1-2. Domu bani 1 Petrus 4:7, 8, aha do na boi mangurupi hita sanggah dong hasunsahan?

HALANI lambin dohor ujungni “panorang parpudi”, bahat do hasunsahan. (2 Tim. 3:1) Umpamani, dobkonsi salosei pemilu i Afrika bagian barat, bahat do halak na martinggili. Sadokah onom bulan lobih, lang boi bebas sanina botou ijai laho hujai hujon halani partinggilan ai. Jadi aha ma na mangurupi sidea bani panorang ai? Piga-piga sanina botou laho hu rumah ni hasoman sahaporsayaon na daoh humbani ianan partinggilan ai. Sada hasomanta mangkatahon, “Malas do uhurhu halani adong hasoman sahaporsayaon. Marsiurupan do hanami anjaha marsiojuran ijon.”

² Sanggah roh “hamarsikon banggal”, tontu malas do uhurta anggo adong hasoman na mangkaholongi hita. (Pangk. 7:14) Halani ai, ponting tumang do humbani sonari ase ipatoguh hita parhasomananta pakon sanina botou. (Basa 1 Petrus 4:7, 8.) Hita boi marlajar humbani si Jeremia. Hinan, paima iripaskon Jerusalem, iurupi hasomanni do ia ase totap martahan ibagas sitarononni. * Aha ma na boi itiru hita humbani si Jeremia?

3. (a) Aha do ra na boi mambahen si Jeremia papuligkon dirini? (b) Aha do na ipatugah si Jeremia bani si Baruk, janah aha ma hasilni?

³ Bahat tumang do halak na mangkorjahon na sambor i Anatot, huta ni si Jeremia. Tarmasuk ma homa tetangga ampa kaluargani. Siotikanni dong 40 tahun ididah si Jeremia ai. (Jer. 11:21; 12:6) Hassi pe sonai, lang ra ia papuligkon dirini. Tapi, ipatugah do bani si Baruk sonaha pangahapni. (Jer. 8:21; 9:1; 20:14-18; 45:1) Janah isuratkon si Baruk ma saritani ai. On ma na mambahen lambin orot parhasomanan ni si Jeremia pakon si Baruk. Janah lambin marsihaholongan ma sidea.​—Jer. 20:1, 2; 26:7-11.

4. Tugas aha ma na ibere Jahowa bani si Jeremia, janah sonaha tugas ai mambahen parhasomanan ni si Jeremia pakon si Baruk lambin orot?

⁴ Sadokah martahun-tahun, barani do si Jeremia patugahkon bani halak Israel pasal aha na laho masa bani Jerusalem. (Jer. 25:3) Sanggah ibere Jahowa use sipasingat bani halak Israel, isuruh Ia ma si Jeremia manuratkon sipasingat ai bani sada gulungan. (Jer. 36:1-4) Ra do marbulan-bulan si Jeremia pakon si Baruk rap marhorja laho mandalankon tugas na ibere Naibata. Halani gati sidea marsahapi, lambin toguh ma haporsayaon ni sidea.

5. Sonaha si Baruk patuduhkon anggo ia hasoman na bujur bani si Jeremia?

⁵ Dob salosei gulungan ai isurat, isuruh si Jeremia ma ase si Baruk patugahkon isini ai bani halak. Pos do uhurni ihorjahon si Baruk do ai. (Jer. 36:5, 6) Barani do si Baruk mangkorjahon tugas na borat ai. Tontu megah ma pangahap ni si Jeremia halani laho si Baruk hu alaman rumah panumbahan laho mambasahon ai. (Jer. 36:8-10) Dobkonsi itangar pejabat-pejabat aha na dob ibahen si Baruk,  mintor isuruh ma ia mambasahon gulungan ai. (Jer. 36:14, 15) Iahap sidea maningon ibotoh Raja Joyakim do homa ai. Jadi ihatahon sidea ma bani si Baruk, “Laho anjaha marponop ma ho pakon si Jeremia, anjaha ulang ma adong na mambotoh atap ija hanima.” (Jer. 36:16-19) Dear do na ihatahon sidea ai!

6. Sanggah dong na manggila bani sidea, aha ma na ibahen si Jeremia pakon si Baruk?

⁶ Dob itangar si Joyakim isi ni surat ai, mintor manggila ma ia. Itutung ma gulungan ai anjaha isuruh ma ase si Jeremia pakon si Baruk itangkap. Hassi pe sonai, lang mabiar si Jeremia. Ibuat ia ma use gulungan na baru, anjaha ibere ma ai bani si Baruk. Dob ai ipatugah ia ma use tonah ni Jahowa, ase isuratkon si Baruk “haganup hata ni buku ondi, na dob tinutung ni si Joyakim”.​—Jer. 36:26-28, 32.

7. Aha ma gunani bani si Jeremia pakon si Baruk halani rap marhorja sidea?

⁷ Somalni, lambin orot do parhasomanan ni halak anggo marsiurupan sidea sanggah dong tantangan. Sonai ma na iahapkon si Jeremia pakon si Baruk. Halani rap marhorja sidea manuratkon gulungan ai, lambin itanda si Jeremia ma si Baruk, sonai homa si Baruk bani si Jeremia. On ma na mambahen lambin orot parhasomanan ni sidea. Jadi sonaha hita boi mangusihi sidea?

