TULUN-AN NGA ARTIKULO 44
Pabakuron Naton ang Aton Pag-abyanay Antes Mag-abot ang Katapusan
“Ang matuod nga abyan nagahigugma sa tanan nga tion.”—HULU. 17:17.
AMBAHANON 101 Pag-alagad nga May Paghiusa
ANG BINAGBINAGON SA SINI NGA ARTIKULO *
Kinahanglan naton ang maayo nga mga abyan sa tion sang “dakung kapipit-an” (Tan-awa ang parapo 2) *
1-2. Suno sa 1 Pedro 4:7, 8, ano ang makabulig sa aton para mabatas ang grabe nga mga kabudlayan?
MALAPIT na matapos ang “katapusan nga mga adlaw,” gani mahimo kita makaeksperiensia sang grabe nga mga kabudlayan. (2 Tim. 3:1) Halimbawa, pagkatapos sang eleksion sa isa ka pungsod sa Africa, madamo ang mga nagprotesta kag nag-ilinaway. Nagdugay ini sing sobra anom ka bulan gani nangin delikado gid ang kahimtangan sang aton mga kauturan. Paano nila nabatas ini nga kabudlayan? Ang iban nagsaylo anay sa balay sang mga kauturan nga nagaistar sa lugar nga indi apektado sang inaway. Ang isa ka brother nagsiling: “Maayo gid kay upod ko ang akon mga abyan. Napalig-on namon ang isa kag isa.”
2 Kon mag-abot na ang “dakung kapipit-an,” malipay gid kita kon may maayo kita nga mga abyan nga nagapalangga sa aton. (Bug. 7:14) Gani subong pa lang, dapat na naton pabakuron ang aton pag-abyanay. (Basaha ang 1 Pedro 4:7, 8.) Madamo kita sing matun-an sa halimbawa ni Jeremias, nga ginbuligan sang iya suod nga mga abyan nga makalampuwas antes ginlaglag ang Jerusalem. * Paano naton mailog si Jeremias?
ILUGA ANG HALIMBAWA NI JEREMIAS
3. (a) Ano ang puede irason ni Jeremias nga mag-untat sa pagpakig-upod sa iban? (b) Ano ang ginsugid ni Jeremias sa iya sekretaryo nga si Baruc, kag ano ang resulta sini?
3 Mga 40 ka tuig ukon sobra pa nga nakaupod ni Jeremias ang indi mainunungon nga katawhan. Nalakip sa sini ang iya mga kaingod kag mahimo ang pila niya ka paryente sa ila banwa sa Anatot. (Jer. 11:21; 12:6) Pero wala sia nag-untat sa pagpakig-upod sa ila. Ginsugid pa gani niya ang iya mga kabalaka sa iya mainunungon nga sekretaryo nga si Baruc. Nahibaluan man naton ini nga mga kabalaka kay mabasa naton ini sa Biblia. (Jer. 8:21; 9:1; 20:14-18; 45:1) Natun-an nanday Baruc kag Jeremias nga palanggaon kag respetuhon ang isa kag isa samtang ginasulat ni Baruc ang tanan nga natabo kay Jeremias.—Jer. 20:1, 2; 26:7-11.
4. Ano ang ginsugo ni Jehova kay Jeremias, kag paano ini nga asaynment nagpabakod sang pag-abyanay nanday Jeremias kag Baruc?
4 Sa sulod sang madamo nga tuig, maisog nga ginpaandaman ni Jeremias ang mga Israelinhon parte sa matabo nga kalaglagan sa Jerusalem. (Jer. 25:3) Para mabuligan pa gid ang mga tawo nga maghinulsol, ginsugo ni Jehova si Jeremias nga isulat sa isa ka linukot ang Iya mga paandam. (Jer. 36:1-4) Samtang nagabuligay sanday Jeremias kag Baruc sa paghimo sang asaynment nga ginhatag sa ila sang Dios, nga mahimo nagdugay sing pila ka bulan, sigurado gid nga nagapalig-unanay sila.
