1-2. Asegun na 1 Pedro 4:7, 8, cosa kanaton ayuda para puede enfrenta con el maga dificultad?

MIENTRAS ta queda kita cerca na fin del “ultimo maga dia,” posible enfrenta kita maga grabe dificultad. (2 Tim. 3:1) Por ejemplo, na un nacion na Africa, grabe el violencia despues del eleccion. Adentro na mas de seis mes, na peligro el diaton maga hermano y hermana por causa na grabe violencia alrededor kanila. Cosa ya ayuda kanila para puede enfrenta con ese? El cuanto kanila ya esta na casa del maga hermano quien ta queda na maga lugar que gendeh bien peligroso. Un hermano ya habla: “Na aquel tiempo, alegre yo cay junto yo con el de mio maga amigo. Ya puede kame anima con uno y otro.”

² Si principia ya el “grande tribulacion,” hay queda kita alegre si tiene kita maga buen amigo quien ta ama kanaton. (Rev. 7:14, NWT) Poreso, bien importante que cultiva buen amistad con otro ahora. (Le con el 1 Pedro 4:7, 8.) Manada kita cosa puede aprende na experiencia de Jeremias. El de suyu maga amigo ya ayuda con ele durante el tiempo antes el destrozo del Jerusalem. * Paquemodo kita puede imita con Jeremias?

3. (a) Cosa posible el razon si porque quierre si Jeremias man lejos na maga gente? (b) Cosa ya habla si Jeremias con Baruc y cosa el resulta?

³ Adentro de 40 año o mas pa, ya vivi si Jeremias entre na maga gente gendeh leal, incluido ya el de suyu maga vecinos y posible cuanto del de suyu maga pariente que estaba na  lugar de Anatot. (Jer. 11:21; 12:6) Pero, nuay le separta kanila. Gane, ya habla le con el de suyu leal secretario, si Baruc, si cosa le ya sinti. Sabe tambien se kita cay escribido se na Biblia. (Jer. 8:21; 9:1; 20:14-18; 45:1) Puede kita imagina que mientras ta escribi si Baruc con el todo cosa ya pasa con Jeremias, ya principia sila tiene amor y respeto para con uno y otro.​—Jer. 20:1, 2; 26:7-11.

4. Cosa ya manda si Jehova con Jeremias y paquemodo este assignment ya hace fuerte con el buen amistad de Jeremias y Baruc?

⁴ Por cuanto año, si Jeremias con animo ya habla con el maga Israelita si cosa sucede na Jerusalem. (Jer. 25:3) Ya manda si Jehova con Jeremias escribi De Suyu maga aviso na un rollo para anima con el maga Israelita que arripinti. (Jer. 36:1-4) Cuando ya trabaja junto si Jeremias y Baruc para hace con este assignment que estaba con Dios que posible ya tarda por cuanto meses, asigurao que yan cuento sila acerca na maga cosas que ya puede hace fuerte con el diila fe.

5. Paquemodo ya dale mira si Baruc que un buen amigo le de Jeremias?

⁵ Cuando ya acaba sila escribi con el rollo, necesita confia si Jeremias que el de suyu amigo, si Baruc, hay habla con el maga gente acerca na mensaje. (Jer. 36:5, 6) Con animo ya hace si Baruc con este peligroso assignment. Ta puede ba tu imagina si paquemodo de proud si Jeremias cuando ya anda si Baruc na templo y ya hace si cosa ya manda con ele? (Jer. 36:8-10) Ya oi el maga principe de Juda el cosa ya hace si Baruc y ya manda con ele que le suena con el rollo. (Jer. 36:14, 15) Ya decidi el maga principe que habla con Rey Jehoiaquim si cosa ya habla si Jeremias. Pero, ya habla sila con Baruc: “Anda y esconde ustedes de Jeremias y no manda sabe maskin con quien si onde ustedes.” (Jer. 36:16-19) Un buen consejo quel!

6. Cosa ya hace si Jeremias y Baruc cuando ya experiencia sila oposicion?

 ⁶ Bien rabiao si Rey Jehoiaquim cuando ya oi le el maga palabra que ya escribi si Jeremias. Por causa con ese, ya quema le con el rollo y ya manda arresta con Jeremias y Baruc. Pero, nuay tiene miedo si Jeremias. Ya dale le otro rollo con Baruc y mientras ta dicta si Jeremias con el mensaje de Jehova, si Baruc ya escribi “con el todo maga palabra na rollo que ya quema si Rey Jehoiaquim de Juda.”​—Jer. 36:26-28, 32.

7. Cosa posible ya sucede mientras yan junto trabaja si Jeremias y Baruc?

⁷ Ta queda cerca con uno y otro el maga gente quien yan junto experiencia probanza. Poreso, puede kita imagina que mientras ta trabaja junto kanda Jeremias y Baruc para cambia con el rollo que ya destroza si Rey Jehoiaquim, ya queda pa mas grande el diila apreciacion con uno y otro. Paquemodo el diila ejemplo puede ayuda kanaton?

