1, 2. Kuntï 1 Pedro 4:7, 8 texton siski ukarjamajja, ¿kunas jan walinakan uñjaskañäni ukhajj yanaptʼistani?

QHEP ‘qhepa urunak’ jakʼachasinkipanjja, inas sinti jan walinakan uñjaschiñäni (2 Tim. 3:1). Amuytʼañataki, África cheqankir mä markan eleccionajj tukuyjjäna uka qhepatjja, jan walinakaw utjäna, jaqenakas wal nuwarasipjjäna. Ukhamätapatjja, jilat kullakanakajj sojjta phajjsinak jilaw jan walinakan uñjasipjjäna. ¿Kunas ukapachajj jupanakar yanaptʼäna? Yaqhepajja, jan walinakajj jukʼak utjkäna uka cheqan jakasiri jilat kullakanakan utanakaparuw sarjjapjjäna. Mä jilatajj akham sänwa: “Ukapachajj suma amigonakanïtaj laykojj wal kusisiyäta. Maynit maynikamaw chʼamañchtʼasipjjayäta” sasa.

² ‘Wali tʼaqesiñ’ tiempojj qalltkani ukapachajja, munasiri amigonakanïñajj wali kusiskañäniwa (Apoc. 7:14). Ukatwa jichhürunakan suma amigonakanïñatak chʼamachasiñajj wali wakiskiri (1 Pedro 4:7, 8 liytʼañataki). Ukatakejj Jeremías chachatwa yateqsna. Jerusalenajj tʼunjaskäna uka nayrajja, amigonakapaw jan jiwat uñjasiñapatak yanaptʼapjjäna. * ¿Kunsa Jeremiasat yateqsna?

3. 1) ¿Kunatsa Jeremiasajj mayninakat yaqhaqtaspäna? 2) ¿Kunsa Jeremiasajj Baruc secretariopar cuenttʼäna, ukat kunjamsa uka qhepat apasipjjäna?

³ Jeremiasajj niya 40 maranakaw jupar uñisir jaqenak taypin jakäna. Uka jaqenakat yaqhepajj vecinonakapänwa, yaqhepasti inas jupajj naskäna uka Anatot markankir mä qhawqha  familiaranakapächïna (Jer. 11:21; 12:6). Ukhamäkchïnsa janiw yaqhaqtkänti. Jan ukasti, kunjamsa jikjjatasïna uk Baruc sat secretarioparuw cuenttʼäna. Taqe ukanakajj Biblian qellqatawa, ukatwa jiwasajj uka toqet yatiraktanjja (Jer. 8:21; 9:1; 20:14-18; 45:1). Kunjamanakantï Jeremiasajj uñjaskäna uk Baruc chachajj qellqkäna ukapachanjja, jupanakajj purapat jukʼamp respetasiña munasiñwa yateqapjjäna (Jer. 20:1, 2; 26:7-11).

4. 1) ¿Kun lurañapsa Jehová Diosajj Jeremiasar mayïna? 2) Diosajj maykäna uk phoqañajja, ¿kunatakis Jeremiasampiru Baruc chachampir yanaptʼäna?

⁴ Jeremiasajja, jan ajjsarasaw israelitanakarojj kunatï Jerusalén markampi pasañapäkäna uk walja maranak yatiyäna (Jer. 25:3). Jaqenakan arrepentisipjjañapataki mayamp yanaptʼañatakejja, kunanaktï israelitanakar siskäna taqe ukanak mä rollon qellqañapatakiw Jehová Diosajj Jeremiasar mayïna (Jer. 36:1-4). Jeremiasampi Baruc chachampejja, walja phajjsinakaw kun lurañtï Diosajj jupanakar maykäna uk phoqañatakejj junto trabajipjjäna. Uka tiemponjja, Jehová Diosar jukʼamp confiyañatakiw purapat chʼamañchtʼasipjjpachäna.

5. Baruc chachajj Jeremiasan suma amigopänwa sasajj ¿kunatsa sissna?

⁵ Rollo qellqañ tukuyjjapjjäna ukhajja, Jeremiasajj Baruc amigoparuw kunatï ukan qellqatäkäna uk yatiyañapatak mayïna (Jer. 36:5, 6). Yatiyasajj jan walinakanwa Baruc chachajj uñjasispäna, ukampis jan ajjsarasaw yatiyäna. Templon patiopan uka rollo liytʼkäna ukhajja, Jeremiasajj wal kusispachäna (Jer. 36:8-10). Judá markan jilïri jaqenakapajja (príncipes), Baruc chachan ukham luratap yatisajj ‘liytʼarapipjjeta’ sasaw sapjjäna (Jer. 36:14, 15). Jilïr jaqenakajja, Jeremiasan arunakap Joacim (Jehoiaquim) reyir yatiyañwa amtapjjäna. Ukampis Baruc chacharojj akham sapjjänwa: “Jumasa ukhamaraki Jeremiasasa  imantasjjapjjam janiraki khitimpisa uñjayasipjjamti, janiraki khitis yatkpati jumanakan kawkhankatamsa” sasa (Jer. 36:16-19). Ukajj mä suma ewjjtʼänwa.

