1, 2. Asegún 1 Pedro 4:7, 8, ¿mbaʼépa ñanepytyvõta jagueropuʼaka hag̃ua umi situasión ijetuʼúva?

OÑEMOHUʼÃVO ohóvo ‘umi ára paha’ ikatu hína jahasa umi mbaʼe ijetuʼuetereíva (2 Tim. 3:1). Por ehémplo, oiko rire votasión peteĩ país oĩvape Áfricape, umi hénte oñepyrũ oiko vaipa ha oñorairõmba. Mas de 6 méserupi ñane ermanokuéra ojapeligra ha ndaikatúi oĩ trankílo pórke umi hénte oñorairõnte voi oikóvo. ¿Mbaʼépa oipytyvõ chupekuéra oaguanta hag̃ua upe situasión? Unos kuánto ermáno oho ojerrefuhia ótro ermáno rógape oikóva peteĩ lugár isegurovévape. Peteĩ ermáno heʼi: “Ko situasiónpe avyʼaiterei kuri aime haguére che amigokuérandi. Upéicha enterovéva ikatu kuri roñomokyreʼỹ”.

² Oñepyrũ vove pe ‘jehasa asy guasu’, javyʼaitereíta jaguereko haguére amígo ñanderayhúva (Apoc. 7:14). Upévare iñimportanteterei koʼág̃ama voi ñañehaʼã jareko amígo verdadéro (elee 1 Pedro 4:7, 8). Heta mbaʼe ikatu ñaaprende umi mbaʼe ohasa vaʼekuégui proféta Jeremías. Oñehundi mboyvemi Jerusalén, umi iñamígo tee tuichaiterei oipytyvõ vaʼekue chupe ani hag̃ua omano. * ¿Mbaʼéichapa ikatu jasegi Jeremías ehémplo?

3. a) ¿Mbaʼépa ikatu kuri ogueraha Jeremíaspe oñemohaʼeño hag̃ua? b) ¿Mbaʼépa Jeremías omombeʼu isekretário Barúcpe, ha mbaʼépa oiko upe haguére?

³ Cuarenta áño aja rupi, Jeremías oiko vaʼekue umi hénte itraisionérova apytépe, umíva ningo haʼe vaʼekue ivesíno térã ikatu voi ihentekuéra oikóva Anatótpe, pe siuda haʼe onase hague  (Jer. 11:21; 12:6). Upéicharõ jepe, haʼe noñemohaʼeñói vaʼekue. Upéva rangue, Jeremías omombeʼu mbaʼéichapa oñeñandu Barúcpe, isekretário ifieletévape, ha ñande jaikuaa avei mbaʼéichapa haʼe oñeñandu vaʼekue pórke umi mbaʼe ojeskrivi la Bíbliape (Jer. 8:21; 9:1; 20:14-18; 45:1). Katuete oiméne pe tiémpo ohasa vaʼekue hikuái oñondive, Baruc oskrivi aja umi mbaʼe Jeremías ohasa vaʼekue, oipytyvõne raʼe chupekuéra ojorrespeta ha oñomombaʼeve hag̃ua (Jer. 20:1, 2; 26:7-11).

4. a) ¿Mbaʼépa Jehová ojerure vaʼekue Jeremíaspe ojapo hag̃ua? b) ¿Mbaʼéichapa ko asignasión omombarete pe amista orekóva Jeremías ha Baruc?

⁴ Heta áñore, Jeremías pyʼaguasúpe oavisa vaʼekue umi israelítape mbaʼépa oikóta Jerusalén rehe (Jer. 25:3). Oñehaʼã jeývo umi israelita oñarrepenti hag̃ua, Jehová heʼi Jeremíaspe oskrivi hag̃ua peteĩ lívrope umi avíso omeʼẽ vaʼekue (Jer. 36:1-4). Jeremías ha Baruc ombaʼapóne raʼe heta mésere okumpli hag̃ua pe asignasión Ñandejára omeʼẽ vaʼekue chupekuéra, ha upe aja oiméne oñemongeta hikuái umi mbaʼe oipytyvõtavare chupekuéra omombarete hag̃ua ijerovia.

5. ¿Mbaʼérepa jaʼekuaa Baruc haʼe hague Jeremías amígo teete?

