდის ოხუ. თიშა მიშურს ჩხუპეფ, ოჭკუმალიშ სინაკლებე, მიწისძვრეფ, ეპიდემიეფ, უკანონობაშ მოძინა დო იეჰოვაშ ხალხიშ თხოზინ (მათ. 24:3, 7—9, 12; ლუკ. 21:10—12). თეს გეძინელ, ვორწყეთ, ნამდა ხალხ თეშ იქციებ, მუჭოთ თენა მოციქულ პავლექ იწინასწარმეტყველ (ქოძირით ჩარჩო „ მუნერ ხალხ ცხოვრენს ამდღა?“). ჩქი, იეჰოვაშ თაყვანიშმცემლეფ, დარწმუნებულ ვორეთ, ნამდა „ბოლო დღალეფიშ“ ბოლო პერიოდის ფცხოვრენთ (მიქ. 4:1).
2. ნამ კითხვეფიშ პასუხეფ ოკო მიჩქუდან?
2 ასე „ბოლო დღალეფიშ“ ბოლო პერიოდის ფცხოვრენთ, მუშენდა 1914 წანაშე ბრელ დროქ მიკორთჷ. აღსასრულ ხოლოს რე, ათეშენ მუსხირენ მნიშვნელოვან კითხვაშ პასუხ ოკო მიჩქუდან: მუ მოვლენეფ მოხვადუ „ბოლო დღალეფიშ“ ბოლო პერიოდის? მუს ელჷ იეჰოვა ჩქინდე თე მოვლენეფიშ მოხვალამაშახ?
მუ მოხვადუ „ბოლო დღალეფიშ“ ბოლო პერიოდის?
3. მუჭოთ 1 თესალონიკელეფიშ 5:1—3-ს ჭარჷ, მუ განცხადებას გაკეთენა მსოფლიო ლიდერეფ?
3 წეკითხით 1 თესალონიკელები 5:1—3. პავლე მიშინუანს „იეჰოვაშ დღას“. მუჭოთ თე მუხლის რე მოჩამილ, „იეჰოვაშ დღა“ მეუთითენს დროშ თი პერიოდშა, ნამუთ „დიდ ბაბილონიშ“, ტყურა რელიგიურ სამყაროშ წინააღმდეგ გიშულათ იჭყაფუ დო არმაგედონით ითებუ (გამოცხ. 16:14, 16; 17:5). სოიშახ თე „დღა“ დიჭყაფუ, მსოფლიო ლიდერეფ გეგმაცხადენა „მშვიდობა დო უსაფრთხოებას“. მართალ რე, თინეფ მინშა ამდღა ხოლო გიმირინუანა თეცალ ფრაზეფს, მუჟამსით ერეფ შქას ურთიერთობაშ გაუჯგუშებაშე იჩიებნა. * მარა ბიბლიას მოჩამილ განცხადება „მშვიდობა დო უსაფრთხოებაშ“ გურშენ, განსხვავებულ იჸუაფ. მუშენ იფჩიებუთ თეს? მუშენდა, მუჟამსით თენა მოხვადუ, ხალხიქ შილებე იფიქრას, ნამდა მსოფლიო ლიდერეფქ მართალო ქიმიოჭირინუეს მშვიდობას. მარა სინამდვილეს, თეს „დიდ გასაჭირ“ ქუმაჸუნუ დო თინეფ „მოულოდნელო გენადგურებნა“ (მათ. 24:21).
შეცდომაშა ვემშაიჸონან „მშვიდობა დო უსაფრთხოებაშ“ გურშენ კეთებულ განცხადებაქ (ქოძირით აბზაცეფი 3—6) *
4. ა) მუ დეტალეფ ვა მიჩქნა „მშვიდობა დო უსაფრთხოებაშ“ განცხადებაშ გურშენ? ბ) მუ მიჩქნა თე განცხადებაშ გურშენ?