6. Reyejj coleraskäna ukhajja, ¿kunsa Jeremiasampi Baruc chachampejj lurapjjäna?

⁶ Kuntï Jeremiasajj qellqkäna uk istʼasinjja Joacim reyejj wal colerasïna, ukatwa rollo phichantäna. Ukatjja, ‘Jeremías profetampiru secretariopampir katuntanipjjam’ sasaw säna. Ukampis Jeremiasajj janiw ajjsarayaskänti. Yaqha rollo aptasajj Baruc chacharuw churäna, jupampiw Diosan arunakap qellqayäna. Baruc chachasti ‘kawkïri rolltejj Joacim reyejj nakhantaykäna’ uk wasitampiw qellqäna (Jer. 36:26-28, 32).

7. Jeremiasampi Baruc chachampejja, ¿kunjamsa junto trabajisajj apasipjjpachäna?

⁷ Mä jan waliru junto saykatirinakajja, jukʼamp sumwa apasiñ yatipjje. Ukhamajj Jeremiasampi Baruc chachampejj Joacim reyin nakhantayat rollo wasitampi qellqapkäna ukhajja, jukʼamp sumwa panipajj apasipjjpachäna. ¿Kunsa uka pä chachanakat yateqsna?

8. ¿Kunatsa cheqpach amigonakanïñajj chʼamakïspa, ukat kunatsa jan aynachtʼañasäki?

⁸ Inas maynejj jan walinak lurawaychistu, ukatwa kunjamäsktansa uk yaqhanakar cuenttʼañajj chʼamakïspa (Prov. 18:19, 24). Jan ukajja, jan tiemponjama jan chʼamanjamaw amuyassna, ukatwa suma amigonakanïñajj chʼamarakïspa. Ukampis janiw aynachtʼañasäkiti. Jan walinakajj utjkani ukapachan jilat kullakanakamp yanaptʼayasiñ munstan ukhajja, jichhaw kunjamäsktansa, kunsa amuytan uk jupanakar cuenttʼañ yateqañasa. Ukaw cheqpach amigonakanïñatak yanaptʼistani (1 Ped. 1:22).

9. 1) ¿Kunjamsa Jesusajj amigonakapar confiyatap uñachtʼayäna? 2) Jan kun imtʼasa parlañajja, ¿kunjamsa yaqhanakampi sum apasiñatak yanaptʼistaspa? Uk mä experienciamp qhanañchtʼam.

⁹ Jesusajj jan kun imtʼasaw amigonakapamp parltʼasirïna, ukhamatwa jupanakar confiyatap uñachtʼayäna (Juan 15:15). Jiwasajj ukhamarakiw kunatï kusisiykistu, kunatï llakisiykistu, kunatï jan waltʼaykistu ukanak yaqhanakar cuenttʼañasa, ukhamatwa Jesusat yateqasitas uñachtʼayañäni. Maysa toqetjja, yaqhanakajj jiwasaru cuenttʼapjjestani ukhajj sumwa istʼañasa, ukhamatwa jiwasjam amuyunïpjjatapsa, amtanakanïpjjatapsa, jiwasjam jikjjatasipjjatapsa yatiñäni. Cindy sat kullakat parltʼañäni, jupajj 29 maraniwa. Kullakajj 67 marani Marie-Louise sat kullakampiw suma amigaptapjjäna. Jupanakajj sapa jueves alwaw predikir sarapjje, ukan taqe kunatwa parltʼasipjje. Cindy kullakajj akham  siwa: “Amigonakajampi wali wakiskir toqenakat parltʼasiñajj wal kusisiyitu. Ukaw jupanakar sum uñtʼañatakisa kunjamäsipkisa uk amuyañatakis yanaptʼitu” sasa. Jan kun imtʼas parltʼasirinakajja, jukʼamp sumwa apasipjje. Jiwasatï Cindy kullakat yateqasisin yaqhanakampi jan kun imtʼasa parltʼasiñatak chʼamachasiñäni ukhajja, jukʼamp sumaw jupanakamp apasiñäni (Prov. 27:9, NM).

