1-2. Sumala sa 1 Pedro 4:7, 8, unsay makatabang nato sa paglahutay sa mga kalisdanan?

SAMTANG magkaduol ang kataposan sa “kataposang mga adlaw,” mahimong makasinati tag grabeng mga kalisdanan. (2 Tim. 3:1) Pananglitan, human sa eleksiyon sa usa ka nasod sa kasadpang Africa, dihay nahitabong kagubot ug grabeng pag-awayay. Sa kapig unom ka bulan, delikado kaayo ang kahimtang sa mga igsoon. Unsay nakatabang nila nga makalahutay sa maong mga kalisdanan? Ang uban midangop sa balay sa mga igsoon sa medyo luwas nga dapit. Usa ka brader ang miingon: “Sa maong kahimtang, naapresyar gyod nako nga kauban nako ang akong mga higala. Nagkadinasigay mi.”

² Dihang mahitabo ang “dakong kasakitan,” maapresyar gyod nato kon duna tay mga higala nga nahigugma kanato. (Pin. 7:14) Busa kinahanglan nga makigsuod na ta karon sa mga igsoon. (Basaha ang 1 Pedro 4:7, 8.) Daghan tag makat-onan sa kasinatian ni Jeremias, kinsa gitabangan sa iyang mga higala nga makalahutay dihang hapit nang laglagon ang Jerusalem. * Unsaon nato siya pagsundog?

3. (a) Unsa untay posibleng rason nga ilain ni Jeremias ang iyang kaugalingon? (b) Unsay gipahayag ni Jeremias sa iyang sekretaryo nga si Baruk, ug unsay resulta niini?

³ Sulod sa labing menos 40 ka tuig, si Jeremias nagkinabuhi taliwala sa mga tawong dili maunongon, nga nag-apil sa mga silingan ug tingali pipila ka paryente gikan sa ilang lungsod sa  Anatot. (Jer. 11:21; 12:6) Pero, wala niya ilain ang iyang kaugalingon. Gani, gipahayag niya ang iyang gibati ngadto sa iyang maunongong sekretaryo nga si Baruk ug kanato usab. (Jer. 8:21; 9:1; 20:14-18; 45:1) Atong maimadyin nga samtang gisulat ni Baruk ang mga panghitabo sa kinabuhi ni Jeremias, milalom ang ilang gugma ug pagtahod sa usag usa.​—Jer. 20:1, 2; 26:7-11.

4. Unsay gisugo ni Jehova kang Jeremias, ug sa unsang paagi kini nga asaynment nakapasuod kang Jeremias ug Baruk?

⁴ Sa daghang katuigan, si Jeremias maisogong nagpasidaan sa mga Israelinhon bahin sa mahitabo sa Jerusalem. (Jer. 25:3) Sa dugang nga paningkamot ni Jehova nga mapalihok ang mga tawo sa paghinulsol, iyang gisugo si Jeremias sa pagsulat sa Iyang mga pasidaan diha sa linukot nga basahon. (Jer. 36:1-4) Samtang nagkauban si Jeremias ug Baruk niining hinatag sa Diyos nga buluhaton, nga lagmit mikabat ug pipila ka bulan, seguradong nag-estoryahanay sila bahin sa mga butang nga nakapalig-on sa ilang pagtuo.

5. Giunsa pagpakita ni Baruk nga siya maayong higala ni Jeremias?

⁵ Pag-abot sa panahon nga ipadayag na ang nasulat sa linukot nga basahon, si Jeremias kinahanglang mosalig sa iyang higalang si Baruk sa pagsulti sa mensahe ngadto sa mga tawo. (Jer. 36:5, 6) Maisogong gituman ni Baruk ang iyang peligrosong asaynment. Maimadyin ba nimo ang kalipay ni Jeremias dihang miadto si Baruk sa hawanan sa templo ug gibasa niya ang linukot nga basahon atubangan sa mga tawo? (Jer. 36:8-10) Ang mga prinsipe sa Juda nakabalita sa gihimo ni Baruk, ug gisugo nila siya nga basahog kusog ngadto kanila ang linukot nga basahon! (Jer. 36:14, 15) Ang mga prinsipe midesisyon nga isulti kang Haring Jehoiakim ang giingon ni Jeremias. Gipakitaan nilag konsiderasyon si Baruk ug giingnan: “Lakaw,  panago mo ni Jeremias, ug ayawg ipahibalo kang bisan kinsa kon asa mo.” (Jer. 36:16-19) Maayo gyod kana nga tambag!