4 ჩქი მიღნა გარკვეულ ინფორმაცია „მშვიდობა დო უსაფრთხოებაშ“ განცხადებაშ გურშენ. მარა, რე თიცალ მუდგარენეფ ხოლო, მუთ ვა მიჩქნა. მაგალთო, მუ მიზეზით ვარდა მუჭო გაკეთენა მსოფლიო ლიდერეფ თე განცხადებას. თეს გეძინელ, ვართ თინა მიჩქნა თე განცხადებას მუსხირენშა გაკეთენა დო ვარ ხვალე ართშა. მუჭოდგა ვა მოხვადასინ, ჩქი ართ მუდგარენ ჯგირო მიჩქნა: ოკო ვედებჯერათ, ითამ მსოფლიო ლიდერეფს შეულებნა ქიმიოჭირინუან მშვიდობას დედამიწას. ოკო ფშუდან, თენა უბრალოთ თი განცხადება რე, ნამდგაშ გურშენ ბიბლიას ჭარჷ, ნამდა თიშ გიმოცხადებას ოკო ველუდათ. თინა „იეჰოვაშ დღაშ“ დოჭყაფაშ ნიშან იჸუაფ!
5. მუჭო მოხვარნა 1 თესალონიკელეფიშ 5:4—6 მუხლეფს ინოჭარილ სიტყვეფ, მივემზადათ „იეჰოვაშ დღაშო“?
5 წეკითხით 1 თესალონიკელები 5:4—6. პავლეშ თე სიტყვეფშე ბგებულენთ, მუ ოკო ვაკეთათ, ნამდა მივემზადათ „იეჰოვაშ დღაშო“. ჩქი „კურცხას [ოკო] ვორდათ დო შხვეფცალო ვედიბრულუათ“. მაგალთო, ჩქი ფრთხილას ოკო ვორდათ, ნამდა ნეიტრალიტეტიშ საკითხის ართგურეფქ ქუდოფსქიდათ დო დღას ვემიბღათ მონაწილება პოლიტიკურ საკითხეფს. მარა, ნეიტრალიტეტის ვედეფცვენთ-და, „თე ქიანაშ ნაწილო“ გინიფრთუთ (იოან. 15:19). მუჭოთ მიჩქნა, ხვალე ღორონთიშ სამეფოს შეულებ მშვიდობაშ დამყარება.
6. მუშ კეთებას ვოხვარუთ შხვეფს დო მუშენ?
6 ჩქი არძას მოკონა კურცხას ვორდათ. თეწკუმა ართო, შხვეფს ხოლო ვოხვარუთ გექშაკურცხან, შხვანერო ქოფთქუათინ, ქიგეგან მუ იწინასწარმეტყველ ბიბლიაქ მომავალ მოვლენეფიშ გურშენ. თენა ასე ოკო ვაკეთათ მუშენდა, დიდ გასაჭირ ქიდიჭყაფუნ, ხალხშო გვიან იჸუაფ იეჰოვაშ მსახურებაშ დოჭყაფა. ათეშენ მნიშვნელოვან რე, ამდღა იფქადაგათ! *
იქადაგით მთელ მონდომათ
ამდღა ფქადაგენთინ თეთ ხალხის ვოძირანთ, ნამდა ხვალე ღორონთიშ სამეფოს შეულებ მსოფლიოს მშვიდობა დო უსაფრთხოებაშ მეჭირნაფა (ქოძირით აბზაცეფი 7—9)
7. მუს ელჷ იეჰოვა ჩქინდე?
7 „იეჰოვაშ დღაშ“ დოჭყაფაშახ აკაფცხა მეძჷ, ათეშენ თინა ჩქინდე ელჷ, ნამდა მთელ მონდომათ მიბღენთ მონაწილებას ქადაგებაშ საქმეს. საჭირო რე დებრწმუნათ, ნამდა ბრელს ფხანდენთ „უფალიშ საქმეს“ (1 კორ. 15:58). მუჭოთ იესოქ იწინასწარმეტყველ, ჩქი თეს გუვაკეთენდით. მუჟამსით ბოლო დღალეფიშ ნიშნეფიშ გურშენ იჩიებუდ, თიქ თქუ: „მარა დიო სახიოლო ამბექ ოკო ექადაგას არძა ხალხის“ (მარ. 13:4, 8, 10; მათ. 24:14). დეფიქრით: ირიათო, მუჟამსით მსახურებაშა მეურთ, მონაწილებას ღებულენთ თე ბიბლიურ წინასწარმეტყველებაშ შესრულებას!
