1-2. Imnis ḇekofen ro 1 Petrus 4:7, 8, rosai nari ḇefnoḇek ko fa komkuepen ro fafisu ḇesamswen na?

FAFISU kofanam syadi ḇe papupes ro ”ras ḇepupesna” na kosmai samswen nabor syadi. (2 Tim. 3:1) Imnis raris, ro sup oso ḇero Afrika, fyor sifrur kampanye pemilu raposa snonkaku ḇebor sya smamunmun. Nasyadi ro paik riwonem, naek srar koḇansi jadi fa sra farma ḇe moḇ ḇesena snar sro moḇ simamunmun roya. Rosai ḇefnoḇek si ro fafisu ḇeradine? Ono sisya sḇarekus naek srar ḇesesya ḇero moḇ smamunmun ro diwa ḇa. Manbesrar oso doḇe, ”Ro fafisu ḇeradine, yamarisen snar bati ayesi sisya ro ris yedi. Inja nkosambraḇser yae nko.”

² Iba syadi ro fafisu ”kandera ḇeba” myun, na komarisen kaku kona bati ḇepyum ḇeswar konsya. (Why. 7:14) Inja, ro kirine beri fandun fa ko kofanam ma koswar yae ko syadi wer. (Wasya 1 Petrus 4:7, 8.) Na kofarkor nabor ro Yeremia farfyar ḇyena. Bati ḇyesi sifnoḇek i fa imkuepen ro fafisu fanam ḇe farmakakok Yerusalem. * Moḇsa na kafrur raris Yeremia i rai?

3. (a) Roi risai bisa nafnai Yeremia i fa ḇyinkwanbur snonkaku sya? (b) Rosai Yeremia ikofenḇair ḇe manfasfas ḇyedi, Barukh i, ma rosai fainda ya ḇe su?

³ Yeremia ryamaker Anatot, ma snonkaku ḇero diansya sisoasuser ḇa. Ḇebor ro si sima karyer ḇyesi ma snonkaku ḇeḇarek fanam i sya. Indokada swaf taun ri 40 ikenem rofandu si. (Yer. 11:21; 12:6) Imbape, ḇyinkwanbur  snonkaku sya ḇa. Kakuya, ikofenḇair moḇ ḇyaḇir raya ḇe manfasfas ḇyedi, Barukh i. (Yer. 8:21; 9:1; 20:14-18; 45:1) Nane nafrur fa Barukh ma Yeremia suswar ma suḇesyowi kaku yae su. Barukh fyasepen roi nabi Yeremia ifrur nakam, ma kowasya na ro syap Yeremia.​—Yer. 20:1, 2; 26:7-11.

4. Rosai Yahwe iwan ḇe Yeremia fa ifrur ya, ma rariso nane nasambraḇser Yeremia ma Barukh ḇaḇebati suḇena?

⁴ Ro swaf taun ḇe taun, Yeremia imkak ḇa fa ḇyuk swarapepen ḇe snonkaku Israel sya rosai nari ḇekur Yerusalem. (Yer. 25:3) Insama nadif snonkaku ansi fa simbror, Yahwe iwan Yeremia fa fyas swarapepen Ḇyuk ro swaf taun anna ro syap ḇeniw. (Yer. 36:1-4) Yeremia ma Barukh sufararur kayam ro swaf paik riḇeḇeso fa sufrur rosai Allah iwan ḇe suna. Kakuya na suna swaf fa suyawawos fa susambraḇser kakyar suḇena.

5. Rariso kofawi Barukh ima bati ḇekaku faro Yeremia i?

⁵ Sufas syap ḇeniw fa imnai raposa, Yeremia ḇye Barukh i fa ikofenpyan anun anna ḇe kawasa sya. (Yer. 36:5, 6) Fararur ani ipyan ḇa mboi Barukh imkakḇa fa ifrur na. Yeremia na imarisen kaku fyor Barukh rya ḇe bait ma iwasya syap ḇeniw anya ḇe kawasa sya. (Yer. 36:8-10) Ḇeḇarara ro Yehuda srower rosai Barukh ifrurya, ma sor i fa iwasya naba faro si! (Yer. 36:14, 15) Ḇeḇarara ansi sna wos oser fa sikofenḇair ḇe Raja Yehoyakim rosai Yeremia ikofen ya. Kuker myaren sanun ḇe Barukh i, ”Au ma Yeremia mu ipyum ya mura ma muyokef mu. Oso ipok ifawi awer moḇ muyokef roya.” (Yer. 36:16-19) Ima anun ḇepyum diri!