5. Paano napamatud-an ni Baruc nga maayo sia nga abyan ni Jeremias?
5 Sang nasulatan na ang linukot, ginsugo ni Jeremias ang iya abyan nga si Baruc nga isugid sa mga tawo ang mensahe sini. (Jer. 36:5, 6) Maisugon nga ginhimo ni Baruc ang iya asaynment bisan pa delikado ini. Mahimo nga nalipay gid si Jeremias kay Baruc sang nagkadto si Baruc sa templo para basahon sa katawhan ang nakasulat sa linukot. (Jer. 36:8-10) Nahibaluan sang mga prinsipe sang Juda kon ano ang ginhimo ni Baruc, kag ginsugo nila sia nga basahon sa ila sing mabaskog ang nakasulat sa linukot. (Jer. 36:14, 15) Ginsugid sang mga prinsipe kay Hari Jehoiakim kon ano ang ginsiling ni Jeremias. Mainayuhon nga ginsilingan nila si Baruc: “Magpanago kamo ni Jeremias, kag indi gid kamo manugid kon diin kamo.” (Jer. 36:16-19) Maayo gid yadto nga laygay!
6. Ano ang ginhimo nanday Jeremias kag Baruc sang ginpamatukan sila?
6 Naakig gid si Hari Jehoiakim sang nabatian niya ang mga ginpasulat ni Jeremias, gani ginsunog niya ang linukot kag ginsugo niya nga dakpon sanday Jeremias kag Baruc. Pero wala nahadlok si Jeremias. Nagkuha sia sang isa pa ka linukot, ginhatag ini kay Baruc, kag gindikta niya kay Baruc ang mensahe ni Jehova. Ginsulat ni Baruc ‘ang tanan nga pulong nga nasulat sa linukot nga ginsunog ni Hari Jehoiakim sang Juda.’—Jer. 36:26-28, 32.
7. Ano ang mahimo nga natabo sang nagbuligay sanday Jeremias kag Baruc?
7 Masami nga nagasuod ang pag-abyanay sang mga tawo kon nabatas nila ang mga kabudlayan nga magkaupod. Gani samtang nagabuligay sanday Jeremias kag Baruc nga islan ang linukot nga ginsunog sang malaut nga si Hari Jehoiakim, mahimo nga mas nakilala nila ang isa kag isa kag nangin mas suod pa gid sila nga mag-abyan. Ano ang mabulig sa aton sang halimbawa sining duha ka matutom nga lalaki?
ISUGID SA IMO MGA ABYAN ANG IMO GINAHUNAHUNA KAG GINABATYAG
8. Ano ang mahimo nga magpugong sa aton nga makigsuod sa iban, kag ngaa indi kita dapat mag-untat sa pagtinguha nga mangin suod sa iban?
8 Kon may ginhimo ang aton abyan sang una nga nagpalain sang aton buot, basi nabudlayan na kita nga isugid sa iban ang aton ginabatyag. (Hulu. 18:19, 24) Ukon basi nagabatyag kita nga wala na kita sang tion kag kusog nga makigsuod sa iban. Pero indi kita dapat mag-untat sa pagtinguha nga mangin suod sa iban. Kon gusto naton nga unungan kita sang aton mga kauturan sa tion sang mga kabudlayan, dapat subong pa lang pabakuron na naton ang aton pagpakig-abyan sa ila. Ang isa ka importante nga paagi nga mahimo naton ini amo ang pagsugid sa ila sang aton ginahunahuna kag ginabatyag, kag dapat naton sila saligan.—1 Ped. 1:22.
9. (a) Paano ginpakita ni Jesus nga ginsaligan niya ang iya mga abyan? (b) Paano ang pagsugid sang imo ginahunahuna kag ginabatyag sa imo abyan makapabakod sang inyo pag-abyanay? Maghatag sing halimbawa.