8. მუჭო მეურს წიმი ქადაგებაშ საქმე?
8 მუჭო მეურს წიმი ქადაგებაშ საქმე? ირ წანას, უმოს მეტ ხალხ ირჩქილუაფ სახიოლო ამბეს ღორონთიშ სამეფოშ გურშენ. მაგალთო, დეფიქრით, მუჭო იძინანს მსოფლიოს მაქადაგებელეფიშ რიცხვი „ბოლო დღალეფს“. 1914 წანას 43 ქიანას ხვალე 5 155 მაქადაგებელ რდუ. ამდღა 240 ქიანას მაქადაგებელეფიშ რიცხვი 8 მილიონშე მეტ რე. მარა, ქადაგებაშ საქმე დიო ხოლო ვათებე. ჩქი ოკო გუვაგრძელათ შხვეფშა თიშ რაგად, ნამდა კაცობრიობაშ პრობლემეფს ხვალე ღორონთიშ სამეფო გინოჭკირუნს (ფსალმ. 145:11—13).
9. მუშენ ოკო გუვაგრძელათ სახიოლო ამბეშ ქადაგება?
9 ქადაგებაშ საქმე თეიშახ ვეთებუ, სოიშახ იეჰოვა ვა თქუანს თეს. მუსხი დროქ დასქიდ ხალხის, ნამდა გეჩინებაფუან იეჰოვა ღორონთ დო იესო ქრისტე? (იოან. 17:3). თენა ზუსტას ვა მიჩქნა. მარა მიჩქნა, ნამდა დიდ გასაჭირიშ დოჭყაფაშახ, თინეფს, „მით მარადიულ ცხოვრებაშო რენა განწყობილ“ დიო ხოლო შეულებნა, მირჩქილუან სახიოლო ამბე დო დიჭყან ღორონთიშ მსახურება (საქ. 13:48). მუჭო შემლებნა მივეხვარათ ხალხის, სოიშახ თეშ დრო დიო ხოლო რე?
10. მუჭო მოხვარნა იეჰოვა, ნამდა ხალხის დუვოგურუათ ჭეშმარიტება?
10 იეჰოვა მუშ ორგანიზაციაშ საშვალებათ მარზენა ირფელს, მუთ მოსაჭირნა, ნამდა ხალხის ჭეშმარიტება დუვოგურუათ. მაგალთო, ჩქი ბრელ მუდგარენს ბგურაფლენთ შქა მარაშ შეხვალამაშე. თე შეხვალამა მოხვარნა თიშ გურაფას, მუ ვუწუათ პიროვნებას პირველ ჩიებაშ დო კინ მეკითხირიშ დროს. თეს გეძინელ, ბგურაფლენთ, მუჭო ჩავატარათ ბიბლიაშ გურაფეფი. თე ირფელწკუმა ართო, იეჰოვაშ ორგანიზაცია მარზენა გურაფას მოხვარნან ფერ საშვალებეფს. თე ირფელ მოხვარნა ...
-
ქიდიბჭყათ რაგად პიროვნებაწკუმა
-
გურჩქინათ ინტერესი
-
აღბძრათ შხვეფ უმოს ქიგეგან ბიბლიაშე
-
ბიბლიაშ გურაფაშ დოჭყაფათ ვოგურუათ ჭეშმარიტება
-
ელუჩათ დაინტერესებულეფს, გემშართან ჩქინ ვებგვერდშა დო ქუმორთან სამეფო დარბაზშა.
მუშო ოკო რაგად, ხვალე თინა ვა რე დასაბაღ, ნამდა თე საშვალებეფ მიღუდან; ჩქი ოკო გიმიბრინუათ თინეფ. * მაგალთო, პიროვნებაწკუმა საინტერესო ჩიებაშ უკულ, ბუკლეტ ვარდა ჟურნალ ქუდუტეთ-და, თის შეიალებე წეკითხას დოტებულ პუბლიკაცია, სოიშახ კინ მიაკითხანთ. ჩქინ პირად პასუხიშმგებლობა რე, ირ თუთას იფქადაგათ სახიოლო ამბე მთელ მონდომათ.
