CACEKIWEN LALAKAW 44
Aniniho Palahad to Soˈlinay Kalawidan
O soˈlinay widang marariday paihkal to olah.—TANENG 17:17.
RADIW 53 Malacecay a Dademak
KALIMLAAN NO LALAKAW *
Misaaliay kita to sadama no ngaˈayay a widang i ‘taˈangayay a padiing’ (Nengnengen ko saka 2 fatac) *
1-2. Pakayni 1 Pitiro 4:7, 8, sasamaan ko hademak ita ngaˈ maremo ko pasangaray a pakayraan hani?
TAHINIAYTO kita i kahererekan no ‘salikoray romiˈad’, mihaenay o tatahalifa to masakenaay a pasangaray alatek. (2 Timoti 3:1) Tinakoen i kakaetipan a Afrika, maharek ko pisingkiw sasifod sanay ko pakayraan, adihayay pala mifekaday ko mariˈangay a demak. O kitiraan no roma salikaka pakidemay ko sasifod, enemay folad caka ngaˈay a masadak. Samanay cangra milakowit to pasangaray hani? Milaliway ko roma tamdaw tayra i rihadayay a kilac, itini lomaˈ no salikaka miliyas to pades. Cecay salikaka sanay: “Malifa ko hatiniay katalawan a pakayraan, kao ngaˈayay iraay ko salikaka masasipakalalok.”
2 Ano mifekad ko ‘taˈangayay padiing’ i, ira i tatihi ko maolahay a widang kitaanan, oha rarihaday ko falocoˈ ita. (Paˈarawan 7:14) Mahaenay i, nohatiniho kita palahad to tangongolay kalawidang to salikaka. (ˈOsien ko 1 Pitiro 4:7, 8.) Nolitengan, pakayni sadama no widang ci Yirimiyaan, malakowitay ningra ko pasangaray a toki i ˈayaw no malaˈafo ko Yirusalim. *Mikitini malifetay ni Yirimiya wa mananam ita ko maanan hani?
O NALIFETAN NI YIRIMIYA
3. (1) O maanan a demak ko sapisawad ni Yirimiya a micawmaˈ to tamdaw hani? (2) Paihkalan ni Yirimiya ci Paruk to maanan hani? Samaanay ko minaroˈan hani?
3 Iraay ko 40 miheca, i taliyokay ni Yirimiya adihayay ko cowa ka madimadi to Kawas a tamdaw, mahawpay ko nai Anatot a finawlan, ato salawina alatek. (Yirimiya 11:21; 12:6) Kawraan, cowa ka sawad sa ci Yirimiya a micawmaˈ to tamdaw, paihkalan ningra ko nafalocoˈan a harateng i madimadiay a Parukan, matiliday koniya sowal, ngaˈayay maˈosi ita anini. (Yirimiya 8:21; 9:1; 20:14-18; 45:1) Haratengen hena, mitilidan ni Paruk ko masakenaay a malifetay ni Yirimiya, toniya tatokian, maedeng matongalay ko kalawidang nangra, matongalay a makakangodo cangra.—Yirimiya 20:1, 2; 26:7-11.
4. (1) Palimoˈotan ni Yihofa ci Yirimiya midemak to maanan hani? (2) Oniya tayal hano matongal ko kalawidang ni Yirimiya aci Paruk hani?
4 Adihayay a mihecaan, timoloay ci Yirimiya pasowal to Israil tamdaw to mamalaˈafo ko Yirusalim. (Yirimiya 25:3) Pakayni sapakalalokaw to finawlan a pasasiyor, palimoˈotan ni Yihofa ci Yirimiya mitilid toniya sapirikec a lihaf i maloloday cudad. (Yirimiya 36:1-4) Ci Yirimiya aci Paruk malacafay matayal, adihay ko mapalakay a toki nangra milaheci to patorodan no Kawas cangranan a demak, o kasasowal nangra malacafay matayal maedeng patanektekay to pakasoˈlinay falocoˈ nangra.
5. Hano o soˈlinay a widang ni Yirimiya ci Paruk hani?
5 Maharek milaheci koniya maloloday cudad, samanen macongeday ci Yirimiya coka ngaˈay tayra i fangcalay sefi, mansa paiken hananay ci Paruk tayra miˈosi toya cudad. (Yirimiya 36:5, 6) Misiˈayaway ci Paruk to katalawan tayra i potal no fangcalay sefi, miˈosi to lalakaw no cudad patengil to ˈalomanay, patadoay ci Yirimiya cingranan a maliko. (Yirimiya 36:8-10) Matengil no ˈaˈideman no Yutaya koniya demak i, papiˈosiay ci Parukan patengil cangranan to lihaf noniya cudad. (Yirimiya 36:14,15) Maharek cangra mitengil i, misaˈosiay patengil to Hongti ci Yihoyakiman, pasowalanho nangra ci Paruk: “Kiso aci Yirimiya ka pilimek, hamaan fanaˈen ko tamdaw to icowaay kamo a milimek.”—Yirimiya 36:16-19.