9 Ginsaligan ni Jesus ang iya mga abyan kag ginpakita niya ini paagi sa pagpakig-istorya sa ila sing tampad kag wala sia sing may gintago sa ila. (Juan 15:15) Mailog naton ang iya halimbawa paagi sa pagsugid sa aton mga abyan sang aton ginabatyag kon nalipay kita, nasubuan, ukon nabalaka. Pamatii sing maayo kon may nagapakig-istorya sa imo, kag mahimo nga matalupangdan mo nga madamo sang iya ginahunahuna, ginabatyag, kag tulumuron ang pareho man sa imo. Binagbinaga ang halimbawa sang 29 anyos nga si Cindy. Nagpakig-abyan sia kay Marie-Louise nga isa ka 67 anyos nga payunir. Nagaupdanay sanday Cindy kag Marie-Louise sa pagbantala kada Huebes sang aga, kag madamo gid sila sang maistoryahan. Si Cindy nagsiling, “Nalipay gid ako nga magpakig-istorya sa akon mga abyan parte sa importante nga mga butang, kay mas makilala ko pa gid sila.” Pareho kay Cindy, kon ginasugid mo sa imo mga abyan ang imo ginahunahuna kag ginabatyag, kag kon ginapamatian mo man sila, mangin mabakod ang inyo pag-abyanay.—Hulu. 27:9.
MAGBULIGAY
Ang maayo nga mga abyan nagabuligay sa ministeryo (Tan-awa ang parapo 10)
10. Suno sa Hulubaton 27:17, ano ang mangin resulta kon magbuligay kita sang aton mga kauturan?
10 Pareho sa natabo kanday Jeremias kag Baruc, kon magbuligay kita sang aton mga kauturan kag makita naton ang ila maayo nga mga kinaiya, makatuon kita sa ila kag mangin suod kita sa ila. (Basaha ang Hulubaton 27:17.) Halimbawa, kon ara kamo sa ministeryo, ano ang mabatyagan mo kon mabatian mo ang imo abyan nga maisugon nga ginapaathag ang iya mga ginatuuhan ukon sinsero nga ginasugid ang iya pagsalig kay Jehova kag sa iya mga katuyuan? Mahimo nga gusto mo magsuod pa gid sa iya.
11-12. Maghatag sing halimbawa kon paano ang pagbuligay sa ministeryo makapabakod sang aton pag-abyanay.
11 Binagbinaga ang duha ka eksperiensia nga nagapakita kon paano ang pagbuligay sa ministeryo makapabakod pa gid sa pag-abyanay. Si Adeline, nga 23 anyos, nagpangabay sa iya abyan nga si Candice nga updan sia nga magbantala sa teritoryo nga talagsa lang mabantalaan. “Gusto namon nga mangin mas makugi sa pagbantala kag mangin mas malipayon sa amon ministeryo,” siling niya. “Gusto namon nga maglig-on ang amon espirituwalidad.” Paano sila nakabenepisyo sa pagbuligay sa ministeryo? “Pagkatapos sang kada adlaw,” siling ni Adeline, “ginaistoryahan namon kon ano ang amon ginabatyag, ang amon makapalig-on nga eksperiensia sa pagbantala, kag kon paano kami gingiyahan ni Jehova sa amon ministeryo. Nalipay gid kami sa sini nga mga pag-istoryahanay kag mas nakilala pa gid namon ang isa kag isa.”
12 Ang duha ka dalaga nga sister sa France nga sanday Laïla kag Marianne nagbantala sing lima ka semana sa Bangui, ang kapital sang Central African Republic. Si Laïla nagsiling: “Bisan may mga problema kami ni Marianne nga naeksperiensiahan, mas nagbakod ang amon pag-abyanay bangod ginaistoryahan namon ini sing maayo kag bangod palangga gid namon ang isa kag isa. Natalupangdan ko nga maayo si Marianne mag-adjust sa bag-o nga mga kahimtangan, palangga niya ang mga tawo sa teritoryo, kag makugi gid sia sa ministeryo. Bangod sini, mas ginrespeto ko sia.” Indi kinahanglan nga magsaylo ka gid sa iban nga pungsod para maeksperiensiahan man ini nga mga benepisyo. Sa kada tion nga nagabantala ka sa inyo teritoryo upod ang isa ka utod, may kahigayunan ka nga mas makilala pa gid sia kag mapabakod ang inyo pag-abyanay.