11. მუშენ შექმნეს ჩქინ ვებგვერდის განყოფილება „ბიბლიაშ გურაფაშ ონლაინ გაკვეთილეფ“?
11 ხოლო ართ საშვალება, ნამდგათ იეჰოვა ოხვარ ხალხის, ქიგეგან ჭეშმარიტება, რე ჩქინ ვებგვერდის jw.org®-ის მოჩამილ განყოფილება „ბიბლიაშ გურაფაშ ონლაინ გაკვეთილეფ“ („ბიბლიის ონლაინ შესწავლა“). მუშენ შექმნეს თე განყოფილება? მთელ მსოფლიო მაშტაბით, ირ თუთას ვითობით ანთას პიროვნება ინტერნეტის გორუნს ინფორმაციას ბიბლიურ საკითხეფიშ გურშენ. ჩქინ ვებგვერდის მოჩამილ ონლაინ გაკვეთილეფს შეულებ მეხვარას თეცალ ხალხის, ქიგეგან ჭეშმარიტება ღორონთიშ სიტყვაშე. ნამთინეს, მიდგას ვუქადაგუთ შილებე ვა უსხუნდას, ნამდა მიდგაინქ პირადო ოგურუას ბიბლია. შეიოლებერ ქორენ-და, ქაძირე თინეფს ჩქინ ვებგვერდის მოჩამილ თე განყოფილება ვარდა ქუჯღონ თიშ ელექტრონულ მისამართი. *
12. მუშ გურაფა შეულებ პიროვნებას „ბიბლიაშ გურაფაშ ონლაინ გაკვეთილეფშე“?
12 ახალ განყოფილებაშა მიშურს საკითხეფ, ნამუთ ოხუ ბიბლიას დო თიშ ავტორს, მთავარ ბიბლიურ პერსონაჟეფს დო ბიბლიურ იმენდის. თინეფიშ გურაფაშ დროს, პიროვნება გეგენს:
-
მუჭო შეულებ ბიბლიას, მეხვარას პიროვნებას
-
მი რენა იეჰოვა, იესო დო ანგელოზეფ
-
მუშენ შექმნჷ ღორონთიქ ადამიანეფ
-
მუ რე ტანჯება დო უბადობაშ მიზეზ
თეს გეძინელ, თე გაკვეთილეფს გარჩიებულ რე, მუჭო ...
-
მუღენს იეჰოვა ბოლოს ტანჯება დო ღურას,
-
გათელენს იეჰოვა ღურელეფს დო
-
დოთირანს იეჰოვა ადამიანურ მართველობას მუშ სამეფოთ.
13. თირანსო „ბიბლიაშ გურაფაშ ონლაინ გაკვეთილეფ“ პიროვნებაშა ბიბლიაშ პირადო გურაფას? გენწყით.
13 „ბიბლიაშ გურაფაშ ონლაინ გაკვეთილეფ“ ვა თირანს პიროვნებაშა ბიბლიაშ პირადო გურაფაშ მეთოდის. იესოქ მოწაფეეფიშ მომზადებაშ პატი გებდვეს. თე ონლაინ გაკვეთილეფ თეშ რე შედგენილ, ნამდა დაინტერესებულეფქ დაფასან, მუდგას გურაფლენა დო უმოს მეტიშ გურაფაშ სურვილქ გურჩქინდან. თაშ ნამდა, თინეფქ შილებე ქიდიჭყან ბიბლიაშ გურაფა. თითოულ გაკვეთილიშ ბოლოს, ვებგვერდის რე მოწოდება, ნამუთ საშვალებას არზენს პიროვნებას მითხუას, ნამდა ბიბლია ართ-ართ იეჰოვაშ მოწმექ პირადო ქუდაგურუას. მთელ მსოფლიო მაშტაბით ჩქინ ვებგვერდის ირდღას 230-შე მეტ ბიბლიაშ გურაფაშ მოთხოვნას ბღებულენთ. შხვეფშა ბიბლიაშ პირადო დოგურაფაშ მეთოდ მანგარ მნიშვნელოვან რე!