8. Aha do ra na mambahen hita lang urah orot marhasoman pakon na legan, janah sonaha mangatasi ai?

⁸ Ra do lang urah iahap hita mansaritahon pangahapta halani ongga adong na mambahen borit uhurta. (Pod. 18:19, 24) Atap, ra do halani sibuk janah loja, lang sompat be hita mananda sanina botou. Tapi, anggo sihol hita dong na mangurupi sanggah marsitaronon, maningon marusaha ma hita patoguhkon parhasomananta. Sada cara ai ma maningon porsaya ma hita mansaritahon na ibagas uhurta bani sidea.​—1 Ptr. 1:22.

9. (a) Sonaha Jesus patuduhkon anggo ia porsaya bani hasomanni? (b) Anggo ra hita marsarita hubani hasoman, mase ai boi mambahen lambin orot parhasomananta? Bere ma contoh.

⁹ Jesus pe porsaya mansaritahon na ibagas uhurni bani hasomanni. (Joh. 15:15) Songon Jesus, saritahon ma hubani hasoman aha na mambahen malas uhurta, holsoh ni uhurta, atap pe na mambahen pusok uhurta. Porini dong na patugahkon na ibagas uhurni hubanta, dear ma homa tangihon. Anggo ibahen hita sonai, ra do holi ibotoh hita sarupa do hape pangahapta pakonsi. Pardiateihon ma contoh humbani si Cindy, na marumur 20-an. Ia marhasoman pakon si Marie-Louise, parintis  na marumur 60-an. Somalni rap marbarita do sidea tiap ari Kamis. Sanggah pajumpah, bahat do na isaritahon sidea. Nini si Cindy, “Anggo ra hita mansaritahon na ibagas uhurta hubani hasoman, janah ra homa hita manangar sarita ni sidea, gabe lambin itanda hita ma sidea.” Songon si Cindy, patugah ma bani hasoman sonaha pangahapta. Janah tangar ma homa sarita ni sidea, ase lambin orot parhasomananta pakonsi.​—Pod. 27:9.

10. Domu bani Podah 27:17, aha do gunani anggo rap marhorja hita pakon hasoman sahaporsayaon?

¹⁰ Songon si Jeremia pakon si Baruk, anggo rap marhorja hita pakon hasomanta, lambin itanda hita ma paruhuranni na dear. Gabe marlajar ma hita humbani hasomanta ai, anjaha lambin orot ma parhasomananta pakonsi. (Basa Podah 27:17.) Umpamani, sanggah marbarita rap pakon hasoman, ididah hita ma barani do ia patorangkon haporsayaonni pasal Jahowa ampa harosuh-Ni. Tontu on ma na mambahen hita lambin orot bani.

11-12. Bere ma contoh na patuduhkon sanggah hita rap mangidangi pakon hasoman, on boi mambahen hita lambin orot.

¹¹ Pardiateihon ma dua pangalaman na patuduhkon anggo hita rap marhorja pakon hasoman, lambin orot ma parhasomananta. Si Adeline na marumur 23 tahun, mangarahkon si Candice, hasomanni laho marbarita hu ianan na jarang ihorjahon. Nini ma, “Sihol do hanami ase ringgas mangidangi. Jadi ipingkirhon hanami ma sonaha ase hanami boi mambere na sidearan bani Jahowa.” Aha ma gunani na idapot sidea dobkonsi rap marbarita sidea? Nini si Adeline, “Dob salosei hanami mangidangi, marbuali ma hanami janah marsiojuran. Ididah hanami do sonaha Jahowa manogu-nogu hanami sanggah mangidangi. Malas uhurnami halani boi marbuali sonai, anjaha lambin orot ma parhasomanannami.”

¹² Dong homa si Laïla pakon si Marianne hun Prancis. Marbarita ma sidea sadokah lima minggu i Bangui, ibu kota Republik Afrika Tengah. Si Laïla mangkatahon, “Hassi pe  bahat tantangannami ijon, tapi totap do hanami marsiojuran anjaha marsihaholongan. Halani ai, lambin orot ma hanami. Huidah, urah do si Marianne marhasoman pakon halak ijon, janah holong do uhurni bani sidea. Ringgas do homa ia mangidangi. Lambin marosuh ma ahu marhasoman pakonsi.” Ase boi mangahapkon sisonai, lang maningon pindah hita hu nagori na legan. Sanggah nasiam rap marbarita pakon hasoman i kuria, boi do lambin itanda nasiam sidea. Gabe lambin orot ma holi parhasomanan ni nasiam.

13. Tantangan aha do ra na dong sanggah rap marhorja pakon hasoman?

¹³ Sipata, sanggah rap marhorja pakon hasoman, ra do ididah hita homa hahuranganni. Sonaha hita mangatasi ai? Ulas hita ma siusihan humbani si Jeremia. Aha do na mangurupisi ase totap mardingat paruhuran na dear humbani hasomanni janah ra manalpuhon hasalahanni?

