1-2. Sèlon 1 Pyè 4:7, 8, ka ki pé édé-nou andiré ?

« DÈNYÉ jou » a sistèm-lasa toupré bout, é pétèt akòz dè sa nou ka jwenn gwo difikilté (2 Tim. 3:1). Pa ègzanp, adan on péyi an Afrik, apré élèksyon fin, té ni gwo konba an lari-la. Ni dé frè é sè ki té ka viv la sé konba-la té ka fèt la é pannan plis ki 6 mwa, yo pa té annéta déplasé kon yo té vlé. Ka ki édé-yo tchenbé magré tout sé difikilté-lasa ? Ni sa adan yo ki ay ondòt koté, aka dòt frè é sè, pou yo té ansékirité. Mi sa on frè rakonté : « Adan sitiyasyon-lasa, an té kontan toubònman davwa an té plen zanmi alantou an mwen. Yonn té pé ankourajé lòt. »

² Lè « gwo tribilasyon-la » ké koumansé, nou ké kontan vwè zanmi an nou alantou an nou, dé zanmi ki enmé-nou (Rév. 7:14). Nou ka tou konprann, kè dépi konnyéla, fò-nou konstwi dé lanmityé ki solid èvè frè é sè an nou (li 1 Pyè 4:7, 8). Ègzanp a Jérémi itil pou nou toubònman. Sé pas bon-zanmi a-y édé-y, i pa mò avan yo té détwi Jérizalèm *. Ka nou pé fè pou imité-y ?

3. a) Ka ki té’é pé pousé Jérémi mété-y apa ? b) Ka Jérémi rakonté Bawouk, é ki rézilta sa ba-y ?

³ Pannan omwen 40 an, Jérémi viv pawmi moun ki pa té fidèl a Bondyé. I té ka viv a Anatòt, é i té ni déotwa vwazen é pétèt osi sèwten moun an fanmi a-y ki té arété adoré Jéova (Jér. 11:21 ; 12:6). Men apapousa, i chèché a mété-y apa. Olyé dè sa, i di Bawouk, sèkrétè a-y ki té fidèl, sa i té ka rèsanti. É konm sa i di Bawouk ka touvé-y adan liv-la i ékri la, noumenm osi nou okouran a sa i té ka rèsanti (Jér. 8:21 ; 9:1 ; 20:14-18 ; 45:1). Nou ka tou  konprann kè pannan Bawouk té ka ékri sa ki té ka rivé Jérémi, yonn vin enmé lòt fò é yonn aprann rèspèkté lòt onlo toubònman (Jér. 20:1, 2 ; 26:7-11).

4. Ki misyon Jéova té ba Jérémi, é kijan misyon-lasa fè Bawouk é Jérémi vin pi bon zanmi ankò ?

⁴ Pannan on bon enpé lanné, Jérémi rété ka avèti sé Izraélit-la pou di-yo ka ki ké rivé a Jérizalèm. É i fè sa èvè onlo kouraj (Jér. 25:3). Jéova té vlé éséyé ondòt biten pou fè sèwvitè a-y konprann kè fò-yo té rèpanti-yo ; kifè, i mandé Jérémi ékri avèwtisman a-y adan on woulo (Jér. 36:1-4). Travay-lasa kè Bondyé ba-yo la dwèt pran plizyè mwa é Jérémi é Bawouk fè-y ansanm-ansanm. Alò asirésèten, yo té ka ni dé bèl konvèwsasyon ki rann fwa a yo pi fò.

5. Kijan Bawouk montré kè i té bon bon zanmi a Jérémi ?

⁵ Aprésa, moman-la rivé pou té fè moun konnèt sa ki té maké adan woulo-la. Jérémi té oblijé fè Bawouk konfyans, piskè sé Bawouk ki té kay li woulo-la ba pèp-la (Jér. 36:5, 6). Misyon-lasa té danjéré, men Bawouk akonpli-y èvè onlo kouraj. I ay adan lakou a Tanp-la é i fè sa Jérémi té mandé-y. Jérémi dwèt té fyèw dè nonm-la toubònman ! (Jér. 36:8-10). Prens a Jida tann palé dè sa Bawouk fè, é yo oblijé-y vin li woulo-la ba yo ! (Jér. 36:14, 15). Yo désidé rakonté Wa Joakim tousa Jérémi té di. Konm yo té ni tibwen konsidérasyon pou Bawouk, mi sa yo di-y : « Ay kaché-zòt, vou é Jérémi, é pa di ponmoun la zò yé » (Jér. 36:16-19). Sé té on bon konsèy toubònman !