გაგრძელით მოწაფეეფიშ მომზადება
14. მუჭოთ მათეშ 28:19 დო 20-ის ინოჭარილ იესოშ მითითებას ბკითხულენთ, მუშ კეთებას ოკო ვეცადათ დო მუშენ?
14 წეკითხით მათე 28:19, 20. მუჟამსით ბიბლიას ვოგურუანთ, ირნერო ოკო ვეცადათ, მუვამზადათ მოწაფეეფ დო ვოგურუათ „თინეფს ირფელიშ დაცვება“ მუთ იესოქ მიზოჯეს. ჩქი ოკო მივეხვარათ ხალხის, ქიგეგან მუსხით მნიშვნელოვან რე თინეფშო, ემსახურან იეჰოვას დო ხუჯ ქუდუკინან თიშ სამეფოს. თენა ნიშნენს, ვეცადათ, აღბძრათ ხალხი გეგმირინუან ნაგურეფ, დუდ მეუძღვინან იეჰოვას დო დინათან. ხვალე თე შემთხვევას გინოსქიდნა „იეჰოვაშ დღას“ (1 პეტ. 3:21).
15. მუშ დრო ვა მიღნა დო მუშენ?
15 მუჭოთ მიფშინეთ, აკაბცხა დრო რე დოსქილადირ თე სისტემაშ მოსპუალაშახ. ათეშენ, ვა მიღნა დრო, გუვაგრძელათ ბიბლიაშ გურაფა თინეფწკუმა, მით ვეგნოდგუნს ნაბიჯეფს, ნამდა ემსახურას ღორონთის (1 კორ. 9:26). ქადაგებაშ საქმე ვეგნიდვინე! დიო ხოლო რენა ადამიანეფ, მიდგას ოსაჭირ სახიოლო ამბეშ მორჩქილაფა, სოიშახ გვიან ვა რე.
მუთუნნერ კავშირ ვა გიღდან ტყურა რელიგიაწკუმა
16. მუჭოთ გამოცხადებაშ 18:2, 4, 5 დო 8-ს ჭარჷ, მუ ოკო ვაკეთათ არძაქ? (ქოძირით სქოლიო).
16 წეკითხით გამოცხადება 18:2, 4, 5, 8. თე მუხლეფ ოძირანს, ხოლო მუშ კეთებას ელჷ იეჰოვა მუშ თაყვანიშმცემელეფშე. არძა ჭეშმარიტ ქრისტიანქ ოკო დერწმუნას, ნამდა მუთუნნერ კავშირ ვა უღჷ ტყურა რელიგიაწკუმა. ბიბლიაშ მაგურაფალ, სოიშახ ბიბლიაშ გურაფას დიჭყანდკო, შილებე ტყურა რელიგიაშ წევრ რდუ, ოსწრუდ რელიგიურ შეხვალამეფს დო მონაწილებას ღებულენდჷ შხვადოშხვა საქმეეფს. ვარდა შილებე ნამთინე ორგანიზაციას ფარას წირენდჷ. სოიშახ ბიბლიაშ მაგურაფალ მოუნათლავ მაუწყებელო გინირთუ, ოკო დერწმუნას, ნამდა მუთუნნერ კავშირ ვა უღჷ ტყურა რელიგიაწკუმა. თიქ მუშ ეკლესიას ვარდა შხვა ნებისმიერ ორგანიზაციას, ნამუთ დიდ ბაბილონწკუმა რე დაკავშირებულ, წერილობით ოკო ქაცნობას ვარდა შხვანერო ქაძირუას, ნამდა ვეჸუაფ თიშ წევრ. *
17. მუ სამუშას ოკო ვემუშუას ქრისტიანქ დო მუშენ?