⁵ Ojeskrivipa rire pe lívro, Jeremías oasigna vaʼerã kuri iñamígo Barúcpe ontrega hag̃ua umi héntepe pe mensáhe (Jer. 36:5, 6). Ko asignasión ipeligróso kuri, péro Baruc pyʼaguasúpe okumpli vaʼekue. ¡Eñeimahinamína mbaʼeichaitépa oiméne Jeremías ovyʼáne raʼe oikuaávo Baruc oho hague pe témplope ha olee pe lívro umi héntepe! (Jer. 36:8-10). Umi prínsipe oĩva Judápe oikuaárõ guare Baruc ojapo vaʼekue, heʼi chupe olee hag̃ua avei chupekuéra pe lívro (Jer. 36:14, 15). Upe rire, umi prínsipe odesidi omombeʼu rréi Jehoiaquímpe umi mbaʼe Jeremías heʼi vaʼekue. Imbaʼeporã rupi hikuái, umi prínsipe heʼi Barúcpe: “Tapeho pekañy, nde ha Jeremías ha ani peikuaauka avavépe moõpa peime”  (Jer. 36:16-19). Upe konsého añetehápe iporãiterei kuri.

6. ¿Mbaʼépa ojapo raʼe Jeremías ha Baruc oĩrõ guare oñemoĩva hesekuéra?

⁶ Pe rréi Jehoiaquim ipochyeterei ohendu rire la Jeremías oskrivi vaʼekue, upémarõ ohapy pe lívro ha omanda ojejagarra hag̃ua proféta Jeremíaspe ha isekretário Barúcpe. Péro upéva nomongyhyjéi Jeremíaspe. Haʼe ojagarra jey ótro lívro, omeʼẽ Barúcpe ha heʼi chupe oskrivi hag̃ua pype Jehová mensáhe. Upémarõ Baruc oskrivi “opa mbaʼe heʼi vaʼekue pe lívro rréi Jehoiaquim de Judá ohapy vaʼekue tatápe” (Jer. 36:26-28, 32).

7. ¿Mbaʼépa oiméne oiko raʼe Jeremías ha Baruc ombaʼapórõ guare oñondive?

⁷ Pyʼỹinte umi persóna ohasáva oñondive peteĩ pruéva ijetuʼúva opyta oñoamigoite upe rire. Upévare ikatu jaʼe Jeremías ha Baruc oskrivi jeýrõ guare pe lívro rréi Jehoiaquim ohapy vaʼekue, haʼekuéra oiméne ojokuaa porãve ha omombaretevéne raʼe pe amista orekóva hikuái. ¿Mbaʼépa ikatu ñaaprende koʼã mokõi kuimbaʼe ifiélva ehémplogui?

8. ¿Mbaʼépa ikatu ñandejoko ñakonsegi hag̃ua amígo tee, péro mbaʼérepa jasegi vaʼerã ñañehaʼã?

⁸ Oiméramo algúno ñanemoñeñandu vai raʼe yma, ikatu ijetuʼu ñandéve ñamombeʼu hag̃ua ótrope ñapensáva ha ñañandúva (Prov. 18:19, 24). Ikatu avei sapyʼánte ñapensa ndajarekoiha tiémpo térã ñanekaneʼõitereimaha ñañehaʼã hag̃ua ñakonsegi amígo tee. Upéicharõ jepe, jasegi vaʼerã ñañehaʼã. Jaipotáramo ñane ermanokuéra oĩ ñande ykére jahasa vove umi situasión ijetuʼúvare, tekotevẽ koʼág̃ama voi jajerovia hesekuéra ha ñamombeʼu chupekuéra ñapensáva ha ñañandúva. Upéva ningo iñimportanteterei jareko hag̃ua amígo verdadéro (1 Ped. 1:22).

9. a) ¿Mbaʼéichapa Jesús ohechauka vaʼekue ojeroviaha iñamigokuérare? b) ¿Mbaʼéichapa oñemombareteve ñane amista ñañemongetáramo lívremente ñane amigokuérandi? Emombeʼu peteĩ ehémplo.