6. Kijan Jérémi é Bawouk réyaji lè yo té ka pèwsékité-yo ?

⁶ Lè Wa Joakim tann pawòl a Jérémi, i fè gwo kòlè : i brilé woulo-la é i di mèt  Jérémi é Bawouk lajòl ! Men, Jérémi pa lésé sa frenné-y. I pran ondòt woulo, i ba Bawouk li é i di-y maké mésaj a Jéova ; Jérémi té ka di Bawouk sa pou i té ékri é Bawouk maké « tout sé déklarasyon-la ki té adan woulo-la Wa Joakim, Wa a Jida, té brilé an difé-la » (Jér. 36:26-28, 32).

7. Toupannan Jérémi é Bawouk té ka travay ansanm, ka ki dwèt pasé ?

⁷ Byensouvan, lè dé moun ka travèsé plizyè moman difisil ansanm, sa ka rapwoché-yo. Jérémi é Bawouk travay ansanm pannan on bon enpé tan pou yo té pé sa ranplasé woulo-la Joakim té brilé la. Sé on wa ki té méchan ! Nou ka tou konprann kè pannan tout tan-lasa yo vin konnèt-yo pli byen é yo vin pi bon zanmi ankò. Kijan ègzanp a sé 2 nonm fidèl lasa pé itil pou nou ?

8. Ka ki té’é pé anpéché-nou konstwi dé lanmityé ki solid, é poukwa fò pa nou mèt an tèt an nou kè nou pé’é jen rivé fè sa ?

⁸ Défwa, nou ni dimal a wouvè tchè an nou ba lézòt pas on moun ni lokazyon blésé-nou dan lèpasé (Pwov. 18:19, 24). Oben pou nou, nou pa ni asé tan é asé énèwji pou nou konstwi dé lanmityé ki solid. Sèlman, fò pa nou mèt an tèt an nou kè nou pé’é jen rivé fè sa. Si nou vlé kè frè é sè an nou soutyenn-nou lè nou ké ka jwenn éprèv, sé dépi konnyéla pou nou aprann fè-yo konfyans. Sé dépi alè osi pou nou aprann di-yo sa nou ka pansé é sa nou ka rèsanti. Sé on biten ki enpòwtan toubònman si nou vlé konstwi dé lanmityé ki vréman solid (1 Pyè 1:22).

9. a) Kijan Jézi montré zanmi a-y kè i té ka fè-yo konfyans ? b) Lè ou ka wouvè tchè a-w pou lézòt, kijan sa ka édé-w vin pi bon zanmi èvè yo ? Bay on ègzanp.

⁹ Jézi montré zanmi a-y kè i té ka fè-yo konfyans pas i té ka palé ba yo franchman é i pa té ka kaché-yo ayen (Jan 15:15). Nou pé imité-y si nou ka palé zanmi an nou dè sa ki ka mèt jwa an tchè an nou, dè sa ki ka enkyété-nou é dè sa ki ka kontraryé-nou. Lè on moun ka palé ba-w, pran tan kouté-y byen. Pétèt ou ké rann-vou kont kè zò ni menm òbjèktif, kè zò ka pansé menmjan-la é kè zò ka rèsanti menm biten-la. An-nou pran ka a Cindy, on sè ki ni 29 an. I vin bon zanmi èvè Marie-Louise, ki pyonyé é ki ni 67 an. Cindy é Marie-Louise ka préché ansanm touléjédi maten, é yo ka palé dè tout kalté biten san pwoblèm. Mi sa Cindy ka èspliké : « An enmé palé pawòl séryé èvè  zanmi an mwen piskè sa ka édé-mwen konnèt-yo plibyen é an ka rivé konprann-yo plibyen osi. » Pou 2 moun vin zanmi, lè yo ka diskité, fò ni on bon anbyans é fò yonn ka wouvè tchè a-y ba lòt. Menmjan ki Cindy, si lè ou ka palé èvè zanmi a-w ou ka di-yo sa ou ka pansé é sa ou ka rèsanti, zò ké vin pi bon zanmi ankò (Pwov. 27:9).

10. Dapré sa ki maké an Pwovèb 27:17, ki rézilta sa ka bay lè nou ka kolaboré èvè zanmi an nou ?

¹⁰ Menmjan sa fèt pou Jérémi é Bawouk, lè nou ka kolaboré èvè frè é sè an nou, nou ka vwè sé bèl kalité-la yo ni la, nou ka pran ègzanp asi yo é nou ka vin pi bon zanmi èvè yo (li Pwovèb 27:17). Pa ègzanp, lè ou ka préché èvè on frè oben on sè, ka ou ka rèsanti lè ou ka vwè jan i ka défann fwa a-y èvè kouraj ? É si lè i ka palé dè Jéova, é dè sa Jéova ni lentansyon fè, i sèten dè sa i ka di é i sensè, ka ou ka rèsanti ? Sèten ou ka vin pli bon zanmi èvè-y ankò.