8. Cosa posible el razon si porque no quierre kita queda cerca con otro y porque kita necesita pricura queda cerca kanila?

⁸ Posible que ta tormenta kita habla con otro si cosa kita ta sinti cay tiene ya quien ya hace sinti duele kanaton del antes. (Prov. 18:19, 24) O baka ta sinti kita que nuay kita tiempo o fuerza para queda cerca con otro. Pero, no kita pensa que imposible se. Si quierre kita que ayuda kanaton el diaton maga hermano y hermana si llega el probanza, necesita kita tiene buen amistad kanila ahora. El un importante manera amo que habla kanila si cosa kita ta pensa y ta sinti.​—1 Ped. 1:22.

9. (a) Paquemodo ya dale mira si Jesus que ta confia le con el de suyu maga amigo? (b) Na cosa manera queda mas hondo el de tuyu relacion con otro si habla tu kanila si cosa tu ta pensa y ta sinti? Dale un ejemplo.

⁹ Si Jesus ya dale mira que ta confia le con el de suyu maga amigo. Honesto le si ta converza kanila y nuay cosa ta esconde. (Juan 15:15) Puede kita imita con ele si habla kita con otro si cosa kanaton ta hace alegre, lingasa y maluya. Oi enbuenamente si tiene quien tan cuento contigo y posible puede tu discubri que semejante el de ustedes pensamiento, sentido y plano. Considera con el ejemplo de Cindy, un 29 año hermana. Yan amiga le con el un pioneer que 67 año, si Marie-Louise. Si Cindy y Marie-Louise junto ta predica cada Jueves aga y tan cuento tambien sila acerca na diferente topico. Si Cindy ya habla: “Quierre-quierre yo man cuento acerca na serioso cosas na de mio maga amigo y amiga cay ta ayuda este para mas conoce y entende yo kanila.” Igual con Cindy, si man cuento tu acerca  na de tuyu pensamiento y sentido con el de tuyu maga amigo y oi kanila si tan cuento sila, hay queda mas fuerte el de ustedes relacion.​—Prov. 27:9.

10. Asegun na Proverbio 27:17, cosa sucede si tan junto kita con el diaton maga hermano y hermana?

¹⁰ Igual na cosa ya sucede con Jeremias y Baruc, si tan junto kita con el diaton maga hermano y hermana y ta mira el diila buen calidad, tiene kita cosa ta aprende y ta queda kita mas cerca kanila. (Le con el Proverbio 27:17.) Por ejemplo, cosa tu sinti si na ministerio ustedes y ya oi tu con el de tuyu amigo que ta defende de suyu fe o con conviccion ta converza acerca con Jehova y con el de suyu proposito? Posible, mas aprecia tu con ele.

11-12. Dale ejemplo si paquemodo kita tiene buen amistad con otro si tan junto kita kanila na ministerio.

¹¹ Considera dos experiencia que ta dale mira si paquemodo el maga gente mas ama con uno y otro si tan junto sila na ministerio. Si Adeline, un 23 año hermana, ya habla con el de suyu amiga, si Candice, que sigui con ele na un lugar que ralo lang ta predica. “Quierre kame queda mas activo y mas man enjoy con el ministerio,” ya habla le. “Tiene kame cosa necesita hace para continua dale el todo con Jehova.” Paquemodo sila ya beneficia cay yan junto sila? “Acabar del cada dia,” si Adeline ya habla, “ta habla kame si cosa kame ta sinti, si cosa ya anima kanamon cuando tan cuento kame con el maga gente na ministerio y si cosa kame ta sinti cay ta guia kanamon si Jehova. Alegre kame dos si tan cuento acerca con este y mas ta conoce pa con uno y otro.”

¹² El dos single hermana de France que si Laïla y Marianne, ya anda predica por cinco semana na Bangui, el centro ciudad del Central African Republic. Ta acorda si Laïla: “Ya experiencia kame dificultad de Marianne pero cay tan cuento kame y ta dale mira deverasan amor, mas ya tiene kame buen amistad. Mientras ta observa yo con el abilidad  de Marianne que man adjust na nuevo circumstancia, el de suyu amor para na maga gente y pagka-activo na ministerio, mas ya aprecia yo con ele.” Gendeh tu necesita anda na otro nacion para experiencia con este maga beneficio. Cada vez tu ta predica na de ustedes teritorio junto na un hermano o hermana, tiene tu oportunidad para mas conoce pa con ele y para tiene ustedes buen amistad.

13. Cosa tiene vez ta sucede si tan junto kita con el diaton maga amigo y amiga?

¹³ Tiene vez, si tan junto kita con el diaton maga amigo y amiga, ta puede kita mira gendeh lang el diila maga buen calidad sino con el diila maga kamali tambien. Cosa kanaton ayuda para puede enfrenta con este? Considera kita otravez el ejemplo de Jeremias. Cosa con ele ya ayuda para mira con el maga buen calidad del otro y perdona con el diila maga kamali?