MAGPOKUS SA MAAYO NGA MGA KINAIYA, KAG MANGIN HANDA SA PAGPATAWAD
13. Kon pirme kita nagaupod sa aton mga abyan, ano ang mahimo naton matalupangdan?
13 Kon pirme kita nagaupod sa aton mga abyan, matalupangdan naton indi lang ang ila maayo nga mga kinaiya kundi pati man ang ila mga kaluyahon. Paano naton mahuptan nga mabakod ang aton pag-abyanay bisan may mga kaluyahon ang aton mga abyan? Binagbinagon naton liwat ang halimbawa ni Jeremias. Ano ang nakabulig sa iya nga makita ang maayo nga mga kinaiya sang iya mga abyan kag mapatawad sila sa ila mga sala?
14. Ano ang natun-an ni Jeremias parte kay Jehova, kag paano ini nakabulig sa iya?
14 Ginsulat ni Jeremias ang libro sang Jeremias, kag mahimo gid nga sia man ang nagsulat sang mga libro sang Biblia nga Nahaunang Hari kag Ikaduhang Hari. Sigurado gid nga ang iya asaynment nagbulig sa iya nga makita kon ano kadaku ang kaluoy ni Jehova para sa indi perpekto nga mga tawo. Halimbawa, nahibaluan niya nga sang naghinulsol si Hari Ahab sa iya malain nga mga buhat, nagsiling si Jehova nga indi niya pagpahanabuon ang kalaglagan sang iya bug-os nga panimalay sa panahon niya. (1 Hari 21:27-29) Nahibaluan man ni Jeremias nga mas grabe ang nahimo ni Manases nga sala batok kay Jehova sangsa nahimo ni Ahab. Pero ginpatawad ni Jehova si Manases kay naghinulsol sia. (2 Hari 21:16, 17; 2 Cron. 33:10-13) Ini nga mga kasaysayan nagbulig kay Jeremias nga ilugon ang Dios. Nangin mapinasensiahon man sia kag maluluy-on sa iya pagpakig-angot sa iya suod nga mga abyan.—Sal. 103:8, 9.
15. Paano gin-ilog ni Jeremias ang pagkamapinasensiahon ni Jehova sang nadula ni Baruc ang iya pokus sa iya asaynment?
15 Binagbinaga kon paano ginbuligan ni Jeremias si Baruc sang temporaryo nga nadula niya ang iya pokus sa iya asaynment. Wala dayon ginhunahuna ni Jeremias nga indi na magbag-o si Baruc. Ginbuligan sia ni Jeremias paagi sa pagsugid sa iya sang mainayuhon pero prangka nga laygay sang Dios. (Jer. 45:1-5) Ano ang matun-an naton sa sini?
Ang maayo nga mga abyan nagapatawaray sing kinabubut-on (Tan-awa ang parapo 16)
16. Suno sa Hulubaton 17:9, ano ang dapat naton himuon para indi maguba ang aton pag-abyanay?
16 Indi paghunahunaa nga indi makasala ang aton mga kauturan. Gani, kon nangin suod na naton sila nga mga abyan, kinahanglan naton magpanikasog para indi maguba ang aton pag-abyanay. Kon nakahimo sang sala ang aton mga abyan, mahimo nga dapat naton sila hatagan sing mainayuhon pero prangka nga laygay nga nabase sa Pulong sang Dios. (Sal. 141:5) Kag kon may nahimo sila nga nagpalain sang aton buot, dapat naton sila patawaron. Kon napatawad na naton sila, dapat naton likawan nga ungkaton ang ila sala ukon iistorya ini sa iban. (Basaha ang Hulubaton 17:9.) Sa sining makahalanguyos nga mga tion, dapat kita magpokus sa maayo nga mga kinaiya sang aton mga kauturan, indi sa ila mga kaluyahon! Kon himuon naton ini, mapabakod naton ang aton pag-abyanay. Importante gid nga himuon naton ini subong bangod kinahanglan naton ang aton suod nga mga abyan kon mag-abot na ang dakung kapipit-an.