17 ჭეშმარიტ ქრისტიან დარწმუნებულ ოკო რდას, ნამდა თიშ სამუშას, მუთუნნერ კავშირ ვა უღჷ დიდ ბაბილონწკუმა (2 კორ. 6:14—17). მაგალთო, თინა დღას ვედიჭყანს ეკლესიას მუშობას. თეს გეძინელ, ქრისტიანქ, მიდგას მუდგარენ ხელობა ვარდა საქმე უჩქჷ, ოკო დეფიქრას ზედმეტო ხომ ვა ღებულენს მონაწილებას თიცალ სამუშას, ნამუთ რელიგიურ შენობეფიშ მიკოჯინას ვარდა მიკოლუაფას ოხუ. ქრისტიანს მუშ ბიზნეს ქუღუნ-და, მუშო ოკო რაგად, ვართ მუშობას დიჭყანს დო ვართ კონტრაქტის გაფორმენს თიცალ ორგანიზაციეფწკუმა, ნამდგას „დიდ ბაბილონწკუმა“ უღჷ კავშირ. მუშენ მიღნა თე საკითხის თეცალ მტკიცე პოზიცია? მუშენდა, ვა მოკონა მუდგაინ საერთო მიღდან რელიგიურ ორგანიზაციეფწკუმა, ნამუთ ღორონთიშ თოლს უწმინდურეფ რენა დო ვართ თინა მოკონა, ნამდა თინეფიშ ცოდვეფიშ მონაწილეეფ ვორდათ (ეს. 52:11). *
18. მუჭო დეცვჷ ართ ჯიმაქ ბიბლიურ პრინციპეფ სამუშაწკუმა დაკავშირებით?
18 მუსხირენ წანაშ წოხოლე, ართ დამსაქმებელქ უხუცეს ჯიმას ქოთხუ, ჯაშ ხელობაწკუმა დაკავშირებულ საქმეშ კეთება ეკლესიას, ნამუთ თე ჯიმაშ ქალაქის რდუ. თე დამსაქმებელშა უხუცეს ჯიმას ნარაგად აფუდ, ნამდა ეკლესიეფს ვა მუშენდჷ. მარა თე შემთხვევას, თე კოჩის გუჭირდჷ მოხელეშ გორუაქ. თეშ უმკუჯინუო, ჯიმაქ დეცვჷ ბიბლიურ პრინციპეფ დო ვარია ქოთქუ სამუშაშენ. უკულიან მარას ადგილობრივ გაზეთის ართ ჯაშ მოხელეშ სურათ რდუ მოჩამილ, ნამუთ ეკლესიაშ შენობას ჯვარს მიკარინუანდჷ. ჩქინ ჯიმა დათმობაშა მიდეშ-და, შილებე გაზეთის თიშ სურათ დუბეშტუდესკო. წერმიდგინით, მუნერ გლახა სახელ აღვენუდ თე ჯიმას ქრისტიანეფ შქას დო მუს იგინანდჷ იეჰოვა!
მუ დიბგურეთ?
19, 20. ა) მუ გებგით თე სტატიაშე? ბ) ხოლო მუ ოკო გებგათ?
19 მუჭოთ ბიბლიას რე ნაწინასწარმეტყველებ, ხოლო ართ მნიშვნელოვან მოვლენა, ნამუთ მალას მოხვადუ, თინა რე, ნამდა ერეფ გეგმაცხადენა „მშვიდობა დო უსაფრთხოებას“. ჩქი ბიბლიაშე ბგებულენთ, ნამდა ერეფ დღას ვემიოჭირნუანა ნამდვილ მშვიდობას, მუშენდა თეს იეჰოვა მირაგადნა. მუ ოკო ვაკეთათ, სოიშახ მსოფლიო ლიდერეფ „მშვიდობა დო უსაფრთხოებას“ გიმაცხადენა დო „დიდ გასაჭირ“ დიჭყაფუ? იეჰოვა ელჷ, ნამდა სახიოლო ამბეს იფქადაგუთ დო მოწაფეეფო მუვამზადენთ ხალხის. თეწკუმა ართო, ტყურა რელიგიას ქუვოკათუთ-და, ოკო გიშებლათ თევრეშე. თეშა მიშურს თიშ წევრობაშე ვარიაშ რაგად დო თიცალ სამუშეფშა დუდიშ ეჩილითაფა, ნამუთ დიდ ბაბილონწკუმა რე დაკავშირებულ.