⁹ Jesús ohechauka vaʼekue ojeroviaha iñamigokuérare oñemongetávo hendivekuéra lívremente ha oñomiʼỹre chuguikuéra mbaʼeve (Juan 15:15). Ñande ikatu avei jasegi iñehémplo ñamombeʼúramo ñane amigokuérape umi mbaʼe ñanembovyʼáva, ñandepyʼapýva ha ñanemoñeñandu vaíva. Oĩramo álgien oñemongetáva ñanendive, jajapysaka porã vaʼerã hese, pórke upéicha ikatu hína jahechakuaa jajoguaha upe persónape heta mbaʼépe, tahaʼe umi mbaʼe ñapensáva, ñañandúva térã umi méta jahupytysévape. Jahechamína Cindy ehémplo, peteĩ ermána oguerekóva 29 áño. Haʼe oñamiga vaʼekue María Luísare, * peteĩ ermána prekursóra orekóva 67 áño. Káda jueves pyhareve haʼekuéra osẽ  opredika oñondive ha oñemongeta heta mbaʼére. Cindy omombeʼu: “Igustoiterei ningo chéve añemongetáramo che amigokuérandi umi mbaʼe iñimportántevare, pórke upéva chepytyvõ aikuaa ha antende porãve hag̃ua chupekuéra”. Imbareteve hag̃ua ñane amista ñane amigokuérandi, ñañemongeta vaʼerã hendivekuéra ha ñahendu chupekuéra oñeʼẽ jave. Upévare, jajapókena Cindy ojapo haguéicha ha ñañehaʼã ñande voi ñañemongeta lívremente ótrondi (Prov. 27:9).

10. Heʼiháicha Proverbios 27:17, ¿mbaʼépa ikatu oiko ñambaʼapóramo ñane ermanokuérandi?

¹⁰ Oiko haguéicha Jeremías ha Baruc rehe, ñambaʼapóramo ñane ermanokuérandi ha jahecha umi kualida porãite orekóva hikuái, ñande ñaaprende chuguikuéra ha ñamombarete ñane amista hendivekuéra (elee Proverbios 27:17). Por ehémplo, ¿mbaʼéichapa ñañeñandu japredika jave peteĩ ermánondi ha ñahendu mbaʼéichapa odefende pyʼaguasúpe umi mbaʼe ogueroviáva, térã oñeʼẽ Jehováre ha umi ipromesakuérare ipyʼaite guive? Katuete oiméne jahayhuve upe ñane ermánope.

11, 12. Emombeʼu peteĩ ehémplo ohechaukáva mbaʼéichapa ñanepytyvõ japredikáramo ñane ermanokuérandi.

¹¹ Jahechami mokõi ehémplo ohechaukáva mbaʼéichapa oñemombareteve ñane amista japredikáramo oñondive. Adelina, peteĩ ermána orekóva 23 áño, heʼi iñamíga Camílape oho hag̃ua oñondive opredika peteĩ lugár ndojepredikaguasúivape. Adelina heʼi: “Ore ningo orekyreʼỹseve kuri ha rovyʼaseve predikasiónpe. Rojapo vaʼerã kuri álgo orepytyvõva rosegi hag̃ua romeʼẽ Jehovápe pe iporãvéva”. ¿Mbaʼéichapa oipytyvõ chupekuéra opredika haguére oñondive? Adelina omombeʼu: “Káda día ropredikapa rire roñemongeta mbaʼéichapa roñeñandu, mbaʼe mbaʼépa oremokyreʼỹ roñemongeta rire peteĩ persónandi, ha mbaʼéichapa rohecha Jehová gía rojapokuévo ko tembiapo. Tuichaiterei ningo oremokyreʼỹ roñemongeta koʼã mbaʼére ha orepytyvõ rojokuaa porãve hag̃ua”.