6. Rosai Yeremia ma Barukh sufrur ya fafisu simsor ma siḇe sfor su?

 ⁶ Raja Yehoyakim imsor fafayaḇa fyor ryower wos Yeremia fyas anna, inja ryap syap beniw ani ma iwan fa sfor Yeremia ma Barukh su. Ḇape, Yeremia imkak ḇa. Dun syap ḇeniw ḇeseya wer ma ḇyuk ḇe Barukh i, ma Yeremia dapḇair Yahwe wos anun Ḇyena ḇe i. Barukh fyasepen ”wos nakam ḇero syap ḇeniw ḇerandak, raja Yehoyakim ro Yehuda ryap kwar anya”.​—Yer. 36:26-28, 32.

7. Snar Yeremia ma Barukh sufararur kayam, rariso ḇaḇebati suḇena?

⁷ Snonkaku ḇesmai kam kandera sya na sfanam syadi yae si. Rarirya kako, fyor sufrur kam syap ḇeniw ḇebabo fadwer syap ḇeniw Raja Yehoyakim ryap kwar anya, Yeremia ma Barukh sumambir kaku yae su ma sufanam syadi wer. Rosai monda kofarkor ro farfyar anine?

8. Rosai ḇedwarek ko fa koḇebati fanam kuker ḇese sya, rosai ḇefnai fa kopok kosusu awer?

⁸ Imbude koḇo samswen ḇe kofa kawos kuker sne ḇesiper ḇe ḇesesya snar fafisu iwara ono sifrur kosnesna naduf. (Ams. 18:19, 24) Ḇaido kokara kona swaf oḇa ma komewer koḇebati fanam kuker ḇese sya. Imḇape kopok kosusu awer. Komarisen naek srar koḇesi sifnoḇek ko ro fafisu ḇesamswen na ido, kirine fandun fa kofanam syadi yae ko. Nyan oser fandun fa kofrur ya iso kokofenḇair ḇe si rosai kokara ma koḇaḇirna.​—1 Ptr. 1:22.

9. (a) Rariso Yesus fyasnai ima ikyar faro bati ḇyesya? (b) Rosai ḇefnai fa wawos roi kwara ma sneḇaḇir ḇedi nafnoḇek Au fa wafanam syadi kuker bati ḇesya? Fawar farfyar oso.

⁹ Yesus fyasnai ima ikyar faro manfamyan ḇyesi kuker ikofenbos roi ḇebor ḇe si. (Yoh. 15:15) Koso Yesus nyan ḇyena kuker kokofen ḇe bati koḇesya roi ḇefrur komarisen, koḇeḇirḇar, ma kofafko. Fyor oso dawos yoḇ Au ido, rwower pyum i, rarirya na wafawi wakna kakara, aw, ma sneḇaḇir ḇemnis kuker i. Kwarapan farfyar ro Cindy, imbesrar ḇyeumur taun ri 29. Ḇyebati kuker imbesrar ḇeḇe perintis ḇeumur taun ri 67 snori Marie-Louise. Ro ras Kamis nakam suḇaryas kayam, ma sufarfyar ḇekur roi ḇebor ma kako roi suḇaḇirna. Cindy doḇe, ”Yamarisen yafawar roi ḇefandun kaku ḇe bati yesi snar nane nafnoḇek aya fa yafawi ma yamambir pyum si.” Raris Cindy, wawosḇair kakara ma moḇ ḇaḇir raya ḇe  bati ḇesi ma wakrower pyum si kako ido, na ḇaḇebati mkoḇena nsambraḇ syadi.​—Ams. 27:9.

10. Imnis kowasya ro Amsal 27:17, rosai fainda kosmai ya snar kofararur kayam kuker naek srar koḇesi?

¹⁰ Raris Yeremia ma Barukh su, fafisu kofararur kayam kuker naek srar koḇansi ma komam rari ḇepyum sena ido, na komambir pyum si ma kofanam syadi kuker si. (Wasya Amsal 27:17.) Imnis raris, ro ḇaḇeḇaryas mam mboi min ḇefararur kayam kuker Au imkak ḇa fa ibriwarek kakyar ḇyedi ḇaido dawos kuker raryaḇ ḇekur Yahwe ma asas Ḇyena. Moḇsa ḇaḇir rai? Kakuya nari wamarisen fa wafanam syadi kuker i.