10. Proverbios 27:17 textorjamajja, ¿kunsa jilat kullakanakasamp yatiyasajj jikjjatsna?

¹⁰ Jiwasatï Diosan arunakap jilat kullakanakasamp yatiyañäni, kunja suma chuymanïpjjesa uks amuyarakiñäni ukhajja, jupanakat yateqasiñäniwa, jukʼamp sumaw apasirakiñäni. Jeremiasampiru Baruc chachampirojj ukanak lurañaw sum apasipjjañapatak yanaptʼäna (Proverbios 27:17 liytʼañataki). Sañäni, mä jilataru jan ukajj mä kullakar jan ajjsaras yatiyir uñjtan, jan ukajj Diosatsa promesanakapatsa jan pächasis parlir uñjtan ukhajja, jukʼampiw jupar munassna.

11, 12. ¿Kunjamsa jilat kullakanakampi junto predicañajj mayachtʼistu? Uk mä experienciamp qhanañchtʼam.

¹¹ Jilat kullakanakamp junto predicañajj kunjamsa cristianonakar mayachtʼistu uk uñjañäni. 23 marani Adeline sat kullakajja, Candice sat amigaparuw kawkjantï awisak yatiyaski uka cheqar junto sarañatak mayïna. Adeline kullakajj akham siwa: “Jukʼamp kusisitaw yatiyañ munapjjayäta. Jupasa nayasa Jehová Diosar jukʼamp serviskakiñatak chʼamañchtʼatäñwa munapjjayäta” sasa. Jupanakarojj ¿kunjamsa junto predicañajj yanaptʼäna? Adeline kullakajj akham siwa: “Kunjamäsipkayätsa, jaqenakamp parlañajj kunjamsa chʼamañchtʼapjjetäna, Jehová Diosas kunjamsa yanaptʼapjjetäna ukanakatwa jaypʼu toqerojj parltʼasipjjerïta. Ukanakat parlañajj wal gustapjjetäna, ukaw jukʼamp uñtʼasiñatak yanaptʼapjjetäna” sasa.

¹² Laïla kullakampi Marianne kullakampejj Francia markatäpjjewa, uka soltera kullakanakajj phesqa semanaw Bangui (República Centroafricana) markar predikir sarapjjäna.  Laïla kullakajj akham siwa: “Marianne kullakampejj jan walinakanwa uñjasipjjayäta, ukampis sum parltʼasiña munasiñampi uñjasiñaw jukʼamp sum apasiñatak yanaptʼapjjetäna. Marianne kullakajj kawkjans yatiñoqtakiriwa, jaqenakarus wali munasiñampiw uñjiri, ukaw jupar jukʼamp respetañatak yanaptʼitäna” sasa. Amigonakanïñatakejja, janiw yaqha markar sarañasapunejj wakiskiti. Territoriosan mä jilatampi jan ukajj mä kullakampi predicañajj jupanakar jukʼampi uñtʼañataki, jukʼamp suma amigöñatakiw yanaptʼistaspa.

13. ¿Jilat kullakanakampi predicasajj kunas awisajj pasaspa?

¹³ Awisajja, jilat kullakanakampi predicasajj janiw suma luratanakapak uñjktanti, pantjasitanakapsa uñjaraktanwa. Ukhamanakanjja, ¿kunas jupanakan amigopäskakiñatak yanaptʼistaspa? Jeremiasat parltʼaskakiñäni. ¿Kunas juparojj mayninakar perdonañatakisa suma luratanakap uñjañatakis yanaptʼäna?

14. ¿Kunsa Jeremiasajj Jehová Diosat yateqäna, ukat kunjamsa ukajj yanaptʼäna?

¹⁴ Sutip apki uk librjja Jeremías profetaw qellqäna, 1 Reyes, 2 Reyes libronaksa juparakiw qellqpachäna. Uka libronak qellqasaw qhawqsa Jehová Diosajj pantjasiri jaqenakat khuyaptʼayasi uk amuyäna. Sañäni, Acab reyejj jan wali luratanakapat arrepentisïna ukhajja, Jehová Diosajj jupar akham sänwa: ‘Juman jakañamkamajja janiw familiamjjarojj jan waltʼañ apayankäti’ sasa, Jeremiasajj uk yatïnwa (1 Rey. 21:27-29). Manasés chachajj Acab reyit sipan jukʼamp jan walinaksa lurkchïnjja, arrepentisïna ukhajj Jehová Diosajj perdonänwa, uksa Jeremiasajj yatirakïnwa (2 Rey. 21:16, 17; 2 Crón. 33:10-13). Ukanakaw Jeremiasarojj Jehová Diosat yateqasiñatak yanaptʼäna, ukhamatwa amigonakaparojj pacienciampi khuyapayasiñampi uñjäna (Sal. 103:8, 9).

15. Baruc chachajj lurañanakap jan sum phoqjjäna ukhajja, ¿kunjamsa Jeremiasajj Jehová Diosjam paciencianïtap uñachtʼayäna?