MANGIN MAINUNUNGON SA IMO GUGMA
17. Paano ginpamatud-an ni Jeremias nga matuod sia nga abyan sa tion sang mga kabudlayan?
17 Ginpamatud-an ni Jeremias nga matuod sia nga abyan sa tion sang mga kabudlayan. Halimbawa, sang ginbutang sia sa lunangon nga bubon, ginluwas sia ni Ebed-melec nga isa ka opisyal sang palasyo. Hinadlukan si Ebed-melec kay basi silutan sia sang mga prinsipe. Sang nabal-an ini ni Jeremias, wala sia naghipos lang. Wala man sia naghunahuna nga masarangan sang iya abyan ang iya problema kag indi na kinahanglan sang bulig. Bisan pa napriso si Jeremias, ginpalig-on niya ang iya abyan nga si Ebed-melec paagi sa pagsugid sa iya sang makapalugpay nga saad ni Jehova.—Jer. 38:7-13; 39:15-18.
Ang maayo nga mga abyan nagabulig sa ila mga kauturan nga nabudlayan (Tan-awa ang parapo 18)
18. Suno sa Hulubaton 17:17, ano ang dapat naton himuon kon may abyan kita nga nabudlayan?
18 Subong, madamo kag lainlain ang mga kabudlayan sang aton mga kauturan. Madamo ang nahalitan sang mga bagyo, linog, kag baha, kag madamo man ang nagaantos bangod sang inaway, terorismo, kag iban pa. Kon matabo ini, mahimo ang pila sa aton may ikasarang nga paistaron anay ini nga mga kauturan sa aton puluy-an. Mahimo ang iban makabulig paagi sa pag-amot. Pero tanan kita makapangabay kay Jehova nga buligan niya ang aton mga kauturan. Kon nahibaluan naton nga nagluya ang buot sang isa ka utod, mahimo indi kita kabalo sang aton himuon ukon ihambal sa iya. Pero tanan kita makabulig. Halimbawa, puede kita makahatag sing tion para makaupod ang aton abyan. Mamati kita sing mainayuhon samtang nagaistorya sia. Kag mahimo kita magpaambit sa iya sang aton paborito nga teksto nga nakabulig sa aton. (Isa. 50:4) Ang importante, ara ka kon kinahanglan ka sang imo mga abyan.—Basaha ang Hulubaton 17:17.
19. Paano makabulig sa aton sa palaabuton ang aton mabakod nga pag-abyanay?
19 Mangin determinado kita subong nga mangin suod sa aton mga kauturan kag pabakuron ang aton pag-abyanay. Ngaa? Bangod tinguhaan sang aton mga kaaway nga gub-on ang aton paghiusa paagi sa pagpalapta sang mga kabutigan kag sala nga impormasyon. Tinguhaan nila nga madula ang aton pagsalig sa isa kag isa, kag indi na kita magbuligay. Pero indi gid sila magmadinalag-on. Indi nila kita mapunggan nga palanggaon ang aton mga kauturan. Indi gid nila maguba ang aton pag-abyanay. Ang matuod, ang aton pag-abyanay indi lang magalawig asta sa katapusan sang sini nga sistema. Ang aton pag-abyanay wala sing katapusan!
AMBAHANON 24 Mataklad Kita sa Bukid ni Jehova
^ par. 5 Bangod malapit na ang katapusan, dapat naton tanan pabakuron ang aton kaangtanan sa aton mga kauturan. Sa sini nga artikulo, binagbinagon naton kon ano ang aton matun-an sa halimbawa ni Jeremias. Binagbinagon man naton kon paano ang aton suod nga pag-abyanay makabulig sa aton sa tion sang mga kabudlayan.
^ par. 2 Ang mga hitabo nga nasulat sa libro sang Jeremias wala napasunod suno sa petsa.
^ par. 57 MGA PIKTYUR: Ginapakita sang sini nga piktyur ang posible nga matabo sa palaabuton sa tion sang “dakung kapipit-an.” Pila sa aton mga kauturan ang nagapanago sa balay sang isa ka utod. Bangod mag-abyanay sila tanan, malugpayan nila ang isa kag isa. Ginapakita sang masunod nga tatlo ka piktyur nga ginpabakod sini nga mga kauturan ang ila pag-abyanay antes pa magsugod ang dakung kapipit-an.