6. Unsay gihimo ni Jeremias ug Baruk dihang gilutos sila?

⁶ Si Haring Jehoiakim nasuko pag-ayo pagkadungog niya sa mga pulong nga gisulat ni Jeremias mao nga iyang gisunog ang linukot nga basahon ug siya nagsugo nga dakpon si Jeremias ug Baruk. Pero wala mahadlok si Jeremias. Siya mikuhag laing linukot nga basahon ug gihatag kini kang Baruk. Samtang gidiktar ni Jeremias ang mensahe ni Jehova, gisulat ni Baruk “ang tanang pulong sa linukot nga basahon nga gisunog ni Haring Jehoiakim sa Juda.”​—Jer. 36:26-28, 32.

7. Unsay lagmit nahitabo samtang nagkauban si Jeremias ug Baruk?

⁷ Ang mga tawo nga magkauban sa paglahutay sa usa ka pagsulay sagad magkasuod. Busa samtang nagkauban si Jeremias ug Baruk sa pagpuli sa linukot nga basahon nga gisunog sa daotang hari nga si Jehoiakim, lagmit mas nagkasuod sila kay ilang nakita ang maayong mga hiyas sa usag usa. Sa unsang paagi makabenepisyo ta sa ehemplo niining duha ka matinumanong lalaki?

8. Unsa tingaliy makapugong nato sa pagpakigsuod sa uban, pero nganong dili ta angayng mosurender?

⁸ Tingali malisdan ta sa pagsulti sa atong gibati ngadto sa uban tungod kay dihay nakapasakit nato kaniadto. (Prov. 18:19, 24) O tingali naghunahuna ta nga wala tay igong panahon ug kusog sa pagpakigsuod sa uban. Pero dili ta angayng mosurender. Kon gusto natong tabangan ta sa mga igsoon panahon sa pagsulay, kinahanglang makakat-on ta karon sa pagsulti kanila sa atong hunahuna ug pagbati. Importante nâ aron maugmad ang tinuod nga panaghigalaay.​—1 Ped. 1:22.

9. (a) Giunsa pagpakita ni Jesus nga may pagsalig siya sa iyang mga higala? (b) Nganong ang pagsulti sa imong gihunahuna ug gibati makatabang nimo nga mas masuod sa uban? Paghatag ug pananglitan.

⁹ Gipakita ni Jesus nga may pagsalig siya sa iyang mga higala kay wala siyay gitago kanila. (Juan 15:15) Masundog nato siya pinaagi sa pagsulti sa atong kalipay, kabalaka, ug kagul-anan ngadto sa uban. Paminaw pag-ayo dihang may makig-estorya nimo, ug tingali imong masayran nga daghan mog parehas nga hunahuna, pagbati, ug tumong. Tagda ang pananglitan ni Cindy, usa ka sister nga kapig 20 anyos. Nakigsuod siya sa usa ka payunir nga kapig 60 anyos, si Marie-Louise. Si Cindy ug Marie-Louise mag-ubag sangyaw kada Huwebes sa buntag, ug magsige silag estorya bahin sa lainlaing butang. Si Cindy miingon, “Ganahan kong makig-estorya sa mga higala bahin sa seryosong mga butang kay makatabang ni nako  nga mas mailhan ug mas masabtan sila.” Sama ni Cindy, kon isulti nimo sa uban ang imong gihunahuna ug gibati, lagmit mas magkasuod mo.​—Prov. 27:9.

10. Sumala sa Proverbio 27:17, unsay mahimong resulta kon makig-uban ta sa mga igsoon diha sa buluhaton?

¹⁰ Sama sa nahitabo kang Jeremias ug Baruk, kon makig-uban ta sa atong mga igsoon diha sa buluhaton ug maobserbahan ang ilang nindot nga mga hiyas, kita makakat-on kanila ug mas masuod kanila. (Basaha ang Proverbio 27:17.) Pananglitan, unsay imong bation kon samtang nagsangyaw ka madungog nimo ang imong higala nga maisogong midepensa sa iyang pagtuo o kinasingkasing nga mipahayag sa iyang kombiksiyon bahin kang Jehova ug sa iyang katuyoan? Lagmit mas mahalon nimo siya.