¹² Laila ha Mariana ningo mokõi ermána soltéra oikóva Fránciape. Haʼekuéra oho vaʼekue opredika 5 semána aja Banguípe, haʼéva pe  kapitál República Centroafricanapegua. Laila imanduʼa: “Mariana ha che roñaprovlemaʼimi kuri, péro roñemongeta porã ha rojoayhu rupi imbareteve ore amista. Che ahechakuaa Mariana ensegída ojadapta hague umi kámbiore, ohayhuha umi hénte oikóvape upépe, ha mbaʼeichaitépa ikyreʼỹ predikasiónpe. Koʼã mbaʼe chepytyvõ amombaʼeve hag̃ua chupe”. Natekotevẽi ningo jaha ótro paíspe ñañandu hag̃ua koʼã mbaʼe. Jaaprovechákena japredika jave peteĩ ermáno térã ermánandi jaikuaa porãve hag̃ua chupe, ha ñamombareteve hag̃ua pe amista jaguerekóva hendive.

13. ¿Mbaʼépa ikatu avei oiko ñambaʼapo jave ñane ermanokuérandi?

¹³ Sapyʼánte ñambaʼapo jave ñane ermánondi, ndahaʼéi umi mbaʼe porãnte la jahecháva, síno avei umi defékto orekóva hikuái. ¿Mbaʼépa ikatu ñanepytyvõ péicha jave? Jahecha jeýna Jeremías ehémplo. ¿Mbaʼépa oipytyvõ raʼe chupe ohecha hag̃ua umi kualida porã orekóva iñamigokuéra ha operdona hag̃ua ofalla jave hikuái?

14. ¿Mbaʼépa Jeremías oaprende Jehovágui, ha mbaʼéichapa upéva oipytyvõ chupe?

¹⁴ Jeremías oskrivi vaʼekue pe lívro oraháva héra ha amalisia avei umi lívro de 1 ha 2 de los Reyes. Añetehápe ko asignasión rupive haʼe ohechakuaa Jehová oiporiahuverekoha umi yvyporakuéra imperféktope. Por ehémplo, Jeremías oikuaa porã rréi Acab oñarrepenti rupi hembiapo vaígui, Jehová ndohejái hague haʼe ohecha mbaʼéichapa oñehundi kompletoite ifamília (1 Rey. 21:27-29). Jeremías oikuaa avei Manasés ojapo hague hetaiterei mbaʼe vai ombopochy hag̃ua Jehovápe, hetave mbaʼe rréi Acab ojapo vaʼekuégui jepe. Upéicharõ jepe, Jehová operdona Manaséspe oñarrepenti rupi (2 Rey. 21:16, 17; 2 Crón. 33:10-13). Koʼã mbaʼe oiko vaʼekue katuete oipytyvõne raʼe Jeremíaspe osegi hag̃ua Ñandejára ehémplo, ikatu hag̃uáicha ipasiénsia ha oiporiahuvereko iñamigokuérape (Sal. 103:8, 9).

15. ¿Mbaʼéichapa Jeremías osegi Jehová ehémplo ohechaukávo ipasiensiaha Baruc ojedistraérõ guare?

¹⁵ Ñapensamína mbaʼéichapa Jeremías oipytyvõ iñamígo Barúcpe ojedistrae ha nokumpliporãvéirõ guare hembiapo. Jeremías ningo nopensái Baruc naipohãveimaha, upéva rangue oipytyvõ chupe. ¿Mbaʼéichapa? Jeremías omombeʼu Barúcpe peteĩ mensáhe oúva Ñandejáragui, upe mensáhe rupive Ñandejára okorrehi Barúcpe derechoite péro mborayhúpe (Jer. 45:1-5). ¿Mbaʼépa ikatu ñaaprende upévagui?

16. Heʼiháicha Proverbios 17:9, ¿mbaʼépa jajapo vaʼerã ani hag̃ua opa pe amista jarekóva ñane ermanokuérandi?

¹⁶ Jaʼe porãsérõ g̃uarã, ndaikatúi voi ñahaʼarõ perfeksión ñane ermáno ha ermanakuéragui. Upévare, jaikuaa porã rire peteĩ ermánope ha ñañeamiga hese, jasegi vaʼerã ñañehaʼãmbaite ani hag̃ua opa pe amista jarekóva hendive. Ñane amígo ojapóramo álgo naiporãiva, tekotevẽ ñaakonseha chupe la Biblia rupive ha ñamombeʼu porã chupe mbaʼépepa ofalla, péro jajapo vaʼerã upéva mborayhúpe (Sal. 141:5). Ha oiméramo ofalla ñanendive, ñaperdona vaʼerã chupe. Upe rire ñañehaʼã vaʼerã ponove jahekýi ojupe umi mbaʼe ñaperdonáma vaʼekue (elee Proverbios 17:9). Koʼã tiémpo ijetuʼuetévape iñimportanteterei jajesareko umi kualida porã orekóvare ñane ermanokuéra, jajesareko rangue idefektokuérare. Péicha imbaretevéta pe amista jarekóva hendivekuéra. Tekotevẽterei ningo jajapo upéva koʼág̃ama voi, pórke pe jehasa asy guasúpe ñaikotevẽta ñane amigokuérare.

