1. Wai du ani aino gupai nzunzu nga ani naraka ti “yangara arame”?

KA SI du nga i avunguro tingbafuo 1914, gure nga mo raki gamo raka naabaha rogo “kusa rago” watadu rogo yangara arame nga ga gi sino raka re. (2 Tim. 3:1) Ani dunduko naima giapa agu apai Yesu agumbapaha kumbatayo nga si nika du ti gi regbo re. Agu apai re nakoda avura, angbongi, abazigizo, riri akaza, bakere kuoandiko, gbiati bakere arungosiro nga ga ga Yekova aboro. (Mt. 24:3, 7-9, 12; Rk. 21:10-12) Ani ima bi aboro a i nimangi apai ngba gu gene gu mokedi nangia Pauro apepaha kumbatayo. (Oni bi gu sanduki nga “Wai du Aboro Awere.”) Wa du ani ni ga Yekova aboro, ani ima du na gu kido nga ani naraka ti yangara papara “yangara arame.”​—Mika 4:1.

2. Gini asanahe si aida ani ini akaragapai kutini?

² Bambiko gupai nga bakere regbo ima susa wa gu garã nga 1914 atona, si ima du ni rengo nga ani naraka ti yangara papara “yangara arame.” Wa duhe nga digido zegino ima mbeda gbe, si naida ani ini akaragapai kuti gu nyanyakipa asanahe nga: Ginipai nika manga ti digido “yangara arame”? Ginipai Yekova aida ani mangihe wa ani asungudo agu apai re?

3. Ringbisihe kuti gu sangbanebi du rogo 1 ATesaroniko 5:1-3, gini takapandepa pai rikaaboro nika mangaha?

³ Oni gedi 1 ATesaroniko 5:1-3. Pauro afura tipa “rago Gbia” watadu ga Yekova uru. Rogo agi averesi re, rago Gbia nabipa gu regbo nika tona na pa zubo ‘Babera Du na Bakere Ome Ti Ni,’ du nga bariwara ngbii ziree pambori, na ki digi kuti Aramegido. (Yugo. 16:14, 16; 17:5) Mbata fu gu ‘regbo’ re tona, rikaaboro  nika takapandepa ‘zereda na ngbabase!’ Abazogo nga ga zegino yo ninaamangasunge amanga ti kura aregbo na ngbatunga gu fugo re ho i afura ni tipa mbakada pabakure dagba aringara. * Ono tie, gu takapandepa ‘zereda na ngbabase’ Ziazia Kekeapai afura tipaha nika du kia. Tipagine duhe ti ni wo? Ho i nika takapandepa zereda na ngbase ni, badungu aboro nika berã gupai nga agu abazogo du rogo zegino ima sa zegino si du ni gu ba ngba ba aboro angba rogoho wenengai. Ono ka pe guhe nga rengo, ‘gberãngbi nika tona ni ba sa’ fuo gure.​—Mt. 24:21.

4. (a) Gini apai ani ata inongo ho tipa takapandepa ‘zereda na ngbabase ya’? (b) Gini apai ani nainihe tipaha?

⁴ Ani ima ino bete apai tipa gu takapandepa ‘zereda na ngbabase’ nika manga. Ono tie, kura apai kinaho ani ainongo ho ya. Ani ainongo gupai nika sa abazogo i mangi gu takapandepai re te, na ani ainongo wai a i nika mangaha te. Na ani ainongo ho singia bangisa tingidapai du i nika mangaha watadu dungu atingidapai te. Singia ginigu nika manga, gupai ani nainihe nga: Si aidanga gu tingidapai re nangi rani ani berẽ gupai nga abazogo nga ga zegino yo ima rengba ka ye na zereda ku rogo zegino te. Kuba gure, si nika ida ani ini gupai nga gu takapandepai Ziazia Kekeapai agumbapaha furani du da. Si nika yugo gupai nga ‘rago Yekova’ nika tona fuo regbo ngbutuko!