11-12. Lè nou ka préché èvè zanmi an nou sa pé édé-nou vin pi bon zanmi ankò. Kijansa ? Bay on ègzanp.

¹¹ An-nou pran 2 ègzanp ki ka montré kè lè nou ka préché sa ka fè-nou vin pli soudé. Adeline, on sè ki ni 23 an, mandé Candice on zanmi a-y, dè ay préché èvè-y adan on téritwa yo pa’a fè souvan. Mi sa i ka di : « Nou té vlé travay plis pou Jéova é nou té anvi pran plis plézi an travay a prédikasyon-la. Nou toulédé té bizwen bon tibwen ankourajman pou nou té vin pi èspirityèl. » Difètkè yo travay konsa men-dan-lamen, ka sa pòté ba yo ? Adeline ka réponn : « Dépi ou vwè jouné-la té fin, nou té ka palé dè sa nou té ka rèsanti. Nou té ka palé osi dè sa ki touché-nou adan sé konvèwsasyon-la nou té ka ni la é dè jan nou vwè Jéova gidé-nou. Nou toulédé té enmé sé diskisyon-lasa, é grasa sa, nou aprann konnèt-nou plibyen ankò. »

 ¹² Laïla é Marianne, 2 sè sélibatè ki ka viv an Fwans, ay préché 5 simenn a Bangui, on vil ki plen animasyon é ki sé kapital a Lasantrafrik. Mi sa Laïla ka rakonté : « Mwen èvè Marianne, nou jwenn difikilté, men konm nou toujou té ka palé dè tout biten é nou té enmé-nou vréman, nou vin pi bon zanmi ankò. An ni lokazyon konstaté kè Marianne sé on moun ki sav fè kò èvè on nouvo sitiyasyon, kè i enmé sé moun-la onlo é kè i ka travay rèd an prédikasyon. An ka rèspèkté-y plis ankò. » Ou pa bizwen ay viv adan ondòt péyi pou-w pé sa konnèt sé bénédisyon-lasa. Chakfwa ou ka préché èvè on frè oben on sè adan téritwa a lasanblé lokal a-w, sé on lokazyon pou aprann konnèt-li plibyen é pou konsolidé lanmityé a zòt.

13. Lè nou ka travay toutlè èvè zanmi an nou, ka nou pé rivé a vwè ?

¹³ Pawfwa, lè nou ka travay toutlè èvè zanmi an nou, nou ka rèmawké kalité a yo men nou ka vwè défo a yo osi. Ka ki pé édé-nou rété bon zanmi èvè yo magré yo ka fè érè ? An-nou wouviré pran ègzanp a Jérémi. Ka i fè pou i té kontinyé konsantré-y asi kalité a zanmi a-y é ka i fè pou i té pasé asi érè a yo ?

14. Ka Jérémi aprann asi Jéova, é kijan sa édé-y ?

¹⁴ I ka sanm sa sé Jérémi ki ékri liv a Labib la ki ka pòté menm non ki-y é i ékri osi dézòt liv : 1 Wa é 2 Wa. Grasa travay-lasa, sèten i ni lokazyon konstaté kantité mizérikòd Jéova ni pou moun ki enpawfè. Pa ègzanp, i té sav kè, konm wa Akab té rèpanti-y parapòt a sa i fè ki pa té bon, Jéova ba-y on favè é i pa lésé-y vwè kantité malè ki té kay rivé fanmi a-y (1 Wa 21:27-29). I té sav osi, kè lè Manasé rèpanti-y, Jéova té padonné-y. Époutan, lè Manasé péché kont Jéova, i fè pi mové biten ki Akab ankò (2 Wa 21:16, 17 ; 2 Kron. 33:10-13). Tout sé istwa-lasa dwèt édé Jérémi imité pasyans a Jéova é mizérikòd a-y lè i té ka aji èvè bon-zanmi a-y (Sòm 103:8, 9).

15. Kijan Jérémi imité pasyans a Jéova lè Bawouk lésé dòt biten pran plas a misyon-la Jéova té ba-y la ?

¹⁵ Sonjé kijan Jérémi aji èvè Bawouk. Pannan on ti moman, Bawouk lésè dòt biten pran plas a misyon-la Jéova té ba-y la. Men olyé Jérémi té lésé zanmi a-y tonbé, i édé-y. É pousa i transmèt-li on mésaj ki té ka vin dè Bondyé, on mésaj ki té fran men ki té plen bonté osi (Jér. 45:1-5). Ki lèson istwa-lasa ka aprann-nou ?