17. ¿Mbaʼéichapa Jeremías ohechauka vaʼekue haʼe hague peteĩ amígo teete umi tiémpo ijetuʼúvape?

¹⁷ Proféta Jeremías ohechauka vaʼekue haʼe hague peteĩ amígo teete umi tiémpo ijetuʼúvape.  Por ehémplo, Ébed-Mélec, peteĩ ofisiál palasiopegua, oguenohẽ vaʼekue Jeremíaspe peteĩ alhíve henyhẽvagui tujúgui, ha péicha Jeremías nomanói. Upe rire Ébed-Mélec opyta okyhyje umi prínsipe ojukárõ g̃uarã chupe. Jeremías oikuaárõ guare upéva, ndopytái ojapoʼỹre mbaʼeve ha ohaʼarõnte iñamígo osolusiona haʼeño upe situasión. Oĩramo jepe préso, Jeremías ojapo ikatumíva ha omokyreʼỹ iñamígo Ébed-Mélecpe. Haʼe oikuaauka iñamígope Jehová promésa okonsolátava chupe (Jer. 38:7-13; 39:15-18).

18. Ohechaukaháicha Proverbios 17:17, ¿mbaʼépa jajapo vaʼerã ñane ermáno ohasa asy jave?

¹⁸ Koʼág̃arupi ñane ermáno ha ermanakuéra ohasa heta mbaʼe ijetuʼúvare. Por ehémplo, heta oĩ ohasa asýva oĩ rupi inundasión, terremóto ha umícha, térã katu oĩ rupi gérra. Umícha jave algúno ikatu orresivi koʼã ermánope hógape ha ótro ikatu hína omeʼẽ pláta oñepytyvõ hag̃ua chupekuéra. Péro enterovéva ikatu jajapo álgo: Ñañemboʼe Jehovápe oipytyvõ hag̃ua koʼã ermánope. Jaikuaáramo peteĩ ermáno térã ermána oñedesanima hague, ikatu hína ndajaikuaái mbaʼépa jaʼéta térã jajapóta. Péro enterove ikatu hína tuicha ñaipytyvõ chupe. Por ehémplo, ikatu jahasa tiémpo hendive, ñahendu chupe oñeʼẽ jave ñandéve ha ñakomparti hendive peteĩ téxto ñandéve ñandegustáva ha ñanekonsoláva (Is. 50:4). La iñimportantevéva hína ñaime ñane amigokuéra ykére oikotevẽ jave ñanderehe (elee Proverbios 17:17).

19. ¿Mbaʼéichapa ñanepytyvõta amo gotyove koʼág̃ama voi ñamombaretéramo pe amista jarekóva ñane ermanokuérandi?

¹⁹ Jajedesidi vaʼerã koʼág̃a ñañeamiga ñane ermanokuérare ha ñamombarete pe amista jarekóva hendivekuéra. ¿Mbaʼérepa? Pórke ñane enemigokuéra omosarambíta heta japu ikatu hag̃uáicha ñandedividi, ñanemoĩséta oñokóntrape ha oñehaʼãta anivéma hag̃ua jajerovia ojuehe. Péro nosẽmoʼãi hikuái ijidéape. Ñande jasegíta jahayhu ñane ermanokuérape ha haʼekuéra ndaikatumoʼãi ojoko upéva. Tahaʼe haʼéva la ojapóva hikuái ndaikatumoʼãi ohundi pe amista jarekóva. Añetehápe, pe amista jarekóva ñane ermanokuérandi ndopamoʼãi og̃uahẽ vove pe fin, síno osegíta pára siémpre.