5. Waigu rengbe 1 ATesaroniko 5:4-6 ka undo rani ani mbakadi tirani tipa ‘rago Yekova’?

⁵ Oni gedi 1 ATesaroniko 5:4-6. Ga Pauro rugute nape wai furani ani narengbe ka mbakadatirani tipa ‘rago Yekova.’ Si aidanga ‘ani raki wa agu yo’ te. Si naida ani naangera angera kindi. Ni kpiapai, si naida ani du na rubangirise ki zanga rimiso tirani ku rogo agu apai yo nga ga birĩ zogarago du rogo gi zegino re. Ka ani rimisi tirani ku rogoho, ani ima rengba kada ni “aboro zegino.” (Yo. 15:19) Ani ima ino gupai nga ga Mbori Kindo nga gu yangara he rengbe ka ye na zereda ku rogo zegino.

6. Ginipai ani aida ka undo aboro i mangihe, na tipagine?

⁶ Kupati gupai nga ani naangera angera kindi, si naida a ani undo kura aboro i wirikipai tipa gupai Ziazia Kekeapai agumbapaha kumbatayo nga si nika manga rogo zegino. Si naida ani tingidi gupai nga bara sa kindi bakere gberãngbi nika tona, regbo adunga berewe be aboro tipa i tona iriso Yekova te. Si du duhe ti ni ni nyanyakipa pai ka tungusapai awere! *

7. Ginipai Yekova aida ani naamangaha awere?

⁷ Rogo gi guru regbo nye koyo mbata fu “rago” Yekova tona re, ko naida gupai nga ani fu tirani kakaka tipa sunge tungusapai. Si naida ani “nimángi ga Gbia sunge zaza dedede.” (1 Kor. 15:58) Yesu aima pepa gupai kumbatayo si aida ani mangihe. Ho ko afura ni tipa agu apai dunduko nika manga rogo yangara arame, ko agbia gu kurapai kutini nga:  “Wene pangbanga adú adu ni tungusitungusi he fu arikaaboro mbata dunduko.” (Mk. 13:4, 8, 10; Mt. 24:14) Oni berẽnga kurii gipai re: Ai gu regbo oni andu gene tungusapai yo, oni nafubee kuti pa digiso gu sangbanebi re!

8. Waigu ani aino gupai nga sunge tungusapai nasona kina kumbatayo?

⁸ Ginipai rengbe ani ka pehe tipa gu sonakumbatayo nga ga sunge tungusapa Kindo? Rogo agarã ni basasa, aboro nagia gu wene pangbanga nga ga ga Mbori Kindo. Ni kpiapai, mo berẽnga kuriipa wai bange abatungusipa Kindo nasono rogo zegino dunduko ti gi yangara areme re. Rogo gu garã nangia 1914, bange abatungusipai adu nga 5,155 rogo aringara nga 43. Areme, bange abatungusipai nga amirioni muambe na beberehe rogo aringara 240! Wa vura duhe wo, gaani sunge ata nyasanga te. Si naida ani naatakapande pa ga Mbori Kindo kindi fu aboro ni gu yangara zogarago nika mbakada gu kpakaraapai nga ga aboro dunduko.​—Tam. 145:11-13.

9. Tipagine si aida ani naatungusapa gu pangbanga nga ga Kindo ti ni kindi?

⁹ Gaani sunge nga ga tungusapa Kindo nika nyasa sa kinaho Yekova nika gumba gupai ni nga si rengbe kuo. Bakio regbo wai nye koyo fu aboro tipa i ye ka ino Yekova Mbori gbiati wiriko nga Yesu Kristo? (Yo. 17:3) Ani ainongo ho te. Gupai ani nainihe nga, “agu yo i aima ringbisa yo sa nyenye unga” na momu kindi beyo ka gia wene pangbanga na ki sia ka iriso Yekova da kinaho bakere gberãngbi nika tona ni. (Amo. 13:48) Waigu rengbe ani ka undo agi aboro re mbata fu regbo susi?