11-12. Paghatag ug pananglitan kon sa unsang paagi ang pag-ubanay sa ministeryo makatabang nga mas magkasuod ang managhigala.

¹¹ Konsideraha ang duha ka eksperyensiya nga nagpakita kon sa unsang paagi ang pag-ubanay sa ministeryo makapasuod sa mga igsoon. Si Adeline, nga 23 anyos, mihangyo sa usa sa iyang mga amiga, si Candice, nga mag-uban sila sa pagsangyaw sa teritoryo nga panagsa rang masangyawan. “Gusto namong mas madasig ug mas ma-enjoy sa ministeryo,” siya miingon. “Pareho ming nanginahanglag pagdasig aron padayon namong mahatag kang Jehova ang among kinamaayohan.” Sa unsang paagi sila nakabenepisyo sa ilang pag-ubanay? Si Adeline miingon, “Human sa tibuok adlawng pagsangyaw, maghisgot mi kon unsay among gibati, kon sa unsang paagi nadasig mi sa among pagpakig-estorya sa mga tawo, ug kon nganong makaingon mi nga gigiyahan ni Jehova ang among ministeryo. Na-enjoy gyod namo ang among panag-estoryahay ug mas nagkasuod mi.”

¹² Si Laïla ug Marianne, mga dalaga nga taga-France, misangyaw ug lima ka semana sa Bangui, ang punog tawo nga kaulohan sa Central African Republic. Nahinumdom si Laïla: “Nakasinati mi ni Marianne ug mga kalisdanan, pero tungod sa maayong komunikasyon  ug tinuod nga gugma, mas nagkasuod mi. Dihang nakita nako ang pag-adyas ni Marianne sa kahimtang, iyang gugma sa mga tawo, ug iyang kadasig sa ministeryo, mas nakadayeg ko niya.” Dili ka kinahanglang mobalhig nasod aron makaeksperyensiya niini. Sa matag higayon nga makig-uban ka sa usa ka igsoon sa pagsangyaw sa inyong teritoryo, may kahigayonan ka nga mas makaila ug mas masuod kaniya.

13. Unsay mahitabo usahay dihang makig-uban ta sa atong mga higala?

¹³ Usahay, dihang makig-uban ta sa atong mga higala, dili lang ang ilang maayong mga hiyas ang atong makita, kondili ang ila pong mga kahuyangan. Unsay makatabang nato aron dili ni makaapektar sa atong relasyon sa atong mga higala? Konsideraha pag-usab ang ehemplo ni Jeremias. Unsay nakatabang niya sa pagpokus sa maayong mga hiyas sa iyang mga higala ug pagpasaylo sa ilang mga kahuyangan?

14. Unsay nakat-onan ni Jeremias bahin kang Jehova, ug sa unsang paagi kini nakatabang kaniya?

¹⁴ Si Jeremias ang nagsulat sa basahon sa Jeremias, ug lagmit siya pod ang nagsulat sa Una ug Ikaduhang Hari. Kadto nga asaynment seguradong nakatabang niya nga mas makita ang pagkamaluluy-on ni Jehova sa dili hingpit nga mga tawo. Pananglitan, nahibalo si Jeremias nga dihang si Haring Ahab naghinulsol sa iyang daotang mga buhat, wala ipahinabo ni Jehova ang katalagman sa iyang panimalay samtang buhi pa siya aron dili niya kini makita. (1 Hari 21:27-29) Nahibalo pod si Jeremias nga mas grabe pa ang gibuhat ni Manases kay kang Ahab sa pagpasuko kang Jehova. Bisan pa niana, gipasaylo ni Jehova si Manases kay siya naghinulsol. (2 Hari 21:16, 17; 2 Cron. 33:10-13) Kadto nga mga asoy lagmit nakatabang kang Jeremias nga sundogon ang pailob ug pagkamaluluy-on sa Diyos dihang nakiglabot si Jeremias sa iyang suod nga mga higala.​—Sal. 103:8, 9.