20 „ბოლო დღალეფს“ შხვა მოვლენეფქ ხოლო ოკო მოხვადას. იეჰოვა ჩქინდე ელჷ, ნამდა შხვა საქმეეფს ხოლო გუვაკეთენთ. მუ მოვლენეფქ ოკო მოხვადას დო მუშ კეთებას ელჷ ღორონთ ჩქინდე? მუჭო შემლებნა მივემზადათ თი მოვლენეფშო, მუდგაქ მალას ოკო მოხვადას? თე კითხვეფს უკულიან სტატიას გუვარჩიენთ.
ობირეში 71 ვორეთ იეჰოვაშ დიდ ჯარი!
^ აბზ. 5 მალას ჩქი ველუთ მსოფლიო ლიდერეფიშ განცხადებას, ითამ თინეფქ ქიმიოჭირინუეს „მშვიდობა დო უსაფრთხოებას!“. თენა დიდ გასაჭირიშ დოჭყაფაშ ნიშან იჸუაფ. მუს ელჷ ჩქინდე იეჰოვა სოიშახ თე განცხადებას აკეთენა? თე სტატია ქიმმეხვარებნა, ქიგებგათ თე კითხვაშ პასუხ.
^ აბზ. 3 მაგალთო, მუჭოთ გაეროშ ოფიციალურ ვებგვერდის ჭარჷ, თინეფ აცხადენა, ნამდა ირნერო ოცადნა, მსოფლიოს „მშვიდობა დო უსაფრთხოებას“ ქიმიოჭირინუან.
^ აბზ. 6 ქოძირით თე ჟურნალს მოჩამილ სტატია: „ღორონთიშ განაჩენ— ირიათო მაფრთხილენანო ღორონთ?“
^ აბზ. 10 თიშ გაგებელო, მუჭო გიმიბრინუათ უჯგუშო თე საშვალებეფ, ქოძირით 2018 წანაშ ოქტომბერიშ „გინაჯინალ კოშკის“ მოჩამილ სტატია: „ოგურეთ ჭეშმარიტება“.
^ აბზ. 11 თე გაკვეთილეფ დიო ხვალე ინგლისურ დო პორტუგალიურ ნინეფშა რე, მარა მალას შხვა ნინეფშა ხოლო იჸუაფ.
^ აბზ. 16 თეს გეძინელ, დუდის ვურიდანთ ტყურა რელიგიაწკუმა დაკავშირებულ ორგანიზაციეფს, ნამუთ შილებე ორგანიზებას უკეთენდას ახალგაზრდულ ბანაკეფს ვარდა შხვა გასართობ ღონისძიებეფს. ჩქი ოკო ვა ვორდათ თეცალ ორგანიზაციაშ წევრეფ. ბრელ თეცალ ორგანიზაცია ოცად თიშ ფულუას, ნამდა თინეფიშ დაგეგმილ ღონისძიებეფ რელიგიაწკუმა რე დაკავშირებულ, მარა ფაქტ რე, ნამდა თინეფს რელიგიურ საფუძველ დო მიზან უღნა.
^ აბზ. 17 უმოს მეტ ინფორმაცია თიშ გურშენ, მუს იჩიებ ბიბლია თიცალ სამუშეფშე, ნამუთ რელიგიურ ორგანიზაციეფწკუმა რე დაკავშირებულ, შეილებნა ქოძირათ 1999 წანაშ 15 აპრილიშ „გინაჯინალ კოშკი“, გვ. 28.
^ აბზ. 83 სურათიშ ეჭარუა: კაფეს გითოხენ თი ხალხ აღელვებულო უჯინე ტელევიზორს ახალ ამბეეფს, სოდეთ „მშვიდობა დო უსაფრთხოებას“ გიმაცხადენა. იეჰოვაშ მოწმე ჩილ დო ქომონჯის, ნამუთ მსახურებაშ უკულ თე კაფეს გითოხე, ჯგირო უჩქნა მუშა რე საქმე.