10. Gini undo Yekova afuhe furani tipa ani yugu rengo fu aboro?

¹⁰ Yekova nafu agu ahe dunduko furani vurube gako riigbu ani aidaha tipa ka yugo rengo fu aboro. Ni kpiapai, ani nagbia rabahe rogo aposo yo dunduko ti regbo gu dunguratise nga ga bebere poso. Gi dunguratise re naundo rani ani ini gupai si aida ani gumbaha ho ani andu ni ti bambata regbo fuo aboro watadu ho ani amanga karagatise ni fuo aboro. Na si nayugo wai furani rengbe ani ka wirika Ziazia Kekeapai na aboro. Ga Yekova riigbu ima fu ahe furani a nga gu du dagba Gaani Aũsunge Nga ga Yugopai yo. Agi ahe re naundo rani ani . . .

• tona fugo na boro,

• sa boro nidu na nyemupai,

• fõngbadu aboro yo i du na nyemu ka wirika dungu apai,

• yugu rengo ho ani awirika Ziazia Kekeapai ni na aboro, na

•   ki pe gupai fu agu aboro du na nyemupai nga i ndu ku rogo gaani bangiriba nga ga Internet na ki ye ku rogo gaani aBambu Kindo.

Rengo ngaha nga, anga gupai gbua si aidaha nga kadu na agi aũsunge re berani te. Si naida ani naamangasunge na ni. * Ni kpiapai, ka mo mbu trakte watadu magazini fu gu boro du na nyemupai fuo fura mo na ni, ni nika geda kura apai ageda berewe da kuho mo nika gbia ni ni berewe. Gaani sunge du nga kaa mangasunge tungusapa kindo ni bakerehe wa rengbe omerani na ni rogo adiwi yo dunduko.

11. Tipagine i akusi Online Bible Study Lessons ti ni?

¹¹ Tipa ka ino gu kura kpiapai nayugo wai Yekova aundo aboro i wiriki rengo, oni bi Online Bible Study Lessons rogo jw.org^®. (Oni ngere tii BIBLE TEACHINGS > ONLINE LESSONS.) Tipagine i akusi agi awirikapai re ti ni? Rogo adiwi yo dunduko, dungu bawe akutu aboro rogo zegino dunduko naweteka Internet tipa agu awirikapai nga ga Ziazia Kekeapai. Agu awirikapai du rogo gaani bangiriba nga ga Internet ima rengba ka undo agu aboro re i tona wirikapai tipa gu rengo du rogo Fugo Mbori yo. Berewe a, bete agu aboro oni afura fuyo ima rengba kadu dindikodindiko ka ida oni wiriki Ziazia Kekeapai na yo. Kangia wo duhe, oni yugu gi papara gaani bangiriba nga ga Internet re fuyo watadu oni kedi gu kekeapai fuyo rengbe ka ndu na yo koyo du agu awirikapai re ni. *

12. Gini apai boro narengbe ka wirikaha rogo Online Bible Study Lessons?

¹² Gaani Online Bible Study Lessons na gu riiapai rogoho nga: “The Bible and Its Author,” “The Bible’s Main Characters,” na “The Bible’s Message of Hope.” Ho boro awirika agi apai re ni, ni nawirikapai tipa:

• Wai Ziazia Kekeapai narengbe ka undo boro

• Da nga Yekova, Yesu, gbiati amaraika

• Ndu gupai Mbori akusi aboro ti ni

• Ndu gupai du rungo gbiati gbegberẽ apai ti ni

Agu awirikapai re nasakapai a tipa wai Yekova nika . . .

• digiso rungo gbiati kpio,

• zingisa kpikpi aboro be kpio, na

• ki moi ga Mbori Kindo kuba gu gbegberẽ azogarago nga ga wiri aboro.