15. Giunsa pagsundog ni Jeremias ang pagkamapailobon ni Jehova dihang nawala ang pokus ni Baruk sa iyang asaynment?

¹⁵ Konsideraha kon giunsa pagtabang ni Jeremias si Baruk dihang temporaryong nawala ang iyang pokus sa iyang asaynment. Imbes maghunahuna dayon nga dili na magbag-o si Baruk, iyang gitabangan si Baruk pinaagi sa pagsulti sa mahigugmaon pero prangkang mensahe sa Diyos para kaniya. (Jer. 45:1-5) Unsay atong makat-onan niini?

16. Sumala sa Proverbio 17:9, unsay kinahanglan natong buhaton aron magpabiling suod sa atong mga higala?

¹⁶ Sa pagkatinuod, dili ta makadahom nga dili masayop ang atong mga igsoon. Busa kon naa tay bag-ong masuod, kinahanglang maningkamot ta nga magpabiling suod kanila. Kon masayop ang atong mga higala, tingali kinahanglan nato silang hatagag mahigugmaon pero prangkang tambag base sa Pulong sa Diyos. (Sal. 141:5) Ug kon mapasakitan ta nila, kinahanglan nato silang pasayloon. Kon gipasaylo na nato sila, dili na nato balikbalikog estorya ang ilang nahimo. (Basaha ang Proverbio 17:9.) Importante kaayo niining lisod nga mga panahon nga magpokus ta sa maayong mga hiyas sa atong mga igsoon imbes sa ilang mga kahuyangan! Pinaagi niana, mas masuod ta kanila. Importante nâ kay magkinahanglan tag suod nga mga higala panahon sa dakong kasakitan.

17. Sa unsang paagi si Jeremias nahimong tinuod nga higala panahon sa kalisdanan?

¹⁷ Gipamatud-an ni Jeremias nga tinuod siyang higala panahon sa kalisdanan. Pananglitan, human luwasa si Jeremias sa opisyal sa palasyo nga si Ebed-melek aron dili mamatay sa  lapokong gahong, si Ebed-melek nahadlok nga himoan siyag daotan sa mga prinsipe. Dihang nahibaloan kini ni Jeremias, wala siya magpakahilom, nga maghunahuna nga ang iyang higala makalahutay rag iya. Bisag napriso si Jeremias, gihimo niya kon unsay iyang mahimo. Gipaambit niya sa iyang higalang si Ebed-melek ang makapahupayng saad ni Jehova.​—Jer. 38:7-13; 39:15-18.

18. Sumala sa Proverbio 17:17, unsay imong himoon dihang naa sa kalisdanan ang imong higala?

¹⁸ Karon, ang atong mga igsoon lainlaig giatubang nga kalisdanan. Pananglitan, daghan ang nag-antos sa mga katalagman nga gipahinabo sa kinaiyahan o sa tawo. Dihang mahitabo nâ, tingali ang uban kanato makahimo sa pagpapuyo sa atong mga igsoon sa atong balay. Ang uban sab tingali motabang sa pinansiyal. Pero kitang tanan makahimo sa pag-ampo kang Jehova nga tabangan ang atong mga igsoon. Kon masayran nato nga ang usa ka igsoon naluya, tingali dili ta mahibalo kon unsay isulti o buhaton. Pero kitang tanan makatabang. Pananglitan, puwede tang mogahin ug panahon nga ubanan ang atong higala. Puwede sab nga sinsero tang maminaw dihang mosulti siya sa iyang gibati. O kaha ipaambit nato kaniya ang atong paborito nga makapahupayng teksto. (Isa. 50:4) Ang pinakaimportante mao nga andam kang motabang sa imong mga higala dihang gikinahanglan ka nila.​—Basaha ang Proverbio 17:17.

19. Sa unsang paagi ang atong pagpakigsuod sa mga igsoon karon makatabang nato sa umaabot?

¹⁹ Kinahanglang determinado tang makigsuod pag-ayo sa atong mga igsoon karon ug maningkamot nga magpabiling suod kanila. Ngano? Tungod kay ang atong mga kaaway maningkamot nga magkabahinbahin ta pinaagi sa sayop nga mga impormasyon. Gusto nilang mawad-an tag pagsalig sa usag usa ug dili magtinabangay. Pero dili sila molampos. Dili nila mabungkag ang atong gugma sa usag usa. Bisag unsay ilang buhaton, di gyod maputol ang atong panaghigalaay. Gani, kini magpabilin dili lang hangtod sa kataposan niining sistemaha, kondili hangtod sa hangtod!