11-12. Fawarpan fawawar ḇefasnaiḇair kofararur kayam ro fararmyan nafnoḇek ko fa koswar yae ko.

¹¹ Kwarapan fawar risuru ḇefasnaiḇair kofararur kayam ro fararmyan nafnoḇek ko fa koswar yae ko. Adeline, ḇyeumur taun ri 23, dor bati ḇyedi, Candice, fa suḇaryas ro moḇ sḇaryas ker rona ḇa. Adeline doḇe, ”Fandun fa nuryaḇ syadi fa nuḇaryas inja nusmai marasrisen ro fararmyan ya. Ḇape, nufandun wos samaraḇraḇ insama nuḇuk roi ḇepyum syadi ḇe Yahwe pdef.” Rosai fainda susmai ro fararur kayam suḇena? Adeline ikofen, ”Ro ras-ras nuḇaryasna raposa, nukofenḇair roi nuḇaḇirna, roi ḇeyun raryaḇ ro ḇaḇeḇaryas, ma nufawi kaku Yahwe fyarkin nu kwar ro fararmyan nuḇena. Numarisen nufarfyar roi ḇeradine ma nafnoḇek nu fa numambir pyum yae nu.”

¹² Laïla ma Marianne suma imbesrar ḇefarḇuk ḇa ḇeraker Prancis. Sura fa suḇaryas swaf paik ririm ro Bangui, kota ḇeba ḇero Republik Afrika Tengah. Laïla fyar ḇo doḇe, ”Marianne ma aya nusmai samswen. Ḇape, ḇaḇebati nuḇena nasambraḇ syadi snar nuyawawos kuker payamyum ma nuswar yae nu. Yamam  Marianne fasaw fa ifawi snonkaku ḇero kota ani moḇ sikenem raya, iswar snonkaku ḇero diansya, ma iryaḇ ro fararmyan. Ine nafrur fa yaḇesyowi kaku i.” Fandun fa rwa ḇe moḇ ḇese ḇa insape waksmai roi ḇepyum nane. Ro fafisu waḇaryas kuker naek ḇaido srar oso ro moḇ Bedi ido, nwa swaf fa mambir pyum i ma swambraḇser ḇaḇebati muḇena.

13. Fafisu kofararur kayam kuker bati koḇesya, na komam sifrur roi ḇepyum monda ke?

¹³ Fafisu kofararur kayam kuker bati koḇesya, na komam sifrur roi ḇepyum monda ḇa, mboi sifrur sasar kako. Rarirya ido, rosai na ḇefnoḇek ko insama kofanam pdef kuker si? Kokara kaḇer Yeremia farfyar ḇyena. Mkorama kawos rosai ḇefnoḇek i fa myam rari ḇepyum ro bati ḇyedi ma ḇyuk ampun faro sasar sena.

14. Rosai Yeremia fyarkor ro Yahwe I, ma rariso nane nafnoḇek i rai?

¹⁴ Yeremia fyas syap ḇeḇuk snonsnon ḇyedi, ma rya fyas kako syap 1 ma 2 Raja-Raja. Fyor fyas syap-syap nane nya swaf fa myam Yahwe isawarwar kaku faro snonkaku ḇesasar sya. Imnis raris, ifawi rofyor Raja Ahab imbror ro sasar ḇyena, Yahwe doḇe ro fafisu ikenem kaker na ipok myam ḇa kina ḇyesikam simar. (1 Raj. 21:27-29) Osower, Yeremia ifawi Manasye iḇyeḇa syadi ro Ahab i. Rarirya mboi Yahwe ḇyuk ampun ḇe i snar marandor ḇyedi. (2 Raj. 21:16, 17; 2 Taw. 33:10-13) Farfyar nane nafnoḇek Yeremia fa iso Yahwe nyan Ḇyena fa dakkaḇaḇaḇ ma isawarwar ḇe bati ḇyesya.​—Mz. 103:8, 9.

15. Raris Yahwe I, rariso Yeremia fyasnai kaḇaḇaḇ fafisu Barukh ibur fararur ḇyedi?

¹⁵ Ro ras oso Barukh ibur fararur ḇyedi. Rosai Yeremia ifrur yoḇ Barukh i? Yeremia kyara fasaw ḇa na jadi fa ifnoḇek Barukh i ḇa. Ḇape, isaramper i kuker ikofenḇair Allah anun Ḇyena ḇe i mboi kuker mayaryaren. (Yer. 45:1-5) Farkarkor rosai kun ro farfyar anine?