6. Misiˈayaw ci Yirimiya aci Paruk to pisafelit i, samaanay ko demak nangra hani?
6 Matengil ni Yihoyakim ko lalakaw no cudad tada maketeray, todohan ningra koya cudad, palimoˈot to tamdaw mirepel ci Yirimiyaan aci Parukan. Cowa ka ciˈangi ci Yirimiya, pafeliayho to roma cudad papiliyawen mitilid ci Parukan to lihaf ni Yihofa, ‘o nano sowal ni Yirimiya mitilidan ni Paruk i fafekang, oya mitodohan no Hongti no Yutaya ci Yihoyakim a cudad.’—Yirimiya 36:26-28, 32.
7. Malacafay ci Yirimiya aci Paruk matayal pairaay to maanan ngaˈayay minaroˈan?
7 O malacafayay tahapades a tamdaw patirengay to ngaˈayay a kalawidang, mahaenay ci Yirimiya aci Paruk. Ikor no todohen ni Yihoyakim koya maloloday cudad i, malacafayayho cangra a mitilid to faelohay a cudad, madeng matongalay ko kasasifanaˈ nangra, malo ngaˈayay a widang. Mikitini cangraanan wa mananam ita ko maanan hani?
FOHATEN KO FALOCOˈ I WIDANG
8. O maanan a lalangian ko sakaeca ka ngaˈay ita a malawidang to tao hani? Hano aka a misawad hani?
8 Alatek na madokaˈay kita cato ka timolo mifohat to falocoˈ i tamdaw. (Taneng 18:19, 24) Alatek awaay ko toki ato ˈicel ako palahad to ngaˈayay kalawidang to tao, sanay ko harateng. Kawra aka a misawad, ano sapilifokaw kita to sadama no salikaka a misiˈayaw to sapalifet i, aniniho minanam a pakasoˈlin to salikaka, fanaˈen cangra to harateng ato nafalocoˈan iso, mihaen ngaˈ malo ngaˈayay a widang nangra kita.—1 Pitiro 1:22.
9. (1) Hano mafanaˈ kita to pakasoˈlinay ci Yis to widang ningra hani? (2) Mifohat to falocoˈ a masasowal, hano mamatongal ko kalawidang hani? Tinakoen.
9 Pakasoˈlinay ci Yis to widang ningra, awaay ko mahimeday a sowal. (Yohani 15:15) Todongen ita ci Yis, pasowalen ko widang to kahemekan, cariraw anca kasomadan a demak. Ano pasowal ko tao to nafalocoˈan a sowal i, songilaˈen ita a mitengil, mihaen o mamahapinang ita o adihayay ko malecaday a harateng, nafalocoˈan ato patosokan ita to tao. Nengnengen ita ko tinakoan ni Sinti, 29 ko mihecaan ningra, malawidangay to 67 ko mihecaan a misakafahay ci Marilois. Pisepatan malacafayay cangra a mitosil, masasowalay to masakenakenaay a lalangian. Sanay ci Sinti: “Maolahay kako masasowal to widang, mihaen wa matongal ko kacipinang cangranan.” Fohaten ko falocoˈ a masasowal mamatongal ko kalawidang ita ato tao, ano malecad kita ci Sintian mihadak to nafalocoˈan pasowal to widang, halo misongilaˈ a mitengil to harateng nangra, wa tanektek ko kalalaˈed ita ato widang.—Taneng 27:9 ato sapatongal pihongyak.
MALACAFAY MITOSIL
O ngaˈayay a widang wa malacafay a mitosil. (Nengnengen ko saka 10 fatac)
10. Pakayni Taneng 27:17, malacafay to salikaka a matayal iraay ko maanan a epoc hani?
10 Malecad o tinakoan ni Yirimiya aci Parukan, malacafay to salikaka a matayal, misinanot to kangaˈayan nangra, minanam cangranan, mamatongal ko ngaˈayay kalalaˈed cangranan. (ˈOsien ko Taneng 27:17.) Haratengen hena, ano maˈaraw iso ko cafay mitosil timolo a miˈading to soˈlinay kimad, anca matomes ko pakasoˈlinay falocoˈ a pasifanaˈ to tao mafanaˈ ci Yihofaan ato araaw Ningra, wa samaan ko harateng iso hani? Maedeng matongal ko kaolah iso cingranan.