13. Ya mo online lessons ima diaba gu mbakadapai nga ga wisigo Ziazia Kekeapai na boro? Oni sakinga rogoyo.

¹³ Online lessons adianga ba gu mbakadapai nga ga wirika Ziazia Kekeapai na boro te. Yesu ima fu gu momu furani nga ga sa aboro ni abawiriki. Ani na gu maabangirise nga agu aboro du na nyemupai nika wisigo agu awirikapai awisigo nga ga online lessons, ki kpinyemu gupai i nika wirikaha, na kidu na nyemu ka wirika kura apai. Ka i mangihe wo, isoke i nika ida aida ka wirika Ziazia Kekeapai. Ti digido ai wirikapai, i pe gupai fu boro nga ni sanahe tipa boro wisigi Ziazia Kekeapai na ni. Rogo gaani bangiriba nga ga Internet, aboro bangeyo naima susa 230 nasanahe na aˈuru dũ rogo zegino dunduko tipa ka wirika Ziazia Kekeapai! Gu ngbatunga wirikapai re ima du na nyanyakipaha!

14. Ringbisihe kuti gu ga Yesu arugapai du ni kekehe rogo Matayo 28:19, 20, ginipai si aida ani mangi bakere asadatise ka mangaha, na tipagine?

¹⁴ Oni gedi Matayo 28:19, 20. Ho ani awisigo Ziazia Kekeapai ni na aboro, si naida ani mangi bakere asadatise ka ‘sa aboro ni abawiriki, ki nirugu yo i niká kuti agu apai dunduko Yesu aruguhe.’ Si naida ani undo aboro i rugutiyo na pa wai duhe ni nyanyakipa pai ka songoda Yekova na gako Kindo. Gere nayugo gupai nga asada ka fõngbadu aboro yo i sa rengo ni gayo ni maa yo  gupai ku rogo mangapai yo i awirikaha, ki kpara gayo raka fu Yekova, na ki zi bapatiza. Ka i mangihe wo, si nika sa gupai nga i bati ti ga Yekova uru.​—1 Pet. 3:21.

15. Ginipai adunga regbo berani tipaha ya, na tipagine?

¹⁵ A wa i nipehe kusayo, gu regbo nye koyo kuti digido gi sino raka re ima du ni guruhe gbe. Mbiko gi ndupai re, regbo berani kaa wirika Ziazia Kekeapai kindi na agu aboro adunga na gu sasa beyo nga ga da ni ga Kristo abawiriki ya te. (1 Kor. 9:26) Si naida ani mangi gaani sunge niˈipiˈipihe! Badungu aboro duho kindi si aida ani tungusi gu pangbanga nga ga Kindo fuyo mbata fu regbo susi.

16. Ringbisihe kuti Yugoti 18:2, 4, 5, 8, ginipai si aida ani dunduko mangihe? (Oni bi gu kekeapai du bandu waraga yo.)

¹⁶ Oni gedi Yugoti 18:2, 4, 5, 8. Agi averesi re nayugo gu kurapai berewe Yekova aidaha be airisiko. Ndikidi aKristano dunduko si aida kparakparapai duadu dagbayo na Babera Du na Bakere Ome Ti Ni. Si rengbe kadu nga mbata fu Bawiriki Ziazia Kekeapai wiriki rengo, ni aduadu rogo ziree pambori. Si ima rengba kadu nga ni anaandu andu tipa irisombori na kini mangi agu apai nga ga pambori. Watadu si ima rengba kadu nga ni aima fu marã fu gu ngbatunga riigbu re. Mbata fu gupai nga boro rẽ ni gu batungusipai ataziongo bapatiza ya, si naida ni ne agu apai dunduko du na ngbanya dagbaha na ziree pambori. Si naida ni ke waraga nga ni berewe nga boro sa rogo gu kanisa ni adu rogoho mbata te na ni berewe rogo ai kura riigbu nga gu du na ngbanya dagbaha na Babera Du na Bakere Ome Ti Ni te. *