16. Imnis ḇeḇefasnai ro Amsal 17:9, rosai fandun fa kofrur ya insama ḇaḇebati koḇena nakain fyoro?

¹⁶ Kakuḇae, kopok kokara awer na naek srar koḇesi sifrur roi ḇenapes rarya kwar. Inja, rofyor kona bati oso na kosewar kaku fa komamwarek ḇaḇebati koḇena fa nakain fyoro. Bati koḇesi sifrur sasar ido, fandun fa koḇuk ananun ḇeknam ro Refo ḇe si mboi kawos kuker mayaryaren. (Mz. 141:5) Ma fyor ono sifrur fa kofafayaf ido, fandun fa koḇuk ampun ḇe si. Koḇuk ampun kwar ido kopok kap kaḇer awer roi sifrur kwar na ro ḇarpon sena ḇaido snonkaku ḇesesya. (Wasya Amsal 17:9.) Ro fafisu ras-ras ḇepupes ine, fandun kaku fa komam monda ḇe roi ḇepyum ro naek srar sya ḇardibur sasar sena! Kofrur na ido na kofanam syadi kuker si, snar nari ro kandera ḇeba ya kofandun bati koḇansine!

17. Rariso Nabi Yeremia fyasnai ima bati ḇekaku ro fafisu ḇesamswen?

¹⁷ Nabi Yeremia fyasnai ima bati ḇekaku ro fafisu ḇesamswen. Imnis raris, fyor sisun Yeremia ro perigi ḇemarser, Ebed-melekh, ḇefararur ro istana, fyaspar i. Mura Ebed-melekh imkak nari manfarkin Yehuda sya smun i. Fafisu Yeremia ryowerna, fyasis monda ḇa ḇo kyara na bati ḇyedine syewar nyan ro mankundi.  Syun ro bui mboi Yeremia syewar fa syambraḇser Ebed-melekh kuker ikofenḇair Yahwe asas Ḇyena.​—Yer. 38:7-13; 39:15-18.

18. Imnis Amsal 17:17 ikofen ya, rosai fandun fa kofrur ya fafisu bati koḇesi sismai samswen?

¹⁸ Naek srar koḇesi ro baboine sismai samswen nabore. Imnis raris, ḇebor sekandera snar rim ḇeba ḇaido mamamun. Roi nane nkur si ido, ono sisya na simarisen sor si fa sḇarek ro rum sena. Ḇesesya wer na sifnoḇek kuker sḇuk kumpan ḇe si. Ḇape kokame bisa koḇenadi kor ḇe Yahwe fa ifnoḇek naek srar koḇansine. Fyor kofawi naek ḇaido srar koḇesi sesanekar, imbude na kofawi mnis ḇa rosai imbe kokofen ma kofrur na. Mboi kokame bisa koḇuk fafnoḇek. Imnis raris, na koḇuk oras koḇena fa kokainus si. Korower pyum fafisu sawose. Ma kokofenḇair ḇe si mnuk ro Refo komarisen kaku ḇesambraḇser ko kwar. (Yes. 50:4) Ḇefandun syadi ya iso fafisu sfandun ko ido koisya fa kofnoḇek si.​—Wasya Amsal 17:17.

19. Rosai ḇefnai fa kofanam syadi kuker naek srar ro kirine nafnoḇek ko ro fafisu iwama?

¹⁹ Fandun kaku kosewar fa kofanam syadi kuker naek srar koḇesi ro kirine. Rosai ḇefnai ya? Snar mbroḇ koḇesi nari sisewar fa sifrur ko fa koḇeoser ḇa kuker sḇuk wos ankarkar ma sfawar ro ḇekaku ḇana. Nari sḇensewar kaku insama kopampum yae ko. Ḇape roi sifrur na nari nun roinoḇa. Sipok ḇa fa sifrur saswar ḇekaḇrai ḇefesepen ḇaḇeoser koḇena fa namuk. Royoḇaḇeri na nafrur ḇaḇebati koḇena fa namnai. Kakuya, ḇaḇebati koḇena na nakain pdef isof ro papupes dunya ine ma isof fyoro-fyoro!