16. Sèlon Pwovèb 17:9, ka pou nou fè pou nou rété bon zanmi èvè frè é sè an nou ?

¹⁶ On biten ki klè, sé kè fò pa nou konpranndèdi kè frè é sè an nou ké aji on mannyè ki pawfè. Kifè, apré nou vin zanmi èvè on moun, fò-nou fè éfò pou lanmityé-lasa diré. Si zanmi a-w fè on érè, pétèt kè fò ou ké ba-y on konsèy ki bazé asi Labib. Fò ou ké palé ba-y èvè onlo bonté men fò ou ké palé franchman osi (Sòm 141:5). É si i fè-w on biten ki fè-w mal, fò-w padonné-y. É lèwvwè ou padonné-y, fè atansyon pou-w pa ay palé dè sa ki pasé (li Pwovèb 17:9). Konm épòk-la nou ka viv la rèd a sipòté, sa vréman nésésè kè nou konsantré-nou asi kalité a frè é sè an nou olyé nou arété-nou asi défo a yo ! Si nou aji konsa, nou ké vin pi bon zanmi èvè yo. Sa enpòwtan kè nou fè sa dépi konnyéla pas lè gwo tribilasyon-la ké pété, nou ké bizwen ni dé bon-zanmi, dé zanmi-frè akoté an nou.

17. Poukwa nou ka di kè Jérémi montré kè i té on zanmi fidèl lè malè té ka rivé ?

¹⁷ Pwofèt Jérémi montré kè i té on zanmi fidèl, lè malè té ka rivé. Sé sa i montré lè i édé Ébèd-Mélèk, on fonksyonnè ki té ka travay an chato a Wa-la. Ébèd-Mélèk ni lokazyon sové vi a Jérémi, lè i fè Jérémi sòti adan on sitèn ki té plen labou. Men aprésa, i touvé-y pè sé prens-la, pas i konpranndèdi yo té’é fè-y vwè mizè. Lè Jérémi aprann sa, i pa rété la lébwa kwazé. I pa enki rété la ka èspéré kè zanmi a-y ké débouyé-y tousèl a-y. Magré i té lajòl, i fè tousa i té pé pou édé zanmi a-y : i fè-y konnèt on bèl pwomès ankourajan ki té ka vin dè Jéova (Jér. 38:7-13 ; 39:15-18).

18. Sèlon Pwovèb 17:17, ka pou nou fè lè on zanmi an nou ka jwenn difikilté ?

¹⁸ Jòdijou, frè é sè an nou ka jwenn tout kalté difikilté ki tini. Pa ègzanp, ni onlo adan yo ki ka soufè akòz dè katastwòf natirèl oben dè lagè. Lè sé biten-lasa ka rivé, pétèt kè sèwten pawmi nou pé akéyi sé frè é sè-lasa akaz a yo. Pétèt kè nou pé lonji-yo on ti monné pou édé-yo osi. Men on biten noutout pé fè, sé mandé Jéova édé-yo. Lè nou ka aprann kè on frè oben on sè dékourajé, pétèt nou pa sav ka pou nou di-y ni ka pou nou fè. Men ni mwayen noutout édé-y. É nou pé fè sa an diféran fason. Pa ègzanp, nou pé òwganizé-nou pou pasé on timoman èvè-y. Lè i ka palé, nou pé kouté-y èvè onlo konpasyon. É si nou ni on vèwsé biblik nou pi enmé, nou pé li vèwsé-lasa ba-y (Iz. 50:4). Men sa ki pi enpòwtan, sé kè zanmi an nou touvé-nou lè yo bizwen nou (li Pwovèb 17:17).

19. Si nou ka konstwi dé lanmityé ki solid dépi konnyéla, kijan sa ké édé-nou plita ?

¹⁹ Dépi konnyéla, fò-nou byen désidé a konstwi dé lanmityé solid èvè frè é sè an nou é fò-nou fè éfò pou sé lanmityé-lasa diré. Poukwa ? Paskè lènmi an nou ka chèché a mèt pwoblèm antrè nou é pousa yo ka simé manti asi nou. Yo ka chèché a fè-nou viré yonn kont lòt. Men yo pé’é pé rivé about. Yo pé’é jen rivé fè-nou arété enmé frè é sè an nou. Kèlkèswa sa yo fè, yo pé’é jen rivé krazé sé bèl lanmityé-la nou konstwi la. An réyalité, a pa yenki an sistèm-lasa nou ké rété bon-zanmi èvè frè é sè an nou, men nou ké rété zanmi èvè yo pou touttan !