¹⁵ Jeremiasan Baruc amigopajja, mä tiempojj lurañanakap janiw sum phoqjjänti. Ukampis ¿kunsa Jeremiasajj luräna? ‘Janiw cambiañ puedkaniti’ sañat sipansa yanaptʼänwa. ¿Kunjamsa yanaptʼäna? Kuntï Jehová Diosajj munasiñampi qhana arunakampi Baruc chachat siskäna uk yatiyasaw Jeremiasajj Baruc chachar yanaptʼäna (Jer. 45:1-5). ¿Kunsa ukat yateqsna?

16. Proverbios 17:9 textorjamajja, ¿kunsa maynimpi jukʼamp suma amigöñatakejj lurañasa?

¹⁶ Cheqansa, janiw jilat kullakanakasan perfectöpjjañap suyañasäkiti. Ukatwa amigonakasamp sum apasiskakiñatak chʼamachasiñasa. Mä amigosatï pantjasini ukhajja, inas jupamp qhan parlañasajj wakischini, ukampis munasiñampiw parlañasa, Bibliampiw ewjjtʼañasaraki (Sal. 141:5). Jan walinak luristani ukhasti perdonañasawa. Perdonjjasajja, janiw mayampsa uka toqet parlañasäjjeti (Proverbios 17:9 liytʼañataki). Aka qhepa urunakanjja, jilat kullakanakasan suma luratanakap uñjañajj wali wakiskiriwa, janiw pantjasitanakapak uñchʼukiñasäkiti. Ukhamatwa, jupanakampejj jukʼamp suma amigöñäni. Wali tʼaqesiñ tiemponjja, suma amigonakanïñajj wali wakiskirïniwa, ukatwa jupanakampi suma amigöñatak chʼamachasiñasa.

17. ¿Kunjamsa Jeremiasajj cheqpach amigötap uñachtʼayäna?

¹⁷ Jan walinakajj utjkäna ukhaw Jeremías profetajj cheqpach amigötap uñachtʼayäna. Kunjamsa Ebed-melec chachar yanaptʼäna uk uñjañäni. Ebed-melec chachajj reyin palaciopanwa  trabajïna. Jeremiasajj ñeqʼe pʼiyar jaqontatäkäna ukhajja, uka chachaw salväna. Salvkäna uka qhepatjja, Ebed-melec chachajj ‘jilïr jaqenakaw jan waltʼayapjjetani’ sasaw ajjsarayasïna. Jeremiasajj uk yatïna ukhajja, ‘jupak kamachjjpansa’ sasajj janiw siskänti. Preso katuntatas uñjaskchïnjja, Jehová Diosan chuymachtʼkir arunakapwa jupar yatiyäna (Jer. 38:7-13; 39:15-18).

18. Proverbios 17:17 textorjamajja, ¿kunjamsa jan waltʼäwinakan uñjasipki uka jilat kullakanakasar yanaptʼsna?

¹⁸ Jichhürunakanjja, jilat kullakanakasajj kunayman jan walinakanwa uñjasipjje. Waljaniw terremotonakampi, jan ukajj guerranakampi jan waltʼayat uñjasipjje. Ukhaman uñjasir jilat kullakanakarojj utasaruw yaqhepajj katoqtʼsna, yaqhepasti qollqempiw yanaptʼaraksna. Ukampis taqeniw Jehová Diosarojj uka jilat kullakanakar yanaptʼañapatak maysna. Mä jilatana jan ukajj mä kullakan aynachtʼatap yatisajja, inas jupar jan kamsirjamäkstanti, jan ukajja, jan kuns lurirjamäkstanti. Ukampis yanaptʼsnawa, ¿kunjamsa? Sañäni, jupar compañtʼañatakiw tiempo apstʼassna, llakinakapat cuenttʼistani ukhas sumwa istʼsna, jiwasar chuymachtʼkistu uka qellqatwa Bibliat liytʼarapiraksna (Is. 50:4). Amigonakasajj yanaptʼa munapkani ukhajja, jupanakampïñatak chʼamachasiñasapuniwa (Proverbios 17:17 liytʼañataki).

19. Jilat kullakanakasamp suma amigöñajj ¿kunjamsa jutïrin yanaptʼistani?

¹⁹ Jichhaw jilat kullakanakasamp jukʼamp suma amigöñatakejj chʼamachasiñasa. ¿Kunatsa? Jutïrinjja, enemigonakasajj kʼarinakampiw tʼaqjjtayañ munapjjestani. Jiwaskam jan yanaptʼasjjañasa jan confiyasjjañaswa munapjjarakini. Ukampis janiw puedipkaniti, jilat kullakanakasar munasiskakiñäniwa. Cheqas jupanakampejja janiw akapacha tukusiñapkamakejj suma amigökañäniti, jan ukasti, wiñayatakiw amigöñäni.