14. Aha ma na ibotoh si Jeremia pasal Jahowa, janah aha ma gunani ai bani?

¹⁴ Si Jeremia sandiri do na manuratkon buku Jeremia. Ra do homa ia na manuratkon buku 1 pakon 2 Raja-raja. Sanggah manuratkon buku ai, ibotoh ia ma anggo Jahowa maridop ni uhur bani jolma na mardousa. Umpamani, ibotoh si Jeremia do seng idahon ni Raja Ahab hamagouan na iparoh Jahowa hubani kaluargani. (1 Raj. 21:27-29) Ibotoh si Jeremia do homa parahan do dousa ni si Manasse marimbangkon si Ahab. Tapi isasap Jahowa do dousani halani mambahen hamubahon ia. (2 Raj. 21:16, 17; 2 Kron. 33:10-13) Tontu dob mambotoh ai, gabe sihol ma si Jeremia maniru Jahowa laho patuduhkon idop ni uhur ampa hasabaron.​—Ps. 103:8, 9.

15. Sonaha si Jeremia maniru hasabaron ni Jahowa sanggah mangurupi si Baruk ?

¹⁵ Sompat do si Baruk lang pongkut mandalankon tugasni. Pardiateihon ma sonaha si Jeremia mangurupisi. Lang mintor iahap ia anggo si Baruk lang boi mubah. Tapi sabar do ia patugahkon barita ampa sipasingat humbani Naibata bani si Baruk. (Jer. 45:1-5) Parlajaran aha ma na boi dapot hita hunjai?

16. Domu bani Podah 17:9, aha ma na porlu bahenonta laho patoguhkon parhasomananta?

¹⁶ Sasintongni, lang dong sanina botou na sempurna. Halani ai, maningon marusaha ma hita patoguhkon parhasomananta. Anggo lepak pambahenan ni sidea, maningon bujur ma hita mambere podah atap sipasingat hun Bibel. (Ps. 141:5) Porini borit uhurta ibahen hasoman, salpuhon ma ai. Anggo domma isalpuhon hita hasalahanni, ulang ma itarsingati hita ai i pudian ni ari, atap ipatugah-tugah hita bani na legan. (Basa Podah 17:9.) Humbani sonari, pontingan do hita mangindahi na madear humbani hasoman, sedo hahuranganni! Anggo ibahen hita sonai, gabe toguh ma parhasomananta. On ma holi na mangurupi hita sanggah masa hamarsikon banggal.

17. Mase si Jeremia ihatahon hasoman na bujur bani panorang hasosakan?

¹⁷ Ibuktihon si Jeremia do anggo dirini domma gabe hasoman na bujur bani panorang hasosakan. Umpamani, dobkonsi itarik si Ebedmelek si Jeremia hun sumur na bagas janah marhubang, mabiar ma ia halani nini uhurni itangkap pejabat istana ma holi ia. Dob ibotoh si Jeremia sonai do hape pangahap ni si Ebedmelek, lang pitah sip ia. Lang marpingkir ia anggo si Ebedmelek boi mangatasi ai. Hassi pe ibagas penjara, ipatugah si Jeremia do janji ni Naibata bani si  Ebedmelek ase tarapoh uhurni.​—Jer. 38:7-13; 39:15-18.

18. Domu bani Podah 17:17, aha ma na maningon bahenonta sanggah dong hasoman na marsitaronon?

¹⁸ Bahat do sanina botounta na marsitaronon. Umpamani, dong na hona bencana alam, atap pe sunsah halani pambahenan ni parjahat. Anggo masa na sisonai, boi ma iontang hita sidea hu rumahta. Atap boi do homa ibere hita duit bani sidea. Anjaha boi do homa itonggohon hita ase Jahowa mangurupi sidea. Sanggah ibotoh hita dong hasoman na maretek ni uhur, ra do lang ibotoh hita mangkatahon aha laho mangapoh sidea. Hassi pe sonai, boi do ibere hita panorang laho mangidah sidea. Sabar ma manangihon sanggah marsarita sidea. Anjaha boi do homa ipatugah hita ayat ni Bibel na sadokah on mambahen tarapoh uhurta. (Jes. 50:4) Na sipontingan, sirsir ma mangurupi sanggah sidea mamorluhon.​—Basa Podah 17:17.

19. Aha do gunani anggo ipatoguh hita parhasomananta humbani sonari?

¹⁹ Humbani sonari, maningon marusaha ma hita ase lambin orot hubani sanina botounta. Mase? Halani marusaha do munsuhta laho mamosah hita marhitei barita na lang tongon. Sidea sihol ase hita lang be porsaya bani hasomanta janah lang be mangurupi sidea. Tapi, anggo toguh do holongta bani sanina botou, lang boi sidea mamosah hita. Lang dong na boi pasedahon parhasomananta. Lang pitah ronsi ujung ni dunia on hita marhasoman, tapi ronsi sadokah ni dokahni do!