14. Cosa ya aprende si Jeremias acerca con Jehova y paquemodo este ya puede ayuda con ele?

¹⁴ Si Jeremias el ya escribi con el libro de Jeremias y posible, ele tambien ya escribi con el Primer y Segundo Rey na Biblia. Aquel assignment ya puede con ele ayuda para mira si paquemodo de grande el lastima de Jehova con el maga gente. Por ejemplo, sabe le que cuando si Rey Ajab ya arripinti na de suyu maga mal trabajo, ya habla si Jehova que gendeh le mira el destrozo na de suyu entero familia. (1 Rey 21:27-29) Sabe tambien si Jeremias que mas grabe el cosa ya hace si Manases contra con Ajab. Maskin pa ansina, ya perdona si Jehova con Manases cay ya arripinti le. (2 Rey 21:16, 17; 2 Cron. 33:10-13) Asigurao, aquel maga suceso ya ayuda con Jeremias para imita con el paciencia y lastima del Dios na de suyu tratamiento con el de suyu maga amigo y amiga.​—Sal. 103:8, 9.

15. Paquemodo ya imita si Jeremias con el paciencia de Jehova cuando ya perde el focus de Baruc?

¹⁵ Considera si paquemodo ya trata si Jeremias con Baruc cuando temporario ya perde el de suyu focus na de suyu assignment. Si Jeremias nuay dayun decidi que gendeh ya cambia si Baruc sino ya ayuda le con ele. Ya habla le con Baruc el bueno y franca mensaje del Dios para con ele. (Jer. 45:1-5) Cosa maga leccion kita puede aprende na este suceso?

16. Asegun na Proverbio 17:9, cosa kita debe hace para gendeh perde el diaton buen amistad con otro?

¹⁶ El deverasan, gendeh perfecto el diaton maga hermano y hermana. Poreso si tiene kita amigo o amiga, necesita kita hace esfuerzo para esta el diaton buen relacion kanila. Si yan kamali sila kanaton, baka necesita kita dale kanila bueno y franca consejo estaba na Palabra del Dios. (Sal. 141:5) Y si ya puede sila hace sinti duele kanaton, necesita kita perdona kanila. Si ya perdona ya kita kanila, debe kita evita man cuento acerca na cosa sila ya hace. (Le con el Proverbio 17:9.) Bien importante gayot na este maga tiempo que man focus kita na maga buen calidad del diaton maga hermano y hermana y gendeh na diila maga kamali! Si hace kita este, hay queda kita mas cerca kanila y necesita kita ansina clase de maga amigo na grande tribulacion.

17. Porque kita puede habla que un deverasan amigo si Jeremias na tiempo de dificultad?

¹⁷ El accion de profeta Jeremias ya dale prueba que ele un deverasan amigo na tiempo de dificultad. Por ejemplo, despues si Ebed-melec, un oficial na palacio, ya salva con Jeremias  na un pozo que lleno de lodo, ya tiene miedo si Ebed-melec que baka hace con ele sinti duele el maga principe. Cuando ya sabe si Jeremias acerca con este, nuay le esta silencio y ya pensa que puede lang quel solva de suyu amigo. Maskin pa na preso si Jeremias, ya hace le el cosa le puede hace y ya habla el promesa de Jehova con el de suyu amigo, si Ebed-melec.​—Jer. 38:7-13; 39:15-18.

18. Asegun na Proverbio 17:17, cosa kita debe hace si ta experiencia dificultad el diaton amigo?

¹⁸ Ahora, el diaton maga hermano y hermana ta enfrenta diferente dificultad. Por ejemplo, mucho ta experiencia maga calamidad. Si sucede este, puede kita invita con el maga hermano y hermana para esta na diaton casa. El otro puede dale financial ayuda. Pero todo kita puede pidi con Jehova para ayuda con el diaton maga hermano y hermana. Si ya sabe kita que yan luya el un hermano o hermana, baka no sabe kita si cosa habla y hace. Pero todo kita puede ayuda. Por ejemplo, puede kita dale tiempo para man junto con el diaton amigo. Oi kita enbuenamente si tan cuento le. Y puede kita habla con ele el diaton favorito texto. (Isa. 50:4) El importante amo que talli tu junto con el de tuyu maga amigo y amiga si necesita sila contigo.​—Le con el Proverbio 17:17.

19. Na cosa manera el diaton buen amistad na diaton maga hermano y hermana puede kanaton ayuda na futuro?

¹⁹ Debe kita queda determinao tiene y mentena con el diaton buen amistad na diaton maga hermano y hermana ahora. Porque? Cay el diaton maga enemigo hay pricura hace separta kanaton por medio na maga imbusterias. Hay pricura sila hace manera para gendeh mas kita confia y suporta con uno y otro. Pero gendeh sila tiene buen exito. Nuay sila cosa puede hace para perde el diaton amor y buen relacion con uno y otro. Gane, el diaton buen amistad kanila gendeh lang hasta na fin de este sistema sino hasta para cuando!