17. Gini ngbatunga asunge marã si aida aKristano nehe, na tipagine?

¹⁷ Si naida ndikidi Kristano ini gupai nga si aidanga ngbanya du dagba gani sunge na Babera Du na Bakere Ome Ti Ni te. (2 Kor. 6:14-17) Ni kpiapai, si aidanga ni du ni borosunge rogo kanisa te. Kurigure, si aidanga gu Kristano namangasunge rogo gu kura abasunge mangisunge rogo gu ba nasonosa ziree pambori te. Ka si du nga ni namanga gani sunge marã ni ti ni, si aidanga ni idi gu sunge Babera Du na Bakere Ome Ti Ni nafuhe fu ni te. Tipagine du ani ti ni na nyanyaki bipai tipa gipai re? Bambiko gupai nga ani aidanga ka fubee sa gu sunge gbiati ingaapai nga ga agu ariigbu nga ga ziree pambori du ni bibirikoho bangiri Mbori te.​—Yes. 52:11. *

18. Waigu kura wirina sa akakuti agu abangua arengo nga ga Baibiri nibipa sunge marã?

 ¹⁸ Dungu agarã kusayo, gu kura kumba sa ni bangerekurii meka arago asana bakumba naamanga gako sunge marã ni tiko tipa ko mangi tooni sunge kpengua kanisa yo rogo gu gbata gu wirina re aaraka rogoho. Gu bangerekurii meka arago re aima ino gupai nga gu wirina re aima digo niya ka ko mangingo sunge akanisa te. Ono bara gere, ko aima du na bakere nyemu ka gbia boro tipa gu sunge re. Ono wa si avura duwo, gu wirina re akakuti agu abangua arengo nga ga Baibiri na ki ká gu sunge re. Rogo gu poso nangbefuo gure, waraga apangbanga rogo gu rago re akusi sura kura basekengua ko nibanga kuruse ti gu kanisa re. Ka wirinarani aakanga kuti abangua arengo nga ga Baibiri ya na ki idi gu sunge re, sura ko du kaa du rogo gu waraga apangbanga re. Oni berẽnga pa wai ka gupai re agberesi rimoko dagba akurako aKristano! Oni berẽnga pa wai a ka Yekova adu.

19-20. (a) Gini apai ani nawirikihe? (b) Gini kura apai si aida ani wirikihe?

¹⁹ Ringbisihe kuti gu sangbanebi nga ga Ziazia Kekeapai, gu bakerepai nika manga kumbatayo barambeda rogo zegino nga, abazogo nga ga zegino nika takapandepa ‘zereda na ngbabase.’ Mbiko agu apai Yekova nayuguhe furani, ani ima ino gupai nga abazogo nga ga zegino yo ayengo na ndikidi nyenye zereda te. Ginipai si aida ani mangihe mbata fu gupai re mangi gbiati gu gbarasahe nika ngbe tifuoho nibasa? Yekova naida gupai nga ani fu tirani sa sunge tungusa gu pangbanga nga ga Kindo na kini asadi ka sa badungu aboro ni abawiriki. Ti kina gu bangisa regbo re, si naida ani kpara tirani kusayo ti ziree apambori dunduko. Gipai re nayugo gupai a nga, ani kuru kusayo rogo gu Babera Du na Bakere Ome Ti Ni na ki ne manga agu asunge du na ngbanya dagbaha na ni.

²⁰ Gu kura apai kinaho berewe nika manga ti regbo “yangara areme.” Gu kura apai kinaho a Yekova aida ani mangihe. Gini apai du ngaha, na waigu rengbe ani ka mbakada tirani tipa agu apai dunduko nika ye kumbatayo barambeda? Ani nika bihe rogo gu kekeapai ngbefuo gere.