11-12. Malacafay kita to salikaka i kasakopang mitosil, hano papangata to kalalaˈed hani? Tinakoen mitadtad.
11 Dotoc a tosa nalifetan papahapinang kitaanan, malacafay mitosil pangataay to kalalaˈed ita ato salikaka. Iraay ko cecay salikaka ci Atelin, mitahidangan ningra ko widang ci Kantis malacafay tayra i cowa kararid lisoˈen a kilac mitosil. Sanay ci Atelin: “Mitokelay kami matongal ko fanekfek, ato olah a mitosil, mansa ciharatengay mikitini piliwko a mitosil milifok to sapakalalok.” Samanayto ko minaroˈan hani? Sanay ci Atelin: “Mahererek misaromiˈad a mitosil i, masasowalay kami to samanay ko harateng toya romiˈad, iraay ko maanan pakalalokay to niyah a nalifetan, ato samanay mahapinang to mikayatay ci Yihofa tamiyanan. Milomal toniya demak tada lipahakay kami, matongalay ko kasasifanaˈ niyam.”
12 Tatosaay cowaho ciramod a fafahiyan salikaka i Frans ci Rayla aci Marianna, malacafayay cangra tayra i Tenokay Afrika a mitosil, itini macekcekay ko tamdaw a niyaroˈ i Panci to lima lipay. Sanay ci Rayla: “Soˈlin malitemohay ako aci Marianna ko pasangaray, kawra mihadakay kami to nafalocoˈan a masasowal, makakaolah, mansa matongalay ko tanektek no kalawidang niyam. Kahenayay mananam ci Marianna, maolahay cingra to itiraay a tamdaw, fanekfekay a mitosil, matongalayto ko kasemer ako cingraanan!” Soˈlinay i, cowa ko tatayra kita to roma kitakit ngaˈ ira ko hatiniay a kafanaˈ. Ano malacafay kita to salikaka i kasakopang mitosil, iraay ko toki ita matongal ko kafanaˈ cangraanan, palahad to tangongolay a kalawidang.
O NGAˈAYAY KO NENGNENGEN, MAKAHI A MISODOD
13. Malacafay to widang matayal, wa tahasiˈayaw to maanan a pasangaray hani?
13 Malacafay to widang matayal, latekay cowa ko ngaˈayay aca ko maˈaraway, maˈarawayho ko dangoc ningra. Ano mahaen o sasamaan ko hademak ita hani? Nengnengen ita ko taˈarawan ni Yirimiya. Hano o ngaˈayay no tao ko minengnengan ningra, misodod to dangoc no tao hani?
14. Mahapinangay ni Yirimiya to samaanay ci Yihofa micada to tamdaw hani? Oniya demak samanay padama cingraanan hani?
14 Cowa ko Yirimiya aca a cudad, mitilidayho ci Yirimiya to saka 1 Hongti ato saka 2 Hongti alatek. Oniya tayal maedeng mahapinangay ningra to siniˈadaay ci Yihofa to cowa kalefot a tamdaw. Tinakoen, soˈlin adihayay ko midemakan ni Ahap a mariˈangay a demak, kawra pasasiyoray cingra, cowa ka paꞋarawen ni Yihofa cingra to kalaꞋafo no polong a finacadan. (1 Hongti 21:27-29) Roma i, cowa pidofdof ci Manasi ci Yihofaan, midemakay to ikakaay ci Ahapan ko tatiih a demak, kawra pakayni ka soˈlin ningra a pasasiyor, misododan ni Yihofa cingra. (2 Hongti 21:16, 17; 2 Rayray 33:10-13) Mihaenay, ano micada ci Yirimiya to widang i, malecaday ci Yihofaan a mihadidi, makahi a misodod to tamdaw.—ˈOlic 103:8, 9.
15. Samanan ni Yirimiya mihadidiay a padama ci Paruk hani?
15 Iraay ko cecay liyad, cowa paisalakaten ni Paruk ko tayal no Kawas, samanan ni Yirimiya padama cingra hani? Awaayto ko kapo ni Paruk cowa kahaen ko piharateng ni Yirimiya, palihafan ningra koniya widang to sidaˈitay ihkalay a limoˈot no Kawas. (Yirimiya 45:1-5) Mikitini toniya tinakoan wa mananam ita ko maanan hani?
O ngaˈayay a widang wa masasodod (Nengnengen ko saka 16 fatac)
16. Pakayni Taneng 17:9, sasamaan ko demak ngaˈ matafo ko kalawidang hani?
16 Soˈlin, o salikaka malecaday kitaanan cowa ko malefotay. Malawidang kita cangranan i, mamisaˈicel kita mitafo to kalawidang. Ano mararaw ko widang, ngaˈayay mihadak kita to sowal no Kawas sidaˈit a ihkal palimoˈot cingranan. (ˈOlic 141:5) Ano midokaˈ ko widang to falocoˈ ita, sododen ita cingra, akato liyawen pasowal koniya demak. (ˈOsien ko Taneng 17:9.) Itini pasangaray siˈayawen a lintad, o ngaˈayay no salikaka ko nengnengen, mihepol to dangoc nangra, mihaen o tatanektek ko kalawidang. Nohatiniho mihaen ko demak kita, samanen itini taˈangayay padiing, tada misaaliay kita to sapadama no widang.
PAIRAEN KO MADIMADIAY A OLAH I TAMDAW
17. Hano o soˈlinay a widang ci Yirimiya hani?
17 O soˈlinay a widang ci Yirimiya, ano tahalifa ko tao to pasangaray i, misaˈicelay cingra padama to tao. Hano mafanaˈ kita hani? Na mifahkolan no tamdaw ci Yirimiya i cikaditay a tefon, pasadakan no sikawdan no lomaˈ no hongti ci Ipitmilik cingra. Ikorto, calemcemay ci Ipitmilik to papatayen no ˈaˈideman ko niyah. Mafanaˈ ci Yirimiya toniya demak, cowa pakihater saan, wa ngaˈay ci Ipitmilik misaysay toniya demak, cowa ka saan ko harateng ni Yirimiya. Soˈlin mapalitay ci Yirimiya itiya, kamayanay misaˈicel palihaf ci Ipitmilikan to sakiˈok ni Yihofa.—Yirimiya 38:7-13; 39:15-18.
O ngaˈayay a widang wa masasipadama (Nengnengen ko saka 18 fatac)
18. Pakayni Taneng 17:17, ano misiˈayaway ko salikaka to pasangaray i, sasamaan ko hademak ita hani?
18 Anini, misiˈayaway ko salikaka to masakenaay a pasangaray. O roma salikaka tahapadesay a misemsem, wa ngaˈay cadaen ita cangra tayni i lomaˈ, ngaˈayay padama to sakaˈorip nangra, ngaˈayayho micangacang ci Yihofaan padama to salikaka. Latekay, roma salikaka cowa ka rihaday ko falocoˈ, mafokilaay kita to o maanan ko hasowal, o maanan ko hademak, kawra adihayay ko pakayraan. Tinakoen, palaken ita ko toki kalacafay cangranan, misongilaˈ mitengil to sowal nangra, patado cangranan a miharateng, paladaˈen to kaolahan ita a sinael. (Isaya 50:4) Ano misaali ko widang to papakalaloken i, itini i tihi nangra a kalacafay kita, o sakakaay koni.—ˈOsien ko Taneng 17:17.
19. Nohatini palahad kita to soˈlinay kalawidang, wa samaan padama to noikoran hani?
19 Nohatiniho palahad kita to soˈlinay kalawidang, patanektek to kalalaˈed i salikaka, samanen ano ikor, wa miyakayak ko ˈada ita to mangah, mipalak to kakelec no mita. Kawra cowa ko mamalaˈosi cangra, samanen cowa ko papakaconged cangra to olah ita to salikaka, cowa ko papakapalak to kalawidang no mita. Cowa ko madadama aca ita, milakowit to hererekan noniya lekakawa, wa tahadaˈoc a mala ngaˈayay a widang!
RADIW 107 Katayni i Lotok ni Yihofa
^ 5段 Pakayni i kangatato no hererekan, papatongalen ita ko kalawidang to salikaka. Oniya lalakaw wa milengo to nalifetan ni Yirimiya, ato palahad to soˈlinay kalawidang wa ira ko maanan a sapadama miremo to sapalifet noikor.
^ 2段 O lalakaw no Yirimiya cowa pitoor to kadadoedo no mifekaday a demak a tiliden.
^ 57段 TATODONG NO COKA: Oniya coka o mamifekad i ‘taˈangayay padiing’ a demak. O papina salikaka milimekay i tingloh, iraay ko salikaka pacafayay milakowit toya pasangaray a tatokian. Dotoc toloay a coka milengoan i ˈAyaw no ‘taˈangayay padiing’, oya i cokaay a salikaka maharekayto palahad to tangongolay kalawidang.
